رواية بلسم الفصل العاشر 10 بقلم هند الهيباني


رواية بلسم الفصل العاشر 10 بقلم هند الهيباني


فتحت الباب وانا حاسه بي ضربات قلبي بتعلى...


المكان حسيتو بقى غريب...


اتذكرت اول مرة شفتو فيها في الحافله نفس النظرات


نفس احساس البروده السرت فيني والنظرات الاغرب


الحسيتا ملاحقاني حتى بعد مشيت من جنبو...


قال لي وهو بتفحص ملامحي كلها وبعاين لي من فوق لي تحت.....وقال لي


بصوت واطي و بحه غريبه


اسماعيل موجود...... 


جى الصوت من وراي... 


وهو بقول لي منو في الباب. 


زحيت من اتجاه الباب وبقو مقابلين بعض 


بقى يتلعثم ويتعثر في خطواتو...


وواقف بسأل وبسلم في آن واحد 


والواقف هناك كان ساكن سكون الجبال 


بثبات كأنو جندي في معر*كة


بقو واقفين سوا وانا اتحركت عاوزة ارجع مكان كنت قاعده 


سمعت اسمو.... 


مازن... 


الااااف الأسئلة اتفتحت وانا بسمع في الاسم دا... 


ورجعت لي تفاصيل المحادثه ديك كأنها الان.. 


هل مازن دا هو المقصود كان اليوم داك.. 


ولا دا تشابه أسماء... 


طردت الفكرة من راسي وقلت وانا مالي.  


رجعت وبقيت اراقب في سمر 


لحد ماتخلص التيست الأديتو ليها.. 


#خالد 


قررت من اليوم اغيير الوضع الأنا فيه دا.. 


واغير الشغل الأنا فيه عسى ولعل... 


القى لي مصدر قروش ثابت ولو ١٠ في اليوم بس تكون مضمونه حا القاها يوميا 


بدل ما كل يوم اجي السوق وانا ماعارف حا احصد شنو نهاية اليوم.. 


قدر شنو لقمة العيش صعبه... 


بس بين دا ودا انا راضي بالوضع الأنا فيه.. 


لأني عارف ربنا ماببتليك الا عشان يطهرك من ذنوبك أو يقربك ليه... 


وفي الحالتين انا عشمان لرحمة ربنا.. 


ولولا العيله الأنا بعيل فيها و منتظرني في البيت لأكل وشراب 


عمري ماكان اشيل هم واخليها كده زي ما تجي تجي... 


قررت اعمل اليوم دا بجد أكبر ألملم حق الهدف الجاني في راسي ولابد وبإذن الله حا أنجح فيه خصوصا مع السخانه دي.. 


لفيت ودعيت ربنا كتير ووفقني لأول ٣ الااااف 


حسيتا بادرة خير حا تتفتح في الأيام الجاية بإذن الله.  


الكنت خاتي في راسي  عندي احساس انو ربنا خاتي لي فيه خير الطريق الحا اسلكه دا... يارب... 




#فاطمة... 


وانت الجابك شنو من الأساس وقت اصلا البيت دا بجيب ليك الفقر.. 


صلاح :يا مرة هييي احترمي نفسك.. 


بيتي واجي وقت داير.. 


طيري من وشي.. 


فاطمه :دخلت جوه وانا حاسه بالاستياء وبفكر 


هل انا في الحياة دي لمن اموت حا اكون عايشه كده.. 


هل عذابو هدف يستحق اعيش عشانو الوضع دا لسه أيام اكتر 


ماكنت لاقيه إجابة للسؤال دا طوال الفترة السابقه.. 


بس نهاية كل سؤال زي دا في كل مرة كنت بقول ايوه يستحق 


ماعارفه طالع من جواي وحقيقي ولا بطمن بيه في نفسي ساي.. 


#جلال


قلت ليك اصبري ربنا كريم يازوله هو شافع صغير قايلاه؟! 


زول  واعي مصيرو يرجع البيت مهما كان


مهيلم :بس يا ابوي يكون مشى وين لاعندو تلفون لا قروش لا حتى ناس يمشي ليهم متأكد.. 


جلال :يا الله ياخ انا خليني في هم امك.. اسكتا هي تنط لي انت.. 


ياخ اعمل شنو يعني فتشت وانت زاتك فتشت معاي 


ماف اي جديد من خمسه ايام.... 


