
رواية مشاعر ثائرة الفصل الثاني 2 بقلم هدير ممدوح
الحياة لا تعطي الإنسان منا ما يريد، فلا شيء كامل، لكن البعض منا يسعى لإكمال ما يريد.
هتفت سلمى بحدة:
_ بقى كده يا سمر، إنتِ عارفة كويس قد إيه ماما حاسة بالذنب من ناحية هدير، وعارفة إنها شقيت وتعبت علينا.
ردت سمر بضيق:
_ يا ستي عارفة، بس أنا كمان محتاجة حد يفهمني.
حدقت بها سلمى،ثم في تريث:
_ طيب، قوليلي عايزة إيه؟
ردت سمر بحالمية
_ عايزة أتجوز، ويكون ليا شقة لوحدي، هتكون مملكتي الخاصة، وهطلع وأدخل بطقم جديد، وراجل يحبني أوي ويكون سندي.
رمقتها سلمى باستخفاف قائلة:
_ بقى ده كل أهدافك في الجواز، وعبدالعال بقى هو فتى أحلامك اللي هيعيشك في الجنة؟
أجابتها سمر بعناد:
_ آه طبعًا هو، ومش عايزة غيره يا ستي، أهو لا هيخليني متعلقة زي جوز هدير، ولا هيعايرني بأمي اللي بتخدم الناس.
قالت سلمى بامتعاض:
_ أمك عاشت فترة تخدم الناس عشانا، ست شريفة، لا استنت لقمة ولا صدقة من حد، إنتِ تعيشي تفتخري بيها العمر كله.
صاحت سمر بضيق
_ يا ستي فاهمة هو أنا اتكلمت، أنا بس قلتلك اللي فيها.
زفرت سلمى بغيظ قائلة:
_ طيب، يلا قومي راضي ماما وخليكي حنينة كده.
هزت سمر رأسها على مضض، واستقامت واقفة، ثم توجهت إلى الخارج وخلفها سلمى.
جلست سمر بجانب والدتها ، فنظرت إليها نادية بضيق، وأشاحت بوجهها إلى الجهة الأخرى.
مالت سمر بخفة، ووكزتها بكتفها قائلة:
_ خلاص بقى يا نونو، ما تزعليش مني.
نظرت إليها والدتها قائلة:
_ بشرط... جواز من اللي اسمه عبدالعال مفيش.
لم تستطع سمر كتم غيظها، فوقفت قائلة بحدة:
_ لا فيه، افهموا بقى أنا عايزة أعيش مرتاحة، هو لا هيخليني أشتغل في البيوت، ولا هيخليني محتاجة حاجة، أنا عايزة أطلع من الفقر ده.
هتفت نادية بحدة:
_ ادخلي على أوضتك يلا، مش عايزة أشوف وشك غير لما تفوقي لنفسك.
وقالت سلمى بضيق
_ بقى ده اللي اتكلمنا فيه.
نظرت سمر إليهما بغضب، وغادرت من أمامهما.
فقالت سلمى بلين:
_ ما تزعليش روحك يا ماما، بكرة تهدى مع نفسها.
هزت نادية رأسها وقالت في هدوء :
_ روحي يا بنتي، غيري هدومك واتغدي، وسيبيني مع نفسي شوية.
زفرت سلمى بقلة حيلة، وابتعدت من أمام والدتها.
صلي على محمد 🌺
تمسكت هدير بطفلها جيدًا، وحاولت تخليص يدها منه وهي تقول بحدة:
_ لو ماسبتش إيدي حالًا، هكون مصوتة ولمّة عليك الناس.
قال محروس بصوت بدا مستفزًا:
_ طيب صوتي كده، ده أنا كنت هسجل صوتك وأعمله منبه...
جاءهم صوت امرأة على غفلة، كانت تنظر من أعلى شرفتها:
_ أنت يا واد يا محروس، بتعمل إيه يا منيل؟
رفع محروس نظره إلى الأعلى قائلًا:
_ ادخلي إنتِ جوة يما، وما تتدخليش.
في تلك اللحظة، سحبت هدير يدها بحدة، وقالت بامتعاض وهي تبصق بجانبه:
_ ابقى ربي ابنك يا حجة.
ومرت من جانبه وكأن شيئًا لم يكن، ونظر هو إليها وهمس:
_بكرة تندم ياجميل.
بعد قليل، وصلت هدير إلى منزل زوجها، ولجت إلى الداخل، فخرجت حماتها من غرفتها وقالت وهي تستند إلى الباب:
_ بت يا هدير، راجعة ليه بدري؟
خطت هدير إلى الداخل، ووقفت أمامها، ثم ردت قائلة:
_ جابوا حد تاني يشتغل.
