قصة بالحلال
البارت الخامس 5
بقلم ثناء معتز
"ثناء"
تلفوني ضرب وكان في اوضتي .. دخلت اشيلو .. حسيت للحظة اني اتوترت وصوت قلبي دا بقا مسموع في الدنيا كلها لما قريت الاسم .. قلتا بصوت واطي وهزيل : كريم !!
فضلت ماسكاهو في يدي مسافة وانا بعاين ليهو .. بعد قفل الخط رجع اتصل تاني .. رديت : الو
جاني صوتو وهو بقول : عرستي ونسيتيني يعني !!
قلتا ليهو : عفواً !! نسيتك !! شوف اول النسا التاني منو حتى بعد داك تعال اتكلم ،، وخلي بالك هسي انا ما ثناء الانت بتعرفها يا كريم انا زولة متزوجة واياك تفكر تتصل لي او تتواصل معاي بأي طريقة تاني
وقفلت الخط .. دخلت الحمام غسلت وشي وانا بحاول اروق قبل ما ارجع ليهم في الصالون
شريفة : مالك طولتي كدا ؟
هند : وعيونك دي مالا ،، كنتي بتبكي انتي!!
سكت مسافة قبل ما احكي ليهم ..
هند : ثناء !! ما جادة طبعا !! هو دا مفروض تحظريهو خلاص ،، بعدين الموضوع هسي ما لعب يعني انتي ما في علاقة عادية او حب ،، انتي زولة معررسة خلاص مرة راجل الكلام دا ما صح
شريفة : دقيقة ي هند ،، ثناء كدي تعالي جمبي
مشيت قعدت جمبها .. مسكت يدي وهي بتقول : تتذكري لما كنت بضغط عليكي تستخيري كتير قبل العرس !!
قلتا ليها : ااي
قالت لي : وكنتي حاسة بشنو !!
قلتا ليها : مرتاحة وللان مرتاحة وما حاسة اني غلطت في قراري دا
قالت لي : طيب احكي لي كيف عمار معاكي
قلتا ليها : حنين شديد وما بيحبني اكون زعلانة وبدقق في اقل شيء بحصل لي
قالت لي : طيب ما حسّيتي من تصرفاتو دي انو بحبك !!
قلتا ليها : هو ايوة اهتمامو كتير وتصرفاتو حلوة شديد بس تصدقي لي هسي ما قال لي بحبك ودا المحيرني
قالت لي : طيب ولا حصل بينكم شيء الفترة الفاتت دي كلها كمتزوجين !!
قلتا ليها : لا
سكتت مسافة قبل ما تقول لي : طيب وانتي
قلتا ليها : وانا شنو !!
قالت لي : حاسة بشنو اتجاهو!!
قلتا ليها : طيب شوفي ،، انا بكون متطمنة شديييد وانا جمبو ولما أتضايق وهو معاي بحس أني م خايفة وبروق سريع ،، كل ثانية بكون فيها جمبو بتحسسني اني تمام والأمور حولي كلها تمام ،، ببساطة يعني الحياة معاهو بسيطة وكلها ضحك وتفاهم
ابتسمت وهي بتقول لي : يعني كدا وكدا !!
فهمتها .. فضلت بعاين ليها مسافة قبل ما اقول : ما بعرف ،، والله ما بعرف
شريفة : لا يعني هسي انا لو قلتا ليكي خلي عمار دا
سكت مساافة وقلتا ليها : ما بقدر
هند ضحكت وهي بتقول لي : ما هو دا الكلام يا هبلة
شريفة : عايني ي بتي عشان ما تجننيني معاكي ،، ثناء دا عرس عرس وانتو عرستو خلاص راجل ومرتو يعني الزول دا حلالك بي كلووو حبي واضحكي واتجنني ،، حلاااالك دا خلاص ،، انتي فاهمة كلامي دا صح !!
