رواية علاقة سامة الفصل الحادي عشر 11 والأخير بقلم ورود الخالدي
دعاء:
بعد هذا اللقاء اكثر من شهرين اني مشفته لان قررت بعد ما اروح لاهله لان بعد ما اتحمل اي توتر بيني وبينه ولو حتى بالنظرات..شخص غريب وتصرفاته اغرب يعني شنو يكول هالعبارة ويتصرف هالتصرف ويروح بدون ميفسرلي شيقصد..طول هالوقت مكلف نفسه يدزلي رساله يشرحلي بيها ولو باختصار معنى جملته ذيج الي يومية اعيدها على نفسي حتى اكدر افسرها وكل تفسير اطرحه احسه مو هو الي يقصده شهالحيره يربي شهالقهر..
المهم طول هالشهرين جانت الايام تمر عاديه الى ان ساءت حاله ماما الصحية ورجعت تتعب وتختنك ورجعنا اني وهيه يوميه نروح لدكتور شكل وتاخذ ادويه بس متتحسن اخير شي كامت تتعب حتى متكدر تراجع اقل مشي تختنك ..واخر تشخيص للاطباء كالو عدها تصلب بالشرايين وبداية عجز بالقلب لازم ترتاح وتلتزم بالادويه وتنام بالفراش طول الوقت لان الاجهاد موزين عليها..وباقرب وقت لازم تسوي عمليه قسطرة بس ماما تخاف ورفضت رفض قاطع انه حتى تفكر تسوي عمليه..
خلال هالفترة زارتنا مرة اني شايفتها قبل بس مو كولش اعرفها يعني جايتنا كم مره بس ماما جانت تكعد.وياها.وحسب كلام ماما هي من اقاربنا من نسابه خوالي .اسمها ام سيف..وكعدت ويه ماما ومن طلعت ماما صاحتني وكلتلي
المرة هاي تعرفيها مو
فكلت الها
غير. نسابه خوالي من الكوت
..وفاجأتني وكالت
جايه تخطبج لابنها الوحيد معدها غيره ومالهم وحلالهم كوله راح يضل اله هو يورثه لان همه يملكون بساتين ع الشط والولد عمره27 ومخلص كلية وع ابواب تعيبن وحالتهم توب
وشوفتني صوره بالموبايل الظاهر المرة دزتهن الها ع الواتس من جانن كاعدات وبقت تمدح بيهم وتكولي يدللون المرة وانتي راح تصيرين جنتهم الوحيده يخلوج ملكة زمانج لان المرة ممخلفة بس هالولد..اني رفضت كلامها وكلت الها شنو اتزوج واحد ما اعرفه بس هي بقت تلح اكلت راسي بالملحة وتكولي قسمه زينه لتضيعيها من ايدج واني مريضة واريد ازوجج واطمن عليج خاف اموت وكل مرة جنت اعارض وارفض كلامها اخر مرة كامت تبجي وتكول انتي تردين تموتيني من القهر..ولان خفت عليها كلت الها راح افكر انطيني مجال فترة افكر بالموضوع فسكتت على امل اوافق
وطبعا خوالي يرحون ويرجون كل فترة حتى يحاولون يقنعوها تسوي عمليه وخالتي هم تعبت ماكو نتيجة
ملك وعيالها هم حاولو يقنعوها وزاروها اكثر من مره.. مره اجه ابو محاق وامه وبنته ومرةابنهم مصطفى وجنتهم هم زاروها وحجو وياها ماكو فائدة
وملك تحجي وياها وتفرفح وتبجي وتحاول تقنعها بس نفس الشي ..
الى ان جتي ام محاق وياها محاق حتى يزوروها وبلكي يقنعوها هالمرة بالعمليه
المهم كعدو يسولفون وسمعت محاق يكولها
خالتي تره انتي مو اول ولا اخر وحده تسوي قسطرة تره عمليه القسطرة صارت عادية مثل قلع السن
خاله ما اسوي ادري بنفسي اموت بيها خليني اطمن على بناتي واسترهن واموت بفراشي
هههه تموتين شنوافه عليج خاله متوقعتج هالكد جبانه شنوقابل عجوز فايته بالتسعين وخاف متتحملين عمليه تره الحجية الله يرحمها سوت العمليه وعمرها بالثمانين وكامت وعاشت سنين وراها كولج انتي عمرج ميتحاوز اربعين
ماما ضحكت
يااا ولك محاق ناصب عليه هاي يا اربعين تره عمري فوك55 سنه
مستحيل اني توقعتج اربعينات عمي ورده ممبين عليج
هو يحجي واني ميته بداخلي من الضحك ابو درب يفوتلها من درب بعدها زغيره حتى تقتنع تسوي العمليه بس هي ردت..
