رواية ورقة نجاة الفصل التاسع 9 بقلم حميده عبدالحميد
على حظي مع وصلتي وقفت العربية. المساعد قال لي ماشه قلت ليو اي نزل لي من الباب ركبت سريع وقعدت في كنبة خالص مديت راسي بالشباك عشان اشوف اذا لحقوني أو لا. بس الحمدلله م شفت زول شلت نفس عميق وسندت راسي في حافة الكرسي. م عارفه جبت الشجاعة دي كلها من وين يمكن كلام تميم أثر فيني وخلاني اكون شجاعة وكل م بتذكر عبارة انتي ضعيفه كنت بقوي بيها اكتر واكتر. وطق اتذكرت كلام ابو محمود بخصوص اخو تميم. ولازم تميم يعرف. بالقصه دي
كان في بت قاعدة جنبي وشكلها طالبة جامعية اتلفت عليها وقلت ليها معليش بس ممكن تلفونك لحظة عايزة اتكلم مكالمة عاينت لي مسافة وقالت لي م عندي رصيد قلت ليها حصل خير. في راجل كبير قاعد قدامي في مقعد نفر. قلت ليو معليش ي عمو ممكن تلفونك لحظه. عايزة اتكلم مكالمة. إبتسم وقال والله ي بتي عمك دا م عندو. تلفون. بادلتوا نفس الابتسامه وقلت ليو ربنا يديك ان شاء الله. م عرفت اعمل شنو. وكل مرة اسال زول يقول م عندو رصيد أو م عندو تلفون ٠٠٠
سالت المساعد العربية دي ماشه وين قال لي حي المطار.طبعا انا طولت م طلعت وم ركبت مواصلات فعشان كدا كنت دايشه شويه
وحي المطار دا وين بالضبط ماعارفه فما . م مشكلة المهم اطلع من هنا ٠٠٠ العربية وقفت وركبت بت في عمري تقريبا حسيتها. طيبه جات وقعدت معانا في كنبة خالص سلمت عليها وقلت ليها معليش بس بلقى عندك رصيد؟ قالت لي اي حبيبتي بتلقى فرحت شديد قلت ليها طيب ممكن تديني تلفونك لحظات بس عندي مكالمة مهمه قالت لي جدا. فتحت الشنطه وطلعت التلفون. فتحت لي النمط وجابت لوحة المفاتيح وقالت لي حاك
شلتوا منها وسجلت رقم تميم. بس تلفونوا كان قافل اتحسرت شديد على حظي حيكون دخل مكان مافيهو شبكة. اكيد بس كنت شبه م مصدقه قصة انو هو طلع من المنطقه حسب الشخصيه الشفتها قدامي هو م بيخلف ب كلاموا. بس تاني اتراجعت وقلت وراهو ناس كبار واكيد م ح يخالف كلامهم رجعت للبت تلفونها ومديت راسي بالشباك قلبي ضرب بقوة لمن شفت. عربية ابو محمود ماشه ورانا رجعت راسي سريع اكيد لاحقني.وطبعا انا عندي عيب واحد انو بخاف سريع. وخمس دقائق كل أفكاري بتتشتت بقيت اتلفت يمين وشمال وانا بفكر ح اعمل شنو والعربية لو قفت ساي هم ح يحصلوني ٠٠٠دموعي بدو ينزلو بس رجعتهم ب شدة. وقلت لنفسي اوع ي فاطمه اوع تبكي انتي م ضعيفه. انتي قويه رجعت ومديت راسي بالشباك تاني. ولقيتهم ف وشي مقاصدين الشباك وابو محمود كان بيأشر لي ب يدو. نظام انزلي رجعت تاني ودخلت راسي جوا. وقلت للبت الركبت قبيل ي اخت معليش بس ممكن نتبادل الطرح. استغربت شديد قالت لي السبب قلت ليها. ف ناس ماشين وراي واشرت ليها اتجاه الشباك مدت راسها وقالت لي ديل الراكبين افانتي قلت ليها اي قالت لي طيب لي؟ قلت ليها هم نسابتي وقعد يعذبوني حتى عايني يدي وشوفي رجلي وشوفي وشي كلهم مشوهين وهم السبب .اتحسرت شديد وقالت لي م تخافي ي بت انا ح امشي معاكي القسم قلت ليها لالا بس انتي اديني طرحتك وشيلي حقتي قالت لي طيب. نزلنا تحت شويه بحيث ماف زول يقدر يشوفنا واتبادلنا الطرح.