رواية علاقة سامة الفصل الثالث 3 بقلم ورود الخالدي
دعاء:::
شويه ورجع شايل بيده اكياس ورقيه مال اكل سفري
وهذا غداجن
هاي شنو محاق ليش جبت النا غده تره اني ارجع اطبخ
يمعوده هسه شجايب اني هنه لفات كص بعدين وينج ووين الطبخ الساعة قربت ع2 الظهر
اشكرك والله اليوم حيل تعبتك وزحمتك
اخذت الاكل منه يربي شلون خجلني بتصرفاته وكرم أخلاقه وتذكرت من صعدني للكيه هيج شالني من خصري يبووو شلون موقف وشكد فشله
منه حسيته حباب ومؤدب وكريم بس بالمقابل مبين حيل عصبي ومعنده خلك يسايس أحد يتصرف بسرعة
وصلنا للبيت وهو فات لبيتهم اول مدخلنا فتحنا اللفات اويلي حارات والطعم فد شي قريت اسم المطعم وعرفت عدهم توصيل حفظت رقم المطعم بجهازي وكلت هاي هيه كلما اريد اوصي ع لفات ادز من عنده..طبعا وره الغده رزلت فرح رزاله غسل ولبس
العصر جني ماما وملك وسولفت الهن السالفه بعدني دا احجي وملك من يمها طفرت
اي ع أساس ميصير نصعد بسيارة جيرانه اشو انتي صاعدة وياه وتفترين بالسوك؟!!
تره اني مصاعده وياه هو الولد شافني محتارة ووجهي مخطوف وادور بالشوارع وصعدني مو مثلج يومية طاكة المكياج ها ويوم بعد يوم اطوخين مكياجج شنو عبالج اني ممنتبهة عليج..لا تره منتبهه كولش زين وهالكد ما عينج وكحة متكعدين بالكشن الورة..لا عيني اله بصفه لان الميانه فول والمستحه صفر عندج
شنو شنو هاي شوكت اني مطوخة مكياجي تره هو مكياجي نفسه الي اروح بيه من دوامت لحد الان
لا مو نفسه وانتي تعرفين قصدي كولش زين
ماما ضاجت من صوتنا لان عالي
هاي الطلايب كولها من جوه راس فرح ولج مو كتلج ممنوع ترحين اليوم لخالتج..
فرح عاد كامت تتبجبج
والله ماما مو قصدي اعاند بس اليوم غزل ممداومة كلت اروح بس اطمن عليها دقيقة وارجع بس اني منايمه جنت حيل نعسانه محسيت ع نفسي ونمت
اي مو ماخذه منوم ومحسيتي
والله يوم ممتقصده
هاي اخر مرة تسويها وانتن كافي تتناكرن اصلا اليوم عندي نغزة بكلبي كوه صعدت للدرج لشقه عمتج حسيت نفسي انكطع
اسم الله عليج ماما
خصم الكلام فرح بعد مترحين لبيت خالتج حتى عيب من رجلها ساكنه عدهم يوميه
يوم هو وين رجل خالتي اصلا ما اشوفه هواي من اروحلهم يطلع بالسته العصر ويجي ثاني يوم بالسته الصبح من دوامة ويخلصها النهار كوله نايم
اي الله يساعده الليل كوله كاعد عبالج شغله الحارس سهله هو من ضيمه اشتغل حارس
عاد اني رديت ع ماما
ليش هو شعنده خو يعيش ع راتب العاطلين العنده شوبناته وولده كلهم متزوجين وطالعين باقيه بس غزوله وخاله عنده
