رواية ظل القدر الفصل السادس عشر 16 بقلم رواء هادي
تحضني وتحجي عن التضحية والحقوق،
بس أنا ما جنت اسمع..
جنت أشوف أمي إلي ربتني يومين سنين، امي إلي من انولدت شفت الدنيا وهي تبجي بسببي، أمي الي انحرمت من الخلفة
ولاية بصوت يرجف : إذا أنتَ تريدين تعيشين حياتج.. روحي.. أنا ما راح اوكف بطريقج
رشا حضنتني بسرعة ودموعها تغرك وجهي..
رشا : لا والله يا ولاية لا.. أنا ما اعوفج.. أنتِ
بنتي.. أنتِ روحي..
بس أنا دفعتها.. اول مرة بحياتي ادفع امي..
ولاية : لا أنتِ مو أمي.. أمي هي ماما نهاد.. هي إلي ربت.. هي إلي سهرت.. هي إلي نظفت راسي من القمل.. أنتِ بس ولدتيني وعفتيني يم الدجاج..
الغرفة كلها سكتت.. ماما نهاد شهكت.. خالو علي كام من مكانه.. حسن عيونه صارت حمرة..
رشا وكعت بالكاع وانهارت.. صارت تبجي بصوت عالي.. تبجي بكل قهر سنينها..
رشا : ايي أنا مو خوش ام.. أنا ام فاشلة.. أنا حتى رحم ماعندي.. حتى جهال ما اجيب.. أنا
انظلمت وانتو كلكم تلوموني..
حسن كام بسرعة.. شال رشا من الكاع.. حضنها
مثل ما يحضن امه نهاد..
باوعلي بنظرة اول مرة اشوفها.. نظرة عتاب
.. نظرة كسرتني..
حسن : ولاية اعتذري من امج هسه
ما اعتذرت.. ركضت لغرفتي.. سديت الباب.. حضنت فلفولة.. وبجيت.. بجيت لما نشف
دمعي..وراها باسبوع..
البيت كله يتحضر للعرس.. عرس رشا ودكتور سامر.دكتور سامر اجه.. رجال جبير.. لحيته بيها شيب.. بس عيونه حنينة.. من شافني سلم ..
سامر: أنتِ ولاية؟ ماما تحجي بيج ليل نهار.. أنتِ شاطرة وحلوة مثل امج..
ما جاوبته.. باوعتله ورحت..
ماما نهاد كاعدة تخيط فستان لرشا.. خالة ام علي تسوي حلويات.. فطيم فرحانة تكول خالتي راح تصير عروس..وأنا.. أنا كل يوم أنام واكعد
والبيت يضيك بيه..يوم العرس..
لبسوها ابيض.. رشا طلعت تجنن.. مثل الملكة.. بس عيونها تدور عليه.. تدور عليه أنا..
رشا : وين ولاية؟
نهاد : بغرفتها ما تريد تطلع..
رشا اجت للغرفة.. لكتني كاعدة بالزاوية.. لابسة تراك قديم.. وشعري منكوش..
رشا : ولاية كومي البسي.. تعاي وياي واح
يجي سامر وأهله ياخذوني
ولاية : ما اروح.. روحي أنتِ
رشا : ولاية أنا أمج.. هاي اخر ليلة الي بالعراق.. باجر طيارتنا لألمانيا..
ولاية : إي روحي.. مثل كل مرة..
عوفيني وسافري..
رشا باستني من راسي.. ودمعتها وكعت على خدي..
رشا: أنا راح ادز عليج.. وعد.. بس اكمل اوراقج.. شهر واحد وادز عليج تعيشين وياي بألمانيا.. تدرسين هناك.. تصيرين احلى دكتورة..
طلعت.. سمعت الهلاهل.. سمعت السيارات.. راحت..
من راحت.. أنا انهاريت ما خليت شي بالغرفة ما كسرته كسرت المراية.. شككت ملابسها حضنت فلفولة وكمت أبجي بكل حركة گلب ...
نهاد اجت تركض: ولاية شبيج يمة؟
ولاية : ليش عافتني؟ ليش كل امهات العالم يبقن ويا بناتهن إلا أمي؟ أنا شنو ذنبي إذا اجيت
بنت؟ شنو ذنبي اذا رحمها انشال ؟
نهاد حضنتني.. حضنتني حيل..
نهاد : لا يمة.لا تكولين هيج.. امج تحبج.. بس انظلمت.. تريد تعيش..
بس أنا ما اسمع..
ورا ما سافرت رشا بثلاث ايام..
أنا بطلت اروح للمدرسة.. بطلت أكل.. بطلت احجي ويا احد.. كاعدة فوك السطح يم قفص فلفولة.. اباوع على الطيارات.. اكول يا طيارة بيها امي؟
حسن صعد.. لكاني نايمة بالكاع
والشمس ضاربة بيه..
حسن : ولاية؟
ما جاوبته..
شالني.. نزلني جوة.. وجهي اصفر.. شفايفي بيض..
حسن : يمة نهاد تعاي شوفي ولاية شبيها!
ماما نهاد وبيبي اجن ركض..
ام علي: يمة هاي البنية مريضة.. صخونة نار..
ودوني للدكتور.. كال انهيار عصبي وحزن شديد ونقص اكل..نطاني مغذي..رجعت للبيت..
فطيم كاعدة يمي تبجي..
ولاية بصوت تعبان: فطيم امي راحت..
فطيم : لا ما راحت.. هاي ماما نهاد امنا كلنا..
حضنتها وبجيت..بالليل.. حسن اجه للغرفة..
جايب بايده صينية أكل
حسن : كومي اكلي..
ولاية : ما اريد..
حسن : إذا ما تاكلين.. أنا هم ما أكل.. وابقى كاعد يمج لحد ما تاكلين..
باوعتله.. عيونه بيها دموع.. حسن ابو 20 سنة إلي جان يريد يشمرني من البيتونة من جنت طفلة بالكماط .. هسه يتوسل بي علمودي ما اكل..
حسن : ولاية.. رشاوي راحت.. بس احنا موجودين.. أنا موجود.. أنا اخوج الجبير.. واحلف بغلات أمي نهاد إذا احد مس شعرة منج إلا اكتله..
حتى لو جانت امج..
اول مرة من فترة طويلة ابتسمت..
ولاية : حسون..
