الفصل الاول 1 والثاني 2
بقلم الشيماء محمد
اغلق شنطة السفر واستعد للعوده الي ارض الوطن بعد غياب
سنين طويله تحديدا خمس سنوات غياب.
اتجه الي المطار وانتهي من جميع الاجراءات واخيرا استقر في
طائرته المتجهه الي القاهره ….اغمض عينيه فهاجمته الذكريات
كالعاده ..ذكريات تمني ان يهرب منها ولو لمره واحده ..ذكريات
تمني ان ينسي ولو جزء منها ..ذكريات اليمه..ذكريات جميله ..
ذكريات جعلته يحن الي لحظات تمني ان تدوم ويكره لحظات تمني
لو يمحيها من حياته ….يعيش مع تلك الذكريات ويفيق علي واقعه
المرير ..انه وحيد ..هي ليست معه ..ليست هنا…هي بعيده كل
البعد عنه ..هي استمرت في حياتها وتخطته ولكنه لم يستطع ابدا
نسيانها او معرفة سواها ..لم يدق قلبه ابدا لسواها ..لم يستطع ابدا
ان يمحي ذكري واحده من ذكرياتها .لو يمحي صورتها المرسومه
دائما امام عينيه .انه يراها في كل شيء ينظر اليه ..يراها في كل
امراءه ولهذا ابتعد عن اي امراءه ..لم تستطع اي امراءه مهما بلغ
جمالها او رقتها او كمالها ان تخترق ذلك الجدار الذي شيده حول
قلبه ..لم تستطع اي واحده ان تقترب ولو قليلا..علي الرغم انه
حاول كثيرا ان يقترب ولو حتي اقتراب جسدي من اي امراءه
ولكن فشل فشلا ذريعا ..لقد جرب جميع الطرق ..جرب ان يشرب
الي ان يغيب عقله ويقترب من اي امراءه ولكن بمجرد ان يلمسها
يجد امامه وجهه حبيبته فيبتعد ..ابتعد عن النساء واتجه الي عمله
اغرق روحه فيه …..
عاد بذكرياته الي سنوات مضت ..بالتحديد الي عشر سنوات
مضت….
__________
منذ عشر سنوات
__________
كان ايضا يرتب امتعته ويستعد للسفر ودخلت عليه والدته وفاء
وفاء: ايه يا حبيبي خلاص جهزت حاجتك ؟؟
ادهم: ايوه خلاص .عايزه اي حاجه مني يا فوفا؟؟
وفاء: ياواد قلتلك بلاش فوفا دي ..المهم عايزاك تبطل تبعد عني
بقي وتستقر جنبي شويه
ادهم: انا ببعد عنك؟؟؟ انا علي طول جنبك
وفاء: يا سلام ده انت طول كليتك وانت بعيد واديك اتخرجت اهوه
وهتسيبني وتسافر تاني
ادهم: في الكليه نظام كليه الشرطه كده ما ينفعش الظباط يفضلو
في حضن امهاتهم ولا ايه؟؟
وفاء: انا برضه مش فاهمه انت هتسافر ليه دلوقتي؟؟
ادهم: عندي تدريبات خاصه يا امي
وفاء: تدريبات ايه؟؟؟
ادهم: هو انا مش فهمتك .؟؟ علي العموم بصي يا امي انا مش
عايز ابقي مجرد ظابط عادي انا عايز ادخل عالم المخابرات
وامن البلد الخارجي مش الداخلي وده بيتطلب تدريبات خاصه
علشان نكون ظباط مخابرات ناجحين
وفاء: يعني زي شغل جيمس بوند كده وميشن ايمبوسبل بتاع توم
كروز ده
ادهم بضحك: يخربيت افلام الاكشن اللي مبوظه دماغك دي ..بس
ايوه ده المجال اللي عايز اشتغل فيه
وفاء: نظام الجاسوسيه وتفضل عمرك كله تسافر من البلد دي لدي
وما يكونش عندك حياه نهائي وتهرب كل شويه من مكان لمكان
ادهم: مش بقولك الافلام بوظت دماغك خالص …شوفي يا ست
الكل عالم السينما مختلف عن عالم الواقع
وفاء: يعني مش هتسافر في شغلك ؟؟
ادهم: لا طبعا هسافر بس مش بالشكل اللي انتي متخيلاه وبعدين
انتي ناسيه ان شله المجانين بتاعتي معايا..
