رواية غالية سيدة قلب يونس الفصل الواحد والعشرون 21 ج2 بقلم نسرين


رواية غالية سيدة قلب يونس الفصل الواحد والعشرون 21 ج2 بقلم نسرين


ما إن دخل الرجال إلى مكتب الحاج نعمان، حتى التفتت نعمة ناحية سمر، وكانت عينيها بتطلع شرار من شدة الغضب. مسكتها من دراعها بعنف، وجرّتها وراها ناحية أوضتها، وسمر ماشية معاها وهي بتبص حواليها بخوف، مش عارفة أمها ناوية تعمل فيها إيه بعد الفضيحة اللي حصلت.

أول ما دخلوا الأوضة، نعمة قفلت الباب وراهم جامد، لدرجة إن سمر اتنفضت من مكانها. وبحركة عنيفة، زقتها على السرير، ووقفت قدامها وهي بتبصلها بنظرات تخوّف:

ـ «قوليلي يا بت.. إيه اللي جاب رجب لحد عندك؟!»

سمر بلعت ريقها، وحاولت تتكلم، لكن نعمة قربت منها وهي بتقول بصوت مخيف:

ـ «والكلام اللي اتقال تحت ده صح ولا لأ؟! ردي عليا يا بت! ولا عايزاني أموتك وأفطسك بإيديا دول؟!»

سمر رفعت إيديها قدامها بخوف، وقالت بسرعة:

ـ «والله يا أمه ما حصل حاجة من اللي في بالك! أنا كنت قاعدة في أوضتي، ولقيت حد بيخبط على الباب، قمت أفتح، لقيت رجب واقف قدامي، وأول ما دخل حط إيده على بُقي عشان ما أصرخش.»

نعمة ضيقت عينيها، وقالت بشك:

ـ «وبعدين؟! كمّلي، أنا سامعاكي.»

ـ «قال لي إنه عايزنا نتفق على خطة نوقع بيها غالية ويونس. هو كان عايز غالية، وأنا كنت عايزة يونس، وكل واحد فينا كان فاكر إن التاني ممكن يساعده يوصل للي هو عايزه.»

ـ «وبعدين يا روح أمك؟!»

ـ «قعدت أسأله عن الخطة، وأقوله هي إيه، وهنعمل إيه بالظبط، لكنه ما كانش راضي يقول لي. كل شوية يقولي: هقولك في الوقت المناسب.»

سمر مسحت دموعها، وكملت وهي بتحاول تبرر لنفسها:

ـ «وأنا اتعصبت منه، وقلت له أنا مش عايزة أبقى زي كيس الجوافة معاك! كل ما أسألك عن حاجة تقولي في الوقت المناسب! أنا عايزة أعرف إحنا هنعمل إيه!»

نعمة عقدت دراعاتها قدام صدرها، وقالت بحدة:

ـ «وبعدين؟! هو إنتِ كنتِ هتاكلي بعض عشان مش راضي يقولك الخطة؟!»

سمر هزت راسها، وبدأت نبرة صوتها تعلى من الغيظ وهي بتفتكر اللي حصل:

ـ «هو اللي استفزني يا أمه! فضل يقولي إن يونس عمره ما هيحبني، وإن غالية اللي كانت خدامة بقت ست الدار، وإن أنا عمري ما هبقى في مكانها مهما عملت!»

عينيها دمعت أكتر، وقالت بقهر:

ـ «والله يا أمه الكلام وجعني، وما استحملتش! قمت رايحة أضربه، لكنه مسك إيدي، وفجأة لقينا نفسنا وقعنا على السرير. وبعدها الباب اتفتح ودخلوا علينا كلهم في الوضع ده!»

خلصت كلامها، وفضلت باصة لأمها بترقب، مستنية تشوف هتصدقها ولا لأ.

نعمة فضلت ساكتة ثواني، بتبصلها من فوق لتحت، وبعدها ضحكت ضحكة قصيرة كلها غيظ، وقالت:

ـ «حسبي الله ونعم الوكيل فيكي يا شيخة!»

سمر بصتلها بخضة:

ـ «ليه بس يا أمه؟! والله أنا ما عملتش حاجة!»

نعمة رفعت إيدها في وشها وقالت بانفعال:

ـ «كل ما أعمل مخطط، وكل ما أرتب لحاجة، تيجي إنتِ تبوظيها لي! طب أعمل فيكي إيه دلوقتي؟! حرقتيلي كل فرصة بإيدك! بدل ما نطلع من اللي إحنا فيه بحاجة، فضحتينا قدام البلد كلها!»