وكان عندها طاقيه سمحه قالت لي شيلي دي برضو. شلتها منها وشكرتها كتير. لبست الطاقيه ورفعت يدي طقطقت للكمساري قال لي نازله قلت ليو اي صفر للسواق كسر من الظلط ووقف. حاسبتوا ونزلت. وعلى حظي كان في شارع مع وقفة العربية نزلت بيهو ٠٠٠ وجريت جرى ٠٠٠٠ م وقفت الا في الشارع التالت نفسي كان قايم من الجري ولاحظت لي رجلي بدت تنزف. شكلوا الجرح اتفتح. في سبيل تحت نيمة كبيرة وظليله جريت وقعدت تحتها. شربت مويه لمن رويت عطشي. واتكيت طرف الشجرة ٠٠
معقوله وحدة ب أهلها يحصل ليها كل العذاب دا بس يلا خير وبكرة بسند نفسي وبقرا وبعوض نفسي عن كل خذلان وتعب عشتوا ان شاء الله ٠٠٠ غمض عيوني وبديت اسرح في حياتي الجديدة ومستقبلي الجديد بعد م اطلق من محمود واسافر منهم بعيد جات نسمه باردة ضربت خدي. لأول مرة احس بطعم الحياة وانو لازم احاول اعيش عشان نفسي ٠٠.كنت مغمضه عيوني لمدة ٨ دقيقه. فجأة حسيت بي صوت عربية. وقفت قدامي قلبي ضرب. فتحت عيوني سريع فإذا بها عربية من نوع (كِلك) الباب فتح ونزلو منها اتنين. شاب. دققت فيهم النظر سمح وعرفت انَو هم عندهم علاقه ب محمود وتقريبا ديل اولاد عمو ٠٠
قمت سريع وحاولت اتخاطهم بس واحد مسكني من. يدي وبكل. استفزاز قال لي فاطمه معقوله حايمه في الشوارع كدا زي الماعندك وليان.؟ رد ليهو التاني وقال ليو. تكون ماشه ليها مكان كدا بالنيه بس ٠٠ طبعا فهمت قصدو طوالي دموعي. نزلو قال لي معليش معليش يعني م نهظر معاك ولا شنو. المهم اركبي نوصلك البيت. قلت ليو شكرا. ونفض يدو مني. قال لي م علكيفك.ي زولة لازم ترجعي البيت ولازم تسحبي الشكوى. قصتك منتشرة بين الأهل والقبيلة كلها. فعشان كدا بدون قوة راس ارح قدامي. قلت ليو تمام. زح طيب من وشي قال لي جدا. وقفت ف نص الشارع. وشلت نفس عميق.
وب أعلى صوت. عندي قلت
حراااااااااااااااااااااميه وااااااي الحقوني حراااااااامية عايزين ينقلوني وبقيت اصرخ واصرخ
خمس دقائق أبواب البيوت بدت تتفتح ومن كل بيت يطلعوا سته سبعة نفر وعلى حظي كلهم رجال. وواحد كدا عالي وليهو هيبه وقف وقال في شنو بقيت ابكي وقلت ليهو عايزين يخطفوني واتعرضو لي وحاولو يضربوني كلهم اتحركو عليهم وواحد منهم مسك الكان مساك لي يدي من قميصوا وقال ليو داير تخطفها وطاخ قطع فيهو كف. والرجال كلهم اتلموا فيهم حاولو يشرحوا ليهم انو انا. بعرفهم وانا مرت ولد عمهم بس م ادوهم نفس طوالي استغليت الفرصه. وجري على الشارع التاني ومن بعيد لمحت ولد صغير قاعد جنب باب بيتهم وقعد يلعب بالتلفون وصلتوا ولقيتوا مندمج مع اللعبة. قلت ليو بتعمل شنو رد لي وهو بيعاين في اللعبة ومركز معاها بكل حواسو
قعد العب ببجي ي خالتو
قلت ليو عندك شريحه في تلفونك رفع عينو وقال اي عندي ابوي جابها لي وطق طلع من اللعبه قلت ليو طيب اديني تلفونك اتكلم شويه و ارجعوا ليك قال لي كويس هاكي شلتوا منو وسجلت الرقم سريع سريع وضغط على الاتصال وطق الخط دخل
توت ٠٠٠
