
رواية شتات الفصل الثامن عشر 18 بقلم مها حولي
_دا شنو دا مية مره مش قلت ليك ما تشيلي تلفوني بدون اذني! بتتصرفي ساي من عندك ليه؟ منو سمح ليك تقتحمي خصوصياتي وترسلي رساله نيابة عني!!
= والله يا خليل ما قصدي اقتحم خصوصياتك، بس حبيت ارسل ليها رساله بسيطه تبسطها 😁
_ رسلي ليها بتلفونك ما بتلفوني انا!
= ما هو المفروض هي تفهم انو الرساله دي منك انت.... يعني بس حبيت أساعدك شويه
جاط فيها شديد وقال ليها ما طلبت مساعدتك و دا ما مبرر ليك، ما ألقاك تهبشي التلفون دا تاني، ما تقولي لي علاقتكم وما علاقتكم دا شي ما بخصك🤚
زعلت وبقت تبكي، بس نهاي ما حنسها ولا عاين ليها مرتين، شال تلفونو ومشى وقبلها هو حذف الرساله الرسلتها اختو جويريه.
لما حذف الرساله حسيت بخيبه وحسيت نفسي زي الهبله لأني كنت مبسوطه بالرساله!
طوالي طلعت من الدردشه وهو تاني ما قال شي وانا ما رسلت ليهو شي بس اتغظت شديد، لو عايز يحذفها ليه رسلها لي من الأساس؟
بس هو ما ح يرسل لي رساله زي دي! يكون قاصد يرسلها لوحده تانيه وجاتني بالغلط!!..... هو لو لسه بحب البت دي وعندو مشاعر ليها ليييييه ما خطبها؟ ليييه ما عرسها؟
مزاجي اتعكر وفي اسئله كتيره كانت في بالي، تاني يوم ونحنا في الجامعه وبعد ما خلصنا المحاضره جمانه قالت لي مالك، قلت ليها ماف شي، قالت لي عايني هسي نحنا قاعدين برانا، غفران مشت، قلت ليها لو قاعده أو لا ماف شي، ما عندي شي اقولو!
شفتو انا واحده من الناس البتضايق من الفضفضه، ما بقدر أي شي يحصل معاي اجي احكيهو لزول، و بتضايق شديد لما زول ينق علي عشان يعرف انا مالي! بضايقني اكتر من الموضوع المضايقني!
ايوه في حاجات الواحد تلقائياً كدا بلقى نفسو حكاها للزول القدامو، بس دا ما معناه انو اي شي يحصل في حياتنا فرض أو واجب علينا نحكيهو للناس حتى لو كانو أقرب الناس لينا!
نهاية اليوم الجامعي مشينا المكتبه انا وجمانه وغفران طلعنا الشيتات، مع انو عادي نقراها من التلفون بس انا ما بحس نفسي قريت إلا لما امسك الشيت واشخبط فيهو.
اها بعد داك بديت استعدادي للإمتحانات، طلعت كل شيتات المواد وبديت اقرا اول ماده لمن الجدول نزل، كتبتو عندي في دفتر وقفلت التلفون، عارفه نفسي لو فتحتو ح أتلهي بيهو، بالذات لو دخلت حسابات خليل في كل المواقع، بعدها بدت الإمتحان، طبعاً اول ماده دي كانت من أصعب المواد، الهم الشلتو ليها أكبر من قرايتي ليها 💔😂
كنا بنمتحن يوم بعد يوم، اها بعد مرور ايام على الإمتحانات يوم وانا بقرا في الغرفه مرام اختي جابت لي تلفون امي، قالت لي هاك دي خالتو سميره، شلت منها التلفون واتكلمت معاها، قالت لي قالوا لي نزلتي امتحانات، قلت ليها اي و الله، قالت لي اها كانت كيف، قلت ليها الحمدلله، فيها الساهل وفيها الصعب، قالت لي ربنا يوفقك ان شاء الله، اتصلت عليك في تلفونك أداني مغلق، حتى جويريه قالت لي مغلق، قلت كدي اتصل على امها اشوف الحاصل عليها شنو، قلت ليها قفلتو عشان الإمتحانات، بتلهي بيهو لو خليتو فاتح، قالت لي ايوااا لو كدا ماف مشكله المهم انك كويسه.... فجأه جاني صوت جويريه وهي بتقول لي يخسسسي عليك مع عايزه زول يتواصل معاك، ضحكت وقلت ليها لا والله، انا كدا ايام الإمتحانات، ببعد عن أي شي، قالت لي والله ناس الشهاده السودانيه ما بعملوا كدا قولي بس ما عايزه زول يتصل عليك 😂
طبعا ما عرفت اقول ليها شنو تاني ف سكت، ضحكت وقالت لي بهظر معاك والله، ربنا يوفقك وان شاء الله تعدي على خير امتحاناتك، قلت ليها آمين يارب، قالت لي اهاااا اخوي لو عايز يتواصل معاك يصل ليك كيف قطعتي راسو! 😂
في سري قلت ليها اخوك مستهبل ساي!.... واصلت كلامها وقالت لي مرتين سألني منك، لاحظ ليك ما ظاهره وتلفونك مقفول، اتجاهلت كلامها وقلت ليها بديتي بحث التخرج؟.... قالت لي ايوه و قربت اخلص، قلت ليها بالتوفيق ان شاء الله وقفلنا على كدا.