قلتا ليها : ايوة
قالت لي : يلا ابقي شاطرة واعرفي انبسطي في حياتك دي
عاينت بعيد وانا بفكر في كلامها .. وبعد حكاية ساعتين من الونسة وكدا هم مشو .. اول حاجة عملتها صليت ركعتين ودعيييت مسافة .. ما بعرف حسّيت بشنو لحظتها بس شلتا تلفوني ومسحت كل المحادثات البيني وبين كريم ووصورو وعملت ليهو حظر من اي مكان قبل ما امسح رقمو هو كمان .. دخلت على رقم عمار وسميتو ( حلالي ) .. قبل ما اخت الويلبيبر حقت تلفوني صورتنا سوى بالجرتق يوم العرس
جبت بعدها اوراق كتيييرة وبديت اخطط لشغلي الجديد وانا عايزة اجيب شنو وابدا أعلن عنو كيف وكدا .. لقيت عدت حكاية ساعة ونص قمت صليت ودخلت المطبخ اعمل لي كم حاجة قبل ما عمار يجي ..
شوية وسمعت صوت الباب فتح .. مشيت ووقفت جمب باب المطبخ قبل ما اضحك واقول ليهو : مساء مساء يا دكتور🌚
التفت علي وهو بضحك قبل ما يقول : اااالله شكلو المزاج فلة الليلة
قلتا ليهو : شديييد ،، يلا استحمى سريع وتعال علشان ناكل سوى ..
قال لي : تمام
بعد حكاية ربع ساعة كدا طلع وقعدنا مع بعض .. مع الاكل وونستنا دي .. عمار قال لي لما نخلص اكل البسي اقرب توب او عباية عشان طالعين
سألتو بإستغراب : وين
قال لي : بطلي شفقة بتعرفي بعد نطلع
عاينت ليهو كدا👀
هو كان بياكل ومنزل عيونو .. قال لي : اكلي ما تعايني لي
ضحكت وكملت اكل .. بعد خلصت غسلت العدة سريع ومشيت لبست لي توب عادي وطلعت معاهو .. بعد حكاية ربع ساعة وصلنا محل كبيير كدا .. نزلنا ودخلنا .. كان كلو عبارة عن صناديق شكلها حلو وورد مجفف وشرايط ولماع وورق ملون ..
التفت وهو بقول لي : شيلي كل المحتاجاهو عشان من بكرا تبدي شغلك عارفك ما بتحبي القعاد ساي
فضلت بعاين ليهو مسافة ..
قلتا ليهو : عمار !!
ابتسم وهو بقول لي : كل العايزة تقوليهو قوليهو لما نرجع بيتنا .. (( مسك يدي )) قبل ما يكمل كلامو وهو بقول : هسي خلينا نجيب الحاجات الانتي عايزاها
فضلنا لافين قريب ساعة ونص ف المحل وانا بشتري في حاجات .. ما قادرة اوصف قدر شنو كنت مبسوطة ومندهشة في نفس الوقت معقول عمار دا كدا بجد !! .. طيب البت الكان بحبها ديك كيف قدرت تخليهو !! هو زول زي دا بتساب !!
بعد شلتا الحاجات ونحن راجعين .. كنت بعاين ليهو طول الوقت في العربية وانا بفكر في حاجات كتيرة .. ضحك وهو بقول لي : لو فضلتي تعايني لي كدا ممكن نعمل حادث التفتي يا بتي النبي
ابتسمت ابتسامة خفيفة والتفت عاينت بالشباك ..
لما وصلنا نزلنا الحاجات وطلعناها فوق .. عمار دخل الغرفة وانا كنت بطلع الحاجات في الصالون بشوف فيها ومبسوووطة .. شوية ومشيت براحة على الاوضة دخلت كدا لقيتو طلع قميصو وداير يلبس فنيلة عادية .. التفت دايرة امرق قال لي : ثناء
قلتا ليهو بتوتر : ن ،، نعم معليش بس ما..
