رواية عذبتني الحياة الفصل الثالث 3 بقلم عائشة البشير

رواية عذبتني الحياة الفصل الثالث 3 بقلم عائشة البشير


السلام عليكم ورحمة الله وبركاته 


في الفصل ملك ونور ونورا وندي يحكو معا بعض قبل ماتبدأ الحصه


نور: خيرها فرح ماجتش لتوا؟


ملك: أي صح غريبه!!


ندي: ''' إن شاء الله غير مادارولها شي ،بس هيا قالت إنها فاتت على خير ، باهي خيرها ماجتش إمالا'''


نورا: ياهووو ياندى وين سارحه وضربتها على كتفها


ندى: ها يابلي خيرك 


ملك: ماتعرفيش علاش فرح ماجتش


ندى: مش عارفه توا أكيد تجي (خايفه علاها بنموت بس مانبيش إنبين قدام البنات)


عم الصمت في الفصل لما خشت الأبلة والإنظار كلها إتجهت للباب بصدمة لما خشيت أنا ، وحالتي كانت حاله (وجهي كله كدمات ولصق متاع جروح وعيني مسكره بفاشة عيون ونعكز من رجلي) طول جتني ندى وملك يجرو ، وكل اللي في الفصل يسألو( خيرك شن فيه )( لابأس عليك)( شن صارلك) معاش عرفت إنرد على مني ولا مني ، ندى طول عيونها دمعو وكأنها فهمت شن اللي صار


نقذتنى الأبله لما تكلمت موجهه كلامها للطلبة


الأبلة: زميلتكم فرح تعرضت لحادث سيارة أمس ،(قعدو الكل يحمدولى على السلامه) بس الحمدلله جاتك بسيطة يافرح ، الحمدلله على سلامتك مره ثانية ، يلا خلاص كل واحد في مقعده خلي نبدو الحصه

ساندتني ندى وملك خذت شنطتي وقعمزت في مكاني وجنبي ندي


ندى: بهمس حقا درتي حادث يافرح؟


فرح: بنفس الهمس ياريتني درت حادث ومتت وإفتكيت من هالحياة ، توا نحكو بعد الحصه


ندى: بقلق ، باهي باهي 




تموا الحصص الأربعة ودرتنا الإختبار ، رن جرس الإستراحة 


ندى: أطلعو إنتم ياملك ونور ونورا


نور: إنتي وفرح مش طالعين؟


فرح: لا لا إني مانقدرش نطلع بحالتي هذى


ندى: وإني توا نقعد معا فرح أطلعو إنتم


ملك: باهي بالك تبوا حاجه فطور ولاميه ، خلي نمشي نجيبلكم قبل


فرح: لاصحيتي ياملك واللهي ماخاطري في حاجه


ندى: إني جايبه معاي شكلاطه وميه توا نأخذوهم ، شكرا ياملك


وطلعو البنات ، وناضت ندى سكرت باب الفصل ورجعت قعمزت جنبي بسرعة


ندى: خيرك يافرح شن صار ، مني اللي دار فيك هكي


فرح أني طول دموعي نزلو ومعاش قدرت نتحكم فيهم ، وقعدت نحكي لندى شن صار بالزبط




** وكأني أنتظر أن يسألني أحدهم: مابك ؟؟؟ حتي أبدا بالبكاء !!! **




ندى: سحر الحيوانه هذه واللهي لما تشوف على عملتها هذى ، تبي تربايه باش تحرم مره ثانيه


فرح: حسبي الله ونعم الوكيل وخلاص


ندى: ياسر يافرح من الطيبه متاعك لازم تقوي روحك شويه وتواجهها، وإحني معاك ماتخافيش 


فرح: مانبيش إندير مشاكل زياده ، مش ناقصني هم ، هذه واحده حيوانه ( هذا غير إحني لينا صاحبات فوق التسعة سنوات وديمه كنت نستر فاها ونغطي على عملاتها ، ولولاي أني كانت مستحيل تنجح) وفي الأخير شوفي شن دارت فيا 


ندى: طلعت إميه من شنطتها وفتحتها ومدتلي، خودي أشربي ومعاش تبكي على خاطرها هالكلبه والله ماتستاهل


فرح: أني مانبكيش علاها بس واجعتني روحي ، ياريته حتي في سبب يخليها إدير هكي ، شن درتلها أني


ندى: أني شاكه إنه في حاجه وراها ، بس مايهمكش فاها واللهي لما تأخذ حسابها ، غير أبري إنتي وشدي روحك ، باش تحضري بعينك كيف نربيهالك


فرح: هههههههههههه تقولى إنتي اللي صار معاك هكي مش أني كيف منفعله 


ندى: إنقهرت عليك ، وبعدين إنتي صاحبتي وكرامتك من كرامتي ، واللهي من أول ماشفتك إستريحتلك وحبيتك كأني نعرفك من زمان


فرح: حسيت وقتها (كأن ندى هيا العوض اللي باعتهولى ربي باش يسندني) ماكنتش نعرف (إن العوض الأكبر مازال ماجانيش) إكتفيت بالابتسامة لندى


ندى: باهي واللفعه مرت خوك هذه شن قصتها


فرح: مش عارفه علاها من يوم يومها هكي ماتحبناش وإدور في أبسط غلطه علينا تجري باها لصالح وهوا عاد مايصدق


ندى: خزي هالشكل مرض يرفعها ، حسني سخفت على خوك اللي واخذها


فرح: هههههه هما الزوز أحرف من بعض ، والنبي فكينا منهم ، نفسي غمت عليا 


ندى: باهى ، هيا تعالى نوقفو في الروشن شويه ، شوفي الجو يهبل والمطر تبشبش تتغير نفسيتك


فرح: باهي تسندت علاها وقعدنا واقفين على الروشن لين رن الجرس وخشو الطلبه ( فعلا جو النسمه الخفيفه والمطر اللي تبشبش من أفضل الأشياءاللي تغير نفسية الواحد)




قبل لاينتهي الدوام جاني سالم وخدالي إذن وطلعت ''ماكنتش نبي نطلع في نهاية الدوام وكل الطلبه يشوفوني وتكثر الدوه والكلام الفاضي وبالذات سحر مانبيهاش تشوفني في الحال هذا وتتشمت فيا




**عند وليد**


جيت للثانوية ومن اول ماركبت ندى وهيا ساكته وواضح أنها زعلانه ومهمومه، ماقدرتش نسألها خفت إنه تكون البنت صاحبتها صارتلها حاجه وهيا زعلانه عليها ، نعرف ان ندى تحبها هلبا ، ونعرف برضو إنه ندى ماتسكتش هكى وتزعل بالشكل هذا إلا على حاجة تحبها، بس زعما شن صار؟؟ قعدت نفكر فى ألف حاجه وشارد، فيقني من شرودي ندى وهيا تقول ....!


