رواية حكاية وعد الفصل الاول 1
بقلم ملك محمد
بتبدأ قصتنا ببنت مصريه لابسه فستان زفاف أبيض وواقفه على كوبري ف تركيا وعماله تعيط وتقول
: الحيوان خدعني طب هروح لمين انا دلوقتي وانا مليش حد هنا
عااااايزه اروح بيتنا اااا
بتمر عربيه من جمبها بيلاحظ الشاب ال فيها ان البنت واقفه بتعيط وأفتكر انها عايزه تنتحر وقف عربيته ونزل بسرعه
قلها بلهفه
:Bunu yapma İntihar çözüm değil
(الترجمه: ارجوكي لا تفعلي ذلك الإنتحار ليس الحل)
بصت ناحيته ورفعت حاجبها بتعجب وقالت
: اتكل ع الله يااستاذ دلوقتي وسبني اكمل عياط علشان انا مش فاهمه انت بتقول اي
ورجعت بصت للبحر وقالت بعياط
: هعمل اي ف المصيبه ال انا فيها دي لا انا فاهمه حد ولا حد هيفهمني ماشي ياكريم الكلب اما اشوفك
سمعها وهي بتتكلم مصري هدي شويه وابتسم
بصت ناحيته لقته بيبص عليها وبيبتسم
قالتله بتعجب
: خير يافندم في حاجه ولا انت علشان شكلك ابن ناس هتتريق عليا انا كمان بنت ناس بردو بس الزمن ال عمل فيا كدا
لسه هيرد قاطعته
: انا عارفه انك مش فاهم انا بقول اي ف اتفضل امشي يلا وسبني اكمل عياط جتك داهيه ف حلاوتك
سند ع سور الكوبري وقال بتناكه
: اعتبر دي معاكسه ولا اي بالظبط
اتصدمت لما كلمها مصري بلعت ريقها ال جف ف حلقها وقالت بتوتر
: هو انت عربي
رد ببرود: مش عربي بس انا مصري كمان
حطت ايدها على وشها بإحراج ولفت وشها للناحيه التانيه وقالت بصوت واطي
: يادي النيله دا طلع فاهم انا بقول اي
: اي هتفضلي باصه الناحيه التانيه كتير
بصتله وهى تتظاهر بالثبات
: ها وابص الناحيه التانيه ليه نعم
: واقفه ع الكوبري بليلل وبفستان فرح بتعملي اي ناويه تنتحري !
: انتحر ! لا حضرتك فهمت غلط
وبعدين كزت على سنانها وقالت بغيظ
: انا ناويه ارتكب جريمة قتل
حط ايده حوالين رقبته
: ياساتر اي العنف داه
قالت بعياط زي الأطفال
: الحيوان خدعني مفروض اني حاجزه تذكره وجياله علشان نكتب كتابنا هنا واكمل حياتي معاه اتفاجئت بيه ف المطار بعد ماوصلت بيقولي
انا حاسس اني اتسرعت ف الجوازه دي وانا بحب واحده تانيه انزلي على مصر تاني
كان متنح من كلامها
: مش فاهم
بعصبيه : اي هو انا بقول تعاويذ
: واضح ان لسانك طويل طب هنفترض ان في راجل ندل وعمل حركه زي كدا معاكي مرجعتيش ليه مصر
ردت بإحباط : وانا قدام المطار واحد شد شنطتي بالباسبور بالفلوس والموبايل وكل حاجه وهرب اول مره اعرف ان تركيا فيها حراميه زي عندنا
: لا هي مفهاش حراميه تقريباً انتي ال نحس
: حتى انت بتقول عليا نحس بس يكون ف علمك لولا الفستان الزفت داه والكعب انا كنت جريت وراه وجبته من قفاه بس يلا ال حصل
: ايوا وبعدين يعني
بصت ناحية عربيته : انا معنديش مكان اروحله ومعرفش حد هنا
قالها : لا حيلك حيلك افرضي طلعتي نصابه وحد مأجرك وكل ال بتقوليه كدب
