روايه حافة المنتصف الفصل الثاني والاربعون 42 بقلم ايه

روايه حافة المنتصف 

الفصل الثاني والاربعون 42

بقلم ايه

صبا العميد منصور بعد سمع موعد المهمه من نبراس 

خالد >> يبقى لاازم نبدو شغل من توا بيش نجو نحن والحق سوا 

نبراس خذا الورقه يلي كانت في يده وحول الاوراق لي عالمكتب وفتحها لهم ، كانت خريطه موضح فيها المكان لي ح يقعدو فيه العصابه 

قربو الصالحين و خالد من المكان 

حط نبراس صبعه وين ماكان فيه دائره >> هنا ح يكون المكان 

قلب العميد الخريطه شوره وحط صبعه على مكان ثاني >> هضا مركز الشرطه متاع المنطقه الي حيكونو متواصلين معانا منه "وغير صبعه لمكان ثاني " وهنا فالمنطقه هذي حنشوفو مكان نتمركزو فيه 

صالحين >> مش بعيد شويه المكان من الوكر لي هما قاعدين فيه؟؟ 

العميد>> وهكي احسن ما نبوش نقعدو قريب منهم هما اكيد حيمشطو المنطقه اصلا و اي حاجه غريبه يشوفوها ح تتغير العمليه بالكامل

نبراس >> بزبط يعني مجموعة تجي و تقعد في حوش قريب منهم واضحه بكل 

هز الصالحين راسه  

العميد >> حنطلع نبلغ الجماعه عشان نبدو تجهيزات 

ضربوله التحيه ، وانسحب وطلع 

نبراس >> يا حسنييييييين ياحسنين 

خالد قعمز >> تبيله ساعتين بيش يجيك 

ضحك صالحين>> تلقاه يكلم في صابرين 

نبراس >> خرفي " وعاود يضبح" يا عمي حسنيييييين 

جا حسنين يجري وخش عليهم >> ايوا ايوا

نبراس >> حسونه نصبي ندير قهوة بروحي وتقعمز انت تشتغل شن رايك 

حسنين >> ياااااااه دا كان حلم صابرين تشوفني شرطي قد الدُنيا بس يلا 

ضحك صالحين ومعاه خالد 

نبراس >> حلم صابرين صار ، حسونه ديرلي قهوه را نخربلك بيتك اطلع من قدامي

حسنين >> هو انا قلت ايه ، الواحد ما يحلمشي يعني "وطلع من جنبهم"

ضحك نبراس وبحت فيهم >> حيجيب القهوة و انتو بحتولي فالخريطه وشوفولي المكان وبكرا حتجينا خريطه اوضح 3D بيش يبان المكان فيه مداخل فيه مخارج ووين مكانهن عشان نحفظوه ونحن مغمضين

صالحين >> صورها ودزها ليا عالتلفون وبحت فيها انت وخالد ، انا عندي بنت فالمستشفى ووليه تبيني مش فاضيلكم "وصبا"

خالد>> ونحن عندنا ملاهي ولا شنو

نبراس >> خليه خليه ينتلف را نصبي نخربله وجه

فتح الباب >> بكرا تو تخربه ليا ، اتمسو على خير توا "وطلع هرب" 

//

//

في المعرض عند كلاب النار على قول الهادي😂

لقمان >> كيف حا يسير توا باهي 

بدر >> خلاص نبراس قال ح يحكي معاه 

سهم كر الكرسي وجا مقابلهم >> قصدي انتو صدمتو امه بالخبر مره وحده انتو الاثنين

لقمان >> خلاص عاد هديل امها دايرتلها حصار معش نحق فيها بكل وكان جت تقعد فالدار لي جوا عشان عمتي هناء ما اديرش قصة 

