قصة جميلتي المجنونة
البارت الثالث 3
بقلم آلاء إسماعيل
فريد فضل يومين بيفكر في حل للمشكلة و لإنه كان مخنوق كان بيطلع بدري قبل ما تصحى و لما يرجع آخر اليوم بيكون الوقت متأخر مش بيدخل عندها و يروح اوضته ينام
فضلت منار مرمية مكانها مطرح ما سابها جسمها كله جروح و من غير اكل و شرب و محدش سأل فيها ولا شافها عايشة ولا مي'تة حتى
عيطت لحد ما الدموع جفت و مابقاش فيها دمع خلاص
ثالث يوم لاحظ ان اوضته زي ما هي طول اليومين اللي فاتوا معنى كدة انها مش بتدخلها خالص و لا بتاخذ هدومها عشان كدة قلبه انقبض و حس ان فيه حاجة غريبة بتحصل
قرر أنه يرجع البيت بدري و يكلمها .
دخل البيت و سأل امه اللي استغربت وجوده بدري
- خير يا ابني شايفاك جاي النهاردة بدري !!
- خلصت شغلي امبارح معنديش حاجة النهاردة
- ناوي على ايه يا رب تكون عقلت أخيرا و عرفت ان البنت دي ما تنفعكش يا فريد
- مش وقت الكلام ده يا ماما ..أنا كنت جاي أكلمها و نحط النقاط على الحروف ،قوليلي هي نزلت اتغدت معاكم ولا لا ؟؟
اتوترت سهير و حاولت تخفي توترها - لا النهاردة ما نزلتش لسة
- و لا فطرت حتى !!
- جرى ايه يا فريد هو انا كنت ولية أمرها ؟؟ 🤨 مش عايزة تنزل براحتها ! اعملها ايه يعني ؟
- بس انتي عارفة ان انا كنت اجيب اكل جاهز في شهر العسل بس بعد كدة دايما بننزل ناكل معاكم !!
- اهو اللي حصل بقى ! النهاردة مشفتهاش خالص 🙄
- طب عن اذنك انا طالع لها.
حاول يطلع بس هي مسكت فيه بتحاول تلهيه بأي كلام
لما شك في تصرفها سابها و طلع جري للدور بتاعه
طلع فريد و اتوترت سهير من اللي هيحصل
راح يدور عليها في الاوضة ما لقاهاش فتح باب اوضة الضيوف لقاها لسة مرمية عالأرض زي ما سابها و جروحها عفنت و طلعت ريحة وحشة
اترعب حرفيا من منظرها كانت زي الجثة المتح"نطة كإنها مغمى عليها بس عينيها مفتوحة بتبص في مكان واحد
- منااااار ... منااار ارجوكي اوعي تمووووتي مناااار !!!
صرخ بأاعلى صوته : مامااااااا !!!!
حاول يحركها كثير بس مفيش اي استجابة اتحسس نبضها و شاف اذا بتتنفس لقى نبضها ضعيف اوي و نٓفسها شبه منعدم
جات سهير عنده و عاملة نفسها مش عارفة حاجة
: خير بتزعق ليه ؟؟ المجنونة عملت ايه المرة دي !!
فريد بخوف - هي مرمية هنا من امتى ؟؟! مش سألتك عنها أول يوم و قلتي إنها بتطلع من الاوضة عادي و لما بيكون معاد رجعتي بتقفل على نفسها ؟؟؟!
سهير بتصنع الدهشة : و انا ايش عرفني انا كنت بأسمع صوتها بس مكنتش بشوفها ما انت عارف ان البرنسيسة مش بتنزل كل وقت ! يعني اقعد اراقبها طلعت امتى و نزلت امتى
-لو كلامك ده صحيح اومال مرمية مطرح ما سبتها من ثلاث ايام ليه ؟؟؟
-الله ؟؟ هو انت بتسألني انا ؟؟ 🤨 ما قلنا مجنوووونة.
