رواية رحم للايجار
الفصل الثالث والسبعون 73 ج1
الجزء الثالث
بقلم ريحانة الجنه
((حب الفرسان))
شعور الخوف ده شعور نسبي ومختلف مش ثابت داخل كل انسان ولا موحد في كل المواقف والحالات ...
اوقات بنخاف من شخص معين !! نخاف علي غالي او حبيب !! نخاف من بكرة واللي جاي مجهول !!
لكن هنا هو شعور الخوف جواه غريب ومتشابك زي خيوط العنكبوت !! خوف مرعب ..خوف من كل لحظة جاية ..خوف من كل حركة بتتحركها عقارب الساعة قصاد عيونه !! بيتمني يوقفها ما تمشيش ثانية واحدة لقدام ...يمكن كمان بيتمني لو كان يقدر انه يرجعها لايام وشهور ويمكن سنين فاتت لورا علشان يمنع كل شئ حصل وهو في غفلة ومش عارف ..اللي حصل اللي وصله للحظة المرعبة اللي بيعيشها دلوقتي !! يمكن هو اكتر واحد الكل شايفه قلبه قوي ومكابر وبيعاند ومافيش حاجة بتهده !! يمكن تكون دي حقيقة ..ويمكن كمان هو نفسه فعلا شايف كدة ومتأكد من كدة....الا عندها ومعاها وعلشانها ...كل الثوابت والطباع بتقع وتتهد كل القوي بتضعف وبيكون في اضعف حالاته ...!!
هي كمان كل ده حاسة بيه وفهماه ويمكن موجوعة لوجعه عليها اكتر من وجعها علي حالها والمجهول اللي مستنيها !!
اتنهدت بخفوت وحيرة وهي عيونها عليه في ظلام الاوضة وهو قاعد علي كرسيه بعيد عنها بأمتار قليلة ...هو متخيل انها نامت ومش هتحس بحالته وضعفه !! لكنها من وقت ما دخل الاوضة من ساعات وقعد مكانها وعيونه عليها بحزن وحيرة وخوف بيمزق قلبه وتفكيره وهي حاسة بيه لكن مش قادرة تواجهه وهو في حالته دي ...لكن الضوء البسيط اللي بينور الاوضة كأنه كلها اتجمع عليه وعلي ملامحه وعيونه وهي عيونها ما فرقتهوش لحظة ...
قام اخيرا من جلسته الطويلة وهو بيتأملها من بعيد ساكت وشارد وقرب منها بخفة وقعد قربها وعيونها بتشبع منها بحرمان غريب وشديد ..ابتلع غصة وجع وأطرافه بتتخلل خصلات شعرها المختلطة بأجمل لونين بالنسبة ليه!! الاسود وهو اصل لون شعرها في صباها وشبابها...واللي كل خصلة منهم لسة بتفكره بكل ذكرى بينهم وكل مكان جمعهم وكل كلمة اتقالت بينهم من اول مرة شافها ...واللون الابيض واللي كأنه ختم من الايام والزمن بيختم بيه علي كل سنة مرت عليها معاه وكبرت قصاد عيونه وكل لحظة وقفت في ظهره فيها وكل موقف عاشوه سوا مع بعض..ومع اولادهم ..ومن بعدهم أحفادهم... ختم ممتع كل خصلة منه بتقول ان اختيار قلبه كان صح ووافق اختيار عقله وده شئ نادر وبيحصل بصعوبة ...ان اختيارنا في لحظة ضعف قلبنا وحبنا يكون صح ونتوفق فيه !! والقلب يسعدنا وما يخذلناش!!
كأن العمر والحكايات والايام كلها ساكنه بين كل خصلتين من خصلات شعرها ...كل خصلتين بلنونين مختلفين بينهم عمر بحاله وحياه طويلة مستحيل تتعوض ولا تتعاش من تاني الا في الذكريات والاحلام !!
