رواية احببت متلازمه داون الفصل السادس عشر 16 بقلم نوسه حمد
شكلو البلد ح تكتم والنت ح يقطعو الله يسترنا دنيا واخره وم تكتبو تم اكتبو ربنا يلطف بالسودان واهلو واسفه للتاخير
دخلت البيت لقيت ناس امي اتونسن معاها نسوان وخالتي وامي عشان خاته الموضوع داك في راسها لمن شافتني لمن انخلعت قالت لي اريج طلقوك قلت ليها طلاق شنو يمه قولي بسم الله وشكلو حسام سمع امي لمن انخلعت طوالي جا اصفق قالو لي دا منو قلت ليها حسام وقلت لي امي كدي صلحي توبك وبفهمك امي حسيتا بالها هدا واطمئنت شديد قامت تلبس في توبا وقالت ليهو اتفضل ولدي حسام جا داخل ودخلنا غرفتي الكنت اصلا بنوم فيها بس اليوم ح اكون احساسي غير ومعاي زوجي حلالي حسام دخل قال لي النقعد مع ابوك قلت ليهو يلا نسلم عليهو بس كمان شينه نحنا عرسان وانا في محل وانت ف محل وموضوع التمثيل دا ماف زول عارفو غيرنا انا وانت قال لي طيب
مشينا لابوي ف الديوان وكان نايم صحيتو قام مخلوع قال لي مالك قلت ليهو حسام بسلم عليك حسام دخل ابوي رحب بيهو وحسام قال ليهو اهلي موضوع زواجي التاني خلعهم عشان كده جينا نبيت هنا وبكره ح اشوف لي شقه انا واريج ابوي قال ليهو لا لا ماف عوجه ي ابوي
مشينا غرفتي وامي جابت لينا العشاء واتعشيت ومشيت عملت لي حسام عصير وكان مهموم اتمنيت اخفف عليهو بس انا كمان اتعاقبت لي عملتي الكان سبب هو فيها وجا دورو اتعاقب تاني مشيت استحميت وجيت صليت حسام بعاين بي عيونو بس م سالني ولا فكر اسالني وقبل ع الحيطه ونام وانا كمان نومتا
تاني يوم صحيت مخلوعه بصوت حسام وم قدرت اصدق انو انا م حلمانه وحسام راجلي بعد جمعت حتي قدرت اقتنع قلت ليهو صباح الخير قال لي صباح النور انا ماشي الشغل وبالمره اشوف لي محل نمشي عليها لغايه م الامور تظبط قلت ليهو ان شاء الله يومين بس م مشكله قال لي طيب مشيت جبتا ليهو الشاي وفطور خفيف قال لي م باكل الصباح قلت ليهو انت شغال ح تصل جيعان عاين لي بطرف عينو وحسيتو داير اقول كلام بس م اتكلم
حسام مشا وجا نهايه اليوم وانا عايشه دور العروس ونهاي م ختيت في بالي انو تمثيل قلت ليه احرم نفسي وكنت مبسوطه شديد رغم انو حسام م راغبني بس ع عين الناس قال لي اريج انا لقيت لي شقه تلاته يوم وجيت اسوقك قلت ليهو طيب اها مشيت اهلك ولا منهم خبر قال لي اي مشيت وامي زعلانه ومرتي مشت اهلا قلت ليهو اعفي لي انا خربت حياتك قال لي لا دا غلطي وانا لازم اتحمل نتايجو ومرتي ان شاء الله بصالحها بي قلبي قلت ليهو ان شاء الله م ترضا ليك عشان انا اكسبها فرصه واكون اسره واجدع الماضي وراي 😉
كلمت امي قلت ليها حسام لقا ليهو شقه وح نمش امي جهزت لينا اكل وشيلتنا ليهو وم خلت لينا حاجه خبايز وفطير واي شي وابوي اداني قروش قال لي راجلك محمول ديل اتصرفي منهن انتي قلت ليهو طيب
مشينا الشقه وحسام كان زهجان م داير يعاين ف عيوني وانا قلت لازم اشوف لي طريقه اجزبو بيها لانو خلاص البقا بقا وبقيت مهتمه بيهو بطريقه مبالغه بس نهاي م قربت منو بتعامل معاهو من بعيد وهو بمش الشغل وبجيني والقروش العندي كنت بتصرف منها وهو قال لي انا تعبان نفسيا نقعد اسبوع تاني قلت ليهو طوالي وفعلا قعدنا وكان بجي القاني مجهزه الاكل ومنظفه الشقه وكان بتونس معاي لكن م حصل لمسني قلت ليهو حسام قال لي اي ي اريج قلت ليهو حسام رايك شنو تكون اخوي وصديقي قال لي ليه قلت ليهو نفسي ف كده ممكن ولا م ممكن قال لي ممكن جدا قلت ليهو بما اننا بنمثل خليني اكون مصدر سعادتك وانت تكون كده قال لي تمام قلت ليهو لو رجعنا نقعد مع ناس امي لانهم براهم قال لي طيب انا بحنس المرأه دي وارجعها ويوم ليك ويوم عليها قلت ليهو كويس اها وبتنا قال لي اريج السيره دي تاني م تجيبيها في خشمك داريرانا نجيبا عشان بعد تكبر تغلط نفسي غلطتنا قلت ليهو لا ي حسام والله وعد انا ح اكون قريبه منها شديد وم ح تغلط زينا خليني ابل شوقي انا توبتا والله قال لي قفلي الموضوع كسر خاطري بس قلت مع الايام بحنسو ان شاء الله
