رواية لأجلها الفصل السادس والعشرون 26 بقلم احمد سيمبا
*كل الطرق تؤدي إليك حتى تلك التي سلكتها لنسيانك*
*"رزان"*
جينا داخلين البيت و ملامح الزعل ظاهرة في وش مجتبى .. لقينا عمي و عمتي منتظرننا في الحوش من شافونا فرحو و قامو وقفو ..عمي قال ل مجتبى اها ي ولدي ، بنيتي كيف! ..مجتبى عاين ليو وم رد ومشى اخد المفتاح و ساق الأولاد و مشى البيت ..عمتي فهمت وقعدت في السرير بتبكي ، أما عمي فكان لسه مُصر وبسألني من ميرا ..ابتسمت وقلت ليو كويسة ي عمي ..قال لي و بنيتها؟ ..مشيت قعدتو و قعدت جنبو وقلت ليو كويسة برضو الحمدلله ..قال لي ألف حمد و شكر ، م سألت مني! ..كان بسألني بحماس م قدرت أكسر خاطرو و أقول ليو لأ ، وم قدرت أكذب و أقول اي وبقيت أعاين ليو ..عمتي قالت ليو ي محمد الموضوع واضح ، بتك لا سألت منك ولا عايزة تسأل اصلا! ..عاين ليها و قال ليها لا لا بنيتي وأنا بعرفا ، دي من لحمي و دمي و أنا بعرفا بتكون سألت مني صاح ي بتي؟ ..و رجع عاين لي ، بسرعة غيرت الموضوع ..وقلت ليو عمي ، أنت بلعت حبوبك؟ ..قال لي لا لا ..قمت و مشيت جبتها ليو وقلت ليو هاك ابلعها ..و اديتو الأدوية وهو لسه بسألني وأنا متجاهلة اسألتو ، لحدي م قلت ليو إني لازم أمشي و قمت عايزة أمشي ..جات مايا وقفت قدامي وقالت لي بتي كيف! ..قلت ليها علييك الله م تقديني بت شنو كمان!! ..قالت لي بتي!! ، بتي العند ميرا! ..قلت ليها قصدك ال رمتيها ل ميرا!! ..قالت لي أنتي ليه م حاسة بي!! ..قلت ليها هو أنتي عندك إحساس لمن أنا أحس بيك!!! ، ي بت الناس أنتي خليتي البت في اللفة هسي جاية بتي بتي!! ، لأ يعني هسي أنتي متخيلة إنو ميرا ح تديك ليها!! ، خليك من تديك ليها ، متخيلة إنها ممكن تخليك تشوفيها!!! ، مايا لا إله إلا الله اخيير ليك تتلمي وم تدخلينا في مشاكل مع ميرا لأنو هي من الأول ناوية ليك ومنتظراك على شعرة ، هسي تمشي تنخسيها تطلع عينك و تريحنا منك!! ..قالت لي أنا المرة دي ما ح أسكت ، بأي طريقة أنا ح اشيل بتي!! ..كان نفسي ألصق ليها كف يخليها تفوق من الوهم ال هي فيو لكن اتراجعت ..وقلت ليها اعملي البريحك! ..و مشيت خليتا ، أنا متأكدة إنو البت المتخلفة دي ح تعمل ليها موضوع جديد ، و وقتا ميرا ح تطلع فيها حق ال 8 سنين الفاتو وأنا م بحجزها ، بظروفا! ..دخلت البيت لقيت الأولاد نايمين ، و مجتبى قاعد متمحن في الكرسي ، ختيت شنطتي في السرير ومشيت قعدت جنبو ..وقلت ليو مالك؟ ..قال لي تفتكري ح تسامحني؟ ..قلت ليو ااي ، في النهاية أنت اخوها الوحيد وم عندها غيرك ..عاين لي وقال لي بعد العملتو فيها؟ ..قلت ليو م أنت م كنت عارف الحقيقة ..قال لي بتبرري لي!؟ ..قلت ليو م دي الحقيقة فعلاً ، أنت م صدقتها لأنو.. ..قاطعني وقال لي دي المشكلة زاتا ، إنو أنا م صدقتها! ، ميرا بتكره حاجتين في الدنيا دي ، إنو زول يجرح كبريائها و إنو يطلعوها كذابة ، وأنا بفلاحتي عملتهم الاتنين ، ما ح تسامحني أنا عارف! ..قلت ليو م تقول كده ، أنا ح أتكلم معاها! ..قال لي لا لا خليها ، لو اتكلمتي ح تقطعها معاك ..قلت ليو أنت مدام بتعرفا كده ، ليه كذبتها؟ ..مسح وشو وقال لي لأنو م كنت متخيل إنو مايا تعمل حاجة زي دي ، لأنو هي شافعة يعني وم بتطلع من البيت إلا نادراً ، وللصراحة للان م قادر أصدق إنو هي عملت كده! ..اتنهدت وقلت ليو حسبي الله ونعم الوكيل فيها ، ربنا يهديها ..