عشتو هو راتب العاطلين ويه الخمسين مال بته٢٢٥ المن ينطي نت لو مولد لومسواك لو يوميات لبته لوجكايره..اسكتي اذا متعرفين بيت ومسؤولية ومصرف
وره اسبوعين
صادف يوم اثنين الصبح الساعة بالتسعه وشويه ماما دتلكط بالتمن اشواختنكت وتخربطت
اني ارتبكت معرفت شسوي طلعت بره ردت اجيب تكسي اخذها باوعت ماكو اي سياره حتى سيارات بيت ام محاق جيرانه ماكو بالباب فكرت ادوك عليهم الباب وتراجعت لان اكيد هسه محاق بالشغل ومجد ماخذ سياره ابو وبالجامعه..والحجي زحمه أطلعه ياخذ ماما..والله مشيت التقاطع ع السريع وجبت تكسي اخذت ماما للمستشفى الطواريء فحصوها وسوولها تخطيط قلب وانطوها علاج مؤقت والدكتور كلي لازم تراجع طبيب اخصائي قلب واوعيه دمويه تحتاج تحاليل وفحوصات أدق واحتمال ايكو للقلب..طبعا ما احجيلكم حالتي..ماما عندي كل الدنيا من توفه بابا لحد الان صارت كولشي بالنسبه الى وإذا يصير بيها شي اموت وراها..المهم بعد العلاج الي أخذته من المستشفى تحسنت شويه رجعنا البيت واكيد لازم نحجز يم دكتور اخصائي
يوم لازم احجزلج يم دكتور اخصائي
اي نحجز اليوم وباجر نروح
لعد اروح لخالتي اداين منها فلوس إلى أن يجي الراتب
ياااا ليش نداين اسم الله تره عندي خير من الله
صدوك يوم عندج فلوس،؟
اي عندي تدرين بامج مو من ذني المخربطات..الم الفلس ع الفلس واضم الطواريء
عفيه عليج ماما وين اكو منج انتي؟!!
ورحنا ثاني يوم للدكتور طبعا فحوصات وتحاليل واشكال بس الحمد لله الطبيب بالاخير طمنا وكال شغلتها تحتاج بس جهاز لاصق ع الصدر ينظم ضربات القلب وادويه منشطة لعضله القلب واكيد اكلها..مشويات..وملح قليل
من رجعنا من الدكتور حسيت شويه ارتاحيت لان الدكتور سألته أكثر من مرة عن مرض ماما وطمني كلي لتخافين بس اريد التزام بالعلاج وبنوعيه الاكل وطبعا الجهاز الي راح يخليه يحتاج مراجعة بين فتره وفتره
حتى الطبيب يتأكد منه
وطبعا أكدت على اخواتي أنه نكون هادئات ومطيعات وماكوعناد بعد ومشاكل صوتنا يعلى لان صحة ماما اهم من كولشي..وبهالفتره ماما التزمت بالعلاج وبالاكل بس مصاريفنا تضاعفت ماما تجمع لمصاريف جامعة ملك لان اهليه ومصاريف فروحة لان هم تريد يوميتها من ماما غير مصاريف البيت نت ومولد ومسواكنا صح ماما شاطرة وتجمع بس حسيت ويه العلاج الحمل زاد عليها لأن علاج ماما كل اسبوع وغالي شويه فقررت ادور شغل واشتغل وطبعا لعنت الفرع الادبي الي اختارته وكليه الاداب التافهة الي تخرجت منها والي مابيها اي امل اتعين لا بحكومي ولا بأهلي..
