رواية لأجلها الفصل التاسع والعشرون 29 بقلم احمد سيمبا
*أن نبقى معًا سنواتٍ مديدة ، دون أن يفصلنا أي شيء ، هذا كلَّ ما أرغبه ، وأتمناه ، وأدعوهُ في ليلي ونهاري ♡*
*_فلاش باك_*
بعد مشت لبست وجات ، لقتني لسه قاعدة في مكاني و سرحانة ، وقفت قدامي و ختت يدها في خدي ..وقالت لي ماما مالك؟ ..عاينت ليها مسافة و اخدت نفس ..وقلت ليها سُكرة! ..قالت لي نعم ي ماما ..قلت ليها اقعدي ..قعدت في رجليني ..قلت ليها تاليا أنتي عندك كم سنة؟ ..قالت لي 8 سنين و نص ..قلت ليها وأنتي بتي الكبيرة و الواعية ولا م ياها ..هزت راسا ..قلت ليها طيب أنا عايزة أقول ليك كلام مهم ويمكن م تفهمي لكن لازم تعرفي ..قالت لي شنو ي ماما؟ ..قلت ليها تاليا أنا م أمك ..اتلفتت عاينت لي وقالت لي كيف يعني؟ ..قلت ليها أنا ربيتك من كنتي بيبي لكن م ولدتك من بطني ..قالت لي طيب ولدتني منو؟ ..قلت ليها مايا ..قامت وقفت بسرعة وقالت لي مايا الكريهة دييك!! ..قلت ليها ااي ..قالت لي كيف يعني هي أمي!! وليه خلتني ليك!! ..قلت ليها م كانت جاهزة تبقى أم ..قالت لي كيف يعني؟ ..قلت ليها م جاهزة بس ..قالت لي يعني هي كانت معرسة بابا قبلك؟ ..قلت ليها لأ ، مهند م أبوك ..قالت لي طيب منو؟ ..قلت ليها بوريك يوم تاني ..قالت لي و مايا خلتني ليه! بتكرهني يعني! ..قلت ليها لأ ، لكن م قدرت تتحمل مسؤليتك ..قالت لي أنا م فاهمة كيف يعني مسؤليتي! ويعني شنو مسؤلية اصلا!! ، أنا بس عايزة اعرف هي خلتني ليك ليه! و ليه م كانت عايزاني اقعد معاها! ..مسكت يدها وقلت ليها لأنو كانت صغيرة وم بتقدر تربيك عشان كده اخدتك أنا ..قالت لي أنا م فاهمة شي ..قلت ليها طيب أمك حملت بيك قبل م تتزوج أبوك وانتي عارفة إنو ده غلط صاح ..هزت راسا ..قلت ليها و لو أبوي عرف وقتها كان ح يعاقبا وهي كانت خايفة من العقاب ده ، عشان كده أنا اخدت مكانا واتعاقبت بدلها ..قالت لي عشان كده طردوك من البيت؟ بسببي؟ ..قلت ليها أنتي سمعتي الكلام ده من وين؟!! ..قالت لي سمعت كلامك أنتي و خالتو رزان و فريال! ..قلت ليها بسرعة و سمعتي شنو تاني؟! ..قالت لي بس إنك طردوك من البيت ..زفرت بارتياح حتى قلت ليها لأ ، م طردوني أنا خليتو ..قالت لي ليه؟ ..قلت ليها عشان م مرتاحة ..قالت لي هم بكرهوني صاح؟ ..قلت ليها لأ ، معقولة إنسان عاقل يكره بنوتة حلوة زيك ..قالت لي طيب ليه م كانو بتواصلو معانا؟! وليه م بجونا ولا بنمشي ليهم! ..قلت ليها عشان أنا متشاكلة معاهم من زماان ..قالت لي بسببي؟ ..قلت ليها اكيد لأ ، بسبب مايا ، أنا وهي م بنتفق ، متشاكلين! ..سكتت ونزلت عيونا ..قلت ليها ي ماما لو في أي شي في بالك قوليو م تسكتي ..عاينت لي مسافة و رجعت قعدت في رجليني وحضنتني ..ضميتا وقلت ليها م تخافي ما ح اخليها تاخدك مني ..هزت راسا و قالت لي أنتي كلمتيني ليه؟ ..رفعت ليها راسا وقلت ليها عشان م تسمعي من زول غيري ، عشان م تتصدمي لمن زول يقول ليك أنا م أمك ..قالت لي يعني الناس كلهم عارفين إلا أنا! ..قلت ليها م كلهم لكن في جزء عارفين و جزء لأ ..نزلت راسا و قالت لي ولو سألوني عن بابا أقول شنو؟ ..قلت ليها أنتي عايزة تقولي شنو؟ ..قالت لي اسمو ..قلت ليها بقولو ليك يوم تاني ..سكتت ..قلت ليها تاليا أنتي زعلانة مني؟ ..هزت راسا ب لأ ..قلت ليها طيب من شنو؟ ..قالت لي من إنو مايا م عايزاني مع إنها أمي ..قلت ليها من اتولدتي كنت و لازلت أنا أمك ولحدي م تموتي ح أفضل أنا أمك و أبوك كمان ..قالت لي بابا مهند ده نفسو الشغال معاك صاح؟ ..قلت ليها ااي ، لكن عرفتي كيف؟ ..قالت لي من اسمو ، مرة قريت اسمو في واحدة من أوراقك ..سكت ..قالت لي انتو مطلقين صاح؟ ..قلت ليها ايوة ..قالت لي وأنا م بتو ، بت واحد تاني عشان كده م بعاملني ك بتو ، مش كده! ..اتنهدت وقلت ليها أيوة ..قالت لي يعني أنا م عندي أهل ، لأنو اهلي الحقيقين م عايزني ، صاح! ..نبرة صوتا الحزينة ، هزتني من جوة و كنت بجاهد نفسي عشان م أبكي ، م كنت عايزة أكون سبب وجعها ، م كنت عايزة أكون السبب في كسرة قلبها ، لكن كان لازم اكلمها عاجلاً أو آجلا ..قلت ليها لأ ، أنا أمك و أبوك و أهلك كلهم كمان ، و في جدك الفي بورسودان و فريال و عُمر و خالتو رزان ديل كلهم بحبوك و كلهم أهلك ..قالت لي طيب ، خلينا نمشي ، ممكن؟ ..وقامت طلعت من الغرفة .....