قال لي دي!! ، دي كل يوم زايدة زيادة م أظنها تتهدي زاتو!! ..قلت ليو استغفر الله ي مجتبى ليه بتقول كده! ..قال لي لا لا لا ، البت دي ابليسة! ، بتحب الفتن والكذب زي عيونا! ..قلت ليو قول الله يهديها بس ..قال لي على قولك الله يهديها بس ..كنت عايزة اكلموا إنها مُصرة تشيل بتها ، تاني سكت عشان م يمشي يعمل معاها مشاكل باقي الليل ده ..وقلت ليو خليك من الهموم ، قوم غسل يدك وصحي الأولاد مسافة اجهز العشا ..قال لي الأولاد قالو اكلو ..قلت ليو وين؟ ..قال لي في المستشفى ، من قبيل بحكو لي إنو ميرا اشترت ليهم سندوتشات و عصير ..قلت ليو خلاص قوم أنت غسل يدك ..قال لي م عندي نفس ي رزان ، م تختي لي أي شي!! ..قبل م ارد ليو ، قام طلع و رقد في الحوش ، أنا م عارفة إذا كانت رجعة ميرا خير علينا ولا لأ ، لكن الشي العرفتو إنو لو م اتصالحو في أقرب فرصة ، إحساس الذنب بس ح يقتلهم كلهم ...
*"ميرا"*
فتحت عيني و عاينت للدرب لقيتو قرب يخلص ، قمت قعدت و اخدت تلفوني عاينت للساعة لقيتا ماشة ل خمسة صباحاً ..قمت اتوضيت و ناديت الممرضة ركبت ليها درب تاني ، عايزة ابدا أصلي ، مازن وقفني ..اتلفت عاينت ليو وقلت ليو مالك؟ ..قال لي دقايق اتوضا ونصلي سوا ..قلت ليو طيب ..انتظرتو مشى اتوضأ وجا وقف قدامي وبقى يصلي بي ، كان صوت تلاتو دنيا تانية ، م بتذكر إنو صوتو كان حلو كده وقت كنت بعرفو ، حتى مخارج الحروف أتعلم ينطقها صاح وبالتجويد ، يعني بصراحة اتفاجأت ♡..بعد م سلمنا و دعينا ، و أنا متأكدة إنو كنا بندعي نفس الدعوة ، قام اتلفت علي ..وقال لي صوتي كيف؟ ..قلت ليو بصراحة صوتك بقى حلو شديد ..قال لي بعد مشيتي ، أنا دخلت خلوة واتعلمت الترتيل ..قلت ليو وختمت؟ ..قال لي الحمدلله ..قلت ليو الحمدلله ، و عقبالي كمان ..قال لي آمين يارب ..سكت شوية و قلت ليو حياتك اتحسنت بعد مشيت ، ختمت المصحف ، و اغتربت و خطبت بت حلاوة الدنيا فيها ، شكلي كنت العارض بتاعك ..قلتها بضحكة مع إنها وجعتني ..قال لي لأ ، عملت ده كله عشان أفي بوعودنا ، المفروض نكون ختمنا المصحف مع بعض ، والمفروض كمان نسافر إسبانيا مع بعض لأنك بتحبيها ..قلت ليو والخطبة؟ ..قال لي كنت عايز اتجاوزك ..حسيت بمرارة الكلمة في قلبي وقلت ليو طيب مبروك عليك ..قال لي لكن م اتجاوزتك ..قلت ليو أنت خاطب هسي ..قال لي و يعني شنو م بقدر افسخ خطوبتي؟! ..قلت ليو أنا م برتبط ب واحد كان خاطب أقرب صحبة لي و.. ..قاطعني وقال لي أنا متين قلت ليك نرتبط؟ ..اهاا اتورطت! ..نزلت عيوني وقلت ليو معنى كلامك كان كده ..قال لي لأ ، ده الشي الانتي عايزاه! ..عاينت ليو بسرعة وقلت ليو عاين ي مازن ، م تلعب لي بمشاعري!! ، حتى لو خليت خطيبتك برضو ما ح أرجع ليك! ..قال لي نفسي أعرف عملت ليك شنو أنا ، لمن بتعاقبيني كده!! ..عايزة اتكلم ، اتذكرت إني حلفت قسم ، ف اكتفيت بإني عاينت ليو وسكت ..قال لي مالك م بتردي؟ ..قلت ليو م عندي مزاج ارد ، بس خليك كده! ..قال لي هو شنو الخليك كده!! ، أنتي مشيتي برضاااك وخليتيني ، و أنا زي العوير جاري وراك من مكان ل مكان وأنتي بتصديني!! ..قلت ليو لأني م كنت عايزة أشوف زول!! ، خصوصاً أنت!! ، م كنت عايزاك تتورط معاي!! ..قال لي بنهرة أنا اشتكيت ليك؟!! ، أنا م قلت ليك إنو أي هم بنشيلو سوا!!! ، م راجل أنا!! م قدر كلمتي!! ..قلت ليو دي كانت مشكلتي أنا!! ، وم كنت عايزاك تدّخل عشان م يطلعو فيك إشاعات!! ، م كنت عايزة صورتك تتشوه قدام الناس!! ، م كنت عايزة إنو الناس يتكلمو فيك لأنو شافوك معاي!! ..