وفاء: ماهو ده اللي مخوفني ان شله المجانين معاك لانكم لما
بتتلموا علي بعض بتجننوا اكتر واكتر….المهم هو مفيش يا ادهم
كده اي واحده هتوحشك لما تسافر؟؟
ادهم: انت طبعا يا جميل
وفاء: انت فاهم قصدي ايه فمتستعبطش
ادهم: وانتي عارفه انه مفيش
وفاء: وامتي هيكون في؟؟
ادهم: الله اعلم بس اكيد مش دلوقتي خالص شغلي حاليا اهم من
اي حاجه وبعدين نشوف الموضوع ده..المهم دعوه حلوه كده علي
الماشي يالا
وفاء: الهي يا ادهم يا ابن وفاء تتخبط في واحده تحرق قلبك كده
وتجننك وتتطير النوم من عينك
ادهم: حرام عليكي ايه الدعوه دي ..تحرق قلبي ؟؟ليه كده؟ ده انا
ابنك علي فكره
ضحكوا هما الاثنين
وفاء: اعملك ايه ما انت مش عايز تحب بالذوق يبقي تحب بالعافيه
ادهم: المهم انا كده هتأخر يالا سلام بقي
وفاء: طيب هترجع امتي؟؟
ادهم: امتي دي بقي ما اعرفهاش بس هفضل علي اتصال بيكي ما
تقلقيش
ضم والدته وودعها مسافرا وعندما نزل لاسفل وجد والده عبد
العزيز في انتظاره
عبد العزيز: خلاص هتسافر؟؟
ادهم: ايوه خلاص عايز اي حاجه مني؟؟
عبد العزيز: وانا يعني لو عايز هتعملي اللي عايزه؟؟
ادهم: طبعا انا عمري ما اتأخر ابدا طول ما بايدي
عبدالعزيز: لا بتقدر وبتتأخر
ادهم: بتأخر في ايه؟؟؟؟ انا سبق وقلت لحضرتك انا ما انفعش
رجل اعمال واقعد علي مكتب انا اموت لو قعدت علي مكتب ده
مش مجالي نهائي انا غير حضرتك وبعدين عندك امجد اخويا هو
في اداره اعمال وبيحب الجو ده بكره يتخرج ويمسك الشغل معاك
عبد العزيز: امجد غيرك… انت البكري والكبير انت المفروض
تكون سندي في الدنيا دي
ادهم: وانا فعلا سندك بش مش شرط اكون كده باني اشتغل معاك
…المهم اشوف وشك بخير
عبد العزيز: ربنا يوفقك تروح وترجع بالسلامه
ادهم قبل يد ابيه فابتسم له ابيه
ادهم: انا مش عايزك تزعل مني بس فعلا انا بحب شغلي ده
والمجال ده
عبد العزيز: عارف يالا ربنا يوفقك في اختيارك وتوصل للي انته
عايزه وتكون اعظم ظابط مخابرات في الدنيا
ادهم: ربنا يخليك ليا(نظر لوالدته) شايفه الدعوات مش انتي
وفاء: كل واحد بيدعي بالي في قلبه بقي
ادهم: ماشي ماشي المهم ابقي سلميلي علي امجد وايه لما يرجعوا
بقي من جامعاتهم سلام
انطلق ادهم في طريقه ليقابل اصحابه ويتوجهوا الي مكان تدريبهم
الذي يبعد عن القاهره حوالي 12 ساعه كان مكان بعيد عن اغلب
مظاهر المدنيه
تعالو نتعرف علي ادهم قليلا… ادهم تخرج من كليه الشرطه
وعمره تقريبا 23 سنه له اخويين امجد في كليه اداره اعمال في
السنه الثانيه وايه كانت في الثانويه العامه كانت اخر العنقود
محبوبه جدا من اخويها ..