*_عودة من الفلاش باك_*
قلت ليو أنت عارف ي مازن إحساسي وأنا بكلمها بالموضوع ده ، حسيت كأنو روحي بتطلع والحروف بتقطع قلبي أنا أول ، حتى بتطلع و تمشي تجرحا! ..قال لي لكن أحسن كلمتيها ، لكن الم فهمتو إنو ليه جبتيها هنا بعد ده كله؟ ..مسحت دموعي وقلت ليو م عاارفة ، هي اصرت إنو تجي هنا ، مع إني قلت ليها إنو ح اسوقا معاي ، لكن هي ابت و جات هنا ..قال لي المهم ربنا ستر وم حصل شي ، و لو سألتيني من هنا لحدي م مايا تهدا شوية م تجيبيها هنا ..قلت ليو اصلًا ما ح اجيبها ، و كلها فترة و نختفي من حياتها نهائياً ..عاين لي بطرف عينو و رجع عاين قدامو وقال لي م فهمت؟ ..قلت ليو ح نسافر ..قال لي وين؟ ..قلت ليو أرض الله واسعة ..قال لي مع طليقك؟ ..قلت ليو أنا و بتي بس ، مهند اصلا طلع من حياتي زمان ..قال لي مع عُمر يعني؟ ..قلت ليو مازن! ، ياتو كلمة م واقعة ليك ، أنا ولا بتي ، قلت ليك أنا و بتي برانا! ..قال لي ايواا ، و مسافرين متين؟ ..عاينت قدامي وقلت ليو فجأة! ، بس يوم تصحو تلقونا مافي! ..وقف العربية وعاين لي و قال لي ميرا م تعملي كده! ..قلت ليو شنو؟ ..قال لي م تختفي من حياتي! ، أنا م صدقت لقيتك! ..م رديت و اتلفت على الشباك عشان اتهرب من نظراتو ، يمكن مازن هو الإنسان الوحيد الفي الدنيا دي ، الأنا عايزة وم عايزة في نفس اللحظة ، أنا بحبو لكن م قادرة اسامحو على العملو معاي ..عاين لي مسافة ولمن م لقى رد ، دور العربية و وصلني البيت ، صحيت تاليا و نزلنا ، كان الضهر ياداب بأذن ..فتحت باب الشارع تاليا دخلت طوالي ، وأنا عايزة ادخل مازن ناداني ، و نزل و هو شايل شنطة تاليا ، اداني ليها ..وقال لي أنتي كيف قادرة تكوني باردة اتجاهي كده! ..قلت ليو بعد المريت بيو ، بقيت باردة إتجاه نفسي خلي أنت! ..قال لي يعني ما ح تديني فرصة؟! ..قلت ليو مازن! ، نحنا انتهينا! ..هز لي راسو و قال لي لأ ، أنا الانتهيت ، تاني! ..و خت يدو في قلبو و مشى ..دخلت و قفلت الباب وأنا برجف ، كل مرة بكسر فيها قلبو ، بحس إني بكسر في قلبي أنا ، كل مرة ببعدو مني أنا البتعذب أكتر منو ، لكن يستاهل ..ده عقابو على العملو فيني ، وم بهمني حتى لو اتعاقبت معاه! ..وقفت مسافة حتى مشيت دخلت جوة و على المطبخ مباشرة ، شربت موية و وقفت مسافة بحاول اتمالك نفسي ..كان في حتة في قلبي لسه واجعاني و خايفة على مايا ، هسي يا ربي الكسر خطير ولا بسيط ، وهل ح تحتاج عملية ولا لأ؟ ..واقفة و سرحانة لحدي م حسيت بيد في كتفي ..اتلفت بخلعة و قلت مايا! ..لقيتا فريال ، قالت لي مايا؟! ..و مسكت وشي و عاينت للكدمات و الخدوش كوويس حتى فكتني ..قالت لي أنتي اتشاكلتي مع منو؟! ..قلت ليها مايا! ..قالت لي لشنو؟! ، و الحصل شنو؟ ..حكيت ليها الحصل بالتفصيل و سكت ..قالت لي كسرتي ليها يدها!!! ، ميرا م اتوقعتك تعملي فيها كده!!! ..قلت ليها م تخوفيني زيادة ، كنت منفعلة وم ركزت!! ، و هدا شوفة عينك للان جسمي برجف!! ..قالت لي طيب ، اهدي ، ما ح تفتح فيك بلاغ صاح! ..قلت ليها خليها تفتح قايلاني خايفة منها!!! ..قالت لي العناااد ي يمة العنااد ، عنااادك و قوة راسك بس الح يجيبو أجلنا كلناا!! ..ضحكت و مشيت قعدت في الكنبة ..وقلت ليها ده في حال أكون معندة على الغلط ، لكن أنا البعملو كله صاح وم ندمانة! ..قالت لي أنا راسي صدع ح أعمل قهوة ، تشربي؟ ..قلت ليها أيوة ..و قمت مشيت غرفتي اخدت حمام و صليت ، حتى مشيت غرفة تاليا و دخلت براحة لقيتا قاعدة في نص السرير و سرحانة ، مايا الله يجازيها خلت بتي العمرها 8 سنين تشيل هموم أكبر من عمرها ، و تفكر في حاجات م مفروض تفكر فيها أصلاً ..اتنهدت و مشيت قعدت جنبها وقلت ليها بتفكري في شنو؟ ..عاينت لي وقالت لي ولا شي ..قلت ليها بتكذبي علي؟ ..م ردت ..قلت ليها طيب ، أنتي ليه كنتي مُصرة تمشي بيت ناس رزان ..نزلت عيونا و بقت تبكي و قالت لي لأني كنت عايزاكم تتصالحوا! ، أنا لو مشيت أنتي ح تضطري تمشي عشاني كمان و وقتا بتتصالحي مع أهلك! ..