قال لي مالك و مال الناس؟! ، أنا بقدر اسكتهم كلهم ، لو أنتي كان اديتيني فرصة بس م كنا وصلنا هنا! ، أنتي عملتي الفي راسك وقعدتي!! ..قلت ليو عشان كده أنت كمان عملت الفي راسك وقعدت! ..قال لي عملت شنو؟! ..قلت ليو ولا شي!! ..و قمت مشيت قعدت جنب تاليا ، و هو مشى قعد في السرير التاني وبحمر لي ..بعد م الواطة أصبحت شوية ، الدكتور جا فحص تاليا وغير ليها الشاش حتى كتب لينا خروج ..لبستها ملابسها و عايزة انزلها من السرير ..مازن قال لي خليها أنا بشيلا ..قلت ليو ح تمشي برجلينا! ..م رد لي و عايز يشيلا زحت يدو ..وقالت ليو بمشي براي ..و مسكت يدي نزلتها براحة وقفت ، مشت خطوة واحدة و وقفت ..وقالت لي ماما بتوجعني! ..قلت ليها معليش استحملي شوية ..و بقينا ماشين و هو ماشي جنبنا ، قام مسك يدها التانية ، عاينت ليو و جرت يدها منو بسرعة ..قام اتحرك بسرعة و مشى قدامنا ..عاينت ليها وقلت ليها ليه جريتي يدك؟ ..قالت لي لأنو هو راجل غريب! ..ابتسمت و سكت ، طلعنا برة لقينا مازن ركب عربيتو ..قلت ليو خليني اوصلك أحسن؟ ..قال لي شكراً بقدر اسوق ..و دور عربيتو و مشى ، و نحنا ركبنا رجعنا البيت ..دخلت تاليا غرفتها و مشيت اتحممت و غيرت ملابسي و نضفت البيت و دخلت المطبخ عشان أعمل ليها شوربة ، تلفوني رنة وكانت فريال ..قلت ليها الو؟ ..قالت لي أنا و رزان جيناك المستشفى ، انتو في ياتو غرفة؟ ..قلت ليها خرجونا وحالياً في البيت ..قالت لي تمام ، جاية ..قفلت منها ، اتصلت ل عُمر اشوفو وصل وين ، جاني تلفونو خارج نطاق التغطية، قمت رسلت ليو بالواتس وقلت ليو وصلت وين؟ ..رد لي في نفس اللحظة وقال لي م قدرت أسافر الجو كعب ..قلت ليو خلاص م تستعجل وتتهور ، تاليا كويسة و خرجوها من المستشفى ..رسل لي "خليها ترسل لي ريكورد" ..رسلت ليو "تمام" ..و مشيت اديتا التلفون و رجعت كملت شغلي ..بعد خلصت ، اخدت الصينية و مشيت قعدت جنبها وبقيت أأكلها ..قلت ليها رسلتي ل عُمر؟ ..قالت لي ااي ، وقال بجي بكرة وبجيب لي معاه شكولاتات كتييرة ، وأنا ح اصورها و اغيظ بيها صحباتي ..ضحكت وقلت ليها ده همك؟ ..قالت لي عشان هي جنها تغيظني لو جابو ليها قلم رصاص بترفعو في الحالة! ..ضحكت وقلت ليها انتو جيل ، جنكم تلفونات ..قالت لي صحي ، تلفوني وينو؟ ..قلت ليها في شنطتك ، نسيناها في بيت رزان ..قالت لي ماما أنا عايزة تلفوني ..قلت ليها بتصل ل فريال تجيبو ..سكت كده ، فريال جات داخلة وقالت لينا السلام عليكم ..قلنا ليها وعليكم السلام ..طوالي جات رقدت في السرير جنب تاليا ، و تاليا بقت تعاين لي ..وقالت لي اها فريال جات! ..قلت ليها خلاص بمشي بجيبو بعدين ..قالت لي لا لا هسي! ، علييك الله ي ماما ، بليييز بليييييز! ، ده زي ولدي برضو ، ترضي حفيدك يكون بعيد من امو! ..فريال ضحكت وقالت لي ميرا قومي جيبي حفيدك ، قبل م امو تفتح بيت بكا ..قلت ل تاليا طيب كملي أكلك أول ..شالت مني الصينية وختتا في رجلينا وقالت لي باكل والله ..قلت ليها طيب ..عايزة أقوم قالت لي استني! ..قعدت ..قالت لي تعالي قريب ..قربت منها ، باست خدي مسافة وقالت لي دي رشوة عشان م تغيري رايك ..ضحكت و بوستها و طلعت ..في الطريق اتصلت ل رزان و قلت ليها أنا شوية كده جاياك عشان اخد تلفون بتي ، افتحي الباب ..