
رواية بلسم الفصل الثالث والعشرون 23 بقلم هند الهيباني
كنت راقده وبالي في الحصل دا...
بلمح البصر....
كأنو ما امس كنت في بيت ابوي وبفكر في الشغل والمعيشه
والان وبعد مرور ايام بسيطة قاعده في مكان تاني ما اتوقعت اني اكون فيه في يوم من الايام.
مع انسان ما اتوقعت انو يكون بينا كلام.. لي انسان بقى اسمو مرتبط بي اسمي....
قدر شنو بنكون راسمين حياتنا بصورة ومرتبنها وبنخطط لي حاجات بس ارادة ربنا تجي تغير كل شي...
قدر الإنسان ما كان يتوقعو في يوم...
سمعت صوت أقدام.. رفعت راسي ولقيتو واقف قصادي...
حسيت بي خوف وضربات قلبي بدت تزيد...
قال لي قومي ارح وراي..
بقت الااااف الأفكار في راسي تودي وتجيب..
موديني وين ولشنو وفي شنو...
كنت ماشه معاه بس م نفسي امش...
وقف جمب باب غرفه...
بقيت اخت في الاحتمالات.. معقوله خلاص.
ما كفاي بيت واحد بجمعنا كمان غرفه!
نطق اخيرا وقال لي دي غرفتك... ونهاية الممر الحمام...
وهناك غرفتي....
مشى... وخلاني واقفه مكاني. دخلت الغرفه بعد دقايق..
وبقيت افكر في سؤال ما لاقيه ليه اجابه..
عرسني ليه يارب!
كنت مفتكرة انو اعجب بي وما لقى طريقه عشان اقبل بيه
الا دي. بس تصرفه الان ابعد الاحتمال دا نهائيا..
وخلاني لافه في دوامة أفكار ماقادرة اعرف ياتو فيها الصاح
وللأسف قبل نتزوج كان غامض ومامفهوم والان زاد غموض اكتر..
غموض عاجزة تماما عن فك شيفراته...
غرفه فيها سرير وتسريحه ومكتبه....
دخلت...
وختيت شنطة ملابسي جمب السرير...
خزانة كان فيها ضلفتين ودرجين تحت...
فارغة تماما زي حياتي الان...
طالعت الزفاف من البيت كان..
بمساعدة دينا وخالتو فاطمة...
طلعت لي بجامة وتوب عادي
لبستهم وقعدت...
احساس بالخوف راودني...
حاجه جواي قالت لي رميتي نفسك ليه رمية زي دي..
رمية يمكن ما تقومي منها عمرك كلو..
شنو الرما**ك في انسان انتي بتخافي منو...
ما بتعرفي عنو اي شي ومتزوجاه كمصلحة لفك دين
منو الزمن دا البعمل كده...
احساس الندم البراودني بعد ما اعمل الحاجه واخلصا
ولا عمرو نبهني قبل أعملا بس بعد اتصرف ويحصل الحصل
بندم على اي شي..
على الكلام... وعلى القرارات وحتى ردات الفعل...
مهمومه جدا... عايشه حياة ما اتمنيتا
ولا قادرة حتى اعرف ولو بنسبة واحد في المية انا هنا بعمل في شنو وموقعي ح يكون شنو وليه الإنسان دا اختارني بالتحديد عشان اقوم معاه بالدور دا... وهو ظاهر ماعندو اي حاجه لي...
مجرد التفكير بالشي دا حا يجنني..
رقدت في مكاني وانا حاسه راسي حا يتفج**ر.
في محاولة يائسة للنوم....
#مازن...
تم الأمر. ودفعت الدين الكان عليهم....
بس ياداب القصه بدت من هنا..
ومن عند دي النقطة...
من اليوم كل شي حا يتغير. ....
راقد زي كل يوم وانا بعاين في سقف الغرفه....
عارف تماما الحا اعملو....
وماشي زي ما مخطط ليه..
بحزافيره.. بسهوله ويسر....
#اسعد
امي... انتي وسمر جيتو ليه مش سمر دي عندها حصص مع بلسم؟!
اماني :البت بلسم وقفت من التدريس عندها جامعه قالت ياهو صرفت ليها قروشا وكل شي..
اسعد :بالله؟! طيب ورايا شنو؟!
اماني (بتلعثم) :رايا في شنو.
اسعد :قررت شنو بخصوصي..
اماني :لسه قالت عاوزة وقت عشان تفكر. استخارت ياداب وقالت بتفكر ماتستعجل ياولدي القرارات الزي دي اصلا في بنات بياخدو فيها مدة.......
اسعد :خير يا امي انا بس وريتك مجرد ما ارجع بتصرف بي طريقتي يا انتي حركيها لي...
مشى وخلاني انا وسمر بنعاين لي بعض متحيرين.....
#فاطمة
احساس بالفراغ بعد ما مشت بلسم...
الايام كانت بتمر سريعه. من بعد آخر حدث داك وانا حاسه بي انو في شي ما تمام.
بلسم اتغيرت تغير توتلي..
بقت دايما ساكته... سرحانه وبالا بعيد مامعانا.
بتفكر شنو ومالا ماكنت عارفه بس سرعه العرس
وعملو بالطريقه دي وشكلتهم اليوم داك ونفخة ابوها خالد ومن بعدا موافقتو وقبولهم في نفس اليوم بعد المشكلة فتح باب الااف الأسئلة في راسي..
وجواي أمنية واحده انو ورغم كل الأفكار دي تطلع ما صاح وبلسم تكون مبسوطة لأنها ماتستاهل الا كل خير.....
