رواية عذبتني الحياة الفصل الثاني 2 بقلم عائشة البشير

رواية عذبتني الحياة الفصل الثاني 2 بقلم عائشة البشير


السلام عليكم ورحمة الله وبركاته 

نضت ثاني يوم ونفس الروتين ،كان عندي إختبار محاسبة وماقريتش فيه بكل ، كنت مرهقه داخليا بشكل مش طبيعي من ضعف شخصيتي والظلم اللي قاعده نتعرضله


طلعنا وخطمنا على سحر (( صح تفكيركم كيف نخطم علاها ونرفعها بعد اللي داراته ،بس أني ديمه هكي ضعيفه ومانعدلش ونفوت في كل شي حتي لو كنت أنا الخاسره)) مابيتش نحكي معاها ولا كلمه


درنا الإختبار وكملنا الحصص وطلعنا 


ندى: تعالي يافرح نقعمزو تحت الشجرة خوي معطل شويه اليوم


أنا: لا لا بنوقف جنب الباب فكيني توا هذيكا تطلع ومانشوفهاش ، ياسر اللي صار أمس قدام البنات


ندى: باهي على راحتك بس شمس هلبا توا رأسك يوجعك


أنا: لا لا عادي ، هي باي توا


ندى: باي نتلاقوا


مشيت ووقفت في جنب الباب الرئيسي باش إنشوف سحر لما تطلع خايفه منها تطلع وتفوتني،




'' وشاء القدر '' 




رغما إني كنت منتبه ومركزه على الباب كويس بس ماشفتهاش طلعت!! ، عطلت هلبا والمدرسة بدت تفضي، قعدو بنات ينعدو على الأصابع، خفت هلبا معقولة تكون روحت وسيبتني، لا لا مستحيل مهما صار بينا ماديرش فيا عملة زي هذه ، عارفتني ماعنديش من يجيني وماعنديش حتي تلفون نكلم حد 'كنت نحكي هكي بيني وبين نفسي'




شويه وشفت بنيه كيف بتطلع من الباب ، نفسها نشوف فاها ديمه مع سحر ، خلي نسألها 


أنا: يابنيه إنتي ، مانعرفش إسمها


البنت هند: نعم يافرح 


أنا: 'حي شكلها تعرفني بس منين' تي هيا خلي نسألها ، باللهي ماشفتيش سحر وين ،من بكري نستني فاها وماطلعتش


هند: بإستغراب بس سحر روحت من بكري


أنا:بصدمة شهقت هييييي حييييي علياااا وبصوت مخنوق بالدموع كيف تروح وتسيبني، كيف بندير، بالك قاعده غير إنتي ماشفتيهاش


هند: مش عارفه عليكم ، بس لا شفتها لما طلعت وركبت في سيارة بوها ، إنروح بيك كان تبي هي تعالي


أنا: بخوف لا لا خلاص صحيتي




وقعدت نبكي 'ياربي كيف بندير أني خلاص اليوم نهايتي واللهي خوتي يقتلوني ، حتي لو قلتلهم سحر هربت عليا وسيبتني مش راح يصدقوني ، راح يشكو فيا ويقولولي أشبح وين كنتي والبنت مالقاتكش '(( ياااااااربي ساااااعدني )) رفعت عيوني شويه لقيت المدرسة شبه فاضيه والبواب يشوفلي بنظرة عجزت نفهمها ، ركبني الرعب وزدت خشيت بعضي وتخلطت عليا دموع وخناين، ومابطلتش دعوات يارب يارب ساعدني 




** عند وليد**


وليد: ' عطلت هلبا على ندى اليوم ان شاءالله غير مافضتش المدرسة ، كله من الدكتور الزفت عطل علينا، ولو كان مش المحاضره مهمه هلبا راهو واللهي ماقعدتله' أهو وصلت باهي الحمدلله شكله مازال فيه بنات ، خشيت بالسيارة من البوابه ، وإندور بعيوني على ندى ، لفت نظري بنت واقفه وحاطه إيديها على عيونها واضح إنها تبكي من هزة جسمها ، ""خيرها هذي ""، زدت قدمت القدام بالسياره وقعدو عيوني مركزات على البنت من المرايه ، جت ندى وفتحت الباب بالقوه