ندى: كان شفتها ياوليد كيف شكلها تسخف مكسرينها تكسير وياريته حتى على حاجه تستاهل، ياناري علاها فرح تسخف 


وليد: لإنى كنت شارد من بداية الكلام ماجاش في بالي إنها تحكي على البنت نفسها ، بس لما قالت فرح ماعرفتش شن صار ، تلخبطت الحكايه عندي ،




ماوعيتش على روحي إلا لما عيطت ندى بالقوه لما قصت شاحنه كبيره من قدامنا وأني مش منتبه ،




شديت فرينو بالقوه لين حسيت السياره إنقامت بينا فوق ونزلت لوطه ، وصوت كلاكس السيارات ، وعياط ندي اللي خبطت رأسها في الباب من قوة الفرينو ، 


هذا كله ماهمنيش وشفت لندي بنظرة حزن وعيون مدمعه ومكسوره خيرها فرح ؟؟ خيرها فرح؟؟ تكلمي ياندى شن صارلها


ندى: تبكي وتشوفلي بصدمة ، شدت يدي واللهي كويسه ياوليد ماصارلها شي ماتخافش


وليد: قمت رأسي فوق وبترجي( ياااااااااربي ياااااااااربي شن دارت فيا بس) لفيت بعيوني على ندى من جديد، كنت حاسس ياكاتي من إمبارح إنه فاها حاجه


ندى: شبحتلي بصدمة وكأنها إتاكدت من كل شي كانت شاكه فيه ( وإذكرت لما كانت تحكي لوليد على فرح في الأيام اللي فاتت ، وليد: واللهي شكلي بنحبها هالبنت من كلامك عليها هههههههه


ندى: تعرف ياوليد تدخل القلب من غير إستئذان هالبنت ، بجد نعمه من ربي فعلا ، لولا إنها هاديه وعبيطه حبتين


وليد: يلا عاد معاش تحكي على حبيبتي هكي ههههه


ندى: ههههههه ) 




ندى: وليد حول من الطريق ماتسمعش في السيارات والناس اللي وراك كيف إمدايرين دوشه


وليد: ولعت السيارة ودرست على اليمين بعيد على الطريق شويه وقعدت حاط رأسي على الدومان


ندى:حطت إيدها على كتفي ، وليد خيرك شن صايرلك


وليد: هيا ياندي واللهي هيا نفسها حتي أني مش مصدق ، حاسس روحي في حلم


ندى: بإستغراب إنت شن تقصد ياوليد ، وسرعان مافهمت قصده ،وشهقت وحطت إيديها على فمها ، معقوله هيا


وليد: قمت رأسي وشفت لندى ، حتي أني مش مصدق ليا ثلاثة أيام مارقدتش ، طيفها مافارقنيش ولا لحظه


ندى: مستحيل أكيد شبه بس


وليد: شنى عيل أني ياكاتي قتلك هيا حافظ ملامحها ، باصمهم في عقلي بصم


ندى: مش عارفه شن إنقولك ياوليد بس أكيد أنت تعرف أكثر مني


وليد: هيا هيا متأكد ، بس إنتي ماقلتيليش خيرها البنت ، شن دارولها


ندى: حكت لوليد كل شي قالتهولها فرح


وليد: مصدوم معقوله فيه ناس هكي ، هاذي مش صاحبه هاذي الكناسه حرام فاها ، ولعت السياره بغضب وعم الصمت ،لين وصلنا




** عند فرح **


مر الإسبوع الأول عادي واليوم يوم الثلاثاء في الإسبوع الثاني ، حالتي تحسنت الحمدلله قعدو شوية كدمات زرق حول عيني بس،من بداية الإسبوع بديت نركب في باص سعد ، أي صاحب الباص اللي قالي عليه سالم إسمه سعد ، والحق إرتحت هلبا مانحبش إنثقل علي حد ، ارفع وجيب وبالأخص كل حد عنده فاش لاهي ،




كل يوم ندى تتحزز على سحر بس أنا نهدي فاها ،مانبيهاش إتصيرلها مشكلة بسببي ، 




طالعين للاستراحه وأني نوصي في ندى تفكنا منها ومن مشاكلها ،وهيا تساير فيا عارفتها بس حاستها زي البركان ممكن تتفجر في أي لحظه


فرح:ندى على خاطري فكينا من المشاكل 


ملك: باللهي يافرح أسكتي تي خلينا إنربوها هالحيوانه


فرح: فنصت في ملك ، الناس تبرد وإنتي تزيدي تشعلي فاها ، ملك لفتت وجهها للجهة الثانيه ومش عاجبها الكلام


ندى: والله خاطرك غالى عندي يافرح ، بس أني حلفت وراسك إلا مانأخذ حقك ياحلوه هههههههه


نور: هههههههه كفك ياندى ، هذا الصح


فرح: أني كيف بنتكلم قطع عليا الولد لما تكلم


أحمد: السلام عليكم ، شن الجو




الواضح إنه يعرف ندى وملك قاريين معاه من قبل ، بس هوا سبقهم وهما قعدو يعاودو سنتين


قعدو يهدرزو وأني تبعدت عليهم ومشيت قعمزت تحت الشجره ، والبنات قعدو واقفين يهدرزو على أحمد