رفعت صابرين حاجبها قائلة:
_ بلا وكسة، وهو ده شغل كان جايب همه،
هبقى أخلي حسن يشوفلك شغلانة أحسن.
ردت هدير بخفوت:
_ ماشي يا خالتي، أنا هطلع أنيم علي عشان نام.
صاحت صابرين قائلة:
_ لا استني، كان ليا متين عندك، أكيد خدتي حسابك.
أجابت هدير بهدوء:
_ دول هما ستمية ، يادوب مصاريف لعلي.
قالت صابرين بفظاظة:
_ لا يروح خالتك، أنا ماليش في الكلام ده، أنا كمان معذورة ومحتاجة مصاريف.
لم تتفوه هدير بحرف، بل فتحت حقيبتها التي كانت معلقة على كتفها قبل أن تغادر، وأخرجت فئة من المئتين، وقالت:
_ أهو، اتفضلي
أخذتها صابرين قائلة:
_ من يد ما نعدمها يا حبيبتي.
زفرت هدير بقلة حيلة، وتوجهت إلى الأعلى.
سبحان الله وبحمده🌺
و جاء يومٌ آخر دون أي أحداث تُذكر..
في الصباح...
في إحدى مراكز العلاج الطبيعي، توجه شابان برفقة مازن إلى المركز، وحملاه على كرسيه بينهما، ثم دخلوا إلى غرفة الطبيب، و التي كانت تجلس خلفه بقليل سلمى، بابتسامة مشرقة وتعابير سعيدة في أول يوم لها في العمل.
سلّم عليه الطبيب بترحيب، ثم قال الطبيب محمود بعدما أعطاه أحد الشابين أشعاته، وأخذ ينظر إليها، وكذلك تمكنت سلمى من النظر إليها،وقال الطبيب:
_ اللي حصل يا مازن بعد الحادث كسر معقد في عظمة الفخذ، قريب من مفصل الركبة..
هز مازن رأسه بخفوت، ولم ينبس بشيء.
فتابع الطبيب:
_ الحادث ده من شهرين ، وإنت طبعًا قصرت في العلاج الطبيعي و أخرته.
لم يلقَ الطبيب ردًا منه، فتابع حديثه:
_ رجلك كويسة يا مازن، وهترجع زي الأول وأحسن الموضوع محتاج شوية وقت، ولو بدأت من بدري كنت هتلاقي نتيجة ترضيك، بس مش مشكلة، هنبدأ معاك من الصفر، ومش عاوز بقى أشوفك تاني على الكرسي ده.
رد مازن باقتضاب:
_ اللي شايفه اعمله.
قال محمود بثبات:
_ هنمشي معاك خطوة بخطوة لحد ما تستقر، وهتكون معاك في الرحلة دي دكتورة سلمى، سلمى من أكفأ الطلاب عندي، وهتكون مسؤولة عن الجلسات بشكل خاص.
رفع مازن نظره إليها، فقابلته بابتسامة جميلة، فأشاح نظره عنها قائلًا:
_ ودي جاية مخصوص تتدرب فيَّا؟
غابت البسمة عن وجه سلمى، وقال محمود ليحسم الأمر:
_ دلوقتي موعد جلستك يا باشمهندس مازن، و أخب أوضحلك العضمة بدأت تلتئم ، لكن متستعجلش يا مازن عضلات رجلك ضعفت جدًا خلال الفترة اللي فاتت، والركبة لسه محتاجة تستعيد حركتها.
دق الطبيب الجرس، فدخلت فتاة، فقال الطبيب:
_ نهى، خدي أستاذ مازن في الأوضة اللي جهزتوها.
هزت نهى رأسها وقالت:
_ اتفضلوا معايا.
خرج مازن برفقة الشابين.
نظر الطبيب محمود لسلمى،وقال:
_مش عاوزك تزعلي من أي كلمة هتقابلك، ممكن هنشوف من كده كتير، ومازن حالته النفسية مش أحسن حاجة، و لو في أي حاجة ضايقتك، قوليلي.
أماءت سلمى برأسها،وغمغمت:
_ خير إن شاء الله يا دكتور.
هز محمود رأسه بإبتسامة، وخرجت سلمى.
بعد ثوانٍ قليلة، دخلت سلمى إلى غرفة مازن، فوجدته مستلقيًا، ويقف أحد الشابين عند رأسه، الذي أومأ في هدوء ما إن دخلت، وقال:
_ هستناك تخلص يا مازن.
رد مازن :
_ تمام يا محمد.