وليدي الموت ميعرف زغير وجبير واني عشت وشبعت من الدنيا بقه همي بس استر بناتي واطمن عليهن بله ملك عدكم امنت عليها..والحمد لله و دعاء هم عن قريب افرح بيها جاييها خوش اوادم..بس فروحه تبقى كاسرة ظهري
من حجت ماما مرت لحظات صمت.. شفت ملامح محاق هادئه وشفته طلع جكارته وقبل ميشعلها كال:
ليش دعاء مكايلتلج اني رايدها!!!
شنو!!
خالتي..لاشنوولا منو اكيد بنتج كايلتلج ماكو بنت متحجي ويه امها بهيج موضوع مهم بس الظاهر الناس الجايبن عليها احسن من عدنا
ماما وامه بقن وحد تباوع للخ صافنات ع كلامة ويباوعلي وقبل مترد اواني ارد كام وكال
خلفلله عليكم
ومشه خطوات وبعده بالممر ماما صاحت عليه
ولك يمه تعال نسولف
طلع بسرعة ..اني حسيت كلبي حيوكف هذا شيحجي منين جاب الجذب وشلون يحجي بثقه ام محاق مثل الفرحانه بكلامه كالت
وج خاله دعاء صدوك محاق حاجي وياج وكايلج يريدج ما اصدك يقبل يتزوج كتلت نفسي واني الح عليه سنين وسنين وهو رافض
وماما جملتها:
وج دعاء ..ليش متحجين ليش متكولين الولد رايدج تردين تفشليني وياه وويه اهله
يوم شهالججي منين جابه والله ما ادري اصلا لاكايلي ولاحتى فاتح وياي هيج موضوع ليش يجذب مادري. حيل جنت عصبيه من حجيت وكملت:
ابد مو من حقة يذب الحجاية ويروح وعفتهن ورحت وراه ركض..حسيت من حقي اوجهه..ومن فتت لبيتهم شفته بالحديقة يروح ويرجع بالممر ويدخن بعصبيه عبالك منتظرني ويعرف راح اجي وراه اول متقربت كتله
محاق انت شسويت منين جبت هالحجي
بسرعة لزمني بعصبيه ودخلتي للاستقبال وسد الباب هالمرة مخفت كتله
احجي..لتذب الحجاية بدون تفسير
شو هذا لزمني من شعري وكلي
سكتي..وجاوبي بس ع سؤالي:
منو هذا الخاطبج احجي
هدني شعري..شعري
لج احجي
هدني واحجي
هدني وكال
بسرعة لا اموتج
كرايب خوالي!!
تغيرت نبرة صوته كلي :
كرايبكم يعني..شايفج وشايفنه..تحبيه؟..انتي تحبي يعني!!
جان صوته مثل المتألم من سالني فكتله
لا والله مشايفته ماما بس شوفتني صوره
لا مستحيل ما اصدك انتي كلتي ما اتزوج اله شخص احبه
اي صح كلت بس ماما مريضة وبقت تلح عليه حتى اوافق فكلت اله افكر
تفكرين..تفكرين دعاء هو تفكرين بموضوعة واني مفكرتي بيه مفكرتي بكلبي هذا الي جنت قافله سنين وسنين حتى قفالته زنجرت وحضرتج جيتي وفتحتيه وهسه تفكرين تعوفيه وتصيرين لغيره!!
محاق شعليه بكلبك اني هاي شدحجي
شعليج بكلبي مو ؟تغشمين نفسج !!
اغشم نفسي شنو محاق انت شنو تحبني يعني مدا افهم ومن شوكت هالحجي؟
من اول يوم شفتج بيه!
