روايه حافة المنتصف الفصل الخامس والثلاثون 35 بقلم آيه

روايه حافة المنتصف 

الفصل الخامس والثلاثون 35

بقلم آيه


الدكتورة>> انا مجد متابعه حالتها ونعرف النظام لي نمشي بيه معاها ، بس عشان نطمنو ح نطلب منك كم تحليل اديرهن امتى ما تحب تعال للمعمل تو نكتبلك اسمه دير التحاليل وهما ح يدزوهن ليا على طول لما يجهزن 


مجد سكتت وبحتت فيه وكانت تعرف انه ك راجل يعني صعب عليه الموضوع هضا 


صالحين >> وامتى مفروض نديره 


الدكتوره>> كل ما سرعنا كل ما احسن ، لو تقدر بكرا ف عادي المعمل هضا الكرت متاعه "ومداته له" في كم فرع واحد منهم قريب من المستشفى شوف الي يناسبك


هز براسه >> ان شاء الله خير ، مجد انا برا 


طلع الصالحين ومجد حست انه اضايق 


الدكتورة >> مجد رحلتنا صعبه ومن اول ما كنت نتابع معاكي من بعد الحادث فهمتك كل شي … الحمدلله وضعك احسن بس الخبطه كانت في مكان جدا حساس علاجك وكل شي ميه الميه ومسألة الحمل امر ربي 


هزت مجد براسها و ماحبتش ترد وهيه سامعه الكلام وحافظته من زمااان


//

//


عند الرائد لي كان في مكتبه 


دق الباب وخش خالد


نبراس>> تو بنفهم انت والصالحين شن فايدة امها الدقه وانتو بتخشو طول 


خالد>> نجاملو فيك بس ولا كان علينا نعتلو ونخشو 


نبراس >> بيش نكس*ره على روسكم


خالد ضحك >> ياساتر يا ربي ، وينه هوا صالحين يحساب روحه اعلى منه رتبه يسيبلنا الشغل ولا شنو 


نبراس>> طالع قال عنده موعد مع المدام


خالد >> صالحين قعد عنده وليه الله الله يالدنيا 


نبراس ضحك>> ما حتى انت عندك


خالد>> عقبالك تكمل الطقم معانا 


ابتسم نبراس والباب كان مفتوح ، علي خشت باته استغرب نبراس وصبا وخالد قرب على الهادي يسلم


الهادي>> سامحونا عطلنا خدمة الوطن


ضحك خالد >> تي نوقفو المركز كله علي سباك


الهادي>> الله يعزك كيف حالك ووينك لا عاد جيت لا وريتني وجد


خالد>> ولدك لا يعزم لا يقول تفضلو


هز نبراس راسه وكر الكرسي الباته بيش يقعمز 


الهادي>> الحوش حوشك تراجي في عزومه غير جيب الوليه شي يوم وتعالو 


خالد>> حاضر والله ، هي انا نستأدن عندي شغل لوطا 


نبراس>> تم تم 


طلع خالد وخذا الباب في يده ، ونبراس من قعدت باته فهم انه مش جايه عشان يتوسطله انه يطلع حد ولا يحل مشكله مع حد … كان واضح بيحكيله في موضوع خطبته 


نبراس>> قهوة ولا شاهي يا حاج

الهادي>> مش جاي نشرب.. نبيك تسمعني


ربع يديه و لف من مكتبه وجا قعد في الكرسي لي مقابل باته 


الهادي >> سالت عالعرب لي حكيت عليهم والكذب على ربي حرام عرب كويسين والبات بذات ما سألتش حد الا وقالولي انه راجل بهيبته وشخصيته وراجل كويس … وخوها نفس الشي متجوز وعنده عويله وراجل يشتغل على حاله …


نبراس >> يا حاج الكلام هضا مفروض تقعد عارفه ما سيدي فرج ماشي قبلك وسأل عليهم لما خطبو سهم البنتهم يعني لو في حاجه ولا كان سمع حاجه انت عارف سيدي مستحيل يخطبها 


الهادي >> مشيت سألت على البنت في منطقتهم


نبراس باستغراب >> كيف يعني منطقتهم


الهادي>> قبل ما تطلق يعني 


نبراس قرن حواجبه و ما بش يرد 


الهادي >> ب امانه ماحدش جاب سيرتها الا بكل خير الجيران قالو عاشت فالشقه كم شهر و ما سمعنش فيهم حسها نهائي 


