قصة قوة الضمائر البارت الرابع 4 بقلم طارق اللبيب


 قصة قوة الضمائر

البارت الرابع 4

بقلم طارق اللبيب

طبعا" جدو نزل عليهو هم وغم مافي شك .. لكن قال مابكلم امو الا يتأكد من القروش الخلاها ابوهو كم ؟ 

دخل لي امو جوة .. وسألها انتي يا امي القروش الخلاها المرحوم ابوي في الدولاب كم؟.. 

 قالت ليهو : والله كانت مليون ومية .. لكن هسي طبعا" نقصت كتير ..  الحالة دي صرفنا من قروش الكشف حق العزاء .. سكت مسافة .. 

قالت ليهو : انت بتسأل ليه؟ في شنو ؟ 

قال ليها : مافي شي ..

 قالت ليهو : والله كان مافي شي .. انا بعرفك اكتر من جوع بطني .. عيوناتك ديل بقولن كلام .. بس انت ماداير تقول لي .. في زول داير منك قروش؟

 قال ليها :  ابدا" والله .. 

طلع تلفونو المخستك وبطاريتو بايظة .. من جيبو .. ودخل جوة .. 

قال ليها :  دقايق بس طيب .. قعد يقلب في الدفتر اتصل علي مصطفى صاحب ابوهو وصاحب الامين .. نقل الرقم في تلفونو .. ومرق مشى دخل الاوضة التانية .. وامو شغالة في عواستها .. ركب التلفون في الشاحن .. واتصل على مصطفى صاحب ابوهو داك الاتصل عليهو يوم الضياع ..

 قال ليهو :  يا عم مصطفى ..  طبعا" انت عارف انو ابوي مستدين من الامين قروش .. وهسي الامين جانا .. وقال داير قروشو في 72 ساعة .. او يفتح  بلاغ .. والله نحن  ماعندنا .. وهسي امي شغالة عواسة .. وبتبيع الكسرة .. عشان مانحتاج لزول .. 

انا ماطالب منك حاجة..  غير انك تتكلم معاهو .. يدينا فترة شوية ..لانو والله حاليا" ما عندنا قروش .. لكن اوعدو اني انا ح اشتغل وامي ح تضاعفف الجهود .. باذن الله نقدر نسدد ليهو في اقرب وقت .. 

مصطفى قال ليهو : بالله العظيم الزول ده قال ليك كدا ؟ 

قال ليهو : والله ياهو الحصل ..

قال ليهو :  على حسب علمي انو ابوك كان بسدد ليهو شهريا" .. وانا عارف لغاية قبل شهرين كان باقي ليهو 12 مليون .. بس انا كلمت ابوك ..

 قلت ليهو : الزول ملعون .. وماعندو ضمير .. وابوك ماكان برضى فيهو كلام .. وهو كان بنافق ابوك لي مصلحة في نفسه .. 

قال ليهو : المصلحة شنو؟

 قال ليهو :  والله مافي داعي بعد كدا .. المصلحة بتاعتو شكلها انتهت ..  وداير يظهر شخصيتو الحقيقية .. 

لكن انا بوعدك اتكلم معاهو..  واشوف خبرو شنو ؟ 

قال ليهو : تسلم ياعمي مصطفى ربنا يكرمك ..

 الامين شغال في سوق امدرمان .. عندو محل بتاع ملابس  اساسا" هو من ناس الخرطوم مولود في الكلاكلة .. واهلو وقرايبو كلهم هناك من بدري .. 

لكن هو واسرتو الان مستقرين في شمال امدرمان .. وعندو علاقة قوية بي الخير ..  مع انو اصغر من الخير بي قريب ال15 سنة .. 

لكن في السوق هناك طول اليوم مع بعض .. وبجي البيت كتير لي ناس الخير .. وحتى عندو اختو بتقرا في جامعة السودان مع جدو .. 