ثباتها خانها وفشلت انها تهرب منه اكتر من كدة!! وجعه واللي من قوته ظاهر في رعشة ايده وهي بتملس علي شعرها وجعها عليه وفتحت عيونها اللي غمضتها هروب منه لما شافته بيقرب منها ...
همس بصت في عيونه بحنان: كفاية تأنيب علشان خاطري !! انا بحاول اهرب منك واتحجج بالنوم علشان تهدي ..كل ما بتبص في عيوني بشوف حزن وضعف عمري ما شوفتك فيه قبل كدة !!
هروب الدموع من عيونه كان محتار في سببه!! هو فعلا وصل لمرحلة من الحزن و الضعف لدرجة انه مش قادر يلجم دموعه ولا الكبر والعمر بيخونوه وهدموا قوته للدرجة دي !!
رعد بحزن وتأنيب مش بيفارقه لحظة : هو مين اللي المفروض يهرب من عيون التاني يا همس !! انا ولا انتي !؟ مين فينا اتأذي بسبب التاني واتوجع واتعرض للموت بدل المرة اتنين وتلاثة !! انا ولا انتي !! مين كان غافل واعمي وفاشل انه يحمي التاني ..انا ولا انتي !!؟ يارتني كنت اقدر اهرب منك بس مش قادر اهرب واسيبك وانا السبب في اللي وصلتي ليه !! حتي الهروب والاعتذار مش قادر عليه !! انا بعترف اني فشلت احميكي وانتي في حضني وقصاد عيوني !! كنت فاشل ومقصر اوي يا همس !!
استقامت من نومتها بدموع وصدمة من كلامه وحالته اللي حقيقي اول مرة تشوفه فيها !! ضمت ملامحه بحنان وهي بتمحي دموعه اللي زادت بشكل ملفت أثناء كلامه !! واللي مش مجرد دمعة هاربة وشاردة في لحظة ضعف !! لا دي دموع مخزونة وكأنها ما انتهزت الفرصة علشان تخرج من قلبه قبل عيونه وتهرب وتتحرر !!
همس بنفي: ايه اللي بتقوله ده يا رعد !! انت !؟ انت فاشل !! لا اوعي تقول كدة ..انت عمرك ما فشلت ولا كنت مقصر انك تحميني وتحمي ولادنا واحفادنا والعيلة كلها!! انت مش رب ولا اله علشان تعرف كل حاجة وتعلم الغيب!! مش طبيعي ومفروض تحمي الكل وتساعد الكل وكل شئ يتم علي هواك !! انت بشر ..بشر طبيعي كل اللي تقدر عليه انك تحاول بعزم ما عندك وبكل قوتك وطاقتك !! وده اللي انت عملته ! انت من يوم ما قابلتك وانت بتحاول تحميني وتخبيني !! من يومك بتتحدي حتي نفسك مش بس الناس والظروف والمشاكل !! انت طول عمرك قوي وشديد وعنيد!! لكن يا حبيبي انا قولتلك انت بشر !! بشر ..بشر وليك قدرة مهما كبرت وعليت هتفضل قدرة بشر مش قدرة إله!! حرام عليك نفسك ..حرام عليك تحملها فوق طاقتها وتهلك نفسك بالندم والعتاب والتأنيب المهلك ده !!
ضم كفوفها اللي بتحضن ملامحها بحنان وضمها لقلبه وعيونه في عيونها بتسألها لاول مرة السؤال ده !!
رعد بحزن: يمكن يكون معاكي حق في كل اللي قولتيه !! واني انسان وليا قدرة علي كل شئ!! لكن اكيد انا كنت في كل مرة بتتأذي فيها بسببي غافل عنك وعن حمايتك !! همس ..انتي حقيقي مسمحاني من قلبك !! حقيقي قلبك اللي اتهلك وتعب بسببي وبسبب حربي مع حازم وغيره وانا اللي كنت السبب في تعبه واللي حصل ليه !! قلبك اللي ما اتمنتش غيره ..ولا اتمنيت اسكن الا فيه !! قلبك بعد كل اللي جري ليه يا همس مسامحني ولسة بيحبني!! ولا كرهني وتعب مني ومعاه حق لو ده حصل ! مسمحاني يا همس !؟
بكت بحرقة ودهشة من كلامه والحال اللي وصل ليه !!