نبراس باعصاب >> حاج نهاية الكلام شنو 


الهادي >> تبي تاخذها انت حر بس زي ما قتلك انت راجل ونعرفك لو حسيت انه البنت مش لكي او بعد يطيح الفاس فالراس تقولي لا هذي كانت متجوزه انا ما ليش اي دخل نصحتك انا وامك نفس الشي ف حوشك وحياتك حر فيهن


نبراس >> صدقني انا ما حكيتلكش الا وانا خابز وعاجن القرار في راسي فتره طوييييله بكل 


الهادي>> امتى بتحكي مع هلها؟


نبراس>> ح نكلم خوها بعدين عشان هوا يحكي الباته بعدها ناخذو موعد ونمشو البوها تتفقو بينكم وتحددو يوم الفاتحه


هز الهادي براسه>> ان شاء الله خير "وصبا"


نبراس >> غير اقعد اشرب حاجه


الهادي >> بنعدي نشوف كلاب النار شن ملبزين فالمعرض ليا زمان ما طبيت عليهم


ابتسم نبراس >> تم تم 


//

//


روح الصالحين بمجد للحوش ، ونزل معاها بيصلي قبل ما يمشي للمكتب 


خشت غيرت دبشها و من اول ما طلعو من العياده وهيه حاسه انه صالحين اضايق ، ماكانتش عارفه كيف تتصرف خصوصا انه مالهمش فتره علي بعضهم ومش واخذه عليه واجد و هيه بروحها مش فاهمه شعورها له شنو بس الي تعرفه انها متريحه معاه 


طلع صالحين بعد كمل صلاته وقطع سرحانها 


صالحين >> بنمشو شور المركز عندي شوي شغل 


مجد >> مطول 


صالحين هز راسه>> لالا ننهي كم حاجه ونروح 


مجد>> ح نبرم عالحوش وننزل نشرب قهوه مع عميمه 


صالحين يلبس في كندرته>> تهيالي قالي نبراس خالتي بتجي تهدرز 


صبت مقابلته>> صالحين بحت فيا


ربط خيوط الكندره وبحت فيها ورفع حاجبه


مجد>> زعلت؟


صالحين >> عليش بنزعل موعد دكتوره ومشيناله "وصبا مقابلها "


مجد رفعت راسها >> متأكد؟ يعني لو ماتبيش ادير التحاليل ما تديرهنش عادي براحتك


صالحين ابتسم >> لدرجه هذي تحبيني 


برمت وجها >> صالحيييين


ضحك >> ح يفوت نبراس ويقعدلك الصالحين


ابتسمت >> نحكي جد ما اتوهش الموضوع


صالحين>> مش زعلان انتي عشان مضايقك الموضوع ف مركزه علي كل شي ، ارخي روحك وخليها علي ربي 


مجد>> ان شاءالله 


صالحين >> هي كملي وانزلي مش ح نطول 


ابتسمت >> تمام 


//

//


عند كلاب النار على قول عمي الهادي ، قصدي عند الشباب فالمعرض 🤭 كانو قاعدين هما الثلاثة يديرو في جرد نهاية السنة و كل حد يهبد في حاجه من عنده