كتير بتجي البيت .. وعاملة صحبة مع ملكة .. ومعجبة بي جدو .. وجدو عامل رايح .. بس ستو بتكره الامين ده .. من زمان ماعارف ليه .. 

المهم في اسرار كتيرة ح تتكشف .. 

مصطفى اتصل على الامين ..  

قال ليهو :  انت وين ؟ ..

قال ليهو : انا في السوق .. في شنو؟..

قال ليهو : انا جاي عليك .. 

مشى ليهو في السوق ..

قال ليهو :  والله يا الامين طلعت بي شخصيتك الحقيقية .. قال ليهو  : شنو هي شخصيتي الحقيقة ياباشا؟ 

قال ليهو :  الاولاد ديل في مقام اولاد اخوك .. لو انت صح راجل .. تمشي تدق ليهم الباب .. وتقول ليهم داير قروشي قال ليهو : انا بتبلى لاسمح الله؟ ولا داير اسرقهم ؟ ..

قال ليهو : انا ماقلت كدا .. لكن انت عارف الراجل الله يرحمو .. كان مكابس ومجاهد قدر كيف .. عشان يلم اولادو ديل في بيت .. ونحن وقفنا معاهو .. وساعدناهو عشان الخوة .. انت هسي تجي تنكف الاولاد .. وتقول ليهم داير حقي في 72 ساعة؟؟ ماعيب عليك؟ ..

 قال ليهو : والله انا متضايق ..

 قال ليهو كذاب :  ما متضايق يهودا دكانك ملان بضاعة 

وعربيتك بوكسي 91 دبل قبينة .. ومرتاح في امن وامان .. لكن طلعت نظريتي فيك صحيحة .. خوتك كانت خوة مصلحة وانا عارف وانت حكيت لي .. لكن اظنك ناسي .. وبمجرد ماعرفت انو البت انشلت ..  وتاني مابتقوم على حيلا .. كشرت انيابك و ظهرت على حقيقتك .. 

قال ليهو : ماصح الكلام ده .. انا اصلا" البت غيرت راي منها  من زمان ..

قال ليهو :  اسمع يا الامين .. انا جيتك لي موضوع واحد .. 

والله انا لو عندي القروش دي .. ادفعها ليك ولا اتردد .. مع اني كنت عايز من الخير اتنين مليون .. وقبل مايدفنوهو انا عفيتن ليهو .. انت ممكن ادفع ليك لكن والله لا املك .. فبطلب منك طلب اخوي .. اخر القروش دي .. والناس ديل يدفعو ليك .. زي ما كان الخير بدفع ليك .. 

قال ليهو :  يازول الخير كان بديني في الشهر مليون .. وانا والله زهجت من الحكاية دي .. ومابقدر عليها انا عايز قروشي كاملة .. واستفيد منها .. وعشان جيتك دي انا بديهم شهر زيادة .. لي قدام لكن داير قروشي كاملة وكاش

 قال ليهو : طيب انت داير منو كم الان ..

قال ليهو : 11 مليون ..

 قال ليهو :  اصدقك كيف؟ عندك وصل امانة؟

 قال ليهو :  انت عارف نحن مابينا وصل امانة ولا شي .. لكن الخير كاتب اي حاجة عندو ..

 قال ليهو : طيب كيف تقول للولد انا بفتح فيكم بلاغ؟ ..

بلاغ تفتحو بدون وصل امانة؟ ولاشيك؟.. انت تاجر ولا بتاع سطلة؟

هسي انت ياخوي ؟ الناس ديل لو دسو الورق العندهم ..  المسجل الخير فيهو الديون ده ..  وقالو ما عارفين حاجة.. ونكروك بتعمل شنو؟ 

قال ليهو : بشكيهم على الله .. انا داير حقي ما طلبت حاجة من زول ..

قال ليهو :  انت كان بتخاف من الله..  بتسوي سواتك دي حرام عليك ياخ ..

