رواية شتات الفصل الرابع 4 بقلم مها حولي
بقيت بس أبكي وما قدرت امشي بيت خالتي، لما امي جات لقتني راقده، قالت لي مالك ما جيتي بيت خالتك، قلت ليها مصدعه، قالت لي بلعتي بندول؟ قلت ليها اي ح انوم شويه يمكن يروح.... لفيت وشي على الحيطه و اول ما غمضت دموعي جات نازله، الاء كانت بتتصل علي، اصلا قبل ما امي تجي هي كانت بتتصل علي من لما كنت في الجامعه، عملت التلفون صامت ونمت....
نمت نومه واحده صحيت قريب للمغرب، بعد صليتو امي قالت لي امشي لناس خالتك باركي ل الاء هسي يقولوا ما جيتيهم، قلت ليها والله يا أمي أنا تعبانه ومصدعه بمشي ليها في أي وقت وبعدين دي موافقه ساي ما خطوبه!
تاني يوم الصباح أثناء ما انا طالعه ماشه الجامعه قبل ما اصل موقف المواصلات وائل طلع في وشي، نزل القزاز وقال لي اتفضلي، قلت ليهو المواصلات متوفره، قال لي عارفها متوفره😊
سكت ساااي بقى واقف منتظرني اركب، فتح لي باب العربيه، اتنهدت و ركبت معاهو، قال لي ماشه الجامعه صاح؟.... قلت ليهو ايوه.... بقى يسألني بقرا شنو وفي جامعة شنو وانا برد ليهو على قدر السؤال.... ما كنت قادره أخت عيني في عينو، لو عاينت ليهو عيوني بتدمع، متأكده لو عينو جات في عيني ل ثواني ح ابكي!
طلعت الشيت وعملت نفسي بقرا عشان هو ما يتكلم معاي كتير، لأنو العبره خانقاني وما قادره اتكلم!... ما عارفه العملتو صاح أو لا بس هسي عديل ما عايزاهو يتكلم معاي!
فجأه قال لي مشخبطه في الشيت زي الشفع... بإنفعال قلت ليهو انا ما شافعه!
طبعاً هو استغرب فيني!... انا زاتي استغربت في نفسي و في ردة فعلي!
قال لي آسف ما قصدي اضايقك!.... ما رديت عليهو، تاني ما اتكلم معاي لحد ما وصلت الجامعه، نزلت وقفلت الباب وشكراً ما قلتها ليهو مشيت طوالي وما عاينت وراي!
لما دخلت الجامعه جوه اكتشفت انو المحاضره الأولى إتلغت!.... مشيت قعدت في البينشات وفتحت الفيس، بقيت اقرا في دردشتي مع وائل، كل ما اقرا رساله دموعي تنزل، طلعت من الفيس ومسحت دموعي، بقيت مربعه يديني وقاعده اعاين للناس الحوليني.... فجأه جاني صوت :
_ قاعده ولا على بالك!
لما إتلفت لقيتها غفران صحبتي!.... قلت ليها غفران اهلييين كيفك وقفت ومديت ليها يدي! سلمت علي ب برود وقعدت، لما قعدت قالت لي انا عمري كلو ما شفت انسانه زيك! انتي معقوله بشر زينا كدا؟
ما رديت عليها.... واصلت كلامها وقالت لي عندك عدم تقدير كدا مبالغ، انانيه، وخاينه للعُشره.... قلت ليها غفران عايني انا ما عندي زمن ولا أخلاق لكلامك دا.... لو شايفه اني كدا ياخ ريحي نفسك وما تتعاملي معاي، انا من البدايه حذرتك!.... قالت لي و وقحه كمان!
شلت شنطتي وأول ما اتحركت عشان أمشي جوا ماريا و جمانه و منار.... عاينت ليهم كويس ومشيت خليتهم، جمانه جات لاحقاني، قلت ليها خير في شنو تاني ما قلتوهو؟
قالت لي مها ليه بتتعاملي معانا كدا؟ ناسيه اننا صحبات؟.... قلت ليها السؤال دا كان تسأليهو لنفسك اول 😊
قعدت في البنش ولفيت وشي منها، جات قعدت قصادي وقالت لي انتي آخر وحده اتوقع منها كلام تصرفات زي دي، قلت ليها وانتي اول وحده اتوقع منها تصرف زي دا... صدقيني ما استغربت ولا انصدمت من موقفك! 😊
قالت لي لكن انتي غلطانه يا مها وانا وقفت مع الحق! غفران ما غلطت عليك هي بس زعلت عشان انتي ما اهتميتي لما كانت عيانه! هي ما حصل قصرت منك لو غبتي كلنا بنسأل عنك ولما وحده فينا تمرض كلنا بنزور بعض و بنتفقد أحوال بعض عداك انتي!