شوية تلفتلي أحمد وقدم جيهتي شويه ووراه البنات


أحمد: شني ياحلوه إنتي، الحشم والتربيه على ناس دون ناس ولاكيف ، كلنا رجالا راهو


فرح: قمت عيوني وأني مذهوله، أشرت على روحي بصبعي : إنت تكلم فيا أني ؟؟؟


أحمد: أي من فيه غيرك إمدايره روحها شريفه ، وهيا أستغفر الله العظيم وخلاص 


ندى: بغضب أحمد إنت شني تقول إحترم نفسك وإعرف كيف تدوي


أحمد: ندى أطلعي منها إنتي حاجه ماتخصكش


ندى: لا مش طالعه ودير اللي بديره وبعدين تكلم كويس 


أحمد: أني نتكلم كويس وبعدين شوفي صاحبتك ، وشبحلي بهزوه 


فرح: أني مصدومه في مكاني ولاتحركت مش عارفه على شن يحكي ، وشن يقصد ، وكأنه كان ناقصني هموم أني لين يجي هوا يكمل عليا


ملك: ياتقول شن فيها ياأحمد وتفهمنا ، ياأما إقلب وجهك من قدامنا


أحمد: قاعد مثبت نظره عليا وقال: كان نعرف بس شن فيا ناقص باش ترديني ، باش زايدين عليا هما ، الحق فيا إني حبيت واحده ماتسواش زيك


فرح: لحظه لحظه شن قال!!!!!وكأنه رجعلي صوتي فجأه : إنت شن تقول أني وين نعرفك باش تحبني؟؟؟؟


أحمد: قعد يشبحلى بكسره وواضح كمية الحزن في عيونه


ندى: جبدت أحمد من يده لما لاحظت إنه الطلبه بدو يتجمعو علينا ، وشبحتلنا ألحقوني يابنات


مشينا وراهم وأني خايفه بنموت،منين طلعلي هذا.




وصلنا لمكان ضيق ومدرق علي الساحه بحيث مافيش حد يشوفنا أو يسمعنا


فرح: ندى أني مستحيل نقعد هنايا، إنتي عارفتيني مانحبش المكانات هادي


أحمد: شبحلي وضحك بهزوة


ندى: حاضر يافرح شويه خلى نفهمو شن فيه ونمشو، وشبحت لأحمد : وإنت يابرو فهمنا شن فيه وعلى شني تحكي




بدي أحمد يحكي (( وياريته ماتكلم😖))




أحمد: تذكري يافرح أول يوم لما جيتو وقفتو في الطابور الغلط إنتي وصاحبتك 


فرح: أي!!!!


أحمد: وأني قلتلكم مش هني سنة أولى وإنتي مشيتي وقعدت صاحبتك تهدرز عليا صح


فرح: صح بس أني ماشفتكش كويس إنت نفسه الشاب أو لا ( كنت نتكلم زي العبيطه)


ندى: كمل ياأحمد


أحمد: وقتها عجبتيني وخشيتي خاطري ، وقلبي دق من غير إستئذان، وقلت لصاحبتك


( أحمد: شوفيهالنا صاحبتك هاذي ياسحر 


سحر: مني قصدك فرح ؟؟


أحمد: وإسمها فرح أخ قلبي الصغيرلايتحمل


سحر: مسرع شفتها إنت وصار فيك هكي 


أحمد: ملاك هذى تخش الخاطر من نظره، غير كلميهالي


سحر: حست بالغيرة وكان تلقى في وقتها تطلق الموت على فرح ، لأنه كل التركيز كان علاها من لما هيا صغيره وحتي في مدرستهم الأولي ، بعكس سحر اللي مش معدل علاها حد


أحمد: شوفاهالي باهي وليك مني أحلي هديه


سحر: باهي أوكي ''' وفي خاطرها واللهي ماتحلم هالحقيره هذي ''')




أحمد: وجتني ثاني يوم ، وقتلي قتلك لا ماتبيش تكلمك ، بس أني مابطلتش وقعدت إنزن على سحر كل يوم إنها تقنعها ، لين يوم كلمتها ( أحمد: شن صار ياسحر معاك


سحر: ماتبيش ياأحمد على قد مادرتلها 


أحمد: تي غير أقنعاها ياسحر واللهي أني حبيتها من قلبي


سحر: سخفتني ياأحمد أني قبل مانبيش إنقولك بس مادامك تحبها لازم تعرف قبل لاتتورط 


أحمد: شن فيه ياسحر إحكي؟


سحر: فرح واحده مش مزبوطه ومتاعت ولاد ، ومن يوم يومها هكي ، وكانت تطلع معا ولاد في المدرسه الأولي وأني كنت نغطي علاها ، وتقول لأهلها أنها فى حوشنا تقرأ معاي ، ماخلتش ولد وماطلعتش معاه ، والله أعلم شن دارو فاها، حتي أني كرهتها من تصرفاتها ومعاش نحكي معاها، نخاف على روحي منها


أحمد: إنتي متأكده ياسحر ، بس والله باين علاها ملاك 


سحر: هيا هكي إدير في وجه المسكينه هذا باش ماحدش يعرفها ولايشك فاها بس أني صاحبتها ونعرفها أكثر واحده


أحمد: باهي ياسحر قوليلها حتي أني نباها تطلع معاى زي اللي تطلع معاهم)


فرح: أني وقتها معاش تحملت وإنفجرت بكي: كذب والله كذب هذي واحده حيوانه(( أصعب شي ممكن يتقبله الإنسان إنه يطعنو في شرفه ، ولا من منى!! من ناس كنت الأقرب ليه))




ندى: هدي يافرح ، إحني عارفين إنه كذب ماتخافيش ، بس خلي يكمل ، وتلفتت كمل ياأحمد




أحمد: مافيش جتني ثاني يوم وقتلي إنها رفضت حتى إنها تطلع معاك ، وقالت ماناقصني إلا نطلع معا الحثاله هذا ، شن عنده باش يقدملي، ونزل أحمد عيونه ، وقالت هلبا كلام عيب مانقدرش إنقوله ، وإنها تأخذ على الطلعه ألف فما فوق