: نصابه ! لا بقى انا مبشحتش اتفضل امشي يلا انا اساسا مرضاش اروح معاك هه
وبصت وشها الناحيه التانيه بعصبيه
ببرود : طيب ماشي
وسابها وراح ناحية عربيته
قالت بصدمه لنفسها
: اي ياربي الرجاله الندله ال الواحد بيقع فيهم دول دا سابني ومشي فعلا
اتصرف ازاي اتصرف ازاي
لسه بيفتح باب العربيه بيبص وراه لقاها واقعه ع الأرض مغمى عليها
جري ناحيتها بلهفه وفضل يفوق فيها
انتي يا فوقي
فتحت عينها ورفعت راسها وقالتله
: اسمي وعد
وغمضت عينها ورمت نفسها تاني ع الأرض
ابتسم على سذاجتها وقالها بقلة حيلة
قومي اتزفتي يلا علشان هتروحي معايا بس تعرفي لو كان الحوار نصب هندمك ع اليوم ال قابلتيني فيه
فتحت عينها بسرعه وقامت نفضت الفستان وراحت ناحية العربيه وهي بتقوله
: انا لو هنصب على حد اكيد هستنضف يعني وبصتله بإشمئزاز
وقف بصدمه يبص على نفسه ويقول
: تستنضف! واضح اني ادبست ف مصيبه
راح ناحية العربيه وركب وهي ركبت معاه
أول لما حطت دماغها ف العربيه نامت لأنها كانت تعبانه جدا من اللف ف الشوارع طول اليوم
Stop
(وعد بنت عندها 23 سنه متوسطة الطول ورفيعه شعرها بني طويل زي لون عيونها بيضاء وذات ملامح طفوليه
مخطوبه لأبن عمها بعد قصة حب 8سنين حبوا بعض من وهما صغيرين بس هو سافر علشان يشتغل ف تركيا ووعدها بالجواز عدت الأيام وأهل وعد كل يوم يزنوا عليه علشان يتجوزها
من الضغط عليه من والده وعمه وافق أخيراً انه يبعت لوعد تسافرله تركيا علشان يتجوزا لبست فستان فرحها من مصر وركبت الطياره بس اتفاجئت بيه بيقولها انا شكلي اتسرعت ارجعي مصر تاني )
وصلوا الڤيلا أخيرا وقالها انزلي
صحيت بفزع : انا فين
: اطمني احنا قدام البيت
بصت حواليها وبعدين هديت وقالت
شكرا يا ..
: اسمي زين
وعد ببرود : اسمك وحش حاول تغيره
وبعدين سابته ونزلت م العربيه
زين بصدمه : اي الكائن ال انا وقعت فيه داه دي لا يمكن تكون بنت عاديه دا فعلا ليه حق حبيبها يطفش
Stop
(زين الرافعي شاب وسيم طويل القامه يمتلك ملامح حاده ورجوليه عيونه خضراء وعنده لحيه خفيفه عمره 30 سنه هو الأبن الكبير لوالده ال اتوفى وساب ليه كل أملاكه عايش طول عمره ف تركيا بس لأن عيلته مصريه بيتكلم مصري كويس وعارف العادات المصريه كمان )
نزلت وعد م العربيه لقت الڤيلا كبيره اوي وجميله قالت بتعجب
: البيت داه كله بتاعك لوحدك
: لا مش لوحدي طبعاً انتي تدخلي بالراحه من غير صوت ماشي
: اشمعنا من غير صوت اوعى تكون حرامي ودا مش بيتك
زين : شششش حرامي اي انتي كمان دا بيت عيله وكلهم نايمين ادخلي بالراحه وعدي ليلتك ع خير لحد ما اشوف بكرا هشرح ليهم الموضوع ازاي
: موضوع اي هو انا تهمه مش مفروض المصريين يتحملوا بعض ف الغربه دانتو عيله ندله فعلاً
زين بغضب وصوت منخفض : لو ملمتيش لسانك داه هجرك من قفاكي ارميكي بره تاني
وعد بغضب: انا ..