ضحك بدر >> عمتي عليك دلاله

لقمان>> الهى في روحك انت 

سهم >> وانت عاد فاتحه مره وحده عليش ؟

بدر >> عشان عارف روحي مش حندير خير بدون فاتحه ف خلي فاتحه بيش يقعد كل شي حلال

ضربه على كراعه >> تحشم على وجك

بدر >> والله الله سألتني وجاوبتك 😂

لقمان >> انا كان قلت فاتحه ح ينجلطو كلهم وانا حتى شقة ما عندي 

بدر >> خوذ شقة سهم شكله مطول

سهم >> تي امكم الهبله ، الشقه لي معتز كان يبيها وانظر من يبيها وانت تعزم بيها خطوها 

بدر >> والله عمتك ليلى عاجبها حوش هلها

سهم >> عاجبها فسختك لي بنخربها لكي اشقى بروحك وفاتحتك كان عمي خلاك تقراها

بدر ضحك >> لازم فاتحه والله مش حندير خطبه بروحها 

سهم >> غير الحلال والحرام والعار يلي بديره عليش فاتحه 

بدر >> عشان نثبت للحماره سديم اني بجد نبيها وما نضحكش عليها 

سهم >> سديم للتربيه والتعليم

بدر>> سديم للكف لي بيجيك توا ابلط 😒

//

//

في المستشفى ، كانت مجد ماسكه المصحف وقاعده قدام غرفة الحضانه وين ما بنتها جنه قاعده وتردد في ايات من القران بخوف وهيه من جوا على قد ايمانها بربي على قد ما خايفه انها تجي يوم للمستشفى و ما تلقاهش 

سمعت صوت كندرة الصالحين وهوا جاي شورها 

مجد >> صدق الله العظيم "وصكرت المصحف"

قعمز الصالحين جنبها >> اخخخ يا ظهري ،شنو مافيش جديد 

اتكت على كتفه>> لالا ولا حاجه جديده الدكتوره قالت لي انه التنفس كويس و وضعها مستقر بس مازال جسمها ضعيف يا الصالحين بكل 

صالحين حط يده على كتفها >> يوم عن يوم حتكون احسن و ح يجي ليوم وحنطلعو بيها 

بحتت فالساعه >> جيت بدري ولا تهيالي 

صالحين >> اها سيبت نبراس و خالد حايسين في شغل و بلطت منهم 

مجد >> باهي نطمن من الممرضه بس ونروحو

صالحين صبا ومدلها يده وصباها >> هيا بيش نحطك فالحوش وبنروح ندوش

مجد >> بس نروحو الحوشنا 

صالحين>> حوشنا انا وياكي ؟ ولا حوشنا حوش هلك

ضحكت >> لا حوشنا انا وياكي 😂 حتتحمل وتشيلني عشان الدروج

صالحين >> نشيلك بعيوني 

ابتسمت و مشت شور الممرضه وصتها زي كل يوم على البنت ولو صارت اي حاجه ترن عليها في اي وقت و روحت لحوشهم هيه وصالحين 

//

//

عند نبراس ، تكى خذا عشا و مشى شور حوش هل مرام … نزل سلم على هلها و خذاها عشان يروحو

فالسيارة 

نبراس >> جبت سندوتشات اكيده ما تعشيتيش

مرام >> والله تغدينا ودرنا قهوه فالعشيه معش جتني نيه "وبرمت لاوره مسكت الشكاره تشوف شن جايب"

ابتسم >> شن جو هلك

مسكت سندوتش و خذت منديل >> كويسين يخممو في اسيل ومحمد وخلاص 

نبراس >> شفته محمد مسكين سلم عليا وعقله مش معاه 

مرام >> والله انا فاهمه بكل وضع اسيل مهما كنا فاهمين ومهما كنا حاسين بيها، بس ماحد يحس ب شعورها 

نبراس >> ان شاء الله ازمه وتمر

مدتله السندوتش >> كول 

قرم منه من يدها وهوا يسوق وبحت فيها>> كنه جوك انتي غير قصة اسيل

مرام>> شي كني " و ردت تاكل "

ضحك >> بلا سماطه 

مرام >> والله ما في حاجه بس ماما كل ما نجي تدويلي في نفس الموضوع امتى بنشوف عيالك ،وانا مش حابه نزعلها واناقشها و قعدت كل ما تدويلي نحس انه مرات كلامها صح ومرات قلب الام واحساسه صح