حسن : عيون حسون ؟
ولاية : إذا رشا ما رجعت.. أنتِ تصير ابوي؟
حسن: أنا.. أنا أخوج.. أخوج الجبير.. يلا أكلي..
وكلني بأيده أكلت وفرحانة بي كلش فرحانة بحسن
كملت أكل أخذ الصينية وطلع كمت ورا وكفت بالباب من سمعته يحجي ويا خالو علي بالصالة
حسن : يابة.. رشاوي إذا ما دزت على ولاية خلال شهر.. أنا اروح لألمانيا اجيبها من شعرها.. لو اجيب ولاية الها.. لو اجيب رشاوي الها.. ما اخلي ولاية تنقهر بعد..
فرحت كلش هواي بحسن ورجعت لفراشي سديت عيوني ونمت.. وأنا بداخلي شي غريب.. خوف.. وغيرة.. وحب.. ما أعرف شنو..
بس أعرف شي وأحد.. من هسه ورايح.. أنا ما عندي أم.. عندي حسن..وحسين وعبدالله و
فطيم وبيبي وماما نهاد وخالو علي
صار اسبوعين أنا ما اطلع من البيت.. لا أكل زين.. لا اشرب.شرب زين . بس نايمة يم فلفولة وأبجي.. حتى شعري صار بيه ريحة وصخ..
ماما نهاد دخلت للغرفة.. ووراها حسن وفطيم وحسين وعبدالله..
ماما نهاد : ولاية كافي يمة.. كافي قهر.. كومي شوفي اخوتج شمسوين..
ما رديت..
حسن اجه شالني من الفراش شيل.. أنا اصيح..
ولاية : عوفني حسون عوفني
حسن : ما أعوفج.. اليوم نطلع للبستان..
فطيم : إي ولاية تعاي.. حسون راح يسويلنا مرجوحة
حسين : يلا ولاية اضحكي
ولاية : نزلتي حسن
حسن : ترحين
ولاية : إي أروح نزلتي
عبدالله : ولاية تعاي نلعب..
ما كدرت اكلهم لا.. نزلني حسن جروني جر للبستان
البستان الهوا بيه يجنن.. ريحة النخل والتراب.. الشمس حلوة مو مثل شمس البيت إلي تخنك..
حسن شايل حبل جبير... وربطه بين نخلتين كبار..
حسن : حسين.. عبدالله.. روحو لبيتنا.. جيبو فراش من فراش امي بالبوكه.. بسرعة..
حسين : يا فراش؟
حسن: ذاك المزخرف مال العروس مال أمي.. إلي تضمه وما تنطيه لأحد..
ولاية : لا حسون لا تأخذ فراش ماما نهاد تزعل
حسن : خلي تزعل.. فدوة الج الفراش..
راحوا حسين وعبدالله يركضون.. رجعو شايلين فراش جبير ثكيل.. فراش عرس ماما نهاد..
لونه احمر ومخمل..
فطيم شهكت : ياا هذا مال ماما.. إذا شافته راح تكتلنا
حسن : انا أتحمل الكتل.. تعالوا..
خله جدع النخلة ولفلف الفراش عليه وسوه مرجرحة صغيرة تكفي نفر وأحد ..
حسن : يلا منو أول واحد؟
كلهم صاحوا
فطيم وحسين وعبدالله : ولاية ولاية
دفعوني.. صعدت بالمرجوحة.. رجليه مدلدلة.. الفراش ناعم وريحته ريحة ماما نهاد..
ريحة حلوة ودافية...
حسن اجه وكف وراي..
حسن : جاهزة أم القمل؟
ولاية : لا تكلي ام القمل كدامهم
ضحك..
حسن : جاهزة ولاية؟
ولاية : جاهزة
وبدأ يهزني.. شوية شوية.. وبعدين قوي..
الهوا صار يضرب بوجهي.. شعري يطير..
النخل يروح ويجي كدامي..
ولاية : ههههههه حسون نزلني أخاف
حسن : لا تخافين.. أنا لازم الحبل.. ما اوكعج..
فطيم تصفك..
فطيم : يلا ولاية طيري طيري
حسين وعبدالله يصيحون..
حسين وعبدالله: ولاية طارت ولاية طارت
وأنا أضحك.. أضحك من كل گلبي.. أول مرة أضحك من سافرت ماما رشا.. اضحك بصوت عالي.. حتى بطني وجعني من الضحك..
ولاية : حسون بعد بعد هزني أقوى
حسن : لا أخاف توكعين
ولاية : ما اوكع أنتِ موجود
حسن سكت.. ايده على الحبل رجفت.. بس هزني أقوى.. صرت اطير فوووك.. أشوف السما قريبة..
بهاللحظة نسيت كلشي.. نسيت انو أمي عافتني.. نسيت انو رحمها انشال.. نسيت انو أنا بلا ام..
ما بقي بس أنا.. والمرجوحة.. وحسون إلي يهز بيه..
نزلني بعدين.. وكعت على الكاع.. دخت من الهوا.. وكعت بحضنه.. وهو لزمني..
حسن بصوت ناصي يمي بس أنا اسمعه: بعد لا تبجين.. دموعج غالية ولاية..
ولاية : حسون..
حسن : ها؟
ولاية : اذا إجه يوم وأنتِ هم تعوفني مثل ماما رشا؟
حسن عيونه صارت حمرة.. شد على ايدي..
حسن : أنا؟ أعوفج؟ ولاية أنا إذا أعوفج الله ياخذني.. أنا مو رشا.. أنا حسن..
أخوج.. سندج..
فطيم اجت تركض..
فطيم : يلا دوري دوري! أنا اريد اتمرجح
بعدت من حسن وفطيم صعدت فوك المرجرحة وحسن صار يهز بيها.. وحسين وعبدالله يتضاربون منو بعده..وأنا كعدت على التراب.. اباوع عليهم..
فطيم تضحك.. حسين يصيح.. عبدالله يبجي يريد يصعد.. وحسن.. حسن يضحك وياهم بس عينه عليه.. كل شوية يباوعلي ويتأكد أنا أضحك..
بهاللحظة عرفت.. أنا ما أحتاج ام تسافر وتعوفني علمود مستقبلها.. أنا عندي أهل..
عندي ماما نهاد.. وخالو علي.. وبيبي.. وعندي فطيم أختي.. وحسين وعبدالله أخواني..