زين : ششش اسكتي
قالت بصوت واطي : حاضر سكت
فضلوا ماشين على تراطيف صوابعهم لحد ماوصلوا الباب
فتح الباب ودخلوا
وعد مقدرتش تمسك نفسها وراحت عاطسه
: آااااتشو
كان في صدى صوت والعطسه كان صوتها عالي
زين حط ايده على وشه بيأس
: يادي النيله
خرج جده (اسماعيل دا كبير العيله وهو ال واخد باله منهم بعد وفاة والده ) خرج وهو ساند ع العكاز من أوضته
وخرجت والدته( مديحه) واخواته التوأم
(تميم وتمام عمرهم 22 سنه ولسه بيدرسوا ف الجامعه)
واخته حسناء (25سنه وشغاله مع زين ف الشركه)
كلهم خرجوا من اواضهم على صوت العطسه
بصو على زين ووعد وهي بفستان الفرح
وعد بصدمه : لا دانتو متشبصين بقى هي عطسه هتصحى العالم دا كله عيلتك دي مش سالكه ياسطا
زين بعصبيه
: اصلها عطسة جاموسه تقريباً
جده بعصبيه : الله الله البيه بيتأخر لوش الفجر وكمان جايب ف ايده عروسه
وعد بتبص حواليها : هي فين العروسه دي
وبعدين بصت لزين وقالت
: معقول يقصدني انا
والدته بصدمه : زين انت اتجوزت
وعد بصدمه: اتجوز مين ياتنط هو انا ارضى بواحد زي ابنك مش خير ولا اي ياجماعه
اخته بصدمه : وكمان متجوز بنت بيئه
ردت وعد بعصبيه : لا بيئة اي ياحببتي اسحبيها كدا بدل مااجي اجيبك من شعرك
زين حط ايده بسرعه على بوئها
: اسكتي يخربيت لسانك انا ال جبته لنفسي
والدته بعصبيه : زين انا عايزه افهم اي ال بيحصل حالا مين البنت دي
: مفيش حاجه ياماما اطمني انا هفهمك كل حاجه
قعدوا سوا ووعد بدأت تحكلهم ال حصل معاها وكلهم اتأثروا وصعبت عليهم
والدة زين : ياحبيبتي يابنتي هو في رجاله بالنداله دي
وعد بصت ناحية زين وافتكرت اما كان هيسبها عند الكوبري ومروح قالت
: اه فيه وقاعد جمبك كمان
زين بصلها بتبريقه (ال هو اسكتي احسنلك)
جد زين: طب يابنتي مش كنتوا كتبتوا الكتاب وانتو ف مصر اضمنلك بدل البهدله دي
: حضرتك ال حصل إن كريم داه يبقى ابن عمي وانا وهو بنحب بعض بقالنا 8سنين لما قرر يسافر وعدني انه هيكون نفسه هنا ويبعتلي نتجوز
وانا عمري ماخونته دا عشرة عمر
قلتله نكتب الكتاب ف مصر قالي لا تعالي ع تركيا ونكتبه هنا واعملك احلى فرح انا متأكده ان كريم في حاجه خلته يعمل كدا ويسبني ال بينا قصة حب كبيره مش مجرد ارتباط عادي
زين بصوت خافت : واضح انها قصة حب قذره
وعد بصتله بغضب : سمعتك ع فكره
والدة زين : بإذن الله خير احنا تقلنا عليكي ف الأسئله قومي غيري الفستان داه ونامي وبإذن الله تتحل
وبعدين ندهت ع الخدم يظبطولها أوضة الضيوف
حسناء : ماما انا هجبلها هدوم من عندي
: طيب ياحبيبتي روحي
وعد : متشكره جدا ليكوا بجد وبإذن الله اكون ضيفه خفيفه عليكوا
قام الجد ووالدة زين رجعوا على أوضهم علشان يناموا
فضل وعد وزين وتميم وتمام قاعدين مكانهم
تميم مد ايده سلم عليها وهو بيقول بإبتسامه
: انا تميم
وعد سلمت عليه : وانا وعد
بصت على تمام
انتو تؤام مش كدا
زين بصوت خافت
: نبغة ذكاء عرفتيها لوحدك
تميم : اه انا اسمي تميم وهو تمام
وعد بألش: تمام اوي ولا تمام نص ونص هههه ههه
بصت حوليها لقت الكل بيبص عليها بإشمئزاز
قالت بإرتباك : اه ماشي
اسمكوا حلو اوي بعدين مدت ايدها علشان تسلم على تمام
