احتوانى كأبنته
البارت الخامس عشر 15
بقلم شذى عبد المكرم
من جانب تالين
اصبحت الصباح مصدعة وتعبانة نزلت تحت لامي
امي: تيلو
تالين: صباح الخير
امي: صباح النور الليلة ما ماشة الجامعة
تالين: امي تعبانة ومصدعة ما بقدر
امي: خلاص حاقعد معاكي
تالين: لالا ما تخلي شغلك انا بقعد عادي وبمشي بعدين لخالتو عفاف
امي: اي امشي ليها ما تقعدي براكي
تالين: تمام . ودعتني ومشت والاولاد مشو المدرسة قعدت براي ما كان عندي نفس حتى اشرب الشاي دخلت غرفتي وقعدت فيها ما عارفة افكر في شنو واخلي شنو لمن نومت تاني عشان انسى دا انسب طريقة للهروب زمن الفطور جا وانا راقدة نايمة صحيت بصوت خالتو عفاف بتنادي طلعت ليها
خالتو عفاف: تيلو تعالي افطري معاي انا براي
تالين: تمام خالتو اغسل وشي واجي
خالتو عفاف: منتظراكي. غسلت وشي ومشيت فطرت معاها بعد الفطور
خالتو عفاف: تعالي حبيبتي جنبي. مشيت قعدت جنبها قالت لي ارقد في رجلها رقدت فيها قعدت تمشي يدها في شعري
خالتوعفاف : احكي لي مالك زعلانة من امجد صح
تالين: اي
خالتو عفاف: ليه
تالين: لانو ما جاب لي السيرة دي ابدا مع انو انا المفروض اعرف اول وحدة
خالتو عفاف: عاتبيهو ما تخليهو
تالين: بس ما من حقي اعاتبو لانو دي حياتو
خالتو عفاف: لالا ما صح لازم تعابيهو وحسسيهو بغلطو
تالين: اوكي حأعمل كدا
خالتو عفاف: ليه حاسة انو زعلك دا اكبر من انو زعلانة بسبب انو ما كلمك اول زول. كان نفسي اكلمها انو فعلا صح كلامها بس سكتا
تالين: خالتو انا بتو المفروض يكلمني وحتى ما عارفة البت منو ما حصل جاب لي سيرة
خالتو عفاف: يبقى لازم تفضي الفي قلبك كلو ما تسكتي كدا حتكوني انتي الخسرانة. سكتا وقعدت افكر في كلامها صح لازم اواجهو. قعدت معاها وواستني لمن امي رجعت من الشغل رجعت البيت بعد العشا مشيت الحديقة الخلفية لانو متأكدة حألقاهو هناك وبالفعل لقيتو قاعد مشيت قعدت جنبو ما عاينت ليهو بعاين قدامي بس
تالين: مبروك. التفت عاين لي بس انا لسع قاعدة اعاين قدامي
امجد: تيلو اسمعيني
تالين: جيت متأخر
امجد: يعني هسي زعلانة. رفعت ليهو حاجبي مستغربة
تالين: زعلانة؟ ههههههه اول مرة احس انو انا ما مهمة عندك
امجد: والله مهمة عندي
تالين: لو كان فعلا كلامك صح كان انا عرفت اول زول. وقومت ماشة مسك يدي وقفني وقفت وسحبت يدي منو
امجد: دقيقة خليني احكي ليكي
تالين بصراخ: ما دايرة اعرف يعني ما دايرة اعرف
امجد: تالين اهدي
تالين: ابوي ما تقول لي اهدا انت عارف انا حاسة بشنو حاليا لالا ما عارف انت اكبر كذاب
امجد: بس انا ما كذبت عليكي
تالين: كذبت انت قولت لي انا دايما اول مرة بعرف بتفاصيلك بس طلع كذب
امجد: تالين خليني احكي. داير يمسك يدي جريتها لورا سريع
تالين: ما تلمسني نهائي طلع عندك وحدة في حياتك وانا ذي الغبية ما كنت عارفة قولت ابوي لو ظهرت بت في حياتو حتى لو اعجاب حتعرفي انتي اول وحدة بس للاسف عرفت الا لمن داير يتزوج ههههههه
امجد: تالين خوفت تزعلي مني
تالين: يعني كدا انا ما زعلانة موش ودموعي دي بتاعت فرح صح احكي. لزيتو من صدرو لمن رجع ورا
تالين: كنت بتقول انا كل عائلتك بس حاليا بتكون عائلتك بعيد مني دي برضو وحدة من كذباتك. طبعا هو ساكت
تالين: عمري ما حأسامحك على كذباتك دي بس ربنا يتم ليك على خير ويسعدك في حياتك. وقومت جارية سامعة بنادي فيني بس ما وقفت وصلت سريري وانا لسع ببكي وصوت امي جات جارية علي حضنتها وبكيت فيها طبعا ما سألتني لانو عارفة السبب وكانت عارفة انو انا ماشة احكي مع امجد بكيت لمن نومت ما عارفة هي طلعت بتين.....