مستحيل..لك انت تحجي صدوك اكيد ناصب عليه شنو احبج شنو كلبي فتحتيه شنو من اول يوم اصلا حتى ملايكلك هالدور!!
لج يادور هذا
دور الحب..الي دتمثله عليه هذا ياحب محاق لك من عرفتك لحد الان جرعت وياك السم بكل لحظة جمعتنه يوميه تثبتلي انه انت محتقرني وتكرهني بطريقه شكل بعد هذا ياحب..ياحب لخاطر الله
اي احبج من اول يوم شفتج بيه ادورين ع اختج ..وبقيت افكر بيج الى ان شمرتي فلوسي عليه وكلتيلي ما اريد منك صدقه تأكدت انه اني احبج.وقررت افاتح اهلي وادزهم يخطبوج بس ..اختج..اختج السافلة ملك خربت كولشي ..دمرتني ..دمرت كولشي حلو بداخلي
محاق!!
لج يامحاق انتي تدرين شصاير بمحاق..من يوم الي جيتيني بالليل وحجتيلي عن اختج ملك ومكسورتها ويه مجد واني يوميه ادخن 4 باكيتات من القهر..كلبي يوميه يوج وينطفي..متتخلين شكد تعذبت !! بسبج؟؟
اني شعليه شنو ذنبي يعني؟؟
ذنبج انه ملك اختج...من يومها واني كلما اشوفج اثنين بداخلي يتصارعون كلبي اليحبج ويتمنى يخلص العمر وياج وعقلي اليكولي ذني بنات زباله وهي مثل اختها متختلف عنها بشي
بسرعة بجيت كلي
ها بجيتي وجعتج الاهان
ولزمني من زنودي
يمكن توجعج بس من تسمعيها بس اني عايشه وياي كل لحظة كلما اريد انساها اشوف اختج كبالي واتذكرها ومن اشوفج احس دماغي صار نار لان ما اكدر اشرحلج الي بداخلي..كل رد فعلي يكون اتهمج واخليج بدائرة الشك حتى بس اسمعج تبرريلي وتكوليلي..اني غير اني مو مثلها..جان تبريرج يبرد كلبي ساعات ويرجع يشتعل من جديد..
وهسه شنو الجديد وشنو الخلاك تتنازل وتشرحلي
لان خلص..بعد ما اتحمل..ما اريد عقلي يفكر ..كلبي انتصر عليه بالاخير اريدج ميهمني اي اعتبار اختج زينه او موزينه ميهمني احبج انتي وبس واريد اكمل حياتي وياج..
محاق انت كل هالوقت محملني ذنب اختي يا اخي حتى رب العالمين يكول لاتزر وازرة وز اخرى
للاسف اي حملتج ذنبها..
وهسه شنو ..مفكر تتزوجني وبعدك محملني هالذنب مسوينه شي وحتى لو اني قبلت..راح تبقى علاقتنا سامة للابد..وراح ابقى اني ادفع ثمن شكك وافكارك من حياتي ومن سعادتي..
لا..مو لهلدرجة اني مجرم حتى ابقى طول العمر اعذبج متخذت قرار الزواج او خطوة اعتراف مني الا واني مقرر انتي غير وانتي تستاهلين. اتغاضى عن كولشي
شهالغرور محاق ليش انت منو حتى محسسني متفضل عليه بحبك الي
تعصب اكثر وضغط ع زنودي حيل وكال
لج شنو متفضل اكولج اني احبج ومتعذب بسببج كل هالوقت ومقرر نتزوج باقرب وقت وانتي تفسرين كلامي غرور؟!!