تمام بصلها بقرف وسابهم وقام مشي دخل اوضته بدون مايتكلم
وعد بإحراج : هو في اي
زين : تقريباً عنده نظر
وعد بصتله بغضب
تميم : تمام معقد شويه وقليل لما بيتكلم متزعليش منه هزري معايا انا انا بحب الهزار
وعد : طب وانا هفرقوا ازاي من بعض دانتو شبه بعض اوي
وقف تميم وبيفتح زرار قميصه وبيقولها
: انا عندي ندبه ف صدري هو معندوش
وعد بتبص عليه بتعجب وبإحراج
زين قام بسرعه حط ايده على عنيها وقله
اقفل زراير القميص يابني بطل عبط
وعد بتحاول تحوش ايده من ع عنيها
: وسع بقى عايزه اشوف
زين : تشوفي اي اتنيلي
قفل تميم زراير القميص شال زين ايده من على وشها
وعد بعصبيه : طب انا هفرقهم ازاي دلوقتي وانا مشوفتش العلامه
زين : ليه هو انتي علشان تفرقيهم هتخليهم يفكوا زراير القميص كل مره
وعد : اه صحيح دا مينفعش
زين : مش بقول قنبلة ذكاء
تميم : خلاص خلاص انا هقولك حل اسهل لما اشوفك انا ال هبدأ بالكلام ماشي مبدأتش يبقى دا تمام
وعد : فكره حلوه بردو
زين : حيلك حيلك ال يشوفك وانتي بتتكلمي يقول مطوله معانا هنا انتي من بكرا تروحي السفاره وتحلي مشكلة الباسبور بتاعك ال ضاع داه وترجعي ع مصر فاهمه
وعد بغيظ: لما اكون قاعده ف بيتك ابقى اتكلم
زين بعصبيه : مش بقول انا ال جبته لنفسي
جت حسناء وجابت الهدوم
: الهدوم اهيه ياوعد
وعد : متشكره جدا واسفه ع سوء التفاهم ال حصل من شويه
حسناء : ولا يهمك
زين : يلا روحي غيري ونامي الوقت اتأخر وانا خلاص هنجت
وعد بألش : اعمل ريستارت هه ههه
صوت صرصار الحقل
الكل بيبص عليها بإشمئزاز
وعد بتعجب قالت لنفسها: اي العيله الكئيبه دي
اخدتها حسناء ودخلوا الأوضه ال هتنام فيها وحطتلها الهدوم ع السرير
وعد : واوو اي الأوضه الكبيره دي كلها
حسناء بإبتسامه: كويس انها عجبتك
وعد رمت نفسها ع السرير
: دي تحفه ازاي متعجبنيش
حسناء: انا مستغرباكي ع فكره ازاي حبيبك سابك وغدر بيكي وانتي بتضحكي عادي كدا
وعد : اصل انا عارفه كريم كويس هو بيحبني واكيد في حاجه حصلت خلته يعمل كدا هو طول عمره ندل اساسا بس انا مش هسيبه هتجوزه يعني هتجوزه
حسناء بتعجب: هو اسمه كريم
: اه
حسناء : اسمه على اسم خطيبي
وعد : اكيد مش كل كريم زي التاني
حسناء بإبتسامه : فعلا ربنا يهدهولك انا هسيبك بقى تنامي
خرجت حسناء ووعد غيرت هدومها وخرجت البلكونه تشم هوا
فجأه كل الثبات ال كانت فيه راح وانهارت من العياط
نزلت ع الأرض بركبتها وفضلت تعيط جامد
البلكونه بتاعتها كانت جمب بلكونة زين
زين لما سمع صوت عياط قام من على سريره وخرج البلكونه عرف ان الصوت جي من بلكونة وعد
قال لنفسه بتعجب : كانت عماله تهزر وتضحك وكأن مفيش حاجه ودلوقتي مموته نفسها من العياط علشان لوحدها وعارفه ان محدش شايفها
سابها قاعده ع الأرض بتعيط ودخل بهدوء علشان متحسش ان في حد سمع صوتها
كلهم صحيوا من النوم وخرجوا ال راح الشغل وال راح الجامعه والفيلا بقت فاضيه
صحيت وعد من النوم ملقتش حد خالص فضلت تلف ف الفيلا ومبهوره بروعتها وجمالها
وهي بتبص حواليها خبطت في الخادمه
وعد بتوتر : انا بس كنت بتفرج ع الفيلا
الخادمه : Herkes dışarıda Hizmetindeyim
الترجمه (الجميع خرجوا انا في خدمتك)
وعد بذهول : ها !