قربت منها، وانحنت ناحيتها وهي بتقول من بين سنانها:

ـ «أموتك وأشرب من دمك عشان أخلص منك؟! إنتِ غلبتيني يا سمر، غلبتيني!»

سمر رجعت بضهرها لورا، وهي بتترجاها:

ـ «والله يا أمه غصب عني، هو اللي استفزني!»

نعمة استقامت في وقفتها، وبصتلها بغل، وبعدها أشارت بإصبعها ناحية السرير:

ـ «اسمعيني زين يا بت! إنتِ هتفضلي هنا، ما تطلعيش من أوضتك دي إلا لما أجيلك بنفسي. سامعة؟! لا عايزة أشوف وشك، ولا عايزة أسمع صوتك، لحد ما أشوف هنعمل إيه في المصيبة اللي إنتِ حطيتينا فيها!»

ـ «حاضر يا أمه.»

ـ «حاضر دي خليها تنفعك!»

لفت نعمة ناحية الباب، وفتحته بعنف، وخرجت وهي بتخبط الباب وراها، لدرجة إن سمر غمضت عينيها من الخضة. فضلت سمر قاعدة على السرير، حاطة إيديها على وشها، ودموعها بتنزل وهي بتهمس بحقد:

ـ «كله بسبب غالية... من يوم ما دخلت حياتنا، وأنا مش شايفة يوم عدل!»

لكنها ما كانتش تعرف إن المصيبة اللي وقعت فيها المرة دي، ممكن تكون بداية نهايتها، مش مجرد عقاب من أمها.

وفي أوضة رجب...

كان رجب ممدد على سريره، جسمه كله واجعه من الضرب اللي أخده، ووشه عليه علامات الإرهاق والغضب. كان بيحاول يغيّر وضعه، لكن كل حركة كانت بتزود وجعه.

في اللحظة دي، الباب اتفتح بعنف، ودخلت وصال وهي مش على بعضها من القلق والعصبية:

ـ «إيه اللي حصل يا رجب؟!»

رجب ما ردش، وفضل باصص للسقف كأنه مش سامعها. وصال قربت من السرير، وقالت بصوت أعلى:

ـ «أنا بكلمك يا واد! إنت صح رحت لسمر وقعدت معاها، والكلام اللي الرجالة قالوه تحت ده صح؟! رد عليا!»

فضل ساكت، ووشه متجهم. وصال هزته من كتفه وقالت:

ـ «رد عليا وكلمني يا واد إنت! هو أنا بكلم الحيطة؟! ما ترد عليا بدل ما أنا هتجنن منك!»

رجب اتنفض من مكانه، واتأوه من الوجع، وبعدها زعق فيها:

ـ «بقولك يا أمه، ملّيني! أنا مش ناقص! شايفاني قادر أتكلم؟! جسمي كله واجعني، وإنتِ جاية فوق دماغي تحقيق وأسئلة! همليني لحالي، واخرجي برّه!»

وصال اتسمرت مكانها من زعيقه، وبصت له بصدمة، وكأنها مش مصدقة إن ابنها اللي خايفة عليه وداخلة تطمن عليه، بيطردها بالشكل ده. سكتت لحظة، وبعدها هزت راسها وهي بتحاول تمنع دموعها من النزول:

ـ «ماشي... ماشي يا ابن بطني.»

قربت من الباب، لكنها وقفت قبل ما تخرج، وبصت له بوجع وقالت:

ـ «أنا اللي غلطانة إني جاية أطمن عليك! بس ماشي يا رجب، ربنا يهديك لنفسك.»

خرجت وقفلت الباب وراها، وهي حاسة إن اللي حصل لابنها مش بس ضربة في جسمه، دي ضربة لكبريائه كمان، وهو بدل ما يعترف بغلطه، اختار يطلع غضبه عليها.

وفي أوضة روية...

كانت روية نايمة على سريرها، بتحاول تهرب من دوشة البيت والمشاكل اللي ما بتخلصش. لكن الهدوء ما استمرش كتير، لأن الباب اتفتح بعنف، ودخلت وصال من غير حتى ما تخبط. روية اتفزعت وقامت قاعدة بسرعة، وبصتلها بقلق:

ـ «وه! فيه إيه يا أمه؟! داخلة كده ليه؟!»