ادهم له اربع اصدقاء (احمد حمدي محمود علي) كانوا رفقاء
دائما من بدايه حياتهم الي اليوم وتجمعهم صداقه متينه دخلو كليه
واحده واتخصصوا بنفس المجال ..كل واحد يحب الاخر اكثر من
نفسه
وصلوا اخيرا لمعسكر التدريب وبحثوا عن القائد المسؤل عنهم ولم
يجدوه ..كان قائدهم ترك لهم رساله ان يتوجهوا لنادي البلده
ليتعرف عليهم وفعلا توجهوا الي هناك وتقابلوا مع المدرب رأفت
الذي يلقب بالسفاح (كان مدربهم ظابط مخابرات في يوم من الايام
ولكن احالوه لتقاعد مبكر وتدريب الخريجيين لانه كان معروف
بوحشيته كان مبدأه اقتل اولا واسأل ثانيا)
المدرب رأفت: اهلا اهلا بالخريجين الجداد ..اتمني انكم تكونوا
ودعتوا حياتكم في مصر لان هنا هتكونوا تقريبا مفصولين عن
العالم الخارجي ..تدريبكم هيبدأ الساعه 6 صباحا وهينتهي 6
مساءا بدون اي استراحات او اي اعذار وباقي اليوم النهارده
استمتعوا بيه لانه يعتبر اخر يوم راحه ليكم ..ده نادي البلد طبعا
مش بمستوي اصغر نادي في القاهره بس ده اللي موجود هو
اقرب للمركز الرياضي عن انه نادي ودلوقتي عرفوني بنفسكم
تعرفوا جميها علي بعضهم وفهم رأفت ان ادهم يعتبر القائد
الروحي لاصدقائه وانهم يطيعوه في كل كلامه واحس انه شاب
يعتمد عليه …انتهت المقابله وانصرفوا يستمتعوا باخر راحه لهم
حاول ادهم ان يتصل بوالدته كي يطمئنها عليه ولكنه فوجئ بعدم
وجود تغطيه للموبيل وحاول مرارا ومرارا بدون فائده الي ان راه
رأفت
رأفت: مفيش شبكه هنا اطلع سطح النادي ممكن تلقط شبكه بس
بتقطع علي طول فقول المهم بسرعه
ادهم: انا متشكر جدا لحضرتك بعد اذنك
فعلا توجه ادهم كي يصعد الي سطح النادي وهو يمسك موبيله
وينظر اليه وفجأه صرخ باعلي صوته لدرجه ان اصدقائه سمعوا
صوته واتجهوا اليه
ادهم كان متجهه الي السطح عندما اصطدم بواحده كانت تحمل
كوب نسكافيه ساخن جدا فوقع علي صدره الكوب بما فيه وحرق
له صدره وهذا جعله يصرخ من الالم ..اخذ ادهم وضع الركوع
كي يقلل من لمس القميص الساخن لصدره .كان غير قادر علي
الكلام نهائيا ولكنه سمع صوتها تتاسف له
البنت: انا اسفه اسفه اسفه جدا انت كويس؟؟
استعد ادهم كي يرد عليها ويشتمها لتصرفها الاحمق وعندما رفع
راسه لينظر اليها تفاجئ بعينين مليئتين بالدموع التي تهدد بالنزول
عينين اجمل ما يكون ..لم يري مثلهم من قبل ..عينين لم يحدد لونهم
هل هو اخضر؟ او رمادي ؟تقريبا كان اخضر فاتح ..غرق في
لون عينيها لدرجه انسته الالم الذي يحس به
البنت: ارجوك رد عليا انت كويس؟؟
اعاده صوت البنت الي الواقع
البنت: انت كويس ولا ايه ؟ طيب اعملك حاجه
ادهم: لا مش كويس نهائي ومفيش حاجه تقدري تعمليها