سكتّ لما حسيتو جاي علي .. وقف قدامي ورفع وشي بيدينو .. كان بعاين لي جوا عيوني .. وانا ما بعرف حصل شنو لحظتها .. بس ما رف لي رمش ولا لثانية بس بعاين ليهو .. يمكن عدت دقايق ونحن بالشكل دا .. قلبي بقا بدق شديد وحاسة الجو حوليني مسخن وكأني ما سامعة اي شيء غير صوت انفاسي وانفاسو ..
ابتسم قبل ما يقول لي : الجمعة الجاية ما ترتبطي بأي برنامج تمام !!
سألتو : لي
قال لي : حتعرفي ما قلتا ليكي انتي شفقانة
جضمتو وانا بزح وشوو وبقربو كل شوية وبقول ليهو : انااا مااا شفقااانننة ياا ولد
بقا بضحكك وانا ضحكت في منظرنا .. فكيت وشو ومسكتو من يدو وقلتا ليهو : تعال معاي
مشينا الصالون .. طلعت التوب ختيتو في الكنبة وجيت رصيت بقية الحاجات في التربيزة وبقيت بحكي ليهو عن اني من بكرا حسوي شنو واعمل شنو وبي دا حعمل كدا وبي داك حعمل كداا وو..
سكتّ لما التفتّ ولقيتو تاكل راسو على يدو وهو بعاين لي .. وقفت شوية قبل ما امشي واقعد جمبو .. ما عارفة كنت بسوي في شنو .. مسكت يدينو وانا بعاين ليهو جوا عيونو مسافة .. ابتسمت قبل ما اقول ليهو : شكراً ،، بجد شكراً يا عمار
قال لي : عايزة تشكريني على دا !! وهو اصلاً من حقك !! انتي مرتي يا هبلة
قلتا ليهو : ما على الحاجة دي او غيرو ،، عشان انت بقيت في حياتي ،، وعشان انت معاي انا كدا ،، شكراً بجد يا عمار لانو كل لحظة قضيتا معاك من اول يوم لي هسي ما حسستني ولو للحظة اني غلطت في قراري بي اني اكون معاك
عاين لي مسافة قبل ما يجرني ويخت لي راسي في رجولو .. بقا بلعب لي في شعري وهو بقول : اسكتي خلاص عايز انوم
حيوان خلاص
ضحكت قبل ما اقول ليهو : طيب تمام
" عمار "
صحيت الصباح وعاينت ليها وهي خاتة راسها في رجلي ونايمة .. زحيت ليها شعرها من وشها قبل ما اقرصها على خدها براحة واقول ليها : مرتي الظريفة لو اتكرمتي ممكن تقومي تعملي لي شاي عشان طالع
قامت وهي بتحك ف عيونا قبل ما تقول لي : حاضر
ودخلت الحمام
ضحكت ودخلت الحمام التاني .. شوية طلعت ومشيت البس لقيتا مجهزة لي لبسة وخاتاها لي ف السرير ومعاها ساعة .. ابتسمت كدا .. لبستها وعملت كم حاجة سريع قبل ما امشي المطبخ اشوفها .. لقيتا مجهزة الشاي وطالعة .. وقفت مسافة وهي بتعاين لي .. ابتسمت قبل ما تقول : حلوة اللبسة عليك
قلتا لييها : اصلاً انا اي شيء فيني حلو
وشلتا الكباية ومشيت قعدت .. جات قعدت معاي وبقينا بنتونس سوى .. قبل ما اطلع سمعتها بتقول لي : عمار
التفت وقلتا ليها : ايوة !
قالت لي : الليلة حتتأخر ولا حتجي بدري !!
قلتا ليها : ما معروف والله ،، لي !!
قالت لي : لا ولا شيء ،، حبيت اسأل بس
ابتسمت قبل ما اقول ليها : طيب ،، يلا سلام
وطلعت اتحركت على العيادة ..
لما وصلت نزلت ودخلت جوا وانا بدندن ومبسوط .. جاني صحبي سامي وطلعنا نشرب لينا جبنة قريب من العيادة .. ونحن بنتونس كدا قال لي : اها اخبار المدام شنو !!