---
_ ولدك ذاتو سخيف يا أمي، يعني الرساله مشت وهي قرتها في داعي يحذفها!
=انتي ذاتك البخليك تشيلي تلفون ما تلفونك شنو و ترسلي بيهو؟ الغلط كلو منك انتِ، ليه ترسلي ليها بتلفونو اخوك عشان تقول الرساله منو؟ انا مش قلت ليك الحشريه الزايده والتطفل دا احسن تخليهو؟
_ يااااويلي انا من حبكم لتكبير المواضيع!.... أمي ولدك ناشف و تعاملو جاف وهي اكيد حست بالشي دا، ف انا بس حبيت ابسطها برساله منو شويه! كنت ح احذف الرساله من عندو طوالي لكن هو جا راجع فجأه ولقاني ماسكه تلفونو حذفها من الطرفين وشاكلني!
= ليهو حق يشاكلك، تستاهلي اكتر من كدا!
_ يعني الزول نهاااي نهاااي ما يحاول يعمل عمل خير في الدنيا دي!.... البت كتكوته وعسل يا ماما ونفسسسي تكون مرت خليل، حبيتها و حبيت استايلها وشخصيتها، حاسه حنكون احسن واجمل اخت ومرت أخ! 😍
= لو دايره دا يحصل ما تدخلي في خصوصيات اخوك وما تركزي معاهو، اصلا هو من يشوف الناس مركزين معاهو بشترها طوالي وبعمل عكس النحنا دايرنو!
---
كلام جويريه بقى معشعش في راسي و جملة : قطعتي ليهو راسو " اتكررت جواي كتير، بقت تجيني اسئله كتيره عن هو بعمل في شنو هسي، رسل لي أو اتصل علي؟ اول فكره جات في بالو شنو لمن لقى تلفوني مغلق، قال لأختو شنو خلاها تقول اني قطعت راسو بسبب اني قفلت تلفوني، يعني هو عمل شنو بالضبط؟ ردة فعلو كانت شنو؟ هسي وين هو وبفكر في شنو!؟
طبعاً كل الأسئله والحوارات الكانت جواي منعتني من القرايه، عشان كدا انا التلفونات دي دائما بتجيب لي البلاوي! كنت قاعده في آمان الله لا بي لا علي، بقرا قرايتي جابوا لي تلفون في مكاني شتت أفكاري! هسي ارجع كيف انا لمود القرايه؟ انفض الأفكار دي كلها كيف من بالي؟
للحظات مشيت جبت تلفوني وكنت ح افتحو بس اتراجعت! هسي جويريه تكون قالت لأخوها كلمتها انك سألت عنها وانا لمن افتح تلفوني ح يقول إني فتحتو عشانو!
رجعت التلفون مكانو، وجيت راجعه قعدت في السرير، بقيت ماسكه الشيت بس ما قادره اقرا، عقلي بتخيل حاجات ما حصلت، وقلبي انشغل بشي تاني!.... بقيت اقرا من الشيت بس حاسه الكلام ما داخل عقلي، في النهايه زهجت، ختيت القلم والشيت على جنب ورقدت على السرير وبقيت اعاين للسقف!
تاني يوم مشيت الجامعه، ما شلت تلفوني معاي، خليتو مقفول زي ما هو، في الإمتحانات السابقه مرات كنت بشيلو معاي بس ما مفعله فيهو النت وعامله تجميد لتطبيق الفيس والواتس والتيك توك، لقيت جمانه وغفران براجعو جنب القاعه، قالوا لي اها جاهزه، قلت ليهم ما عارفه حاسه عقلي فاضي، جمانه قالت لي ليه ما قريتي يعني؟ قلت ليها ما قدرت، قالت لي تعالي طيب، قعدوني في نصهم وكل وحده بقت تشرح لي وتعمل لي مراجعه سريعه لأهم النقاط الممكن تجي في الإمتحان، لمن دخلت الإمتحان الحمدلله قدرت اشتغل، ايوه انا ما كنت قاريه بالشكل المطلوب لكن مراجعة جمانه وغفران لي قبل الإمتحان فادتني شديد، بعد طلعنا من الإمتحان قلت ليهم مراجعتكم فادتني، لولاكم كنت اتجهجهت شديد، غفران قالتي لي ناسيه لمن كنتِ بتراجعي لينا كلنا قبل الإمتحان و ليالي شرحك لينا في القروب؟ انا مرات كتيره كان ممكن اتملحق في الماده لولا شرحك ومساعدتك لي!