غفران دي مرضت وغابت كم يوم حصل مشيتي تشوفيها؟ اتصال ساي انتي مستكثراهو عليها، ولما نقول ليك ارح معانا ليها تتحججي! ولما جات عاتبتك و ورتك غلطك تقومي تزعلي وتاخدي موقف و تقاطعيها؟... هسي منو المفروض يزعل من التاني؟ انتي ما قاطعتيها هي بس قاطعتينا كلنا عشان وقفنا معاها... وقفنا مع الحق!
قلت ليها لما مرضت ما مشيت معاكم ليها؟ ليه بتكذبي؟.... قالت لي مره واحده بس!.... قلت ليها وبعدين انا ما قاعده اتحجج لما اقول ليك ما قادره امشي مكان معناها فعلاً ما قادره امشي!.... قالت لي انتي مقتنعه بكلامك دا؟
قلت ليها ايوه.... قالت لي تمام يا زوله اعملي البريحك.... قالت كدا و مشت!
أخدت نفس عميق عشان ما اقعد افكر في مواضيعهم دي، انا خلاص الموضوع دا قفلتو وانتهينا!
لما جا زمن المحاضره التانيه مشيت القاعه، قعدت قدام و وراي مباشرة كانوا قاعدين ناس جمان،كانو بتكلموا عن شاي و بعاين للتلفون، فجأه غفران قالت ليهم انا ما عارفه ليه انتوا مستغربين من انو الأفعى بتغير جلدها! الأفاعي البشريه زاتها بتغير جلدها!😊
طبعاً عارفاها قاصداني، جا الأستاذ و بدا المحاضره وهم وراي يتوسوسوا وانا بس مركزه على المحاضره وبكتب أي كلام يقولوا الدكتور، بعد خلص المحاضره قال في زول عندو سؤال؟ رفعت ليهو يدي قال لي اتفضلي يا مها.... سألتو سؤالين و جاوب علي.... سمعت غفران قالت شطاره فايته الحد!
اول ما هو طلع لميت حاجاتي و طلعت، مواصلاتي في السوق، المره دي ما ركبت طوالي، دخلت السوق، أثناء ما انا ماشه وبعاين في الدكاكين والملابس وباقي الحاجات شفت خالتو ربيعه من بعيد!... كانت شايله حاجات كتيره تمشي وتقيف!.... مشيت عليها لما وصلتها قلت ليها خالتو ربيعه كيفك؟... لما إتلفتت شافتني قالت لي مهووويه ازيك يا بتي!... قلت ليها كويسه الحمد لله.... طالعه خلاص؟!
قالت لي آي لكن بفتش على جميل ما لاقياهو، الحاله قلت ليهو انتظرني هنا!... قلت ليها اتصلي عليهو!.... قالت لي نسيت تلفوني في العربيه!.... شلت معاها حاجاتها وطلعنا من السوق ختيتهم ليها في العربيه، شالت تلفونها واتصلت على ولدها، قلت ليها انا ح امشي بعد دا، قالت لي لا لا ارح نوصلك معانا، قلت ليها لا لا انا ياداب داخله السوق، قالت لي ايوااا اها كيف عامله مع الجامعه؟ قلت ليها تمام الحمدلله، قالت لي جمانه خليتيها في الجامعه ولا جات معاك هنا؟... قلت ليها في الجامعه،قالت لي غريبه ليه ما طلعت معاك؟
قلت ليها انا طلعت طوالي، قالت لي يعني ما قلتي ليها انا طالعه؟.....بقيت اعاين ليها وما عارفه هي عايزه تصل لشنو!.... فجأه ولدها جميل جا، طبعاً هو ياداب ممتحن شهادة سودانيه، قال لي اوووو مها كيفك.... قلت ليهو اهلييين يا الممتحن، قال لي عليك الله ما تذكريني، كفايه علي أمي، ضحكت وقلت ليهو الظاهر انهم ما مريحنك، قال لي كل دقيقتين يذكروني اني ممتحن كأني ناسي يعني وما عارف!
خالتو ربيعه قالت لي ما تشوفيهو كدا مستهتر خلاص وما قاعد يقرا، جبت ليهو اساتذه في البيت بقى يتهرب منهم، مره يقول عيان ومره يطلع وما يرجع، الأستاذ يجي ينتظرو كدا لمن يرجع!