البنت: طيب حاول تقلع القميص علشان صدرك
هنا وصل اصدقاؤه اليه
احمد: في ايه اللي حصل؟؟ مالك يا ادهم؟
البنت: انا اسفه انا اتخبطت فيه والكوبايه كانت سخنه فوقعت عليه
نظر احمد للفتاه واستعد كي يرفع صوته عليها ولكن تاه في جمال
عينيها فصمت…
حمدي: خلاص حصل خير اتفضلي حضرتك احنا هنتصرف معاه
البنت: انا اسفه كمان مره ارجوك سامحني بجد مش قصدي
ادهم:زي ما قالك حصل خير اتفضلي حضرتك
ساعد احمد صاحبه المصاب كي يتخلص من قميصه وذهب حمدي
كي يسأل رأفت عن اقرب مستشفي فذهب معه كي يري ادهم
وتوجهوا لاقرب مستشفي وعالجوه كان حرق من الدرجه الثانيه
غير خطير جدا ..اعطوه كثير من المسكنات للالم وتوجهوا الي
السكن المعد لهم
عندما حاول ادهم ان يأخذ من المسكنات هنا تدخل رأفت
رأفت: المسكنات للضعفاء وانت هتكون ظابط مخابرات ولو
اتصبت في مهمه مش هتلاقي مسكنات او دكاتره
نظر للجميع ووجه كلامه اليهم جميعا
رأفت: الدرس الاول…الالم صديقك الصدوق لازم تصاحبه ولازم
تعود عقلك ازاي تتعامل مع الالم وازاي تفصل عقلك عن
الاحساس بالالم ..هاه يا سياده الملازم ادهم لسه عايز تاخد
مسكنات؟؟؟
ادهم كان يحب التحدي جدا وكان يحب ان يتقن اي شيئ يقوم بيه
وان كان مطلوب له ان يصاحب الالم فهذا ما سيفعله
اعطي المسكنات لرأفت
ادهم: لا مش هحتاج لمسكن
رأفت: كويس ودلوقتي ارتاحوا كلكم والساعه 6 تكونوا في الساحه
بره وحضرتك ملازم ادهم عندك يومين بس راحه اعتقد كفايه؟؟
ادهم: كفايه جدا متشكر يا افندم
بعد ما خرج رأفت وتركهم
احمد: انت اتجننت ؟؟انت ازاي تديله المسكن؟
ادهم: الالم صاحبنا السادس لازم نتصاحب عليه
حمدي: والله انت مجنون يا ادهم المهم الف سلامه عليك
علي: بس البت كانت ايه مزه مزه يعني
ادهم: هو ده اللي همك البنت صح ؟ المهم ما تنساش احنا هنا
علشان حاجه معينه فركز علي المهم ودلوقتي كل واحد يروح ينام
علشان الصبح اعتقد ان يومكم هيكون طويل ومش سهل
توجه كل واحد منهم لمكان نومه وتركوا ادهم مع افكاره التي
اعادت له صوره اجمل عينين
ما اجمل تلك العينين التي تاه في جمالها …لابد ان يراها مره
اخري كي يتأكد فقط من لون عينيها لابد ان يتأكد
ابتسم عندما تذكر والدته ودعوتها
ادهم لنفسه: كان لازم تدعي انها تحرق قلبي اهي حرقته
بجد؟؟يارب بقي باقي الدعوه ما يستجبش انا مش ناقص طيران
النوم انا محتاج النوم ضروري
ولكن هيهات ان يأتي النوم فطوال الليل تطارده عينان وتسرق
النوم من عينيه
ياتري هتكون حكايه البنت دي ايه؟ والحب هيشتعل ولا المشاكل هتبدا ...تبع 🌺
رواية مر العمر الحلقة الثانية
ادهم اقنع نفسه انه مش قادر ينام من الالم وان عنين البنت مالهاش