قالت لي أنا كنت في بيت رؤى و هسي جاية عليك ، قربت من بيتك كمان ..قلت ليها طيب أنا كمان قربت من بيتك! ..قالت لي طيب عايني ، في نسخة من المفاتيح عند عمتي ، أمشي شيليهم وافتحي الباب ..م رديت و فصلت الخط ، كنت مترددة بين أرجع و لا أواصل ، م عندي طاقة اتناقش بيها مع أهلي و أخلاقي واصلة نخرتي و متأكدة لو مشيت ح أعمل مشكلة ، عشان كده فكرت أرجع البيت ، تاني غيرت رايي لأني اصلا وصلت الحلة فما ح أرجع بسببهم ح أمشي بس! ..وقفت قدام الباب و نزلت دقيتو ، فتحت لي وعد ..ومن شافتني حضنتني وقالت لي خالتوو ميراا ..قلت ليها وعودة الحلوة كيفك ..قالت لي كويسة ، تاليا كويسة؟ ..قلت ليها الحمدلله كوويسة ..فكتني وقالت لي ماما مافيشة! ..قلت ليها عارفة بس عايزة المفتاح من حبوبتك ..قالت لي طيب ..و جرت دخلت جوة ..شوية تاني جاتني راجعة وقالت لي حبوبة قالت ليك تعالي ..قلت ليها قولي ليها مستعجلة و عايزة المفتاح ..جرت تاني ، مسافة تجي أبوي جا وقف في الباب ، شكلو سمع صوتي ..قال لي م دايرة تسلمي على أبوك ..ربعت يديني واتلفت منو ..قال لي أنا والله ندمان ي بتي ، ندمان على العملتو فيك ، ندمان لأني ظلمتك ..عاينت ليو و عيوني مليانة دموع وقلت ليو ااي ي أبوي المفروض تحس بالندم بعد العملتو فيني! ..حسيت بيو اتصدم و سكت ، شوية جات أمي شايلة المفتاح ، مديت ليها يدي ..قالت لي ي بتي حني علينا شوية بس و اعفي لينا ..قلت ليها أنا لمن كنت ببكي ليكم هنا انتو حنيتو علي؟! ، لمن كنت بحنسك وبحلف ليك إنو م عندي دخل حنيتو علي؟! ، لمن ضربتيني ولعنتيني حنيتي علي؟! ، لمن أبوي البحبو والمفروض يكون سندي ، رماني في الشارع بكل القسوة الفي الدنيا و دعا علي بكل الأدعية البقدر عليها حنيتو علي؟! ، انتو م حنيتو علي ، انتو ظلمتوني و ربنا شاهد و الناس تشهد والظلم ده أنا ما ح أنسى طول عمري! ..و مشيت خليتهم ببكو وأنا ببكي أكتر منهم ، الكلام القلتو ليهم وجعني أكتر من م وجعهم ، دموعهم و نظراتهم المليانة ندم فتحت لي جروح قديمة وخلتني أنزف من أول و جديد ، لكن المرة دي م ح أبكي ، م بس الأنا قلبي ح يوجعني وما ح أقدر انوم الليل من الوجع ، كلهم ح يبكو معاي و ح يحسو بالانا حاسة بيو ..مشيت بيت رزان فتحتو و اخدت شنطة بتي و طلعت من الغرفة ، لقيت مايا واقفة في الحوش ..هي بالذات لمن اشوفا بحس إنو الدم بغلي في راسي لكن م عايزة اضارب معاها هسي ..قفلت الباب و عايزة اطلع مسكت يدي ..وقالت لي ميرا عايزة اتكلم معاك ..قلت ليها بصوت هادي فكيني ..فكتني وقالت لي أنا آسفة على الحصل فيك بسببي وبتمنى إنك تسامحيني ، أنا فعلا كنت بت أنانية و طايشة وغبية وم بعرف اتصرف ، لكن هسي كبرت وعقلت و اكتشفت إنو العملتو في حقك كان غلط وم كان مفروض أعمل كده ..عاينت ليها وقلت ليها خلصتي؟! بقدر امشي! ..قالت لي ميرا أنا كبرت هسي ، وفهمت معنى الكلام الكنتي بتقولي لي ، وفهمت معنى الأمومة وانو تكوني أم ، ميرا أنا عايزة اخد بتي! ..والله في اللحظة دي م حسيت بيدي إلا وهي مطبوعة في خدها ، ومسكتها خنقتها ولصقتها مع الحيطة و من الزعل عروقي كلها وقفت وهي من الخنقة م قادرة تصرخ ..قلت ليها أنتي قايلة نفسك منو؟!!! ، بكل عين قوية جاية تقولي لي عايزة بتي؟!!! ، والله ي مايا اوديك الترب اخيير ليك تتلمي وتختي دربي!!! ..