موج ادهم
اسكريبت الثالث 3 والاخير
بقلم عهد عامر
_الجميل زعلان ليه؟
= مخنوقة يا ادهم.
_مخنوقة من ايه؟ مالك؟
= من كل حاجة، من الامتحانات اللى كل امتحان اصعب م اللى قبله، وانك بعيد، انا زهقت يا عم
_ممممم، طيب افتحى فيديو كده
= ادهم؟ والله م وقته انا على اخرى
_ يا بت عايز اشوفك الاه، يا عديمة الرومانسية انتى!
= يعنى الرومانسية متعرفش طريق باب بيتكوا غير وانا كده؟ مش لاعب يا عم
_ انجزى طيب
جبت الستاند بتاع الفون وسبته ع المكتب قدامى وفتحت فيديو كول بينى وبينه
ادهم : ايه القمر ده؟
= الكذب حرام واحنا ف ايام مفترجه، اتلم واعمل حاجة لأخرتك.
ادهم: هى هرمونات امتحاناتك هتطلع عليا يا موج؟ اهدى يا ماما على نفسك ها!
ضحكت وفضلت ابص على الكاميرا ووشه، اكتشفت انه وحشنى اوى وان كل الزهق والخنقة اللى كنت فيهم راحوا ف الهوا
ادهم: انا عارف انى لا أقاوم والله، بس ركزى معايا
موج بابتسامه: مش مركزه غير معاك والله
ادهم: احم، مالك بقى يا جميل؟
موج: مخنوقة حبة صغيرين من الامتحانات بس وضغطها شوية والزهق هيروح لحاله
ادهم: زهق وانا موجود؟ والله عيب عليا
موج: انت بتكلمنى وانت ماسك موبايلك لي؟ لو مشغول يا عم هقفل متعصبنيش
ادهم: انا لو انشغلت عن الدنيا كلها افضالك انتى، بس لحظة بعمل حاجه، وخلصتها اهو
ساب الفون وبصلى تانى وقال
ادهم: وحشتينى
موج: وانت كمان، هتيجى امتى، انا مفتقداك اوى ومفتقدة لكل حاجه بينا كنا بنعملها سوا
ادهم: هانت يا حبيبى، كلها اسبوعين وتلاقينى ف وشك
موج: لسه هستنى اسبوعين تانى و..
قطع كلامى معاه الجرس وهو بيرن
ادهم: طيب زى الشاطره كده البسى اسدالك وافتحى الباب عشان اللى على الباب يخصك.
استغربت كلامه ولبست الاسدال بسرعه ومسكت الفون الى كان لسه مفتوح فيديو كول م بينا وفتحت الباب لقيت الدليڤرى جايبلى اوردر وحسابه مدفوع وكمان لقيت بتاع محل الورد جايبلى بوكيه ورد جورى زى م بحب وبوكس معاه
خدتهم ودخلت على اوضتى بسرعه خلعت الاسدال وسبت الفون ع الستاند وانا متحمسه افتح اللى جالى
موج: انت اللى طلبتهم؟
ادهم: يرضيكى اشوف حبيبتى زعلانه ومفرحهاش وانا عارف اللى يبسطها؟
هزت موج دماغها بالرفض وهى بتبتسم
ادهم: يلا بسرعه كده افتحى الحاجه معايا متحمس اشوف فرحتك اكتر منك والله
ضحكت موج وجابت اول حاجه البوكس اللى جاى مع الورد فتحته وطلع كتب ادهم الشرقاوى ومعاه بادى سبلاش من النوع المفضل ليها ومج شكله جميل مرسوم عليه (شهاب) تبع كرتون الدببة الثلاث واخيرا مجموعة من انواع النسكافيهات المفضلة ليها
موج بتفاجؤ: بتهزر يا ادهم صح؟
ادهم: تؤتؤ كل ده بيفرحك وكان لازم اتدخل وافرحك
موج: انا مش عارفه اقولك ايه بجد، انا بحبك اوى
ادهم: وانا بموت فيكى، افتحى التانى بسرعه كده
فتحت موج اوردر الاكل اللى كان عبارة عن برجر وبطاطس وكاتشب كتير وجنبهم V7 بالتوت زى م هى بتحب
موج بفرحة: حتى دى مسبتهاش
ادهم: ودى تفوتنى برضو يا جميل.