مستني ايه من وحدة مجنوووونة !!! 🙄
فريد بضيق - طيب طيب ساعديني نلبسها لبس نظيف بدل المتقطع اللي كله د'م ده انا هآخذها المستشفى
- لو انا منك اطلع من المستشفى على السرايا الصفرا على طول
أخذها فريد بقلق على حالها و ضحكت سهير ضخكة خبيثة
في المستشفى
الدكتور : هي المدام تقربلك ايه ؟؟
فريد بقلق : مراتي ...ليه ؟؟
الدكتور : ايه ده يا استاذ ؟؟! هي المدام كانت عايشة مع بني آدمين ولا وحوش ؟؟!
- ليه بس يا دكتور !!
دي دخلت في غيبوبة سكر ادعي ربنا تفوق منها بس ... ازاي تقعد ثلاث ايام من غير اكل !! هي كانت في صحرا !!
فريد بإحراج : يا دكتور أصل المدام بتعاني من أمراض نفسية يعني عقلها مش قد كدة و ما تقدرش تعتمد على نفسها ف حاجة
الدكتور بغضب : عذر اقبح من ذنب ...مادام كدة كان مفروض انت تراعيها مش بتقول جوزها ولا هو جوزها بالكلام بس ؟؟ و بعدين ازاي عندها كم الجروح دي كلها و محدش يعقمها لها لحد ما عفنت بالشكل ده !! انا مش مصدق ان لسة فيه ناس زي كدة 😤😡
- يا دكتور انا كنت بأشتغل متأخر طول الأيام اللي فاتوا و كنت فاكر انها بتاكل و .....
- هو انت كمان مش بتشوفها كل يوم ؟؟ لا نعم الزوج و الله .. انا كدة مضطر ابلغ البوليس
فريد : ليه يا دكتور بوليس ليه ؟؟؟
- المدام متعرضة لإعت"داء و عن'ف جسدي من واجبي ابلغ عن الحادثة
- بس هي اللي طلعت برة و العيال رموها بالحجر مفيش اعت'داء ولا حاجة ..يستر عرضك بلاش بوليس مش عايز فضا"يح .
بص له الدكتور بإحتقار و مسك تلفونه و أتصل بالبوليس
سهير- فردوس ...بت يا فردوس
- خير يا ماما
- الحقي مش اخوكي رجع بدري و لحق المجنونة لقاها هتموت !
فردوس بغل- ايه اللي رجعه ماكان سابها تموت عشان نخلص منها المشوهة دي ( فردوس مش بتناديها غير بكدة بسبب الحرق اللي في ايديها )
- يالا اهو كدة كدة هياخذها مستشفى المجانين ...ده ان عاشت.... بس ما اعتقدش هيرجعها تاني .
فردوس- يا خوفي بس يصدقها !!
- يصدق ايه انتي عب'يطة ؟؟
- و الله خايفة ننكشف يا ماما
- ما تخافيش .. اومال اخواتك فين ؟
- فريدة و فادية راحوا الكوافير مش هيتأخروا
- طب يا اختي اطلعي بينا نشوف الهدوم اللي كان جايبهالها آخر مرة انشغلنا من يوم الحكاية إياها و ما طلعناش عندها
- اه صحيح كنت شايفاه شايل كيس فيه جزمة شكلها حلو المضروبة مقاس رجليها زي مقاسي
- طب يالا بينا قبل ما يرجع .