م قدرت ترد لي و دموعا جارين مية مية وأنا كلمة بتي القالتا لي كانت بتحرقني بجوة ، بعد السنين دي جاية تقول لي بتي! ، بعد السنين دي جاية تشيلا مني!! والله بتحلم .. فجأة جا مجتبى داخل وقال لي بصرخة ي ميرا بتقتليها!! ..و جا بسرعة فكاها من يدي ، جات واقعة في الأرض و ماسكة رقبتها و ي الله بتاخد نفسها ..مجتبى قال لي جنيتي ، كنتي ح تقتليها!! ..قلت ليو م تموت كان عايزة تمووت!! ، ياخ كرهتني زااتو!!! بعد السنين دي جاية تقول لي بتي!! ، مايا لا إله إلا الله ، م تلعبي معاي!!! اخيير ليك م تلعبي معاي!! و تااني لو جبتي سيرة بتي بالغلط بدفنك حية! سامعة ولا م سامعة!! ..م ردت لي ، عايزة أمشي ليها ، مجتبى مسكني ..وقال لي خلااص ، ماف زول ح يقرب من بتك ..حمرت ليو و رجعت حمرت ليها حتى اخدت شنطة بتي و طلعت طوالي ..وصلت البيت وأنا شوية وح اتفجر ، جدعت شنطة تاليا في الكنبة وقعدت ماسكة راسي ، كانت كلمة بتي القالتا لي مايا بتنهش في دماغي ..أنا تقول لي عايزة بتي!! ، دي بتي أنا ، أنا وبس!! ..قاعدة غضبانة و بهز في رجلي ، جات رزان قعدت جنبي وقالت لي مالك؟ ..عاينت ليها وم رديت و رجعت عاينت قدامي ..قالت لي اتشاكلتي مع أهلك؟ ..قمت وقفت وقلت ليها يا ريت!! ، يا ريت لو اتشاكلت مع أهلي ي رزان!! ، دي مايا ، مايا عايزة تجنني!!!! ..قالت لي ميرا أعصابك ..قلت ليها أعصابي!!! ، أعصابي وين ي رزان ، أعصابي بااظت خلااص!! ، بعد العمر ده جاية تشيل مني بتي!!!؟ ، لأ و كمان مالية خشمها و بدون خجل قال عايزة اخد بتي!!! ، والله ي رزان لو جات جنبي ساي بطلع ب روحاا!!! ..كنت بكورك وبتكلم بيديني و ماشة و جاية في الصالة ..فريال جات طالعة وقالت لي بتجوطي مالك؟ ..قلت ليها مايا قالت عايزة تاخد تاليا مني!! ..قالت لي البت دي عواليق ولا شنو!! ..رزان قالت لينا براحة ي جماعة ، هسي تاليا بتسمعكم ..فريال قالت ليها نايمة ، هسي اديتا المسكن ونامت ..قلت ليها أنا عايزة اقطعهاا!! ، عايزة اكلها بسنوني ي رزان!!! ، والله لو قربت منها م برحمها و هدا كلمتكم!! ..رزان قالت لي طيب أنتي روقي شوية ، كلنا عارفين إنها ما ح تقدر تعمل حاجة ..قلت ليها اروق كيف و ب ياتو طريقة!! ..قامت حضنتني ، مسكتها و بقيت أبكي و ارجف وحيلي بقى م شايلني قعدت في الأرض ، فريال جاتني جارية قايلة اغمى علي ، لقتني واعية بس ببكي وك العادة هم بدو يبكو معاي ..فريال قالت لي تبكي عشاان دي!! ..قلت ليها على نفسي ي فريال ، ببكي على نفسي!! ..رزان مسحت لي دموعي وقالت لي م تبكي ، ماف سبب بخليك تبكي ، أنتي عاارفة إنو مايا م بتقدر تشيلا منك ..قلت ليها هي م بتقدر لكن تاليا لو عرفت بتمشي معاها ي رزان!! ، تاليا لو عرفت إني م أمها ح تخليني و تمشي لأمها الحقيقية و ده شي أنا م بقدر اتحملو ي جماعة م بقدر والله م بقدر! ..فريال قالت لي تمشي معاها عيونا كم!! والله لو مشت بمسكها من شعرها بجيبا!! ، أنتي طردوك من البيت بسبب منو م بسببها!! ، عرستي لشنو م عشانا!! اطلقتي لشنو م عشانا!!! اتمرمطي في الدنيا دي عشان منو مش عشانا!!! ، كنتي بتقدري تخليها و تمشي من أول لكن أنتي م خليتيها!! ، بعد العملتي ده كلو لو مشت مع مايا والله العظيم ي ميرا م اخليها لا هي لا أمها!! ..قلت ليها هي طفلة يااخ و م فاهمة شي ، و مايا لو لحنت الحقيقة هي ح تصدقا لأنو حتى لو كذبت قصتها ما ح اقدر اكذب حقيقة إني م أمها!!! ، أنا كل يوم عايشة في الخوف ده! ، إنو في أي لحظة تعرف و تخليني! ..رزان مسحت دموعا وقالت لي طيب كلميها أنتي! ..