قلتا ليهو : كووويسة الحمدلله
ضحك وهو بقول لي : يعني نقول الامور سمبتيكة والموضوع داك خلاص !!
سكت مسافة وانا بحاول أأكد على كلامو فسألتو : اي موضوع !!
قال لي : شذى
فضلت بعاين ليهو مسافة واتوترت شوية .. قلتا ليهو : الموضوع دا اتقفل خلاص وانا ما عندي ليها اي شيء بعد دا
ضحك وقال لي : روق روق ي حبيبنا م قلنا شيء المهم هسي انك مبسوط ودا الانا عايزو
ابتسمت ليهو وانا تفكيري مشا مكان تاني ..
" المساء "
رجعت البيت وفتحت الباب لقيت المكان مضلم .. قلتا معناها الكهرباء قطعت او خلصت .. بس انا اتأكدت من العداد الليلة الصباح يعني في كهرباء يبقا معناها قطعت بس .. لما دخلت جوا وانا بنادي على ثناء .. ما كانت بترد .. قلقت وقلتا يمكن مرقت بس انا نبهتها لو مارقة اي مكان بس تكلمني عشان اكون على علم .. وانا بنادي فيها كدا دخلت الاوضة .. فجاة المكان ضوا .. طلعت برا لقيت في كم بالون بالألوان .. وصورنا نازلة معلقة بي خيوط خفيفة .. والتربيزة كان فيها كم عطر وعلى الله بالالوان وكم لبسة وكذلك جزم وساعتين و ٣ خواتم .. سمعت صوتها وهي بتقول : حبيتهم !!
التفت عليها وانا حقيقي اللحظة دي حسّيت روحي في دنيا تانية .. كانت لابسة فستان اسود قصير ورافعة شعرها لفوق .. لابسة حلق فضي طويل وسلسل فضة رقيق .. وعاملة عطرها المعتاد .. يعني فضلت بعاين ليها مسافة كدا .. البت دي غريبة .. مرات بتديني احساس انها طفلة .. طفلة شديد .. اكتر واحدة بتعرف متين وكيف تغير شكلها
وطريقتها في التعامل .. مشيت عليها ووقفت قدامها وانا بقول : انتي عملتي كل دا
ابتسمت قبل ما تقول لي : ايوة
مسكت يدي وودتني على البلكونة .. لقيتا عاملة شاي وكيك .. عاينت ليها وانا بقول : امم ممكن اقول شيء
قالت لي وهي بتخت الكيك في صحن وبتكب الشاي : اتفضل
قلتا ليها : الليلة طالعة ،، يعني ما بعرف بس كلمة حلوة بسيطة عليك
التفتت علي وهي بتعاين لي جوا عيوني مسافة .. يا ريتها ما عاينت لي كدا عيونا .. عيونا كون تاني .. كيف بتقدر تعمل كل دا في الزول .. كيف !!
ضحكت وهي بتقول : حلوة عيونك ،، بعدين عشان انا مرت دكتور عمار لازم اكون حلوة كدا ولا كيف
لما قالت كدا انبسطت شديد .. ضحكت وانا بقول ليها : فعلاً فعلاً
قعدنا وشربنا الشاي ونحن بنتونس .. شوية وبقيت اهبش ف جيوبي ما عرفت ختيت تلفوني وين .. قلتا ليها تتصل علي فيهو .. كان في جرس بس برضو صوت تلفوني ماف قلتا ليها : ممكن تلفونك اتصل بيهو تحت عشان اشوفو ف العربية
قالت لي : طيب
ادتني ليهو وانا نزلت لما فتحت العربية فتحت تلفونها وضربت بيهو للحظة سرحت مسافة وانا بعاين ف الاسم المسجلاني بيهو حلالي سمعت صوت تلفوني عرفتو وين شلتو وامنت العربية وطلعت فوق جري .. لما دخلت قالت لي : لقيتو !!