علاقه نهائي .عدي اول يوم بالعافيه وتاني يوم قضي اليوم كله في
السرير واخيرا وفي وقت الظهر حاول ينام شويه وهو بيحاول
يشيل صوره البنت من دماغه وقرر انه لازم اول ما يصحي يروح
لها ويتكلم معاها
راح النادي وفضل يدور عليها لحد ما شافها بفستان ابيض زي
الملاك وحطه فيونكه علي شعرها بيضه وكلها اجمل من انها تكون
حقيقه قرب عليها وهيا ابتسمت اول ما شافته
ادهم: ازيك عامله ايه؟
البنت: المفروض انا اللي اسالك عامل ايه؟
ادهم: انا كويس …ما تخافيش عليا
البنت: الجرح احسن دلوقتي ؟
ادهم: اه احسن كتير ..تسمحيلي اقولك حاجه؟
البنت: قول…
ادهم: انتي اجمل من اي حاجه شوفتها قبل كده ودي اول مره قلبي
يدق بالطريقه دي
البنت: قلبك دق؟؟؟
مسك ايدها وحطها علي قلبه
ادهم: حسي بنفسك
ابتسمت البنت ومسكت ايده وحطتها علي قلبها
البنت: بيدق بالطريقه دي؟؟
ادهم: تصدقيني لو قلتلك ان انت اول حد قلبي يدقله؟
البنت: اصدق لانك انت اول حد قلبي انا كمان يدقله
قرب منها ومسك وشها بايده وقرب شفايفه من شفايفها ولسه
هيلمسها
احمد: ادهم ادهم اصحي يا عم انت نايم واحنا مطحونين بره
ادهم فتح عنيه مخضوض
ادهم: هيا فين؟
احمد: هيا مين؟ انت كنت بتحلم بايه بالظبط؟
ادهم: بحلم؟؟؟؟انت بتصحيني ليه؟ انا اصلا طول الليل ما نمتش
احمد: بس مريح وده كفايه .يا بختك انا بحقد عليك
علي:مش انت لوحدك
محمود: بطلوا بقي حقد ..ادهم اخبارك ايه؟
ادهم: انا الحمد لله كويس بس انتو اللي شكلكم مش كويس
محمود: احنا خلاص متنا ..انا غلطان اني سمعت كلامك..انا عايز
اتخصص في البرمجه والكمبيوتر مالي ومال التدريبات العنيفه كده
انا هنسحب
ادهم: محدش هينسحب وكلها كام يوم وتتعود وانا هساعدك.وبعدين
لازم تتدرب طالما هتكون ظابط مخابرات
محمود: بس انا هختص في الكمبيوتر هساعدكم في المجال ده
ماليش دعوه بالضرب والقتل
ادهم: ماهو علشان توصل للي انت عايزه لازم تعدي الاول
المرحله دي
محمود: لامش هقدر وبعدين مفيش اكل هنا انا كده هموت
احمد: قول بقي ده اللي مضايقك قله الاكل مش التدريب ..اعتبرها
رجيم علشان تخس شويه..عمرك شوفت ظابط مكلبظ كده؟؟
محمود: وانت مالك اخس ولا ؟؟حد قالك عايز اخس؟
ادهم: احنا بنخلص تدريب الساعه 6 بعدها كل زي ما انت عايز
بس المهم لازم تكمل
محمود: هحاول علشان خاطرك انت بس
ادهم: ماشي المهم انا هخرج اتمشي شويه
احمد: استني اغير هدومي واجي معاك
ادهم: ما تريح انت انا هتمشي ساعه كده وارجع
احمد: لا مش هقدر لازم اغير جو والا هتخنق .خمس دقايق وابقي
جاهز استني اوك
ادهم: اوك
راح احمد يجهز وهو بيفكر انه لازم يشوف البنت تاني ويتكلم