قلت ليها شنو؟ ..قالت لي كلميها ، احكي ليها الحصل بالتفصيل ، احكي ليها العملتو فيك مايا كلو ، خليها تعرف! ..فريال قالت لي ااي كلميها ..قلت ليهم هي صغيرة ما ح تفهمني! ..رزان قالت لي حاولي فهميها ، أنتي أمها و بتعرفيها ، اتصرفي و اشرحي ليها الحصل خليها تعرف منك أحسن من تعرف من مايا ..هزيت راسي وقلت ليها لأ ، أنا م بقدر اصدمها بالطريقة دي! ..رزان قالت لي ميرا أنتي لو م كلمتيها ، مايا ح تكلمها وح تطلعك غلطانة في نظرهاا ..مسحت دموعي وقلت ليها تلقاها وين! ، مجرد م تاليا تبقى كويسة شوية أنا ح اسوقا و أسافر بيها و تاني ما ح أرجع ..فريال قالت لي ده م حل!! ، أنتي متين بقيتي صعيفة كده؟! ، أنا طول عمري بعرفك قوية وم بتخافي من حاجة و بتحلي مشاكلك بسهولة ، كيف فجأة بقيتي ضعيفة زي ده!! ..قلت ليها لأني تعبت!! ، أي زول في الدنيا دي عندو حدود معينة لو وصلها ببقى مكسور و ضعيف و تعبان ، وأنا وصلت الحد ده ي فريال!! ، ااي أنا بعرف احل مشاكلي واتعامل معاها ، لكن تاليا م مشكلة ي فريال ، تاليا قطعة مني و سندي في الدنيا و مجرد التفكير إنو في زول عايز ياخدها مني أنا بالدّمر ، أنا م بالقوة الانتي شايفاها ، أنا بحاول ابقى قوية عشانا لكن هي لو مشت أنا ح أبقي قوية لمنو و لشنو اصلا ، أنا لمن أقول ليكم إنو هي شريان حياتي انتو بتفتكروني بهظر ، لكن أنا جادة ي فريال ، أنا لو شالو تاليا مني زي الشالو مني روحي!! ..حضنوني الاتنين و بقو يحاولو يهدوني ، لكن أنا م كنت قادرة اهدا ، كل الخوف الشايلة في قلبي اتحول ل دموع م قادرة اوقفها ..بعد سنين طويلة ياداب انهرت و بقيت م قادرة اسند طولي ، كل القوة و الشجاعة و العناد اختفو ، بس حاسة بخوف و وجع زي الكأني ح أموت هسي ، و ده كله بسبب جملة واحدة اتقالت لي من أكتر إنسانة بكرهها في حياتي ..فضلنا قاعدين قعدتنا دي تقريباً ساعة ، و رزان و فريال مرة يبكو معاي و مرة يحنسوني ، لحدي م تاليا جات طالعة ..مسحنا دموعنا سرعة و بقينا نعاين ليها ، المشكلة إنو هي زاتا جاتني بتبكي لكن لمن شافتنا سكتت ..قلت ليها مالك ي ماما؟ ..قالت لي أنتي ال مالك؟ ..قلت ليها مالي؟ ..قالت لي مالك بتبكي؟ ..قلت ليها م كنت ببكي ..قالت لي بتكذبي علي؟ ، أمشي شوفي وشك في المراية ..قلت ليها طيب ااي كنت ببكي ..قالت لي ليه؟ ، منو زعلك؟ ..وعاينت ل فريال و ل رزان وقالت ليهم منو فيكم الزعل أمي؟ ..ماف زول رد ، وأنا دموعي جارية براها ..عاينت لي وقالت لي لسه بتبكي؟ ، ماما بتبكي مالك؟! ، والله لو م سكتي أبكي معاك و أنتي عارفاني عبيطة لو بكيت م بسكت فما تبكي! ..م رديت و قمت دخلت الغرفة وقفلت الباب ، الليلة بالذات عايزة اطلع زعلي كلو في دموعي ، أي لحظة م بكيت فيها و حبست دمعتي طلعت الليلة ..سمعت صوت تاليا بتبكي برة و بتدق الباب ، و البنات بحنسوها عشان الجرح ..بكيت قدرتي جوة و بعد شبعت بكى ، مشيت غسلت وشي و قعدت شوية وفتحت الباب مشيت غرفتها ..لقيتا راقدة وبتبكي ، و فريال بتحنس فيها لمن شافتني قامت وقفت ..مشيت رقدت قدامها و مسحت ليها دموعا وقلت ليها مالا بتي الحلوة بتبكي؟ ..قالت لي أنتي ليه بتبكي؟ ..قلت ليها خايفة ..قالت لي من شنو؟ ..قلت ليها من إنك تمشي و تخليني ..قالت لي وهي بتتنهد عشان العملية؟ ..قلت ليها ااي ..قالت لي م أنا هدي كويسة الحمدلله ..قلت ليها برضو كل م أتذكر بخاف ، أنتي عارفة إنو عندي فوبيا من إني أفقدك ..