الخادمه عرفت انها مش فاهمه فقالت الكلام تاني :Herkes dışarıda Hizmetindeyim
وعد بتعجب : انا مش فاهمه انتي بتقولي اي
الخادمه صامته
وعد : مش مهم مش مهم المهم انا جعانه
الخادمه مش فاهمه وعد بتقول اي
فقالتلها: Ne
(ماذا)
وعد : يادي النيله
شاورتلها بإديها وحاولت تفهمها انها جعانه بس الخادمه مفهمتش
وعد بيأس سابتها ومشيت وهي بتكلم نفسها وبتقول
: منك لله ياكريم ياابن عمي انت السبب ف المرمطه ال انا فيها دي اما اشوفك هفرمك
____________
في شركة تصميم الأزياء التي ورثها زين عن والده
قاعد زين ع الكرسي ف مكتبه بيقلب ف بعض الملفات فجأه افتكر انه نسي تصميم مهم ف البيت اخد مفتاح عربيته وساب المكتب ورجع للڤيلا
كانت وعد قاعده ف الجنينه وحاطه ايدها ع خدها شافها من بعيد وهي مكنتش واخده بالها منه قال لنفسه
: انا نسيت ان فيه مصيبه هنا
بدأ يقرب منها ووعد سرحانه وعماله تكلم ف نفسها بصوت عالي
وعد : احطله سم فيران ولا اخليه نايم واجيب سكينه ادبها ف قلبه
زين واقف وراها مصدوم من كلامها
وعد بغيظ وغل: لا لا القتل حاجه سهله
زين برعب : حاجه سهله !
وعد : انا اعذبه الأول واطفي سجاير ف ودانه وبعدين اقتله
زين بذهول وهو يتصنت عليها : هطفي سجاير ف ودانه الجاحده
فجأه قالت ببكاء: بس انا بحبه بحبه اوي ياترى هو كويس ولا حصله اي
زين خرج عن صمته وقالها بصوت عالي
: انتي يا أنسه يالي قاعده تخططي ف جريمة قتل
وعد بصدمه بصت وراها : اي داه انت هنا من امتى
زين جه وقف قدامها وقال : من وقت سم الفيران
وعد بيأس : طيب كويس انك مسمعتش ال قبل كدا
زين : هو في اكتر من كدا
وعد: سبيك مني دلوقتي انت بتعمل اي هنا
زين بص حواليه وقالها بإستهزاء
: هو مش دا بيتي بردو
وعد بضيق : ظريف اوي ماشاء الله
زين : مش احسن مااكون مجنون زيك انت ناويه تقتلي مين بالظبط
وعد بحزن وهي حاطه ايدها تحت خدها : حبيبي
زين قعد جمبها وقالها بتعجب
: هو ال بيحب حد بيقتله
وعد بحزن : انا لو اتخدش كدا ممكن يحصلي حاجه دانا بخاف عليه م الهوا
زين : لسه بتحبيه بعد ال عملوا
وعد : انا مش بحبه
زين : كويس طلع عندك كرامه اهوه
وعد : انا بعشقه
زين : لا دانتي مهزئه بقى
وعد : انا متأكده أن ال حصل دا غصب عنه دا ممكن يكون قالب تركيا دلوقتي بيدور عليا
زين : هو في حاجه ف الدنيا تقدر تخلي انسان مواعد واحده بالجواز وبيحبها يقولها ارجعي تاني بلدك اصل انا حاسس اني اتسرعت واكتشفت اني بحب بنت تانيه
وعد : اها ممكن يكون مخطوف وقال الكلام داه تحت تهديد السلاح
زين : انتي عايزه تجبيلوا اي مبرر وخلاص
وعد : القصه مش قصة مبرر الحكايه حكاية وعد وانا وهو بيني وبينه وعد وصعب ينتهي انا بحبه اوي ومقدرش اعيش من غيره دي قصة حب 8 سنين كبرت وانا شايفاه قدامي هو كل حاجه ليا بعد وفاة بابا
: مش يمكن الغربه غيرته اصل ال بيجي هنا ويشوف البنات عامله ازاي دماغه بتتلحس ومبيعرفش يحب بنات مصر تاني
وعد قربت منه وبرقت ف عنيه بعصبيه وقالت
: لي هو انا وحشه
زين اتخض لما قربت منه فجأه رجع راسه لورا وهو بيبص في عيونها سرح شويه ف شكلها ودي كانت اول مره يركز ف ملامحها شافها جميله اوي