ندى: باهي اللي شرفت ياأفندي وينن، قطعت علاها


وليد: الناس تقول السلام عليكم كيف حالك ياوخيي مش خاشة فيا زي الحادث ياكاتي


ندى: بغضب مصطنع أسفه، بس عطلت هلبا عليا


أني : أسف سامحيني عارف روحي غالط بس واللهي دكتور نمى أهوااا عطل بالمحاضرة ومحاضرته كانت مهمه وحتي شيتات مايعطيش هالبلوه


ندى: هههه باهي خلاص سامحتك بس لازم مقابل 'بغمزه'


وليد: عارفك مصلحجيه لازم تستفيدي ، بس عادي إدللي اللي تبيه حاضر


ندى: هههههه سلم وخيي، تي هيا تحرك تي شكلك تبينا نباتو هني ولا شني


أني: لهيتيني بالدوه ياكاتي ، ورفعت عيوني للمرايه إندور على البنت اللي كانت واقفه ، بس ماهناش ، أستغفر الله وخلاص شن صارلي الزفت ، ودورت السيارة وكيف طالع جهة الباب الرئيسي ،لاحظت في حاجه في مجموعة بنات متجمعين والباين فيه بنت طايحه بينهم ، 'زعما نفسها هيا البنت' أني سارح لين عيطت ندى جنبي




ندى : واااااك لا ياااااااااربي وقف ياوليد حيييي عليا فرح، وماستنتنيش حتي نوقف طول فتحت الباب ومشت تجري وقريب طاحت على وجهها نزلت و السياره تمشي 


أني : ماأستوعبت شي كنت سارح في البنت ، وخلعتني ندى لما عيطت ، وخفت علاها ، وبعدين قالت فرح زعما نفسها البنت صاحبتها اللي ديمه إموجعتلي باها رأسي




**عند فرح**


كنت بنهبل معاش عرفت حتي نفكر ياربي شن بندير وأني في عز دموعي لحظت سيارة خشت نفس السياره متاع أول يوم بس ماقدرتش نقيم رأسي نشوف اللي فيها وبعدين مظلمه مش راح نشوف شي ' ياربي أني في شني نفكر غير خلي نلقي حل لمصيبتي قبل ' والبواب زادو نظراته ليا شكله مايطمنش بكل 




حولت من جنب الباب وخشيت داخل شويه وقفت جنب مجموعة بنات ، من الخوف والتوتر وزادوني الدموع فقدت تركيزي وفي لحظه إختل توازني وطحت لوطه، إلتمو عليا البنات ، اللي تعطي فيا ميه واللي تسأل خيرك واللي تفترش من دماغها في قصص ، أني ماكنتش معاهم بكل نفكر في موتي كيف بيكون اليوم، شوية وسمعت صوت نعرفههه كويس !!!




فرح فرح خيرك شن فيك ، قمت عيوني بفرحه أأأأخ الحمدلله يااااااربي ، ندى إنتي قاعده ماروحتيش الحمدلله الحمدلله ،' حسيتها ربي بعتهالي زي طوق النجاة '


أنا: ياندى سحر الحيوانه روحت وخلتني ، كيف هكي إدير فيا هالحقيره 


ندى: خلاص يافرح ماتبكيش عليها هالمريضه موت يرفعها


أنا: أني إنتهيت ياندى واللهي لما يقتلوني شني بنقول كيف بنتصرف مش راح يصدقوني '' أني كنت نبكي ونخبط برجليا ونرعش معا بعضي ومش منتبهه على العيون اللي مركزه عليا وتتفحص فيا بدقة''


**عند وليد**


وقفت السيارة ونزلت نلحق في ندي وين مشت ،طاح نظري على البنت نفسها اللي تبكي إمبكري ، زعما هياااااا؟؟؟ أي هيا نفس الوشاح ونفس اللبسه والسبيدرو والشنطه !!!!! ''' أكيد بتقولو كيف عرفتها ؟؟ بنقلكم صح ماشفتش وجهها بس ركزت علاها كويس وقعدت منتبه معاها في المرايه لين ركبت ندي ولهتني بالدوة ، وشتت تركيزي''' خيرها زعما ؟؟؟ هيا نفسها فرح!!! ونشوف في ندي قعمزت قدامها وتحكي معاها ، قربت جيهتهم وقعدت مركز في نفس النقطه عيونها السود اللي معبيات دموع ، شنننني هذذذذا ياااااااااربي عليك عيون ''يطيحو الطير من السمي'' على قولتهم، وقفت 