جمانه قالت لي لي بالجد والله، ايام يا حليلا! غفران قالت لي ناويه تفتحي تلفونك متين انتي؟ خلونا نراجع زي زمان، قلت ليهم طيب الليله ح اخليهو فاتح.
لمن رجعت البيت، طوالي فتحت تلفوني، لقيت مكالمات من جويريه وخالتو سميره و كمان خليل، متصل مره واحده بس هو قبل 3 أيام، نشطت وفتحت الواتس، برضو رساله واحده بس منو قبل يومين، كاتب لي السلام عليكم كيف الحال!
بالجد زعلت شديد! ليه هو محسسني انو مغصوب على الخطوبه دي! ليه بتعامل معاي بالجفاء دا كلو! ليه محسسني انو مجبور علي، مجبور يرسل، مجبور يتصل!
حتى لاحظت انو ما كاتب شي في الميديا عن خطوبتو، مع انو هو زول نشط على الميديا، خبر زي دا مفروض يكون ناشرو ولا ما عايز يزعل فراشاتو!!
طبعاً ما رديت على رسالتو وقلت تاني ما ح اقفل التلفون وما ح ارسل ليهو ولا ح اتصل حتى لو هو بادر، لحدي ما اشوف حل للموضوع دا🤚
بليل قعدنا نشرح شويه انا والبنات، طبعاً منار وماريا ما شاركو معانا مع انهم موجودين في القروب، المهم صورت الشيت ورفعتو استوري في الواتس وكتبت عليهو زنقة الكلاب الماااا بحبها 🤧😭
بعد شويه جويريه ردت علي وقالت لي يااااا قلبي امتحنتي كيف؟
قلت ليهو نص نص، لأني ما قدرت اقرا كويس 😭
قالت لي ليه مالك؟
قربت اقول ليها بسببك انتي و اخوك!.... قلت ليها ما عارفه بس زهجت من القرايه، أمس ما قريت كويس لكن صحباتي راجعوا لي قبل الإمتحان بدقائق والحمدلله اشتغلت، قالت لي عايني ما تتوتري، الإمتحانات دي ما تديها هيبه نهاي، اتعاملي معاها كأنها محاضره أو أي شي عادي، انتي كل ما تخافي و تضخمي الإمتحانات جواك كل ما حتكون صعبه عليك والقرايه تغلبك لأنك ح تدي الخوف والتوتر حيز كبير جواك، روقي شويه و هدي نفسك، قلت ليها ما بقدر والله 😭
قالت لي بكرا انتي شغاله؟ قلت ليها لا، قالت لي معناها هسي نومي، ريحي عقلك من الضغط، نومي الآن والصباح بدري أبدي قرايه و بعدها ارتاحي وهكذا، ما تخلي وقتك كلو قرايه عشان ما ترهقي نفسك و عقلك ما يطش، قلت ليها حاضر 😭🩷
قالت يلاااا ما عايزه اشغلك اكتر، تصبحي على خير، قلت ليها وانتي من اهل الخير، شكراً يا جويريه 🩷
قالت لي العفو على شنو!
لمن طلعت من دردشتها لقيت رساله من خليل بنكك، كان رادي على الإستوري!.... حيييينا نسيتو عديل، ما كنت عايزاهو يشوفها، ما عايزه احسسو بوجودي، كنت عايزه اكون مختفيه بالنسبه ليهو لحدي ما اخلص امتحانات اشوفو ح يعمل شنو، ما رديت على رسالتو بس كان نفسي اشوفو كاتب شنو للنهايه، بعد مسافه فتحتها لقيتو كاتب لي :
"اعقليها وتوكلي، اعملي العليك بس، هي فتره و ح تعدي، بكرا اول ما تخلصي ح يروح كل التعب دا، و ح تنسي الإرهاق والسهر دا كلو، والإجتهاد بذره ثمرتها النجاح، والنتيجه هي المكافأه البتخليك تعرفي انها كانت بتستاهل التعب والإجتهاد"
كتبت ليهو :
عارفه لكن القرايه صعبه 😭💔
قال لي عارف، ماف شي صعب، بس لكل مجتهد نصيب، انتي ح تتعبي هسي عشان ترتاحي بعدين!
قريت رسالتو بس وعيوني إتملت دموع، رسل لي تاني وقال لي كيف كان امتحان اليوم؟
قلت ليهو الحمدلله، قال لي يعني ساهل ولا صعب؟ قلت ليهو نص نص، لأني ما قريت كويس، قال لي معناها اقري كويس للجاي، كتبت ليهو ان شاء الله.