وصال بصتلها من فوق لتحت، وقالت بسخرية:

ـ «ما شاء الله عليكي يا أختي! نايمة ولا همك اللي حصل في أخوكي تحت؟! ولا اللي عملوه فيه؟! ده إنتِ قاعدة كأن المصيبة ما حصلتش!»

روية اعتدلت في قعدتها، وبصتلها بهدوء غريب بالنسبة لوصال، وقالت:

ـ «وعملوا فيه إيه يعني يا أمه؟! هو غلط، وبيأخد جزاءه، هو وسمر.»

وش وصال اتقلب، وفي لحظة كانت واقفة جنب السرير، ماسكة روية من دراعها جامد:

ـ «جرى إيه يا بت إنتِ؟! مالك كده؟! ما تظبطي نفسك شوية! مالوية علينا ليه؟! إيه اللي حصل لك؟! هو إنتِ نسيتي إن ده أخوكي؟!»

روية اتوجعت من مسكتها، وحاولت تفك دراعها، وقالت بنبرة بدأت تبان فيها كل السنين اللي سكتت فيها:

ـ «سيبي دراعي يا أمه، إنتِ بتوجعيني!»

وصال زودت ضغط إيديها، وقالت بحدة:

ـ «ما تردي عليا الأول! إيه اللي جرالك؟! هو إنتِ خلاص حنيتي عليهم وبقيتي واحدة منهم؟! أنا عديت اللي حصل بمزاجي، وسيبتك تقفي جنب غالية بمزاجي، لكن واضح إنك فهمتيها غلط!»

روية بصتلها، وعينيها لمعت بدموع محبوسة، لكنها المرة دي ما نزلتش راسها:

ـ «بمزاجك؟! هو أنا طول عمري كل حاجة في حياتي بمزاجك إنتِ؟! حتى لما أسكت وأستحمل، يبقى بمزاجك، ولما أتكلم يبقى برضه لازم بمزاجك؟!»

وصال قربت منها بوش متجهم:

ـ «إنتِ بتقولي إيه يا بت؟! هو مين اللي حشّى دماغك بالكلام ده؟!»

روية هزت راسها بحزن، وقالت:

ـ «محدش يا أمه، محدش حشّى دماغي بحاجة. أنا بس فوقت، وبقيت شايفة نفسي كويس أوي.»

اتنهدت، ومسحت دمعة هربت من عينها، وبعدها قالت:

ـ «إنتِ طول عمرك تعيريني، وتقوليلي يا ريتك ما خلفتيني، وتعايريني بشكلي، وتقوليلي يا صمرة يا ليفة محروقة! كل كلمة من دول كانت بتوجعني، بس كنت بسكت وأقول لنفسي دي أمي، مهما عملت فيا، دي أمي.»

صوتها اتهز للحظة، لكنها تماسكت وكملت:

ـ «لكن كفاية يا أمه! أنا مش هفضل طول عمري أستنى منك كلمة حلوة، ولا هفضل أحاول أرضيكي على حساب نفسي. أنا عرفت قيمتي، ومش هسمح لحد يقلل مني تاني، حتى لو كان أقرب الناس ليا.»

وصال بصتلها بذهول، وبعدها قالت بانفعال:

ـ «جرى إيه يا بت؟! إنتِ اتجننتي ولا إيه؟! مين اللي قلبك عليا بالشكل ده؟!»

روية ردت من غير تردد:

ـ «محدش يا أمه. أنا كل اللي حصل إني بس فُقت، مش أكتر.»

سكتت لحظة، وبعدها بصتلها مباشرة وقالت:

ـ «ولو على أخويا، فأيوه، هو يستاهل اللي حصل له. أنا شفته بعيني وهو داخل أوضة سمر بالليل، وما رضيتش أتكلم عشان ما تحصلش مشاكل في البيت. قلت يمكن ربنا يهديه، ويمكن يرجع عن اللي في دماغه.»

هزت راسها بأسى، وكملت:

ـ «لكن سبحان الله، كلهم عرفوا، والحقيقة ظهرت من غير ما أنا أتكلم. ودلوقتي هو بياخد جزاءه، وبدل ما يفكر في غلطه، قاعد يزعق فيكي إنتِ كمان!»