وليد: ندي ياندي خيركم شن فيه ؟؟


وليد: قامت عيونها وشبحتلي وتسللت دمعه من طرف عينها ومسحتها بكف يدها قبل لاتوصل خدها '''' أأأأخ ياربي شن صارلي شن هالملاك هذا ، زي البيبي بالزبط وقعدت سارح فيها ومعاش سمعت شي حتي ندي لما تكلمت ، وكأنه الدنيا وقفت ومافيش إلا هيااااا وأنييييي وبسسسس'''




********************************


بتعرف شعور لما تلتقي صدفه بحدا


مابيشبه حدا


لما فجأة تموت العجقه ووحدك 


بتشوفى هدى


********************************




بس لا أني كأني شايفها قبل ، حسيت ملامحها مألوفه لما ركزت فاها وخصوصا وهيا تبكي وتمسح فى دموعها ، كأنه نفس الموقف متكرر عليا من قبل


وليد: بصدمه!!!! معقوله ؟؟؟ لا أكيد لا




^^^^^^^^^^^^^^^^^^^^^^^^^^^^^^


فرح: قمت عيوني فوق لما سمعت حد ينادي على ندى !! زعما مني ؟؟ 


فرح: سمعت ندي قتله شويه ياوليد أهو جايه '' هذا خوها وليد زعمااا !!!! أي صح هيا قالت إنه خوها وليد هوا اللي يجيب فيها ويروح بيها ، بس ماشاء الله عليه ، شن هالجمال والشخصية "




هزيت على روحي أني في شني ونفكر في شني ياربي نتخلص من المصيبه اللي أني فاها توا


ندى: فرح متخافيش هذا وليد خوي ، أسمعي خلى نجيبلك تليفوني إتصلي باأمك، وناضت ندي ومشت وقفت على خوها وبعدين جابت التليفون وجت ، ومشينا تبعدنا شويه على البنات ، وخوها يمشي ورانا ، عنده حق المدرسه فاضيه خايف على أخته




^^^^^^^^^^^^^^^^^^^^^^^^^^^^^^


وليد: ناضت ندي وجت وقفت عليا ، خيرك ياندى شن فيه ؟؟


ندى: هذه فرح صاحبتي البنت اللي معاها روحت وخلتها وعارفتها ماعندها حد ولا حتي تليفون تكلم حد


وليد: معقوله هذا كله العياط والنديب على خاطر هكي ، وبعدين في مازال بنت ماعندهاش تليفون توا ،قصت عليا ندي


ندى: واااااك ياوليد منك ، البنت تخاف هلبا وخوتها متشددين ماخلوهاش إدير تليفون ، خلي نمشي إنجيب تليفوني باش تكلم أمها 


وليد: أستني هاك عطاها تليفوني، شبحتلي ندي من فوق للوطه ، تباها تتكلم من تليفونك مستحيل إديرها ، مشت للسيارة 




وأني رجعت بنظري للبنت وقفت وقعدت تنفض في حوايجها وقامت شنطتها ،معاش قدرت إنزل عيوني من علاها ، قعد نظري ثابت علاها هييي وبس 


''''' نسمع في البنات كيف يناشبو ويضحكو ويعرضو فى رواحهم عليا وكنت محط أنضارهم كلهم ، إلا هيااااا الوحيده اللي ماتلفتتش جيهتي نهائي ولا كأني واقف ، معقولة هذا كله عقل وحشمه!!! ''''




ندى: هيا يافرح خوذي كلمي أمك ومدتلي التليفون ، كان لمس وماعرفتش حتي كيف إنشده، ياندي مانقدرش أمي أكيد راح تكبر الموضوع وتقول لخوتي كلهم ، واللهي صالح يجي يقتلني إهني


ندي: باهي شوفي بوك


أنا: نفس الشي أكيد قاعد في الحوش وبيعرفو كلهم لما بنكلمه 


ندى: باهي كيف شوفي حد ثاني كلميه، ولا أسمعي شن رأيك إنروحو بيك إحني ونحطوك بعيد وقوليلهم روحت مع سحر




أنا: مش عارفه شن اللي خلاني نتلفت ونشوف لخو ندي وواضح مركز عليا هلبا ومانزلش عيونه بكل، وفيسع ماتلفتت بفزع لا لا لا مستحيل يشوفني حد واللهي نموت ، أحسن شي نشوف سالم على الأقل قاعد أهون منهم كلهم، عادي نتصل بيه من رقمك