لقمان >> بدر الدين اسكت اسكت

بدر >> تي شن قلت انا 

سهم>> مليون مره نعاودو ام الحسبه من لخبطتك

بدر وخر يديه>> دروحكم اذكياء انت وخوك 


لقمان>> انت عد نجوم الليل عد الحبايب كم حبّيبه الا انك تعد الحسبه


بدر >> هي قولتك خليني نطلع نعد نجوم الليل 


برم يبي يطلع ويحق باته خاش شورهم ، وصل عند الباب ورد


بحت فيه سهم >> كيف صار 


لقمان شاف شور الباب وضحك>> قال لم يقل شيئا 😂😂


ضحك بدر وخش الهادي >> السلام عليكم 


الشباب>> وعليكم السلام 


بدر >> مرحب مرحب


الهادي بحت فيه >> وين كنت طالع


بدر >> لا غير كنت نحسب وعارفني انت لما نحسب نحب نبرم بيش تطلع الحسبه صح 


ضحك لقمان خبطه بدر على كراعه و سهم مطبس راسه في الاوراق وما يبيش يضحك


الهادي ماصدقش طبعا لف شور سهم>> و شن درتو فالحسبه 


سهم >> قاعدين ننهو فيها للمره المليون بيش نتأكدو انه كله صح


كر الهادي كرسيه وقعمز>> باهي تمام تمام ، ما خطمش باتك هنا 


لقمان >> لا والله كيف قالك بيجي


الهادي>> اه قتله بنمشي شور المعرض قالي عنده مشوار وبعدها تو يخطم


بدر >> تلقاه نسا ، كارثة معتز خلت فيه عقل 


الهادي >> خطرها على معتز ، اسمعو انتو الثلاثه را انا وبوكم كبار ومافينش حيل نقعدو نحلو في مشاكلكم ، الي عنده سيور على حاله يبي يديره يقعد راجل وقد كلمته ويبعد عن الغلط كلا تقعدو تلبزو وكل حد يحساب روحه حر نفسه لا والله وراكم هل ووراكم ناس 


بدر >> تي غير روق يا حاج بس 


بحت فيه الهادي>> الكلام لكي مخصوص


ضحك سهم بصوت ومعاه لقمان وبدر بحت فيهم وبرم وجه 


صبا الهادي >> هي كملو الحسبه ربي يعاونكم


طلع وبدر بحت فيهم


لقمان >> كنه الحاج جاي يهدد


بدر >> جايني انا راقد الريح

لقمان >> وانا معاك 


سهم بحت فيهم >> كلا انا خطبت مش شوري كلام العويله


بدر >> اسكت انت لحظه ، لقمان شن في من ورايا 


لقمان مسك الفواتير >> بدر مش كنت بتطلع تعد نجوم الليل 


بدر >> اقعدو فيها تو نوريكم الخباثه انت وخوك


سهم >> احا شن دخلني انا 


بدر >> احسب احسب 


//

//


عند فرج ، الي خذا نجوى مراته ومشو شور حوش هل خلود عشان يفهمو الي صار و يشوفو فرج الصغير 


كان سراج هوا الي استقبلهم ، فتحلهم الباب سلم عليهم وخششهم للمربوعه 


سراج >> عمك وعمتك برا اطلعيلهم يبو فرج وبيحكو معاك


بحتت خلود في سراج لي قال كلامه وطلع وردت بحتت في امها ، وهيه حايره مش عارفه شن ادير عشان كانت مازال ما حكتلهم انه معتز بيتجوز من اول ما جتهم قالتلهم مشكله بينا وخلاص 


خلود >> ماما بنخش بفرج البسي محرمتك وتعالي بنحكي قدامك انتي وسراج 


نجاح >> عليش نخش معاك 


خلود >> ماما البسي بس وتعالي وكلمي سراج 


خذت خلود فرج وطلعت بيه شور المربوعه ، اول ما شافت خلود عمتها مشت لعندها و بكت وما قدرتش تمسك دموعها 

على خشت سراج مفجوع وفي جرته امه 


وفرج الي كان مسك حفيده ويهز في راسه بأسف ، وخرت خلود بعد خش سراج و مسحت دموعها على طول


سراج>> خلود كنك شن فيه


خلود>> قعمز بس بنحكي معاكم 


نجوى >> معقوله تطلعي وما تقوليلي 


خلود>> صدقيني يا عمتي اليوم لي طلعت فيه ماكنتش نشوف في شي قدامي والله كنت نبي نطلع وخلاص


هز فرج براسه و هو لي بدا الكلام >> انا عارف انه معتز غلطان من ساسه الراسه ، و مش ح نقولك اي عذر له وانتي خير منه و اعقل منه 


بحتت خلود في ملامح هلها لي مش فاهمين >> عمي ماما وخوتي ما يعرفوش انه معتز بيتجوز عليا


فنص سراج في خلود اما ام خلود حطت يدها على قلبها بصدمه …. وانهالن الاسأله من الطرفين 

سراج يحكي وامه تحكي و الاسأله كيف وليش وامتى ومن البنت  وامتى بيجوز وكيف بيجوز


فرج قطع الكلام >> ياجماعه عطوني معاكم كلمه بس 

انا والله عارف لي صار غلط وانا زي ما قلت من الاول مش جاي نتعذر عليه ولا نعطي فيه في مبررات ولدي غلط، بس زي ما انا عارف انه غلطان انا نعرف انه ح يندم والله ويعرف انه فرط في خلود وخسرها وحيجيها نادم 