معاها..وادهم بيفكر في الحلم الغريب اللي حلم بيه ..عمره قبل كده
ما حلم بواحده
وصلوا النادي وقعدوا شويه واحمد عينيه بتدور علي البنت
ادهم: انت بتدور علي حد؟؟
احمد: لا ابدا بتفرج بس علي المكان
ادهم: اه…انا هطلع اكلم فوفا زمنها اتجننت لاني مكلمتهاش امبارح
احمد: خد راحتك
طلع ادهم وفي ايده الموبيل وفجأه شافها جايه من بعيد واستغرب
جدا لانها كانت لابسه فستان ابيض وحاطه فيونكه بيضه في
شعرها وماسكه كوبايه بيطلع منها بخار كتير
وقف ادهم جنب الحيطه وهيا لما شافته ابتسمت
ادهم: اتفضلي عدي انا بعيد تماما
البنت: هههههه انا اسفه مره تانيه
البنت حطت الكوبايه علي الارض
البنت: اهي الكوبايه بعيد ممكن اقرب بقي؟
ادهم: اه كده ممكن
البنت: ازيك اخبارك ايه؟؟وصدرك اخباره ايه؟
ادهم: كويس ما تقلقيش ..ايه ده؟
البنت: ايه ايه؟؟
ادهم: لا ما تاخديش في بالك
ادهم لاحظ ان عنيها مش اخضر فاتح عنيها كانت رمادي غامق
البنت: صدرك بيوجعك؟
ادهم: اكدب عليك لو قلت لأ
البنت: طيب تسمحلي؟
ادهم: اسمحلك بس بايه؟
البنت: افتح قميصك كده
ادهم استغرب بس فتح قميصه وهيا قربت منه وحطت ايديها
الاتنين علي صدره وغمضت عنيها وفضلت تقول كلام كتير في
سرها وهو مستغرب من تصرفها لحد ما خلصت
ادهم: ممكن اسأل ايه ده؟تعويذه مثلا؟
البنت ضحكت: لا مش تعويذه ده دعاء جدي حفظهولي بيخفف
الالم كتير وعن تجربه
ادهم: دعاء ؟؟وانا اللي فهمتك غلط
ضحكوا الاتنين
ادهم: علي فكره انا اسمي ادهم
البنت: وانا ليلي.
ادهم: اهلا بيكي ..بما اننا اتعرفنا متعرفيش مكان ممكن اتكلم فيه
في الموبيل يكون فيه شبكه
ليلي: شبكه؟؟تعال هقولك علي مكاني السري
ادهم: هاتي معاكي النسكافيه بتاعك انا ما يخلصنيش تسيبيه
اخدته ورحوا في حته بعيده شويه وطلعوا سلم جانبي وراحوا
لسطح النادي بس من وري
ادهم: في شبكه ؟؟معقول؟
ليلي: اي خدمه..اسيبك بقي
ادهم: لا استني انا هعمل مكالمه سريعه
ليلي: علشان بس تاخد راحتك وانت بتكلم الجيرل فرند بتاعتك
ادهم: انا مش هكلم الجيرل فرند بتاعتي لاني معنديش واحده
لحظه استني
ليلي: اوك هشرب النسكافيه لحد ما تخلص
ادهم: اوك
اتصل ادهم بامه
ادهم: فوفا روحي ازيك؟
وفاء: لا انا زعلانه ولسه فاكر اصلا ان ليك ام؟
ادهم: روح قلبي انتي. بس اعمل ايه دعوتك هيا اللي اخرتني
وفاء: دعوه ايه؟
ادهم: مش دعيتي عليا اتخبط في واحده تحرق قلبي اديني اتخبطت
واتحرقت كمان وما نمتش خالص امبارح مبسوطه؟
وفاء: بجد يا ادهم حبيت؟
ادهم: حبيت ايه؟بقولك اتحرقت تقولي حبيت
وفاء: مش فاهمه
ادهم: يعني خبطت في واحده ماسكه كوبايه سخنه واتدلقت عليا
وحرقتني في صدري شوفتي بقي ربنا استجاب ليكي ازاي؟