فرح: أني هني إنهرت خلاص طحت لوطه ونخبط على رجليا ، معاش قادره نواجه حد ، جوني البنات( نور وملك ونورا) يجرو شدوني ، وندي قعدت تحكي معا أحمد




أحمد: وجعاته فرح وحس إنه ظلمها مستحيل هالملاك إدير هكي :بس والله يافرح أني ماصدقتهاش حسيت إنها وحده ألعبي


ندى: ورد بالك تصدق ياأحمد ( وحكتله كل اللي داراته سحر معاي)


أحمد: معقوله هالحيوانه هذي واللهي نشرب من دمها


ندى: لا ياأحمد خليك إنت على جنب (وشبحت للبنات اللي شاديني وأني مش قادره نوقف ، شكلها لعبت بعداد موتها الحلوه هههههه)


ملك: هههههههه خلي تتلقي إمالا


أحمد: بس والله يافرح حبيتك سامحيني 


فرح: حسبي الله ونعم الوكيل فيكم ياكلاب 


أحمد: حط رأسه لوطه وحاس إنه الندم بيأكله


ندى: خلاص برا إنت ياأحمد توا بعدين نحكو 




رن الجرس وخشينا وأني سانديني البنات وحاسه روحي خلاص بنموت




**كل يوم صدمة أقوى من اللي قبلها**




^^^^^^^^^^^^^^^^^^^^^^^^^^^^^^




**عند وليد**


من هذاك اليوم وأني عايش في دوامه، كل يوم أسوء من اللي قبله ، مش قادر ننسي ومش عارف كيف نتصرف ، قاعد مش مستوعب اللي صاير نهائي، غارق فى أفكاري لين طق الباب




ندى: طق طق طق ممكن أدخل ياباشا


وليد: ههههههههه تفضلي ياهانم


ندى: فتحت الباب ومدت رأسها بس ، الباشا فاضي ولا لا


وليد: تعالي ياكاتي ، تعرفي كان مش منك إنتي راني هاج قداش ليا 


ندى: خيرك ياوليد مانعرفكش ضعيف هكي


وليد: باللهي شن عاجبك في عيشتنا ، بوك وأمك اللي يلودو من بلد لبلد ولايسألو ولايدورو ولاكأنه إمخلين حد وراهم ، ولاخوتك اللي كل واحد لاهي في روحه ومش حاسبين حد ، 


ندى: الله غالب ، بس نهى ونسرين كل يوم يكلمو فيا ويسألو عليك، يتصلو بيك يلقو في تليفونك مقفل ومسكر النت ، كيف تبيهم يوصلو فيك


وليد:اللوم مش علي نهى ونسرين ، اللوم على الكبار اللي يحسابو أرواحهم مراهقين ، ولاخوك الكبير اللي غاطس يلهف وخلاص، ولاحافظ اللي يجري ومايدري 


ندى: ياناري حافظ يسخف كان يلقي يتزوج قبل لاتروح أمي ، خايفه تفسد عليه ولاتقلب لبوي دماغه


وليد: والنبي فكينا معاش عندي خلوق لحد في هالحوش ، كل واحد يفكر في روحه وخلاص ،إنتي تعشيتي؟؟


ندى: لا لا جيت أصلا باش نسألك ونطلبو معا بعض


وليد: خلاص أصلا أنا طلبت بيتزا وكباب قريب يوصلو ، وحسبت حتي حافظ معانا 


ندى: احسن مادرت لأنه الطباخ ماجاش ومش راح يلقي حاجه يأكلها


وليد: طباخ البلي اللي حاصلين فيه يلهط في الفلوس على الفاضي وإحني نطلبو من برا


ندى: يلا ماعلينا ، رزقة دايرهاله ربك ، وليد...


وليد: نعم ياكاتي


ندى: أنت خيرك ، مش عاجبني بكل ، أحكيلي باش ترتاح


وليد: آآآآآآه آآآآآآه ياكاتي شن بنقولك ، مافيش كلام يوصف اللي حاس فيه بصراحه ، حاسس روحي تعبان وإيديا مربطات مش عارفة كيف نتصرف


ندى:الله يقطع الحب وسنينو ههههههههه


وليد: ههههه واللهي إنتي فايقه ورايقه




عم الصمت بينا للحظات، ماقدرتش نمنع روحي أني نسأل علاها




وليد: ندى 


ندى: وعيونها في الموبايل ، نعم


وليد: بلهفه كيف حالها؟


ندى: سكرت التلفون، وشبحتله ،كويسه ياوليد ،بس لو تخليني نكلمها 


وليد: لا مستحيل نعشمها بأي شي وأني مش قده، إنتي عارفه أهلك الراقيين وتفكيرهم الساذج، ولانسيتي الكلمه اللي عاطيتها أمك لخالك ،ااااخ لو نعرف شن هوا الشي اللي شادينه على عيلتنا بس، ومخليين أمك وبوك يسمعو في كلامهم وينفذولهم في طلباتهم


ولولا نسرين بس عندهم ، وخايف علاها كنت وريتهم الكلاب


ندى: الله شن جاب لجاب أمل لى فرح فرق بعد السمي علي الأرض ( أمل بنت خال وليد اللي أمه عاطيه فاها كلمه تبيها لوليد و أخت نور الدين زوج نسرين) 


وليد: باللهي فكيني من سيرتها هالطوبو هذي


ندى: بإستفزاز قصدك فرح


وليد: بغضب ندى بلا لعب فروخ ، مش وقت برادتك( كان قصده أمل ، بس ندى حاولت تستفزه بفرح لأنها عارفه إنه يبيها بس يكابر على حساب روحه وهوا الخاسر)


ندى:ببرود باهي خلاص سكتت وحطت إيدها علي فمها


وليد: بتنهيده طالعه من القلب ، إستاحشتها ياكاتي


ندى: ضحكت ، عرفتك بتقو وقص على كلام تليفونها لما رن ، شافت للتليفون بصدمة ورجعت شافت لوليد