ضمتني وقالت لي وأنا م ماشة أي مكان عندي كم ميرا أنا عشان اخليك! ..مسحت دمعتي النزلت غصباً عني وقلت ليها ربنا يطول في عمرك و يحفظك لي ي فرحتي ..قالت لي و يحفظك لي كمان ، و بعدين الدموع دي كلها عشاني ، أنا م بستاهل دموعك الغالية دي ولا في زول في الدنيا دي يستاهلها ، أنتي ميرا م أي زول كمان! ..ضحكت وقلت ليها حفظتي الكلام ده من وين؟ ..فكتني و قالت لي من فريال ، طوالي بتقولو لي ..عاينت ل فريال وقلت ليها علمتي بتي كسير التلج؟! ..قالت لي ي بت اسكتي ساي ، علمتها جنس حاجات ح تبهرك! ..قلت ليها كُر علي ، بقى عندي تو فريال! ..تاليا قالت لي لأ ، أنا مستحيل أشبه زول غيرك مش أنتي أمي! ..هنا فريال و رزان بقو يأشرو لي عشان اكلمها الحقيقة ، عاينت ليها كانت مبتسمة بعد وجع العملية الحاسة بيو ، مبتسمة في نص دموعا عشاني ولأنو مفتكرة أمها بتبكي بسبب وجعها ، فقررت تدسو مني ، مع إنها عارفة إني حاسة و عارفة إنها موجوعة ..اتجاهلت اشاراتهم وبقيت اتونس معاها ، لحدي م نامت وهي في حضني ..بعد مسافة كده قمت منها براحة و طلعنا برة ..بعد م قعدنا فريال قالت لي كان تكلميها! ..قلت ليها م هسي ..رزان قالت لي م تجرجري الموضوع ، مايا دي لو لقت فرصة بتكلمها و وقتا الخايفة منو ح يحصل ..قلت ليها أنا قلت ليكم إني م قاعدة هنا ، و كلها فترة وإن شاء الله ح أسافر و تاني لا تشوفا ولا تحلم بيها ..فريال قالت لي لو سألتيني ، احسن تكلميها ..قلت ليهم ممكن نقفل الموضوع ده بعد ده! ..رزان قالت لي خير! ..فريال قالت لي بالمناسبة أنا عايزة افسخ خطوبتي من مازن! ..أنا و رزان قلنا ليها بصوت واحد لشنو!!؟ ..قالت لينا بتجاهلني و بتبارد معاي و فوق ل ده كله غامض شديد يااخ ..حيرتني لأنو مازن زي المراية الفي قلبو على لسانو ، م بكذب ولا بجامل نهائيا و كمان لسانو حلو في الكلام ، فكيف غامض و بارد! ..قلت ليها كيف يعني؟ ..قالت لي يعني كل م أقول ليو حاجة بمشيني ب تمام أو كويس ، و أي شي م فارق معاه مهما عملت بكون م عليو ، يعني لو بطلت اتصل ليو سنة بكون عندو عادي ، وجودي و عدمي واحد عندو! ، وكمان م بحكي لي أي شي وأنا غير إسم أبو م بعرف عنو أي شي ، لا اخواتو لا اخوانو لا حياتو ولا يحزنون ، وكمان لمن اسألو عن حاجة ، مثلاً زي قصة خنقك ولا م خنقك دي أو إنو جا اتبرع ل تاليا و مشى من غير م اشوفو م ببرر لي ، يا إما بتجاهلني ، يا إما بتطلع لي بقصة تانية أو بطلعني مشوار المهم م برد! ، بجد تعبني و فترني معاه ..رزان عاينت لي و رجعت عاينت ليها وقالت ليها من متين بدا حركاتو دي؟ ..قالت ليها من م لقيتو عندو ..أنا هنا اتنهدت لأنو م طلع بسببي ..تاني واصلت كلاما وقالت لكن الفترة دي زايد زيادة ..طوالي رزان عاينت لي عملت ميتة ..قلت ليها طيب وافقتي بيو ليه ، طول ما م متفقين؟ ..قالت لي لأنو عجبني شكلياً ، يعني أسمر ملتحي عندو وجنات و مغترب أسبانيا ، ففكرت إنو كده كفاية ف اقنعتو إنو نعرس! ..قلت ليها اقنعتيو؟ ..قالت لي علاقتنا كانت صداقة اصلا ، لاقيتو أول مرة في فرع مطعمنا الهناك و كان بجي طوالي يتعشى عندنا ، ف اتصاحبنا و اتبادلنا الأرقام وطلعات وفسحات ، و فجأة حبيتو أو كنت قايلة نفسي بحبو ، فقلت ليو بالهظار إنو رايو شنو يعرسني ، فقال لي جداً ح ألقى زيك وين ، وبعدين طلب رقم ابوي ، لكن كلمتو إني م عايشة أبوي و اديتو رقم عُمر و طلب يدي منو و عُمر وافق مبدئياً ، و كنا مخططين إنو بعد نرجع السودان يتقدم لي رسمي ، لكن بعد الشوفتو منو م أظن ..