مسحت دموعا و قلت ليها أنتي ليه شايلة همي ، م أنا قلت ليك إني ح اصالحهم ..قالت لي لأني عايزاك تكوني مبسوطة زيي ، أي زول بكون مبسوط لمن يكون مع امو مش كده ، ف أنا كمان عايزاك تكوني مبسوطة ..عيوني دمعو ، قمت ضميتا ..و قلت ليها أنا م محتاجة زول من أهلي عشان أكون مبسوطة ، أنا فرحانة بيك و بوجودك ، أنتي أكبر فرحة في حياتي ي روحي ♡..قالت لي وأنا بحبك ي ماما ، لكن كنت قايلاك ح تتصالحي مع أهلك ، لكن بسببي اتشاكلتوا أكتر من أول ..قلت ليها أنتي م سبب المشكلة ..قالت لي لأ أنا ، أكيد زعلتي منهم لأنو خلوني طلعت براي ..قلت ليها م عشان كده ، لكن صاح أنتي كنتي ماشة وين براك و طلعتي ليه؟! ..قالت لي وهي بتتنهد طلعت لأنو هم بدو يتشاكلوا بسببي و كنت عايزة أكون بعيدة منهم ..قلت ليها كيف بسببك؟ ..حكت لي الحصل هناك ، و ورتني يدينا ، و كان فعلاً آثار يدين مايا معلمين فيها و عاملة ليها كدمات ، بقيت أعاين ليها و دموعي جارين و كل م امسحهم بزيدو ..مسحت لي دموعي وقالت لي ميرا م تبكي م وجعني شديد ..م رديت ليها و مشيت جبت مرهم ، قبل م امسحوا ..قلت ليها صليتي؟ ..هزت لي راسا ..مسحت ليها محل الكدمات و كانت واجعاني أكتر من م واجعاها ، هنا شوية عذاب ضميري خف لأنو بعد التصرفات المجنونة العملتها مايا مع بتي ، تستاهل كسرة اليد عشان م تلمسها تاني نهائي ..بعد خلصت قلت ليها متأكدة م واجعاك؟ ..قالت لي أيوة ..هزيت راسي مع إني م كنت مقتنعة ، قامت حضنتني ..وقالت لي ميرا ، و ربي أنتي بكاية أكتر مني ، ده شنو ده دموعك دي م بتخلص! ..قلت ليها تقولي شنو ، حتى عيوني م بقدرو يتحملو يشوفو وجعك ..قالت لي أنا كويسة و ربي كويسة ، بس أنتي م تبكي عشان م أبكي معاك ..و باست راسي و فكتني ..وقالت لي أنا عارفة الح يفرحك شنو! ..و نزلت مشت جابت قهوة بالحليب و جات مدتو لي ، اخدتها ..قالت لي من غير سكر ، لأنو سكر عيونك كفاية جداً ..ضحكت و قلت ليها م تقولي لي ده علمتو ليك فريال؟ ..ضحكت وقالت لي ااي ، و كلام تاني كتييير ..أخدت رشفة و اتنهدت ..قالت لي أحسن؟ روقتي هسي؟ ..قلت ليها ااي ، أعصابي زاتا هدت ..قالت لي طيب ممكن اسألك سؤال؟ ..ختيت الكباية و هزيت راسي ..قالت لي قبيل لمن مايا قالت إلا عايزة تخليني معاها ، وقتا هم كلهم زعلوا و بقو يجوطوا فيها و خالو مجتبى ضربها ، و قالو ليها إنو أنا بتك أنتي م بتها ، ف عايزة أعرف هم ليه عملوا كده ، هم م عارفين يعني؟ ..فكرت شوية و قلت ليها لأ ، عارفين ، لكن مايا غلطت في حقك زمان ، بصراحة غلطت في حقنا كلنا ، ف عشان كده ناس البيت زعلانين منها و م عايزنك تقعدي معاها عشان م تبقي زيها ..قالت لي عملت لي شنو؟ ، ضربتني وأنا بيبي؟! ..قلت ليها لأ ، لكن كانت بتعلي صوتها على ناس البيت و كمان كانت بتخلي أمي و أبوي يبكوا كتيير ، ده غير إنها بتجرحهم بالكلام ..قالت لي و ليه بتعمل كده؟ ..قلت ليها كانت قاسية وقتها و أنانية شوية ..قالت لي وعملت لي شنو أنا! ..قلت ليها قالت م عايزاك ، و هسي بعد السنين دي كلها رجعت قالت عايزاك عشان كده هم و من ضمنهم أنا زعلانين منها ، لأنو هي أول خلتك ..قالت لي خلتني؟ ، و لو أنتي م اخدتيني كنت ح أمشي وين؟ ، الميتم صاح! لأنو ده المكان البياخدو ليو الأطفال الم عندهم أهل زيي ..قلت ليها لأ ، لأني م كنت ح اخليك تمشي أي مكان ..قالت لي لو افترضنا م اخدتيني أنتي كنت ح أعيش في الميتم صاح؟ ..هزيت راسي بتردد و قلت ليها أيوة ..قالت لي طيب ، ليه أنتي كنتي عايزاني مع إنو أمي الحقيقة م عايزاني؟ ..م كان عندي إجابة بصراحة سؤال غريب ، حتى لنفسي م سألتو ..قلت ليها بصراحة م بعرف ، لكن أنا بحبك ..قالت لي ليه بتحبيني؟ ..قلت ليها لأنك بتي ..قالت لي لكن أنا م بتك الحقيقية ..قلت ليها برضو ، ده م غيّر مشاعري اتجاهك ، الموضوع إني بكون مرتاحة و مطمنة طول م أنتي جنبي و بخير ، هسي أنا لو سألتك ليه بتحبيني ح تجاوبي بشنو؟! ..سكتت مسافة قالت لي لأنك أمي ..