نجوى>> ربي يعلم اني ما عندي بنات وانتي بنتي و عارفتيني كيف نصبي معاك وما نصبيش معاه ، انا والحاج عارفين ولدنا كويس وعارفه انه مش ح يلقى كيفك … ساعة شيطان و مانبيكش تاخذي اي قرار وانتي زعلانه ومش عارفه تفكري


سراج كان ساكت وما بش يحكي شي و كان متعقد من خلود انها ما حكتلش ،،،، و امها برضو كانت مصدومه و مقهوره على حظ بنتها 


بعد كملو كلامهم وماحدش من هل خلود حكى ، بحتت خلود في سراج وبعدين ردت عيونها العمها


خلود >> بس يا عمي 


قاطعها فرج >> كان عندي خاطر عندك ما تقوليش شي توا و ما تعطينيش جواب ، فكري كويس قبل وبعدها يسير خير 


هزت خلود براسها ، وطلع فرج فلوس من جيبه حطهن على فرج الصغير و خذا مراته وطلع وسيب خلود تحت تساؤلات هلها 


//

//


في حوش الجده ف الليل بعد ماكل حد كمل اشغاله وزي ما ديما متعودين كلهم لما يروحو يجو الحوش جدتهم على طول ، والبنات بطبيعة الحال ديما غادي 


كانت سيسي طالعه هيه وهديل يبن يروحن 


بدر >> عمتى هناء وين 


سيسي >> ماما روحت من مبدري تلقاها راقده اصلا 


بدر >> بتروحن 


هديل>> بكرا عندي شغل


ضحك بدر >> الله اكبر يلي قعد عندك شغل 


هديل >> مش ح نرد عليك قعدت بزنس وومن توا😂😂


ضحك بدر >> سيسي خشي جيبيلي اميه وهيا نصبيلكن 


سديم >> كيف هذي ، وصلنا وخش اشرب 


بدر >> سديم كلمه هيه 


خشت تنفتر>> اوووووف كل حاجه سديم سديم 


غمز بدر السهم انه ما يخلي حد يخش بيحكي معاها ، ابتسم سهم و غمض عيونه بمعنى تمام


على صوت تبييب سيارة نبراس ، طلع لقمان يفتح فالباب


خش درس سيارته ونزل لقاهم فالجنان واقفين


نبراس >> كنكم هنا صقع 


لقمان >> اهو توا متفرقين غير كنا نحزو بين بدر وسيسي 


ضحك نبراس >> كلا هما الاثنين عليك جهد للمنابشه عندهم


سهم >> خوك مستفز


هديل تثاوب >> حتى اختي بسلامتها 


ضحك لقمان 


نبراس بحت في سهم >> تعال النبي نبيك فكلمتين


سهم >> هي 


//

//


مشى نبراس ولحقه سهم على جنب ، طلع دخانه وولعه


سهم>> شن فيه؟؟


نبراس>> هوا انا عارفني كثرت عليك بس انقنه طلب 


سهم خذا منه الباكو كر دخان و ولع>> شنو؟


نبراس>> تحكي مع خطيبتك صح


سهم نفخ دخانه>> لو ماحكيتش معاها يوم ما ينحسبش يوم اصلا


نبراس >> بلا رومنسيه هابطه ندوي جد


سهم ضحك>> وجاوبتك


نبراس>> باهي ما تحكيلكش على اختها ؟


سهم ب استفزاز>> مرام قصدك؟؟


نبراس بحت فيه بالجنب>> شوف انا كيف محترمك ونقول خطيبتك؟ وانت كيف تحكي


ضحك سهم >> لالا ما حكتليش على اختها بس تقولي انها هكي حايسه الفتره هذي و خلاص


نبراس>> باهي تقدر تكلمها وتسالها


سهم>> كيف انت ما تحكيش معاها ؟ 


نبراس>> نحكي انا وياها بس حاس انها مضايقه وموضوعي معاها طول بكل وواعدها ندير حل و كل ما له يطاول ويتعكر الموضوع ومعش فاهم شن ندير وكيف نواسيها 