________
من جانب امجد
كنت بفكر بطريقة اتكلم مع تالين لانو اكيد زعلانة قعدت في الحديقة الخلفية بعد شوية جات ما كنت عارف ابرر موقفي معاها جات وقعدت وعاتبتني ما كنت قادر ارد على كلامها ودموعها كانت بتحرق قلبي ما قدرت اعمل حاجة قالت جملة خلتني ما انوم اليوم داك قالت لي عمري ما حأسامحك على كذباتك دي ما اتوقعت في يوم اصل مع تالين للمرحلة بس ندمت انو ما حكيت ليها اول وحدة كنت كل ما اقرب منها بترجع لورا وبنفر مني دا وجعني اكتر من كلامها لانو كل ما كانت بتزعل بلجأ لي وترقد في كتفي او حتى انا لمن ازعل منها برضو بترقد في كتفي وبشتكيني لنفسي بس المرة دي لا كانت بنفر مني ما كنت عارف اتصرف كيف ولا حتى اعمل شنو الاعتذار ما حيفيد ابدا......
" صراع الإنسان مع قلبه مؤلم جداً ."💔
_______
من جانب تالين
من اليوم داك بقيت بمشي الجامعة وبرجع ما بتكلم كتير ولا حتى بقعد مع ناس البيت و بقيت ما قاعدة امشي بيت خالتو عفاف نهائي عشان ما اتطاقش معاهو لقيتو مرتين بس اتجاهلتو قلبي كان بوجعني بس بنسى وبمشي لحدي في يوم جات امي
امي: تالين البتعملي فيهو دا غلط
تالين: امي انا عملت شنو
امي: هل امجد بستاهل منك المعاملة دي؟
تالين: ما عملت حاجة انا كل الموضوع ما دايرة اتكلم معاهو
امي: اول حاجة امجد ما غلط لمن قرر يتزوج دي حاجة كلنا عارفين انها حتحصل في يوم من الايام لو ما الليلة بكرة بس هو المربيكي ما يستاهل تتعاملي معاهو كدا عشان ما كلمك يمكن ليهو اسبابو ويمكن ظهرت فجأة وهو داير يكمل نص دينو ليه تعاقبيهو كدا دا ما موضوع كبير تزعلي منو انتي المزعلك انو في بت حتدخل حياتو غيرك دا المزعلك اصلا لو كان كلمك برضو كنتي حتزعلي لانك بتحبي امجد دي حاجة مفروغ منها ما تحاولي تكذبي نفسك دا السبب بس فأمجد ما عندو ذنب في الموضوع عشان يتعامل كدا اتذكري هو عمل شنو في حياتو عشانك يعني نسيتي الحاجات دي كلها في ثانية وركزتي في الحاجة دي كونو امجد اختار واحدة تانية دا ما غلطو هو عشان كدا تصرفك دا غلط نهائي ما بدعمك فيهو المفروض انتي اول وحدة تكوني واقفة جنبو وتفرحي لفرحو حتى لو على حساب سعادتك انتي
امي قالت كلامها دا وطلعت بالفعل كلامها كلو صح وانا غلطانة ليه ما فكرت كدا ليه زعلت ابوي وهو ما السبب في الموضوع السبب فيني انا يداب استعوعبت الحاصل انا طلعت بحب امجد وهو اختار بت تانية غيري دا المزعلني ما المزعلني انو ما كلمني اول وحدة وصح كلامو كان خايف اني ازعل في كلا الحالتين كنت حأزعل صح كلام امي والله اليوم داك بكيت بكى بس اتخذت قرار حأقيف مع امجد عارفة حأتعذب بس امجد يستاهل اكتر واحد تعب معاي في حياتي يستاهل اقيف معاهو لمن يستلم زوجتو عارفة حأتوجع بس كل ابتسامة منو بزيل وجعي...