ضحكت وقلت ليهو بتبالغ يا جميل، شد حيلك شويه، امك دي ما قصرت منك والله، شوف حتى الأساتذه ديل جابتهم ليك!.... اجتهد كلنا عايزين نفرح بيك، قال لي ان شاء الله.... قلت ليهم يلا مع السلامه.... قال لي تعالي نوصلك معانا، قلت ليهو داخله السوق انا....قبل ما اتحرك خالتو ربيعه مسكتني من يدي وقالت لي انتي وجمانه زي الأخوات، خلوا حركات الشفع دي وارجعوا زي ما كنتوا، جميل ضحك وقال ليها يعني هن متشاكلات؟ ايوااا عشان كدا جمانه رأسها بقى مقطوع وبقت ما بتجيب سيرتك 😂
امو قالت ليهو انت انطم... قالت لي زي ما قلت ليك خلوا حركات الشفع دي، لو عرفت انكم ما اتصالحتوا والله ما اريحكم،سوط عديل ح اشيلوا ليكم....قلت ليها حاضر يا خالتو، اركبي بعد دا الشمس.... ودعتهم و رجعت دخلت السوق.... اشتريت مرطبات وشلت معاي فواكه ورجعت.... لما وصلت حينا رجليني ساقوني لخالتو سميه، كنت على طول بجيها بنتونس مع بعض، بتفهمني شديد، عادي احكي ليها هي وما احكي لأمي، كنت عارفه انو وائل ما حيكون موجود، دا كان توقع ساي مني عشان قبيل وصلني ومشى، بس فعلاً لما دخلت بيتهم هو ما كان موجود، خالتو سميه انبسطت، قالت لي زارتنا البركه!.... لقيت بناتها التلاته معاها ب شفعهم، بناتها وداد، و وئام و وصال ، سلمت عليها وقعدت، كنت تعبانه ومسخنه، قالت لي أقلعي الطرحه و زادت درجة المكيف، وئام مشت جابت لي مويه وجات قالت لي كيف عامله مع الجامعه، قلت ليها الحمدلله لكن تعب بس، قالت لي بكرا لمن تتخرجي دا كلو بهون، خالتو سميه كانت بتعاين لي ساي، قلت ليها خالتو سميه انتي زعلانه مني ولا شنو!؟ قالت لي بري طواااالي بتها وصال قالت امي زعلانه عشان كانت عايزاك ل وائل!.... هنا أخواتها طوالي حمرو ليها!!... قالت ليهم اصلا هي حتكون عارفه، امي اكيد بتكون قالت ليها عايزاك ل وائل حتى لو هظار!
طبعا انا اتفاجأت!... خالتو سميه كانت عايزاني ل وائل!
عملت نفسي رايحه وقلت ليهم الجو الأيام دي بقى مسخن شديد صاح!.... قالوا لي اي والله و وداد طوالي مشت تعمل الجبنه، قلت ليهم انا ح امشي، حلفوا إلا اقعد اشرب معاهم الجبنه.... في الآخر قعدت شربتها معاهم، لما كنت ح امشي شفتها شينه اجي داخله ليهم بأكياس وامشي منها زي ما جيت! صراحة انا ما كنت مخططه اجي غاشيه خالتو سميه، ما قايله بناتها قاعدات، المهم أديتهم من الفواكه، خالتو سميه قالت ما بتشيلهم، قلت ليها ليه ارجعهم يعني بعد جبتهم ليك؟
المهم قدموني لحد الباب، وئام رجعت جوه و خالتو سميه بقت واقفه معاي جنب الباب، قالت لي ما تنقطعي مني بناتي بكرا بعد بكرا بمشن و ح اقعد براي زي زمان، قلت ليها العروس جاياك.... قالت لي ربنا يتم على خير، بكرا ح نجي نتقدم ليها رسمي ومنها ح يحددوا موت الخطوبه و العقد بالمره، قلت ليها ربنا يسعدهم ويتم ليهم على خير، يلا معاك سلامه يا خالتو سميه.... فجأه قالت لي مها يا بتي، والله انا كنت دايراك ل وائل لكن هو كمان ليهو رأي ومن بدري خاتي وحده في بالو يلي هي بت خالتك و..... قاطعتها وقلت ليها خالتو سميه ليه بتقولي لي كدا؟ ماف أي مشكله؟ فيها شنو يعني ل ولدك قال عايز الاء و خطبها! انتي ليه زعلانه؟ كل شي قسمه ونصيب، ربنا يسعدهم ويهنيهم!.... قالت لي ويسعدك ويهنيك و يرزقك ب ولد الحلال، لكن أنا من هسي حاااسده المره الحتكون نسيبتك، والله كنت دايراك تجيني عروس في بيتي وتقعدي معاي، لكن قدر الله وما شاء فعل.... في وقفتنا ديك فجأه وائل جا وقف ونزل من عربيتو، قال لينا السلام عليكم، ردينا ليهو السلام، خالتو سميه قالت ليهو مالك اتأخرت!.... انا استأذنت ومشيت بيتنا....بعد ارتحت شويه طلعت ومشيت ل الاء، لقيت معاها بنات الجيران، صوت ضحكهم كان واصلني من برا، جيتهم داخله وسلمت عليهم، قالوا لينا وين انتي مختفيه تماماً من المشهد! قلت ليهم ياداب جيت من الجامعه!