وبما أنه مراجعات ماما الطبيب جانت بين فترة وفتره فتعرفت. ع بنيه تشتغل بعيادة الدكتور مسؤوله عن الباصات وباثناءكلامنه عرفت أنه اني محتاجة اي شغل فكالت اكو دكتور اسنان يريد عاملة باصات شفت مسائي لان اختها تشتغل يمه بالشفت الصباحي وعرفت انها ينطي يوميه١٥ الف فكرت شبيها ال١٥الف نعمه من الله هم أشيل المسواك عن ماما وهم أساهم باحتياجات البيت عرضت الموضوع ع ماما بالبداية رفضت وصارت عصبيه بس اني لحيت عليها وقنعتها وخليتها توافق
ونطتني البنيه العنوان ورحت بس مجان كولشي مثل متوقعت توقعت راح اشتغل بعيادة بسيطة بيها دكتور اسنان امشي باصات المراجعين بس من وصلت جانت العياده عباره عن طابق كامل ضخم وواسع من بناية جبيره واصلا مكتوب عليها مركز لتجميل وزراعة وعلاج الاسنان وجان يشتغل بيها دكتور واحد ووياه اربع دكتورات كل دكتوره الها كرسي يصعدون عليه المرضى وكل وحده اختصاصها شكل وحدة قلع وحده حشوه وحده زرع وحده تبردوتحفر بالاضافه الى مجموعة متدربات جايات من كليه طب الاسنان يتدربن بالمركز لحد لهنا كولشي طبيعي بس ألمو طبيعي لبسهن كوله بنطرونات ضيگة لو مشككه وبديات تفشل ومكياجهن طوخ لدرجة الأوفر والطامة الكبرى من طلع الدكتور.. جسم وجمال وعيونه ملونه عبالك لاعب كمال اجسام من شفت الدكتور فهمت ليش الكادر وياه النسوي هيج يلبسن لو يلعبن بخلقهن بالمكياج وطبعا معظمهن مسويات بوتوكس وفلر وتجميل لخشومهم كومه كومه عمليات مسويات..طبعا مرتاحيت للكل بس بعدين فكرت اني شعليه قابل اشتغل وياهم بالغرف كلي عامله كاعده بره استقبل الناس وانطيهم ارقام باصاتهم..لو كارتات المركز..
ومر شهر و٧ ايام واني اشتغل هناك بالاضافه الى الباصات والكارتات اراقب الكاميرات خاف اي طاريء يصير المهم..جنت فرحانه باليومية الي اخذها واول ما اوصل للبيت انطيهن لماما واحس نفسي مسويه إنجاز عظيم وبيوم من الايام جنت الصبح بالبيت انظف عادي دك تليفوني ..برقم ماما ع الواتس لان ماما جانت طالعة أبيت جيرانه ام محاق..شلته سمعت ماما تکول
ماما دعاء دزيلي كارت العيادةالدوامين بيها
ها شعجبب
وج يوم خطية هذا ابن ام محاق صار يومين منايم من رحاته وميقبل يروح للطبيب يكول مابيه انتظر وألزم سره كتله لاتلزم سره بتي تشتغل بعيادة طبيب اسنان اول ماتروح ادخلك كبل
هااا اي هسه ادزه
هو بيه العنوان مو؟؟
اكيد بيه العنوان ورقم التليفون هم
يله دزيه لعد..
اخذت صوره الكارت ودزيته لماما
المهم العصر رحت داومت عادي بس وره الدوام بربع ساعة..تفاجئت مرة دخلت للعيادة تركض وياها ولد شاب وجههم مليان شر رادت تفوت للدكتور بسرعة ركضت كتلها
هاي شنو خاله ميصير هيج تفوتين اكو نظام وسره
جان تدفعني وتفوت اول مفاتت صوتها يلعلع:
انت طبيب لو كصاب من الاول كتلك ابني عنده مرض نزف بالدم كتلي عادي يشلع سنه كتلك طفل وخاف ينزف كلت معليج يمي ..تدري ابني وين هسه ابني بالانتعاش من البارحة لليوم يديروله دم وينزفه شوف كدام هاي الناس كلها اذا ابني صارله شي ..احسب الله ماخالقك اموتك بيدي...