حسيت بالذنب لأنو ح ينفصلو بسببي ، ولأنو مازن ظلمها بسببي هو قال لي بصريح العبارة إنو كان عايز يتجاوزني بيها ، يعني م بحبها ولا أي شي بس عاملها بديلة لي ، و لسوء حظو البديلة دي جابتو لي تاني عشان كده نفر منها ..قلت ليها ربنا يعوضك بالاحسن ..رزان قالت لي ما ح تحاولي تقنعيها! ..قلت ليها هي م مجبورة تتحمل تصرفاتو دي ، إذا من هسي كده ، معناها لقدام ح يبقى أسوء ، وحاجة تانية ي فريال ..قالت لي اهاا؟ ..قلت ليها مازن بعمل كده بسببي ، لأنو هو حبيبي الخليتو بسبب الحصل ..رزان بقت تعاين لينا بترقب و منتظرة ردة فعل فريال ، لكن م حصل السيناريو الفي راسا ..و فريال قالت لي حسيت من حركاتو إنو ده هو! ..قلت ليها آسفة ..قالت لي م تعتذري ، اصلا هو م كان نصيبي من الأول ..رزان قالت لي طبعا مستغربة أنا ، اتوقعتكم تقومو تتكافتو! ..فريال قالت ليها لشنو ، اخوّتنا م بخربا ولد! ..قلت ليها و كمان لأنو فريال ، قلبها مال لواحد تاني ..و ضحكت ..قالت لي قصدك منو؟ ..قلت ليها قصدي منو؟! ، المشيتي احتفلتي بيوم ميلادو! ..نزلت عيونا وقالت لي ماف حاجة زي دي ..قلت ليها وااضح ، لكن برضو مهند ده مااا هناي كده ..قالت لي بسرعة اتعالج والله! ، أنا سألتو وقال لي إنو اتعالج و وراني ملفو الطبي كمان! ..قلت ليها وصلتو ل هنا! ، المهم برضو م تثقي فيو شديد ، و كلمي يجي بالباب عدييل ..قالت لي تمام ، لكن لازم افسخ خطوبتي من مازن أول و اكلمو عشان كل واحد فينا يمشي بحال سبيلو! ..م عارضتها لأنو ده أحسن شي ليهم الاتنين ، بعداك غيرنا الموضوع وبقينا نتونس في مواضيع تانية ، لحدي المغرب كده ، طلعت مع رزان وصلتها بيتها و واقفة بتكلم معاها ، مجتبى جا ..قال لينا السلام عليكم ..ردينا ليو ..قال لي ميرا بتك بقت كيف؟ ..قلت ليو م عندك بيها شغلة! ..و ودعت رزان و ركبت العربية و مشيت .. لأ ، هو يعني مصدق نفسو إنو لو اتجاهل الماضي ح اتجاهلو أنا كمان! ، لسه م بعرفني كان كده ، مشوار المسامحة ده لسه طويل! ..اليوم التاني بالمسا كده عُمر جا ، اطمن على تاليا و فريال كلمتو إنها عايزة تفسخ خطوبتها من مازن ، لكن م كلمتو بموضوع مهند .. ولأنو عُمر اصلا شاميو من أول ، وافق بسرعة وكان عايز يتصل يكلمو ..قلت ليو خليها تتكلم براها ..قال لي قولتي كده! ..قلت ليو ااي ..قال لي تمام ..و فريال اتصلت ليو واتكلمت معاه بالتلفون ، و هو قبل الإنفصال ..وقال ليها إنو ربنا يسعدها في حياتها وتلقى الأحسن منو ..قالت ليو آمين يارب جمعا ..وقفلت وهي مبسوطة لمن عُمر اتحير ..وقال ليها مش مفروض تبكي وتتمختي وتتبشتني وتسمعي أغنية حزينة! ..قالت ليو أبكي شنو ، م فاضل لي إلا ازغرت قال أبكي قال! ..و مشت مبسوطة الغرفة ..عُمر عاين لي وقال لي دي مالا! ..قلت ليو علمي علمك ..قال لي الجن ولا النفسيات ، المهم اتخلصنا منو ..قلت ليو ااي ، وعلى فكرة أنا كلمت فريال حقيقتو ..قال لي عشان كده خلتو؟؟ ..قلت ليو لأ ، أنا كلمتها بعد قررت قرارها ده ..قال لي ايواا ، أحسن كده عشان م تزعل بعدين ..قلت ليو ااي ..قال لي على كلٌ ، أنا ماشي تصبحو على خير ..قلت ليو وأنت من اهله ..وقام مشى ودع تاليا و مشى بيتو ، وأنا مشيت غرفة فريال اتونس معاها ....
*لكنّني لا أقوى أن يشاركنيّ أحداً بك ..ولو بنظرة..