موج: ربنا يديمك فى حياتى لآخر العمر
ادهم: ويديمك يا روح قلبى انتى، يلا بسرعة كده كلى وانا معاكى اهو.
بدأت موج فى الاكل وقضوا وقت لطيف سوا وهما بيتكلموا.
♡♡♡♡♡♡♡♡♡♡♡♡♡♡
ادهم: مرداش على اهلى ليه م الصبح تطمنينى عملتى ايه ولا مالك؟
موج: مكنتش قادره اتكلم
ادهم: على اساس ده مبرر انى اسكتلك؟ ده كده يدينى الحق انى اجيبك من شعرك على القلق اللى عيشتينى فيه الكام ساعة دول مليون مره اقولك تردى حتى لو هتقولى كلمه وبعدين انتى فين كل ده و...
قاطع كلامه صوتها وهى بتعيط
ادهم بقلق: موج؟ مالك، ايه اللى حصل بتعيطى ليه؟؟
موج: مش قادره اتكلم انا عايزه اروح
ادهم: طيب يا حبيبتى انتى فين دلوقتى؟
موج: مش عارفه انا فضلت ماشية ومش عارفه انا فين انا عايزه اروح
ادهم بقلق اكبر: طيب اسألى اى حد حواليكى طيب وقوليله يقولك انتى فين
موج: بيقول انى ف شارع••••••
ادهم: طيب بصى اركبى تاكسى وقبل م تركبى صوريلى ارقامه وابعتيها واتس وانا معاكى ع الفون مش هقفل
عملت موج اللى ادهم قالها عليه وركبت التاكس وهو كان معاها ع الفون بيهديها لغايه م وصلت البيت وطلعت
موج: انا عايزة انام
ادهم: طيب خدى دش وغيرى هدومك الاول وتعالى
موج: حاضر
وقفلت معاه وفضلت تعيط تانى ودخلت خدت دش وصلت ورجعت ع السرير عشان تنام وقفلت الفون بعد م بعتت مسدج ل ادهم انها هتنام
♡♡♡♡♡♡♡♡♡♡♡♡♡♡
ادهم: يا طنط يعنى متعرفيش مالها؟
مامتها: والله لا يا بنى من وقت م جت امبارح وهى قافله على نفسها ومش راضية تفتح لحد ولا تكلم حد
ادهم: تمام يا طنط، خبطى عليها بعد اذنك وقوليلها ادهم بيقولك افتحى فونك
قفل معاها واستنى اما فتحت فونها وردت عليه
ادهم: ينفع يعنى تقلقينى عليكى. كده من امبارح؟
موج: حقك عليا معلش انا بس متضايقة شوية
ادهم: ايه اللى يضايق حبيبتى للدرجه يخليها تعيط طيب؟
موج: مش عايزة اتكلم طيب دلوقتى ع الاقل
ادهم: امممم، طيب قومى كده زى الشاطره البسى احلى طقم عندك انا عازمك
موج باستغراب: انت رجعت من السفر؟؟!
ادهم: هرجع م السفر من غير م تعرفى؟ ازاى؟!
موج: اومال هتعزمنى بره ازاى؟!
ادهم: انتى رغاية ليه كده، اخلص يا حلو
موج بابتسامة: حاضر لما اشوف اخرتها معاك
لبست موج زى م قالها ورنت عليه تانى طلب منها تفتح فيديو كول
ادهم: الله اكبر، ايه الجمال ده؟
موج: حلو الدريس؟
ادهم: قمرين تلاته اربعه، اينعم باين على وشنا الزعل اللى منعرفش سببه والعياط اللى مخلى عيونا اجمل، بس هنصلح كل ده دلوقتى حالا.
موج: ازاى بقى؟!