طبعا صوتها يلعلع وتهدد وتتوعد والشاب الوياها استلم الدكتور غلط وفشار عليه وع الكادر الوياه وشفت وحده من الدكتورات تتصل بالأمن..طبعا الدكتور هم مسكت يصيح ويدفع بيهم وكلهم طلعو بره وواذا تبقون دقيقة بعد ملتومون اله نفسكم..المهم ..وره العركة والصباح طلعت المره والشاب لان عرفت اتصلوا بالشرطة..وبس طلعو من العيادة الدكتور عاف الناس كولها واجه عليه عيونه بكصته
انتي شنو شغلج هنا وشلون سمحتيلهم يفوتون
دكتور والله حاجيتهم همه دفعوني وفاتو
ماكو هيج عذر وضل يصيح عليه بعلو صوته اصلا طلع حركته كولها بيه وبعده يصيح رأسا بجيت وسمعت ورايه صوت اعرفه
هوب..هوب هاي انت شدتخرط وليش تصيح عليها..شنو عبده عندك لو موظفه
التفت عليه الدكتور
رجاءا ارجع بمكانك موظفه عندي ودا احاسبها على تقصيرها لاتتدخل و انتظر سراك
تحاسبها شنو بهالطريقة..منو سمحلك تنتقص منها
متشوفها طكت من البجي
يا اخي انت شدخلك شعليك بيها
شدخلني شنو هذه البنيه اختي وما اسمحلك تصيح عليها
اذا خايف عليها كعدها بالبيت ليش مطلعها تشتغل واكيد تكد عليك
شفت الدكتور عصبي وطبعا الي جان يحجي ورايه محاق يربي راح يتعاركون شجابه لهنا
شفته بسرعة لزم الدكتور من ياخنه
ولك منو تكدعليه؟!!
الدكتور راد يضربه بس محاق اسرع منه رأسا ضربه كله بوجهه ولأن الدكتور قوي رجع الكله وبقو يتضاربون والناس التمت عليهم ..وبينما يتضاربون شفت الشرطه جوي واخذوهم وقبل ينزلون الدرج محاق كل الشرطي
دقيقة بس أحاجي اختي رحت ركض..كتله
محاق شسويت
سكتي لج..ابد لتحجين شي لا لاهلي ولا لاهلج وحتى إذا عرفو كولي مجنت موجوده تمام
قبل ما اجاوب أخذوه الشرطة
العيادة جانت مخبوصة خلص حسيت الناس كلها تباوع عليه وتلوم بيه والدكتورات والمتدربات كولهن ملتمات
ويحجن اشكال
اخذت جنطتي ورحت للبيت اول مفتت حجيت كولشي لماما
ماما كالت وج خلي اروح اكول لأهله أهله ابنكم أخذته الشرطة
لا يوم لترحين ميقبل كلي ما اريد احد يعرف
يااا وج غير يرحون وراه
يوم فدوة لترحين
زين خلي نروح اني وانتي ع أساس مسيرين ونفهم شصار
اي..اي
رحنا اني وماما بسرعة اول مفاتت شفنا ام محاق وجنتها وبنتها مخبوصات وعرفته من خلال حجيهن أنه أحد مخابرهم وكايللهم ابنكم متعارك وبالمركز والولد والحجي كولهم رايحين عليه
بكلبي اكول عزة العزاني هسه يعرفون كولشي شلون بيه ماما تريد تحجي شاورتها:
يوم كولشي لتحجين
شويه ودك تليفون ام محاق وسمعتها تحجي وكالت..
وهسه شلون
هاا.اي خلي احد يكفله
اي اي زين تسوي وسدته
خير خيتي شصار
راح يطلع..ابو يكول اذا مطلعه الضابط لازم ندور كفيل بس كال متعارك ويه الطبيب بعيادة الاسنان..