وصال فتحت بقها عشان ترد، لكن روية سبقتها وقالت:

ـ «أنا مش فرحانة في أخويا يا أمه، والله ما فرحانة. بس مش معنى إنه أخويا إني أقول له الغلط صح، ولا أقف معاه وهو بيظلم الناس. أنا تعبت من كتر ما كل واحد في البيت ده عايزني أبقى نسخة منه، ومحدش فيكم سألني أنا عايزة إيه!»

وصال سابتها لحظة من المفاجأة، لكن بعدها رفعت إيدها مهددة:

ـ «والله العظيم يا روية، لو ما تظبطي نفسك لأصدقيني هظبطك! وإنتِ عارفاني زين، وعارفة أنا أقدر أعمل إيه! فاهمة يا بت إنتِ؟!»

روية بصتلها، ورغم الخوف اللي كان مستخبي جواها، ردت بصوت هادي:

ـ «فاهمة يا أمه... فاهمة زين.»

وصال استنت منها إنها ترجع في كلامها، أو تعتذر، أو حتى تنزل عينيها زي كل مرة، لكن روية فضلت ثابتة مكانها، وما قالتش كلمة تانية.. وده كان أكتر شيء استفز وصال. لفت ناحية الباب وهي بتقول بغضب:

ـ «الأيام بينا يا روية، والأيام هتبيّن مين اللي هيكسب في الآخر!»

وخرجت وقفلت الباب وراها بعنف.

روية فضلت قاعدة على السرير، بتبص للباب المقفول، ودموعها بدأت تنزل في صمت. ما كانتش فرحانة إنها واجهت أمها، ولا كانت حاسة إنها انتصرت، لكنها لأول مرة من سنين طويلة حسّت إنها قالت اللي جواها من غير ما تعتذر عن وجعها.

داخل مكتب الحاج نعمان...

كان الحاج نعمان قاعد ورا مكتبه، بينما يونس ومنصور قاعدين قدامه، وعلى الكنبة المقابلة قعد عبد الرحيم وعبد الحميد، أما حمزة فكان قاعد على واحدة من الكنب الجانبية. يونس هو اللي أصرّ إن أبوه يقعد مكانه ورا المكتب، احترامًا لمكانته وقدره.

الحاج نعمان أخد نفسًا طويلًا، وبص للحاضرين، وبعدها قال بنبرة جادة:

ـ «دلوقتي يا جماعة، اللي حصل حصل، وسواء بنتك يا عم عبد الرحيم، ولا ولدك يا عبد الحميد، الاتنين غلطوا، والموضوع لازم نتصرف فيه قبل ما يكبر أكتر من كده. أنا شايف إننا نجوزهم ونستر على اللي حصل، بدل ما الحكاية تنتشر في النجْع كله، خصوصًا إن الأيام الجاية كلها هتبقى حركة في الدار بسبب الفرح والتجهيزات.. ولا إيه رأيك يا يونس؟»

يونس بص لجده، وبعدها رد:

ـ «والله يا جدي، أنا شايف إننا لازم نتكلم مع رجب وسمر الأول، وأفهم إيه اللي حصل بينهم، وإيه اللي جمعهم من الأساس.»

منصور بص له بضيق وقال:

ـ «لسه هنتكلم يا يونس؟! خلاص يا أخوي، اللي حصل حصل، ومش ناقصين نفتح أبواب إحنا في غنى عنها. الأحسن نخلص الموضوع ده بدل ما الناس تفضل تتكلم.»

يونس رد بهدوء:

ـ «اهدى يا منصور، أنا مش بقول إني هسيب الموضوع، بس عايز أفهم. رجب وسمر عمرهم ما كانوا بيطيقوا بعض، إيه اللي جمعهم فجأة؟»

حمزة هز راسه موافقًا وقال:

ـ «عندك حق يا يونس، بس الأهم دلوقتي إننا نتصرف في اللي حصل النهارده، والحمد لله إن الناس كانت مشيت قبل ما الموضوع يكبر.»

يونس التفت ناحية عبد الرحيم وقال:

ـ «إيه رأيك يا عم عبد الرحيم؟»

عبد الرحيم اتنهد، وقال:

ـ «شوف يا ولدي، أنا سايبلك الأمر ده كله. إنت أدرى بمصلحة الدار، واللي تشوفه اعمله. عايز تجوزهم، جوّزهم، وعايز تتصرف بطريقة تانية، إنت حر.»