وعندي حسون.. الي سوالي مرجوحة من فراش امه حتى يضحكني..يمكن رشا راحت
.. بس ظل حسن
احنا بعدنا بالبستان نضحك ونتمرجح، وفطيم نايمة بالمرجوحة وحسن يهز بيها وحسين وعبدالله يتعاركون منو يصعد وراها، وأنا كاعدة على
التراب ورجلي كلها تراب بس مرتاحة..
وفجأة..
سمعنا صوت يصيح من بعيد..
نهاد : حسسسسسن! حسسسسين!
عبدالله! فطيييم! ولاااااية!
التفتنا.. ماما نهاد واكفة براس البستان، وايديها على خصرها، وعبايتها طايرة من الهوا، ووجهها احمر من الحر..حسين همس..
حسين : اجت امي..
عبدالله ضم نفسه ورا النخلة..
عبدالله : أنا ما جيت.. حسون كلي جيب الفراش..
حسن بلع ريجه ...
حسن : يمه.. اجينه شوية للبستان..
ماما نهاد قربت.. عيونها على المرجوحة.. على الفراش الاحمر المخمل.. فراش عرسها إلي صارله 20 سنة ضامته محد يلمسه..
سكتت ثواني..
نهاد: هذا.. هذا فراشي؟
محد حجه..
نهاد : فراش عرسي؟ الي جابته إلي خالة؟ إللي مخليته للكعدة الحلوة؟ مسوينه مرجوحة وبالتراب؟؟
فطيم نزلت من المرجوحة بسرعة..
فطيم : ماما والله مو أنا.. حسون كال..
حسن تقدم كدامنا كلنا.. مثل كل مرة.. يصير ساتر..
حسن : يمة أنا سويته.. أنا كلتلهم جيبوه.. لا تعيطين على ولاية.. هي جانت زعلانة وسويت الها مرجوحة حتى تضحك..
ماما نهاد باوعت عليّ.. وباوعت عليّ أنا.. أنا بعدني بالكاع وشعري منكوش واثر دموع على
خدي بس أضحك..
هي شافتني أضحك..
عصبها نزل شوية..
نهاد : ولاية؟ أنتِ ضحكتي؟
هزيت راسي إي..
نهاد : فدوة للفراش.. فدوة للبوكة كلها إذا أنتِ تضحكين.. فدوة اروحلج أنا..
وباستني براسي..
نهاد : بس والله يا حسن لو ما شفت ولاية ضاحكة إلا أخلي النعال يرقص فوك ظهرك وظهر حسين وعبدالله وفطيم بس حظكم بولاية
ماما نهاد كامت.. شالت الفراش من الحبل..
نفضت التراب منه..
نهاد : يلا كوموا.. كافي لعب.. صار المغرب.. وخالة سوت عشة. والفراش اخذه اغسله.. وأنتِ
يا حسن حسابك بالبيت..
رجعنا نمشي للبيت... حسن كدامنا شايل الحبل.. وأنا بنصهم.. فطيم لازمة ايدي.. حسين شايل عبدالله على ظهره..
بالطريق حسن دنك عليّ
حسن بصوت ناصي: ها ولاية؟ المرجوحة حلوة؟
ولاية : تجنن.. بس بعد ما اسمحلك
تاخذ فراش ماما نهاد..
حسن : لعد باجر اسوي لج وحدة
من البطانية مالتي..
ولاية : لا أريد نفسها..
حسن: تدللين.. اسويلج بستان كامل
مراجيح الج وحدج..
ضحكت.. وهو ضحك..
وصلنا للبيت.. بببي واكفة بالباب..
ام علي : وين جنتم؟ وشنو هذا الفراش؟
نهاد هذا مو فراش عرسج؟
نهاد : إي خالة.. حضرة جناب حسن مسويه مرجوحة لبنات
نهاد : شفت؟ ولاية اكلت..
علي : الحمدلله.. ابني حسن طلع رجال..
بليل.. أنا نايمة بغرفة فطيم.. مو بغرفتي وحدي.. فطيم حضنتني..
فطيم : ولاية.. إذا ماما رشا ما رجعت.. احنا نبقى اخوات مو؟
ولاية : نبقى..
فطيم : وحسون يبقى اخونا الجبير؟
ولاية : يبقى..
سكتنا شوية..
فطيم : ولاية.. أنتِ تحبين حسون؟
انصدمت.. وجهي صار نار..
ولاية : شتحجين فطيم؟ هو اخوية
فطيم : ادري اخونا.. بس أنتِ من تتمرجحين تباوعين عليه بس هو..
ما جاوبتها.. درت وجهي ونمت..
بس بداخلي.. سؤال فطيم بقى يرن..
أنا أحب حسون؟
لا.. هو اخويه.. هو اللي جان يريد يشمرني من البيتونة.. هو اللي يكلي ام القمل..بس.. هو
الوحيد إللي ما عافني...
غفيت.. وحلمت انو أنا بعدني بالمرجوحة.. وهو يهز بيه.. وما يوكف ابد..ورا سالفة المرجوحة بجم يوم، رجعت اضحك شوية.. اروح للمدرسة، أرجع أساعد ماما نهاد بالبيت، انيم فلفولة
جوه جربايتي.. بس كل ليلة.. كل ليلة قبل لا انام، افتح تلفون فطيم وأشوف إذا ماما رشا ناشرة شي..ماكو.... لا صورة.. لا اتصال..
شهر.. صار شهر كامل من سافرت، وهي كالت شهر وادز عليج..حسن كل يوم يسألني..
حسن : دزت عليج؟
ولاية : لا..
ويعصب.. يطلع للسطح بيوم من الايام، خالو علي اجه من الدوام ووجهه تعبان..
علي : نهاد.. رشا اتصلت..
أنا فزيت من مكاني..
ولاية : وين؟ احجي وياها! انطيني احجي خالو
علي باوعلي بنظرة غريبة: نهاد تعاي للمطبخ..
راحو للمطبخ وسدوا الباب.. بس أنا لزكت اذني على الباب..سمعت ماما نهاد تصيح..
نهاد : شنو؟ شلون يعني ما تكدر تجيبها هسه؟
علي : تكول اوراقها بألمانيا صعبة.. وزوجها سامر ما يقبل تجيب بتها وياها هسه.. يكول خليها تكمل دراسة هنا يلا تجيبها.. سنة.. سنتين..
سمعت هالكلمة وانفتح الباب بوجهي.. وكعت على الكاع..ماما نهاد شافتني..