سهم >> عمي شن قالك؟؟


نبراس>> قالي انه كلم خوها وخوذ موعد بيش نمشو ونحكو مع هلها وكان سخر ربي نحددو موعد فاتحه


سهم >> يا سيدي على بركة الله ، وكلمته خوها؟

نبراس>> خلطت عليا خلطه فالشغل سودا طلعت ستين دوريه و المركز مليان ، الصبح بنكلمه 


سهم مسك تلفونه >> نكلم المدام و نقولك بعدها شن ح يسير 


نبراس >> عليك قصة


سهم>> تبيني نكلمها حذاك بلكي ؟


نبراس خلاص انتلف كلمها تقول ما خطب الا انت 🙂


مسك سهم تلفونه و حط على رقم ليلى ونبراس برم وخش شور دار سالمين و لقى امه جنبها


//

//


اما عند بدر ، خشت سديم وهوا لحقها وصكر باب المطبخ و واتكى عليه


سديم >> كنك ؟ عليش تصكر فالباب


بدر >> بننفرد بيك


سديم حطت كباية الميه>> افتح باب المطبخ شن الحركات هذينا را يجي عمو الهادي 


بدر >> عادي خليه يجي يشوفنا 


سديم >> بدر كنك ؟؟


بدر >> سيسي مطولين هكي


سديم >> مطولين كيف يعني


بدر >> ونحن نستعبطو ؟


سديم بلعت ريقها وسكتت


بدر >> ردي عليا لعند امتى العبط هضا ؟


سديم بغباء>> مش فاهمه على شن تحكي انت


بدر>> ايوه هضا لي نحكي فيه انا الاستعباط متاع مش عارفه شن تحكي انت ، وليش نحن الاثنين ديما هابين في بعضنا وليش وليش


سديم ربعت يديها >> بدر الدين 


بدر >> ما بدرش كذا الي يحكي حرفين تقولوه اسمي كامل تقول حافظينه جديد


سديم نزلت يديها >> افتح الباب خليني نطلع 


بدر >> قوليلي امتى ح نبطلو استعباط قبل


سديم>> انا مانستعبطش 


بدر >> سمعت كلامك مع سهم هضك اليوم 


سديم قرنت حواجبها >> شن سمعت؟؟


بدر ضحك>> انك خايفه مني ؟ تقول نبي ناكلك … ما سمعتش باقي الكلام لاني ما كنتش نصنت اصلا كنت طالع شوركم لقيتكم تحكو رديت خشيت


سديم توترت >> بدددرر خليني نطلع لو سمحت 


بدر >> مش عارف شن رد عليكي سهم بس متأكد انه قالك اللي بنقوله لانه الوحيد لي حافظني ، وعارف انه قالك اني مستحيل نأذيكي واني والله معش نحكي مع ولا وحده وانه وانه وانه 


سديم >> بدر ارجوك انت ولد عمي ، و انا بنت عمك وغاليين على بعضنا و تبي نسكافيه نديرلك و تبصر معايا و نبصر معاك و بس "بحتت فيه" وبسسس يابدر


ابتسم ورفع حاجبه>> ح تقدري ؟ 


سديم بحتت فيه وحطت يدها على حجابها تسقم فيه بتوتر


رخى حواجبه >> مش ح نقولك وقفي استعباط بس انا ح نوقفه ومن يوم وغادي انا مش بدر الدين ولد عمك وبس


بخوف >> شن قصدك؟


بدر>> وخر من الباب، كل خير "وفتح الباب وهوا مازال مقابلها " مش بتطلعي ؟


سديم >> بدر بطل سماطه شن قصدك قولي


برم وفتح الباب>> زي ما قتلك والله كل خير ، هيا عشان نوصلكن


طلع بدر وهيه توترتتتتتت الف ، بالرغم انه الكلام ما كانش واضح بينهم بس هيه فاهمه وهوا فاهم وماحد فيهم بيوضح 