يونس حوّل نظره لعبد الحميد، فقال الأخير:

ـ «وأنا كمان يا ولدي، اللي تشوفه أنا موافق عليه، وإحنا واثقين في حكمك.»

يونس سكت لحظة يفكر، وبعدها قال:

ـ «بصوا يا جماعة، إحنا أنا ومنصور فرحنا قرب، والدار كلها مشغولة بالتجهيزات، وأنا مش عايز أي حاجة تحصل تخلي حد يتكلم علينا، ولا عايز فرحتنا تتحول لسيرة على لسان الناس في النجْع كله.»

وبص لعبد الرحيم، وكمل:

ـ «يا عم عبد الرحيم، إنت عارف اللي حصل النهارده في الفرح، وعارف إن سمر اتكلمت على غالية قدام الناس، وقالت كلام ممكن يفتح علينا أبواب إحنا مش ناقصينها. وأنا مش عايز حد يربط بين اللي حصل النهارده وبين جواز رجب وسمر.»

أخد نفسًا، وبعدها قال بحسم:

ـ «عشان كده، أنا شايف إننا نجيب المأذون بكرة بالليل، بعد العشاء، ونكتب كتاب رجب وسمر في هدوء، من غير ما حد من برّه الدار يعرف. وبعد ما نخلص فرحنا أنا ومنصور على خير، نبقى نعلن جوازهم قدام الناس. كده نكون سترنا عليهم، وفي نفس الوقت ما فتحناش باب لكلام الناس.»

حمزة أومأ برأسه موافقًا، والحاج نعمان وافق، وكذلك عبد الرحيم وعبد الحميد. منصور بص ليونس وقال:

ـ «أنا موافق يا أخوي، بس عندي طلب واحد.. محدش يتكلم مع رجب وسمر كتير، وعايزك إنت اللي تتكلم معاهم وتشوف إيه اللي حصل بينهم بالظبط.»

يونس هز راسه بجدية:

ـ «وده اللي أنا ناوي أعمله.»

بعد ما خلص الاجتماع، طلع كل واحد على أوضته. الحاج نعمان دخل جناحه، فلقى غالية وزينب قاعدين مع الحاجة صفية. أول ما شافوه، وقفوا وقالوا:

ـ «السلام عليكم يا عمي.»

رد الحاج نعمان بابتسامة دافئة:

ـ «وعليكم السلام يا بناتي.. قاعدين لغاية دلوقتي؟»

قالت غالية:

ـ «أصلنا كنا قاعدين نطمن.. عمي جه أهو يا خالتي صفية، نقوم أنا وزينب بقى عشان نروح ننام.»

وقفها نعمان وهو بيضحك:

ـ «وه! هاتوها لي كده يا بنتي.. أول ما دخلت عايزة تهربي؟! خليكم قاعدين وياي شوية.»

اعتذرت غالية برقة:

ـ «معلش يا عمي، حقك عليا، بس اليوم كان طويل وصعب قوي، وإنت كمان لازم ترتاح.»

بص لها نعمان بإعجاب وابتسم بحنان، ثم التفت لزينب وقال:

ـ «مش عايز الحزن النهارده يكسر فرحتكم يا بنات، واني هعوضكم إن شاء الله، وعندي ليكم هدايا مجهزة.»

نطت زينب بلهفة:

ـ «بجد يا أبوي؟! طب فين هي الهدايا؟»

ضحك الحاج نعمان على طريقتها:

ـ «يا بت، إنتِ على طول نطّالي كده؟! ما تقلقيش، هديها لك، بس مش النهارده.»

قالت زينب بمزاح ودلع:

ـ «يعني لسه هتخليني أستنى يا أبوي؟! طب بتقول لي عليها ليه دلوقتي؟! ده قلبي هيوقف من الشوق!»

ضحك عليها نعمان بصوته كله:

ـ «ههه.. اجري، اجري روحي يلا ناموا، عشان وراكم الأيام الجاية تحضيرات كتير.»

قربت غالية وزينب وباسوا راسه بحب، وقالوا:

ـ «تصبح على خير يا عمي/يا أبوي.»

وطلعوا.