اعتذر منك محاق لاادز اهلك ولا تخطبني لان مراح اوافق واعرف راح تكول مقررة تتزوجين هذا الي خاطبج احب اكولك لا انت ولا هو راح اقبل بيكم ذاك ما اعرفه وانت اعرفك حق المعرفة
هدني وكال:
هاا ولان تعرفيني حق المعرفة رافضتني
اي ..صح ..من كل عقلك تجي بعد كل الي شفته منك تكولي احبج واني اسلم واكولك..تعال اخطب هذا يوم المنى
زمخ بيه وكلي
لج حتى الله ينطي فرصة ثانيه وانتي قافلتها عليه
لانك متستحق مني فرصة بعد
تغيرت ملامحة وابتسم وكال:
ههه..لا اشو استحق وراح انتظرها
تنتظر ع الخالي بلاش تره
عفته وطلعت لان ماكو بعد كلام نحجي..ومن طلعت من بيتهم لاكتني امه مبتسمه هاي شبيها هم مثل ابنها مصدكة ..وبس وصلت يم ماما اكلت كلبي ليش مكلتي وليش مكلتي
يوم والله ماكو هيج شي محاق ممحاجيني ولا كايلي رايدج
يعني شنو يجذب وليش يجذب
اي يجذب يريد يفركش خطوبتي وبس
ليش شعنده وياج
يوم مخبل والله مخبل ..فجاة جاي يكولي شنوتنخطبين واني احبج واريد اكمل حياتي وياج!
يااا وج ياريت ياريت
يوم لتتاملين اقبل لا بمحاق ولا بهذا كرايب خوالي ما اتزوج هسه واذا تضغطين عليه اسوي بنفسي شي والله
شافتني احجي وصوتي مكسر عبرات سكتت
كعدت بغرفتنا الي جنا نكعد بيها اني وملك وبقيت افكر بكلام محاق ..يربي اكو واحد هيج يحب شنو من حب هذا..وتذكرت ملامحة وصوته ومتاكدة كل كلمة كالها حقيقية وطالعة من داخلة يكولي متعذب من وراج منو المتعذب بالضبط اني لو هو الي شبعني قهر وضيم وظلايم..مستحيل اقبل بيه لان نوع علاقتنا راح يكون علاقة سامه والعلاقة الي من هالنوع ملازم تستمر ولازم تنبتر
وطبعا حرصت انه ما اشوفه بعد ومتجمعني بيه اي فرصه ..عشر ايام مرت لاشفته ولا اتصل ..بس لاحظت هو صار يفتح ستورياتي هههه بعد وكت..شنو جان حلمان وكعد
ومر شهر لاخ ماما اخذتها خاله للدكتور واخيرا الدكتور قنعها تسوي قسطرة بالناظور وشرحلها انه هذه العمليه موصعبه ويكدر حتى يجريها الها بوقت قصير وتتعافى منها بسهوله وفعلا سوت القسطرة صح صحتها مرجعت مثل الاول بس ع الاقل صارت تكدر تمشي وتطلع مرات تروح يم ملك وترجع وخالتي مرات تاخذها يمها تغير جو وترجعها بالليل ..
ومرة من المرات شفتها جايه مخبوصة من يم بيت ام محاق
الله يستر ربي يصبرهم ويبرد كلوبهم بحق السميع العليم
وصلت المغرب وكامت تدعي ومن خلصت كلتلها شبيج يوم
وج يمه مصيبه مصيبه الله يستر
شكو يوم
وج محاق من البارحة الصبح طالع بسيارته محمل اخشاب للرمادي ولحد الان ماكو خبر منه
من البارحة!
طبعا كلبي وكع مني بس كلت
ماما يجوز عطلانه سيارته
وج واذا عطلانه ..خو يتصل باهله...جاي يتصلون عليه موبايله مغلق من البارحة
شنو رايح وحده
اي وحده محمل هو كل مرة يدز سواق المعمل وعمال وياهم بس لان للرمادي..والطريق خطر محد قابل يروح ومحمل ورايح وحده..وج بيتهم مخبوص عمامهم وعماتهم وكولهم يكولون احتمال انكتل ذيج المناطق مو امان
شلون يروح وحده!
بعد هذا الي صار صخام الصخمج سميرة
عفتها تصلي وتدعي وفتت للغرفه مدري شبيه روحي انعصرت و بجيت بس بداخلي اكول لامابيه شي اكيد مابيه شي اصلا ما اتخيل الدنيا بدونه ...افكر وابجي واكول بس لا كلام ماما صح ومكتول الله ليكولها خطية كلي احبج واريد اخطبج ..واني رفضته...كلي اريد فرصة ثانيه كتله ماكو..ليش..ليش هيج كتله لو منطيته وقت لو كايلتله افكر عاد..ليش..ليش غبرة اني ثوله خطية..جان يحجي وصوته كوله الم وعذاب صح اذاني بس اني ليش قطعت ونهيت كولشي بموقف واحد..