في المستشفى
فريد بخوف : يا حضرة الضابط مراتي لسة في غيبوبة و انا قلقان على حالتها و انت بتتهمني بمحاولة قتلها ؟؟
- نظرا لشهادة الطبيب المدام متعرضة للضرب الشديد و اتمنع عليها الاكل و الشرب يعني في الحالة دي هنعتبرها شروع في الق'تل
- بس انا شرحت للدكتور حالتها النفسية و لو تسمحولي هجيبلكم ملف طبي كامل عن وضعها و كمان عندي شهود انها اتعرضت للضرب من عيال صغيرين زي ما قلتلك
- ما اعتقدش العيال اللي رموها بشوية حصى يعملولها الندوب دي كلها ..الآثار الموجودة هي آثار حديد يا بشمهندس فريد
التوتر بان على وجه فريد : طب اصبر لما تصحى بس من الغيبوبة و هي بنفسها هتحكيلكم اللي حصل
الضابط نظر للطبيب: تعتقد هتقدر تطلع من الغيبوبة امتى
الطبيب : الله اعلم يا حضرة الضابط المهم اننا اسعفناها و الباقي على ربنا
- طب معاك رقمي اول ما تصحى هناخذ اقوالها
بص لفريد : انت هتفضل على ذمة التحقيق لو عرفت انك هربت عقوبتك هتبقى مضاعفة
- اهرب فين و اسيب مراتي؟
انصرف الضابط و الطبيب و بقى فريد ينظر إليها عبر الزجاج
تنهد بحزن و قال - آسف يا منار .. آسف يا حبيبتي. .... كنت مضطر ..انتي اللي خلتيني اعمل كدة 😓😔
- يا راجل حرام عليك جوزها بيقول إن البنت مرمية في المستشفى بين الحياة و الموت!!
- و انا مالي ؟! هو احنا هنفضل نجري ورا المستشفيات لحد امتى ؟ مش خلاص جوزناها و خلصنا من قرفها ؟؟ عايزاني اعمل لها ايه يعني ؟
- تاخذني أشوف بنتي حرام عليك يا رجب دي لحمك و دمك.. يا عالم حصل معاها ايه وصلها للغيبوبة !!
- أكيد عمايلها... هيكون ايه غير كدة!!
- يا حج يعني عايز تبقى انت و الزمن عليها !!!
- آخر كلمة مستشفى مش رايح
- يبقى هروح لوحدي أشوف بنتي و اتطمن عليها
- لو طلعتي برة البيت ده هتبقى طالق يا فوزية فااااهمة !!!!
- هتطلقني يا رجب !!!
- و الثلاثة كمااان ...كفااااية قر"ف من ورا البنت دي بقى !؟!! مش عايز أعرفها و انتي كمان من هنا و رايح انسي ان عندك بنت تانية غير مها فاهمة !!!
بعد اسبوع فاقت منار من الغيبوبة
الدكتور كان مستنيها تفوق عشان يتصل بالضابط ياخذ اقوالها
نظرت منار الى فريد الذي كان مرعوبا و أخبرت الضابط بما قاله فريد قبل أن يصل الضابط و انها لم تتعرض لإعت"داء
طلعت منار من المستشفى و هي مهزومة و مكسورة مش قادرة تتكلم ولا قادرة تنطق بحرف بعد الشهادة دي ...
فكر فريد كثير في الأسبوع اللي عدى و وصل لقرار
في العربية
- منار انا قررت حاجة اتمنى ما تزعليش مني بس ده لمصلحتك
لم تنطق منار بأي كلمة فأكمل فريد
- أنا هأرجعك المستشفى تاني بس مش هسيبك الا لما تخفي
لا رد
لم تعرف ما تقول ولا بم تجيب سوى بدمعة نزلت تلقائيا
في مستشفى المجانين الشيء اللي رفع معنويات منار هو وجود الدكتور عماد اللي وقف بجانبها و كان السبب في رجوعها للمجتمع و خروجها من المستشفى أول مرة...
طلب من زوجها أنه يكلمها على انفراد و طلب منها تحكيله كل اللي حصل معاها
منار كان عندها ثقة فيه و حكتله كل اللي حكته لجوزها و ما صدقهاش.
- بصي يا منار. ... انا متأكد من صحة قواك العقلية و عارف انك اصح وحدة في المستشفى دي .. بس لمصلحتك انا مضطر احجزك هنا لحد ما ترجعي لعافيتك و جروحك تخف و عايزين نكشف لعبة اهل جوزك ...قلتي ايه ؟
- لو هتساعدني ارجع جوزي و اخليه يصدقني انا موافقة .