توووووت
تووووت٠٠٠
كنت بدعي في سري ي رب يفتح يارب يفتح. الجرس لمن انتهى بس م فتح.الولد قال لي اديني التلفون طيب عايز امشي البيت بديت افقد الامل خلاص وشكلوا تاني م ح اقدر اتكلم مع تميم كان نفسي اكلموا بموضوع اخوهو مديت التلفون للولد وقبل يسحبوا مني التلفون رّن ٠٠
وكان رقم تميم فرحت شديد وقلت للولد ثواني بس قمت على حيلي ورديت عليهو
الو تميم انا فاطمه
سكت مسافه وبعدها قال
فاطمه وين انتي ي بت انا جيت المستشفى وم لقيتك.سالت الممرضه قالت لي طلعتي
قلت ليو انت موش طلعت من المنطقه. وماشين منطقه تانيه واتحركتوا الساعة وحدة بليل
سكت مسافه وبعدها قال بكل هدوء
انا وعدتك انو ح اخلصك من محمود وح اقيف معاك لمن تتطلقي منو فمستحيل اخلف بوعدي لو اموت و ايوا . كتيبتي اتحركت لانو جاني. امر من فوق انو نتحرك فعشان كدا خليتهم يتحركوا مع عز الدين وانا بعد م احل ليك مشكلتك. واضمن انو انتي في بر الأمان حتي ح اطلع
م عارفه بس حسيت ب احساس غريب معقولة. هو عايز يعمل دا كلو عشاني
واصل كلامو وقال وين انتي بالضبط. عاينت للولد وقلت ليو الحي دا اسمو شنو؟ قال لي حي الداؤودي قلت ليو تمام كلمت تميم. قال لي في شارع واضح تقدري تطلعي عليهو عاينت يمين وشمال وشفت الظلط من بعيد. قلت ليو ح اطلع ليك في الظلط قال لي. تمام قفلت الخط ورجعت التلفون لي الولد شكرتو وسرعت على الظلط. فرحت شديد لمن عرفت تميم لسه قاعد. ٠٠٠
وقفت في الظلط وكنت راجياهو وانا بعاين في كل زاويا وكل ركن. وعلى سؤء حظي فجأة ابو محمود وقف قدامي بالعربية اطرافي بردو وحسيت بالدم نشف في عروقي ونفسي كتم فتح الباب بقوة ونزل. وقال. تعبتينا معاك ياخ
بالله انتي انسان ولا بلا. ياخ دي شنو الانسانة السغيلة دي.
رجعت خطوة ل ورا. ومع الخلعة حسيت بحركة رجلي اتكبلت واصلا مشيت بيها كتير. وبدت توجعني وكنت م قادر امشي بيها من الخلعة فتح الباب وقال لي اركبي. من دون أي كلام كتير ومن دربنا دا على القسم. قلت ليو ما ماشه والشارع ملان ناس. بصرخ وبلمهم ليك. ضحك وقال. عادي جدا بقول ليهم مختلة عقليا وبعدين اخوي المعاي دا ضابط. يعني اي زول ح يشوفك ح يفتكر عاملة ليك جريمة ولا مصيبه وحدة فماف زول ح يجيب خبرك فعشان كدا الحركات السغيلة والبايخه دي احسن تخليها. ولسه كمان ضربتي بتي بالطوبة الايام دي جايبه ليك. فلحمه وحركات كدا عجيبه. لكن بنزلك في الأرض ي فاطمه خلي بس أفضى من موضوع محمود والجيش المتغطيه بيهم سافرو خلاص يعني. ارتاحي ساي. وشوفي كلام نفسك بعدا. عايزة امشي بالجهة التانيه هنا اخوهو صرخ فيني وقال اركبي زفت العربية دي ياخ م تجننينا معاك نحن م عندنا شغلة غيرك ٠٠ ولا شنو.؟
بقيت اعاين في الشارع على امل المح تميم اكيد ح يجي زي كل مرة وفي آخر الدقائق ح يساعدني اي اكيد انا متأكدة. كنت واقفه زي الصنم في مكاني وانا بعاين في نهاية الظلط. ابو محمود لمن شافني أبيت اركب. جا ومسك يدي بقوة لحدي م لزاني جوا العربيه ودخلني بالغصب وقفل الباب. وركب قدام وداك برضو ركب واتحركنا.