همس : انت ازاي وصلت لكدة !! ازاي قلبك ولسانك طاوعوك تقول كدة !! ازاي قدرت تفكر كدة !! انا قلبي يكرهك ويزهد فيك يا رعد !! انا !! والله ..وحياة كل لحظة جمعتني بيك وحياة كل ليلة شوفت فيها حنيتك لاعمره حصل ولا هيحصل !! ده انا قلبي كأنه ربنا خلقه وانت ساكن فيه لحد ما قابلتك وشوفتك وقتها خرجت من بين دقاته ...انت ما دخلتش قلبي لما قابلتك يا رعد انت كنت جواه ...جواه من قبل ما اشوفك عارف ليه !! علشان ربنا كان مقدر اني اقابلك واحبك !! ربنا كان مخبيك ليا علشان يعوضني ويفرحني ...الدنيا قبلك لا كانت تتعاش ولا تتحب !! ده انت دخلت حياتي حلتها وغيرتها !! نسيت !! نسيت انا كنت عايشة في ايه واللي كان مستنيني قد ايه وانت عملت علشاني ايه !! نسيت ولا الايام نستك !!؟
رعد اتنهد بحنين : ولا عمري اقدر انسي!!
همس ابتسمت بحزن : لا شكلك نسيت !! نسيت ناجي واللي كان ممكن يعمله فيها !! نسيت جوز اختي وابن عمي اللي كانوا عايزين ينهشوا فيا !! وانت عملت فيهم ايه علشاني !! نسيت مها واللي شوفته منها وانت ازاي نصرتني عليها !! نسيت جدك واللي عمله فيا وانت ازاي وقفت قصاده بكل جبروت وقوة !! نسيت كل اللي شوفته منك وعملته علشاني يا رعد وافتكرت بس انك السبب في شوية تعب ربنا مقدرهم عليا !!
رعد انت ليه مش قادر تفهم وتستوعب ان عداوتك مع مها وجدك. زمان ومع حازم زمان ولحد دلوقتي وغيرهم وغيرهم او من غير عداوتهم اللي ربنا مقدره ليا وليك هنشوفه !! ليه مش فاهم ان حتي لو حازم ما كنش دبر ورسم لكل ده ربنا كان رايد ان قلبي يتعب كدة وكان هيتعب ويوصل للمرحلة دي حتي من غير أدوية ولا مؤمرات ولا اتفاقات !! كل الحكاية انهم نفسهم اقوي من شيطانهم والقدر حطهم في الطريق ده وبقوا مجرد اسباب !! لكن القدر واحد ومحتوم !! قدر ربنا لا ولا انت ولا هما لينا يد فيه !! يمكن هما يدهم كانت في الشر وعلشان كدة ربنا حطهم في طريقنا!!
رعد بغليل وغضب: لا يا همس !! لا !! انا وهما السبب !! انا يمكن زمان ولحد النهاردة بحاول احميكي واعوضك ايوة !! لكن من ايه ومن مين !! ماهو انا السبب في كل ده !! كل اذي وكل تعب حصل ليكي كنت انا المقصود بيه وانا اللي كان لازم اكون مكانك مش انتي !! انا السبب يا همس .. انا مش حد تاني !؟
همس بشفقة : ارجوك كفايا كدة انا راضية بقضاء ربنا ومش معترضة ثم مش خلاص انت قررت اننا نسافر مع سليم.. وأنا وافقت علشان اريحك !!
رعد ضم كفوفها بحنان: اوعدك إني اخد حقك من اللي عمل كدة ولو كانت دي اخر حاجة هعملها في حياتي...اوعدك ......