اها بعد رسلت الرساله دي طقققق اتذكرت انو ما كان مفروض ارد عليهو! دا شنو الغبااااء دا؟ ليه طوالي رديت عليهو وفاتحه نفسي عايزه اتشكى ليهو!
يعني هو حذف الرساله ديك، و بحب واحده تانيه، و بتعامل معاي بجفاء ليييييه ارد عليهو؟
طوالي كتبت ليهو :
عايزه اقول لي شي مهم حصل معاي قبيل، اقرا الرساله للنهايه انا.....
يلا بعد السطر دا مليت الرساله بكلام اشتر ساي، ليه؟ عشان لمن يشوف اول سطر من برا يتشوق عشان يقرا باقي الكلام و يفتح الشات بسرعه، يلا الكلمات المشاتره التحت دي عشان لو هو فتح الرساله يلقى الرساله طويله، اها كتبت الكلام دا و طوالي رسلت الرساله،وكنت في حالة استعداد وتأهب وفاتحه الدردشه ومحدده الرساله اول ما جاني صاحين القراءه طوالي حذفتها و طلعت من الشات، طبعاً ما حيكون لحق قراها 🙃
وقفلت الشبكه، لمن فتحتها بعد مسافه لقيت منو رساله، كان كاتب لي :
_ حذفتي شنو؟
= بالغلط
طوالي قرا رسالتي و قال لي الحصل شنو معاك قبيل؟
حيييييينا طواااالي ابتسمت، خططي مشت زي ما خططت ليها، قرا السطر الأول وما عارف الباقي، قلت ليهو زي ما قلت ليك الرساله جاتك بالغلط، قال لي الجمله دي انا نفسي افهمها، كيف يعني رساله تجي لزول بالغلط؟ انتوا لمن بترسلوها بتكونو مغمضين ولا ما بتعرفو تقروا؟
قلت ليهو ما مغمضين وبنعرف نقرا لكن عادي الأسامي بتتشابه والدردشات جنب بعض، قال لي والله!؟
قلت ليهو لو ما مصدقك على كيفك، واصلا انا شنو البخليني ارسل ليك رساله واحذفها لو ما بالغلط؟
اتخيييييلوا قال لي شنو!... قال لي يمكن عايزه تدسدي حقك.... عشان الرساله الحذفتها!
طبعاً ما عرفت امشي وين!.... يعني هو عارف من البدايه اني رسلتها ليهو قااااصده!
قلت ليهو رسالة شنو ما انتبهت؟! 🙂💅
طوالي رسل لي ريكورد..... قلبي بقى يدق زي الدلوكه، ركبت السماعه وأول ما فتحت الريكورد قلبي عمل شححححح من الصوت! ما عرفت اركز مع الصوت ولا الكلام!
قال لي :
بالمختصر، الرساله رسلتها جويريه، استخدمت تلفوني بدون اذني وانا حذفت الرساله لأنها ما مني!
حيييينا طبعاً تبريرو غيااااظ!... قلت ليهو اصلا ما لحقت اقراها اتحذفت طوالي، قال لي ما فيها شي مهم، طبعاً عارفاهو ما صدقني وعارفني قريتها بس اكتفى بظاهر الكلام القلتو.
مع انو تبريرو ما بجبر خاطر وسخييييف لكن اتكيفت عشان هو برر! يعني اكيد حس اني حأكون استغربت أو زعلت من كونو رسل لي رساله وحذفها، خاصة اني شفتها!