بعد ما طلعوا، بصت صفية لجوزها وقالت بقلق:

ـ «ها يا حاج نعمان.. عملتوا إيه؟»

اتنهد نعمان وقال:

ـ «والله يا صفية.. قررنا نكتب كتابهم بكرة بالليل في السر، ومن غير ما حد يعرف. وبعد ما نعمل فرح يونس ومنصور، نبقى نعلن جوازهم عشان الناس ما تقولش حاجة.. سمر كانت لسه طاعنة في شرف غالية وعشان بتحب يونس، فما ينفعش تاني يوم نقول إنهم اتجوزوا، هيقولوا أكيد فيه إنّ، وإحنا مش عايزين كتر حديث.»

هزت صفية راسها بموافقة:

ـ «والله عملتوا عين العقل يا أخويا.»

وفي الوقت ده، كانت غالية وزينب طالعين على الجناح فوق، فصادفوا يونس وحمزة ومنصور وهم كمان طالعين. وقفوا في الممر، فقال يونس باستغراب:

ـ «كنتوا فين لحد دلوقتي كده؟»

ردت زينب وهي بتبص لمنصور:

ـ «كنا قاعدين ويا أمي..»

سكتت زينب لما لاحظت شحوب وجه منصور، فقالت بلهفة وقلق وهي بتقرب منه:

ـ «كيفك يا منصور؟! مالك، لونك مخطوف خالص كده ليه؟!»

بص لها منصور بوجع وتعب وقال بصوت مكسور:

ـ «والله ما أنا قادر يا زينب.. حاسس إن دماغي هتنفجر.»

غمزت غالية لزينب بخفة إنها تطبطب عليه وتروح معه. لاحظ منصور الحركة، فأومأ بدماغه، وقالت زينب برقة وهي بتمسك دراعه:

ـ «طب تعالى وياي أنا.. هوصلك لأوضتك ترتاح.»

ومشوا سوا.

وقف حمزة، وبص ليونس وغالية بابتسامة هزار:

ـ «آه.. أدي زينب أخدت منصور وراحوا ويا بعضهم.. وكده يونس وغالية هيقعدوا مع بعض، وأنا أخد بعضي وأروح أنام، ما أنا مليش حد ياخدني!»

ضحك يونس هو وغالية، فقالت له غالية بمزاح:

ـ «بكرة تيجي اللي تاخدك وتروحوا ويا بعض إنت كمان يا حمزة، ما تستعجلش!»

ضحك حمزة وقال:

ـ «اللي يسمع من بقك لباب السما يا غالية! تصبحوا على خير.»

ومشي.

تنهد يونس بثقل بعد ما مشي حمزة، وبص لغالية بحنان وهي بتحط إيديها على وجهه:

ـ «مالك يا يونس؟! احكي لي في إيه؟»

مسك كف إيدها وباسه برقة وقال:

ـ «تعالي وياي بس..»

أخدها ونزلوا من الدوار ومشيوا في الجنينة اللي ورا لحد ما قربوا من الإسطبل. فتحوا الباب، فوقفت غالية بذهول وفرحة:

ـ «وه! نجمة وأصيل؟! واخدني هنا ليه في الوقت ده يا يونس؟»

قال بابتسامة دافئة:

ـ «تعالي بس..»

قربت غالية بسرعة على فرسها «نجمة»، وحضنتها بحب وبقت تحسس عليها، فعملت نجمة صوت الصهيل الفرحان، وأكلتها شوية سكر. وفي الناحية التانية، كان يونس بيطبطب على «أصيل» ويأكله سكر هو كمان.

بعد دقايق، قعدوا الاتنين على الأرض جوه الإسطبل بهدوء، فقال يونس بنبرة جادة:

ـ «بكرة.. بكرة هنكتب كتاب رجب على سمر.»

اتسعت عيون غالية بذهول:

ـ «وه! بالسرعة دي يا يونس؟!»

ـ «أيوه.. قعدنا النهارده والكل حكم، وأنا حكمت إننا نكتب كتابهم بكرة عشية، ونعلن جوازهم بعد فرحنا، عشان الناس ما تتحدثش كتير.. ما إنتِ عارفة اللي حصل النهارده، هيقولوا كيف كانت بتحب يونس وهتتجوّز رجب؟! فمنعًا للقيل والقال، لازم نستر عليهم.»

طبطبت غالية على كتفه بحنان، وقالت بصوت نقي:

ـ «زين ما عملت يا يونس.. والله، رغم كل اللي عملوه فيا، لكن ساعة ما حصلت المصيبة دي، قلبي وجعني عليهم، وما اتمنيت لهمش الشر أبدًا.. اللهم لا شماتة، وزي ما قلت: كما تدين تدان، والحمد لله على كل حال.»