نبراس >> وانتي شن اللي ح يريحك عشان نديروه

بحتت فيه >> انا مش مضايقه بس هكي كثرت الكلام توتر فيا 

نبراس درس قدام الحوش>> مدام مافيش حاجه مضايقتك معناها اسمعي وطنشي مازلنا عرسان 

ابتسمت >> انزل ياعريس انت

نزلت هيه وياه وفتح باب الحوش >> باتي اكيد رقد قبل بنزرق عليه نحكيله في موضوع المصايب هضوما

مرام حولت ايشربها و حطت الاكياس فالمطبخ وهيه تحكي معاه ومشت شور الدار 

مرام>> منو ؟ بدر الدين

نبراس >> والاخ لقمان ، خطرلهم توا بيجوزو عاد 

ضحكت مرام و طلعت راسها من باب الدار >> وانت بس لي بتجوز يا سيادة الرائد

خش للدار >> كسرولي راسي هما الاثنين ياحرم سيادة الرائد

ابتسمت >> حرام احكي مع عمو الهادي ، بدر بذات شيباته سديم

نبراس >> بكرا الصبح قبل مانمشي شغلي تو ندويله

مرام>> غير دبشك وتعال كول

نبراس >> عقبتي حاجه انتي كملتيه فسياره 😂

مرام >> تعال ياسامط را نكمله بجد 😒😂

//

//

صباح يوم جديد 

عند اخصائيه نفسيه ، كان محمد حاجز موعد عندها مالقش قدامه غير الحل هضا عشان يستوعب حالة اسيل ويقدر يساعدها ترد كيف قبل

خش لعند الاخصائيه سماح و كانت كبيره فالعمر وفاهمه شغلها و محمد مشالها بعد ما دور وسأل كم حد.

✨قعمز محمد خذا نفسه و بدا يحكي وقاللها انه مش جاي عشانه جاي عشان مراته و ماقدرش يجيبها معاه عشان عارفها حترفض بس هوا حاب يساعدها وحاب يعرف هوا كيف يتصرف فالحاله هذي 

سماح >> باهي ليش ماحاولت تقوللها تجي معاك ممكن هي محتاجه

محمد >> صدقيني انا حافظ اسيل حاجه كيف هذي في وقت كيف هضا مستحيل اتقبلها و حتقولي تشوف فيا مجنونه وانا والله ما هضا همي ، همي كله فيها نبيها تطلع من اللي هيه فيه

سماح>> الخطوه الكويسه منك كراجل انك جاي وتحاول تفهم ، هضا بالنسبه لحالتها نص العلاج انك تكون فاهم حالتها … اول شي طبيعة الناس تختلف على بعضها .. يعني فيه مرأة تتحمل الشي لي صار هضا وانها تفقد جنين في الشهر التاسع ! وفيه مرأة لا فلازم تستوعب انه ردات الفعل والظروف وكل شي يختلف من شخص الشخص 

محمد >> بس اسيل هاديه و عاقله ، يادكتوره انا من كثر ما كنت عصبي ومازلت بس خففت شويه كنت ح نخسرها بس هيه هاديه و عاقله وتفهمتني وتحملتني و هضا بيش مكملين في زواجنا ف مستغرب ليش ردة فعلها هكي وهي تصلي وتخاف ربي ومؤمنه بقضاء الله وقدره 

سماح >> في مثل واكيده تعرفه يقول " اتقي شر الحليم اذا غضب" يعني الشخص الهادي والساكت و المتحمل و الصابر لما يزعل زعلته مش حتكون ساهله 

ومش معروف كم مدتها ، على قولتك انها طول عمرها صابره ومتحمله ف المره هذي عطيها وقتها تزعل 