قلت ليها طيب م أنا م أمك الحقيقية؟ ..قالت لي نفس كلامك بس ، ولأني بحب حُضنك وبحب احضنك و لأنو أكلك حلو! ..قلت ليها ي شييخة ، بس لأنو أكلي حلوو! ..ضحكت و قالت لي م أنا قلت حاجات تانية غير الأكل برضو! ..عاينت ليها وم اتكلمت ..قالت لي أنا بعرف النظرة دي ، م تفكري تكلكليني! ، و ربي م بخليك ..ضحكت و عايزة امسكها قامت جارية طلعت ، أنا قعدت فكرت شوية في موضوع مايا و مازن ، لحدي م فريال نادتني قمت طلعت ليهم برة ..لقيت عُمر قاعد ، سلمت عليو و قعدت جنب فريال و تاليا ..عاين ل وشي وقال لي مالك أنتي؟ ..قلت ليو اتناقشت مع مايا ..قال لي مايا؟! ، لقيتيها وين؟ ..قلت ليو موضوع طوويل ..عاين ل تاليا فهم و سكت ..فريال قالت ليو طيب ي عُمر أنا عايزة أقول ليك حاجة ..قال ليها أحكي ..قالت ليو بصراحة في واحد بحبني و عايز يتقدم لي ..قال ليها منو؟! ..اترددت شوية و في النهاية قالت ليو مهند ..تاليا قالت ليها مهند طليق ماما؟ ..عُمر عاين ل تاليا و رجع عاين ل فريال وقال ليها مهند ، مهند الشغال معانا! ..هزت راسا ب إيجاب ..قال ليها فريال الإنسان ده مريض! ..أنا ادّخلت وقلت ليو بقى كويس ..تاليا قالت لي عندو شنو؟ ..قلت ليها م عاارفة المهم كان عيان و هسي بقى كويس ..عُمر قال لي و أنتي عرفتي كيف؟ ..قلت ليو اتكلمت معاه ، و ملاحظة إنو بقى أحسن بكتيير ..عاين ل فريال وقال ليها أنتو اتعرفتو ليكم أقل من شهر لحقتو تحبو بعض! ..قلت ليو عُمر! ، الحب محتاج زمن يعني؟! ، مدام هم فاهمين بعض و عايزين يكملوا حياتهم مع بعض بالحلال ليه عايز تكون عارض ليهم! ..فريال قالت لي فعلاً نحنا م اتعرفنا من فترة طويلة ، لكن أنا حاسة إني ح أكون مبسوطة معاه! ..قال لي ولو ضربها ولا اذاها! ..قلت ليو م أظن ، لكن حتى لو اذاها أنت قاعد ، وأنت ح تاخد ليها حقها ، مش أنت خالها الرباها! ، لو زواجها نجح ح تكون مبسوطة ولو م نجح ح يكون درس جديد في حياتها وح تحب غيرو عادي ، م تعقد الموضوع! ..فريال قالت لي بالظبط كده ..عُمر سكت مسافة و فكر حتى عاين ل فريال وقال ليها تمام ، اديو رقمي وأنا بتفاهم معاو ..قالت ليو بفرح طيب ، حاضر! ..تاليا قالت لي ماما! ..قلت ليها عيونا ..قالت لي كل البحبو بعض بتزوجو؟ ..قلت ليها م كلهم ، لكن البحبك بالجد بجي بالباب عديل و بتقدم ليك بالحلال ..قالت لي ولو م عمل كده؟ ..قلت ليها معناها م بحبك و بلعب بيك و المفروض تخلي طوالي ..قالت لي اممم ، طيب أنتي و عمو مازن ناوين تعرسو متين؟! ..حصلت لحظة صمت جماعية ، وفريال و عُمر بقو يعاينو لي ..قلت ليها وأنا بتمتم أنا و مازن؟! ..هزت راسا وقالت لي ااي ، مش هو بحبك؟ ..قلت ليها لأ ، م بحبني ، هو بس شغال معاي ..قالت لي اممم ، عشان قبيل زي سمعتو قال ليك م تخليني ..و عاينت لي بطرف عينا ..قلت ليها قبيل أنتي م كنتي نايمة؟! ..قالت لي يمكن ..و ضحكت ، اتوترت و دخلت في ضفوري ، لو بالجد تاليا سمعت كلامنا ح يبقى يومي أخضر ..قلت ليها كده غلط ي ماما ، م تتصنتي على كلام الناس الكبار! ..قالت لي انتوا الكنتو بتتكلموا في العربية ، و بعدين أنا م سمعت كل الكلام ، كنت بين نايمة و صاحية و سمعت كم كلمة بس ..عُمر قال لي أنتي لقيتي مازن وين؟ ..قلت ليو في المطعم ..فريال قالت لي بعد طلعنا نحنا؟ ..هزيت راسي ..عُمر قال لي انتو اتلاقيتو؟! ، انتو ي بنات بتعملو شنو ب وراي؟ ..عاينت ل تاليا وقلت ليها ادخلي جوة ..قالت لي ي ماما عايزة اقعد معاكم! ..قلت ليها ادخلي ي تاليا ، و اقفلي الباب! ..قامت ب زهج ، دخلت و قفلت الباب ..عُمر قال لي احكوا لي بالتفصيل سرعة ..حكيت ليو القصة من لاقيت فريال و مهند ، لحدي اللحظة دي ..قال لي يعني تاليا بقت عارفة الحقيقة! ..قلت ليو أيوة ..فريال قالت لي ردة فعلها اهدا من م اتوقعتها ..قلت ليها لسه ، كل م تكبر ح تكتر الأسئلة ، من وقت عرفت وهي بتسألني كل شوية سؤال أغرب من القبلو ، لكن الشي اللاحظت ليو إنها بتسألني طوالي ، ليه مايا خلتها مع إنو أمها ، عادت السؤال ده خمسة ألف مرة من الصباح ..