خرج المدعو محمد تحت أنظارها، وأغلق الباب خلفه.
دنت سلمى منه، وأمسكت بقدمه على حين غفلة، فقال هو بضيق:
_ مش تفهميني هتعملي إيه؟
تبسمت سلمى في هدوء قائلة:
_ هقيّم الأول الحركة، وهبدأ بشوية تمارين خفيفة.
أومأ مازن برأسه، ورفعت هي قدمه قليلًا وبدأت تحركها، وعمّ الصمت المكان.
ليتأوه بعد قليل، وقال باعتراض:
_ براحة يا بتاعة إنتِ.
لترد سلمى في برود:
_ بجاحتك اللي بتخبي وراها ألمك دي مش هتنفعك.
قال مازن بذهول، وهو يشير إلى نفسه:
_ أنا بجح؟
عقدت سلمى ساعديها أمامها بعدما تركت قدمه، وقالت:
_ أيوة، جاي مكشر وزعلان وغضبان من الدنيا، عاوزة أفهم كل ده ليه... عشان الابتلاء اللي إنت فيه ده؟
رد مازن بإنفعال:
_ إنتِ مش عايشة بدالي، عشان كده بتتكلمي وخلاص.
ردت سلمى بثبات:
_ و انت جربت تعيش مكان إنسان هيعيش حياته بالوضع اللي كانوا مدخلينك بيه ده، جربت تزور مستشفى الأطفال للسرطان عشان تستشعر نعم ربنا عليك؟
قال مازن بتبرم:
_ آه، إنتِ بقى عاوزة تقولي إني شخص معندوش دم ولا صبر ولا...
قاطعته سلمى قائلة بعجل:
_ لا خالص يا أستاذ مازن، أنا بس بحاول أقولك إن المحنة اللي إنت فيها دي هتعدي، المهم تكون فهمت الدرس.
أشاح مازن بوجهه إلى الجهة الأخرى قائلًا:
_ ياريت يا أستاذة تشوفي شغلك.
صاحت سلمى وهي تعاود عملها:
_ أنا مش أستاذة، أنا دكتورة.
ليرد مازن وهو يرمقها شزرًا:
_ وأنا مهندس، مش أستاذ.
و تبسمت سلمى في هدوء على عناده، وأكملت عملها، أما هو فكان يختلس النظر إليها بين حين وآخر...
لا حول ولاقوة الابالله العلي العظيم 🌺
خرجت السيدة أميرة من غرفة نومها، ووقفت متجمدة في مكانها وهي ترى هذا المشهد؛ علياء تفترش الأريكة مستغرقة في النوم، والأرضية مليئة بقشر البذر، والطاولة بجانبها يعلوها فنجان القهوة المسكوب نصفه.
امتعضت أميرة من هذا المشهد، ودنت منها، وقالت بصوت حاد وهي توقظها:
_ علياء، علياء، إنتِ يا بنتي...
رفرفت علياء بأهدابها، واتسعت عيناها بدهشة وهي تنظر إلى والدة زوجها، وقالت بامتعاض وهي تعتدل في جلستها:
_ إنتِ بتعملي إيه في أوضتي، ما تعرفيش حاجة اسمها خصوصية.
زفرت أميرة بضيق وقالت بثبات:
_ بصي حواليكي الأول، وإنتِ تعرفي أنا واقفة فين.
قطبت علياء حاجبيها، ونظرت حولها، ثم قالت بلا مبالاة:
_ يمكن نمت من غير ما أحس.
قالت أميرة في هدوء:
_ طيب يا بنتي، قومي لمي الزبالة اللي حواليكي دي، و رني على حد من إخواتك يجيب سيف، أصله واحشني أوي.
استقامت علياء واقفة وقالت:
_ لا، أنا مش هلم حاجة، نبقى نشوف شغالة، وسيف هيقعد لآخر الأسبوع.
احتدت أميرة:
_ يعني يا بنتي الشقة هتفضل كده، تقلب تعدل؟
قالت علياء ببرود وهي تمر من أمامها:
_ خلاص، اعمليها إنتِ.
زفرت أميرة بقلة حيلة، وصمتت.
لا حول ولا قوة إلا بالله العلي العظيم🌺
في شقة السيدة نادية...
تعالت طرقات عالية على الباب، فصاحت من داخل المطبخ:
_ إنتِ يا مقصوفة الرقبة، قومي افتحي الباب.
في الصالون، استقامت سمر واقفة وهي تقول بتأفف:
_ أوف، طيب هفتح.
فُتح الباب، وظهرت من خلفه فتاة في نفس عمر سمر، فعانقتها سمر بود قائلة:
_ أخيرًا جيتي.