هز محمد براسه >> يعني اهم شي ما يأثرش الموضوع هضا علي نفسيتها بس

سماح >> خليني نكملك ، توا نحن كملنا من موضوع ردة فعلها نبيك تفهم حاجه ثانيه ، انه المرأه عباره عن كتلة هرمونات متحركه ، و يزيدن في فترة الحمل واكيده جربت و يزيدن اكثر ما بعد الولاده تقعد حساسه اكثر و في شي اسمه اكتئاب ما بعد الولاده وهضا يجي سوا المولود كان حي او فقدتوه هيه هكي هكي نهت مراحل الحمل ف حتحس بمشاعر بعد الولاده كلهن …. يعني يا استاذ محمد هذينا العوامل كلهن يأثرن على نفسيتها و على حياتها … المطلوب منك حاليا تكون حواليها وما تسيبهش وتحسسها انك فاهم شعورها و حتى لو لقيتها رافضه وجودك انت برضو خليك معاها … وبعد ما تمر فتره افتح معاها موضوع انها تقابل اخصائي نفسي

محمد >> يعني مرات يطول الموضوع معاها ؟؟ باهي. انا عارفها ح ترفض 

سماح >> انا نحكي معاك من واقع خبره صدقني هيه توا نفسيتها تعبانه و مانبيهش تخش في اكتئاب عشان حنقعدو نعالجو في حاجه اخرى .. خليك معاها حاليا و لما تفتحلها موضوع الاخصائي حتوافق تلقاها هيه بروحها تبي من يساعدها ومش عارفه 

هز محمد براسه >> ان شاء الله خير 

سماح>> خليك على تواصل معايا ولو حسيت ب اي شي ماتريحتلش بلغني .. بس برضو مش تقعد مركز عليها يعني خليك حواليها بس خليها براحتها 

محمد >> تمام 

//

//

فالظهر من نفس اليوم

كان خاش للحوش و دغري علي الدار لي فيها جدته كعادتهم كلهم لما يخشو يمشو لدار هذي

وقبل ما يوصل ويخش كان بيتنحنح عشان لي مش حاط حجابه يحط ، بس وقف عند هدرزة سديم و مجد وهما يحكو على خلود

مجد >> والله الله مبدري كلمتني خلود فالصبح قبل ما يجيبني صالحين هنا بروحها قالته ليا

سديم >> قصدك تبي توافق ؟؟

مجد >> مش عارفه والله كلمتني تسأل على صحتي وعلى جنه امتى حايطلعوها حكتلي لي صار وخلاص تهدرزلي انتي عارفه خلود كيف صاحبتي مش بس مرات ولد خويا 

سديم ميلت راسها >> قصدك طليقت ولد خويا 

هزت راسها بمعنى الله غالب 

خش معتز و هوا ياخذ فالنفس ! وبيفهم ويستوعب شن كانن يقولن ، الدار ما كانش فيها غير سيسي و مجد و جدتهم كانت تصلي فالصالة 

اول ما خش حطت سديم حجابها دغري ومجد بحتت فيه بصدمة مش فاهمه لوسمعها ولالا ،بس اول ما بحت فيها فهمت من نظرته انه سمع 

معتز >> شن قالت لك خلود ؟ 

مجد>> معتز اصبر بس بشويه 

معتز بصوت عالي >> قتلك احكي انا شن قالت الامك خلود شن قالت ؟؟؟ شن سمعت انا فهميني توا الكلام لي كنتي تحكي في جد اصله هضا شنو

صبت سديم و بحتت في مجد بخوف 

صبت مجد قدامه>> بالله عليك تهدا بس ما فيش شي مجرد انها تهدرزلي 

معتز اللي يعيط وينفتر ب يديه>> تهدرزلك على عرب جايينها صح ؟؟ احكي ازف ما تنرفزينيش اكثر را اقسم برب الكعبه ماسك روحي بالسيف من هضك اليوم الاسود ولي درته في روحي ما نبيش ننفصل ما نبيش ننفجر خلاصصص عاد خلاصصصص ارحموني شويه 

مجد بلعت ريقها بخوف من شكله وكيف كان يحكي ب اعصاب وبصوت عالي لدرجة جدتهم قطعت صلاتها وكانت تمشي بشوي شوي الدار بعكوزها وقربت لعندهم 