تاني يوم ما كان عندي جامعه، جوني جمانه وغفران، عملنا قعده ظرررريفه كدا شربنا فيها الجبنه مع ناس امي، وجمانه تتونس مع امي سااااي، اصلا امي بتحبها وهم بحبوا يتونسوا مع بعض والواحد بحسهم متفاهمين شديد، غفران كانت بتتونس معاي ومره مره ما اخواتي بالذات مرام، بعد شويه الاء جات، طبعاً هم بعرفوها سلمت علينا وقعدت معانا ونحنا واصلنا ونسه عاديه بس الاء كانت ساكته! حتى امي لمن بقت تتكلم معاها ما اتكلمت كتير!.... المهم انتهينا من موضوع الجبنه و رجعنا ل قرايتنا، قرينا كوووويس لحدي ما بعد العصر، امي عملت لينا سندوتشات خفيفه كدا مع عصير، لمن جمانه وغفران كانو ح يمشوا أمي حلفت إلا يقعدوا يتغدوا، قالوا ليها المره الجايه اتأخرنا والله، جمانه جاها اخوها جميل بالعربيه و غفران طلبت تاكسي مع انو جمانه قالت ليها ممكن نوصلك معانا قالت ليها طلبتو من قبيل وهسي حيكون قرب يوصل، المهم في الآخر مشوا، في نفس اليوم دا بليل خليل رسل لي وسألني إذا قريت كويس وجاهزه لإمتحان بكرا، قلت ليهو ايوه و صحباتي جوني و..... الخ حكيت ليهو أبرز تفاصيل اليوم، قال لي ممتاز شديد، حاسي انك المره دي متحمسه و جاهزه شديد للإمتحان، قلت ليهو ايوه الحمدلله، قال لي بالتوفيق، عملت لووف على رسالتو و خلاص، بس حقيقي رسالتو بسطتني، يعني كونو مهتم وعايز يعرف قريت أو لا و مدى إستعدادي للإمتحان فرق معاي والله، معناها اني بهمو، اصلا انا عارفه شروطو ديك فارغه ساي منو وما ليها معنى 😂😁 اصلا مستحيل يكون ما حباني أو ما عندو لي شوية مشاعر، استحاله الإهتمام دا كلو يكون دعايه، يعني حتى لو هو ما اعترف لي افعالو أكبر دليل، انا حاسه كدا وعارفه اني بهمو وبفرق معاهو 🩷
يااااخ انبسطت شديد و حماسي وصل السماء، حسيت نفسي بقيت خفيفه و ح اطير، تميت باقي قرايتي بكل رواااقه وانبساطه، حتى اني راجعت بدري وخلصت بدري وباقي الليل قضيتو في حسابات خليل! يااااخ الإنسان دا عجيب! معقوله دا زول زينا! أول مره أشوف قبول وكاريزما و هيبه و جماااال و قوام و لباقه واحترام في زول واحد!! تحسو ممثل تركي لكن على سمار شويه! تحسو بطل في روايه أو فلم! انسان خياااال لأبعد درجه، معقوله دا حقيقيه! معقوله الإنسان دا.... خطيبي!
قعدت اضحك براي زي المجنونه و اتملكتني مشاعر كتييييره وغريبه، فرح على توتر على اطمئنان، بالجد خفت احسد نفسي!
قلت وانا ما أقل منو، هو مفروض يصلي ركعتين شكر لأنو خطب وحده زيي، و دا الشي الخلاهو يتراجع بعد ما قال لي شروطو ديك، هو غصب عنو ح يلقى نفسو مهتم بي و مركز معاي وعايزني اكون معاهو في أدق تفاصيلو، واثقه وعارفه شديد انو وحده زيي لا تقاااوم حظو والله 😎
وانا مبسوطه كدا و بضحك جاتني اسئله كتيره في بالي :
زول زي خليل استحاله يكون ما حب أو اتحب! ياربي يكون حب كم مره؟ كم مره في بت حبتو وشكل الحب دا كان كيف؟ هل كان مهتم بيها؟ بخاف عليها؟ بغير عليها؟ اول حب في حياتو كان متين وعامل كيف، و احساسو الأول كان شنو لمن حب والحباها دي عامله كيف!
صدقوني الأسئله دي كلها قللت سعادتي وخلتني اغار من بنات ما شفتهم ولا بعرفهم! مجرد فكرة انو هو حب غيري ضايقتني! حاساهو ملكيه خاصه، ما مفروض يكون حب بت في حياتو غيري، ما عايزاهو يشوف غيري.....بس دي حاجه ما ب يدي! يعني هو عمرو دا كلو مستحيل ما يكون حب ليهو بت! اكيد حب مره واتنين ويمكن تلاته!.... طوالي اتذكرت البت الهددتني ديك! ياها دي وحده منهم! دي شكلها متمسكه فيهو شديد وما عايزه تتخطاهو!
بالجد اتضايقت شديد، ماااا عايزه، ماااا عايزه أي بت تشاركني فيهو، ما عايزه بت تعاين ليهو، ما عايزه بت تفكر فيهو، ما عايزه بت تحبو و تعجب بيهو و دي كلها حاجات مستحيله خاصة انو متواجد على الميديا، يعني بقوا علي اتنين، بنات في الواقع وبنات في المواقع! 💔
في وسط دا كلو بنات أهلو خطروا على بالي! معقوله ما يكونو حبوهو ولا حباهم؟ إحساس بنات خالتو واعمامو شنو لمن هو خطبني؟ خطب وحده غريبه ما منهم!.... غيتو انا لو كنت بت عمو ولا خالتو كنت حأموت من الوجع والغيظ! يعني اتخيلي ولد اهلك أو ولد خالك أو عمك يكون زي خليل دا ويمشي يخطب وحده غريبه! حااااره والله، ح تحسي انك أولى بيهو، انو هو حقكم وما مفروض يختار الغريبه، والله واحد زي خليل لو ما بخاف الكذب أظن المعرسه المن بنات أهلو ذاتا ح تغار عليهو وتتمنى لو كانت زوجتو!
اخخخ يا قلبي!