وسمعت ماما تحجي بالموبايل وكمت ادعي يارب ..مابيه شي يارب الي ديصير حلم وراح اكعد منه
فتحت باب الغرفة اول مطلعت ماما كالت
حضريلي فوطتي وملابسي السود
ونزلن دموعي كدام ماما
ليش..ليش ملابس سود!؟..ميت..ماما ..محاق طلع ميت؟!!
اي يمكن ميت خطية مخابرين هسه ع ابو يكلوله تعال للمستشفى.. اكو سايق كيه مسوي حادث وميت من البارحة بالمستشفى تعالو شوفو
يجوز مو هو
شنو يجوز..حادث وسايق كيه ومن البارحة ميت اكيد هو
وطلعت ماما راحتلهم..
متت بجي جنت وحدي بالبيت ابجي بصوت مسموع واكول لا اعتراض ع حكمك يارب..بس ليش خليتني بهالموقف ليش راح عن الدنيا وجان منتظر مني بس كلمة ..
وبعد ماشبعت بجي فوك الساعة ونص خابرت ملك كتلها
هاا ملك طلع هو..طلع ميت يعني؟؟
لا..لا هسه خابر عمو يكول موهوه
الف الحمد لله .
وحسيت كلبي شويه برد ..من رجعت ماما وكالت؛
الحمد لله مو هو بس هم بعدها السالفه تخوف..
ولان ماما عدها تكمله علاج اخذته وتمددت. طلعت بره احجي ويه رب العالمين واكوله
يارب اترجاك رجعه لاهله سالم..يارب اترجاك بحق رسولك الكريم استجيب دعائي ورجعة بخير وسلامة..
نص الليل دك موبايل ماما ...رقم ام محاق ماما نايمه رديت
ها خاله..بشري
الحمد لله رجع محاق..الف الحمد لله
جان صوتها مبحوح مبينه المرة مفرفحة تفرفح على ابنها
الحمد لله خاله ربي يحميه الكم
خطية امج مريضة وفرفحت وياي طمنيها
ماما نايمه هسه اكعدها واكولها بس وين جان من البارحة خاله
والله مدري شكولج رايح يدز غرفه اخشاب اول مواصللهم بعده ممنزل الحمل سمع ابو البيت يخابر كايليله ابنك غرك...عاد قافل السيارة ورايح وياهم وجهازه هم ناسي بداخلها ومخلص شحن هالكد مانتصل بيه..
يااا ومفكر يتصل بيكم يطمنكم عليه
خاله غير نكوله هيج يكول شنو اني جاهل وتخافون عليه وخابصين الجو همزين ما اجيت لكيتكم معلكين قطعة بيها نعي الي
يااا
يصنف علينا واحنا كالبين الدنيا كلاب
والطفل لكوه لولا
اي لاكيه خطية ..بس هالواحد عدهم محاق يكول يكسر الخاطر ابو وجان كل هالوقت باقي وياهم وهمه هم مجلبين بيه تعرفين اهل الغربية يجلبون بالضيف خصوصا هو هم نازل للشط يدور وياهم على ابنهم
المهم رجعلكم خاله الف الحمد لله والشكر
عود طمني امج خطية
اي اكيد
سديت الاتصال وما اكولكم الفرحة الي حسيتها ..اصلا حسيت روحي رجعتلي..موبايلي بيدي شفت الساعة ١٢ وربع ..كلت يمكن نايم..اي جاي تعبان ونايم هسه بس شعليه واذا نايم قابل اتصل بيه لا..لا شنو اتصل استحي..