و جميله لي كانت فوق سمعت الصوت و نزلت 

سالمين رفعت عكوزها نغزاته بيه>> كنك بسم الله كنه صوتك عالي 

نفخ بأعصاب ومازال نظره المجد >> مجد اخر مره نقول احكي اخر مره 

مجد شبكت يديها في بعضهن خوف من رد فعله >> اه جايينها عرب من كم يوم و حكو مع امها ومازال يراجو في رد خلود بيش كان وافقت يجو رجاله 

صفق يديه ببعضهن زين >> لا حلو والله حلو  

طلع بسرعه خبط في نبراس لي كان خاش من برا يدور فالهادي بيحكي معاه وكان معتز ماشي وهوا والع ويتمتم

خش نبراس عليهم فالدار وهوا مش فاهم شن فيهم لقاهم كلهم مصبين يبحتو في بعضهم

نبراس >> كنكم مصبيين هكي تقول جايتكم خباره شن فيه ؟ وهضا كنه طالع والع و يهزب انظر في شن يقول

سديم بحتت فيه >> خلود جايينها عرب و ولد عمك انكلب رسمي 

سالمين قعمزت في مكانها المعتاد >> عدي الحقه الله يربحك انت عارف معتز منكلب را يعدي للبنت ويخربها اكثر ما هو خاربها معاها 

نبراس >> لاحول ولا قوة الا بالله القصة هذي على شن بتنتهي بس 

طلع نبراس على طول البرا بحت لقى سيارة معتز مازال مدرسه ، قرب من حوشهم لقى الباب مردود و بان عليه معتز مقعمز على حاشية الدروج لي يقابلن فالحوش اول ما تخش … دف الباب بشويه وخش 

نبراس >> معتز

معتز>>ولا كلمة يانبراس ولا كلمه ، انا اللي درته في روحي انا شن كنت متوقع؟ تبي تراجيني ولا تبي تقعد تكمل طول حياتها على ذكرياتي ! ما هضا الطبيعي انا لي فرطت فيها انا لي خليتها الغيري انا !  

انا لي خليتها تبحت فيا بنظرة مستحيل ننساها وانت شاهد عليها لما كنت نحكيلك يومها اني بنجوز وهيه سمعتني بالغلط وقتها كنت هبل وغبي نحق فيها وهيه تلم في دبشها وهيه طالعه من الحوش ونقول زعله بسيطه وتو ترد كنت ضامن حبها لدرجة اذيتها في هالحب خليتها تكره اليوم لي حبتني فيه .. كنت اناني بكل ووقتها ما خفتش من مشاعرها وشن تحس خفت بس انها سمعتني و حدير قصة كنت حقير ونستاهل كل اللي يصيرلي نستاهل انها تقعد بعيد عليا نستاهل مرمدة ولدي لي قعد يكبر بدوني نستاهل اني شفت الغيرها و حكيت مع غيرها واجوزت عليها وخنتها وجرحتها شن كنت نراجي يا نبراس؟ تجي اطبطب عليا وتقولي نحبك ولا عادي بنردلك؟ 

مسح على عيونه وهوا محروق ونبراس مصبي مقابله حاط كراع علي اول درجة و كراع الثانيه لوطا ويسمع فيه بدون ما يرد بحرف

كمل معتز وهوا منزل راسه >> تصدق اول مره نحس بشعورها ! توا كيف حسيت بشعورها لما انا اجوزت وسيبتها وفرطت فيها بسااااهل بكل ، كنت نعرف انه الموضوع مش ساهل بس ماكنتش متخيله هكي …. هضا كله وهيه مازال ما قعدتش علي ذمة راجل غيري امالا انا شن درت فيها لي خليت وحده غيرها على ذمتي 

"بحت فيه ورفع راسه " 

معتز >> نبراس انا لو خلود خذاها حد ثاني مش عارف شن ح ندير و ديني ماني موخر انا مكلوب وانتو عارفيني حننهي ام حياتي هذي بيش انا نتريح وهيه اتريح مني وتنتهي القصة هذي