ندي: من غير تردد ، عادي إتصلي خودي راحتك


أنا: باهي إتصلي إنتي مانعرفش نستعمله تليفونك


ندي: بابتسامة باهي هي 


قلتلها الرقم كتباته وإتصلت ومدتلي التليفون 


ندى: خوذي يرن ، شويه وجاني صوت سالم 




سالم: أيوا ألو


أنا: سالم أيوا تسمع فيا


سالم: بإستغراب مني منى إنتي


أنا: أني فرح ياسالم


سالم: فرح !!! رقم منى هذا يابنت


أنا: بنت صاحبتي غير أسمعني توا بسرعة


سالم: خيرك شن فيه إحكي! وين إنتي؟


أنا: أني قاعده في المدرسه سحر هربت عليا روحت وخلتني ، ماعرفتش مني نكلم خفت منهم في الحوش ، مافيش غيرك إنت قطع عليا سالم


سالم: ينع................ كيف قاعده لتوا في المدرسة ، وين كنتي ماشفتيش البنت لما طلعت


أنا: ببكي واللهي ياسالم في جنب الباب واقفه، هيا اللي بلعاني هربت عليا


سالم: خلاص سكري فمك ياخرااااا توا بعدين نتفاهمو شويه وجايك خليك في جنب الباب وردي بالك 


أنا: باهي ، وسكر عليا ''' ياربي سترك '''




تلفت وشفت ندي واقفه في جنب خوها والغريب إنه خوها مانزلش عينه من عليا بكل ولا قال نتحشم حتي شويه ، جيت جيهتهم ووقفت بعيد شويه وقعدت إنادي، ندى ياندى ، تلفتت ندى وجتني 


ندى: ها شن صار


أنا: قالي شويه وجاي ، بس هوا ماعنداش سياره ان شاءالله غير مايقولش لصالح، ياااااااااربي 




**عند وليد**


مشت ندي جابت التليفون وعطتهولها ، الواضح إنه البنت متوتره هلبا وخايفه أكثر من اللازم، قاعدات عيوني ثابتات علاها وماقدرتش إنزلهم ، مش بيدي ماقدرتش نفهم شن صارلي كيف سحروني عيونها بالسرعه هذى ، على قد ماشفت من بنات ماصارش معاي هكي إلا معاها هيا من أول لحظه مافهمت شي عقلي وقف عن التفكير وقلبي إمداير عرس وزفة ونوبه وهياجه مش عاديه ههههههههههه 




ماإستاقظتش على روحي إلا لما هزتني ندى


ندى: تي هيييييي خيرك وين عقلك من بكري وإني نكلم فيك


وليد: شفت جنبي لقيت ندي ، والبنت قاعدة واقفه في مكانها وتتكلم الواضح إنها رجعت تبكي، ** لالا هش ياقلبي** حطيت إيدي على قلبي محاولة مني إني إنهديه ، وتلفتت لندى ،ها ها شن قلتي 


ندى: قتلك ياناري تسخف خايفه هلبا ، ان شاءالله غير مايديرولها شي 


وليد: ان شاءالله ان شاءالله ، تلفتت وشفتها جايه جهتنا ، ''''وقلبي يرقص ياجماعه في حاله'''' وقفت بعيد شويه وقعدت تنادي في ندى ، ومشت ندى قعدت واقفه هيا وياها ، قربت شويه عليهم بحيث نسمعو بعض إذا تكلمنا




وليد: بصوت عالي نوعا ما ، ياندى تعالو قعمزو في السيارة شمس عليكم غادي


ندى: شني يافرح نقعمزو في السياره؟


فرح: لا لا خليني واقفه إهني ، ورجعت نبكي


ندى: خلاص يافرح ياسرك بكي وجعتيلي قلبي


وليد: إمالا شني تقولى علي خوك اللي تفترش قلبه مليون شقفه من بكاها ''في خاطري طبعا''


فرح: مسحت دموعي ، قالي سالم خليك جنب الباب خلي نمشو غادي


ندي: باهي هي تعالي 




وليد: مشو البنات جهة الباب وأني قعدت وراهم




فرح: باللهي قولي لخوك يركب في سيارته ، باش كان جي سالم مايشوفاش ويفهم غلط


ندي: باهي توا نقوله




وليد: شفت ندى جايه جهتي ، تكلمت بسرعه ها خيرك ياندى ماتقوليش بنروحو، على الأقل نستنو لين يجيها حد يروح بيها شوفي المدرسه كيف فاضيه