نهاد : ولاية..
ولاية ودموعي تنزل : كالت سنتين؟
خالو علي سكت..
ولاية : هي باعتني؟ باعتني علمود رجال؟ علمود جنسية؟
نهاد : لا يمة لا تكولين هيج..
ولاية : لعد شلون؟ مو كالت شهر؟ صار شهر ونص!
ركضت لغرفتي فتحت الكنتور مال ماما رشا القديم طلعت كل هدومها إللي عايفتها شمرتهن بالحوش.. جبت دبة النفط..
ولاية: احركهن.. احرك كلشي يذكرني بيها!
حسن اجه ركض اخذ دبة النفط من ايدي شمره بعيد..
حسن : ولاية لاااا.. لا تسوين هيج
كمت اضرب حسن بإيديه وأبجي ...
ولاية : أنتِ هم جذب مثلها! كتلي شهر واجيبها من شعرها! وين؟ ليش ما رحت؟!
حسن لزمني من ايدي اثنينهم.. هزني..
حسن : ولج أنا ما اجذب! إذا ما اجيبه
الج أنا مو رجال
بهاللحظة تلفون حسن دك عاف إيديه وشاف المتصل فتح خط بسرعة من سمعت
صوتها عرفتها أمي وشا...
رشا: الو.. حسن ... الوو تسمعني حسسسن الووو
سمعت صوتها.. صوت ماما رشا.. بس
متغير.. لهجتها متغيرة..
أخذت التلفون من إيد حسن بسرعة وريت ...
ولاية : الو..
رشا : ماما حبيبتي.. شلونج؟ سامحيني..
والله مو بإيدي.. سامر..
ولاية : لا تكولين ماما.. أنا ما عندي ماما.. ماما ماتت من سافرت..
رشا : لا تكولين هيج ولاية.. أنا أمج..
ولاية : أنتِ مو أمي.. أنتِ مرت دكتور سامر.. أنا أمي نهاد.. واخوي حسن.. روحي عيشي حياتج الجديدة ونسيني..
وسديت الخط بوجهها..
ذبيت التلفون وكعدت بالكاع أبجي.. أبجي بصوت عالي.. فطيم اجت تحضني.. حسين يبجي وياي.. عبدالله يمسح دموعي بايده الصغيرة..
حسن ما بجي.. حسن كام.. شال تلفونه..
طلع بره.. سمعته يحجي..
حسن: الو.. رشا؟ أنا حسن.. إذا أنتِ صدك أم.. لا تتصلين بعد.. لا تخلين بنتج كل يوم تموت الف مرة.. هي هسه عدها أم.. وعدها أخوان.. وإذا احتاجت شي أنا موجود.. مو أنتِ ولا فلوسج..
حسن : من هسه.. أنتِ مو بنت رشا.. أنتِ أختي.. أخت حسن.. وإذا احد كالج بنت فلان
وعلان.. اكسر حلكه..
هزيت راسي إي.. وأنا أبجي..
حسن : يلا كومي.. خل نسوي مرجوحة جديدة.. بس هالمرة أنا وأنت وبس
إجت ماما نهاد من شافتني كامت تبجي وحضنتني حيل وراها بيبي جت تواسي بي وخالو علي هم جان يواسيني ويضحكني ..
ضحكت من بين دموعي وراها دخلنا جوه البيت هديت شوي وصاحلي حسن ..
حسن : يلا أمشي أخذج لمكان تحبي
ولاية : وين ؟
حسن : انطيني إيدج
جرني من إيدي وطلع بي من الباب الجوة الدرج
ولاية : وين ماخذني
حسن : للبستان
ولاية : غير نأخذ حسين وعبدالله وفطيم
حسن : كل مرة نأخذهم هالمرة بس أنا وياج
ولاية : ها
رحنا للبستان.. نفس النخلتين.. نفس المرجوحة.. بس هالمرة هو كعدني وهو وكف..حسن
وهو يهز بيه شوية شوية ..
حسن : ولاية
ولاية : ها؟
حسن : إذا كبرتي.. وصرتي حلوة أكثر.. وجوي خطابة عليج هواي.. توافقين؟
ولاية : لا.. ما اتزوج.. ابقى يمكم
حسن سكت شوية وبعدين كال ...
حسن : وإذا أنا خطبتج؟
المرجوحة وكفت الهوا وكف حتى النخل
سكت..باوعتله مصدومة..
ولاية : شنو؟
حسن وجهه احمر مثل الدم ...
حسن : اقصد.. يعني.. إذا.. إذا امي نهاد وأبوي رادوا يزوجوج إلي.. حتى تبقين
يمنا.. توافقين؟
أنا ما جاوبت.. نزلت من المرجوحة وركضت للبيت.. كلبي يدك الف دكة..معقولة؟ حسون؟ إللي جان يريد يشمرني من البيتونة؟ اللي يكلي ام القمل
وابو الزوري؟ يريد يزوجني؟
دخلت للغرفة.. سديت الباب.. وخليت إيدي على كلبي.. اللي جان يدك مو من الخوف..
من شي ثاني.. ما أعرفه..
بالليل طلعت من الغرفة، وشفت خالو كاعد فوك الكرسي، وماما نهاد فاتحة شعرها الأسود الحلو الطويل، وخالو كاعد يمشط إلها،
ويسولف ويضحك، دنك باس خدها. يا ربي شكد حلوين، يخبلون، مو مثل أمي وأبوي، مخابيل وانفصلوا عن بعض وضيعوني.
أبوي راح وتزوج، وأمي راحت تزوجت وعاشت حياتها، وأنا ضعت وما أعرف وين ما
وين، راح يصفي بيه الدهر...
نهاد : علي
علي : عيون علي احجي
نهاد : ولاية
علي : شبإيدي عليها نهاد شبإيدي
نهاد : تذكرني بروحي مالها أحد غيرنا
علي : نهاد لا تبجين
نهاد : ماكدر علي ماكدر كلما أشوفها أشبع قهر بنية بعمر الورد لا أم ولا أب أمها وأبوها عايشين
وتخلوا عنها
علي : المهم إحنا موجودين وراح نعوضها عن كلشي
نهاد : أعرف إحنا مراح نقصر وياها بس جواها راح يبقى نقص يبقى فراغ صعب يمتلي صعب
علي : اووف كافي نهاد ماتحمل أشوف دموعج أنا ماصدكت بطلتي تبجين وصرتي تضحكين
كافي نهاد ..اوووف كافي والج
خالو علي سكت، باس إيد ماما نهاد..
