رواية غرام السلطان 2
الفصل الثامن 8
بقلم عادل عبدالله
جميلة " تضحك " : ايه اللي بتقوله ده !! انا بعد كام شهر هبقي جدة !!!!!
فلرس : لكن كلك شباب وحيوية و مشاعر واحاسيس،.
جميلة : وانت عرفت مشاعري واحاسيسي ازاي ؟؟!!
فارس : بقلبي .
جميلة : الحقيقة اني عيشت تجربة صعبة قبل كده لما اتجوزت ابو بنتي ، وعلشان كده خايفة ادخل تجربة تانية وافشل .
فارس : صدقيني مفيش داعي للخوف ، انا حبيتك ونفسي نكمل حياتنا مع بعض ،ثم انا انسان زي ما انتي شايفاني صريح ومش بخبي حاجة ، يعني بعد الجواز مش هتتفاجئي بحاجة في شخصيتي ممكن تضايقك .
جميلة : معلش الافضل بردو بلاش استعجال .
بعد ايام ...
نور يسافر الي المانيا بصحبة زوجته للكشف الطبي عليه .
في منزل غرام
جميلة تزور ابنتها غرام ...
جميلة : ازيك يا غرام اخبارك ايه دلوقتي ؟
غرام : الحمد لله يا ماما .
جميلة : جوزك هنا ولا في الشغل ؟
للكاتب عادل عبد الله
غرام : في الشغل يا ماما ، لسه مش بيرجع دلوقتي .
جميلة : قولتي لباباكي علي قسيمة الطلاق ؟
غرام : ايوه قولتله وزعل لما عرف انك رفضتي ترجعيله وقالي انه هيطلقك رسمي وهيبعتلي قسيمة الطلاق .
جميلة : يارب يطلع صادق المرادي ومش يماطل تاني .
غرام : وحضرتك اخبارك ايه ؟ لسه بتكلمي الاستاذ فارس ؟
جميلة : ايوه بكلمه عادي ، ليه فيه ايه ؟
غرام : قوليلي الصراحة يا ماما ، انتي عايزة قسيمة الطلاق علشان تتجوزي الاستاذ فارس ؟
جميلة : وافرضي اني اتجوزت يا غرام هتزعلي ؟؟
غرام : مش عارفة يا ماما .
جميلة : ازاي مش عارفة ؟
غرام : لو فكرت بعقلي مش هزعل ، لأنك عيشتي كتير لغيرك ومن حقك تعيشي لنفسك دلوقتي ده غير انك لسه مش كبيرة ومن حقك تكملي حياتك زي ما تحبي .
جميلة : ولو فكرتي بقلبك ؟؟
غرام : اكيد هزعل لأني مش متخيلة انسان يدخل حياتك وياخد اهتمامك مني .
جميلة : ياخد اهتمامي منك !!! انا عمري ما حد ممكن ياخد اهتمامي منك يا غرام ، وبعدين انتي عندك جوزك يهتم بيكي انما اناا...
غرام : يا ماما انتي مش امي بس ، انتي كل حاجة في حياتي ، امي واختي وصحبتي وحبيبتي .
تضحك جميلة : ربنا يخليكي ليا يا قلبي .
غرام : ويخليكي ليا يا ماما ، قوليلي بقي ناوية تتجوزي استاذ فارس ؟؟
جميلة " تصمت قليلا ثم تقول " : مش عارفة !!!
غرام : تقصدي مترددة ؟؟
جميلة : بصراحة ايوه .
غرام : هو عرض عليكي الجواز .
جميلة : ايوه عرض عليا الجواز بعد فرحك باسبوع .
غرام : بتحبيه يا ماما ؟؟
جميلة : انا هكلمك يا غرام كصاحبتي مش بنتي ، هتصدقينيي يا غرام لو قولتلك مش عارفة !!
غرام : ازاي ؟؟
جميلة : هو شخصية محترمة وجذابة ومهذب جدا و بصراحة واضح من كلامه انه بيحبني .
غرام : ربنا يسعدك يا ماما .
جميلة : واضح انك مش موافقة !!