طبعاً الاء ما عاينت لي ولا اتكلمت معاي، مع ذلك باركت ليها وقلت ليها ربنا يتم ليكم على خير، ما ردت علي وعملت نفسها مشغوله بالكلام مع البنات الجنبها!
طول مدة قعادي كانت متجاهلاني ولما اتكلم معاها ما بترد عليها وانا جني وجن التطنيش و الحقاره قدام الناس بالذات، طوالي قمت من مكان ومشيت ولا قلت لزول ماشه وهم اظنهم قايلني طالعه برا وجايه، خالتي من المطبخ نادتني، لما مشيت ليها قالت لي مالك ماشه متين جيتي؟ قلت ليها والله تعبانه يا خالتي ياداب جيت من الجامعه، بجيكم بعدين، قالت لي سمح، لكن عليك الله تعالي وخليك مع الاء، ح تحتاج ليك كتيير الأيام الجايه،وبكرا ناس سميه ديل ح يجوا يتقدموا، انتي مفروض من هسي تكوني معاها! قلت ليها حاضر بمشي واجيكم، قالت لي امك وين ناديها لي عندنا تجهيزات كتيره خلاص! قبيل مشينا السوق وبرضو في حاجات ناقصه! قلت ليها كويس بكلمها!....أول ما طلعت من بيتهم لقيت أحمد في وشي! قال لي وين مختفيه! قلت ليهو قاعده، قال لي متشاكله مع الاء ك عادتكم ولا شنو؟ قلت ليهو لا، قال لي معناها آيي!😊
أخدت نفس وقلت ليهو أحمد انا والله تعبانه وما عندي حيل للكلام والنقاش،عاين لي مسااافه ودخل بيتهم!... لمن رجعت البيت امي قالت لي مالك جيتي بسرعه! قلت ليها قعدت فتره طويله، براي تعبانه وعندي امتحانات ح تبدأ بعد دا!... قالت لي بكرا الناس ديل جاين يتقدموا، قلت ليها اي خالتي كلمتني وقالت ليك تعاليها، قالت لي اصلا هسي كنت ماشه عليها، ابوك لما يجي ختي ليهم الأكل واتغدوا ما تنتظروني، قلت ليها تمام، بعدها هي مشت، بقينا قاعدين في البيت انا و مآب، مرام في بيت خالتي، ومحمد ومصطفى ك عادتهم في الشارع، اها المساء لما ابوي جا وسأل عن امي كلمتو وقلت ليهو انت ما عارف ولا شنو يا ابوي؟ قال لي عارف لكن نسيت... انتي مالك ما مشيتي؟ قلت ليهو ح امشي هسي.... ختيت الغدا، اتغدينا، صليت المغرب، عملت الشاي ل ابوي ومشيت بيتنا ناس خالتي، ناس امي كانوا بخططوا و بجهزوا في حاجات بكرا من ضيافه وغيرها وهناك الاء بتختار الفستان الح تلبسوا بكرا،اتفقوا كل وحده من البنات ح تعمل ليها حاجه، واحده ماسكه الشعر و واحده الميك اب و واحده الرسم!.... لمن دخلت قعدت معاهم جوه بدوا ليهم الرسم، رسم بسيط كدا وخفيف لأنو تعارف بإعتبارو، مشيت لناس امي وقلت ليهم خلوني امسك ليكم موضوع البيتي فور، ان شاء الله بس الفرن دا يكون كويس! خالتي قالت لي لا لا امشي اقعدي جوه مع البنات، خليهم يرسموك ليك، قلت ليها هسي برسموا ل الاء، خلوني اعمل حاجه!
شلت الفرن طلعتوا برا في الحوش وجريت وصله طويله، امي وخالتي والجارات القراب كانوا قاعدين في المظله، بقيت اجيب منهم البيتي فور و ادخلوا الفرن و اراقبو ليهم، أحمد جاب ليهو كرسي وجا قعد جنبي، قال لي اعملي حسابك ما تحرقيهو لينا! قلت ليهو عشان كلامك دا ح احرقو، ضحك وقال لي ياريتني ما اتكلمت!
بقيت مركزه مع البعمل فيهو وهو يعاين لي ساي، قال لي اتطمني بكرا ما عرس الاء.... عاينت ليهو بإستغراب.... قال لي شايفك خايفه من فراقها!.... حتى لو عرست ياها ح تسكن قريب هنا! يعني كدا كدا هي معاك معاك!
في نفسي قلت ليهو انت ما عارف المطره صابه وين!.... فجأه الاء جات طالعه وهي ماده يدينها قدامها عشان الرسمه ما تتخرب، أحمد قال ليها ياداب بقيتي شبه أنثى، نشوف لحد بكرا البحصل شنو، قالت ليهو وااااي انا منك ياخ! وبعدين انت شنو المقعدك هنا؟!