ادهم: زى الشاطره هتطلعى تشاورى طنط انك خارجه وتنزلى وانتى معايا ع الفون يلا
♡♡♡♡♡♡♡
خرجت م البيت ونزلت الشارع وكان ادهم بيكلمها فون
ادهم: دلوقتى بقى تاخدى تاكسى على المكان المفضل لينا وهتلاقى حجز على اول ترابيزه قعدنا عليها.
دخلت المكان ولقيت الترابيزه وقعدت وكانت الترابيزه جنب البحر على طول
ادهم: دلوقتى بقى الكتكوت يفتح فيديو كول يلا.
فتحت فيديو وسابت الفون قدامها وبصتله
موج: حركاتك المجنونة دى انا مش عارفه اخرها ايه
ادهم: عادى، اخرها انى افرحك واشوفك مبسوطه ولو حبة صغننين
موج: مش هفرح غير بوجودك معايا
ادهم: طيب م انا معاكى اهو، اطلبى بس الاكل ونشوف الحوار ده سوا
طلبت شاورما و V7 كالعادة ونزلها الطلب وادهم معاها فيديو
ادهم: كلى يلا
موج: مش قادرة والله
فجأة ادهم ظهر قدامها وهو بيقول
ادهم: فى اللحظة دى احب اتدخل جدا واجى أأكل قرة عينى بإيدى الاتنين
موج وقفت مكانها وهى حاطة ايدها على بوقها بصدمه: لا متهزرش
ادهم : والله م بهزر، انا قدامك اهو
جريت موج عليه وحضنته جامد وكل اللى ف المكان كانو بيسقفوا ومنهم اللى بيصور اللحظة دى
خدها ادهم وقعد قصادها ع الترابيزه وهو ماسك ايدها ونزله نفس الطلب بتاع موج
موج: انت قولت انك جاى كمان كام يوم مش دلوقتى
ادهم: يعنى كنتى عايزانى اسمع عياطك امبارح بالمنظر ده وفونك اللى يتقفل واسيبك لدماغك تسوحك اكتر؟ انسى يا ماما مش انا اللى اعمل كده
موج بلمعة عين: هو انا قولتلك انى بحبك قبل كده يا ادهم؟
ادهم: نسمعها تانى وعاشر يا عيون ادهم وبعدين يلا كلى قبل م الاكل يبرد ونشوف حوار بحبك ده.
ضحكت موج وكلوا وخلصوا وطلعوا يتمشوا سوا فى وسط البلد
♡♡♡♡♡♡♡♡♡♡♡
ادهم: ها بقى يا ست الكل، ايه اللى مزعلك
موج: تصدق انى نسيت لمجرد انى شوفتك!
ادهم: اوعى التثبيت، بس ولو ولو لازم تقوليلى وانتى عارفه انا زنان ازاى.
موج: خناقة بسيطة بينى وبين صحبتى كده
ادهم: وهى الخناقة تخليكى ماشية فى الشارع معيطة ومتعرفيش انتى رايحه فين؟
موج بدموع لمعت فى عيونها: باباها تعب واحنا مع بعض وجرينا سوا للمستشفى وهى فضلت تعيط جامد حضنتها وفضلت اهدى فيها والدكتور خرج قالهم انه محتاج عمليه وهى انهارت
سكتت موج بعدها
ادهم : بعدين حصل ايه؟!
نزلت دموع موج وهى بتقول: وانا بهدى فيها بقولها ان شاء الله هيطلع منها كويس انا حاسة بيكى بس ادعيله وتعالى ننزل نصلى سوا، لقيتها بصتلى وبتقولى وانتى هتحسى بيا ازاى وباباكى ميت؟ وقتها حسيت بجردل مايه ساقعة واتدلق عليا، اتوجعت منها اوى، متوقعتش جمله زى دى منها، وهى عارفه انا كنت متعلقه ازاى ب بابا وعارفه كويس اوى انا ازاى عانيت لما هو سابنى ولولا وجودك فى حياتى وقتها وكنا كاتبين الكتاب انا مكنتش طلعت من الحالة اللى كنت فيها، متوقعتهاش منها خالص يا ادهم والله، فتحت جرح مصدقت انه لم وهدى.