زق دماغها بصباعه لورا وقالها
: انتي حلوه اه بس لسانك دا يودي ف داهيه
وعد : شكراً داهيه تاخدك
زين : يخربيت لسانك معرفش قعد يحب فيكي 8 سنين ازاي ازاي استحملك العمر دا كله مش فاهم
وعد بحزن : معرفش يمكن انا متحبش بس انا بحبه
زين حس انه جرح مشاعرها : ع فكره انا كنت بهزر بس ممكن اعرف في اي مميز علشان تحبيه اوي كدا
وعد بإبتسامة ونظرة حب: كريم دا حاجه قمر اوي شبه بتوع السيما كدا بحب فيه رجولته وشخصيته القويه
زين : احلى مني يعني
وعد بصتله : هو حد قالك انت حلو اساسا
زين : تصدقي انك اول واحده تقولي كلمه زي دي
وعد : معلش معندهمش نظر
زين بعصبيه : انتي واحده مستفزه اوي مش عارف انا قاعد معاكي بعمل اي
وعد بعصبيه : قول لنفسك انا مقولتلكش تيجي تقعد معايا
زين قام بغضب وسابها وطلع ع اوضته يجيب الملف ال نسيه وهو بيقول
: مش عارف انا ازاي دخلت المصيبه دي البيت
دخل اوضته اخد الملف وخرج
وهو خارج اتفاجئ بوعد قدامه
زين : جايه ورايا تعملي اي
وعد : انا جعانه
زين : طب ماتروحي تاكلي هأكلك انا مثلا
وعد : الخدامه مش فاهمه منها حاجه ولا هي فاهمه انا بقول اي
زين : تعالي ورايا
اخدها ع المطبخ وطلب من الخادمه تحطلها أكل وف غضون 10دقايق كانت السفره جاهزه
قعدت وعد ع الأكل وهي مبسوطه
زين واقف مستني وعد تقوله شكراً
وعد بتعجب : واقف كدا ليه روح شوف شغلك
زين بغيظ : هو مش مفروض ان لما حد بيعملك حاجه بتشكريه
وعد بلهفه : اه صحيح نسيت شكراً يا وبعدين قالت لا مش هتفهمني
زين بتعجب : ها
وعد : ممكن تقول للخادمه شكراً بدالي اصلها مش هتفهمني
زين حس ان هيحصله حاجه ف سابها ومشي وهو بيقول لنفسه
: دي لا يمكن تكون انسانه طبيعيه
وبعدين لف وشه ليها وقالها بصوت عالي
: انجزي ف حوار الباسبور داه علشان يومين بالكتير هرميكي ف الشارع زي ماجبتك
وعد وهي بتاكل بعصبية : انسان بارد وندل فعلاً
راح زين لعربيته وقبل مايسوق بص ف مراية العربيه على شكله وفضل يملس ع دقنه ويقول لنفسه
: معقول انا مش حلو فعلا
وبعدين قال لنفسه
: اي ال انت بتعمله دا يازين البت لحست دماغك ولا اي
_________________
"ف المساء"
اتلمت العيله وكلهم رجعوا من بره ماعدا زين دايما بيتأخر
الجد اسماعيل : اتمنى تكوني مبسوطه معانا هنا ياوعد
وعد بإبتسامه : انا بجد متشكره جدا ليكوا على استضافتكوا ليا هنا
تميم بسعاده : بصراحه انا ال فرحان انك موجوده معانا
مديحه : ها عرفتي حاجه عن خطيبك
وعد : بصراحه لا انا صحيت ملقتش حد ف الڤيلا ومكنتش عارفه اروح فين
حسناء : كان مفروض زين خدك معاه السفاره علشان تشوفي حوار الباسبور ال اتسرق داه
وعد : لا بلاش المتعجرف داه
فجأه بيدخل زين بس وعد مش واخده بالها
حسناء بتوتر : مين بس ال قال زين متعجرف دا زين جدع جدا
وعد بتناكه : لا لا دا شخص مغرور وتحسيه شايف نفسه اوي انا بصراحه مش عارفه عايشين معاه هنا ازاي ومستحملينه دا محدش يطيقه يومين على بعض
زين واقف وراها بيسمع الكلام وهو مدايق
مديحه والدته بضحك : تقريباً لقينا حد يقدر ينتقد زين ف البيت داه
وعد : اي دا انتو بتخافوا منه
تميم : ع فكره زين ورا....