هزيت ليها راسي ورجعت ليها تلفونا ..
شالتو وقالت لي : يلا خلينا نقعد محل ما كنّا قاعدين
قلتا ليها : طب يلا
ورجعنا البلكونة .. وانا بس بعاين ليها وهي بتتكلم وبتحكي وبتضحك .. سألتها : انا منو
قالت لي : كيف !!
قلتا ليها : امم كدا عديل
قالت لي : راجلي عماروصديقي الصدوق وهكذا
ضحكت وقلتا ليها : وحلالك
قالت لي : كيف
شلتا تلفونا وفتحت رقمي ولفت التلفون عليها عاينت ليهو وتاني عاينت لي مسافة بنظرات عرفت منها انها خجلانة
" ثناء "
ما بعرف الخلاني اسوي كدا شنو بس ما لقيت نفسي غير اني بقرب منو وبطبع بوسة خفيفة وطويلة على راسو .. رجعت قعدت في مكاني ورفعت عيوني عاينت ليهو .. كان بعاين لي بنظرات استوعبت منها قدر شنو هو انبسط وارتاح واتفاجئ من حركتي دي ..
قلتا ليهو : زي ما وعدتني انك حتكون دايماً معاي ،، اوعدك انك حتلقاني كمان دايماً معاك وسانداك وكل العمر الباقي حنتمو سوى ،، انا وانت
في كلامنا دا .. شالني ومشا بي على غرفتنا .. رقدني ف السرير ورقد جمبي وضماني عليهو ونحن بنتونس بالشكل دا
بعد شوية قال لي : ي حلوة
رديت : عيونا
قال لي : بكرا لازم نمشي لي ناس امي ما قابلتها من جينا ،، تمام !!
قلتا ليهو : بس كدا !! حاضر
ابتسم وهو بقول لي : تحضري ما تغير
" عمار "
صحيت تاني يوم وفتحت عيوني ما لقيتها جمبي .. قمت دخلت الحمام استحميت وجيت طالع .. كالعادة عاينت اتجاه السرير لقيتها مجهزة لي لبستي بتاعت اليوم والساعة والجزمة
جهزت وطلعت برا لقيتها واقفة ف المطبخ ومشغلة بالاسبيكر اغنية : بين الريد والهوى ،، عشنا احلامنا سوى ،، ما قاسينا النوى ،، ما احلاك يا هوى ،، الهم راح وانطوى ،، عِش ريدتنا استوى
وبتغني معاها .. كانت رافعة شعرها لفوق ولابسة هيد باند اسود .. وقميص بيت اصفر .. وهي بتسوي ف الشاي .. فضلت بعاين ليها مدة قبل ما اصفر واقول : اششششي العايز يظهر يلبس اصفر
ضحكت وهي بتخت يدها ف نصها وبتقول : هيييي بِسْم الله كمان دا كلامك
كبت الشاي وجابتو لي .. قعدت شربتو ولما جيت طالع قدمتني للباب .. قبل ما امرق سمعتها بتقول : عمار
التفت وقلتا ليها : ايوة
رفعت نفسها عشان تبقا بمستوى طولي .. باستني في عيوني الاتنين قبل ما تقول : خلي بالك من نفسك ،، واتحصن
انا للحظة اتبكمت وبقيت واقف وغلبني الكلام وبقيت بس بعاين ليها ،، احييي من الشغل دا انا عايز اقعد ف البيت معاها
لما لقتني اتلخبطت كدا قالت لي : احمم انت حي
ابتسمت وانا بقول ليها : مفروض كدا يعني
ضحكت وهي بتضربني على كتفي وبتقول لي : يلا يلا ي ظريف امشي عشان م تتاخر
قلتا ليها : تمام يلا ،، ما تنسي بعدين ناس امي
قالت لي : ما ناسية ما تخاف
ودعتها وطلعت على الشغل ..