فكرت كلت انزل ستوري واذا كاعد يشوفه واذا نايم هم الصبح يشوفه
وفكرت بكلمات مناسبه واخير شي نزلت ستوري كتابة
((احيانا تنقطع كل حبال الوصل بيننا ..ونصدق انها النهاية..لكن فجأة..نشعر..اننا بحاجة لفرصة ثانية))
نزلته والابتسامة شاكة وجهي.. رغم عيوني جانن مورمات من البجي عليه ومثل متوقعت وره دقايق شفت اتصاله رديت :
هاا..دعاء يعني اله اموت يله احصل فرصة ثانيه
اي تستاهل
استاهلج يعني لو استاهل الموت!!؟
رجعنه للفلسفة..محاق موزين انطيتك فرصة ثانية..يربي شايب ويتفلسف
ههههه منو الشايب اني؟..ها نسيت انتي عندج الي عمرة فوك الثلاثين يعني خاش بالعمرين
اكيد
وج والله هذا الشايب اذا يلزمج هسه اله يفصخج تفصيخ ويسويج قطع غيار
مفهمت!!
بعدين تفهمين!!
هسه شنو شوكت نجي عليكم
تجون شنو
اي غير حتى نخطب رسمي
تخطب .شنو تره كتلك فرصة ثانية مو خطوبةكبل
انجبي لج...باجر امي تروح ع امج حتى ادز خبر لعمامج وخوالج
باجر !
اي باجر يله ولي..تعبان اريد انام
وسده
شو هذا يكولي ولي استغفر الله ربي شلون تخلص وياه
وفعلا ثاني يوم جتنا امه واتفقت هي وماما بعد يومين خطبة وعقد طبعا وحدهم يقررون ويحجون وكولما اريد احجي ماما تسكتني..وهو خلال اليومين لا اتصل لاكال داز امي عليهم لازم نسولف نحجي اي شي لا مخلصها سكته وحتى ستورياتي مفتحها..اوف مرمرني والله..المفروض ابقه سنه كامله شالعة كلبه يله انطي فرصه بس اني تسرعت ونزلت الستوري..
ورة يومين راحت وياي مروة وملك للصالون واختاريت بدله تجنن وطبعا المكياج فد شي ماما حيل فرحت من رجعت للبيت وكعدت بالصاله ع كوشه عقد مرت مصطفى وخالتي هنه الي محضراتها ومرتبات كولشي لان ماما مو مثل قبل تكدر تهتم بهالامور وجتي مشيتهم هي خطبة وهو عقد وطبعا..هم جابو وياهم ذهب ولبستي حلقه ولبسته هو مدنك مبين مستحي من الناس اني هم حيل مرتبكة وره الحلقة امه لبستني بقيه الذهب وكصينا الكيكة ههه مرتبك حيل اول مرة احسه ممرتاح وعركان..بقه كاعد يمي شويه محجة اثنينا متوترين وراها اجه مصطفى كله تعال سلم ع الناس يردون يرحون. وطلع يسلم ..بعد مشفته والبنات مقصرن هم يركصن ويدبجن ماما حيل فرحانه بيه وجهها حيل مرتاح وابتسامتها تارسه وجهها
وبعد مخلصت الحفلة وبدو يرحون مروة جتي يمي همست باذني
وج مو تبدلين طالعة كيكة اليوم اكيد محاق وره متروح الناس يجي يشوفج..
ها ما ابدل
اي ضلي هالشكل
وراحت وفعلا وره مراحو اندكت بابنا راحت فروحة فتحت الباب ورجعت ركض
هذا محاق اجه
اي خلي يتفضل فتحيله الاستقبال اني هسه جايه
راحت ماما كعدت يمه بس اني كلبي يدوك ابلعومي اعرف هسه يدز عليه حيل مستحيه منه...وافكر شنو حيكولي وشنو حيصير بينا
وره شويه جتي ماما
ماما رجلج يريد يحجي وياج
ماما تعالي كعدي يمنه
هههه لا يمه خطية اكيد يريد يسولف وياج كم حجاية وحدكم..اني دقايق واجي يمكم
لتتاخرين ماما
ورحت امشي واسحل ابدلتي لان طويله دخلت و كعدت ع القنفه ..وشفته ابتسم واشرلي اجي اكعد يمه
مشيت كم خطوة رحت كعدت يمه..اول مكعدت ضربني حيل ع زري وكال
اي شلونهن الحلوات الجانن يلمعن بالكاميرات
اوي..شبيك محاق تره وجعتني
ادنه يمي باسني ع رگبتي كزبر جسمي كال:
كومي قفليها لهاي الباب
اقفلها شلون هسه ماما تجي
لج غير مرتي حلالي اريد ابوس احضن افصخ براحتي
تفصخ شنو محاق تره احنا بس عقدنا مو زفه وعرس
ابتسم ودناني وحضني حيل وبقه يبوس بيه بوسات هيج استحي اوصفهن..يمكن 3دقايق او اكثر بعدين دناني وباوع بعيوني ولزم خدودي وكلي
والله ..الا اخليج اسعد مرة بالكوكب
بسرعة كتله
واني هم!