قال ليها صراحة حارس الخبيز، خايف لو مشيت تقوم المجنونه دي تحرقو لينا، قلت ليهو دا ما خبيييز دا بيتي فور، قال لي عايني بيتي فور، بيتي ثري ما مهم في النهايه مخبوزات، وكلمة خبيز جايه من مخبوزات، وقعت ولا ما وقعت؟؟!
الاء قالت ليهو خليك من دا، عملت القلتو ليك ولا لا؟ قال ليها ريحي نفسك كلو تمام!
الاء طوالي مشت لناس امي و ورت الرسمه لأمها، سامعه خالتي قالت ليها سمحه ما شاء الله!
جات طالعه من المظله وكانت ماشه تدخل جوه للبنات بس احمد وقفها لما قال ليها غريبه ما وريتي رسمتك ل مها!
ما ردت عليهو مشت طوالي وهو طواااالي عاين لي، نهاي ما رفعت ليهو راسي، قال لي انتوا حركاتكم دي ما ح تخلوها!.... طبعاً انا كنت زعلانه وعايزه اطق من تصرفات الاء و تجاهلها لي، ما رديت على كلام أحمد... قال لي معقوله الموضوع كبير لدرجة انكم ما تتكلموا مع بعض؟.... دموعي طوالي جات نازله، مسحتهم بسرعه، قال لي الحصل شنو احكي لي؟
قلت ليهو ماف شي، قال لي ماف شي بعد الدموع دي كلها؟... الاء زعلانه منك في شنو؟
تااااني دموعي جات نازله، قلت ليهو أحمد انا امس انشغلت وكنت مصدعه وتعبانه وما قدرت اجيها وتلفوني صامت، هي اتصلت ورسلت لي وما لقت رد مني عشان كدا زعلت!.... هسي جيتها وهي من قبيل متجاهلاني واحرجتني قدام البنات، براك عارفني ما بحب زول يطنشني قدام الناس لأني ما قاعده اعمل ليها كدا!... كان ممكن تجي تلومني.... تعاتبني، لكن هي فضلت انها تسكت وتسفهني قدام الناس!
قال لي بس دا كل الموضوع!.... ما تشيلي هم بعد شويه ح تروق وتجي تصالحك، اصلا الاء ما بتقدر بدونك!.... قلت ليهو على كيفها تجي أو لا ما ح انسى ليها تصرفها دا، قال لي فعلا هنا هي غلطانه ومفروض انتي تقبلي اعتذارها لما تجي تصالحك! وانا بعتذر ليك نيابة عنها، يلااااا امسحي دموعك! .... قلت ليهو ما عايزه منها أي اعتذار،خليها على راحتها!
قال لي حاسي اني بتكلم لي مع شافعه وبحاول أحل مشاكل شفع!
كلامو دا ذكرني وائل!.... قلت ليهو انا ما شاااافعه! قال لي معلوم لكن التصرفات تصرفات شفع خااااصة دموعك دي🤣😂
قلت ليهو أحمد ياخ قوووم طير من هنا، غلطانه انا الحكيت ليك، قال لي والله ما عندي اجنحه عشان اطير، قلت ليهو خلاص ازحف او احبى أو اعمل اي شي المهم امشي من قدامي، قال لي بس انا لا من الزواحف عشان أزحف لا من الأطفال عشان احبى!
قلت ليهو بزهههج احممممد ياااااخ! قعد يضحك ناس امي لما سمعو صوتي قالوا لي مالكم؟.... خالتي قالت ليهو مالك معاها يا احمد، قال ليها دي مستهبله ساي.... قلت ليها كذاب يا خالتي ما بخليني اشتغل، جنو تعليقات وكلام كتير،قال لي اشتغلي ساي انا ماسك ليك يدينك؟؟!!..... فجأه تلفونو رن، رد ومشى طوالي!
المهم لما الساعه بقت 11 و زياده، امي قالت ليهم نمشي بعد دا، خالتي قالت لي اقعدي بيتي معانا، قلت ليها مرام بايته معاكم..... المهم ودعناهم و طلعنا انا وامي و مآب، أحمد قال ح يوصلنا البيت ف ولاء قالت ليهو بمشي معاك، خالتي قالت ليهو خليها تطلع، اصلا من مرضت ما شافت الشارع، المهم طلعنا وأحمد و ولاء معانا، أحمد وامي قدام و انا و مآب و ولاء وراهم، مآب قالت نعسانه شديد وقالت لينا انتوا بتمشوا براحه، لما قربنا للبيت جرت دخلت البيت.... أحمد و ولاء لما وصلوا معانا باب البيت امي قالت ليهم اتفضلوا، ولاء قالت ليها لو دخلنا قعدنا معاكم لما نقول ماشين ح تمشوا تقدمونا ولما تقدمونا ح نجي معاكم تاني عشان نقدمكم ونقعد كدا لمن يجينا الصباح!