قال ليهو :  انا مشغول يامصطفى  ..  وماعندي وكت .. والله خلاص عشان خاطرك اديتهم شهر .. لكن  لو ما سددو في الشهر .. انت بتلتزم  تسدد لي؟..

قال ليهو  : كدي اليجي الشهر ..فتك بي عافية اخليك لي شغلك ..

 مصطفى راجل من الدمازين .. ومن زمان ساكن امدرمان شغال  موظف في الضرايب تقريبا" .. وعلاقتو بي الخير علاقة صداقة وخوة نقية جدا" ..   

في الفترة دي كان جدو متوتر شديد .. وامو تعاين ليهو ساي.. واصلو ما اصرت عليهو عشان تعرف المقلقو شنو ..

 وفي افكارها انو ربما يكون مقلق من حالة البيت .. او شغل امه وتعبها مع الحمل .. او يكون متأثر على رقدة اختو يعني ما شغلت بالها كتير .. لانها ماكانت خاتة في راسها انو ممكن يكون في زول داير قروش قدردي من الخير ..  ايوة الخير قال ليها : بنسدد في ديون من الامين لكن ماكانت قايلاها 11 مليون .. 

والجامعة بتفتح بعد اسبوعين .. وماعارف يعمل شنو؟ لو مشى اشتغل وخلا الجامعة .. ح يحطم معنويات امه .. وكل احلامها تتبخر .. وهو باقي ليهو سنة واحدة بس .. بقرا مكانيكا .. 

اها يازول جاها قعد جمبها كدا .. والوكت ضهرية .. وهي بتغسل ليها في صحن ستيل ..

 قال ليها :  يا امي .. 

انا عايزك في مشورة .. 

قالت ليهو : اها قول ..

قال ليها : طيب عايني لي جاي خلي الفي يدك .. عشان تركزي معاي .. 

قالت ليهو :  انا سامعاك بي اضاني .. مابسمع بعيوني قول وخلصني ياجدو ..

 قال ليها :  انا عايز اجمد السنة دي ..

 قالت ليهو : ليه؟ .. والسبب شنو ؟

 قال ليها :  عندي التزامات .. ومابقدر اركز في السنة الاخيرة دي ..

قالت ليهو : مامشكلة ..  انا ما بجبرك على حاجة انت حاسي بانك مامستعد ليها .. ماعندي مانع تجمد .. لكن تخلي القراية ده كلام بعيد من المنطق .. 

قال ليها : لالا مابخليها ان شاء الله .. 

العصرية كدا في زول ق الباب ..  مشى جدو فتح ليهو الباب لقاهو ده مصطفى .. الكلام ده بعد يومين من كلام الامين .. سلم على جدو وقال ليهو : عايز اتكلم معاك ممكن؟

 قال ليهو :  اتفضل .. 

دخلو على الاوضة..  ومشى بي غادي يجيب ليهو حاجة امو سألته قالت ليهو :  ده منو الجاء؟؟

 قال ليها : ده عم مصطفى .. 

قالت ليهو :  مصطفى ده طول مننا ان شاء الله خير مالو؟ 

قال ليها : لالا ما قال حاجة ..

 قالت ليهو :  ح يقول ليك ..  مصطفى من طبعو مابمشي ليهو لي ناس ساكت .. الا يكون في موضوع .. 

هسي انت من متين ماشفتو جانا ..

 قال ليها :  والله مابتذكر طول شديد .. 

المهم ادوهو حاجة شربها .. وبدا يتكلم .. الاوضة القاعدين فيها .. فيها  برندة كدا بي وارها برندة مفتحة .. والزول البقعد فيها.. بسمع كلام الناس الجوة الفي الاوضة .. 

وستو سمعت طرف الكلام البقول فيهو مصطفى لي جدو .. قال ليهو : بالنسبة لي موضوع الامين .. والقروش العايزها من المرحوم .. انا طبعا" مشيت لي  الامين اتكلمت معاهو وقلت ليهو : ليه تمشي للناس ديل في بيوتهم وتنكفهم في القروش؟؟ .. 