عزة هاي شكلت دنكت استحيت من ردي السريع فكلي
معندي اي شك انه راح اكون اسعد انسان وياج اصلا من اول لحظة شفتج بيها واني اعرف انه سالفتي وياج مراح تخلص الا وانتي حلالي ..هيج قريت جوه عيونج
وملك..راح تنسى موضوعها
ملك منو؟؟
من كلي هالكلمة حسيت فعلا راح نبدي اني وياه حياة جديدة..ادنيت يمه حضنته..حسيته فرح بهالحركة مالتي باسني من كصتي وكال
حبيبتي
بعدين ماما دخلت هدني ماما بقت يمنا تسولف وياه وتوصي عليه الى ان طلع..
وره شهرين تزوجنا جانت حفله زواجنا ضخمه وجبيرة..محاق كل الناس تحبه وتحترمه وتقدره والكل فرحان اله..وصرنا لبعض صح جنت متخوفه بالبدايه لان اعرفه..عصبي بس جان وياي غير عن كل الناس اصلا يعاملني مثل طفلته ويخاف عليه صح لسانه منشار وميحاسب ع كلامة ..بس تعودت عليه ..وره 3شهور صرت حامل جان طاير من الفرح بحملي وحسيت سعادته كملت من جبتله ولد يجي من الشغل بلهفة حتى يلعب وياه ويدقق بكل حركة تصدر منه
هااا ضحكلي ها لزم اصبعي ..ها شلع شواربي ..ها شفي شلون بطل ويتكلب الطفل ماخذ كل اهتمامه اني اخرب ضحك من يلعب وياه ويحاجية حجي مال كبار يكوله لك اكبر بسرعة حتى تطلع وياي للمعمل. صرنه اسعد عائلة والحمد لله..صار ابني عمره سنه وهسه هم حامل شهرين
كل هالاخبار الحلوة حجيتها الكم بس اكو خبر حزين راح اكوله الكم خطية اختي ملك بنتها توفت قبل 9 شهور وكتلت نفسها عليها تنام وتفز وهي تحلم بيها وتبجي وبقت فتره طويله حالتها النفسيه زفت بس تقبلت الواقع والحمد لله هسه هي هم حامل تقريبا دخلت بالشهر الرابع شكرا لكل من قرأ قصتي وتفاعل ويه احداثها وكل الحب والشكر والامتنان للكاتبة الي وصفت لكم الاحداث باجمل صورة
انتهت❤️❤️❤️❤️❤️
بما ان قصة دعاء ومحاق قد انتهت اليكم بعض العبر المستخلصة منها ...كما عودتكم في كل رواياتي
لا ينبغي للإنسان أن يحكم على الآخرين بسبب أخطاء غيرهم؛ فكل إنسان مسؤول عن أفعاله، ولا يصح أن يتحمل شخص ذنبًا لم يرتكبه
الحب الحقيقي يحتاج إلى الصراحة والوضوح، فكتمان المشاعر وترك الطرف الآخر في حيرة قد يؤديان إلى سوء الفهم والألم وإضاعة فرص كان يمكن أن تغيّر حياة الطرفين.
الشك وسوء الظن قد يفسدان أجمل العلاقات، فحين يسيطر الشك على الإنسان قد يرى في تصرفات الآخرين ما ليس فيها، وقد يؤذي من يحب رغم صدق مشاعره تجاهه.
الاعتذار وحده لا يمحو آثار الأذى دائمًا؛ فقد يحب الإنسان شخصًا بصدق، لكنه يكون قد تسبب له من الألم والظلم ما يجعل العودة إليه أمرًا صعبًا.