ضحكنا ضحك على كلامها، امي قالت ليهم سمح يلا تصبحوا على خير، دخلت قدامنا انا لمن دخلت وراها حسيت بطرف طرحتي بتجر.... عرفتو اصلا دي حركاااات أحمد... كمان قدام اختو! لمن إتلفت عليهو ابتسم وفك طرف الطرحه، فجأه ولا قالت ليهو:
الناس بتخطب وتعرس انت بس اقعد لي لـ قِبيض الطرح!
انا بقيت بس ماسكه نفسي من الضحك، قال ليها كويس.... عاين لي وقال لي يلااا تصبحي على خير.... مشوا وانا قفلت الباااب ولسه بضحك على كلام ولاء! مبالغه والله!عندها كلام كدا بتعرفو براها، نستني اني كنت زعلانه ومهمومه..... 😂🤣
دخلت غرفتنا انا واخواتي، رقدت بعد قلنا البيت انا وامي و طفينا الإضاءه، ناس امي بنومو في الحوش معاهم التيمان و انا و مرام ومآب بنوم جوه الغرفه.... مسكت تلفوني وجري على الفيس، كنت متوقعه ألقى رسائل من وائل بس ما لقيت ولا رساله.... يعني هو جاي يتقدم لي رسمه بكرا كيف ما يرسل شي!!!... قصدي يتقدم ل الاء!!.... غريبه ليه ما رسل شي!
تاني يوم ما كان عندي جامعه، بس الاء عندها، قالت ح تمشي و ترجع بدري، اصلا ناس خالتو سميه ح يجوا المساء، نحنا من الصباح في بيت ناس خالتي بطلب منها، مع انو ماف شي تاني عايز تجهيز، البيت مرتب و نضيف والضيافة جاهزه، والمكان الما مُجير أحمد جيرو وكلو تمام!.... شربنا الجبنه في بيتهم.... رجعنا البيت و جيناهم تاني قبل ساعه من موعد جية ناس خالتو سميه،
كلنا كنا مرتبين شكلنا و خالتي حريصه انو كلنا كدا ك أسره نكون انيقين،ياااخ حتى التوأم محمد ومصطفى خالتي اشتريت ليهم ملابس مرتبه عشان يلبسوها، ولاء قالت ليها يا أمي دا ما عرس، قالت ليها برضو مالو يعني لو كنا سمحين و أنيقين؟؟
انا كنت لابسه فستان عادي ب اللون السماوي عليهو تطريز بالفضي و طرحه بنفس اللون وما كنت عايزه اعمل شي في وشي بس خالتي أصرت اعمل حواجبي و ميك اب بسيط ، قالت أهلهم جاين معاهم احتمال ألقى لي عريس منهم و أعرس سوا مع الاء!!
طبعاً لحد اللحظات ديك الاء ما كانت بتتكلم معاي وانا نهاي ما عاتبتها ولا حاولت ابرر ليها لأنها بدت بالتجاهل وما جات سألتني!
اها بعد شويه ناس خالتو سميه جوا!.... أول الداخلين كان وائل و ابوهو و امو و وراهم اخواتو و شابين و نسوان اتنين و راجل كبير!! لما شفت وائل قدامي قلبي بقى يدق بسرعه! كان لابس جلابيه بس أنيق شديد و ريحة عطرو سبقتو!....استقبلناهم و ضيفناهم، وانا نظرات وائل لي وترتني! حاساهو لسه شاكي! كأنو لسه بقول في نفسو مفروض دي يكون اسمها الاء!! طوالي دخلت جوه، ما قدرت اقعد معاهم، ابوي و عمو مبارك برضو كانو موجودين واكيد لازم يكونو موجودين، دخلت المطبخ وقعدت هناك، بعد شويه لمى جاتني، قالت لي مها الاء بتناديك..... طوالي مشيت ليها لقيتها متوتره ترجف، طوالي ضمتني وقالت لي وااااي مها انا متوتره، خايفه ما عارفه اعمل شنو، شوفي يديني بقوا باردات كيف!
قلت ليها ما تتوتري، الموضوع عادي، قالت لي ما عادي والله.... وااااي انا هسي كيف ح اطلع أقيف قدامو، ما ح أقدر والله.... صدقيني عيني ما ح أقدر أختها في عينو.... فجأه خالتي جات وقالت لينا تعالوا ومشت.... الاء مسكت فيني قوي وقالت لي مها خليك معاي، هزيت ليها راسي بس.... كانت لابسه فستان كبدي و طرحه بيجيه وشعرها مفرود، و الميك اب مرتب و مُظهر ملامحها اكتر، كانت قمر 14 بس.... اها طلعنا ليهم و الاء لسه ماسكه فيني و ورانا اخواتي و أخواتها.... لمن جيناهم داخلين كل الأنظار اتجهت علينا، وهي ماسكه فيني شديييد ولو عليها ترجع جوه، قالت ليهم السلام عليكم ومشت سلمت عليهم وهي منزله راسها.... كنت بعاين ليها لحدي ما وقفت قصاد وائل و مدت يدها... هو سلم عليها و رجع يعاين لي وهو مستغرب!