ندى: ياودي غير أسكت مانبيش إنروح ، أصلا مانقدرش إنخلاها بروحها ونروح ، بس برا أركب في السياره باش كان جي خوها مايشوفكش ويفهم غلط


وليد: باهي باهي غير بري بحداها، رجعت ندى وإني ركبت فى السياره ودرقتها شويه علي الباب




**عند فرح**


قعدت إنشوف لندى كيف واقفه جنبي وهيا الوحيده اللي ساعدتني ، وهيا ليها أقل من شهرين بس تعرفني ، 


وكيف واضح خوفها عليا وأني اللي خفت منها في البدايه إضيعني وماكنتش نبي صحبتها ولا كنت واثقه فاها '''' الناس مواقف فعلا ''''




**بعض الصداقات المميزه قد تنشأ معا غرباء بصورة مفاجئة دون أن تعرف كيف وأين بدأت بالتحديد**




تفكرت سحر اللي صاحبتي من تسعة سنين وبنت جيرانا وشبه تربينا معا بعض كيف دارت فيا وكانت مصلحجيه درجه أولي




شويه ودرست سياره قدام المدرسه ونزل منها سالم


فرح: بفرحه ندى هذا سالم أهو جي الحمدلله 


ندى: شوفي في واحد ثاني في السياره ان شاءالله مش غير خوك الواعر بس


فرح: لا لا هذا صاحب سالم


خش سالم وواضح معصب واصل حده وأني قعدت نبكي ، جاني لقاني نبكي إضبطني طول ، ندى تبعدت شويه وواضح رن تليفونها وقعدت تحكي 


سالم: خلاص أسكتي أهو جيت ياأم دميعات




وليد: في السيارة منو هذا زعما.....،،،طول رنيت علي ندي ، طول أول مافتحت ، أني: مني هذا اللي إضبطاته


ندى: ها ياوليد خوها خوها


وليد: ومني اللي في السيارة 


ندى: صاحب خوها ، هي شويه وجايه سكر هي


فرح: طلقت سالم ومسحت دموعي ، 


سالم: هيا أطلعي ولا عجباتك الوقفة


فرح: ههههههه لا لا خلي نكلم صاحبتي ونجيك هي


وليد: شفتها طلقاته باهي ''وأخيرا طيب فيك ياحنه'' ومسحت دموعها وقعدت تضحك '''أخ ياقلبي ماسلمتش من دموعها يبال الضحكه شن بدير فيك'''


فرح: ندي شكرا صحيتي بارك الله فيك مش عارفه شن إنقولك


ندى: ماتقولي شي ياهبله إحني صاحبات ولا شن رأيك


فرح: أكيد وأحلي صحبه ، هي سلام وطلعت ركبت وراء سالم ، قلت السلام عليكم ورد صاحبه وعليكم السلام ومشي


حطيت رأسي على المرش وعقلي يخمم في هلبا حاجات




^^^^^^^^^^^^^^^^^^^^^^^^^^^^^


وليد: جت ندي ركبت بعد ماطلعت صاحبتها ، لقتني سارح في البوابة الرئيسيه اللي طلعت منها البنت وكأني نلمح في خيالها


ندى: وليد وليد


وليد: تلفتت لندى وأني عارفها شن بتقول ، أكيد لاحظت عليا لأنه كل شي درته مفضوح، أسمعي ياندى ولا كلمه لو سمحتي مش مستعد نحكى ولا شي ، سكتت ندى لين وصلنا للحوش وكل واحد مشي لداره




^^^^^^^^^^^^^^^^^^^^^^^^^^^^^^^


فرح: تلفتت لما درست السياره ، وشفت هذا مش حوشنا ، نزل الولد وعطي المفتاح لسالم ، ركب سالم مكان السواق وقالي إنزلي أركبي من قدام 


ركبت 


سالم: مش لازم حد يعرف اللي صار فكينا من خوتك


فرح: باهي كان قالولي وين كنتي شن بنقول 


سالم: توا نقلهم أني خطمت عليك من بكري ورفعتك معاي توازيلي حوايج ، وإمبكري لما كلمتيني إتصلت بيهم ولقيتهم مشغوليين عليك قتلهم إنك معاي شويه وجايين


فرح: أهه هذا وين إرتحت شويه سلم وخيي ، بس صالح مستحيل يفوتها على خير ، وباهي اللي جلال في الصحراء كان هذا وين بنصبح 