وليد: إستغرب خيرك مني اللي متصل


ندى: فرح ياوليد شكله القلوب عند بعضها


وليد: كان متكي وقف في لمح البصر، وعيونه يلمعو من الفرحه وقعد يساوي في حوايجه


ندى: هههههههههه ياغبي راهي علي التليفون مش علي الباب، لا إنجنيت رسمي إنت


وليد: ضحك على روحه وفعلا مش عارف شن صارله لما سمع إسمها


ندى: أهي سكرت عاجبك هكي لهيتني ماخليتنيش إنرد


وليد:قعمز جنبها ، ركبي السماعات وعاوديلها 


ركبت ندي السماعات وعطت لوليد واحده وهيا واحده ورنت على فرح وشويه وجاها صوت فرح ، وليد أول ماسمع صوتها حط إيده على قلبه وكأنه يحاول يشده باش مايطلعش من مكانه




فرح: ألو 


ندى: أهلين فروحه


فرح: هلا وغلا


ندى: شكلك رايقه، دوم يارب 


فرح: أي واللهي الحمدلله، ويدوم فرحك ان شاءالله 


ندى: كيف حالك ؟ شن أخبارك؟


فرح: كويسه ، كيفك إنتي؟


ندى: تمام التمام، كيف خطرنا على بالك


فرح: هههههههههههه واللهي ( هني وليد داخ معا الضحكه وإتكا لوطه وطاحوالسماعات من وذن ندى)


ندى: يابلوه إنت، طول إتكت جنبه وخذت السماعه الثانيه ، ها يافرح شن قلتي ماسمعتكش 


فرح: قتلك العويله مهناش وأمي شكلها نست تليفونها، قلت خلى نستغل الفرصه ونرن عليك


ندى: أحسن مادرتي ، وين أهلك غريبه قاعده بروحك


فرح: مشو لحوش عمتي ، مش بروحي قاعده معاي سناء بس في المطبخ


ندى: وخيرك مامشيتيش لحوش عمتك غيرتي جو


فرح: بصراحة وين نمشى علاء إيدرهلي في كبدي ، ويأخذ ويجيبلي، الولد يسخف فيا نمشيلهم مره في الشهر ، يصرف في معاشه كله عليا




ندى لاحظت إنه وليد تعصب وتنرفز وواضح الشي هذا فى عيونه ، حطت يدها على يده وهزتله برأسها بمعني لا مش زي مافهمت ( وليد فهم إن فرح في علاقه مع علاء ولد عمتها)




ندى: فرح إنتي ليش مضايقك الشي هذا ، المفروض تفرحي إنه في واحد يحبك للدرجه هذه


فرح: باللهي ياندى معقولة إنتي ، أني وعلاء مستحيل أصلا ، مانبيش نعطي للولد أمل على الفاضي ، أني مستحيل نرتبط بيه ، مش هو فارس أحلامي على قولتكم ههههههه




وليد إرتاح شويه وإبتسم من كلام فرح ،أشر لندى بمعني أسألها شن مواصفات فارس أحلامه




ندى: وشن هيا مواصفات فارس أحلامك يافرح


فرح: ندى غدوة توا إنهدرزو في المدرسه ، ماتنسيش مذكرتي اللي عندك


ندى: ههههه قولي من الأول إنك متصله على خاطر المذكره ، متخافيش مش راح ننساها


فرح: لا ياندى مش هكي قلت نوقضك بس


ندى: باهي حاضر


فرح: يحضرلك الخير ياروحي هيا سلامات ليلتك سعيدة


ندى: سلام تصبحي على خير




سكرت ندى التليفون، وشافت لوليد اللي سارح في السقف وضحكته من الودن للودن 


ندى: وإنت ياسيد وليد ماتبيش تعشينا ولاكيف ، وينه اللي طلبته


وليد: بضحكه حاضر ياروحي 


ندى: لا إنت هبلت رسمي




وصل العشي وإحني نتعشو:-


ندى: وليد غدوة إحتمال يجيك إستدعاء من المدرسه


وليد: وعلاش ان شاءالله 


ندى: غدوة ناويه الفرخه سحر ، بنطفي ناري


وليد: ههههههه باهي غير ماتكثريش بس فكينا من المشاكل 


ندى: مادور شي أهم شي ماحد يسمع من العيله غيرك


وليد إكتفي بهز رأسه وكمل أكله




^^^^^^^^^^^^^^^^^^^^^^^^^^^^^^^


** عند فرح**


دخلنا بعد الإستراحه ، خدينا حصه واحده، وكانو الحصتين الأخيرات فيه إجتماع للكادر التعليمي ( مدرسين ومدرسات بيناقشو جداول الإمتحانات لنهاية السمستر الاول) وكل الطلبه طلعو للساحه


ندى: والله جت على رجليها يابنات


ملك: إيه هذي فرصتنا


نورا: شن رأيكم نستفردو باها في الفصل توا قبل لا تطلع


ندى: لا نبيها فى الساحه باش الكل يتفرجو علاها هالحشره


ملك: تم إمالا خلي نكلم باقي البنات أني ومشت ملك طلعت


ندى: فرح غريبه ساكته ، معارضتيش الموضوع


فرح: شني بنقول علي أساس بتسمعو كلامي ، وتلفتت نجمع في كتاباتي


ندى: مش هكي يافرح بس هذى بعد اليوم خلاص تبي تربايه شفتي أحمد شن قال


فرح: إكتفيت بالسكوت ، بس صح علي قولت البنات تبي تربايه هالحيوانه، بس ماكنتش نبي إنديرلهم مشكلة بسببي




طلعنا للساحة وجونا البنات صاحبات ندى وملك ، كانوا قريب 30بنت ، أني شهقت وشفت لندى 




فرح: معقولة هكي هلبا ياندى كلكم على واحده


ندى: شكلك خايفه علاها هالحيوانه


فرح: لا بس هكي رح تقتلوها


ندى: لا ماتخافيش أني بس نقدرها هالحشره،


بس البنات بيحموني 


فرح: أني خفت بصراحه يصيرلها شي ، ونضيعو فاها


ندى: هيا يابنات بدت اللعبه ههههههههه


البنات كلهم قعدو يضحكو ومشو وراء ندى، الطلبه اللي في الساحه كلهم قعدو يشبحو ، وكأنهم عارفين إنه مجموعة البنات هاذم مايجتمعو إلا وفي دعكة كبيرة وراهم