سكتت شويه وكالت
اكولج خاله مو انتي انطيتي العنوان اله
اي خاله بس اني اليوم مرحت الشغل
ماما كالت
اي اليوم مراحت دعاء
يربي اكو واحد يتعارك ويه الدكتور خلص عمره بهالعصبيه
بلكي عدكم ضابط عرف بالمركز
شلون ماعدنا اكيد عدنا
ماما كالت
داده جيناكم بوقت مو مناسب نروح احنا عود خابريني وطمنيني من يطلع
يااا هاي وين رايحة
اشوفج مخبوصه الله يطمن كلبج خلي اروح غير وكت اجي
يمعوده تحجين صدوك
اي والله اروح باجر امرلج
ورجعنا البيت..بقيت بره اباوع من وره الباب منتظره أحد يرجع منهم والف حسبه براسي..بقيت ساعتين ونص تقريبا افتر بالحديقة كل دقيقتين اروح للباب وفجأة ارتاح كلبي من شفتهم نازلين وكلهم من سيارة محاق ومحاق وياهم
الف الحمد لله
فتت جوه وكلت لماما شفت محاق رجع هي هم ارتاحت ثاني يوم الصبح ماما سمعتها تتصل
ها خاله شصار مصار وياك
هاا اي دعاء حجتلي..ياخاله.. والله ما اعرف شكولك
وبقت تسمعه ونسولف وياه استغربت ماما منين جابت رقمه بس متحملت :
من رخصتج يوم اريد احجي وياه
الوو
الوو
محاق ليش..ليش هيج سويت..مجان اكو داعي المشكله الجبيرة اكيد اهلك عرفو اني السبب
لا محد عرف انتي بس سدي حلكج ومحد يعرف
شنو اسد حلكي تره اني خسرت شغلي
شو هذا سده بوجهي.. كلت لماما
منيلج رقمه يوم
يااا غير من دزيتي الكارت مال العيادة اناني رقمه و
حولتله الصوره ع الواتساب..شكلج؟
شكلي اصلا سده بوجهي
وره ربع ساعة اندكت بابنا رحت فتحته وقبل ما احجي كلي
صحيلي امج
فتت صحتها شافته كالت
هله خاله محاق تفضل
مو مال تفضل
خاله فوت قابل اسولف بالباب
دخل لبيتنا بس وكف اباب الاستقبال الخارجي
خاله تفضل
لا هنه حجايتين واروح..خاله شلون قابله بنتج تشتغل بهيج مكان
يااا شبيه المكان خاله
قبل ميحجي كتله بصوت عالي
شبيه المكان يعني تره مركز تجميل اسنان شكده شكبره
باوعلي بنظره كولها استهزاء
مركز تجميل اسنان لو مركز تجميل گ....ب..هنه والگ....د مالهن
فور دمي لعبت نفسي من ألفاظه
ما اسمحلك هيج تحجي وتتلفظ هالعبارات ابيتنا
لعد شلون سامحة لنفسج تشتغلين هناك
محاق شهالحجي..تره دكتور اسنان محترم وذني الوياه كولهن دكتورات وقسم متدربات..ليش هالتهجم ع الناس
دعاء تحجين صدك انتي شجابرج تشتغلين بهيج مكان وتخلين هيج واحد لامله كومه ساقطات يصيح عليج ويذلج
شعليه بيهم ساقطات لولا..تره دا اشتغل شغله شريفه اني مجرد عامله باصات بره
شغلتج شريفه ..بس المكان ممبين عليه الشرف ابدا
شعليه بيهم محاق شعليه بالناس..اني اريد اساعد ماما لان مريضة وعدها كومة مصاريف
ماما حجت
ع كيفك وياها خاله تره ممشتغله قبل ومتعرف الناس!
ووليش تشتغل اساسا هيج شغله هي خريجة وتشتغل باختصاصه
يا اختصاص محاق اني كليه اداب والخريجين الوياي يبيعون مخضر لو يشتغلون عماله لوواحدهم لازم ترمز جاي ويفتر بالسوك..انت شايف الخريجين ديتعينون يعني! اصلا من حظي لكيت هيج شغل..انت ايدك بالمي متعرف الايده بالنار
لو جايتني جان
ها..تريدني اجيك باعتبارك جارنا الزنكيل شنو اكولك دايني..لو انطيني صدقه من خيركم..لو هااااا...شغلني عندك بمعمل النجارة!!!!!!
طبعا احجي واحس عيوني تحركني وحسين نظراته تراقب كل تعابير وجهي رغم ماما واكفه وسمعته كال:.