مسك يونس إيدها وباسها وقال بحب:

ـ «أنا أكتر حاجة بحبها فيكِ يا غالية هي عقلك الراجح وطيبة قلبك الكبيرة.. ما فيش زيك في الدنيا دي كلها.»

رجعت سألت بحيرة:

ـ «أمال مالك مهموم كده تاني؟»

تنفس يونس بعمق وقال:

ـ «عايز أعرف.. إيه اللي لمّ سمر على رجب بالشكل ده؟! طول عمرهم مش بيطيقوا بعض، إيه اللي حصل فجأة؟! ولو إني أقطع دراعي إن الموضوع ده وراه مصيبة متعلقة بيا وبيكِ.»

هزت غالية رأسها بتأييد:

ـ «بيني وبينك.. أنا حاسة برضه إن فيه إنّ! لكن على قولك، أكيد كانوا متجمعين علينا وربنا كشفهم.»

قال يونس بوعيد:

ـ «أنا هأعرف كل حاجة بنفسي.»

قعدوا شوية كمان، ولما الليل بدأ يتأخر، أخدها وقاموا راجعين على الدوار عشان يرتاحوا ويستعدوا ليوم بكرة الطويل والناري.

صباح اليوم التالي..

طلع الصبح على الدوار، وكل واحد فيه كان شايل همّ اللي حصل بطريقته.

نعمة ما داقتش طعم النوم طول الليل، وقعدت جنب سمر تفكر في الفضيحة اللي حصلت، وفي كل الخطط اللي كانت بتحاول ترتبها، لحد ما بنتها بوّظت كل حاجة بإيديها.

أما عبد الرحيم، ففضل طول الليل صاحي، مش قادر يستوعب اللي حصل لبنته، ولا عارف إزاي هيواجه الأيام الجاية.

وصال هي كمان ما ارتاحتش، كانت غضبانة من رجب بسبب طريقته معاها، ومن روية بسبب الكلام اللي واجهتها بيه، وفوق ده كله مش لاقية إجابة تشفي غليلها عن اللي حصل في أوضة سمر.

أما رجب، فكان صاحي من بدري، والغضب بياكل في قلبه. فكرة إن يونس قرر إنه هيتجوز سمر كانت مستفزاه، وكان بيسأل نفسه بغيظ: هو يونس فاكر نفسه مين عشان يقرر عني أنا هتجوز مين؟!

وفي أوضة سمر، كانت قاعدة لوحدها، عينيها وارمة من كتر العياط، مش قادرة تتقبل فكرة إنها هتتجوز رجب اللي طول عمرها ما بتطيقوش، وهي قلبها متعلق بيونس.

وفي الناحية التانية من الدار، كانت غالية وزينب وكريمة وروية صحيوا بدري، وبدأوا يجهزوا الهدوم والحاجات اللي لسه ناقصة للفرح.

لكن كريمة كانت قاعدة وسط البنات ساكتة، وعينيها مليانة دموع، وكل شوية تمسحها بسرعة وتحاول تداري حزنها.

لاحظت غالية سكوتها، فقربت منها وقالت بحنان:

ـ «بكفاية عليكِ بقى يا كريمة، هتفضلي لحد إمتى شايلة الهم وعايزة تعيشي نفسك في الحزن؟! اللي حصل حصل يا خيتي، والحمد لله إن ربنا ستر.»

بصت لها كريمة، وانفجرت في العياط وهي بتقول:

ـ «مش مصدقة إنه حصل يا غالية! مش مصدقة إن سمر أختي ورجب ولد عمي يحصل بينهم كده!»

حاولت غالية تهديها، لكن كريمة كملت وهي بتمسح دموعها:

ـ «أنا مش عارفة أعمل إيه.. نفسي أروح لسمر وأتكلم معاها، وأسألها إزاي وصلت نفسها لكده، وفي نفس الوقت خايفة أروح أزعق لها أكتر، أو تحس إني بشمت فيها.»

زينب قربت منها وقالت بحنان:

ـ «يا كريمة، إنتِ هتفضلي تعيطي لحد إمتى يا حبيبتي؟! اللي حصل حصل، ودلوقتي هما خلاص هيتجوزوا، وربنا وحده اللي عالم كل واحد فيهم هيعمل إيه بعد كده.»