قاطعته وقالت : زين دا انسان بارد بصوا وهو ماشي بيعمل ازاي وقامت علشان تقلد ماشيته
الكل كاتم ضحكته
تمام بجديه : زين وراكي
وعد : عادي مبخفش
وبعدين استوعبت الجمله قالت
:ها انت قولت اي
حسناء : بيقولك زين وراكي
وعد بلعت ريقها : ورايا انا
اسماعيل جدهم بضحك : اه وراكي
وعد بصت بخوف وراها لقيته واقف وساند ع الحيطه
زين ببرود : كملي بمشي ازاي
وعد بضحكة ارتباك : ههههه لا ولا حاجه
زين : مانا لو مسكتك فشفشتلك دماغك دلوقتي كلهم هيدافعوا عنك
والدته : زين هي كانت بتهزر اكيد متقصدش
زين جه وقعد : ياماما البنت دي لسانها طويل صدقيني لازم ترجع مصر تاني مينفعش تقعد هنا اكتر من كدا
وعد : افهم انك بتطردني
زين : ايوا ممكن تمشي من هنا بقى علشان انا بقيت بدايق لما اشوفك
جده بعصبيه : زين انت اتجننت ولا اي انت لو مدايق سيب البيت واتفضل شوفلك مكان عيش فيه انت ازاي تطرد ضيفه عندنا هنا
وعد بخبث راحت جمب جده وقالتله
: ربنا يخليك ليا ياجدي
زين : جدك! جدك منين داه وبعدين انتو بتبعوني علشانها
وعد طلعتله لسانها وقالت
: ال مش عاجبه وجودي يسيب البيت زي ماجدي قال
فجأه موبايل حسناء بيرن
حسناء : كريم خطيبي بيرن هقوم أكلمه بعيد
وخدت الفون ومشيت
تميم : وعد فكك من الناس دي وتعالي نخرج الجنينه
وعد : تمام يلا
جده : وانا داخل اوضتي سهرت كتير النهارده
مديحه : وانا كمان طالعه اريح شويه
تمام قام دخل بدون مايتكلم
وعد بصت لزين بغرور وسابته ومشيت معاهم
زين بعصبيه بص حواليه ملقاش حد قال لنفسه : وانا هتزفت اطلع اوضتي مانا ال جبته لنفسي
______بقلم ملك محمد_______
حسناء كانت بتكلم خطيبها ف الفون ف أوضتها
: وحشتني اوي ياكريم
كريم : انتي اكتر ياروح قلبي
: مش هشوفك بقى ولا الشغل هيفضل واخدك مني كدا كتير
: اعمل اي ف زين بس انا اذا كان عليا نفسي اشوفك كل دقيقه بس اخوكي مش راحم اهلي ف الشغل تعرفي سايبلي 40ملف بيقولي راجعهم علشان عايزهم بكرا ع مكتبي
: يااه انت مضغوط اوي كدا
: واكتر بس يلا كله يهون علشان خاطر عيونك امال انا بشتغل وبتعب لمين ماهو علشانك علشان نتجوز بسرعه
: ربنا يخليك ليا ياكريم انا بجد بحمد ربنا اني اتعرفت عليك
قعدوا يحبوا ف بعض ف الفون وكلام محن ملناش دعوه بيه عشان المراره يدوبك ....
خلصوا كلام وكريم قفل معاها فجأه لقى موبايله بيرن
شاف المتصل والده عرف ان وعد روحت واكيد حكتلهم ع كل حاجه
فتح المكالمه وقال برعب
: ازيك يابابا
والده : بخير ياعريس انت عامل اي ووعد عامله اي كله تمام
كريم بصدمه : وعد ! هي وعد مش عندك
والده : عندي فين بالظبط ياكريم هي وعد موصلتش
كريم عرف انها مرجعتش مصر قاله بإرتباك : ها لا وصلت اكيد انا بهزر يابابا
: طيب يابني اديني اكلمها
: تكلمها ازاي
: هو اي ال اكلمها ازاي مالك ياكريم
: اقصد يعني انها ف الحمام بتاخد شاور ولما تطلع هخليها تكلمك
: طيب ياحبيبي متنساش تبعتلنا فديوهات الفرح وابقى هاتلها خط من عندك علشان امها قلقانه عليها وعايزه تكلمها
: حاضر حاضر اطمنوا انتو بس
: اكيد طبعاً مطمنين بنتنا مع راجل
كريم قفل معاه ورزع الفون ف الأرض بعصبيه وهو بيقول
: راحت فين الغبيه دي انا قولتلها ارجعي ع مصر
وبعدين شد الجاكيت بتاعه وخرج بسرعه يدور عليها
______________
زين كان طلع اوضته اخد شاور وغير هدومه
سمع صوت ضحك جامد جي من تحت فتح البلكونه وبص عليهم لقا تميم ووعد قاعدين بيهزروا سوا
قال لنفسه