همت الفتاة بالرد، فجاءها صوت والدتها قائلة:
_ مين يا بت؟
ردت سمر بصوتً عال:
_ دي هالة يا ماما.
دخلت هالة مع سمر إلى الصالون، وفي تلك اللحظة خرجت نادية من المطبخ وقالت بابتسامة :
_ أخبارك إيه يا هالة؟
ردت هالة قائلة:
_ بخير يا طنط، تعالي اقعدي معانا شوية
لوت سمر فمها بحنق قائلة:
_ بتحضر الغدا لدكتورتنا العظيمة.
ألقت نادية نظرة حادة عليها..
وتساءلت هالة بفضول:
_هي سلمى بتشتغل.
أردفت نادية بفخر:
_ شغالة في مركز كبير، مساعدة دكتور، وبكرة تتخرج وربنا يكرمها وتفتح مركز خاص بيها.
هزت هالة رأسها ، وقالت سمر ساخرة:
_ تفتح مركز، هو إحنا لاقيين ناكل.
قالت نادية بعصبية:
_ أعوذ بالله من لسانك، قولي الحمد لله إحنا حالنا أحسن من غيرنا.
وتابعت بحدة :
_ إنتِ على طول لسانك بينقط سم كده.
وقفت سمر بغيظ، وجذبت يد صديقتها قائلة:
_ مش هنعرف نتكلم هنا، تعالي جوة يلا.
وولجتا إلى الغرفة تحت نظرات والدتها الغاضبة.
أغلقت سمر الباب خلفها، فقالت هالة:
_ يالهوي، طنط نادية شكلها كانت عايزة تولع فيكي.
ردت سمر بلا اكتراث:
_ فكك منهم، المهم أخبار عبدالعال إيه؟
أجابتها هالة:
_ عبده أخويا كويس، بس إنتوا محدش رد علينا، كده هتخلي أمي تغض النظر عنك وتشوفله واحدة تانية.
هتفت سمر بعجل:
_ لا، واحدة تانية إيه أنا ما صدقت هطلع من الفقر ده وأخلص، بس مش عارفة أقنعهم إزاي.
ابتسمت هالة قائلة بغموض:
_ أنا هقولك إزاي...
🌺🌺🌺🌺🌺
في منزل السيدة أميرة...
أخرجت أدوات التنظيف، وشمّرت أكمامها، وراحت تدور في الشقة حتى نظفت ما استطاعت تنظيفه.
شعرت فجأة بدوار يداهمها، فاستندت إلى باب الشقة قائلة وهي تحدث نفسها:
_ إيه يا أميرة، هنخيب على الحتة اللي فاضلة دي.
وأخذت تمسح مقدمة الباب، ثم عادت إلى الداخل، ولكن فجأة، ومن دون سابق إنذار، انزلقت قدمها وسقطت على وجهها، مستندة على كف يدها، وصرخت صرخة شديدة من الألم.
انتفضت إحدى الجارات فزعة على صوتها، وصعدت إلى الأعلى، كانت فتاة في ريعان عمرها، واتسعت حدقتاها حين رأتها تفترش الأرض أمامها، فصاحت في قلق:
_ طنط أميرة...
وتابعت وهي تنادي بصوت عالٍ:
_ محمد، يا محمد...
بعد دقائق، صعد شاب إليها، ومال بجذعه قائلًا:
_ خلينا نقومها يلا، حاولي معانا يا أم عبدالرحمن.
قالت أميرة بصراخ:
_ كفّة إيدي يا بني، مش قادرة أحركها.
هتفت الفتاة بتخمين:
_ يمكن اتكسرت...
عاونوها معًا، واستقامت واقفة وهي تبكي ألمًا كالطفل.
في تلك اللحظة، خرجت علياء قائلة:
_ إيه ده، حصل إيه؟
رمقتها الفتاة بضيق:
_ إنتِ اللي فينِك كلده، حقيقي أنا مكنتش فاكراكي كده.
رفعت علياء حاجبيها ببرود قائلة:
_ إيه كنت نايمة، هو أنا مفروض أحرسها يعني.
هتفت أميرة من شدة الألم :
_ يا بنتي، الحقوني، أبوس إيدكم، أنا هموت.
قال الشاب محمد:
_ الكلام ده بعدين يا نجوى، خلينا نطمن على طنط الأول.
وقالت علياء:
_ طيب استنوا، هلبس وأجي معاكم.
رمقتها نجوى بغضب، وغادروا من أمامها.
هتفت علياء بحنق قائلة:
_ روحة بلا رجعة، عقبال ما أخلص منك خالص.