طبس نبراس و جا قعمز جنبه >> وحد الله وما تقعدش تفكر وانت شايط هكي اهدا بس اهدا شويه واذكر ربك و عدي صلي ركعتين بيش تهدا وتعرف تفكر شن ادير وانت والع هكي قاعد تبربر مشعارف شن تقول 

معتز >> مافيهششش ما نفكر انا منبيش نفكر واحد غيري مش واخذها مش ما تبيش تردلي خلاص نقعد انا بروحي وهيه بروحها لا مع غيري ولا انا مع غيرها

نفخ نبراس >> بلا عياط امك جوا مش ناقصها ترعش فيها ، ماتصغرش عقلك ومش حايسير شي ما تخافش صبي بس اركب تريح و نحكو بعدين صبي عليك حركات ادير في امهن 

صبا معتز بدون ما يرد على كلامه وخش طبق باب الحوش و سط افكاره اللي ماخلنش فيه عقل … هز نبراس راسه ونفخ وطلع من الحوش ومشى شور حوشهم لقى بدر كيف مدرس سيارته هوا وسهم 

سهم >> كنت عندنا ولا شن

نبراس >> خوك هضا معش قعد فيه عقل بكل 

بدر نزل من السياره >> شن دايره اخرى عمتك خلود 

نبراس >> جايينها عرب وشكلها داويه المجد و هوا سمع والله مانندري انا كيف خشيت لقيته طالع والع و عروقه بيطلعن

ضحك بدر وصكر الباب وجا في جهة نبراس >> الصحة لها بنت امها 

بحت فيه سهم لي كان منزل القزاز ومازال فالسيارة>> غير را تقول الكلام قدامه بس بيش ما يعجنكش 

بدر >> صح والله الله بيجوز و يبيها تقعد عاد تراجي فيه تي يبقى طيب 

برم شور الباب لي كان مردود وخش وهوا يغني بصوت عالي قالب بيه الدنيا "وانتظرينيي وعدي نجوم الليل "

ضبحله نبراس >> اسمع بنخش ندوي الباتك ماتقعدش قدام وجي خش الدارك وفوتها 

بدر >> والله بتدويله توا قصدك ؟ 

نبراس >> اه وتعطلت ورايا شغل كل مره ماسكني حد 

بدر >> ذل امنا عاد "وكمل مشيته شور الحوش"

هز نبراس براسه >> انقنكم الا عيله اتشيب الراس 

غمزله سهم >> طالع منها يا متاع مرام انت 

على طول مسكه من عند رقبته >> تقول اسمها مره ثانيه نخبطك

سهم وهوا يضحك و يزر في بطمة القزاز بيش يرتفع >> حول حول ما عرفن طبكن الا عيت حواء خليكم 

طلق نبراس يده قبل ما يتصكر القزاز و هوا يهز فراسه و سهم وخر بيش يدرس عند حوشهم

.

.

.

رد نبراس الي شيبوه في جرتهم و خش لحوشهم ، مشى شور المربوعه البرانيه لقى باته وامه مقعمزين فيها بعد العرض لي داره سيد معتز قبل ما يطلع 

غمز نبراس الامه اللي صبت بتطلع 

 وبحت في باته >> حاج فاضي ندوي معاك 

نزل نظاراته وحط تلفونه حذاه >> ادوي شيبني انت لاخر كيف كلاب النار الاربعه الاخرين

ضحك >> كيف حتى معتز انضم لقروب كلاب النار

الهادي >> هو كبيرهم الهبل لي خرب حوشه

نبراس >> الله غالب اهو قاعد يدفع في ثمن غلطته غير معش تضغطو عليه انتو بس 

الهادي>> هو اللي مكلوب محد جا شوره

نبراس >> غير توا خلينا في موضوعنا 

الهادي>> وشن موضوعك

نبراس >> بدر ولقمان 

الهادي >> خرفي ، تو انت من جدك جاي تحكيلي في موضوعهم ؟ سبب رفضي اصلا لي صار بينك وبين بنت سيدك قبل هذي حاجه مانبيش نخرب الدنيا في بعضها ، وحاجه ثانيه لا لقمان عنده شقه يلم بيها روحه ولا بدر الطايش يتحمل مسؤولية وليه وحوش