سالم: ههههههه ياخوافه مادوريهمش خليهم عليا، بس لينا تقعميزه تفهميني الموضوع ، هي إنزلي 


فرح: باهي حاضر نزلنا ومن حظي النحس طبعا خشينا من باب الحوش تلاقينا إحني وصالح وزينب شادة بنتها في الفرانده كيف راقيين لشقتهم 


صالح: وين كنتي يافرخه لتوا ، وجاي جيهتي ورافع إيده بيضرب ، وهذيكا واقفه تضحك الحيوانه


سالم: جي وقف قدامي كانت معاي ياصالح، أني اللي رفعتها توازيلي شوية حاجات


زينب: وأنت كيف ترفع أختك وإدخلها لمحلات شباب، صالح يشبح بغضب وشكله يستني في الرد من سالم 


سالم: لا مادخلتهاش نجيبلها في السياره وهيا توازيلي ، وبعدين بوي عنده علم بالموضوع وهوا راضي خلاص إنتهي الموضوع


زينب تشبح بغل ومش عاجبها الكلام، كانت تبي صالح يضربني بأي طريقه بس ماحالفهاش الحظ ، تلفت صالح وركب ومشت هيا وراه زي اللفعه 


خشيت أنا وسالم ولقينا ماما وبابا ونعمه مقعمزين في الحوش على عالة الشاهي ، سألونا وجاوبنا نفس الشي اللي تفاهمنا عليه، فاتت القصه على خير وأني مش مصدقه حاسه روحي في حلم ، توقعت يقتلوني خلاص بس الحمدلله، 




وفاتو يومين العطله( الجمعة والسبت)




( طبعا كلمتني ندى على تلفون ماما تطمن عليا قلتلها لا الحمدلله فاتت على خير وتوا نهدرزو الأحد في المدرسه ، ماكنتش نعرف أنه زينب سمعتني وشكت في الوضع) 




^^^^^^^^^^^^^^^^^^^^^^^^^^^^^^


يوم السبت في الليل، جاني سالم في الدار وحكيتله كل شي داراته سحر ، والحمدلله صدقني وقالي معاش إتكلماها ولاتجي من جنبها ،


سالم: أصلا البنت مش عاجبتني من الأول


فرح: حسبي الله ونعم الوكيل ، بس مني بيروح بيا؟


سالم: لا خلاص كلمت بوي في واحد خو صاحبي إمداير باص بيرفعك ويجيبك من غذوه وأني متكفل بحقه وبوي قال باهي


فرح: بفرحه باهي كويس بكل ، صحيت سلم وخيي، أطلب وإدلل إنديرلك اللي تبيه


سالم: ههههههه هذا وين بنستفيدو منك بيبدأ الاستغلال على أصوله شدي روحك ، إمالا غذوه نبي بسبوسه


فرح: حاضر تروح غدوه تلقاها واتيه 


نضت صليت ركعتين شكر لله اللي فات كل شي على خير (ماكنتش نعلم على قاعد يستني فيا)




^^^^^^^^^^^^^^^^^^^^^^^^^^^^


نضت نغسل في ماعيين العشي وكيف عقلي سرح في خو ندي ونظراته ليا ، ومانسمع إلا العياط والتقربيع ، وصالح يعيط ويلعلع وينها الكلبه واللهي لما نقتلها، دار حوسة في الحوش




شويه وإنفتح باب المطبخ ،كان صالح واضح عيونه حمر ومعصب لين واصل حده، شحني من شعري وطاح فيا رفس على سبان ، بوي وأمي وسالم ونعمه يشحو فيه وماقدروه هالوحش وإني تحته زي النمله، لين دهش وفشل باش شحوه من عليا وقدرت نهرب وشحتني نعمه وطلعتني وأني مدقدقه ونعكز علي رجلي وعيني مش قادره نفتحها ، طلعت وسط الحوش ولقيت زينب واقفة وتضحك وتشوفلي بهزوه، عرفت إهني إنها هيا السبب هالفتانه 


نعمه: حسبي الله ونعم الوكيل، ودخلتني للدار وسكرت عليا بالمفتاح


زينب: شن قصدك يانعمه !! تلحقي عليا ؟؟ 


نعمه مابتش ترد علاها، سيبتها وطلعت للجنان


إني تلوحت على السرير وحاسه روحي مدقدقه ومافيش ولا عظمه صحيحه الوجع في كل مكان 


آآآآآآه ياربي تعبت من الظلم ومن هالعيشه السوده ، هذي مش أول مره نأخذ طريحه من صالح، وزينب هيا السبب هالفتانه