قعدنا و بدا التعارف وانا القعده كانت غالباني بسبب نظرات وائل، كان مره يعاين لي ومره يعاين ل الاء، أحمد كان قاعد جنبي، همس وقال لي مالك متوتره اكتر من الاء نفسها!.... قلت ليهو هسي انا متوتره؟ ما متوتره؟
عاين ل يديني المشربكاهم مع بعض و قال لو انتي متوتره للدرجه دي الاء احساسها حيكون شنو 🤣
طبعاً الاء قعدوها جنب خالتو سميه و خالة وائل، طبعاً الجو معاهو ديل بعد عرفونا بيهم طلعوا عمو و خالتو و أولادها الإتنين و عمتو وياهو خالتو سميه و ابوهو الحاج و اخواتو التلاته!
مخرجات القعده دي هي انو الخطوبه بعد اسبوعين و العرس بعد ما الاء تخلص سنتها دي يعني بعد 4_5 شهور كدا!
طبعاً انا عقلي و مشاعري كانو جايطين شديد،يعني الزول الكنت بحلم بيهو و بحلم بلحظات زي دي معاهو هسي جاي يتقدم ل غيري! والمشكله انا الخليتو يعمل كدا!... طيب لو كان كلمتو، لو كان قلت ليهو الحقيقه الحيحصل شنو؟ لو بس انا كان قريت رسالتو ديك في موعدها القال لي فيها انو امو جايه تفتح الموضوع كنت ح امنعو و اأخرو شويه، ما عارفه لمتين بس القعده دي ما كانت ح تحصل في التوقيت دا، بس انا ما كنت عارفه انو خالتو سميه جايه لخالتي! .....يعني شوفو الحياه دي، انا و الاء صاح قريبات شديد من بعض بس شخصياتنا و طموحاتنا و اختياراتنا بتختلف! الاء بس كانت عايزه زول يحبها و يخلص في حبها و كانت بتقول مستعده تسكن معاهو في راكوبه والوضع المادي ما بهمها..... أما أنا.... انا سقف أحلامي و طموحاتي أعلى منها، ما ح أوافق على أي زول، بهمني الوضع المادي، ايوه عايزه زول يكون وفي بس يكون مستطيع كمان و وضعو المادي كويس، كل مواصفات شريك الحياه الإنا عايزاها لقيتها في وائل، وائل وضعو تمام، ابوهو وضعو تمام مع انو مُطلق خالتو سميه من زمان بس ما مقصر من أولادو، و اخوات وائل متزوجات احسن الرجال و كلهم وضعهم المادي تمام، يعني هم كدا أسره تمام التمام!....ئهه وشوفو هسي وائل جاي يختار منو!!
خلص التعارف هم رجعوا بيوتهم و نحنا قعدنا شويه مع ناس خالتي و رجعنا البيت....
بليل وائل رسل لي.... قال لي مبروك لينا.... ربنا يتم لينا على خير.....
ما كنت قادره اواصل اكتر و انتحل شخصيه ما شخصيتي!.... بعد دا ارد ليهو بأي حق!.... احكي ليهو طيب!... بس لو اهلي عرفو! اتفاعلت بس مع الرساله ب "❤️ "
بعدها نزلت امتحانات و شغلتني شويه، ما كان في قابات كتيره، امتحان ورا امتحان، يوم لما رجعت من الجامعه طوالي غشيت خالتو سميه، ك عادتي دائما ايام امتحاناتي بمشي اتجرس ليها، قلت ليها وااااي يا خالتو سميه ما شفتي الإمتحان صعب كيف، غيتو لو نجحت فيهو ح اضبح عديل، ضحكت وقالت لي مها جرسه، ان شاء الله ح تنجحي فيهو انا وااااثقه في بتي، قلت ليها لكن أنا ما واثقه، وااااي يا ساميااااو، اعمل شنو انا.... بقيت واقفه و بتكلم و شغاله ليها كمان الإمتحان البعدو صعب، كل ماده أصعب من التانيه، تخلص امتحان يطلع ليك امتحان تاني، تخلص ماده تتراكم عليك ماده، تنجح في ماده تسقط في ماده تانيه تنتحر تدخل النار... وااااي يا خالتو!!.... طبعاً هي قعدت تضحك وفجأه سمعت صوت ضحك تاني!.... لما إتلفت لقيتو وائل!.... يعني هو قاعد!... خالتي قالت ليهو شفت دي الجرسه دي كيف، دا حالها من زمان و بتنجح عادي 🤣 زمن الثانوي جننت نفسها و جننتنا كلنا معاها!