علي : نهاد.. أنا وياج من كنا نخلف جهال.. وهسه صار عدنا جهال.. وولاية مو غريبة.. ولاية بنتنا الخامسة..
ماما نهاد مسحت دموعها..
نهاد : إي والله بنتنا.. بس أخاف عليها من كلام الناس.. من باجر عكبه تكبر وتسأل.. ليش أمي عافتني؟ ليش أبوي ما سأل عليّ؟
كل كلمة أسمعها نفس السجينة بگلبي تنغرز ...
رجعت لغرفتي.. ما نمت من التفكير
ثاني يوم الصبح..
كعدت من وكت.. غسلت وجهي.. مشطت شعري
لبست صدرية المدرسة.. ماما نهاد
من شافتني شهكت..
نهاد : ولاية؟ رايحة للمدرسة؟
ولاية : إي ماما.. أريد أرجع أداوم..
حضنتني.. حضنتني حيل..
نهاد : فدوة أروح للشاطرة أنا..
ولاية : خالو وين ؟
نهاد : هوينة بالمطبخ جاي يتريك تعاي اتريكي وياه
رحت بوست خالو وكعدت يمه أتريك شوي وكلها إجت فرحانة بي حسن جان طالع الفجر لدوام
هم يلا يلحك يوصل للجامعة ...
رجعت من المدرسة، جان يومي حلو، المدرسات سألن عليّ، صديقاتي حضنوني، حتى المديرة سألت عليّ لأن أنا من الطالبات المتفوقات ...
رجعت للبيت وأنا أحس روحي خفيفة بس سالفة البارحة بالبستان بعدها بگلبي.. كلام حسون..
"وإذا أنا خطبتج؟"
كل ما أتذكره وجهي يصير نار...
العصر صار، والدنيا حارة، ماما نهاد تسوي غده، فطيم تحل واجبها يمي، وحسين وعبدالله يتعاركون على الريموت..
عبدالله مخلي إيدينه على شاشة الستلايت وحسين يريد يغير القناة عبدالله مايقبل وكتعاركين ملخ بيناتهم فطيم كاعدة تحل واجبها ....
سمعنا صوت الباب..
نهاد: اجه حسون من الجامعة
فزيت لا إرادياً.. عدلت شعري..
دخل حسن تعبان لابس قميص أبيض وبنطرون أسود وجهه أسمر من الشمس، عركان..
باوعلي أنام نزلت راسي بسرعة صرت أباوع على الكتاب وراح غسل.. رجع كعد شوي وماما نهاد صبت الغده عفت كتبي وكمت
غسلت وجه خالو علي ومعدنا نتعده يأكل ويانه بس عينه عليه..بعد الغده ماما نهاد نامت،
فطيم راحت للغرفة تنام ...
أنا بقيت بالصالة أكتب وامسح ماعرف شجاني ارتبكت من نظرات حسون إلي حسن اجه
.. كعد كدامي على الكاع....
حسن : ولاية..
ما جاوبته..
حسن : ولاية باوعيلي مو أحجي وياج
ولاية : شتريد؟
حسن : سالفة البارحة.. مال البستان..
گلبي صار يدك الف..
حسن : أنا.. أنا جنت أشاقه وياج.. يعني.. شفتج ضايجة كلت أضحكج.. لا تاخذينها صدك..
سكتت.. باوعتله..
ولاية : تشاقه؟
حسن : إي.. أشاقه.. أنتِ أختي الصغيرة.. شلون أخطبج.. الناس شتكول.. أمي وابوي شيكولون..
حسن : أنتِ مثل فطيم..
ما أعرف ليش.. من كال مثل فطيم.. گلبي انقبض.. حسيت شي انكسر بداخلي بس بنفس الوقت ارتحيت يعني هو بعده أخوي ما راح يتغير
شي.. ما راح أخسره..
هزيت راسي بسرعة وابتسمت، ابتسامة جذب..
ولاية : إي أدري.. أدري جنت تشاقه.. حتى أنا ضحكت بداخلي.. معقولة أنت تخطبني؟
أنت حسون أبو الزوري..
ضحك.. بس ضحكته مو مثل كل مرة..
حسن : إي.. شفتي؟
ولاية : إي..
حسن : زين.. لعد ليش وجهج احمر؟
ولاية : من الحر.. حر..
كمت بسرعة رحت للمطبخ.. خليت إيدي على گلبي.. جان يوجعني هو صدك جنت أريده يشاقه.. مو؟ إي طبعاً.. هو أخوي..صدكت بي..
كلت لنفسي هو يشاقه.. وهو أخوي الجبير.. وبس..
بس ليش من كال أنتِ مثل فطيم انقهرت؟
ما أعرف..؟
بليل نمت نمت مرتاحة شوية لأن على الأقل رجع كلشي مثل قبل.. حسن أخوي.. وأنا أخته..فلفولة ضوجتني بس تصيح رحت شمرتها
فوك السطح بالقفص ونزلت نمت يم فطيم يم بيبي نام أنا وفطيم ثاني يوم الصبح كعدت من وكت.. الشمس بعدها ما طالعة زين.. رحت أسوي العادة مالتي كل يوم.. أروح يم قفص فلفولة..
فلفولة مو بس دجاجة.. فلفولة هي الوحيدة اللي بقت من ريحة ماما رشا.. هي جابتها إلي من جنت صغيرة.. كالتلي هاي بنتج.. ربيها..
كل يوم أنطيها أكل.. أحجي وياها..
اليوم فتحت القفص..
فلفولة: ...
ما تتحرك..
ولاية : فلفولة؟ كومي.. جبت لج ريوك
مديت إيدي جسمها بارد يابس عيونها مسدودة رجليها معوجة ماتت..
هزيتها..
ولاية : فلفولة؟ فلفولة كومي.. لا تموتين.. فلفولة!
صرخت..
البيت كله فز..
ماما نهاد اجت تركض ...
نهاد : شكو ولاية شكو؟
شافتني كاعدة بالكاع وحاضنة الدجاجة الميتة وأبجي بصوت عالي مو بجي عادي نواح عبالك أمي رشا ميته مو الدجاجة فلفولة
ولاية : ماتت.. ماما فلفولة ماتت..