الفرص الثانية قد تغيّر مجرى الحياة، لكن منحها ينبغي أن يكون بعد التأكد من وجود تغيير حقيقي ورغبة صادقة في إصلاح الأخطاء.
لا تؤجل التعبير عن مشاعرك المهمة إلى ما لا نهاية؛ فقد تأتي لحظة يصبح فيها الكلام ضروريًا، بينما الصمت قد يجعل الأمور أكثر تعقيدًا.
الظروف الصعبة تكشف حقيقة المشاعر؛ ففي لحظات الخوف والقلق يدرك الإنسان أحيانًا قيمة أشخاص كان يظن أنه يستطيع الاستغناء عنهم.
لا ينبغي اتخاذ قرارات مصيرية تحت تأثير الخوف أو الانفعال؛ فقرارات الزواج والارتباط تحتاج إلى تفكير هادئ وقناعة حقيقية، لا إلى ضغط الآخرين أو الخوف من الندم.
الأسرة والسند الاجتماعي لهما أثر كبير في حياة الإنسان، وخصوصًا في الأوقات التي يمر فيها أحد أفراد الأسرة بمرض أو أزمة.
الحياة مليئة بالمفاجآت، ولذلك لا ينبغي اليأس من رحمة الله؛ فقد تبدو الأمور في لحظة وكأنها انتهت، ثم يأتي الفرج من حيث لا يتوقع الإنسان.
المواقف الصعبة قد تجعل الإنسان يعيد اكتشاف مشاعره، وتكشف له مقدار تعلقه بشخص لم يكن يعترف لنفسه بحاجته إليه.
ليس كل شخص عصبي أو قاسٍ في أسلوبه خاليًا من المشاعر، لكن المشاعر الصادقة لا تبرر الإساءة أو التجاوز، بل يجب أن تقترن بالاحترام وحسن التعامل.
الزواج الناجح لا يقوم على الحب وحده، بل يحتاج إلى الاحترام، والثقة، والتفاهم، والقدرة على تجاوز الماضي وعدم استخدام الأخطاء القديمة سلاحًا ضد الطرف الآخر.
لا ينبغي أن يحمل الإنسان شريك حياته أخطاء أقاربه أو عائلته؛ فالعدل يقتضي أن يُحكم على الإنسان من خلال أفعاله هو.
بعض العلاقات تبدأ بسوء فهم وصعوبات كثيرة، لكنها قد تتحول إلى حياة مستقرة إذا استطاع الطرفان تجاوز الماضي وبناء الثقة من جديد.
الإنسان قد يكتشف قيمة النعمة بعد أن يخاف فقدانها، لذلك من الجميل أن نقدر الأشخاص الذين نحبهم ونعبّر لهم عن مكانتهم قبل أن تضعنا الظروف أمام احتمال فقدانهم.
الحياة لا تسير دائمًا كما نخطط لها؛ فقد تبدأ القصة بالحيرة والألم وسوء الفهم، ثم تنتهي بالزواج والأسرة والأبناء والسعادة.
الفقد جزء مؤلم من الحياة، والتعايش معه يحتاج إلى وقت وصبر؛ فالإنسان قد ينكسر أمام فقد شخص عزيز، لكنه يستطيع مع مرور الوقت أن يتقبل الواقع ويواصل حياته.
أجمل ما في القصة أن الإنسان قد يمر بمراحل من الألم والحيرة والخوف، ثم يصل في النهاية إلى مرحلة يدرك فيها أن بعض الأحداث كانت بداية لمرحلة جديدة من حياته
واخيرا طالما اكدت لكم في كل رواياتي اهمية ان تحافظ الفتاة على عفتها اولا لارضاء الخالق وثانيا ليبقى رأسها ورأس اهلها مرفوعا
احبكم♥️♥️♥️.
تمت بحمد الله تعالى.
لقراءة جميع فصول الرواية من هنا
وأيضا زرونا على صفحة الفيس بوك
وايضا زورو صفحتنا سما للروايات
من هنا علي التلجرام لتشارك معنا لك
كل جديد من لينك التلجرام الظاهر امامك
وايضا زورو صفحتنا سما للروايات
من هنا علي التلجرام لتشارك معنا لك