رواية أرهقني الفجور الفصل التاسع والعشرون 29 بقلم نوسه حمد
في يوم من الايام سمعت جرس الباب بيضرب وما من عوايدو في الزمن دا يجونا ناس قلت لي ريان خليني بفتح انا مشيت فتحت الباب لقيتهم اهل علا انا لمن اتجمدتا في مكاني بقيت اتمتم ماعارفه بقول في شنو دخلت المطبخ وانا برجف اتصلت علي شهاب قلت ليهو تعال. سريع اهل علا ف البيت قال لي اهل علا الجابهم شنو وعرفو البيت من وين قلت ليهو ما عارفه اي شي اتصرف تعال وقفلت الخط طلعت قعدتا معاهم ورحبت بيهم باركو لي زواجي وفي الطربيزه كانت في كتبي لاني كنت اقرا حسيت ام علا بتعاين لي حاجاتي بحسد وغل جواها بس ما اشتغلت بيها بقيت اتحصن دقايق وشهاب جا سلم عليهم ورحب بيهم وقال لي جهزي الفطور مشينا انا وبتي المطبخ جهزنا الفطور فطرناهم وشربو الشاي والقهوه ولسه ما نطقو حرف شهاب قال ليهم عرفتو بيتي من وين وبقا يسال فيهم قالو ليهو عرفنا من ابوك وهو زاتو جا معانا انا انخلعتا وشهاب انخلع طوالي اتصل علي ابوهو اظنو قال ليهو انا جاي ودي كانت أول زياره لي ابو شهاب في بيتنا شهاب من الفرحه نسا اهل علا زاتهم قال لي ماشي اضبح لي خروف ما تابع كلامو ابوهو جا داخل بي خروفو مطبوح وجاهز انا غلبني البعملو مشيت ناديت ام ريان جات ما شاء الله قالت لي اقعدي بس مع الضيوف ودخلت جوه ظبطت اللحمه والاكل ابو شهاب قال لي انا فاطر اخدو راحتكم ما تستعجلو عملت ليهو قهوه ومشيت ليهو في الغرفه البهناك كان بصلي قلت ليهو ابوي كيف مالو ما جا معاك قال لي ابوك كويس والله بقا مشغول مع ابو زميلتك وقال بجيكم هو وامك براهم قلت ليهو تمام شهاب يدخل ويمرق ويقول لينا اعملو كده وما خلا حاجه ما جابا وما شاء الله ام ريان وريان ماقصرو عملو الاكل اشكال وانواع اكرمناهم وما خلينا حاجه والباقي شهاب اتصل لي صاحبو جا وداهو المستشفى ووزعنا للجيران وقعدنا بالعصر كده نتونس ابو علا طوالي بدا يتكلم عن المراهقه وطيش البنات وانو علا كانت طايشه واتلمت علي شله م كويسه وحصل الحصل وانها في السجن عيانا وروحها طلعت وبتبكي دم وانها ندمت وتابت وكلام كتير مقدمه طويله وعريضه وامها كذالك شهاب قال ليهم ربنا يفك سجنها وترجع ليكم قال ليهو نحنا جينا عشان الموضوع دا عرفنا انو مرتك الرافعه فيها البلاغ شهاب قال ليهم مرتي دخلها شنو وما اضررت منهم الاضررو اهل سعاد وصفيه ديل هم اساس القضيه وهم الرافعنها قالو ليهو الاتنين بسمعو كلام نسيبه وبعملو ليها اعتبار نحنا عايزين نسيبه تخش واسطه وتدخل وتقول ليهم اتنازلو حسيت بي غضه في حلقي ابو شهاب قال لي يابتي عفا الله عما سلف اتزكرت منظر سعاد لمن ولدت في الشارع قلت ليهو ابوي تتزكر البت الولدت في الشارع ديك قال لي اي مالا قلت ليهو يلا البت دي بسبب علا وقوادتها ليها شربتا حاجه وفي واحد اغتصبها وحملت وولدت بالحرام وانتهي