رواية زواج من أجل التحليل
الفصل السادس 6
بقلم ريري
نزلت وهو نزل وجاب معاهو الحاجات فتح الباب ودخلنا بيت م كبير غرفتين ومطبخ وهول وصالون مفصول براهو معاهو حمامات
عماد: البيت بيتك اخدي راحتك ومعليش م جبت ليك شيلة ولا حاجه بس بديك تشتري هدوم لانو شفتي الوضع كان كيف
هبة: عادي ولا يهمك كنت واقفة وهو دخل غرفة وجا طالعه شايل بجامه بتاعت اولاد في يدو
برمود نص وفنيلة نص كم برضو
عماد: البسي ديل لحدي م نشتري ليك هدوم غيري وتعالي عايزك في موضوع طويل
دخلت غيرت وغسلت وشي بس وجيت طالعه لقيتو ختا الاكل وقعدنا ناكل وشربنا بعدها البيبسي رفعت راسي لقيتو بعاين لي واتكلم
عماد: عرسنا حصل سريع زي م شفتي احمد طليقك هو السبب في اني اعرسك المفروض اعرسك 5 شهور وبعدها اطلقك وهو يجي يعرسك تاني واتفق مع ابوك علي الكلام دا وسكت
كنت مصدومة يعني م صدقت خلصت منو وحمدت الله علي انو طلع من حياتي بس هو مصر يرجعني ليهو والقرف الكنت عايشة فيهو لقيت دموعي بتجري براها وم قادرة اتكلم بس البحصل دا حرام ابوي كيف يوافق علي حاجه زي دي معقولة القروش عمتو قدر دا صحيت علي يد بتمسح دموعي لقيتو دا عماد بمسح فيهم واتكلم معاي
عماد: هبة م تبكي عليك الله انا م عرستك عشان احللك لي احمد عرستك لانو انا عايز انقذك منو لانو احمد دا واحد قذر وبسببو انا خسرت اكتر زولة كانت مهمة في حياتي من الليله م تخافي انتي في حماية راجل واي حاجه عايزاها انا مسؤول منها واصلا زي م شايفة م عندي زول ربتني خالتي امي ماتت يوم ولدتني وابوي بعدها بي سنه يعني انا وحيد وم عندي زول غير خالتي لانو اهل ابوي علاقتي معاهم م تمام واكيد لحظتي عشان كدا انا سندك وانتي سندي وانا م عايز منك شي وح اخليك علي راحتك لمن تتعودي علي تمام
هبة: يعني م ح تتطلقني لي احمد
عماد: لا والله ابقي م راجل لو عملتها
هبة: شكرا ليك
عماد: ولو اكيد تعبانة قومي ارتاحي
قمت دخلت الغرفة الوصفة لي عماد ملصت التوب هدوم عماد كبيرة شوية فيني بس ماشي الحال ابتسمت لانو م حصل لبست هدوم اولاد فكرة لو عماد دا كان واحد واطي واحمد اغرهو بي القروش كان حصل لي شنو اكيد كنت ح اموت اف عاينت لي الغرفة كانت بسيطة بس و م فيها عفش كتير بس حسيت براحة مبالغة صليت العشاء ونومت ولي اول مرة انوم من غير م ابكي
قاعد في الصالة محتار ح انوم وين اصلا الغرفة التانية م فيها عفش والهول في طقم جلوس وباقيهو فاضي وغرفتي نايمة فيههبة واصلا فيها سريرين ودولاب ضلفتين وكرسين بس اكيد م ح ترتاح وانا موجود معاها في الغرفة ي الله. م كنت مهتمي بالحاجات دي عشان كدا م اشتريت واصلا م قاعد في البيت كتير كلو يوم عن واحد من اصحابي والمطبخ اصلا فاضي والبيت مخشن بس يعني حالة صعبة بس اعمل شنو انا م بفهم في الحاجات ح اخلي الامور دي لي هبة اكيد بتفهم فيها اتصلت لي معاذ كم مرة بس م ردا لي وبرضو عبدالرحيم م برد وعبدالله كلامو كتير م اتصلت ليهو عاينت لي نفسي انا لسه م غيرت هدومي والبت اكيد نامت اف عادي ياخ م هي مرتي قمت دخلت الغرفة كانت نايمة وشها فيهو كمية براء مبالغة وظاهر عليها تعبت في حياتها بس ان شاء الله اقدر اعوضها انا صاح عايز انتقم من احمد بس هي ضحية زيها زي زينب شلت غياري وطلعت من الغرفة دخلت الحمام استحميت واتوضيت وجيت صليت العشاء قعدت في الكنبة وبقيت اقلب في التلفون لحدي الساعه بقت 2 صباحا بقيت م قادر افتح عيوني وبكرا عندي يوم طويل عشان كدا لازم انو شفت اكبر كنبة ونومت فيها بس كانت ضيقة لانو انا طويل وعريض بقيت اتقلب قلبني النوم في النهاية لبست سفنجتي ودخلت الغرفة وطفيت النور وجيت طلعت في السرير الجنبها والجو كان بارد عندي بطانيتين شلت واحدة والتانية غطيت بيها هبة وبعد مسافة لقيت روحي نومت .