نبراس >> باتي هديل وانا قصتنا انتهت برضانا و كلكم عارفين انه اللي صار كان غلطه موافقتنا من قبل ، سديم وهديل امانتك انت وعمي فرج ومش حتلقى خير من انهن يقعدن قريب منك ، شقة بدر واتيه مقابله شقتي ، واما لقمان ح نخليه يشتغل على القطعه لي لاوره يدير فيها جناح مؤقت مع هله على ما بعدين دار شقه بوجها 

الهادي >> الموضو مش موضوع شقق ، الموضوع موضوع مسؤوليه وموضوع يقعدو رجاله ويتحملوا الحياه لي خاشين عليها واحد بيقرالي فاتحه وواحد يقولي اصلا اقنع عمتي ، قليلين الربا لا انا لا فرج عرفنا نربو 

ضحك نبراس >> غير بس انت قلبها في راسك شويه و احسبها كويس وانا عارفك حدير الصح ، هي انا بنطلع عندي شغل 

الهادي >> انت كيف حالك 

نبراس >> الحمدلله حايس فشوية شغل الفتره هذي 

الهادي >> ربي يرعاك ، المهم انت ما تحكيش شي لكلاب النار لي برا هضوم ما تعطيهمش ضي خضر

هز براسه وابتسم >> حاضر 

//

//

كان مدرس بسيارته قدام الشغل متاع هديل ، بعد ما استلم مهمة توصيلها بدال المهزب لقمان عشان هناء طلبت هكي 😂🤭

مسك سهم تلفونه ورن على ليلى ، وهوا يراجي في هديل تنزل 

ليلى >> الو 

سهم >> مرحب ، وين مختفيه اليوم

ليلى >> جتني لين مبدري محمد ماشي الاسيل شويه علقت فيه لين جابها معاه

ضحك >> والله وتجيك لين تختفي عليا يعني ؟ 

ليلى >> حرام عليك لها كم يوم بعيده 

سهم >> شنصار مع مرات خوك

ليلى>> توا بعد جا محمد سألته عليها قالي نفس ما هيه ما فيش جديد 

سهم >> قصة والله 

ليلى >> وين انت ؟ عند شغل هديل 

سهم >> اه نراجي فيها تنزل ، قصة هذي عمتي هناء دايره اوامر علينا وهضا كله مازال ما زرقتش على سديم وبدت

ضحكت>> حي عليهم وحي بعدها 

سهم >> مبدري كنت عند الحوش حطيت بدر ، لقيت نبراس قال بيخش يحكي مع باته 

ليلى >> باهي ان شاءالله يوافق 

كرت لين السماعه وهيه تعيط >> سحممم

ليلى >> سمعتها 

ضحك >> عطيها تكلم سحم

ليلى>> ايوه وتاخذ التلفون وتجري بيه و معش تصكر زي ديما 

سهم >> وخلينا نحكو شن دخلك بينا 

ليلى >> صكر خير ما نصكر في وجك

ضحك >> اهي هديل نزلت ، نروح ونكلمك

ليلى >> تمام 😂

.

.

.

//

//

✨ مابين اكتئاب اسيل ، ومابين مجد اللي فالمستشفى تراجي تطلع ببنتها كل يوم  وما بين خوف الصالحين على حالة مجد وعمليتها ووضعها… ومابين ترقُّب الشباب انه الهادي يتحرك ويدير خطوه في مواضيعهم …. ومابين صدمة معتز لما سمع بالخبر متاع خلود … ومابين المهمه والتخطيط لها فالمركز 

هكي كانن يمشن الايام ✨

//

//

لحد ما يومها كانو كلهم في حوش الجد ، عالمغرب هكي … وسديم تحكي مع خلود 

سديم >> خلاص من هضك ليوم لي سمعنا نحكو فيه انا و مجد معش شفناه جا الحوش امي سالمين بكل، نحق في سيارته برا ويمشي للشغل ويروح قالت عمتي نجوى وخلاص