تاني يوم عااااد مشيت امتحنت زي العجب، خلصت بدري وبقيت اتأمل ورقة الإمتحان، وانا بقول في نفسي شووووف يا خليل خطيبتك شااااطره كيف، والله طول ساعات الإمتحان كنت بتخيلو معاي في القاعه، عاينت للباب واتخيلتو واقف جنب الباب ومبتسم لي ف ابتسمت ليهو زي العجب لحد ما المراقب قال لي ركزي مع ورقتك يا طالبه!
طبعاً اتخلعت في نفسي!.... معقوله للدرجه دي! دا جن دا! ضحكت كويس ومشيت سلمت ورقتي وانا مبسوطه المراقب قال لي الإمتحان شكلو ظابط، قلت ليهو فعلاً، اول ما طلعت تلقائياً لقيت نفسي بتصل على خليل كنت مبسووووطه شديد، اول ما رد علي قلت ليهو اوووول شييي صباااح الخير، قال لي اهلييين صباح النور، قلت ليهو يااااداب طلعت من الإمتحان، قال لي بشري كان كيف؟ قلت ليهو عساااال عساااال شديد، وانا في سري عسل الأولى قاصداهو هو والتانيه قاصده بيها الإمتحان، قال لي ممتاز شديد، عرفتو حيكون حلو وساهل من حماسك الأمس واستعدادك ليهو، خليك كدا على طول، قلت ليهو ان شاء الله، قال لي باقي ليك كم امتحان؟
قلت ليهو واحد بس، حيكون بعد بكرا، قال لي موفقه ان شاء الله، قلت ليهو آمين. قال لي يلا انا عندي اجتماع ح يبدا بعد شويه، قلت ليهو تمام وقفلت منو بس اتمنيت لو المكالمه دي تطول! عن كمية الطمأنينه والإنشراح والسعاده البحس بيها لمن اتكلم معاهو! حتى لو كانت مجرد رساله بقدر اتخيل شكلو هو مرسلها لي وبقراها بنبرة صوتو! 🩷
جمانه وغفران لمن طلعوا لقوني منتظراهم وانا مبسوطه، هم كمان قالوا الإمتحان حلو ما كعب، قعدنا شويه في الجامعه وطلعنا مشينا، جمانه قالت بكرا نجي نقرا معاها في بيتهم، غفران قالت ليها لا لا تعالوني انا! جمانه قالت ليها انا عزمتكم قبل ما انتِ تعزمينا!
قلت ليهم ماف مشكله، ممكن نجي لواحده منكم بعد الإمتحان، طبعاً انا ما كنت متأكده من حتة هل امي ح تخليني امشي أو لا، امي بتحب شديد صحباتي يجوني في البيت، بس بتفضل هم اليجوا ما انا الأمشي واقعد في بيوتهم!... نهاي ما قلت ليهم يمكن اهلي ما يرضوا، لأنو كدا ح يتحسسوا وليهم حق، يعني هم أهلهم عادي بخلوهم يجوني لما يجي دوري اقول ليهم اهلي ما بخلوني؟ ليه مالم هم؟ مجرمين ولا مصاصين دماء!؟
لمن رجعت البيت وارتحت شويه قلت لأمي جمانه عازمانا بكرا في بيتهم، عشان نقرا سوا، سكتت ساي، قلت ليها انا ما قدرت أرفض لأنها جاتني اول أمس، لمن تتصل هي أو خالتو ربيعه ح اديك تتكلمي معاها، وقولي ليها نحنا ما عندنا بت بتمشي تقعد في بيوت الناس.
طبعاً عاينت لي مساااافه وسكتت، المهم واصلت باقي يومي عادي، بقيت لو في شي مفروض اعملو في البيت بمشي اعملو بسرعه عشان افضي نفسي و اجي جاريه للسرير وامسك التلفون واقعد اتفرررج على خليل بنكك 😍
اها تاني يوم انا موضوع جمانه دا نسيتو عديل، لحد وقت الفطور لمن كنا بنفطر انا وأمي، قالت لي ما ماشه ولا شنو؟
قلت ليها وين؟ قالت لي حيكون وين؟.... طواااالي اتذكرت! قلت ليها بيت ناس جمانه؟ قالت لي اي! ضحكت وقلت ليها ماشه معاي ولا شنو؟ 😂
قالت لي خلاص ما تمشي، قلت ليها لا لا خلاص بهظر معاك!