عافتني.. حتى هي عافتني
حضنتها وصرت أشم بيها.. ريحتها بعدها..
ولاية : ليش كلكم تعوفوني؟ أمي عافتني.. وهسه أنتِ؟ أنا شسويت؟ ليش كلكم ترحون
وتعوفوني وحدي؟
حسن اجه ركض، حتى ما لابس تيشيرت، بس فانيلة والبنطرون جان خطية يجهز
نفسه لدوام
حسن : شصار؟
شافني.. وشاف فلفولة بحضني..
سكت..
نهاد : يمة فدوة لا تبجين.. هاي دجاجة..
نجيب لج غيرها.. نجيب لج عشرة..
ولاية : ما أريد غيرها! أريد فلفولة! هاي أمي جابتها إلي! هاي أخر شي بقى من أمي رشا
بهاللحظة حسين وعبدالله وفطيم اجو.. كلهم ..
حسن تقدم.. نزل يمي بالتراب..
حسن : ولاية.. انطينياها..
ولاية : لا.. لا تاخذها.. لا تدفنها..
حسن : ما أدفنها هسه.. بس انطينياها..
أخذها من إيدي شوية شوية أنا أبجي وأرجف..
حسن باوع لفلفولة وبعدين باوعلي حسن
بصوت ناصي كلش بس أنا سمعته..
حسن : إذا هي عافتج.. أنا ما أعوفج..
والله ما أعوفج
ما سمعه أحد غيري...
شال فلفولة ونزل بيها بسرعة وأنا وراه أركض راح للبستان.. وأنا لحكته.. لحكته حافية..
رجلي كلها تراب وشوك..
راح يم النخلة نفس النخلة مال المرجوحة هناك مخلين كرك جاب الكرك وحفر حفرة صغيرة
ونزل فلفولة بنص الحفرة ...
أنا واكفة فوك راسه أبجي..
ولاية : حسون لا تعوفها بالظلمة وحدها تخاف
حسن : ما أخليها وحدها.. راح أزرع يمها وردة.. حتى من تكبرين تجين تشوفيها..
دفنها.. وخله فوكها حجارة بيضة وأنا كعدت يم قبرهاحطيت راسي على رگبتي وأبجي حسن كعد يمي ما حجى شي.. بس خلى إيده على راسي.. يمسح على شعري.. مثل ما ماما نهاد
تمسح عليه من أبجي..
ولاية : حسون..
حسن : روح حسون أحجي ؟
ولاية : فلفولة ماتت.. منو يبقى يبيضلي كل يوم؟
حسن ضحك بصوت عالي ....
حسن : ههههههه
ولاية : ليش تضحك ؟
حسن : مقهورة على فلفولة لو على البيض
ولاية : الأثنين
حسن : عمي على البيض سهلة كل يوم أجيب الج طبقة بيض واشبعي
ولاية : مو فلفولة عزيزة وبيضها عزيز نفسها
حسن : والله أجيبلج دجاجة جديدة بس
أرجع من الدوم
ولاية : ماريد ماريد
خليت وكمت مقهورة أباوع على قبر فلفولة وأبجي
رجعت للبيت وحسن وراي يمشي عافني براحتي نفس ماما نهاد من تضوج خالو علي
يعوفها براحتها ...
بهاللحظة عرفت رشا عافتني فلفولة ماتت بس حسن وأهله مايعوفوني أبد ويحبوني هواي شافني خالو علي باسني وحضني وانطاني مصرف
وكالي من ترجعين من الدوام محظر الج هدية
ولاية : صدك خالو
علي : إي خالو روحي اسبحي وروحي لدوامج
ولاية : صار خالو صار
رجعت للبيت بوجهي للحمام سبحت وحسن سبح وراي وراح بدل وطلع لدوامه وأنا هم تريكت ورحت لدوام ويه فطيم فطيم بالصف
الرابع علمي وحسين بالخامس أدبي وعبدالله بالأول متوسط رجعت من الدوام والمفاجأة إلي خالو علي جايب إلي أرانب اثنين
من شفتهم طرت من الفرحة طرررت حاضنتهن وابوس بيهم فرحانة ،حسين وعبدالله سووا الهن مكان بالحديقة لأن مايعيشن بالسطح
يردن أكل عشب ...
ماما نهاد تباوعلي وتضحك بيبي تضحك عليّ لأن أحب الحيوانات وفجأة خالو علي أخذ حسين وعبدالله وصعدوا فوك السطح نزلوا
كل حمام حسن وخلوا بالكونية بقيت مصدومة
ولاية : ماما نهاد وين مودين حمامات حسن
نهاد : ههههه
ولاية : ماما أحجي وين مودينهن ؟
نهاد : خالج متخبل منهن من زمان بس مايكدر يحجي لأن عندج فلفولة هسة فلفولة ماتت إجت الفرصة الخالج وراح يبيع الحمام
ولاية : هسة حسن يتخبل
نهاد : خل يتخبل منو يتحمل الوصخ فوك
السطح لعبان نفس صاير
أخذهم وطلع ساعة زمان رجعوا واكفة بالحديقة حاضنة الارانب وفرحانة بيهم ما أدري
شكو صار فوك السطح ...
أسمع خالو علي يصيح..
علي : يلا حسين عبد الله صعدوا شيلوا
القفص هذا الجبير أول شي
حسين وعبد الله صاعدين فوك السطح ونازلين صوتهن عالي كل السطح تراب وريش ووصخ وينظفون ويشمرون من فوك السطح ..
ولاية : خالو شتسوي ؟
علي : خالو بعت الحمام وخلصت من هالبلوة.. حتى نرتاح وانتو ترتاحون.. السطح صار مزبلة
أنا سكتت.. گلبي وكع.. أعرف حسن حماماته روحه بيهن.. كل وحدة مسميها اسم صعدت
ركض فوك السطح...
ولاية : خالو ليش هيج خطية حسن
علي : هسه ينساهن.. هاي كلها مرض.. نهاد
صارلها سنة تكول شيلوهن
ماما نهاد من جوة تصيح ...
نهاد : اي شيلوهن علي فدوة خل نخلص
ظلوا يشيلون.. قفص ورة قفص.. البراج الخشب.. حتى طشت المي مال الحمام شالوه.. بقى السطح فارغ.. نظيف.. بس ريحته بعدها مال حمام..