وفاء: اتحرقت اتحرقت بجد يعني؟
ادهم: ايوه اتحرقت بجد
وفاء: انا اسفه يا حبيبي بس انا مكنش قصدي المهم انت كويس
ادهم: اه كويس وانتي
وفاء: سيبك مني المهم قولي حلوه؟
ادهم: هيا ايه؟
وفاء: البنت ؟
ادهم: شوف اقولها ايه تقولي ايه ؟
وفاء: رد عليا حلوه؟
ادهم: لا مش حلوه ..قمر ممكن.. ملاك كده مش عارف بالظبط
وفاء: هيا السناره غمزت ولا ايه؟
ادهم: بقولك ايه هكلمك بعدين لان الشبكه ضعيفه وبتقطع
وفاء: ماشي بس عايزه اعرف كل حاجه بالتفصيل
ادهم: لما يبقي في حاجه هبقي اعرفك سلام
خلص المكالمه وراح لليلي واول ما شافته ابتسمت الابتسامه اللي
بتطير عقله
ليلي: خلاص اتكلمت
ادهم: ايوه
ليلي: تشرب نسكافيه؟
مدت كوبايتها ليه وهو مش بيحب ابدا يشرب مع حد او يشارك حد
في حاجته الخاصه بس اتفاجئ من نفسه لما اخد من ايدها الكوبايه
وشرب وراها
ادهم: ما قولتليش انتي هنا ليه؟
ليلي: هنا فين ؟انا هنا في بلدي لكن انت اللي هنا ليه؟
ادهم: انا هنا في شغل بس انا قصدي في النادي مش البلد عموما
ليلي: اه انا هنا يا سيدي لاني في فريق الغنا والتمثيل في النادي
وبنيجي كل يوم في المعاد ده بندرب وبمشي علي العشا كده وانت
جاي بلدنا ليه؟
ادهم: انا هنا علشان عندي تدريب تبع الجيش
ليلي: انت ظابط يعني؟رتبتك ايه؟
ادهم: انا لسه متخرج يعني ملازم اول
ليلي: اممم.. وهتيجي النادي هنا كل يوم ولا؟
ادهم: هاجي كل ما اقدر بس هشوفك لما اجي ؟
ابتسمت ليلي وبصت للارض
ليلي: انت عايز تشوفني؟
ادهم: عايز اتعرف عليكي اكتر ده لو مش يضايقك؟
ليلي: ربنا يسهل المهم انا لازم امشي علشان اكيد بيدوروا عليا
سلام
ادهم: هشوفك بكره ؟
ليلي: مش عارفه يمكن ويمكن سلام
مشيت وسابته متلخبط وفرحان ومش عارف هو حاسسس بايه
نزل وراح لصاحبه وقابله بره النادي
احمد: انت فين كل ده؟انا بدور عليك
ادهم: ابدا اتكلمت علي السطح وجيت
احمد: طيب تعال ندخل
وهما داخلين
احمد: ايه ده ؟بص يا ادهم البنت اللي خبطتك امبارح اهيه
ادهم: اه هيا..يالا ندخل
احمد: مش هنكلمها؟
ادهم: ونكلمها ليه؟؟يالا
احمد: لا انا هكلمها
ليلي كانت ماشيه مع صحباتها
احمد: انسه يا انسه
ليلي: افندم في حاجه؟
احمد: انتي مش فاكراني؟
ليلي: انا اسفه المفروض اني اعرفك؟
احمد: انا كنت مع اللي انت حرقتيه امبارح
ليلي: اه اسفه وهو اخباره ايه دلوقتي؟
احمد: الحمد لله كويس
ليلي: الحمد لله .بعد اذنك
احمد: استني
ليلي: افندم في حاجه تانيه؟
احمد: ممكن تتفضلي تقعدي معانا نتعرف مثلا؟
يا تري ليلي هتتعرف ولا هتعمل ايه؟ وادهم هيتقبل صداقتها مع
صاحب عمره ولا هتكون في غيرة ....
لقراءة جميع فصول الرواية من هنا