المهم بعد عصر شديد .. 

قال لي : خلاص يسددو لي في شهر .. 

قال ليهو :  برضو يا عم مصطفى .. نحن ال 11 مليون نجيبها ليهو من وين في شهر؟؟

 اصلو نحن شغالين شنو؟ هو ابوي لما كان حي ماقدر يوفر ليهو القروش في شهر بديهو كل مرة جزء .. معقول نقدر نسددها ليهو في شهر؟؟

 الزول ده ببالغ ولاشنو ؟ بعدين نحن ذاتو ماعارفين القروش الباقية كم .. 

مصطفى قال ليهو :  بالمناسبة .. دي ثقرة قانونية في صالحكم .. انتو قولو الزول ده .. ماعندو قروش عندنا .. وهو ماعندو مستند .. وماعندو شهيد انو ابوك شال منو الا انا .. وانا كان قص رقبتو مابشهد له .. الكلب الملعون .. (طبعا" لاحظو الكلام ده كلو ستو بتسمع فيهو بي اضانها ) 

هنا مصطفى قال لي جدو :  انت كلمت الوالدة بالموضوع ده؟

 قال ليهو :  ماكلمتها لكن بكلمها .. 

هه الوالدة طبعا" تاني مامحتاجة كلام .. لانها سمعت التفصيل .. وعرفت الحاصل .. 

بعد مصطفى قام وقال داير يمشي .. وجدو بدا يودع فيهو . ستو قعدت في طرف السرير .. واتمحنت محنة عجيبة خلاص معقول الخير متدين 11 مليون ولايكلمني ..

ياحليلك يا الصميم وهميم .. حتى ولا بحسسنا انو مديون ولا مضايق في حاجة .. اها ياست البنات الليلة بتجيبي القريشات ديل من وين؟؟ لو عستي من الليلة لا السنة الجاية مابتقدري تسدديهن .. 

وشوفي الولد يايمة .. ماشي فوق درب ابوهو .. الناس يطالبو فيهو بالقروش .. وهو ماداير يكلمني .. داير يخلي الجامعة عشان يشتغل ..

غايتو الحمد لله .. انا والله مازعلانة انو ماكلمني .. بالعكس فرحانة وبالي مسرور .. 

واصلي ماني شايلة هم القروش .. داير يسوي لينا شنو الامين؟ .. يسدنا في الحراصة ؟ خلو يسوي الداير يسويه ..

بعد مافات مصطفى .. جدو دخل جاء بي جاي لي امه .. عاين ليها كدا في وشها عرف انها سمعت ..

 قال ليها : انتي سمعتي كلام الزول ده؟ 

قالت ليهو : اي سمعته ..

 قال ليها :  والله انا كنت عايز اتصرف مع الامين  بدون ما اقول ليك.. 

قالت ليهو : تصرف .. تسوي شنو مثلا"؟؟ كدي انت اصبر خلو النشوفو داير يسوي شنو ؟.. والنشوف القانون البساندو ياتو .. 

الزول ده كان جانا بالتي هس احسن .. احسن ليهو والله .. 

قال ليها :  نحن هسي القانون في صفنا .. حتى مصطفى قال مابشهد ليهو .. وماعندو اي اثبات .. انو ابوي متدين منو اساسا" .. 

قالت ليهو : بعدين نحن ما عارفين .. الباقي ليهو كم ؟..  احتمال ابوك دفع ليهو اكتر من كدا .. يعني نحن ندفع حاجة ما متأكدين منها؟..  سبحان الله الزول ده انا ياجدو اصلو ماردتو .. ولاقدرت ابلعو .. وابوك قاعد يقول لي انتي الزول ده ظالماهو .. 

طيب هو ليه ماكتب مستند من ابوك ؟ الموت من الحياة مومعروف .. يهدي النتيجة .. اليخم ويصر .. 