عُمر قال لي و لسه ح تسأل ، لحدي م تلقى إجابة مقنعة ..فريال قالت لي أهم شي إنها م قالت عايزاها ..قلت ليها لأ م قالت ، بالعكس قالت عايزة تكون بعيدة منها ..عُمر قام وقف و قال لي كوويس ، و اتذكرت حاجة كمان ..أنا و فريال قلنا ليو بصوت واحد شنو؟ ..قال لينا أنا قررت أخطب ..فريال قالت ليو منو؟ ..عاينت ليها وقلت ليها سحر في زول تاني ..قال لي بخلعة عرفتيها كيف؟! ..قلت ليو كان واضح إنها بتحبك ، عشان كده خمنت ساي لأني م عارفة إذا أنت بتحبها ولا لأ ..قال لي اخخ بحبها أكيد ، سحر دي سحرت قلبي بعيونا السمحات ديل ..فريال ضحكت و قالت لي صاحبنا وقع خلاص ..قلت ليها واقع من زمان بس ياداب اعترف ..عُمر قال لي و أنتي ناوية تعترفي متين؟ ..قلت ليو بشنو؟ ..قال لي م ملاحظة إنو أنتي و مازن بقيتو قريبين ل بعض ..فريال قالت لي صاح ، أنتو من أول كنتو مرتبطين و قلتي خليتي عشان المشكلة ، هسي بما إنو سوء التفاهم اتحلى ليه م بترجعوا لبعض؟ ..قلت ليها م تتأملو اصلا ، لأنو أنا و مازن قصتنا انتهت من بدري ..عُمر قال لي إلا كم من جهتك أنتي بس ، لأنو هسي تاليا قالت إنو سمعتو بقول ليك م تخليني ..فريال قالت لي ميرا! ، مازن زول كويس و ود ناس وأنا اشهد ، فما تضيعي من يدك ..عاينت ليهم وم اتكلمت ، م كنت قادرة احكي ليهم العملو مازن فيني ، و السبب الخلاني انفر منو و م أرجع ليو ..عُمر قال لي كدي أنتي فكري و بعداك قرري ..قلت ليو تمام ..قال لينا طيب استأذن أنا ..و طلع ، أنا قعدت مع فريال شوية و قمت دخلت الغرفة ل تاليا ..لقيتا راقدة و زعلانة ، رقدت وراها و ضميتا ..وقلت ليها مالا الحلوة زعلانة؟ ..اتلفتت علي وقالت لي عشان ابيتي تخليني اقعد معاكم! ..قلت ليها في مواضيع أكبر منك ، وم لازم تسمعيها ..قالت لي لكن أنا بحب أقعد معاكم! ..قلت ليها و بتقدري تقعدي في أي زمن ، لكن لمن نتكلم في كلام خاص من الأدب إنك تقعدي جوة ، تمام؟ ..نزلت عيونا و هزت راسا ب إيجاب ..بوست راسا وقلت ليها بتي الشاطرة الله يحفظك لي ..م ردت و سكتت مسافة بتفرك في يدينا بتوتر ، حتى قالت لي ميرا! ..قلت ليها عيونا ..قالت لي مايا لو جات عايزة تاخدني معاها ح تخليها تاخدني؟ ..و عاينت لي بنظرة م فهمتها خوف ولا قلق ..لكن عشان اطمنها قلت ليها لأ ، إلا في حالة واحدة ..قالت لي بسرعة شنو؟!! ..قلت ليها إذا انتي كنتي عايزة تمشي معاها ، في الحالة دي أنا م بقدر امنعها ..ضمتني وقالت لي أنا م عايزة أمشي معاها ، عايزة أفضل معاك ي ماما! ..مشيت يدي في شعرها و قلت ليها وأنا كمان عايزاك تفضلي معاي دائماً يا قلب ماما أنتي ♡..مسكت فيني قوي وم اتكلمت ، وأنا سكت بفكر في حالة مايا حالياً و إذا كويسة ولا لأ ، غايتو الموضوع ده ح يقلق بي شديد ، لازم أعرف الحصل ليها شنو! ..اليوم التاني من الصباح اتصلت ل رزان و اتكلمت معاها و قالت لي إنو يدها اتفكت م اتكسرت ، و هي كويسة وم عندها شي ، هنا شوية اطمنت و قلبي قعد و قفلت الموضوع على كده ..بعد كم يوم عُمر جانا البيت و كلمنا إنو اتصل لأهل فريال و اداهم مهند اتكلموا معاه و وافقو و قررو عرسهم يكون بعد 15 يوم ، و إنو أتقدم ل سحر و برضو أهلها وافقوا و عرسهم بعد شهر ..و إنو ح نسافر كلنا بورسودان عشان مهند ح يعقد عليها و يعملو عزومتها حتى يجي هنا يعمل عرسو هو و يسوقا طوالي ، لأنو عندو شغل وما ح يكون فاضي لفترة عشان كده ح يعرس أول حتى يبدا شغل ..عكس عُمر ال أخر عرسو لأنو مشغول هسي ، و بعد يخلص ح يعملو ..كنت مبسوطة لأني شايفاهم متحمسين و مبسوطين ، على الأقل كده حياتهم استقرت و كل واحد فيهم لقى شريك حياتو الح يكمل معاه ♡ ، و أكتر شي كيفني إني ح أكون بعيدة عن مايا و مصايبها لفترة كويسة ، وح أكون بعيدة عن مازن برضو و ما ح اضطر أفتح موضوع علاقتنا تاني ، لكن.. م عارفة أزعل ولا أفرح لأني فارقتو! ، لأنو حتى لو أنكرت و صرخت و عنّدت ، برضو بحبو و لسه مشتاقة ليو .....