//

//


وقبل ما يطلعو بدر وسديم ، وبعد ما خشو نبراس و سهم من جنبهم 


قعدت هديل فالجنان و لقمان معاها 


هديل >> صقعت بكل


لقمان >> انتي شكلك تعبانه ونعسانه 

هديل >> بكلللل ما رقدتش كويس 

لقمان>> ماتمشيش بكرا تريحي

هديل>> لا عاد مازال بدري عالغياب ، مازلت في اول شهرين تدريب

لقمان ضحك>> انتي عارفه انه كله شكليات وانه عقدك ماشي معاهم لمدة سنة

هديل>> خليني عاد نعيش الدور

ضحك>> لا والله بحتي الساعة كم توا قريب ١١ ونص و انتي اكيده مش ح ترقدي طول و بكرا شوفي كم بتنوضي 

هديل >> لقمان خساره ماديما نقول اكثر حد يشجع فيا


لقمان>> لا والله بكرا اوف ، تو انا نرن عليه فالصبح ناخذلك اذن


ابتسمت >> كنت نبيها العطله والله من عرس مجد للشغل ما خذيتش فرصه


لقمان >> بكرا قبل الظهر ما نلقكش واعيه


هديل شيرت على عيونها>> ان شاءالله ماتلقانيش مصليته مع العصر بس من النوم لي ح تشوفه


ضحك لقمان ، على طلعت بدر ووراه سديم


لقمان >> خليك انا هكي هكي طالع


بدر >> تمم معناها تصبحو علي خير


هديل >> تلاقي الخير 


خش بدر 


سديم بحتت في لقمان>> خوك وين من يوم قال الخباره معش شفناه


لقمان>> علمي علمك مبدري باتي وامي طلعو امي قالت ماشيين الخلود وهوا ما نندريش عليه


هديل >> وهوا ما مشش لولده بكل


لقمان>> خايف من رد فعل خلود ما يبيش يواجه


سديم >> جبان والله ماتوقعتش معتز هكي


وصلو عند باب لحوش ، فتحت سديم الباب وخشت


هديل >> تصبح على خير 


ابتسم >> قدامك الخير 


//

//


اما عند سهم ف رن على ليلى ، و طلع الحوشهم وخش داره 

ليلى>> طولت اليوم


حط سبيكر و حطه عالسرير ويلبس في الماليه>> ما قتلك ياحبي تسكير حسابات وجرد نهاية السنة


ليلى>> كملتو؟؟


سهم>> مازال بكرا بس


ليلى >> باهي حبيبي بترقد 


خذا تلفونه و خش فراشه >> تالف بكل وبكرا من صبح ربي ح نطلعو بس بنحكي معاك 


ليلى >> باين من صوتك 


ابتسم>> عندك جامعه بكرا


ليلى >> اوففف عندي السنه لي معش بتكمل


سهم >> كمليها بيش ندير الدفع 


ليلى >> مش حنصدمك ونقولك انه احتمال كبير دور ثاني


سهم >> ان شاء الله دور ثالث وراس امك هذكي دفع بعد السنة هذي ساد ما العرس 


ليلى ضحكت>> خلاص حاضر 


سهم >> خطرها نسييييت انا اصلا ران بنحكيلك في موضوع


ليلى >> موضوع شنو؟؟


سهم>> نبراس 


ليلى >> كنه؟؟


سهم>> الحق حق ربي يسأل على مرام ، قالي انه حاسها مضايقه بكل الفتره هذي عشان موضوعهم طول وهكي مهم يسال عليها 


ليلى >> والله ما نكذبش عليك هيه تحسها هكي مضايقه وحاسها انها تايهه مش عارفه شن ادير مابين انها تبي نبراس وما بين انها عارفه هله مش بساهل ح يوافقو 


سهم >> هو اكيد صعب بس كلنا عارفين نبراس يعني مدام قال مرام معناها مش ح ياخذ غيرها


ليلى >> هيه تفكر حتى في قصة بنت عمك وانها حتقعد قدامها ديما وماتعرفش ردة الفعل كيف ح تكون


سهم>> ماتفكرش في شي وتسبق الاحداث ، بعدين هديل مش من نوعيه لي هكي ولو كانت تبي نبراس بتفسخ الخطبه يعني 


ليلى >> مش عارفه عاد اهو تفكير ما وقفش 


سهم >> ان شاء الله خير 


//

//


ثاني يوم الصبح مشى الصالحين ، ودار التحاليل المطلوبات وقالوله انه ح يدزوهن للدكتوره ثاني يوم وبعدها يمشو ويشوفو شن ح يسير 

.

.