ندى وملك ونور ونورا كانو القدام وأني وراهم معا البنات الثانيات وقعدو اللي في الساحة يمشو ورانا يبو يتفرجو


كانت سحر مقعمزه هيا وزوز بنات صاحباتها، لما شافونا جايينهم ناضو وقفو وقعدو يشبحولنا بخوف 


ندى: أهلين بسحر الحلوه


سحر بخوف : ها أهلين


ندى: والله وطحتي بين إيديا ، تلفتت لملك ونورا : جيبوهالي الحلوه


مشو البنات شدو سحر اللي كانت بتهرب ، وقعدو يشحو فيها، لين وقفوها قدام ندى ، دارو البنات دائرة بحيث تكون ندى وسحر بس في الوسط وهما حايطين بيهم ، باش مايخلوش حد يخش ويحزهم لين تكمل ندى 




ندى من غير أي مقدمات طاحت في سحر ضرب وكفوف ، وبسرعة ماطاحت سحر لوطه ، وأصوات الشباب والبنات اللى في الساحه قعدت تعلي علي الشي اللي صاير ، وندى شي قالت إنبطل قلبها نار




فرح: خلاص ياندى البنت بتموت ، قلت هكى لما شفت الدم طالع من فم سحر


ملك: باللهي شوية ياندى ، وجت لسحر عطتها رفسة برجلها لين سحر تكمشت معا بعضها ، ونزلت لسحر وتفوووو على وجهها 


ملك: سامحيني ياسحوره بس خاطري فاها قداش ليا لازم إنبرد قلبي ، وشافتلي تعالى يافرح طفي نارك فيها هالحيوانه


فرح: بخوف لا ياسر فاها اللي درتوه


ندى: أسمعوني كلكم والبنات بالأخص، هذى نهاية أي واحده تتعرضلي أني ولا واحدة من صاحباتي ، فهمتوا هذا درس ليكم كلكم ، ياريت تتعلمو منه


جو الأساتذه والمدير والمدرسات يتجارو بعد ماسمعو، بس بعد شني لين ندى خلاص دقدقتها


كنا واقفين أنا وندى وملك ونورا جنب بعض


قامو المدرسات سحر ورفعوها لوحدة الإسعافات الأولية اللي في المدرسة


المدير: وأنتم تعالو معاي للإدارة 


ندى: لافرح مش معانا


فرح: ندى شن تقولي مستحيل تتعاقبو بسببي وأني نقعد واقفه


ندى: فرح أسكتى وبري توا إنتي مش معانا ، دفتني ندى للخلف ومشت هيا والبنات وراء المدير


فرح: ياربي ساعدني حرام عليا كله صار بسببي إن شاء الله غير مايفصلوهمش ، ومشيت وقفت جنب باب الإدارة وأني نبكي ، شويه وجتني نور 


نور: شن صار يافرح


فرح: نبكي وحالتي حالة :مش عارفه قاعدين ماطلعوش، خايفه علي البنات كله بسببي ياريتني متت واستريحت 


نور: ماتخافيش يافرح ، وبطلي بكى إنتي مادخلكش ، وسحر كان لازم تتربي ولا راح تزيد تتمادي أكثر ، وبعدين ندى ماينخافش علاها وهذي مش أول مره إدير هكي وتطلع منها زي الشعره من العجين، غير كانت الفتره اللي فاتت عاقله شويه


فرح: إستغربت في كلام نور يعني ندى من يومها مشكلجيه، بس أنا من لما بدت القرايه ماشفتهاش دارت شي زي هذا ، نور إنتي وين كنتي؟ ماشفتكش من بكري


نور: خشيت كملت على سحر ، أني فتحت عيوني بصدمه


**قبل شوي**


ندى: نور زي ماتفاهمنا باهي هي بري بسرعه


نور: باهي باهي 


مشو البنات وراء المدير ، ونور توجهت لغرفة الإسعافات الأولية اللي فاها سحر 


نور: طق طق طق وفتحت الباب : ممكن ندخل ياأبله


الأبله: خيرك شن تبي ، تشوفي فيا مش فاضيه


نور: لا بس سحر صاحبتي ونبي نطمن علاها ودارت روحها تبكي 


الأبله: باهي خشي خليك بحداها شوي ، نجيب المعقم من الغرفة الثانيه وإنجي 


نور: باهي ، إستنت لين الأبلة طلعت ، وطبست علي سحر ، 


نور: تعرفي ياحلوة إنتي تفتحي فمك بكلمه ولا تجبدي واحده من البناويت وبالأخص فرح، تكوني عولتي على موتك ، ومش تحسابي مافيش حد يقدر يوصلك برا المدرسه لا ياسمحه زي ماوصلنالك إهني ، نوصلوك لو تكوني في سابع سمي ، فاهمه


سحر: بخوف هزت رأسها بمعني فاهمه


نور: أيوه هكي خليك شطوره ، وطلعت نور وخلت سحر زي الكلبه إملوحه ، ومافيش حد عدل علاها حتي صاحباتها مافيش واحده جتها كلهم خافو من ندى




فرح: أني شهقت :معقولة هذا كله يطلع منكم 


نور: تي ، وسكتت لما إنفتح باب الإدارة وطلعت ملك ونورا 


فرح: شن صار؟ وين ندى!


ملك: نفس كل مره ندى تحملت كل شي


فرح: بصدمه كيف!