مرت الايام وحسام رجع لي مرتو وجابا وحنسا بس كان بشكي منها
انا عملت لي صفحه جديده ف النت وصادقت كم ناس لغايه م لقيت لي ولد اسمو احمد ولد من الجزيرة تمبول زول محترم شديد كنت بتونس معاهو واخفف على نفسي وقلت ليهو زوجي ميت واتعرفت عليهو واتعلقت بيهو شديد وسالني اذا كنت عندي اطفال قلت ليهو عندي بت
يوم حسام قعد احكي لي بي حياتو ومرتو وبيتو قلت ليهو حسام م تستلم للدنيا دي وانا كان. نفسي تكون زوج لي بس فشلت في كده وم زعلانه لانو حاجه م راغبها انا م عاوزاها كفايه اني في عصمتك عشان اهلي ونفسياتهم والمجتمع وكلامو وقلت ليهو انا مرتاحه كده اني اختك وصديقتك قال لي كده حرام لكن قلت ليهو ربنا كريم احسن من الطريق الوقعتني فيهو انت
وفي أثناء كلامنا حكيت لحسام بي انو اتعرفت ع واحد اسمو احمد عشان نحنا اتوعدنا نكون اصحاب لكن رده فعل حسام كانت كلها غيره قال لي جنيتي صح كيف تتعرفي ع راجل وانا ف عصمتك ما مالي عينك قلت ليهو حسام انت نسيت التمثيل قال لي موش انتي ف القسيمه مرتي ابقا انتي مرتي وقسما بالله تاني القاك تتكلمي مع ولد اكتلك قعدت اضحك قلت ليهو بتغير صاح قال لي لا م بغير قلت ليهو لا بتغير وكلامك كلام غيره قال لي عارفه ي اريج رغم الحصل والتمثيل بس انتي ست بيت ناجحه وعشان اكون صريح معاك انا نفسيا برتاح في يومك لانك بتحترميني وانا م بستاهل منك الاحترام لاني ظلمتك شديد وبس كمان م داير اظلم مرتي واقع بين امرين م ح اقدر اكون ليك زوج للنهايه قلت ليهو شكرا م قصرت ع انك وافقت تعقد علي عشان نلم بتنا قال لي الموضوع دا تاني م تفتحي قلت ليهو سمح
مرت الايام واتصلت علي ثويبه وسمعتني كلام فارغ قالت لي اخوي من اتزوجتي بقا م بجي لي امو كتير قلت ليها اسالي من السبب م تتصلي تشاكليني وطبعا هي م جايبه خبر زواجنا تمثيل قلت ليها افتكرتك عقلتي ومتصله تباركي لي قالت لي ابارك ليك شنو انا نفسي اعرف حسام وافق اتزوجك كيف بعد فضيحتك العملها وهو كان بحزرني منك اجي يوم واتزوجك قلت ليها قسمه ح تعترضي عليها فجاه سمعت صوت علي وقفلت الخط ف وشي
مرت الايام وبقيت م بفتح النت كتير عشان م احتك بي احمد رغم رسايلو لي بس بطنشو بقيت لانو هو زاتو ولد شاب لو اتعلق بي مشكله
حسام قال لي مرتي حامل قلت ليهو م قالت زعلاانه قال لي اي زعلانه وم متقبله زواجنا بس انا قدرت احنكها وقال لي امي وافقت انو تجي تسكني معاهم لانو الصرف كتير على قلت ليهو تمام واشترينا العفش مع بعض واهلي رحلوني ومشيت حياه جديده ح تكون كلها مشاكل بس لازم انا اتحمل وفعلا زي م اتوقعت من رحلتا مشاكل مره مع مرتو مره مع امو مره مع ثويبه بس حسام كنت ليهو ملجأ لمن اكون زهجان بخفف عليهو لغايه م حسام بقا احبني واتعلق بي وكده كسبتو كزوج واخدت عهد مع نفسي اني م اعاين لي غيرو وربنا قسم لي وحملتا ومرتو وامو دايرات اموتو كيف انا احمل والمسؤوليه ح تكتر بس م ركزت معاهم وحسام عمل لي مطبخ وابوي م مقصر مني كل يوم بجيب لي خداري ولحمتي وقال لي راجلك الحمل كتير عليهو وانتي حامل ابوي حسيتو اتغير شديد ومبسوط لي زواجي وحملي
مرت الايام وانا ماشه في شهور الحمل وكنت تعبانه منو شديد ومرت حسام ولدت ولد بس شكلو منقولي وجاتا نفسيات عديل من الحاجه دي وتعاليق الناس كانت بتضايقها والولد حلاتو قدر م قلت ليها م تشتغلي بالناس ومالو المنقولي زول زيو وزي اي زول بس دي خلقه ربنا م فيها اعتراض.......
يتبع.
لقراءة جميع فصول الرواية من هنا