غرام : مش مهم اوافق او لأ ، المهم انتي تكوني سعيدة .
بعد ايام
في فيلا سلطان
يعود سلطان من الشركة يجد واضح علي شهد الحزن !!!
سلطان : مالك يا شهد ؟ شكلك متغير ليه ؟!
شهد : انت كلمت نور النهاردة ؟
سلطان : ايوه كلمته الصبح في الشغل ، وسألته عمل ايه هناك قالي ان ميعاد الدكتور النهاردة .
شهد : الدكتور الالماني قاله نفس الكلام ، ان عدد الحيوانات المنوية قليل جدا و قاله علي علاج هيجيبه معاه وهو راجع ونظام غذائي معين يمشي عليه .
سلطان : وقاله ايه بالنسبة لفرصة حدوث حمل ؟؟
شهد : نفس الكلام ، قاله ان احتمال حدوث حمل ضعيف ومحتاج وقت .
سلطان : وبالنسبة للتلقيح الصناعي ؟
شهد : بالنسبة لحالته صعب جدا خصوصا دلوقتي .
يجلس سلطان ويبدو عليه الحزن والوهن ثم يقول باستسلام : الحمد لله علي كل شيى .
شهد : انا صعبان عليا نور قوي ، حالته النفسية صعبة قوي .
سلطان : لازم لما يرجع هو ومراته نقف جنبهم وندعمهم نفسيا ومعنويا لغاية ما يمروا من الازمة واما يخف ويخلفوا او يقبل بالنصيب والمكتوب .
شهد : طبعا يا سلطان ، لازم نبقي معاهم وجنبهم ، وربنا يهدي منار وتصبر وتفضل جنبه .
سلطان : البنت كويسة جدا يا شهد ، وانا متوقعش ابدا انها تتغير معاه بعد كده او تطلب الطلاق مثلا .
شهد : فعلا عندك حق ، انا كلمتها قبل ما يسافروا وقالتلي انها وافقت علي نور علشان بتحبه وموضوع الانجاب ده قضاء وقدر وهو قابلة به .
سلطان : عموما هما راجعين بعد يومين عايزين نبين لهم اننا مش زعلانين .
شهد : اكيد .
بعد عدة اسابيع
في المحكمة
يقف بسام داخل قفص الاتهام ، بينما تجلس شيماء تبكي في انتظار الحكم وبجوارها شهد وابنها باسل !!
يسأل بسام عن نور .....
بسام : فين نور ابن خالتك يا باسل ؟
باسل : معرفش مجاش ليه !!!
بسام : انا عرفت من امك انه اتجوز .
باسل : ايوه اتجوز ، لكن من ساعة ما اتجوز وهو اتغير .
بسام : اتغير ازاي ؟ يعني اول ولا اخر واحد يتجوز !!!
باسل : لأ انت فهمتني غلط ، انا قصدي انه علطول مهموم و حزين .
بسام : ليه ؟ يمكن يكون مش بيحب مراته !! او فيه بينهم مشاكل .
باسل : لأ ، اللي اعرفه انهم بيحبوا بعض جدا ، عارف نور اتجوز مين ؟؟
بسام : امك بتقول ان اتجوز صاحبة اخته غرام بنت جميلة .
باسل : ايوه ، انت شوفتها قبل كده ، فاكر البنت اللي كنت بتعاكسها في الكافية ؟؟
بسام : ايوه .
باسل : هي دي اللي نور اتجوزها .
بسام " بتعجب " : بتتكلم جد ؟؟!!!
باسل : ايوه ، شوفت الصدفة !!!
بسام : يعني هي ضاقت عليه الدنيا مفيش بنات غير دي ؟!!!
باسل : نصيبه بقي .
بسام : ايوه نصيب !! هو المحامي راح فين ؟ مش باين !!!
باسل : معرفش ، ممكن يظهر لما القاضي يدخل الجلسة علشان ينطق الحكم .
بسام : انا خايف قوي يا باسل .
باسل : متخافش ، ان شاء الله خير .
يدخل القاضي ويتلو الحكم علي الموجودين .