** في الإدارة**


المدير: أنتم كيف إديرو هكي في البنت قريب قتلتوها


ندى: كانت تبي تربايه وتربت بس مافيها شي هذي زي الجن


المدير: لا واللهي ياسيده ندى، هكي قولك إنتي ، أني فرحت بيكم قلت شكلهم عقلو هالسنه وبطلو مشاكل ، بس تاريته عقلكم طلع وراه مصيبه


ندى: ااااااااف باهي خلاص شن تبي توا


المدير: قولو شن السبب اللي خلاكم إديرو هكي في البنت


ندى: البنات مادخلهمش خليهم يطلعو ، أني اللي ضربتها مافيش حد مسها غيري ، موضوع بيني وبينها


المدير: أطلعو إنتم موجه كلامه لي نورا وملك


وتلفتت لندى وإنتي شني نفس كل مره نكلمو خوك


ندى: وليش أني عندي غيره ، أتصل بسرعه حسني مليت


المدير: اااف عليك قلة أدب وشد التليفون يتصل




**عند وليد**


كنت مقعمز أني والشباب في الكافتيريا متاع الجامعه رن تلفوني وشفت الرقم ، واللهي شكله ندى دارت اللي فى رأسها، نضت تبعدت شوي على الشباب ، وفتحت الخط


المدير: أيوا إستاذ وليد


وليد: نعم تفضل


المدير: أختك الأنسه ندى مشرفتنا في الإداره كالعاده، ياريت تجي تشوفلها حل 


وليد: حاضر ياأستاذ ربع ساعة ونكون عندك


شوية ووصلت ونزلت وخشيت للمدرسة ، وأني نسمع في همس البنات كالعاده ، دخلت وشفت شلة ندى مقعمزين جنب الإدارة ، بس شد إنتباهي إنه فرح مش معاهم ! زعما داخل في الإدارة؟ لا إن شاء الله لا (( خفت علاها يكونو شادينها في الإدارة ويكونو إمدايرليها إستدعاء ، خفت علاها من أهلها لو عرفو شني بيديرو فاها هالمره))




فتحت باب الإدارة بسرعه وبلهفه وطمنت لما لقيت ندى ، وبنت ثانيه والواضح إنها طالعة من عملية تجميل فاشله، لاعبين فاها لعب خشيت وسكرت الباب




وليد: السلام عليكم ، ومد إيده يسلم على المدير


المدير: وعليكم السلام ، أهلين ياوليد تفضل قعمز 


وليد قعمزت وشفت للبنت مره ثانيه وشفت لندى بغضب


وليد: هلبه هكي ياندى زودتيها حبتين


ندى: بالهمس لو سمعت اللي سمعته اليوم كنت قتلي شويه فاها وزدتها إنت من عندك


وليد فنصت في ندى معقوله شن زادت دارت هالبلوه


المدير: ياوليد أختك ماتبيش تتكلم وتقول علاش دارت هكي في البنت ، قالت لين يجي وليد ، تبي تحكي قدامك


وليد: ها ((خاف إنه ندى تجبد سيرة فرح بس إرتاح لما تكلمت ندى وقالت))


ندى: البنت تبلت عليا وفتنت بيني وبين صاحباتي


وليد نتفرج على ندى كيف تتكلم بثقة ولاكأنها دايره حاجه ، وطلعت بارعه في التمثيل 


ندى: ترضي ياوليد واحده تكذب وتتبلي على حبيبتك((كانت تقصد على فرح ، وليد فهم قصدها ، والمدير زي الأطرش في الزفه يحسابها تحكي على روحها))


وليد: بغضب أكيد لا مانرضاش


ندى: تخيل ياوليد الحيوانه هذى طعنت في شرف حبيبتك، وبدت ندى تبكي ودارت دموع التماسيح


وليد: بعصبية وقف وخبط على مكتب المدير، لا هكي هلبه كل شي إلا الشرف ، ياأستاذ ،أنتم كيف تقبلو الأشكال هذى عندكم، وين ولى أمرها هذي


المدير خاف شويه لأنه عارف إنه بو ندى واصل هلبه في الدولة


المدير: أهى البنت قدامكم وتفاهمو معاها، مابتش تعطينا رقم ولى أمرها


سحر: عارفه روحي غالطه ياأستاذ وأني مسامحتهم، ومانبي منهم شي


وليد إنصدمت الحق شني اللي يخليها تحكي هكي وتتنازل عن حقها ، وهما مش إمخليين عظمه صحيحه فاها (( واللهي طلعتي مش ساهله ياكاتي))


أما ندى شافت لسحر بنظرة هزوه وإنتصار في نفس الوقت، وسحر طول حطت عيونها لوطه


المدير: تقدرو تتفضلو إنتم ياوليد ، وإنتي ياسحر خليك إهني لين يجي ولى أمرك




** عند فرح**


بعد ماطلعو البنات قعمزنا قدام الإدارة وقعدنا نستنو في ندى، بعد شوية جابو سحر وساندينها زوز أبلات مش قادره تمشي وحالتها تصعب على الكافر ، الحق ماوجعتنيش ولاحركت فيا ساكن ، لأنه اللي داراته فيا مش ساهل، ((كله كوم والكلام اللي قالاته لأحمد كوم ثاني، ممكن نسامحها على كل شي ، بس إلا طعنة الشرف)) المشكلة كانت صاحبتي ، فاتت من جنبنا وعيونها لوطه ، عارفه روحها هيا اللي غالطه




فرح: بنمشي إنجيب إميه نحس في روحي ريقي مر


نور: خليك إنتي يافرح توا أني نجيبلك


فرح: لا لا شكرا توا نجيب بروحي ، ومشيت للمقصف




ولما رجعت قالولي إنه خو ندى جي وخش للإدارة


شويه وخش أحمد وجي جيهتنا 


أحمد: شن صار فى ندى يابنات




مش عارفه شن صارلي لما شفته إذكرت كل الكلام اللي قاله ، أشبح لكم واحد قالاته غيره، ليش تشوه في صورتي ، حسبي الله ونعم الوكيل




خشيت فى نوبة بكي، تقول بيبي وخذو منه أمه، على قد مادارولي البنات شي قلت نسكت


أحمد بيتكلم بس أشرتله نور إنه يسكت، قعد واقف في جنبنا وخلاص




إنفتح الباب وطلعت ندى ووراها وليد




"""""""""""""""""""




لما سمعت الباب إنفتح نضت طول وقعدت نمسح فى دموعي ومشيت طول إضبطت ندى ونبكي بصوت ((بصراحه اللي قاعده إديرلي فيه حتي الأخت ماديراش لأختها))




""""""""""""""""""