برضو في نفس الصبح واقف نبراس قدام الحوش على طلعت سهم 


بحت فيه ونفخ الدخان


سهم >> صبح يا فتاح

نبراس >> نراجي فيك امس 

سهم >> والله عندي مواضيع مع المدام 

نبراس >> اخلص عندي شغل 

سهم >> اوكي يا وزير العدل ، كلمناها وقالت لي جوها تمام بس تفكر 

نبراس >> باهي 

سهم>> هضا الباهي ، تفكر بس انه كيف هلك ح يتقبلو كيف ح تكون ردة فعل هديل وتفكير معتاد 

نبراس مسح على وجه >> ان شاء الله خير

سهم >> ماشي للمركز

نبراس>> اها عندي شغل مع خالد وصلوحه وانت

سهم>> للمعرض نصكرو الجرد بس متاع امس نراجي. في بدر الدين ساعتين بيش يطلع 


على طلعت لقمان من الحوش صبح عليهم وركب سيارته 


طلعت هديل من الحوش >> صباح الخير 


سهم ونبراس>> صباح النور 


ركبت مع لقمان بتمشي الشغلها بعد ما صكرت راسها ومابتش تغيب ناضت فالصبح دزتله انها ح تمشي 


فتح روشن سيارته 


لقمان>> نوصلها ونجي للمعرض حل غايه تسقدلي العريس لي معش طلع بيش نصكرو الحسابات


سهم >> تمام 


طلع كل حد في سيارته وسهم ركب يسخن فالسياره على ما طلع حبيّب روحه بدر الدين 🙂😂


//

//


عند نبراس لي كان يسوق ويفكر ، بحت فالساعه كانت ١٠ الا ربع … حط على رقم محمد وخذا نفس ورن عليه 


ضرب الرنه الاولى الثانيه الثالثه و الرابعه رد 


نبراس >> الو مرحبا 

محمد >> مرحبتين اهلا سيادة الرائد ايش الاخبار

نبراس>> الله يسلمك ويبارك فيك شن امورك انت

محمد مستغرب>> والله بخير في نعمة

نبراس >> دوم، سامحني واعيتك

محمد>> لا والله وين النوم الواحد يجري على رزقه

نبراس >> باهي تمام "تردد شويه وكمل كلامه" اسمع انا الحق حق ربي ما نعرفش نلف وندور وجايك من الباب 

محمد >> تفضل وان شاءالله نخدمك

نبراس بدون مقدمات >> لو مافيهش مانع ، حاب اناسبكم 

محمد باستغراب >> قصدي اختي الصغيره مخطوبه الولد سيدك ! "سكت شويه" والكبيره قصتها على يدك 


نبراس >> ايوه نبي الكبيره 


محمد >> نعم ! 


نبراس >> نبي نجيب رجاله ، يعني باتي يجي يحكي مع باتك دغري مانبيش جيت صبايا قبل وبعدها رجاله ، لو موافقين بنجيبهم يتفقو عالشروط


محمد >> والله مش عارف شن نقولك الحق ، بس الموضوع مش هكي وخلاص لازم نشاور باتي قبل ، انت ولد عالم وناس بس اللي صار مع البنت مش ساهل


مسح على وجه >> خوذ وقتك وشوف عمي الصادق و كلمني 


محمد >> ان شاءالله خير ان شاءالله 


//

//


في قايلة نفس اليوم ، عند الشباب فالمعرض


سهم>> بدر الدين ماتبيش تبطل لعب بتلفون وتساعدنا


لقمان>> كملنا من تكليم فلانه وعلانه قعدنا فاللعب عالتلفون 


بدر>> كان صعنا ياووك وكان تأدبنا يا ووكين 


لقمان ضحك 


سهم >> تقدر تروح ب سيسي باهي 


رفع راسه >> عندها جامعه


سهم>> اها "بحت فساعه" خلاص المحاضره قريب تكمل 


بدر حط التلفون في جيبه>> هي تو نطلع 


لقمان بحت في ساعته>> وانا بنروح ب هديل 


طلع بدر في جرته لقمان ، وسهم واقف يضحك عليهم


//

//


في نفس اليوم ، بس في مكان ثاني اللي هوا المركز 


كان نبراس في مكتبه وكالعاده انعتل الباب وخش خالد



       الفصل السادس والثلاثون من هنا 


تعليقات