كانت روية قاعدة قريبة منهم، فبصت لكريمة وقالت بهدوء:

ـ «خليكي بعيدة عنها دلوقتي يا كريمة.. هي أكيد مش قادرة تسمع كلام من حد، وإنتِ كمان مش مطالبة تصلحي غلط غيرك. سيبيها تهدى، ولما ربنا يفرجها وكل واحد يعرف غلطه، ساعتها ممكن نبقى نتكلم معاها.»

هزت كريمة راسها، ومسحت دموعها بطرف إيدها وقالت:

ـ «عندك حق يا روية.. أنا مش هروح لها دلوقتي، مش عايزة أزود عليها أكتر من كده.»

مسكت غالية إيد كريمة بحنان وقالت:

ـ «روية عندها حق يا حبيبتي.. ما تفضليش شايلة همّ كل الناس. دلوقتي إحنا عندنا فرح، وعايزين نكمل استعداداتنا ونفرح من قلبنا. اللي حصل حصل، وربنا وحده أعلم كل واحد يتعلم إيه من اللي مرّ بيه.»

ابتسمت كريمة ابتسامة صغيرة وقالت:

ـ «حاضر يا غالية، هحاول أهدى وأركز معاكو.»

ابتسمت زينب وقالت وهي بتقوم من مكانها:

ـ «أيوه بقى، هو ده الكلام! يلا يا بنات بدل ما نقعد نعيط، نشوف الهدوم والحاجات اللي لسه ناقصة للفرح.. مش معقول الفرح ييجي وإحنا لسه بنواسي بعض!»

ضحكت غالية وروية، وحتى كريمة قدرت تبتسم وسط دموعها، وقاموا كلهم يكملوا تجهيزاتهم، وبدأت أصوات الضحك والكلام ترجع للأوضة من جديد.

وفي اللحظة دي، اتفتح باب أوضة سمر فجأة، وظهر يونس واقف على الباب بملامح جامدة ونظرات خلت سمر تقوم من مكانها بخوف.

نعمة بصت له باستغراب وقالت:

ـ «خير يا يونس؟! إنت داخل علينا كده ليه؟»

يونس بص لها ببرود وقال:

ـ «اطلعي برّه يا نعمة، واتقي شرّي أحسن لك... يلا، من غير كلام كتير!»

نعمة فتحت عينيها بصدمة:

ـ «إنت بتقولي أنا الكلام ده يا يونس؟!»

رد عليها بنبرة حاسمة:

ـ «أيوه، بقولك إنتِ! ويلا على برّه!»

نعمة بصت لسمر بقلق، وبعدها خرجت وهي بتتمتم بكلام مش مفهوم.

سمر فضلت واقفة مكانها، قلبها بيدق من الخوف، وبصت ليونس بتوتر:

ـ «إنت عايز إيه يا يونس؟!»

يونس ما ردش عليها، إنما فضل باصص لها بنظرات غامضة، وبعدها قال بصرامة:

ـ «تعالي ورايا.»

سمر اتراجعت خطوة وقالت بخوف:

ـ «أروح معاك فين؟! وليه؟!»

يونس زعق فيها:

ـ «قلت تعالي يا سمر!»

اتخضت من صوته، وما قدرتش تعانده، فمشت وراه بخطوات مترددة، وهي مش عارفة هو ناوي على إيه.

أول ما خرجوا من الأوضة، ظهرت نعمة قدامهم وهي بتقول بحدة:

ـ «إنت واخد البت على فين يا يونس؟!»

يونس وقف وبصلها بنظرة حادة:

ـ «مالكيش صالح يا نعمة! خليكي في حالك أحسن لك.»

وسابها واقفة مكانها، ومشي بسمر، اللي كانت بتبص حواليها بخوف، وكل خطوة بتاخدها كانت بتزود حيرتها.

_-يا ترى يونس واخد سمر على فين؟ وإيه اللي ناوي يواجهها بيه؟❤️‍🔥
وياتري ايه المستني الدوار الايام الجايه ناااار🔥🔥🔥

مستنيّة تفاعلكم يا حبايبي ورأيكم و توقعاتكم  ❤️🔥

و مبسوطه جدا جدا ان الفصل عجبكم كلامكم فوق راسي ي احلي ناس ❤❤
ولسه الجاي هيولع اكتر انتظروو❤️‍🔥❤️‍🔥❤️‍🔥...



تعليقات
×

للمزيد من الروايات زوروا قناتنا على تليجرام من هنا

زيارة القناة