جابوا مي وزاهي ومكناسة.. كاموا يغسلون السطح غسل.. المي ينزل من المزريب أسود
عبد الله : ولاية انزلي جوه وصخ لا تتوصخين
نزلت.. كعدت يم الارانب بس بعد ما فرحت بيهم.. أحس سويت ذنب جبير العصر حسن رجع من الدوام.. تعبان أول ما طب للبيت باوع
للحديقة شاف الأرانب
حسن : شنو هاي؟
ولاية : خالو علي جابلي أرانب
حسن : ديري بالج عليهن
أبتسمت راح طب للبيت شوي وكبت العيطة صعد ركض فوك السطح فتح باب السطح.. وبقى واكف..
السطح يلمع.. مي بعدة.. ماكو شي.. لا برج.. لا قفص.. لا حمام.. لا صوت ....
حسن : وين حماماتي ؟
حسن صرخ.. مو صياح عادي.. صرخة من كلبه..
حسن : وين حماماتي ولكم ؟؟؟ وين وديتوهن ؟؟؟
خالو علي طلع..
علي : بعتهن خلصت أمك من وصخهن
حسن : شنو بعتهن ؟؟ منو كلك تبيعهن ؟؟ ذني حلالي.. تعب سنين.. شلون تبيعهن
بدون ما تكلي ؟
حسن : يا مصلحة ؟؟ انتو ما تحبوني.. انتو تكرهوني.. تكرهون كلشي أحبه
حسن ما سمع أحد بعد.. طب للغرفة وضرب
الباب.. قفله.. قفل قوي حسين صار
يدكدك باباب ويصيح عليه ...
حسين : حسن افتح الباب
عبد الله : حسون افتح فدوة
ماكو جواب بيبي طلعت من غرفتها سمعت الصياح حسن وتعاركت ويه خالو علي
بيبي : علي شمسوي ؟؟ ليش هيج سويت بالولد ؟؟ مو كلتلك لا تمد ايدك على حلال الولد ؟
علي : يمة وصخ ومرض..
بيبي : وصخ ؟؟ هو أنتِ نظيف ؟؟ تعب الولد هذا.. هذا مثل جهاله.. شلون تبيعه ؟
وبلشت بيبي تتعارك ويا نهاد..
بيبي : وأنتِ نهاد.. أنتِ وياه.. مو كافي فلفولة ماتت وكسرتوا خاطر البنية.. هسه
كسرتوا خاطر حسن ؟؟
نهاد : يمه احنا ردنا نرتاح..
بيبي : ترتاحون على حساب حسن ..وخررر
حسن بيبي أفتح الباب
حسن : روحي يمة أريد أرتاح
بيبي : باجر من الصبح اجيبلك حمامات وأشوف يارجال ويامره يمدون ايدهم عليهن
حسن : العزاز راحن بعد ياهو ليجي ياخذ مكانهن
بيبي : علي أخذ ولدك ورجع الحمامات
علي : نباعن راحن ههههه
نهاد : كافي خالة مو لعبت نفسنه من الحمام وحسن مو جاهل يزعل على الحمامات هسة ولاية جاهل إي خوما حسن أطول من ابوه
ويزعل نفس النسوان
بيبي من سمعت ماما نهاد تحجي هيج .. اندارت عليها وعيونها تلمع نار ..
بيبي : نهاددد .. سدي حلةج .. هذا مو حجي .. حسن رجال .. وغالي .. حلاله غالي .. انتو لو عندكم ذرة احساس جان ما كسرتوا خاطره .. شلون تضحك علي ؟؟ أنتِ تضحك على ابنك ؟؟
علي : يمة لا تكبريها .. هو حمام ..
بيبي : حمام بعينك .. هذا تعب الولد .. من هو صغير وهو يربي بيهن .. يكعد بالحر حتى يزقهن .. يلم من مصرفه حتى يشتريلهن اكل .. وأنتِ
جي بيوم وليلة تبيعهن وتضحك ؟؟
ولاية : حسون .. حسون افتح ..
والله بيبي راح ترجعهم ..
حسن من جوه صوته تعبان حيل ..
حسن : ولاية روحي حتى الحمام ماريده بعد
حسين وعبدالله واكفين يم الباب خايفين .. اول مرة يشوفون حسن هيج .. حسن الي دايما يضحك وياهم .. يلعب وياهم طوبة .. هسه ساد الباب
على روحه وما يريد احد ..
عبدالله : يابة.. والله حسن راح ينهار ..
خل نروح نرجع الحمام ..
علي : شلون نرجعهن ولك .. الرجال اخذهن
وراح للسوك .. باعهن ..
حسين : انطي فلوس زيادة ونرجعهن ..
علي : ماكو مايرجعن محظر مفاجأة لحسن
ام علي : كافي علي مفاجأت كافي راح
تجلطون الولد أنتِ ومرتك
نهاد : ياا خالة شمسوين ونجلطه ههههه
ماما نهاد صارت تضحك وخالو يضحك وياها خلوا وراحوا للغرفة حسين وعبدالله مشوا هم وبيبي ضاجت وراحت للغرفة فطيم هم راحت
وأنا بقيت واكفة كدام غرفة حسن أعرف شنو شعوره هو رباهن وتعب عليهن وحقه يزعل لأن انباعن بدون علمه وانصدم من رجع
ومالكاهن ....
بالليل يلا طلع حسن ماما نهاد حضنته وتضحك هو زعلان خالو علي شافه كام يضحك عليه لأن زعلان وهاي أول مرة نشوف حسن يزعل
عبالي مايعرف يزعل عبالي بس أنا هواي أزعل ..
نهاد: هلا بابو الزعل..
حسن دفعها شوية بس هو بعده زعلان..
حسن : عوفيني يمة..
خالو علي جان كاعد بالصالة يشرب چاي.. من شاف حسن كام يضحك بصوت عالي..
علي: لك هلا هلا.. هلا بالزعلان.. شلونك
يا ابو الحمام؟
حسن ما جاوب.. باوع لأبوه بنظرة قهر..
علي : تعال كعد يمي.. تعال لا تصير مره..
حسن : أنا مو مره..
علي : لعد شبيك زعلان على طيور؟ أنتِ رجال طولك طول النخلة وتبجي على حمامة؟
بيبي من المطبخ صاحت ...
ام علي : عليييي اسكت ماعليك بالولد
خالو علي سحب حسن من ايده وكعده يمه ..
علي : اسمعني زين ولك.. أنا بعت الحمام
مو لأن أكرهك.. لا والله..