وانا ف العربية تلفوني ضرب .. رديت بسرعة لما قريت الاسم وانا بقول : يااا حبيبنا ،، كل شيء جهز !! خلاص تمام تسلم كتير ياخي ،، الله يخليك نخدمك ف الافراح ،، تسلم يلا سلام
قفلت وانا مبسوط .. اااالله ياخي نهاية الاسبوع دا حيجي من خلال
" ثناء "
بعد ما عمار طلع .. اول حاجة عملتها رتبت ونضفت البيت سريع .. قبل ما اقعد واتصل على امي .. ردت علي واتونسنا شوية قبل ما اقفل منها وأقوم اجيب الحاجات الاشتريتها للشغل .. اول شيء عملتو جهزت كم هدية عشان التصوير .. وظبط الإضاءة واصلاً كاميرا تلفوني ظابطة .. صورت كتييير .. وجهزت كلام كتير كمان كتبتو .. خشيت الفيس وبقيت بنزل في مختلف الصفحات والقروبات بوست عن الهدايا دي ومعاها رقمي للطلب .. والحاجة الحلوة اني سايقة يعني من ناحية التوصيل وكل شيء جاهز .. على كدا قفلت التلفون ولقيت الوقت مر .. قمت اختار لي لبسة .. جهزت حاجاتي ودخلت استحميت وجهزت قبل ما اطلع .. سمعت صوت الباب وعرفت انو عمار رجع ..
مشيت الصالون وسلمت عليهو .. كان تمام واي شيء بس جاني احساس انو ف شيء غلط ما بعرف لي
مشا دخل الحمام استحمى وجهز .. بعدها طلع وقال لي : يلا مارقين ..
وفعلاً مشينا ركبنا عربيتو واتحركنا .. طول الطريق بحاول اخد وادي معاهوو ف الكلام شوية يتونس ويضحك وشوية يسكت .. زعلت بجد لاني ما بحب الزول البيتغير فجأة كدا وأبقا ما فاهمة مالو ..
سألتو : عمار مالك !!
قال لي : مالي !!
قلتا ليهو : ما عارفة ما عاجبني زعلان مني انت في شيء !!
قال لي : انتي عملتي شيء يزعلني !!
فكرت مدة قبل ما اجاوبو واقول : ما ظنيت
قال لي : امم كويس
وصلنا بيتهم ونزلنا .. دق الباب وجات فتحت لينا داليا .. فجأة للحظة بقا بضحك وبتونس عادي .. وبتعامل حلو شديد يعني ما نفسو الكان معاي ف العربية .. حاولت أتجاهل القصة وما اركز .. دخلنا وشوية كدا جات خالتو امل وعمو حسام ( ام وابو عمار ) سلمو علينا وقعدنا نتونس كلنا وضيفونا .. ف ونستنا ديك عمو حسام سألني : كيف الشغل يا بتي !!
قلتا ليهو : الشركة يا عمو والله خلاص بقا ماف شغل فيها
قال لي : كيف كيف يعني ي بتي !!
حكيت ليهو ..
قال لي : لي خير يا بتي اصلو كل شيء بحصل فجاة كدا لي خير ،، وربنا بيعوض ان شاء الله
قلتا ليهو : ااي كلامك صح ان شاء الله
داليا قالت : بس شايفاكي قبيل منزلة بوستات كتيرة موضوع شغل هدايا وكدا عجبني شديييد
ابتسمت وانا بقول ليها : تسلمي الله م ضراك
خالتو امل قالت لي : زاتو ي بتي الشغل دا احسن ليكي ما فيهو ضغطة كتيرة وفي نفس الوقت بيفرق عليكي شديد
قلتا ليها : فعلاً بس ربنا يسهلو ان شاء الله
في كل الحصل دا كنت مركزة انو عمار بعاين بس وما قال اي شيء .. ودي الحاجة الخلتني أتأكد انو بجد في شيء وإحساسي ما غلط .. بعد حكاية ساعتين كدا عمار قال لي : نمشي
قلتا ليهو : طيب
قمنا وودعنا اهلو ومرقنا .. طول قعدتنا ف العربية ما سألتو لغاية ما وصلنا وطلعنا البيت
دخلت وهو دخل وراي .. قفل الباب ومشا على المطبخ شرب كباية موية وجا .. انا كنت واقفة قدام التسريحة وبطلع في اكسسواراتي وبطلع ف المكياج .. فكيت شعري وانا للان بحاول أتمالك نفسي وانتظرو يجي يتكلم .. مشا غير هدومو وجا رقد واتغطى بالبطانية وكأنو ما حاصل شيء !! تخيلو بس
زعلت شديد وطوالي مشيت وزحيت منو البطانية وقَعَدت جمبو وانا بقول ليهو : عمار مالك ياخي ف شنو !!