- هساعدك كثير اعتبريها فترة نقاهة.. منتجع .. أجازة لحد ما تستردي عافيتك و صحتك انتي ضعيفة و بنيتك الجسدية مش متحملة أذى زيادة
- حاضر يا دكتور انا موافقة على كل اللي تقول عليه.
بالفعل اتحجزت في المستشفى بناء على طلب الطبيب لمدة ثلاثة أشهر على الأقل و يمكن للمدة أن تزيد
أكد الطبيب على فريد أنه يزورها بشكل يومي عشان يخليها تثق فيه تاني و تندمج في حياتها الجديدة
و في نفس الوقت كان بيساعدها بأفكار مختلفة تخلي فريد يصدقها و عايزها تكشف حماتها و بناتها و تحاربهم بالذكاء
كان فريد كل ما يجي يزورها بتحاول تتقرب منه و تتدلل عليه في نفس الوقت ..كلامها رزين و هادي و تصرفاتها مش بتاع وحدة مجنونة ولا كلامها حتى ...شوية شوية بقى بيحبها اكثر من الاول و أكدله الدكتور انها طبيعية 100 في المية كانت بس محتاجة فترة هدوء و راحة نفسية
لما اتأكدت أنه واثق فيها و مستحيل يكذبها حكتله الحقيقة كلها و بالفعل صدقها لأنه شك في تصرفات امه و اخواته و حكايتهم المتناقضة بعد ما حصل لها اللي حصل و طلب منها تسامحه
منار : مسامحاك و أوعدك اني هثبتلك صحة كلامي بالدليل
- و انا كمان أوعدك هيجيبلك حقك منهم .
قالت له كلام رعبه
- لا انا كل اللي عايزاه انك تصدقني و تقف جمبي ما تتخلاش عني اما حقي فربنا هيجبهولي كامل مكمل لاني مع كل صلاة و كل حركة باعملها بقول حسبي الله و نعم الوكيل في اللي ظلموني ...صدقني زي ما فض"حوني هيتفض"حو و زي ما ظلموني هيتظلمو و زي ما اذوني هيتأذو .. واثقة ف عدالة ربنا .
فريد بخوف: اهو انا مش خايف غير من الكلمة دي ...لاني واحد منهم و في يوم من الايام جيت عليكي زيهم 😓
- لا مش زيهم...انت كرامتك اتجرحت، و غيرتك كراجل و انت شايفني بالوضع ده خلاتك اتخنقت و الغضب منعك تستنى لحد ما تفكر مين عمل كدة و ان كانت لعبة او لا .
فريد بضيق - معاكي حق ف كل كلمة... انا اول ما الراجل جاب سيرتك الد"م علي في عروقي ...مكنتش شايفك مجنونة كنت شايفك مراتي اللي الناس قاعدة تتفرج عليها .. انا بحبك اوي مقدرتش اتحمل ان كل الناس تشوفك كدة
- خلاص اللي فات مات .. انت وعدتني اهو
- و هافضل عند وعدي لحد ما امو"ت
- بعد الشر عليك يا ديدو
رجعت أخيرا منار مع جوزها البيت بعد اربع اشهر و زبادة و قابلتها حماتها بالاحضان و الزغاريط هي و بناتها
كانت مندهشة من معاملتهم و فريد مش أقل دهشة منها
كان شكلهم فرحانين بس عينيهم هتطلع من الغيرة من شكلها
شعرها ابتدا يطول من تاني زي سلاسل الذهب و زاد وزنها و رجعت اجمل بكثير من الاول
دخلت هي و فريد اوضتهم بالليل
احتضنها بعشق و عيناه تلمع رغبة و شوقا: وحشتيني اوووي البيت من غيرك كان ظلمة بجد يا روحي ...