ربنا يصبرني بس ما تبقو عليي انتو وهو... 


مهيلم:خير يا ابوي.. 


احييي ياولدي وينو ولدي ياربي ترجعو ياربي تلمنا بيه 


السلام عليكم.. 


وعليكم السلام... حامد كيف حالك.. 


بخير والله خالتي كيفك.. 


الحمدلله ياولدي الحمدلله شايله هم مازن طلع ولي يوم الليله ما ظهر في البيت.. 


التفت ناحيه مهيلم.. 


وهو بردد مازن طلع؟؟؟ 


مهيلم :ايوه ليه زي خمسة يوم كده.. 


بالله؟! كيف وليه.. 


انت جنيت يا حامد


بتقصد شنو بي سؤالك دا؟! 


يعني عاوزو يقعد طول عمرو هناك 


بدل ما تبارك لينا تقول ليه.. 


اعفي لي يا خالتي بس اتوترت شويه.. 


اتوترت من شنو يا حامد؟! 


اسمعني هنا كفاي العشتو طوال السنين دي 


والله وتالله واحد بس يغلط بي كلمة واحده معاه انا اخلي البيت واسوقو وامشي وانسو عندكم ام ولا خاله. 


رن صوت التلفون قطع الحوار الحاد الكان بدور بينهم.. 


رد على الاتصال مهيلم وبعد دقيقه فصل الخط وهو بقول 


لقينا مازن 


الحمدلله الحمدلله ودوني لي ولدي ودوني ليه


جلال :يامرة مالك اصبري ياخ ما تدوشينا معاك. 


لقيتو وين.. 


بلع ريقو وقال في بيت الضابط اسماعيل... 


استياء قلق على وجوه الكانو واقفين في المكان دا.. 


بعدا صبرو امو واتحركو التلاته على العربيه متجهين لهناك... 




#بلسم... 


وقفو مسافه من الزمن كنت بين كل ثانيه والتانيه بعاين باتجاه الكان واقف هناك بنفس الوضعيه ليه نص ساعه بكل ثقه 


وتوتر وحركة كتيرة من ابو اسماعيل ماحصل شفتو في حاله زي دي طوال فترة قعادي هتا  وجيتي للبيت دا كنت بشوفو زول مسيطر مابخاف من زول. 


انسان مثير للاهتمام اول مرة احس نفسي عاوزة اعرف عن انسان حاجه... لانو كل ملامحو ما بتتقري.. لا بتعرف مبسوط لا حزين ولا غضبان ولا ناوي شنو ملامح جامده.  


بعد دقايق سمعت صوت قفل الباب.. قعدت زي ١٠ دقايق وكان وقتي خلص.. 


لميت حاجاتي وشلت شنطتي وطلعت على باب الشارع سمعت صوت سعد وهو يناديني حسيت بالضيق.. 


وقفت مجبورة وقلت نعم قال لي جيت أحول ليك المرتب حقك اكيد محتاجه ليه.. حسيت بالسعاده لمجرد سماعي الكلمة دي وقلت ليهو طيب دقايق اديك رقم ابوي.. 


وقفت معاه دقايق معدوده بعدا حولا لي وقال لي محتاجه اوصلك ولا حاجه ابتسمت بتمشيه وقلت ليه مشكور بيتنا قريب 


اتحركت من جنبو قاصده البيت وبقيت مبتسمه طول الطريق وانا بفكر حا اسعد ابوي قدر شنو 


وما ان خطت رجلي نص الشارع  


 لقيتو ساند على الحيطة ومربع ايدينو نفس الشاب نفس الوقفه والملامح الجامده ماكنت عارفه اقيف ولا اواصل اعاين ولا اغض النظر.. 


حسيت بالخوف والقلق دفعه واحده جمعت شجاعتي وقررت امش بسرعه وما التفت وراي.  


وعند اول خطوتين سمعتو بردد اسمي بلسم.... 


هنا وعند دي النقطة بقيت ما حاسه بي اطرافي. .. 


وقفت لثواني وفجأة سمعت صوت أقدامو بتمشي باتجاهي.. 

#يتبع.


                  الفصل الثاني من هنا 

         لقراءة جميع فصول الرواية من هنا 


تعليقات
×

للمزيد من الروايات زوروا قناتنا على تليجرام من هنا

زيارة القناة