: اهو تميم لقى حد اتفه منه يتعامل معاه
بس البنت دي الوحيده ال لسانها طويل عليا ومحدش يقدر يكلمني بالطريقه ال هي بتكلمني بيها انا لازم اعرفها تمامها اصلها وسعت منها ع الآخر
قرر ينزلهم الجنينه
" ف الجنينه"
تميم : مصر حلوه
وعد : دي جميله اوي كفايه بساطة الناس هناك وخفة دمهم بس معقوله منزلتش مصر قبل كدا
تميم : لا نزلت بس مش كتير بإذن الله هنزلها قريب
وعد : اكيد هتنورها
تميم قاعد بيبص عليها وسرحان
وعد بإرتباك : في حاجه
تميم : تعرفي انك جميله اوي
وعد بكثوف : شكراً انا هقوم ادخل جوه
تميم : لا مقصدش انتي فهمتيني غلط انا مش بعاكس انا اساسا مرتبط وبحبها جدا
وعد : بجد تركيه بقى ولا مصريه
: لا تركيه طبعا انا اي ال هيوديني مصر
: بعد ماتخلص جامعه هتتجوزا بقى وكدا
تميم : للأسف في مشكله
: اي هي
: جدي مش موافق عليها لأنها من طبقه فقيره بس انا بحبها جداً ونفسي عيلتي تتقبلها هنا ف البيت انا وعدتها اني هتجوزها ومستحيل أخلف وعدي
وعد : بما ان الحكايه حكاية وعد انا ممكن اساعدك واحاول اقنع جدك
تميم بفرح : بجد متشكر جدا ليكي دا يبقى جميل عمري ماهنسهولك
وعد ابتسمت
تميم : هقوم اعمل قهوه تشربي معايا
وعد : تمام ماشي
مشي تميم وسابها قاعده لوحدها ف الجنينه
جه زين وقابل تميم وهو داخل الفيلا
تميم وقف قدامه : انت رايح فين
زين : خير ياشبح لازم ادفع رسوم ولا اي
تميم بص ناحية وعد : مترخمش عليها بقولك
زين : اي ياد انت كبرت عليا كدا ليه روح اجري ذاكرلك كلمتين ينفعوك
تميم بغضب: ع فكره انا مش صغير وبطل تتعامل معايا بالطريقه دي انا فاضلي سنه واتخرج
زين : ماشي ياعم الكبير ممكن تروح تشوف وراك اي بقى وتسبني اعدي
تميم بعد من قدامه : اتفضل بس زي ماقولتلك مترخمش عليها
زين سابه ومشي بدون مايتكلم وهو بيقول لنفسه
: البنت دي عملتلهم غسيل مخ ولا اي
قرب منها ووقف وراها
زين : احم
وعد بصت بلهفه: تميم انت جي...
قالت بخضه : زين
زين قعد جمبها : اي اتخضيتي كدا ليه
وعد : وهتخض من اي انت بتخوف
زين بخبث : اهو انا بقى دا ال مدايقني انك مبتخفيش مني ومطوله لسانك اوي عليا
وعد بتعجب : وهخاف منك ليه يعني
زين بخبث قرب منها وبص ف عنيها : علشان انا راجل مثلا وممكن اعمل حاجه تزعلك
وعد بتوتر شالت عينها بعيد عنه ووقفت : الجو برد هنا انا داخله جوه
زين شدها من أيدها وقعدها مكانها تاني : اقعدي لسه يومنا طويل
وعد بخوف : ع فكره انا واحده مخطوبه والدبله ف ايدي وخطيبي لو عرف ال انت بتعمله معايا داه هيكرسلك دماغك
زين بضحكة بسخريه : خطيبك ال طفش وسابك
وعد : انت ذودتها ع فكره لو وجودي هنا مش عاجبك انا ممكن ...
قاطعها زين : ايوا مش عاجبني ممكن تمشي بقى
وعد بغيظ : مش ماشيه وأعلى ما ف خيلك اركبوا وشدة ايدها منه وسابته ودخلت جوه
زين بص حواليه بإرتباك وقال لنفسه: البنت دي كل مره بتهني وتسبني وتمشي
فجأه بتيجي حسناء اخته وتقوله بعصبيه
: انت ازاي تمرمط كريم ف الشغل كدا دا مبقاش لاقي وقت يشوفني
زين بذهول : كريم مين ال متمرمط ف الشغل مين قالك كدا
: ايوا هو قالي انك مطلعه عينه
: حسناء اتوكسي انتي وكريم انا مش عارف بتحبي ع اي دا كمان دا لولا انه صحبي كنت فشفشتله دماغه هو دا بتاع شغل أساساً
حسناء بعصبيه : لو سمحت يازين متتكلمش عليه كدا تاني ماشي وخفف عنه الشغل شويه علشان اعرف اشوفه
زين : شغل اي انتي كمان انا اما اشوفه
وسابها ومشي طلع ع أوضته
يتبع ..