قام وقعد في السرير قصادي وهو بعاين لي وبقول : ثناء مالك ف شنو انتي !!
قلتا ليهو : انت من جيت متغير لغاية ما مرقت الصباح كنّا حلوين مالك جيت راجع قالب وشك وتعاملك
قال لي : طيب اذا انتي شايفة كدا معناها مش في حاجة غلط حاصلة !!
قلتا ليهو : طيب وريني الغلط الحصل شنو !!
قال لي : انا اعترضت على موضوع شغلك !!
قلتا ليهو : لا ابداً
قال لي : طيب منعتك منو !! ولا لقيتيني مشجعك
قلتا ليهو : مشجعني
قال لي : طيب على ياتو اساس بتبدي الشغل كدا وما بتوريني انك ناوية تعملي توصيل لا وكمان توصلي انتي !! ومنزلة رقمك !!
قلتا ليهو : طيب وفيها شنو !!
قال لي : طيب ي ستي انا أفهمك ،، هسي انتي ضامنة انو اي زول بطلب منك دا صادق ونيتو بس يستلم الهدية !! ليه !! عشان شنو تمشي لغاية عندو وانتي بت وما معروف زاتو طالب الهدية ولا طالبك انتي !! ايوة انا بعرف انو كلامي ممكن يكون غريب بس ثناء المجتمع دا نيتو ما صافية فما تتعاملي وكأنو كل شيء حيكون تمام لانو دايماً الحاجات دي بتحصل فيها مشاكل كتيرة ،، وانتي فاهماني كويس صح !!
طبعاً انا بس بقيت بعاين ليهو ومخلوعة .. ايوة فعلاً كلامو ممكن يكون صح بس ما اتوقعت انو زعلان الزعل دا كلو من الموضوع وما جا اتكلم معاي !! عادي كان ممكن يجي ويقول لي انا زعلان عشان كدا ونتفاهم وخلاص ..
وانا بعاين ليهو قال لي : ما عجبك كلامي دا
قلتا ليهو : ما كدا بس اتفاجئت شوية ،، خلاص طيب انا بحاول اظبط الموضوع بصورة تانية
قال لي : ال هي كيف !!
قلتا ليهو : بتفق مع اي زول عايز طلب يقابني مكان ما انا عايزة ومكان يكون مناسب لينا الاتنين
عاين لي مسافة تاني قال : طيب اذا كدا حلو وكويس
قلتا ليهو : يعني خلاص بطلنا زعل !
ابتسم وهو بقول لي : انا بقدر كمان
عاينت ليهو مسافة قبل ما اقول : خلاص تم نومك انا بغير هدومي وبجي
وفعلاً هو رقد وانا مشيت لبست لي بجامة .. طلعت من الغرفة على المطبخ شلتا لي كباية موية ومشيت قعدت في البلكونة وانا بفكر ف الحصل .. دي اول مرة عمار يزعل .. انا ما فاهمة كان في داعي لي كل دا !! حقيقي لما نكون متعودين على اُسلوب حلو معين الطريقة دي بتصدمنابس ما مشكلة حصل خير .
بعد حكاية ربع ساعة كدا .. مشيت على الاوضة ورقدت نمت .