وليد طلعنا وطول جت عيني علاها وهيا تمسح في دموعها بإيديها زي البيبي ،"" هيا واللهي هيا ""




""""""""""""""""""




فرح: سامحيني ياندى كله بسببي إني أسفه


ندى: خلاص يافرح ماصار شي ،إنتي ماليكش علاقه ، وبعدين إحني صاحبات مش بينا حاجه تافهه زي هذي ، وبعدين أطلقيني خنقتيني 


فرح ضحكت وطلقت ندى ، طول جبدها خوها وحضنها هوا الثاني، مافهمتش شن قصده


ندى: يوم الأحضان اليوم ولاشني 




"""""""""""""""""""




وليد حسيت قلبي بيطلع من مكانه لما حضنت ندى وهيا تبكي، قطعتلي قلبي ، فجأة حسيت قلبي بيطير من الفرح لما ضحكت ((كيف تقدر تقلبني بلحظه، هالبنت سحريه)) طلقت ندى طول جبدتها وإضبطتها أني


وليد بهمس لندى وهوا يضحك: يومك كله في حضني اليوم فيك ريحة الحبايب




"""""""""""""""""""




مش عارف شن قلها خوها ويضحك


ندى: هههههههه ياحيوان ودفاته بالقوة من علاها


ندى شبحتلي وغمزت لوليد ، بس حتي أني عندي طلب عندك يافرح ونتمنى إنك ماتردينيش 


فرح: عيوني ليك ياندى


وليد ضرب ندى ومش عارف شن قاللها في وذنها 


ندى: بس مش توا يافرح خلاها مره ثانية 


هيا تعالو نطلعو برا إنغميت


نور: إحني الباص جي هي نتلاقو غذوة ، طلعت نور ونورا




""""""""""""""""




وليد ندى كانت راح تفضحني قدامها ،بس ضربتها علي إيدها باش تفيق علي روحها


وليد: ندى سكري فمك مش وقته توا نحكو في الحوش




""""""""""""""""


وإحني طالعين ، وتلفتنا كلنا لما أحمد نادا بإسمي 


أحمد: فرح ممكن شوية لو سمحتي


وليد: شن تبي إنت الثاني (( فرح في خاطري باهي اللي سمعنا صوته من بكري وهوا يوشوش توشويش))


أحمد: نبي فرح شويه


وليد: واللهي قطعت عليه ندى: ياأحمد كان عندك حاجه قولها قدامنا


أحمد: أني أسف يافرح باللهي عليك سامحيني، ممكن تعطيني فرصه، واللهي أني نحبك


ماشفنا شي إلا ووليد عاطيه بوني إمطيحه لوطه، وكان بينزله بيكمل عليه لولا ندى وقفت قدامه 




""""""""""""""""




وليد الولد هذا مش عاجبني بصراحه ، وبعدين شني يدير بينهم ، وزيادة نادي علي فرح، لا هذا زودها، حاولت إنوقفه عند حده ، واللي عجبني إنه فرح ماتكلمتش وردت عليه ، بس كلامه الأخير خلا دماغي يفور، لو عندي الموت كنت طلقتها عليه وقتها




""""""""""""""""




فرح من لما تكلم أحمد و أني على الوضع الصامت، وكنت مستغربه في وليد كيف يتكلم بدلي وكأني مش موجوده والواضح إنه كلام أحمد عصبه 


بس مافهمتش شي بعدها الكلام اللي قاله أحمد والبوني اللي عطاهوله وليد الدنيا خشت بعضها ماعرفتش إندير شي إلا إني نبكي ((لا ياااااااااربي شني اللي قاعد يصير معاي ، أكيد أني منحوسه ، ماتفوتش ساعه إلا وأني طايحه في مصيبه جديده))




"""""""""""""""""




ندى: خلاص ياوليد شوف البنت إنهارت ، ياسر هيا تعالا نطلعو نروح




وليد: مش طالع لين يطلع ولد الكلب هذا قدامي


أحمد: ناض وقف وهوا يمسح في الدم اللي نازل من خشمه وقام شنطته وطلع




"""""""""""""""




أني قاعده نبكي وملك واقفة جنبي وشادتني بإيديها الزوز




"""""""""""""""




وليد شفت لفرح بعصبية: خلاص أسكتي إنتي الثانية ياسر دموع هبلتيني الزفت


ندى: خلاص أسكت ياوليد إنت شن قاعد تقول


وليد: بري سكتيهالي ياندى ، خير مانخطفها توا ومعاش تشوفوني لا أني ولا هيا




"""""""""""""""




فرح وكأنه دموعي تمو بعد العيطه اللي عيطها وليد قعدت إنشوف في الفراغ ، لين جتني ندى


ندى: خلاص يافرح هدي روحك وخودي إميه ، تعالي نقعمزو تحت الشجره


مشينا قعمزنا ، وأني قاعده علي الوضع الصامت ، رن تليفون ندى


"""""""""""""""

ندى: نعم ياوليد


وليد: خليك جنبها ياندى أني مش مروح لين تروح هيا قبل


ندى: باهي حاضر ، وسكرت


وقعدنا ساكتين ، شويه وجتني بنت تركب معاي في الباص وقتلي إنه الباص جي ، نضت وطلعت من غير ولا كلمة ماسلمتش حتي على البنات


وأني طالعة وليد مقعمز في سيارته وفاتح الروشن ويدخن ، واضح عيونه عليا طول الوقت ، خليت روحي عاديه ومابيتش إنشوفله وطلعت طول ركبت في الباص


"""""""""""""""

وليد ركبت ندى واضح معصبه من تسكيرتها لباب السياره بالقوه 


ندى: ممك قطعت علاها لما حطيت إيدي علي فمي بمعني أسكتي، وحضنتها طول ، وطول نزلو دموعي 


وليد: ريحتها علقت فيك ياكاتي


ندى قعدت تبكي حتي هيا ، بعدت من علاها ومسحت دموعي ،وولعت السياره وطلعت.



                   الفصل الرابع من هنا 

          لقراءة جميع فصول الرواية من هنا

تعليقات
×

للمزيد من الروايات زوروا قناتنا على تليجرام من هنا

زيارة القناة