رواية وردتي السوداء
الفصل التاسع والعشرون 29
بقلم/سمية عامر
فضلت نورين بصاله بس هو فاجئها برد فعلة و أخدها في حضنة و بص لام ماجد : انا متاكد ان عمرها ما تعمل كده لأنها بتحبني
ام ماجد : بكره هتشوف لما تلاقيها مع غيرك في السرير
اتعصب و كان هيضربها بس نورين مسكته
وصلت عربية الإسعاف و البوليس بعد ما بلغ يوسف بكل حاجه و سمعهم تسجيلات الاعتراف بتاعت الدكتور و ام ماجد
فضلت نورين تبص عليهم وهما في البوكس و بصت لعبد الملك : الحمدلله كل الوجع راح
باس راسها و ابتسم : طول ما احنا سوا مش هيبقى في وجع
ابتسمت و حضنته : طب مش يلا نتجوز بقى
بعد عبدالملك عنها : سيبيني افكر كده
ضر"بته على كتفة: نعم ؟؟ خلاص مش عايزة
مشيت و سابته بيجري وراها : استني .. كنت بهزر يا مجنونة .. طب يا ام العيال .. يا بطاية
عدى شهر و لبست نورين فستان ابيض ستان بسيط و نزلت وهي حوليها عيالها و كان ابوها جه و كتبو الكتاب من جديد وسط زغاريط سحر و مرات يوسف
قرب عبدالملك منها وهو باصص في عيونها : عمري ما هطلقك تاني ابدا ايه كل الحلاوة دي ها ها
بس بقى بتكسف
ضحك و حضنها و همسلها : بتتكسفي ايه هو احنا لسا عملنا حاجه
فاق من الرومانسية دي على صوت مرات يوسف وهي بتصوت : اااااااه الحقووووني انا بولللللد
بعد عبدالملك عنها : ايه احنا هنهزر ولا ايه ده يوم الدخلة .. ما تشوف مراتك يا عم !!
نورين : عبدالملك بس بس اتصل بالاسعاف بسرعة لازم نروح المستشفى
إسعاف ايه انتي ملكيش دعوة اطلعي استنيني فوق
مرات يوسف مسكت فيها : الحقيني يا نوررررررين مش قااااادرة
شالها يوسف و طلع يجري بيها و سحر وراهم
نيرة لابوها : يا عم اجري وراهم اعمل حاجه ...
عبدالملك بنظرات حزينة : ما انا كنت هعمل حاااااجه
نور الدين : كل الرجالة كده مفيش فايدة كسفتنا
بس يا حبيبي انت و اختك انتو مش فاهمين حاجه
ضحك ايمن على عيال اخوه و خدهم يلعبو معاه
خرج عبدالملك وراهم و ركب العربية وصل بيهم للمستشفى
نزل يوسف و هو شايل مراته و نورين نزلت اخر واحده
مسكها عبدالملك : اركبي اركبي بسرعة
ضحكت على طريقته : انت بتعمل ايه مرات اخوك بتولد
و اااااحنا ماااالنا بس انتي قولتي اهو مرات اخوك
مسكت أيده و شدته وراها : تعالى بس الله يسترك فضحتنا
دخلو جوا و فضل يوسف واقف قلقان
عبدالملك : يابني انت قلقان ليه هتطلع بالسلامة ان شاء الله
يوسف : ان شاء الله
فضلت سحر تقرأ قرأن و تبص عبدالملك و تضحك
نورين : يوسف اهدا بلاش التوتر ده
عبدالملك رد بسرعة : خايفة عليه اوي ها ها .. كنتي خافي على جوزك اللي لسا متجوزك من عشر دقايق و هيطلقك ان شاء الله
ضحكت و مسكت ايد حماتها و نامت على كتفها
عدى ساعتين و فتح الدكتور الباب وهو بيتنهد : الف حمدالله على سلامتها و الف مبروك جابت ولد
فرح يوسف و جري بسرعة عشان يشوفها
فرحت نورين و دخلت هي و سحر وراه اتطمنو عليها و فضلت سحر معاها
خرجت نورين تطمن عبدالملك اللي لقيته اختفى
نزلت تحت مكنش موجود
طلعتلهم تاني و طلبت سحر منها أنها تجيب هدوم من البيت للبيبي
نزلت نورين وقفت تاكسي و وصلت البيت حضرت لبس للنونو و لأمة و خلت البنت تحضر اكل لعيالها
كانت لسا هتخرج بس لقيت اللي بيشدها من ايديها و بيشيلها : مش كفايه بقى كده ولدت بالسلامة