قلت ليها بالجد انا ما عارفه اعمل شنو، شلت شنطتي وقلت ليها ماشه اجازف الشيت، قالت لي تعالي، لمن قعدت جنبها ختت يدها على كتفي وقالت لي ما تشيلي هم، والله ماف تعب وماف قرايه بتضيع ساي، انتي بتخافي لكن بتقري و دي الحاجه الكويسه شديد لأنو في ناس الخوف بخليهم عاجزين و انتي ما عاجزه، وانا دعواتي دائما معاك، ربنا يوفقك و يعلي مراتبك.... قلت ليها آميييين يارب تسلمي يا خالتو سميه ربنا يديك العافيه 🥹🥺 قالت لي انا مش قلت ليك قولي لي ماما سميه!.... قلت ليها والله انا الكلمه دي ما متعوده عليها،يلااااا مع السلامه وخليك قاعده بمشي براي.... طوالي طلعت بإستعجال ماشه اجازف باقي الماده.....لما وصلت البيت لقيت الاء قاعده منتظراني، قالت لي اتأخرتي شديد اها كيف امتحنتي، قلت ليها غايتو ما عارفه اشتغلت كويس أو لا لكن الحمدلله، طبعاً هي قبلها اعتذرت مني وقالت لي انا بس زعلت منك عشان ما جيتيني وما رديتي علي.... المهم بعد رقت شويه وارتحت قالت لي ارح السطوح، لما مشينا قالت لي أمس وائل رسل لي.... كنت بشرب في جبنه انشرقت لما قالت كدا لأنو في الماسنجر ماف رسائل!... قلت ليها كيف يعني؟.... قالت لي شنو الكيف، انتي طاشه شبكه ولا شنو، رسل لي في الواتس، شكلو عايز يتعرف ويفتح موضوع بس انا الغبيه ما عرفت ارد عليهو كيف وكنت متوتره و خجلانه منو حتى وهو ما جنبي، معقوله كل البدايات كدا؟ هسي يكون قال شنو عني، ح يقول دي شنو البت الهبله دي! ..... في نفسي قلت دا المتوقع! اكيد ح يشيل رقمها.... هسي لو جاب ليها سيرة الماضي على أساس هي الكانت بتتكلم معاهو اعمل شنو؟
قلت ليها يعني قال ليك شنو؟.... قالت لي ما قال شي، ياداب بسلم وعايز يفتح الباب!.... قلت ليها يعني أمس اول مره يرسل ليك من يوم التعارف؟ قالت لي لا، قبل كدا رسل لي السلام عليكم و وراني انو هو وائل لأنو شال رقمي ياداب..... يلا انا ما شفت رسالتو وقتها، شبكتي كانت فاتحه شكلو فهم اني متقصده ما عايزه ارد ليهو أو عامله فيها تقيله ف رسل لي:
آسف لأنو شلت رقمك ورسلت قبل ما ننخطب رسمي وكدا.... قلت ليها وقلتي ليهو شنو؟
قالت لي رديت السلام و فهمتو اني بخلى الشبكه فاتحه بس التلفون بكون بعيد مني او بكون في محاضره، ف قال لي ماف مشكله وتاني رسل أمس بسلم و كدا، انا برد السلام و بسكت، غيتو غلبني افتح مواضيع معاهو...
_ ما شفتها بتخاف كيف من الإمتحانات 😂 ، ربنا يوفقها و يسعدها، لمن تتوتر بتوترني معاها، اول ما تخلص امتحان بتجيني جاريه
= اي ظاهر عليها جرسه شديد
_ ما شفتها ايام الثانوي، بالذات في تالته ثانوي، البت دي قريب للإمتحانات مرضت عديل و علقوا ليها دربات، تعبت شديد والله و شيلتنا كلنا همها!
_ صح هي خوافه لكن بتقرا و بتنجح، ربنا يوفقها اكتر و اكتر..... مالك سرحت وين يا وائل
=.... عايز اسألك يا أمي.... انتي زمان الأدويه الكنت برسلها ليك من السعوديه منو الرسلت لي صورهم لما تلفونك كان متعطل؟
_ رسلتهم ليك الجرسه دي زاتا 😂
=.... البتذكرو انك قلتي لي الاء ح ترسل ليك الصور
_ اليوم داك الاء ما كانت موجوده بتسأل ليه؟ الذكرك بالكلام دا شنو؟
غريب أمر الحقيقة…
نكرهها حين تأتي، ثم نشكرها لاحقًا لأنها أنقذتنا من الاستمرار في حب شيء لم يكن كما تخيلناه.
يتبع...