🌺🌺🌺🌺
في منزل مازن...
كان مستلقيًا على فراشه، وبيده هاتفه، حين دخل مدحت إليه قائلًا:
_ عامل إيه بعد الجلسة
ترك مازن الهاتف بجانبه، ورد:
_ بخير الحمد لله، لسة ما روحتش المعرض يعني.
دنا مدحت منه وجلس على الفراش بجانبه، وقال:
_ هروح دلوقتي، بس قلت أعدي عليك الأول، إيه رأيك في مركز دكتور محمود، الدنيا تمام؟
تذكر مازن سلمى، فابتسم تلقائيًا وهو يتذكر عينيها الخضراوين، وتلك الغمزة التي زيّنت ذقنها لتزيدها جمالًا، وبشرتها الخمرية، لا ينكر أن تلك الفتاة شغلت جزءًا من تفكيره، ولا يعلم لماذا.
تطلع إليه مدحت بدهشة من صمته المفاجئ، وتحدث:
_ بلغت دكتور محمود نخليك تروح جلستين في الأسبوع بدل تلاتة، عشان ما تزهقش.
هز مازن رأسه، وشعر بالضيق من هذا القرار، ثم عاد لبروده قائلًا:
_ تمام، و زي ما اتفقنا لو حسيت للحظة إني مش مرتاح، هسيب الدكتور ده.
هتف مدحت في هدوء:
_ اللي إنت عاوزه هيحصل، وكمان بفكر أروح معاك الجلسة التانية.
وتابع حديثه وهو يربت على كتفه قائلًا:
_ هسيبك ترتاح دلوقتي، بس خليك عارف إني هعمل المستحيل بس تطلع من الحالة دي.
زفر مازن بعمق بعدما غادر مدحت، وقال بوجع تجلى في نبرته:
_ محدش حاسس باللي أنا فيه.
استغفر الله العظيم واتوب إليه 🌺
في العيادة الخاصة لجراحة العظام، كانت السيدة أميرة على فراش الكشف، وعلياء انضمت إليهم بعد حين.
قال الطبيب وهو يلف يدها بالجبس:
_ الجبس هيفضل كده لشهر ونص هكتبلك على نوع مسكن تاخديه عند اللزوم عشان الألم، وألف سلامة يا حجة أميرة.
هزت أميرة رأسها بهدوء، وأخذت نجوى روشتة العلاج من الطبيب قائلة برسمية:
_ السلام عليكم.
رد الطبيب السلام، وخرجوا جميعًا.
هتفت نجوى ما إن أصبحوا خارج العيادة:
_ لازم تبلغي عبدالرحمن باللي حصل يا طنط.
هتفت أميرة بعجل:
_ لا يا بنتي، بلاش أخضه، محدش يقوله حاجة، هو عشر أيام كده وهيخلص شغل و ينزل.
تحدثت علياء بضيق:
_ أنا مش عارفة أصلًا إيه اللي خلاكي تنضفي الشقة، ولا بتعملي كده عشان أطلع أنا الشريرة قدام عبدالرحمن، ما أنا عارفة شغل الصعبنيات ده.
رمقتها أميرة بغضب قائلة:
_ أخص عليكي، بقى أنا بعمل صعبنيات؟
وهتفت نجوى:
_ عيب كده يا علياء.
قالت علياء بامتعاض:
_ أنا اتخنقت، هو إحنا هنقف كتير؟
أردفت نجوى بحدة:
_ محمد هيجيب العربية وجاي، لو مستعجلة أوي، وقفي تاكسي وامشي.
رفعت علياء حاجبيها بكبر:
_ يكون أحسن، أنا هروح عند مامي يومين، أهلي وحشوني.
همّت نجوى بالحديث، فقبضت أميرة على يدها كي تمنعها، وغادرت علياء من أمامهما.
قالت نجوى بعصبية:
_ أنا مش عارفة إزاي مستحملة أسلوبها، لازم عبدالرحمن يكون عنده علم بده.
تحدثت أميرة بلا مبالاه:
_ الله يهديها يا بنتي، أنا بس هطلب منك تشوفيلي واحدة أمينة تنظف الشقة وتعملي لقمة.
ردت نجوى:
_ حاضر، أنا هكلم أم عماد اللي بتيجي عندي، وأشوفهالك لو فاضية، أو تبعت حد من طرفها.
هزت أميرة رأسها قائلة:
_ كتر خيرك يا بنتي.
وتوقفت أمامهما سيارة الشاب محمد، ليغادروا معه.
يتبع...
دمتم بخير 🤍.
الفصل الثالث من هنا