بيها الامر انتحرت ودا كلو كان بتخطيط علا امهت طوالي نطت لي في حلقي قالت لي مستحيل بتي تعمل كده دا كلو كذب وتشويه لي سمعه بتي اي بتي غلطت وبارتهم بس ما عملت البتقولي فيهو دا قلت ليها انا زاتي لو قالو لي علا عملت كده مابصدق بقول كذب بس الحاجه الانتو ما عارفنها الكلام دا كلو مصور والضابط الورانا ليهو ونحنا زاتو اتفاجئنا زينا زيكم وعلا غلطت ولازم تتعاقب وحتي لو كنت دي انا الغلطت لازم اتعاقب وانا القضيه والله ما رفعتها انا جابوني شاهد قلت الحاجه الشفتها والحكيتو ليكم دا كلو عرفتو فيما بعد وانا والله بتمني انو عقوبتها تكون مخففه وما تقعد كتير في السجن وتطلع علا تانيه علا اللعبتا معاها وهي طفله ما علا الهسي دي حسيت ابوها اتكسر شديد وفي خشمو الف كلام مفتكرني انا سبب في دخول بتهم السجن وانو بتهم التهم مثبته عليها
ابو شهاب اعتزر ليهم قال ليهم بتي دي مافي يدها حاجه وانو ما كان عارف الحقايق دي والحصل لو كان حصل لي بتهم ما كان ح يرضوهو واتكلم معاهم كلام حار طلعو زعلانين واعتزر لي شهاب ولي قال لي ما كان فاكر القصه كده فهموهو موضوع تاني وابا يورينا قالو ليهو شنو بس كويس نحنا ما سكتنا واديناهم الحقيقه يزعلو ولا يرضو ابو شهاب اعتزر مننا وقال راجع الحله شهاب مسكو بس رفض قال لي بعد ربنا مرقك من الحله ماعندك شغله فيهم وبي ماضيهم يحلو مواضيعهم بعيد منك وانو ديل كذبو عليهو وفهمو كلام غير الحقيقه ولو عارف الموضوع من الاول كده ما كان جا معاهم حسيتو منحرج قلت ليهو عادي يا ابوي وانت الليله نورتنا والله قال لي بنورك يابتي يلا فوتكم بعافيه خلو بالكم من نفسكم وفات ابو شهاب زول هادي وراقي شديد
يوم كان متعب وكابوس بس رغم كل شي كنا مبسوطين بي ابو شهاب شهاب قال لي ما شايفين بتهم غلطانه ودا اكبر غلط مفترض هم يخجلو عديل مش افتشو اطلعو بتهم وبتهم كانت بتعمل في الحركات دي قدام عينهم مالهم ما نصحوها ورجعوها لي صوابها بعد دمرت البنات قالو تابت وحسو بالذنب صدقيني البت دي لو طلعت هسي من غير ما تتادب ح تطلع بي فهم انها تنتقم وهنا في محلك دي ح تصلك لكن لو ضاقت السجن واتأدبت استحاله تغلط تاني وطلع تلفونو اتصل للضابط وحكا ليهو الحاصل قال ليهو الناس ديل ما بفهمو ميه مره فهمتهم انو انتي شاهد بس ماعندك علاقه بالقضيه بس هم عشان عارفين علاقه زوجتك بي صفيه وام سعاد مفتكرين انهم ح يأثرو عليكم بالكلام والمشكله بتهم الوحيده الكميرات مثبته عليها اي اعتداء وانها هي الخدرتهم يعني هي متورطه اكتر من اي زول ولو قدرو طلعوها انا بقدم استقالتي واعتزر لي شهاب وقال ليهو هانت كلها ايام وتسمع عنهم كلهم في خبر كان ولو القاضي حكم لو جا الجن ما بطلعو منها
مرت الايام والامتحانات قربت ودعتا ريان ودمعتي في عيني ريان بت طيبه وهاديه وحنونه واهلا ناس طيبين ومحترمين شديد.