في الحوش بعد ماهدي صالح شويه


بابا: إنت وين تحساب روحك بتقتل أختك وماتحشمتش لا مني ولا من أمك 


صالح: إمالا شني إنخلوها ماشيه على حل شعرها هالحيوانه هذى 


بابا: وشن فيه ان شاءالله شن شفت من أختك 


صالح: أهي زينب توا تحكيلك شن قالت علاها البنت اللي تروح هيا وياها


زينب: فكني ياصالح توا غير بيقولو عليا فتانه وندور في الشر


سالم: بالشويه لنعمه علاش هيا عندها خدمة ثانيه غير الفتنه والشر


نعمه: أسكت فكنا منهم توا يسمعوك


بابا: احكي يازينب شن فيه


زينب: توا كلمتني غاده صاحبتي اللي في المدرسة أخت سحر صاحبة فرح ، وإستغربت فاها تسأل فيا غادة: شني يازينب أمتي روحت حماتك يوم الخميس


زينب: علاش تسألي


غادة: لا غير أختي سحر قالت قلبت علاها المدرسه ومالقيتها أشبح معا مني طالعه وقعدت تستني فاها لين إعييت وبعدين روحت، وخافت تمشي تقول لأهلها يضربوها ولا يديرولها حاجه


زينب: بس أني ياعمي كذبتها وتعاركت معاها وقتلها كيف تقولي هكي وفرح روح باها سالم على الوقت بالزبط وسمعني صالح ، وقالي ياتقولى شن فيه والا معاذ تقعديلي في حوش خفت وقتله وإلا أني قبل مانبيش إنقول مانحبش تصير مشاكل بسببي


(طبعا كله كذب هيا لما سمعتني نحكى معا ندى شكت في الموضوع ومشت أتصلت بي غادة وقعدت تقصقص في سحر ، وهذيكا الكلبه ماصدقت زادت كذبت وكبرت الموضوع)




سالم: لا كذب مش هكي الموضوع يابوي


صالح: بغضب كيف تكذب فينا ياكلب


سالم: ماباش يرد عليه ، وقال لبوي أني توا نقوللكم اللي صار


صالح: سكر فمك ياحيوان أصلا مافسدتها إلا أنت ديمه إدافع علاها وتغطي على مصايبها


بابا: خلاص ياصالح أسكت خلي نسمعو خوك زي ماسمعناك 


سالم: بدي يحكي في القصه اللي حكيتهاله أني ، وهذا اللي صار يابوي ،وهذيكا البنت مش مزبوطه واحده فتانه هيا وهلبا ناس وشبح لزينب على جنب


زينب حطت عيونها لوطة طول، وكيف بيتكلم صالح سكته بابا 


بابا: أني مصدق اللي قاله سالم وبعدين هذى بنتي وأني عارف شن إمربي ، وبعدين أنت ديمه إدم فيهم عيلة( فلاااان) ومش عاجبينك ، وتمشي توا تصدقهم وتكذب أختك، صالح حط عيونه لوطه ومعاش تكلم


بابا: مره ثانيه رد بالك تقرب خواتك أو تمد يدك عليهم أني المسؤول في الحوش ،أي شي تسمعه، تقولي قبل وأني نتصرف، فاهم ولا لا




صالح ناض ومش عاجبه الكلام وطلع من غير مايقول حتي كلمه وناضت اللفعه لحقاته تجري


ماما طبعا ولا كأنها موجوده ديمه سلبيه ومستحيل تتكلم معا صالح وجلال




بابا: نوضي يانعمه شوفي أختك


ناضت نعمه فتحت الباب وخشت هيا وسالم ،قعدت تنظفلي في وجهي بالمعقم ودارتلي لصقه على عيني ، ولفلى سالم رجلى بالفاشه ، وأني نبكي في حالة وشي قالو دموعي يوقفو


سالم: ياسر بكي عاد زودتيها راهو


فرح: شن هوا اللي زودتها ماتشبحش فيا كيف كسرني تكسير


سالم: ههههههههه من زيك نشطولك الدوره الدمويه


فرح: ضحكت ههههه سالم كان يحاول يغيرلي جوي بأي طريقه ، كيف بنمشي غذوه للمدرسه وأني هكي وعندي إختبار 