تحت كانت سهير تقطع الصالة ذهابا و إيابا بعصبية
جات فريدة ماسكة كوباية اللبن
- اتاخرتي .. ساعة على ما تسكبي كوباية لبن ؟؟
- ما لسة بدري مالك قلقانة كدة ليه هي كانت اول مرة ؟؟
- طب يالا طلعيه بسرعة ...اهو ده اللي كان ناقص! انها تجيبله عيل عشان يمسحنا من قاموسه خالص ميبقاش غير البرنسيسة و ابنها !
فوق في اوضة فريد
منار بكسوف: احم فرييييد
فريد بتوهان: عيووونه
منار : اتلم بقى
فريد و هو يحتضنها بجرأة - لا و الله !! و اتلم ليه بقى مش مراتي حلالي !!! يبقى من حقي ما اتلمش 🙄😉
منار بحب : يا رب بس الليلة دي تكون بداية حياتنا الجديدة يا حبيبي
لمعت عيناه بفرحة: انتي قلتي ايه ؟؟
منار بخجل - حبيبي و نور عيني ... و اماني كمان ...صحيح كنت قاسي عليا زيهم في الاول ...بس ده ما يمنعش انك كنت الوحيد اللي وقف جنبي و ما اتخليتش عني ..حتى اهلي محدش فكر يزورني ولا مرة طول المدة اللي قضيتها في المستشفى، بس انت ما زهقتش مني و صدقتني في الاخر .
- و هافضل جنبك طول العمر يا روحي ..
احتضنته بخجل- أنا بحبك يا فريد
- و انا بعشقك يا قلب فريد 😍... اخذ شفاهها في قبلة لطيفة تحولت الى اخرى شغوفة .. بالكاد ابتعد عنها و هو يقول
- ممم مش هنغير هدومنا بقى و ننام ؟!
اطرقت بخجل : ماشي 🥰
راحت تغير لقت دولابها فاضي ...مفيهش غير شوية هلاهيل مقطعة
- فين الهدوم اللي كانت هنا كلها ؟! انت قبل ما توديني المستشفى كنت جايبلي هدوم كثير !!
فريد بإحراج : مش متأكد ..بس شكلهم عمايل اخواتي عموما انا عامل حسابي
توجه الى السرير و احضر حقيبة من تحته و وضعها فوقه
- انا جايبلك شوية هدوم تبتدي بيها لحد ما اخذك و اجيبلك كل اللي تحتاجيه ...كنت حاسس انهم لو شافوها هياخذوها كمان عشان كدة خبيتهم تحت السرير
فتحها و اخرج قميص نوم أحمر ناري اعطاه إياها و هو يهمس لها برغبة : هيطلع عليكي تحفة .
اخذته بخجل و انصرفت الى الحمام
تنهد و قال في اثرها : هأعوضك عن كل اللي حصلك يا روحي صدقيني لو اكتشفت ان كل اللي حصلك لعبة من عيلتي هأرجعلك حقك منهم .
كانت تهم بالخروج من الحمام حين سمع خبط على الباب
اومأ لها بالبقاء في الحمام و فتح الباب
فريد بتعجب- خير يا فريدة !؟. ايه اللي جابك دلوقت ؟؟
فريدة بتصنع البراءة: مرات اخوي متعودة تشرب لبن قبل ما تنام جبتلها كوباية .
فريد بدهشة - شكرا ..تصبحي على خير .
اخذ منها الكوب و اقفل الباب
خرجت منار من الحمام و رأته يمسك الكوب
- خير؟؟
فريد بشك- جايبالك اللبن ... هو انتي من امتى بتشربيه ؟!
- من لما اتجوزنا ليه ؟؟
فريد: مش هتشربي حاجة من النهاردة
اخذ عينة منه في زجاجة بالحمام و القى الباقي في الحوض.
و عاد الى زوجته و اخذها الى حضنه و ناما...