اليوم البعدو كالعادة مشيت الحديقة ولقيتو قاعد جيت قعدت جنبو عاين لي مسافة ما فتح خشمو مسكت كتفو لفتها بقدام وميلت رأسي في كتفو حأشتاق للحركة دي تاني بس بعد يتزوج ما بقدر ارقد في كتفو كدا
تالين: ابوي يعني خلاص ناوي تبعد
امجد: انتي عارفه انو ما بقدر
تالين: ما بخليك تبعد اصلا انت عارف حاجة؟
امجد: شنو
تالين: انو انا اشتقت ليك. دموعي نزلت
امجد: انتي عارفة انا حسيت بشنو
تالين؛: بشنو
امجد: بالعجز
تالين: ليه
امجد: لانك قولتي كلام نهائي ما نسيتو وقاعد في قلبي ذي الحجر
تالين: ابوي انا اسفة والله. وبكيت
امجد: ما تبكي ياااخ ما بتحمل انك تبكي
تالين: عارفة انو زعلان مني ومن كلامي كانت لحظة زعل بس
امجد: عارف انها لحظة زعل بس كلامك كان من قلبك
تالين: ابدا
امجد: بسامحك بس بشرط
تالين: احكي
امجد: ما تبكي تاني
تالين: بحاول
امجد: تااالين
تالين: ابوي قولنا بنحاول اها التعارف متين عشان اشوف زوجة ابوي ههههههه
امجد: زوجة ابوي دي حلوة هههههههه
تالين: حنتشاكل فيك يومي ما حأخليك ليها هههههه. وضحكنا وقعدنا نحكي شوية و اي واحد مشى......
بعد اسبوع كان التعارف ما كان عندي نية امشي نهائي ولا عاوزة اشوفها في نفس اليوم تعبت بسبب الشهرية سبحان الله وطبعا بتعبني اخدت حقنة وامجد داير يلغي التعارف عشاني بس انا اصريت انو يمشو وبالفعل مشو بس خلو معاي تالا للضمان ونومت صحيت بالليل لقيتها رجعو
امي: بقيتي كيف
تالين: هسي احسن الحمدلله اها لقيتو العروس
امي: ايي
تالين: حلوة؟
امي: ههههههه حلوة بس ما احلى منك
تالين: امي ياااخ
امي: والله جادة ههههه حسيتها ذي الشايفة نفسها
تالين: بس امجد بقدر ليها
امي: اصلا امجد صعب بقدر ليها ههههههه
تالين: اها قلبوها خطوبة؟
امي: قالو يعملو عقد بعد اسبوعين
تالين: امي انتي جادة
امي: والله والعرس ما معروف ما حددو
تالين: ايوااا ربنا يتم ليهو على خير
امي: امين يلا اخليكي ترتاحي . وطلعت مني قلبي وجعني بس خلاص الموضوع اتحسم....