يعني كدا خلاص ح امشي اسحب القضيه؟ . قلت ليو حتى لو وديتني هناك م ح اسحبها قال لي م علكيفك ي فاطمه. ح تسحبيها وتقولي نفس الكلام القلتوا ليك في المستشفى وبعدين المدينة النحنا عايشين فيها دي شغل واسطات بس وكلها معارفي وناسي يعني. لو مشيتي وين وين بجيبك. وولدي لو حصلت ليو اي حاجه باكد ليك قتيلك م ح يتعرف ف احسن تمشي عديل. طوالي سكته لانو بجد خوفني
بعد ربع ساعة وقفنا قدام القسم وعمل نفس الشي فتح الباب ومسك يدي ونزل بي دخلنا جوا القسم والمدير كان منتظرنا ومجهز كل ورقو واخو محمود وود خالتو كلهم كانو قاعدين وشكلهم كانو حارسننا. المدير كان قاعد في الكرسي قدام المكتب وبي قدام الطربيزة اتنين كرسي ابو محمود قال لي اقعدي هنا قعدت وهو قعد في الكرسي التاني وبقينا مقاصدين بعض والمدير في نصنا ابو محمود اتنهد وقال للمدير دي مرت ولدي وح تشرح ليكم اي شي وياريت قبل دا كل تبدأ ب إجراءات فك ولدي. وهي حاليا ح تسحب الشكوى كانو كلهم واقفين في راسي المدير عاين لي بكل تركيز وقال ح تسحبي الشكوى ؟؟ عايزة افتح خشمي بس سمعنا صوت جاي من ورا وهو بيقول ٠٠
لأ. ي ساعدتك نحن م عايزين نسحب اي شكوي. اتلفت اتجاه مصدر الصوت فإذا به تميم. دخل وعاين لي ابو محمود بنظرات حادة جدا .وقف قدام المدير وقال ليو. نحن جينا. عشان. نزيد الشكوي ونقدم ليكم أدلة وحاجات تانية ويا ساعدتك للأسف شديد. الإنسان الاسمو محمود حاول يقتل البت المسكينة دي ويلي هي مرتو وشايف الحروق الفي يدينها ووشها ورجلها البتنزف حاليا الخ٠٠٠٠ داااااا كلو
سببو محمود ي سعادتك. ودخل يدو ف جيب الكاكي وطلع منو حاجات ختاهم قدام المدير وقال ليو دي أدوات بيشربو بيها مخدر الايس وللأسف محمود مروج وبيتعاطي يعني ي ساعدتك بلاوي الدنيا دي كلها لامه فيهو والقانون ح يكون ف زمة الله لو م حكم ليهو بالإعدام ٠٠٠ ابو محمود بقي قدر السمسميه حاول يدافع عن ولدو بس تميم سكتو وقال ويا سعادتك. الإنسان القدامك دا عارف بكل شي. وعارف مرت ولدو قعد تتعذب وحاليا جايبها بالقوة. عشان تسحب الشكوى المدير اتلفت على وقال صح جيتي بالقوة؟
بكل ثقه وشجاعة قلت ليو اي وبديت اسرد ليهو في كل شي حصل لي معاهم كنت قويه شديد لمن شفت تميم. بعد م خلصت المدير قال لا حول ولا قوة الا بالله. وقال يا منتصر
منتصر جا طالع من جوا قال ليو نعم
قال ليو تحرك العناصر هسي دي. واول حاجه تمشو وتداهمو بيت محمود وتاني حاجه تمشوا المستشفى وتجيبوا عشان يتحول السجن الكبير وهناك ح نشوف اصدار اخر قرار شنو. ابو محمود بقي يكورك ب اخر صوت لمن سمع كلام المدير
تميم ضحك وقال ليو عيب ياخ انت راجل وعاين لي وقال يلا ارح نمشي قدامنا قضيه طلاق لسه
قمت بكل ثقه ولحقتوا طلعنا برا وقلت ليو تميم بجد شكرا ليك بس كيف عرفت انا هنا؟ قال لي من بعيد شفتكم وشفت الحيوان دا لمن ركبك العربية وقلت احسن انهي موضوع سحب الشكوي واطلعوا ليهم من راسهم وكنت ماشي وراكم. المهم انا بديت ليك إجراءات الطلاق كلها والليله اول جلسة. وفتح لي باب العربية. قال اركبي ركبت وهو ركب حرك العربية واتوجهنا على المحكمه هنا طق اتذكرت قصة اخو شلت نفس عميق وقلت ليو انت عندك اخو اسمو تيم؟؟ . عاين لي بتعجب وقال اي بس عرفتي كيف؟ قلت ليو اخوك مات مغدور والغدر بيهو واحد اسمو موسى وناس ابو محمود بيعرفوا. من الصدمه طوالي قبض فرااااامل ونزل من الظلط ٠٠٠
يتبع ....