في اليوم الموالي
غادر فريد بعد ان ودع محبوبته
نزل الى الأسفل و قال لوالدته
- ماما منار أمانة عندك لحد ما ارجع خلي بالك منها
سهير بتصنع الطيبة: في عينيا يا حبيبي دي مرات الغالي
نزل من البيت و هو ينظر يمنة و يسرة
فوجد صديقا له ينتظر في الخارج
- الحمد لله جيت ف وقتك خذ دي للمعمل و زي ما اتفقنا التحليل يوصلني النهاردة يا مراد
- من عينيا المخبر و صاحبه تحت امرك يا فريد.
- تسلم يا صاحبي
سهير : يالا انتي و هي جاهزين ؟!
فادية : جاهزين يا ماما
سهير بغل : قال و راجعة بكل بجاحة البيت ولا كإنها اميرة
صعدت الاربعة إليها و كانت في غرفتها توظب الثياب الجديدة في الدولاب .
سهير : أهلا بعروسة النحس
فردوس - الله الله !! ده احنا عندنا هدوم جديدة يا ماما !؟؟
امسكت ذلك الفستان غصبا من يد منار و وضعته عليها و نظرت للمرآة : شكله تحفة يا ماما و كمان مقاسي !!
منار بحدة - حرام عليكي انتي واخذة مني لحد دلوقت اكثر من عشرين فستان
فردوس بغل : جابهم لك امتى دول يا مشو"هة ؟؟ احنا دخلنا الاوضة قبل ما ترجعو بعشر دقائق مكانش فيه حاجة !!!
- ارجوكي انا ما حيلتيش غيره... أوعدك هأخليه يجيببك واحد زيه لو قلتله ... فريد مش بيرفضلي طلب
سهير - طبعا يا اختي طلعتي خبي"ثة زي الحية! رسمتي عليه الدور كويس اوي و خلتيه يعملك كل اللي انتي عايزاه !!
- بيحبني ... مستكثرين عليا ان واحد يحبني !!! انتو ايه ؟؟
فريدة بكره - بيحبك على ايه مش فاهمة ؟؟؟ ايه اللي بيحبه ف واحدة مجنونة ؟؟!
سهير : احنا هنوريكي احنا ايه ...يالا يا بنات
اقتربت منها البنات لضربها و كانت سهير تمسك بالحبل لتكتيفها
سرعان ما ربطتها و امسكت المقص بينما انهالت الثلاثة بالضرب
- هو ده شعرك اللي مفتون بيه سي فريد صح ؟! رجع طول و بقى زي الحرير ... اهو انا هأخليه يطلقك عشان شعرك ده !طول ما انا عايشة الشعر ده مش هيطول سنتي زيادة و هأحلقهولك ثاني و ثالث و رابع و لا ميبقاش اسمي سهير
كانت تهم بأن تقص لها اول خصلة منه و هي تصرخ بقوة و تقول : ارجوووووكي لااااا شعري لااااا الحقني يا فرييييييد !!!
فريدة بحقد : فريد مين الي هيلحقك يا نونو فريد لما يجي تكوني وسط الشارع عر'يانة خاااالص المرة دي مش بهدوم مقطعة ..و هنشوف ساعتها ان كان هيسامحك و يسيبك على ذمته دقيقة
و اطلقت ضخكة خب'يثة
سهير بكره - انا عمري ما حبيتك لا انا و لا اي وحدة من بناتي عارفة ليه؟؟؟
- يمكن لانها احسن و انظف منكم انتو الاربعة ؟؟؟!
صدمت كل من سهير و البنات بالصوت القادم من امام الباب
يتبع بقلمي آلاء إسماعيل البشري
آسفة على التأخير في النشر بسبب دور برد جامد عافانا الله و إياكم
وعدتكم ان القصة هتكون مكونة من ثلاث أجزاء بس زي ما عودتكم بحب أهتم بالتفاصيل ، و لإن القصة حقيقية مش من وحي الخيال زودت فيها بارت كنت عايزة اعرض كل الجوانب بتاع القصة و مش بحب اهمل اي شخصية منهم