المهم رسلت لجمانه وأكدت ليها اني ح اجي، طبعاً متفقين نجيها الضهر، فعلا مع وقت الضهر جهزت نفسي وصليت ومشيت ليها، لمن وصلت لقيت غفران جات قبليني، خالتو ربيعه قالت لي نورتي والله، عاد الليله زارتنا البركه، مشيت سلمت عليها شديييييد، خالتو ربيعه دي انا بحبها شديد، زي حبي الكان لخالتو سميه، والله خالتو سميه للآن بحترمها بس الكف داك كسر حاجه جواي ناحيتها، حسيتها زي الغدرتني، لأني كنت جايه اشوفها واتونس معاها وهي بالمقابل استقبلتني ب كف بعد دخلتني بيتها💔
طبعاً كان معاهم ضيوف، اولاد أهلها،
المهم نحنا مشينا غرفة جمانه، كانت مزينه الغرفه وعامله كيك ومكسرات وعصاير، قلنا ليها دي قرايه ولا حفلة توديع العذوبيه!.... طبعا هي وغفران مهووسات تصوير، لازم يصوروا اي شي، يعني الواحده لو عايزه تشرب قهوه أو بارد أول شي بتصورها بعد داك تشرب! 😂
زمان كنت بعاني معاهم شديد لمن نطلب بوووش انا بكون جعانه عايزه آكل وهم يحلفوا إلا يصوروا اول ولازم ياخدو صور من كل زوايا صحن البوش ومع البيبسي طبعاً!!
اها بعد انتهوا من تصوير الحاجات قالوا نتصور نحنا ونعمل كم تريند، وجمانه كانت مُصره نسرح نفس التسريحه، سرحنا نفس التسريحه ولبسنا نظارات شمسيه اتهابلنا واتصورنا كويس، ختيت الصور واتس بعد استثنيت ناس من ضمنهم خليل، يعني الح يشوفو الصور شوية بنات من دائرة المقربين، ختيت صور كم فيديوهات كدا للتريندات العملناها!🩷
بعد شويه جويريه ردت على الإستوري وقالت لي عساااال عساااال ما شاء الله، عندكم عرس ولا شنو؟
قلت ليها اتخيييلي حفلة توديع العذوبيه دي كلها عشان نقرا بس 😂؟
قالت فظييعين والله ان شاء الله قريتو، سجلت ليها ريكورد قلت ليها وين ياداب نحنا بنقول بسم الله، اول شي نرفه بعد داك نقرا، قالت لي احسن ليكم والله، الوقت داك جمانه كانت مشغله سماعه وبترقص، وصوت السماعه كان في الريكورد ف جويريه قالت لي ياااا بت انتوا عاملين عرس عدييييل، قلت ليها دي جمانه المجنونه 😂
جمانه عرفتني بتكلم مع جويريه قالت لي اتصلي عليها مكالمية فيديو خليها تشوف البنسوي فيهو، فعلاً اتصلت عليها فيديو، وريناها زينة الغرفه و كل المكسرات والعصاير والقومه والقعده، قالت لينا بعد دا كلو لو ما قريتو ح أجلدكم، طبعاً مشغلين السماعه وهي بتبشر لينا، بعد شويه سمعت خالتو ربيعه بتنادي علي، جمانه قالت لي اكيد عايزه توريك تيابها الإشترتهم جداد ما بتقتنع إلا بذوقك.... رديت وقلت ليها جايه، فجأه كدا جويريه قالت خليل تعال شوف ديل بعملوا شنو، طبعاً انا من سمعت اسمو طوالي اتلبشت ولبست الطرحه، قال ليها شنو؟ جويريه ضحكت علي وقالت لي هو ما شايفك 😂
قالت ليهو ناس مهويه عاملين ليهم حفله عشان يقروا، والله شهيتوني القرايه وانا خريجه 😂
فجأه كدا سمعت صوت واحد عديل بنادي علي! انا استغربت و قلت دا منو كمان البنادي علي! الصوت جاي من برا، ردت جمانه وقالت ليهو جايين يا ياسر!
قلت ل جويريه ح اقفل بعد دا، فعلا بعد قفلت منها قلت لجمانه دي منو الكان بنادي علي!.... قالت لي دا ياسر ولد اهلي، شكلو امي كانت بتنادي عليك وهو سمعها عشان كدا ناداك عشان يقول ليك امي بتناديك!
المهم طلعنا ومشينا لخالتو ربيعه، و زي ما قالت جمانه عايزه تشوف ذوقي في التياب الإشترتهم، جمانه قالت ليها امييي عليك الله خلينا نقرا، قالت ليها يا مستهبله هسي كنتوا بتقروا!!
المهم اخترت لخالتو ربيعه تياب على ذوقي وعجبوها، قالت لي خلاص ح اشيل ديل وارجع الإتنين ديل للمره الدلاليه.