اهلي جهزو لي البيت عشان الولاده نزلتا الحله بعد غياب تسعه شهور ابوي كان فرحان بي شديد وكنت مشتاقه ليهم شديد حسيت روحي ردت لي لمن شفتهم شهاب قال لي اخليك معاهم بجي الصباح انا لمن قلبي وجعني قربت اقول ليهو ما تمشي اليوم مرا علي كانو سنه ما متعوده انو شهاب يكون بعيد مني لو ما خجلتا من امي كان قلت ليهو تعال المهم لي بليل غلبني النوم وخلاص اخلاقي ضاقت وامي حست بي متوتره قالت لي مالك بسم الله قلت ليها مافي شي قالت لي لو حاسه بحاجه وريني غلبني اقول ليها انا متعوده علي شهاب بس امي حست بي قالت لي دايره راجلك انا لمن خجلتا ما رديت قعدت تضحك قالت لي ياها حال الدنيا مابزعل لو قلتي دايراهو قلت ليها لا يمه العفو مشتاقه ليك اكتر من اي زول انتظرت الصبح اذن بفارق الصبر اتصلت علي شهاب قال لي غلبك النوم صاح قلت ليهو عرفت كيف قال لي انا زاتي في طريقه اجيكم ابتسمتا وامي عاينت لي قالت لي خلي راجلك يجي النقوم اجهز ليكم الشاي قلت ليهو تعال واظنو شهاب كان ورا بابنا خمسه دقايق لقيتو في وشي هو يضحك وانا اضحك امي ظبطت لينا الشاي بي زلابيه والجو كان جميل شديد بعد شربنا الشاي شالتنا نومه ما صحينا الا العصر
كنت واعده صفيه اجي المدرسه وكلمتها اني جيت لمن صحيت العصر لقيت امي وصفيه شغالات اعملن في الغداء امي قالت لي بالغتي الراجل تلقي مات بالجوع لمن شفت صفيه العبره خنقتني بقت ضعيفه ولونها قلب هي لمن شافتني لمن شهقت قالت لي بقيتي حلوه يا نوسه ما شالله غايتو الا تتحصني وكنت مشتاقه ليها اتونستا معاها كتير لدرجه انو نسيت شهاب لمن هو جا لاحقني وصفيه قيلت معانا وشهاب اتصل للضابط قال ليهو كلهم التهم اثبتت عليهم واتسجنو عشره سنوات وعلا خمسه سنوات انبسطنا شديد انو اخيرا اتخلصنا من هم والسجن اكيد ح يأدبهم
مرت الايام وشهاب اجز لي امتحاناتي وكنت تعبانه شديد وخلاص في اخر ايامي وع وش ولاده ومتوقع الد في اي لحظه وولدتا بعد اخر جلسه امتحان وجبتا لي ولد قطعه من شهاب سميناهو محمد علي ابوهو وشهاب كان طاير من الفرحه واهلو ماقصرو مني وعملنا سمايه عزمنا فيها كل الناس بعد سما لي رجع الشغل قربتا اقول ليهو سوقني معاك قال لي امي انو اربعين يوم كتيره الايام الاولي بس وبجي يسوقني وطبعا بتي الشغاله ماقصرت مني وامي حبتا شديد بالذات لمن عرفت انها يتيمه
صفيه قالت لي بفتش لي شغل وشهاب كلم ليها ناس المستشفى واشتغلت في الاستقبال وكانت مبسوطه شديد وفاجأتني بالدكتور العمل ليها عمليه الاجهاض انو اعجب بيها وانا كنت خايفه عليها شديد خايفه يكون بكذب عليها وبالاخص هو دكتور الله اعلم افكر اتزوج بت مطلقه وهي كانت طايره من الفرحه وما قدرت اقول ليها اي كلام وقلبي موجعني ياربي صفيه ح يتزوجها ولا ح يغشها ويستغلها ……….يتبع.