جدو قال ليها : نصبر الشهر .. ونشوف الزول ده بعمل شنو

واصل جدو بتكلم مع امو قاليها : انتي يا امي مصطفى ده قال لي كلام بس مافهمتو ..

قال لي :  الامين ما صادق في خوتو مع ابوك.. كانت خوة مصلحة وهسي المصلحة انتهت .. عشان كدا ظهر بي شخصيتو الحقيقية ..

قالت ليهو : ايوة صح كلام مصطفى ..

اصلا"  الامين  كان عندو نية نديهو ملكة .. وانا كنت رافضة لانها لسع صغيرة على الكلام ده .. بعدين هو اكبر منها كتير .. وابوك ماكان عندو مانع .. وانا وكت عارضته .. 

ابوك قال لي :  نسأل الملكة امكن توافق .. 

قلت ليهو : مابنسألها هسي  .. لاني هسي مابعرسها لا ليهو ولا لغيرو .. الا لمن  تكبر شوية .. وتبقى مراة تفهم الحياة .. 

ابوك مشى كلمو .. قال ليهو : امها معارضة.. وقالت مايشاوروها .. انت ادينا فرصة .. خليها تكبر شوية ونسألها 

وانا يوم سألت ملكة .. قلت ليها :  رايك في الزول ده شنو؟؟

 قالت لي : ده ان بقى اخر راجل .. انا مابعرسو بس ما تكلمي ابوي عشان مايزعل مني .. 

اها اظنو هسع .. وكت شاف الملكة انضربت .. ورقدت قنع منها.. وسلا ضنبو الكلب ..

لكن قولو ان شاء الله الملكة بتقوم ..  وتبقى زي العجب .. وبي عينك مابتشوفها .. 

وفعلا" مرت الايام .. وجدو مشى جمد السنة .. 

والملكة بدت تقعد على حيلا .. وبدت تجيب كلمات كدا مامفهومة .. وعندها بكية من الصباح .. اصلا" ما خلتها يوم  بس بقت معاها بتجيب كلمة ابووووي .. وستو تقعد تعاين ليها والعبرة تخنقها ودموعها يكبن .. 

وسبحان الله تجي تلقاها راقدة .. او قاعدة .. اصلا" مابتقول مابتقدر تقوم .. نفس الجمال والبهاء ..

اها يازوووول بعد مافضل من مواعيد  القروش اسبوع بس ..  ويتم الشهر .. جاهم الامين دقا ليهم الباب .. مشى فتح الباب جدو .. لقاهو راكب في عربيتو ومعاهو مراة كبيره في السن  .. بس جدو مابعرف المراة دي منو .. المهم الامين نزل والمراة مانزلت راكبة في مكانها  ..

 الامين قال لي جدو : اسمع ياخينا فضل اسبوع من المواعيد .. انا ماعايز اجرجركم في المحكمة 

انتو لميتو لي القروش ولالا؟ .. 

قال ليهو : والله الفترة دي كلها وفرنا سبعمية جنية .. يعني على نهاية الشهر .. يمكن تتم مليون .. لكن انا عايز اسألك سؤال ياالامين ؟ انت عندك مستند من ابوي؟ انو استلم منك قروش؟ 

قال ليهو : انت قايلني انا اهبل؟؟ بمشي المحكمة بدون اثبات ؟ انا عندي شاهدين اني انا سلمت ابوك مبلغ 15 مليون .. بس انا ما زول كعب عشان اطلب 15 انا داير قروشي بس ال11 بس .. 

ومعاي شاهدين .. بحلفو القسم .. ويقولو انهم شافوني سلمت ابوك القروش .. تاني داير اثبات اكتر من ده؟؟  وده اثبات القاضي بعتبرو .. انا مابشيل منكم اقل من حقي .. او البيت للدلالة .. وندق فوقو الجرس .. ونبيعو بالمزاد العلني .. واشيل قروشي وتشيلو .. حقكم وانتهينا .....


               البارت الخامس من هنا 

   لقراءة جميع حلقات القصه من هنا

تعليقات