المهم رجعنا غرفة جمانه والمره دي بدينا قرايه جد جد، عشان كنا مبسوطين قرينا بكل أمانه وإخلاص، بعد حكاية ساعه كدا خليل اتصل علي، لمن رديت عليهو قال لي رجعتي البيت ولا لسه؟
طبعاً قلبي قعد يرفرف! قلت ليهو لسه، يداب بنقرا نحنا، قال لي بتقروا في دستور انتوا، قلت ليهو كيف يعني؟
قال لي بتخلصي متين؟
قلت ليهو ما عارفه، قال لي بجيك الساعه 4، والوقت داك الساعه 4 قربت، قلت ليهو لا لا نحنا ياداب بدينا القرايه،شكلنا ما ح نخلص ف ح اضطر أبيت معاهم، قال لي شنوووو؟.... قلت ليهو ح أبيت، لازم نخلص الماده دي عشان بكرا!! قال لي اهلك عارفين انك ح تبيتي؟ قلت ليهو هسي بكلمهم! قال لي ما ح يعترضوا؟ عادي عندهم يخلوك تبيتي في بيت صاحبتك؟
قلت ليهو ايوه عادي!
ما قال شي وبعد شويه قفل الخط، اتكيفت شديييد و واصلت قرايه بنفس فاتحه وجمانه وغفران شغلوووها لي، قالوا لي قال ليك شنو خلاك تتبسمي براك 😂
اها لمن الساعه 4 جات قلت ليهم يلا نمشي بعد دا، جمانه قالت لينا اقعدوا شويه قلنا ليها لا لا عشان ما نتأخر، تلفوني رن تاني والمتصل كان خليل، قال لي الساعه 4 جات، ماف حاجه اسمها مبيت، لو سمحتي ارجعي البيت 😊
قلت ليهو اصلا راجعه لأنو خلاص قرينا كويس!.... قال لي طلعتي ولا لسه؟ قلت ليهو طالعه هسي، قال لي انا حالياً سايق وصفي لي وين البيت، قلت ليهو لا لا ما تتعب نفسك، ولد خالة جمانه ح يوصلني.... سكت مساااافه بعدها قال لي وصفي لي البيت!
وصفتو ليهو، جمانه قالت لي يخسييي عليك من قبيل تكذبي عليهو سااااي، غفران قالت ليها لازم لازم و دي كذبه بريئه 😂
المهم غفران مشت مع انو قلت ليها نوصلك معانا لكن مشت عشان عندها مشوار تاني مع أختها، اما انا قعدت مع خالتو ربيعه وجمانه لحدي ما خليل وصل واتصل علي،لمن طلعت ليهو اولاد أهل جمانه كانو قاعدين جنب الباب، واحد برش في الشجر والتاني قاعد في كرسي بتكلم بالتلفون والتالت بمسح على العربيه وجميل معاهم، قال لي على وين ما بدري، قلت ليهو بالعكس قعدت كتير والله، الوقت داك خالتو ربيعه وجمانه قدموني لحد الباب، خالتو ربيعه قالت لي مالو ما يجي يسلم على الناس! قلت ليها يمكن ما جابي يزعجكم، ودعتهم ومشيت ركبت مع خليل، قلت ليهو السلام عليكم، رد علي السلام بدون ما يعاين لي، و تاني نهاي ما اتكلم معاي ولاااا عاين لي ولا عبرني كأني ما راكبه معاهو! والحاله اني راكبه معاهو متحمسه وجايه احكي ليهو كل شي عملناهو!
لحدي ما وصلنا البيت ما اتكلم معاي، نزل سلم على ناس البيت ومشى، وطبعاً بطريقه ما مباشره فهمتهم انو جويريه هي الكلمتو وهو كان في مكان قريب من بيت ناس جمانه ف اتصل وقال ح يوصلني معاهو، امي قالت لي احسن من انك تجي براك وما تلقي مواصلات والزمن يتأخر.
طبعاً كنت زعلانه شديييد لأنو اتجاهلني! طيب القال ليك تعال وصلني منو!
بقيت قاعده وحارسه تلفوني، قلت يمكن يتصل أو يرسل يبرر لي تصرف قبيل بس ما عبرني!.... عيوني إتملت دموع، لحدي الساعه 10 بليل منتظراهو بس ما رد علي!
لمن خلاص فااااض بي و زهجت، رسلت ليهو رساله في الواتس محتواها :
أنا ما بحب العلاقات الما واضحه ولا بحب الناس المزاجيين،راحتي النفسيه عندي أهم من أي شي تاني، انت لو شايف انك مغصوب أو مجبور علي قول لي، عشان ننهي الموضوع دا من هنا 😊🤚
رد لي بعد مسافه رد نهاي ما اتوقعتو، رد كسر خاطري و فاجأني!
كتب لي :
"انا كمان شايف كدا "
💔💔
سأتركك تمضي، وأمضي أنا أيضًا. لا لأن ما كان بيننا أصبح قليلًا، بل لأن بعض الأشياء، مهما أحببناها، لا يُكتب لها البقاء. وسأكتفي بأنني التقيتك يومًا، وأن قلبي عرف معك شعورًا لن ينكره
يتبع....