خلود >> حتى له كم معش جا وخذا فرج لعند عمي هضك اليوم جا خذاه

سديم >> باهي وانتي شن صار معاكي ؟ 

خلود >> سديم انا كنت نهدرز المجد بس لكن انا اكيده حنرفض و حلّفت ماما انها ما تقولش الانيس لانه لو سمع ح يجوزني بالغصب

سديم >> ما فهمتش ح تقعدي هكي لحد امتى 

خلود >> خلاص يا سيسي هكي حنقعد ديما حنربي فرج ونكبره ، انا قاعده فالنص لا انا لي قادره نرد المعتز ولا انا لي حنقدر نقعد مع راجل اخرى غيره 

سديم >> مش عارفه شن نقولك والله ، بس ربي يجيبلك لي فيه الخير على قد ما نبوك بيناتنا من جديد بس انا فاهمه شعورك مش حنقدر نعطيك راي مزيف عشان بس تردي فالنهايه نحط في روحي مكانك

خلود >> الحمدلله نصيب كل واحد حياخذ نصيبه من الدنيا … المهم لو صارت اي حاجه قوليلي 

سديم>> حاضر 

صكرت سيسي الخط ومشت جنب هديل ومرام

هديل >> خلود ؟

سديم >> اه تسأل شن صار من بعد ما حكينالها اخر مره شن صار معتز

مرام >> انا مش شايفتها خلود بس تمنيت نتعرف عليها من كلامكم 

سديم>> توجع بكل تحكي معايا وقلبها محروق بكل وواجعتها روحها وفي نفس الوقت تحبه بس مش قادره تردله 

مرام >> الطلاق مش حاجه ساهله ، اذا كان انا اللي كنت في مشاكل معاه و ما جبتش منه عيال … وشوفي كيف الموضوع اثر فيا وفي حياتي .. ولعند توا نظرة الناس للمطلقة في البيئه لي نحن فيها مازالت قديمه 

هديل >> عارفه الناس كيف لما تقعد الحاجه بعيده منهم يتعاطفو معاها بس لما تقربلهم وتوصل فيهم لا خط احمر ناس غريبه 

مرام >> كيف يعني 

هديل>> يعني نحكيلك بصراحه ماتزعليش؟ 

هزت براسها و سديم حطت يدها على خدها تسمع فيهن

هديل >> عارفه لما مشو يخطبو في ليلى آختك السهم روحو كلهم ميتين فيكم ك عيله و عميمه ام نبراس تحكي عليكي كيف انك صغيره وسمحه وواجعتيها عشان اطلقتي و امي سالمين قالت حتحصل نصيب سمح و بلا بلا بلا يعني عجبتيهم لانك فعلا انسانه تنحبي 

مرام ابتسمت >> باهي 

كملت سديم الكلام >> بس شوفي توا كيف لما قرب الموضوع شورهم و عرفو انه نصيبك نبراس ولد عمي كلهم ما تقبلوش الفكره

مرام >> ولحد توا عميمه جميله مش متقبله 

هديل >> ما تزعليش والله انتي ما درتيش اي حاجه غلط نصيبك وخذيتيه وربي يعطي كل حد نصيبه 

مرام >> لو يسمعني نبراس نحكي علي طلاقي وقصتي احتمال يوقفني فالمركز عنده في شي زنزانه لمدة يومين 

ضحكت سديم >> على قول بدر مراد علم دار ح يحكم عليك مؤبد

ضحكن البنات وسمعن صوت سيارة درست قدام الحوش

سديم>> سيارة الصالحين هذي 

هديل >> موهبه جديده تعرفي السياره من صوتها

سديم>> صقع عليك ، بس غريبه مجد كنها روحت بدري قبل تروح فالليل متأخر من المستشفى 

بحتن هديل ومرام في بعضهن و صبت سديم تفتح فالباب..

          الفصل الثالث والاربعون من هنا 

  لقراءة جميع فصول الرواية من هنا

انضم إلى قناتنا على تليجرام

تعديل المقال