الفصل التاسع والعشرون 29 ج4
بقلم نجمه براقه
#مؤيد
كل حاجه غريبه في البيت ده مفيش حاجه مفهومه ، وعلامات الاستفهام كتير عن اللي بيحصل وتعامل كل شخص مع التاني ، مفيش حد فيهم قايم بدوره ، زوج مش زوج ، واب مش اب ، و ولد يشبهني يطلع غريب عنهم ولقيط ، وبابا قايم بدور الاب ليقين في حين ان ابوها بيكرها ، كله ملخبط ، بس كله معقول شويه ، الا تصرف عبدالرحمن لما خرج من جوه ويقين خرجت وراه و وقفت جمب اوضتها خايفه وحاطه ايدها علي بوقها ومستنيه اللي هيقوله بتوتر شديد
عبدالرحمن: عاوز اقول حاجه لازم كلكم تعرفوها
عمار ينهض ويمسك ساعده: عبدالرحمن عاوزك دقيقه
عبدالرحمن: سيبني اقول اللي عندي يا بابا ، انا مش هخبي اكتر من كده ، مش هتتحسب عليه جوازه بالكدب
صفوان: جوازه بالكدب ؟! انت بتقول ايه
عمار: بقولك تعاله
صفوان: استنا يا عمار..( يوجه حديثه لعبدالرحمن وهو يتقدم نحوه ) ايه الحكاية
عمار: مفيش حكايات ، عبدالرحمن بقولك تعااااله
عبدالرحمن يفلت يده : لو سمحت يا بابا سيبني اتكلم، مش ماشي من هنا غير لما اتكلم وتعرفو اللي حصل
كان باين علي بابا القلق الشديد من اللي هيقوله عبدالرحمن وكأنه عارف هيقول ايه ، وعمي صفوان واقف قدامه وبيسأله في ايه وليه بيقول كده وبعد توتر من الكل نطق عبدالرحمن اخيرآ بكلام غير اللي انا توقعته
عبدالرحمن: انتو كلكم عارفين انا ويقين اتجوزنا ازاي وانها مكنتش موافقه عليه قبل كده واطرت تجوزني عشان المشكله اللي حصلت
صفوان: وبعدين
عبدالرحمن: يقين لغيت دلوقتي مش عاوزاني، ومكملناش جوازنا، مدخلتش عليها يعني زي مانتو عارفين
عمار: عبدالرحمن!!!
صفوان: عمار ! استني انت دلوك ( يضيف موجه حديثه لعبدالرحمن) يعني ايه مدخلتش عليها امال الي شفناه ده ايه
عبدالرحمن: انا جرحت ايدي ومسحتها في الملايه ده اللي حصل يومها
صفوان باندهاش: يعني ايه...( يتابع بجنون) يعني البت معيوبه ولا لا
عبدالرحمن بعد صمت دام في النظر إليها: لا هي كويسه ، كويسه قوي ياعمي.. هي كشفت عند الدكتوره وقالت انها كويسه وبختم ربها وعمرها ما غلطت أبداً ، بنتكم شريفه
عمار يتنفس باريحيه: خلاص قفل علي السيره عيب الكلام ده
صفوان: يعني ايه يقفل علي السيره ، اسمع ياد انت دلوك تدخل عليها بلا رضيت بلا ما رضيتش
عمار: بزيداك يا صفوان
صفوان: بقولك ايه يا عمار ، الكلام ده مينفعنيش يعني ايه يقعدو كل ده من غير ما يحصل حاجه.. ( يضيف موجه حديثه لعبدالرحمن) وانت مقصفتش رقبتها ليه
عبدالرحمن: واقصف رقبتها ليه ، هي مش عاوزاني وانا كمان مش هاخدها غصب ، ودلوقتي علي كده انا هطلقها
صفوان: تطلق مين... اسكوت خالص مفيش طلاق
عبدالرحمن: احنا خلاص قررنا اننا مش عاوزين نكمل بس كمان مينفعش متعرفوش اللي حصل وتفضلو فاكرين ان الجوازه كملت بالكدب ( يتقدم نحوها ويمسك يدها )
عبدالرحمن بخفوت: انا عملت اللي عليه وانتي بعد كده حره مع ابوكي ، بس انا مش هشيل غلطت غيري
يقين بدموع: انت كده كتر خيرك ، متشكره قوي
تجاهل كلماتها وعاد بها اليهم: قدامكم اهو انا بطلق يقين بتلاته ومن غير رجعه ومتحرمه عليه زي امي واختي.. انتي طالق يايقين
صفوان: انت عملت ايه يا فقر صحابك، ردها قوام
عبدالرحمن: عملت الصح.. ورقتها هتكون عندها ( ينظر لعمار) انا مسافر ، هقعد في مصر وامي واختي وقت ما يعوذو يشفوني هما عارفين عنواني .. هلم حاجتي وماشي
قال كده ودخل جوه وهي وقفت مكانها تبكي وكانها زعلت علشان طلقها بس اللي انا مش فاهمه هو ليه عمل كده ليه خبي عليها .. معقول يكون بيحبها لدرجه يستر عليها بعد ما اهانته كده.
حاولت كتير افهم حاجه من اللي بيحصل وبردو مفهمتش ف سيبتهم وطلعت اقعد في الجنينه مع وحيد بدل ما اقول حاجه اندم عليها وبعد شوية جت ندي تقعد جمبي وتتكلم في الموضوع
ندي: واضح انك رجعت في وقت غلط ما تيجي نرجع القاهرة
مؤيد: مش دلوقتي تقدري ترجعي انتي لو عاوزه
ندي: بتطردني
مؤيد: لا بس لو مضايقك الوضع ده امشي
ندي: اممم امشي ؟! لا مستنيه ؛ مش هسيبك في التوتر ده ( قالتها وهي تنهض) داخلة جوه