*_"بعد 14 يوم"_*
صحيت نص الليل من غير سبب وم قدرت أنوم ، قمت قعدت لقيت تاليا نايمة قدامي و فريال راقدة في السرير التاني و معانا كم بت من أهلها ..نزلت براحة و فتحت الباب طلعت برة ، قعدت في سرير الحوش و عاينت ل بيتي كوويس ، شكلو م اتغير ، ياهو نفس البيت الخليتو قبل خمسة سنين ، أي شي في محلو ، لكن طبعاً كان وسخان إلا نضفنا أنا و البنات عشان نقعد فيو لأنو بيت ناس عُمر مليان ل آخرو ..ابتسمت و أنا بعاين للبيت لأنو ده واحد من أول انجازاتي البفتخر بيها ♡ ، للان بتذكر منظرو أول لمن جيت ، و منظرو هسي ، اختلاف 180 درجة ..و لأنو البيت ده قريب من قلبي ، اشتريتو قبل سنتين من عمي بابكر عشان كل م اجي بورسودان اقعد فيو و أتذكر أيامي الأولى هنا ، كانت أيام حلوة شديد و قاسية برضو في نفس اللحظة ..ضحكت في نفسي وأنا بتذكر أيامي هنا ، و عاينت للسما لفتتني النجوم الكبيرة و المنورة ، ففكرت إني لو مشيت الكورنيش ح أقدر استمتع بالنجوم أكتر مع صوت الموج و الهوا البارد ، ف قمت مشيت دخلت جوة ، لبست عبايتي وكنت طالعة كده ، سمعت صوت تاليا ..قالت لي ماما ، ماشة وين؟ ..قلت ليها الكورنيش ، تمشي؟ ..قالت لي ااي ..قلت ليها طيب انزلي براحة وم تدوسي ليك زول ..مشيت مسكت يدها ، و مررتها بين الناس النايمين في الأرض ، لأنو الواطة ضلام وأنا معتمدة على ضوء القمر بس ..بعد طلعت برة ، جبت ليها البلوڤر حقها ، لبستو ، لأنو شتاء بورسودان بارد م زي حق الخرطوم و كفاية تغيير الجو آخر مرة تعبها و حمتها أسبوع م نزلت ..طلعنا براحة و مشينا على الكورنيش ، الطريق كلو بنتونس و بحكي ليها عن عادات الأعراس هنا ، لأنو دي أول مرة تحضر عرس سوداني ، و هي كانت بتعاين لي بتركيز و بتسأل عن كل شي تقريباً ، و جزء عجبها و جزء م عجبها ..المهم وصلنا الكورنيش ، اتفاجأنا ب مازن قاعد هناك و بعاين للسما ، ااي مازن جا يحضر عرس فريال و ليو تلاتة يوم هنا ، أنا اتوقعت إنو ما ح يجي و ح أعيش كم يوم هاديين ، لكن لأ ، جا و محل م أمشي بلقاه قدامي لكن م بتكلم معاي بسبب الكلام القولتو ليو آخر مرة بقى بتجاهلني ..تاليا قالت لي ماما ، مش داك عمو مازن؟ ..قلت ليها ااي ..فكتني و مشت ليو ، سلمت عليو و مشت قعدت جنبو و بقو يتكلموا عن السما و بأشرو في النجوم ..مشيت وقفت وراهم وقلت ليو مساء الخير ..عاين لي وقال لي صباح النور ، لأنو الساعة 3 صباحاً هسي ..م رديت ، أصلا م عاارفة الساعة كم ولا أي شي ، قعدت جنب تاليا ..تاليا قالت ليو عمو مازن ، أنت صاحي مالك زي الوقت ده؟ ..قال ليها م قدرت أنوم و أنتي؟ ..قالت ليو لقيت ماما مافي ، ف قمت وراها ..عاينت لي وقالت لي ماما أنتي صاحية مالك زي الوقت ده؟ ..قلت ليها م قدرت أنوم برضو ..سكتنا شوية ، شوفنا سحابة تقيلة جاية ..تاليا قالت لي ماما اتخيلي تجي مطرة! ، أنا ولا بدخل جوة غايتو بقعد برة هنا ده! ..مازن قال ليها بتحبي المطر؟! ..عاينت ليو و هزت راسا ..قال ليها حلو ، وأنا كمان بحب المطر ، م بس أنا ، أخواني و أخواتي كلنا بنحب المطر ..قالت ليو نحنا في البيت ، أنا و فريال بس البنحب المطر ، ماما م بتحب تكون مبلولة بالموية ولا عُمر كمان ..قال ليها انتو ساكنين سوا؟ ..هزت راسا و قالت ليو هسي لأ ، نحنا كنا في الدوحة و عُمر هنا ، و فريال في إسبانيا ..قال ليها طيب زمان كنتو ساكنين سوا؟ ..قالت ليو ايوة ، كنا ساكنين سوا ، أنا م بتذكر حاجات كتيرة لأني كنت صغيرة شديد لكن ماما حكت لي ، إنو كنا ساكنين مع ناس عُمر ..قال ليها في بيتهم؟ ..قالت ليو جنبهم ، لكن بنوم عندهم عادي ..عاين لي وقال ليها ايواا ..طبعاً م فهمت عايز يصل لشنو ، و لشنو بسأل من حياتي القديمة ، ولا عايز يعمل فيها مهتم كمان؟ ..قعدنا مسافة من غير م نتكلم ، لحدي م تاليا نعست وبقت تتثاءب ..قلت ليها قومي ارح م تنومي هنا ..مازن قال لي اقعدي شوية عايز أتكلم معاك ..قلت ليو من قبيل قاعدين م اتكلمت مالك؟ ..قال لي هسي اتذكرت ..قلت ليو م بقدر ، أنا نعست و عندي صحية بدري بكرة ..قال لي تمام ..قمت سوقت تاليا و رجعنا البيت ، و بعد ده لا نمت ولا شي ، بس راقدة بفكر هو كان عايز يسألني من شنو! ، لحدي م الأذان التاني أذن ، قمت صليت و مشيت ساعدت الناس برة للشاي و الفطور ..و زي بعد الضهر مشينا مع فريال الكوفير ، كانو بجهزوها عشان تطلع للضيوف ، لكن الزفاف ح تلبسوا في الخرطوم ، يوم عرس مهند اللي هو بعد بكرة ..المهم عرسها مر على خير و رجعنا الخرطوم ، و اليوم التاني مباشرة كان عرس مهند في الصالة ، و مشيت عشان خاطر فريال و مهند بس ، مع إني كنت عارفة إنو ح الاقي اعمامي و أهلي كلهم هناك لكن اتجاهلتهم ..قاعدين في الصالة للفطور وأنا قاعدة في الطربيزة مع أخت فريال الكبيرة "فردوس" و أولادها ، و كم بت من بنات أهلهم ، و تاليا كانت مع أخت سحر الصغيرة أسمها "سمر" ، عندها زي عشرة سنة كده ..المهم قاعدة و بتونس مع البنات جاتني تاليا بتبكي و ماسكاها سمر ..قلت ليها مالك؟ ..م ردت بس بتبكي و تتشهق ..قلت ل سمر مالا؟ ..قالت لي كنا قاعدين نلعب و هي اتصدمت في مرا بالغلط ، قامت المرا ضربتها كف وقالت لي زحي من وشي ي بت الحراام ..غمضت عيوني مسافة و اتمالكت أعصابي عشان م أقوم أعمل مشكلة ..قلت ليها وينا المرا؟ ..قالت لي تعالي ..و مسكت يدي و ودتني الطربيزة القاعدة فيها ..أشرت فيها و قالت لي دي المرا! ..عاينت ليها لقيتا أم مازن ..قلت ليها تمام ..أم مازن قالت لي مالك قال؟!! ..ابتسمت وقلت ليها ولا شي ..و عاينت ل سمر و قلت ليها أمشي العبي ، تاليا شوية و بتجيك ..هزت راسا و مشت ، مسكت تاليا من يدها و مشينا قعدنا في العربية ، و هي لسه بتبكي و تتشهق ..مسحت دموعا وقلت ليها لشنو الدموع دي؟ ..قالت لي هي ليه قالت لي كده! ..كنت عايزة أكذب ، لكن لقيت إنو كل م وضحت ليها الموضوع من بدري أحسن ..اتنهدت و قلت ليها دي كلمة بقولوها للأطفال الاهاليهم جابوهم من غير م يتزوجو ..قالت لي و ليه بقولو ليهم كده؟ ..قلت ليها هم مفتكرنها إساءة أو نبذة ..قالت لي وهي بتتنهد م هي كده فعلاً! ..قلت ليها لكن م عندها معنى! ..قالت لي م عندها معنى؟ ..قلت ليها ايوة م عندها معنى ، أنتي اخترتي تكوني كده ، أنتي كنتي عارفة إنو أمك جابتك من غير م تتزوج؟ ..هزت لي راسا ب لأ ..قلت ليها معناها م عندك ذنب في الموضوع ، عشان كده م تخلي الكلمة دي تأثر فيك ، أصلا بعملو أي شي عشان يزعلو بعض و يكسرو بخاطر بعض ، ف أنتي م تخلي الكلمة دي تبكيك ..قالت لي لكن دي حقيقتي صاح؟ ..قلت ليها تعالي ..قامت قعدت في رجليني ..ضميتا وقلت ليها أنتي في حياتك في حقيقة واحدة بس ي تاليا ، اللي هي أنا ، أنتي بتي أنا ، بت ميرا وبس ، و أي إنسان في الدنيا دي بقول ليك كلمة غير كده ، طنشي ، مش أنتي عارفة نفسك ..قالت لي لكن.. ..قاطعتها وقلت ليها تاليا ، أنتي م اخترتي طريقة ولادتك ولا أهلك ، لكن بتقدري تختاري هويتك ، أنتي عايزة تكوني بتي ولا لأ ..قالت لي عايزة ..