حضنها ادهم بكل ما فيه وعيطت اكتر فى حضنه
موج: وحشنى اوى يا ادهم، ووحشنى كل لحظة معاه
ادهم: ششششش انا هنا اهو معاكى، ايوة مش هكون زيه ولا هاخد مكانته ف قلبك بس انا معاكى اى حاجه تحتاجيها هتلاقينى فى ضهرك وهشجعك بكل ما فيا، انا مصدقت انك تخرجى من الحاله اللى كنتى فيها، وبعافر بكل طاقتى انك متدخليش فيها تانى، تيجى هى وبكلمه ترجعك لنقطه الصفر من تانى؟؟ فين عنوانها دى؟!
خرجت من حضنه وبصتله: هتعمل ايه بعنوانها؟
ادهم: هروح اجيب حق بنتى من هناك، واعرفها ان حتى كلمة صحبة مينفعش تتقال ليها.
موج: بلاش يا ادهم هى دلوقتى زعلانه عشان باباها بلاش نزود زعلها تانى هى اكيد متقصدش.
ادهم: خليكى انتى كده بتتعاملى بطيبه مع ناس متستاهلش
موج: طيب انت زعلان ليه دلوقتى؟
ادهم: متضايق عشانك وان بسببها وصلتى بحالتك اللى كنتى فيها.
مسكت موج ايده وقالت: وانا كويسه اهو
وفرحانه اوى اوى اوى انك موجود معايا، وبعدين ايه ده انت عايز تلهينى ومتأكلنيش ايس كريم من العبد ولا تشربنى قصب؟ ولا انت بخيل يلا
ادهم بصدمه: بخيل؟ بعد كل ده؟! صحيح خير تعمل شرا تلقى، متمرش فيكى الشاورما بتاعتك وبتاعتى اللى ملحقوش يتهضموا دول؟
موج: بالهنا والشفا على قلبى، يلا بقى
خدها ادهم من ايدها ومشى بيها
ادهم: امرى لله، خارج مع بنت اختى انا
ضحكت موج بسعاده واتعلقت فى ايده زى الاطفال بالظبط وجابلها عصير قصب وفضلوا يتصوروا وجابلها ايس كريم وكل حاجه كان نفسها فيها.
موج: اقولك سر
ادهم: قولى
موج: انت عوض ربنا ليا، حاسة بوجودك ان الحياة بتقولى انا اسفة على كل اللى عشتيه وعلى كل اللى مريتى بيه، حساك كده زى المكافأة اللى بتيجى للواحد بعد شوقة، او مصباح علاء الدين اللى بيحقق الامنيات ده عارفه؟
ادهم: عارفه وحافظه يا برنسس جاسمن انتى.
ضحكت موج وحضنته وقالت: انا بحبك اوى يا ادهم.
ادهم : وانا بموت فيكى يا روح ادهم.
وفجأة المطر نزل وادهم فضل يلف بيها تحت المطر ويجروا سوا بسعادة وللحظة كل واحد فيهم نسى سنه ورجع طفل صغير فرحان بنزول المطر على هدومه، ومشاركه اللحظة دى حد بيحبه اوى من كل قلبه، كل طرف مطمن بوجود الطرف التانى ومش عايز حاجة تانى من الدنيا غير وجوده وحضنه وبس.
وفى الباك جراوند كان وائل جسار بيقول:
« واحنا اتقابلنا وجه أونًَا،
شوفتك بقلبى اللى اتمنَّا،
وريتنى أيام الجنة
وبنيت بحبك اوقاتى
حلم حيااااتى
وصحيت وياك على يوم عيدى
حضنك قلبى ولمساك ايدى
والفرحة اهى عرفت مواعيدى
كترى يا سنين منها وهاتى
حلم حياااااااتى»
تمت بحمد الله
وايضا زورو قناتنا سما للروايات
من هنا علي التلجرام لتشارك معنا لك