لان اي زول يحتاج ليها بيلقاها
شايله هم اخوانا وهم ابوها...
والبحتاج ليها بلقاها في وشووو..
بتساعد لابتكل لا بتمل وقلبا ابيض...
وبتحب للناس الخير يارب ما ترميها مع زول مابستاهلا
واسعدا يارب...
حياتي اتغير فيها الكتير من بعد الله بسبب نصايحا
والان يوم عن يوم وضعي مع طلال ماشي في تحسن...
واتغير في علاقتنا اكتر...
من بعد ما كان بجي في الشهر مرة..
خلال الأسبوع الواحد دا جى تلاته مرات.
ما لحقت حتى احكي ليها المستجدات...
بس يلا أهم شي الان انو تكون هي سعيدة...
وان شاء الله كل الحى في بالي من بعد شوفتا كده
تكون اوهام ساي وتكون مبسوطة يارب.....
#بلسم...
ماكان جاييني نوم نهائي...
قمت على حيلي حسيت بالعطش......
اتحركت بخطوات بطيئة وانا بطلع...
ممر مظلم ما كان في غير نور خفيف متسلل من غرفتو
الوصف لي عليها قبيل....
نزلت تحت بحذر شديد وانا بقدم رجل وبأخر التانيه وحاسه
بي خوف شديد، بجر في توبي عشان مايقع...
وبنزل فيه مل مرة اكتر.. لحد ما..
دخلت المطبخ... شلت كباية قزاز ..
لقيت في مبرد مليت منو الكباية..
وما ان شربت اول جغمة...
حسيت بي ثقل الجو.. والمكان حولي..
التفتا وراي شفتو في وشي... رميت الكباية من يدي
وما وعيت الا بي صوت تكسرا في أرضية المطبخ.
#مازن..
جاتني امي في الغرفه...
وهي بتفتش عنها...
ما لقتا...
سكتت مسافه.. وبعدا قالت لي مازن.. مايكون ألفي بالي صاح...
ماكان عندي ليها جواب غير اني رجعت بعاين لدا السقف الكنت بعاين ليه من قبيل...
اتكلمت معاي كلام كتير. نصو ما سمعتو ماعشان شي..
غير انو الكلام القالتو لي داير زول عندو مشاعر وانا ماعندي ولا ذرة من الاحساس دا...
طلعت وهي بتردد ربنا يهون.. ربنا يهون...
وبعد مدة هدوء البيت... الكل شكلو نام من التعب..
بس صوت أقدام...
قادر اميزا من بين كل الأصوات الهنا..
يمكن قعادي في السج**ن خلى حاسة السمع عندي قويه..
وكيف لا وانا قاعد في مكان...
مافيه رفاهيه اكتر من انك تعرف الجايي دا..
الجايب الاكل.. ولا دا سجي**ن جديد...ولا غيرهم..
سامع صوت اقداما... خايفه مترددة..
قمت على حيلي ونزلت تحت.. واتجهت صوب الصوت...
بحركة بطيئة وقفت وراها ولحظة التفاتا...
رمت الكباية على الأرض...
بعاين للقطع المتناثرة في كل أرضية المطبخ..
رجفتا... ومعالم الخوف البادية عليها...
رجعت لي ورا وبقت تتمتم.
واتلصقت مع الادراج...
حركات كأنها في فلم رعب.. وانا..
#بلسم
حاسه نفسي حا ابكي في اي لحظة...
ماقادرة اقعد لا قادرة امش لاقادرة اتصرف اي تصرف..
عاوزة اقول كم حاجه و ماعاوزة اقول شي في نفس الوقت
للسبب دا بقت تطلع مني الكلمات. على شكل تمتمة مامفهومه..
عاينت في طرف المطبخ لقيت مكنسه وخمامه شلتهم واتجهت صوب القزاز المكسور.. في محاوله اني ألمو بس رجفه يدي ورتني اني محتاجه ألم تشتتي وخوفي واني اثبت..
واقفه في نفس الحته لي مده كل حته فيني بترجف..
جى عليي وانا كنت برجع ورا..
لحد ما وصلني مد يدو باتجاهي وانا بهز في راسي..
مسك مني وبقى يلم فيهو هو..
وانا لسه في نفس الحته برجف.
بعدا فتح الدرج وطلع كباية تانيه ملاها موية ومداها لي.
ماكنت قادرة استوعب البحصل..
كان فوق قدرتي على التوقع.
يلم هو.. والان بمد لي موية
تخبط وحاله من الحيرة اتملكني...
بقيت واقفه سرحانه في الكباية..
ماقادرة أمد يدي من الخوف.. احساس الخوف اللي بخلي كل أطراف الجسم ماتطاوعك للحركة..
وتلقى نفسك بقيت ماقادر تحرك ولو اصبع.
وكانك فقدت الارادة...
في ذات اللحظة ما. اوعى على نفسي الا وهو بمسك يدي
وبخت فيها الكباية ويمسك يدي التانيه ويضمهم الاتنين على الكباية وهو بقول لي اشربي...
شربت... خوفا وانا حاسه بالاف المشاعر..
والأفكار الملخبطة بتضرب عقلي..
عقلي بقى ماقادر يميز بين اي شي..
شربت وانا ماعارفه الموية نازله وين...
شربت غصبا عني جغمتين فكاني بعدهم واتحرك قدامي...
بعاين ليهو وهو مديني ضهرو عشان اخد نفس بعد طلوعو...
بس وقف جمب باب المطبخ وقال لي...
#يتبع..