سالم: عادي بري وقولي درت حادث وتوا أني نرفعك ونروح بيك الإسبوع هذا


فرح: أأخ ياربي حسبي الله ونعم الوكيل 


سالم: خلاص هيا أرقدي وإرتاحي توا ، تصبحي على خير ، وطلع وطفي الضي


فرح: ياربي شني درت فى عمري باش يصيرلي هكي خاطري نكون ولو مره قويه وندافع على روحي قدامهم، بس للأسف😔 ديمه نسكت ويغلبوني دموعي




^^^^^^^^^^^^^^^^^^^^^^^^^^^^^^^


**عند وليد**


طلعت معا صحابي للإستراحة من لما روحت بندى يوم الخميس، ومروحين الليله موخر شويه، ندمت إني مشيت الشباب مابطلوش تسهويك وتلقيح عليا


( الحق كنت زي المسطول طول الوقت مش قادر إنطلعها من بالي نهائي ، طيفها مافارقنيش ولا لحظه ، غير شن دارت فيا هالفرح) كنت بنموت ونعرف شن صار معاها ، ان شاءالله غير مافيش حد دارلها حاجه، كنت نبي نتصل بندى ونسألها شن صار فاها ، بس شاد روحي بالسيف ، مانبيش ندى تشد عليا حاجه معاش تبطل بعدين وأصلا هيا شكت فيا ومانبيش إنزيد إنأكدلها شكوكها ، خلي نصبر وخلاص أكيد راح تقولى بروحها لو في حاجه




###يوم جديد الصبح 


وليد: نزلت بكري ولعت السياره وقعدت مقعمز فاها ، ماخاطريش إنشوف حد ، إمروح متأخر إمبارح ومرقدتش كويس نفكر في البنت شن صار فاها ، شفت الساعه ، معاش وقت شديت التليفون ورنيت على ندى ، ردت من أول رنه هذى عادتها


ندى: وهيا تفطر رن تلفونها بأغنية أجنبية صاخبه 


خليفة: بغضب شن هالبلي من الصبح


تركيه: ماهو قتلك غيراها هالنغمه 


ندى: ردت طول على التليفون بدون ماتعبر لابوها ولاأمها ، بلهفه وليد صباح الورد تي وين وينك من يوم الخميس إختفيت 


وليد: بالشويه عليك ديمة إنقولك معاش تخشي فيا زي الحادث، خليك سلو ياكاتي تعلمي من الناس الراقيه ههههه


ندى: ههههههههههه بصوت عالي ومزعج على الصبح


خليفة: عطاها نظرة خلاها تيبس في مكانها


وليد: أولا صباح الورد ياكتي ، وثانيا كنت معا الأولاد في الإستراحه، وثالثا والأهم هيا أطلعي برا نستني فيك معاش وقت على مدرستك


ندى: ناضت بسرعه وسكرت التليفون من غير ماترد وطلعت تجري ، خلت أمها وبوها بيتفجرو من حركاتها الطايشه والمزعجه




ندى: طلعت ولقيت وليد في السياره وحاط رأسه على الدومان ، ركبت بدون صوت 


وليد: رفعت رأسي وشفت لندى غريبه ركبت وهيا ساكته (مصدوم بصراحه)


ندي: ماتشبحليش هكي عارفه كل شي غير مانبيش نتكلم لاحظت راهو من يوم الخميس وقتلي توا نحكو وهربت مني ، لأمتي بتهرب سيورك بتجي وتحكيلي بروحك


وليد: ههههههه أحلي حاجه فيك إنك فاهمتيني، ودورت السيارة وطلعت ، ماقدرتش نمنع نفسي من السؤال ، ندى شن صار في صاحبتك !!! أن شاء الله غير ماصارلها شي


ندى: شافتلى بنظرة متاع أهو بديت تفضح في روحك ، كلمتها وقالت الحمدلله فاتت على خير 


وليد: أها باهي كويس ''''' مش عارفه شن اللي خلاني إنحس إنها صارتلها حاجه ''''' وصلت ندى للمدرسة وكنت نتمني إنشوفها بس شني الحجة اللي بنخترعها قدام ندى ، أحسن شي نسيطر على روحي شويه خيرني أني شن صارلي معقوله شفتها بس ربع ساعة هكي دارت فيا ، دورت وإتجهت لجامعتي..



                    الفصل الثالث من هنا 

           لقراءة جميع فصول الرواية من هنا

تعليقات
×

للمزيد من الروايات زوروا قناتنا على تليجرام من هنا

زيارة القناة