حسن باوعله..
علي : أنا بعت الحمام لأن أريد أسويلك شي أكبر من الحمام بهواي..
حسن : شنو؟
علي : تتذكر الكاع الوره البستان؟ الكاع
الجبيرة إللي بيها نگرة ماي؟
حسن : إي شبيها ؟
علي : راح أسويلك بيها حقل.. حقل مال سمچ.. حقل جبير إلك وحدك.. تربي بيه سمچ.. تبيعه.. تصير تاجر سمچ.. مو مال حمام.. تصير رجال صدك..
حسن فز من مكانه..
حسن : صدك يابه؟
علي : وحق هاي الشوارب.. بس كون
تبطل زعل النسوان هذا..
حسن وجهه انفتح.. عيونه لمعت.. لأول مرة من الظهر يضحك..
حسن : حقل إلي وحدي؟
علي : إلك وحدك.. أنتِ المدير عليه.. وحسين وعبدالله عمال عندك..
حسين من وره الباب صاح ...
حسين : لا يابه أنا ما اشتغل عامل يم حسن
علي : انجب تشتغل عامل جوه إيد اخوك
الكل ضحك.. حتى حسن ضحك.. وأنا واكفة يم الباب اباوع عليه وگلبي يدك.. لأن شفته رجع حسن مال البستان.. حسن مال المرجوحة..
حسن باوعلي وأنا باوعتله.. وابتسملي..
وراها بفترة..
خالو علي صدك سواها.. جاب حفارة.. حفر الكاع.. سواها حوضين كبار.. جاب ماي من النهر..
وجاب سمچ صغار.. .
حسن نسه شي أسمه حمام..
كل يوم الفجر يكعد.. يلبس دشداشته.. ياخذ
علف السمچ ويروح للحقل..
حسن : حسين.. عبدالله.. كوموا ولكم.. ورا الحقل
صار كل يوم ياخذ حسين وعبدالله وياه.. وأنا وفطيم نلحكهم الحقل صار جنة.. مي يلمع..
وسمچ يلعب.. ونخل داير ما دايره..
حسن كاعد على الحافةوشايل بإيده خبزة يذب للسمچ.. والسمچ كله يجي يمه..
فطيم : حسن هذا السمچ يعرفك
حسن : طبعاً يعرفني.. أنا ابوهن..
حسين : لعد احنا شنو؟
حسن : انتو عمامهم الفگر..
حسين : لا يافگر
حسن : انجب هههه
نضحك كلنا والعصر من يكمل شغل الحقل.. حسن يطلع سلاح خالي علي ويروح يصيد بالبستان
حسن : يلا.. وكت الصيد..
ياخذنا نمشي بالبستان.. يعلم حسين شلون يصيد.. يعلم عبدالله يوم من الايام باوع
عليه وعلى فطيم...
ولاية : أنا ما أخاف علمني
حسن : تعاي لعد يا ام القمل.. تعاي اعلمج..
أجه وكف وره ظهري.. لزمني ايدي.. خلاني ألزم الكسرية الصيد حسن بصوت ناصي يم اذني ..
حسن : عينج على الهدف.. لا ترجف
ايدج.. نفسي.. واثبتي..
ريحة عرگه.. وريحة المي مال الحقل..
وصوته يرجف....
ولاية : حسون إيدي ترجف
حسن : لا ترجف.. أنا لازمج.. أنا موجود
فطيم تباوع علينا وساكتة.. ضربت الطلقة.. اجت بالهوا وأنا رجعت ليورا همزين حسن وراي وحضني من ورا ظهري حيل وكعت الكسرية من إيدي
حسين وعبدالله : ولاية صادت! ولاية صادت
حسن : على كيفج
ولاية : جتفي راح
حسن : تتعلمين مو اليوم باجر
بعد عني جتفي كام يوجعني أذتني الكسرية حتى إيدي كامت توجعني هم يضحكون عليّ فطيم ماتقترب السلاح أبد تخاف وماتحب
هاي السوالف مو مثلي كلشي أحب اتعلمه من حسن ومن ذاك اليوم.. صار روتينا الصبح مدرسة.. العصر حقل السمچ.. والمغرب صيد..
دراج.. حمام بري....
حسن صار يصيد ويجيب للبيت.. وماما نهاد تسوي عشا وبيبي تدعيله حسن نسى الحمام مال السطح.. لأن هسه صار عنده حقل.. وسمچ.. واخوانه حواليه..وانا.. أنا نسيت فلفولة شوية..
ونسيت انو ماما رشا عافتني..
لأن من أصير يم الحقل يم حسن وهو يهزلي المرجوحة الجديدة الي سواها إلي هناك بين نخلتين الحقل أحس انو أنا ما انعافت أنا انولدت من جديد.. يم اهلي.. يم حسن ويم أخواني
جاب حسن شتلة ورة وزرعها فوك قبر فلفولة علمود كلما أباوع للورد اتذكرها والله مرت الأيام بسرعة ونجحت من الثالث وأريد أقدم
أدبي فطيم ماتقبل تكول روحي علمي وأنا معنده أريد أدبي أحب الحفظيات ' ماحب الفهميات
وأكره مادة الكيمياء والفيزياء...
يوم من الأيام كاعدة باوع للارانب مالاتي ماعرف شبيهن مريضات ماياكلن ولا يشربن وصاير بيهن اقشور بيضة بوجههن ورجلينهن
حسن شافهن وكال ...
حسن : ولاية هذني مجربات
ولاية : مجربات
حسن : إي مجربات لازم نذبهن
ولاية : ليش حسن نذبهن خطية
حسن : مالهن علاج ولاية جرب وأخاف يعديج
ولاية : اوووف
حسن : وخري من يمهن روحي اسبحي
ولاية : ماشي
خليت ومشيت وحسن خلاهن بالكونية وطلع يذبهن بره بالكاع وأنا مقهورة حتى الارانب عافني كلما أحب شي واتعلق بي يروح من إيدي
وأنا أخاف يجي يوم واخسر حسن وأهله نفس ماخسرت أمي وأبوي وعائلتي. ...
ثاني يوم گلبي وكع بين رجلية من سمعت صوت حسن متعارك ويه خالي علي وبطاري أبوي حمزة رافع قضية حضانة ويطالب بي ....
يتبع....قمراتي 🤍✨.
لقراءة جميع فصول الرواية من هنا