قلت ليها بس امسكي في الكلام ده قوي ، وأي زول بقول ليك بت الحراام ، قولي ليو أنا م بت حرام أنا بت ميرا ، اوعك تخافي أو تترددي ، إذا كان كبير أو صغير ، إياك تخلي يتجاوز حدودو ، مهما عاندك و طول في الكلام ، عنّدي أكتر منو لحدي م يسكت إياك تخلي يزعلك ، م تخلي زول يقول ليك بت الحراام ي تاليا ، سامعاني! ..هزت راسا ..قلت ليها أنتي بتي أنا ، وأنا عايزاك تكوني قوية زيي و تقدري تدافعي عن نفسك وم تخافي إلا من ربك ، فهمتي؟ ..هزت راسا ، ابتسمت و بوست راسا ..وقلت ليها خلاص كده ، ولا في حاجة تاني؟ ..قالت لي في حاجة ..قلت ليها احكي ..رفعت راسا عاينت لي وقالت لي بحبك ي ماما ♡..ضحكت وقلت ليها وأنا بحبك ي عيون و روح و قلب ماما ♡ ، يلا سرعة ارجعي كرسيك عشان نمشي ل فريال الكوفير ..رجعت كرسيها و ربطت الحزام و مشينا الكوفير ، قعدنا ، انتظرنا فريال لحدي م خلصت قريب للساعة 8 مسا ، و منها مهند جا داخل و نحنا طلعنا انتظرناهم في العربات ، بعد نص ساعة كده حتى طلعوا ماسكين في يدين بعض وبضحكوا ..تاليا عاينت ليهم بالشباك وقالت لي ماما أنا عايزة اعرس عشان ألبس فستان زي ده ..قلت ليها إن شاء الله لمن تكبري تلبسي فستان أحلى منو كمان ♡..قالت لي و عايزة معاه تاج كمان ، زي حق فريال ده ..قلت ليها حاضر ، ح البسك أحلى تاج ل أميرتي المدللة ، بس ربنا يحضّرنا ♡..اتلفتت عاينت لي و قالت لي يحضّرنا؟ ..قلت ليها يعني يطول في عمرنا ، عشان أنتي تعرسي وأنا احضر عرسك ..قالت لي آمين يارب ..و رجعت تعاين للعرسان لحدي م ركبو و اتحركنا ، مشينا الصالة و نزلنا ، رقصو الاسلو و بدو الهجيج و تاليا في نصهم مع عُمر و فريال ، وأنا قاعدة و بعاين لأم مازن من بعيد ..بعد م لقيت الناس القاعدين معاها كلهم قاموا ، قمت مشيت ليها و قعدت جنبها ..قالت لي يعني م لقيتي مكان إلا هنا! ..قلت ليها قصتك شنو أنتي ، عايزة تصلي لشنو يعني م فهمت؟ ..قالت لي شنو؟!! ..قلت ليها ليه قولتي لي بتي بت الحراام ، مع إنك عارفة اصلها و نسبها ، على فكرة انتي بتسيئي لنفسك بس و بتصغري منها ..قالت لي دي م حفيدتي!! ..قلت ليها م حفيدتك؟!! ، أمشي أنادي مازن يحكي ليك الحقيقة؟!! ..قالت لي ولا تنادي لي مازن ولا غيرو ، دي م حفيدتي يعني م حفيدتي!!! ، أمشي لصقي بتك في زول تاني! ..ضربت الطربيزة بيدي لمن اتخلعت وقلت ليها اسمعيني هنا! ، أنا حاولت اجيك ب التي هيا أحسن ابيتي ، أنا والله م عندي أخلاق عدييل ولا عندي صبر لحاجة بتتعلق بتي! ، خالتي فاطمة لا إله إلا الله ، بتي أنا تاني م تجي تشكي لي منك! ..قالت لي سجمي ، ي عديمة التربية أنا أكبر من أمك! ..قلت ليها لو الاحترام بالعمر ، كان احترمتي إنو بتي طفلة صغيرة وم بتستاهل المعاملة دي منك!! ..سكتت ..قلت ليها على كل ، بتي م تجي تشكي لي منك و هدي كلمتك ، لا عذر لمن أنذر ..و قمت وقفت ..قالت لي ح تعملي لي شنو يعني!! عان البت المعفنة دي كمان!! ، دي حقيقتكم الوسخة أنا م جبت حاجة من عندي! ..اتلفت عليها وقلت ليها خالتي ، ولدك أساس الوساخة زاااتا ، ف أنتي في نص الوسخ عشان م تعملي فيها نقية وبتاع ، أما بالنسبة ل ح أعمل فيك شنو ، ف أنا أختي بت أمي و أبوي كسرت يدها عشان زعلت بتي ، فما بالك أنتي ال ياداب جارتنا البعيدة ح أعمل فيك ، مجنونة أنا على فكرة و بعمل أي شي عادي و ماف زول بقدر يحاسبني! ..و مشيت خليتا ، كنت عارفة إني زودتها لكن لو م عملت كده ، أم مازن دي ما ح تخلينا في حالنا ..رجعت قعدت في كرسيني ولا كأنو حصل شي ، مع إني متأكدة متأكدة ح يحصل شي ...
*لا تلعب بأوتار قلبي حتى لا أرقص على لحن موتك!.