يبتسموا جميعا وتظهر مظاهر الفرح عليهم حينما علموا بتخفيض الحكم الي اربعة سنوات ماعدا شيماء التي مازالت حزينة !!!
باسل : زعلانة ليه يا ماما ؟ الحكم اتخفف لاربع سنين اهو !!!
شيماء : اربع سنين يا باسل مش عدا منهم الا سنة وكام شهر !!! لسه بدري قوي !!! انا كنت فاكرة ان الحكم هيتخفف لسنتين ويبقي كلها كام شهر واخوك يخرج .
باسل : يا حبيبتي سنة السجن ب ٩ شهور يعني الاربع سنين هيقضيهم تلاتة بس يعني كلها سنة ونص وابنك يخرج وينور البيت .
شيماء : بتتكلم بجد يا باسل ؟
باسل : ايوه يا ماما .
شيماء : ربنا يبشرك بالخير يا حبيبي ، قولي بقي مراتك هتولد امتي ؟
باسل : بعد تلات شهور .
شيماء : هتسمي ابنك ايه ؟ سميه بسام علي اسم اخوك .
باسل : غرام عايزة تسميه سلطان علي اسم باباها .
شيماء : سلطان !!! وانت تسمع كلامها ليه ؟ ده اسم قديم مينفعش لطفل !!!
باسل " يضحك " : الصراحة هي كانت عايزة تسميه جميل نسبة لاسم طنط جميلة .
شيماء : نهار اسووود !!! ده انت لو عملت كده كان اخر يوم تعرفني فيه ، ولا انت ابني ولا اعرفك .
باسل : ما انا لما رفضت ، اتفقنا في النهاية علي اسم سلطان .
شيماء : اذا كان كده ماشي ، سلطان كويس ، حتي عمك سلطان وشهد اختي هيفرحوا قوي .
بعد شهر
غرام تشعر بالآم حادة !!!
غرام تتصل بجميلة ولكنها لا تجيب !!! فتتصل علي الفور بباسل ...
غرام " تصر.خ " : ألحقني يا باسل .
باسل : فيه ايه يا غرام ؟ مالك ؟
غرام : انا تعبانة قوي ، انا حاسة اني همو.ت !!
باسل : بعيد الشر عنك يا حبيبتي ، حالا هكون عندك .
يتصل باسل بجميلة ثم يلحقها الي المنزل ، وفي الطريق يتصل بالاسعاف .
في المستشفي ...
تقف جميلة تبكي بحرارة ، بينما يقف باسل يتضح عليه التوتر الشديد !!
تسأله جميلة : ايه اللي حصل يا باسل ؟
باسل : معرفش يا طنط ، هي كانت بتشتكي من مغص خفيف الايام اللي فاتت ، لكن وانا رايح الشغل الصبح كانت كويسة .
يخرج الطبيب من غرفة الكشف ، يهرولوا اليه سريعا ...
جميلة : بنتي مالها يا دكتور ؟ فيها ايه ؟
باسل : طمني يا دكتور مراتي مالها ؟
الطبيب : اهدوا يا جماعة ، دكتورة غرام هتولد .
باسل : هتولد ازاي ؟ ده لسه شهربن !!
الطبيب : حالتها تستدعي انها لازم تولد النهاردة .
جميلة : النهاردة !!!
الطبيب : ايوه يا مدام لازم تولد قيصري النهاردة لان المية اللي كان عايش فيها الجنين نزلت .
جميلة : وهي كويسة دلوقتي ؟؟
الطبيب : هي كويسة لكن المشكلة دلوقتي ان فصيلة د.مها نادرة ، لازم نرسل لبنوك الد.م علشان نوفر الد.م اللازم لاجراء العملية .
وبعد اقل من ساعة كانت شيماء قد وصلت الي المستشفي و بعدها بقليل وصلت شهد ومعها سلطان !!!
بمجرد ان رأت جميلة سلطان ابتعدت عن المكان وجلست وحيدة !!!
شعرت جميلة ببعض الارتباك والتوتر فقامت بالاتصال بفارس !