رواية جرح يداويه العشق
الفصل الاول 1
بقلم جنات
••﴿ هنتعرف فيه اكتر على القصر وعلى ابطالنا﴾••
فى احدى محافظات الصعيد وتحديدااا فى قصر عيله الهلالى لما تقرب منه تنبهر بجماله وفخامته طبعاا ده قصر اكبر عيله فى الصعيد والقصر كلاسيكى جدااا من برا ومن جوااا
تعالو نتعرف اكتر على شكل القصر
اول ماندخل من البوابه الرئيسه الكبيرة بنلاقى حديقه واسعه جدااااا وفى نافورة كبيرة فى نص الحديقه وورا القصر فى اسطبل كبير فيه مجموعه كبيرة من الخيول العربيه وطبعاا الحصان الخاص ببطلنا يونس الهلالى
وبنمشي ممر طويل لحد مانوصل للقصر اللى بيتكون من ٣ ادوار وسطح
لما بندخل القصر اول دور وهو واسع جداااا ومتقسم لاكتر من قسم اول قسم وهو ريسبشن وفيه صالون بلون البيج مع الزيتى
وعلى يمينه ركن وموجود فيه ترابيزة على شكل دائرة وحوليها ٤ كراسي بلون البيج
وفى ركن قريب منهم بنلاقى سفرة طويله وحوليها عدد كبير من الكراسي بلون الابيض مع بعض اللمسات الدهبي والكراسي بلون الزينى
وجمبها بابين وعليهم ستائر بلون الزيتى والابيض ودول باب للمطبخ اللى بيتميز بالطابع الكلاسيكى زى باقى القصر وفيه باب جوا المطبخ بيخرجنا على حديقه واسعه جداا مزروع فيها انواع كتير من الخضروات والفاكهه ومكان خاص للخبز
والباب التانى اللى جمب السفره حمام لضيوف
وفى مكان قريب من السفره بنلاقى باب اوضه ودى مش اى اوضه دى المندرة اللى بيتجمع فيها الرجال دايمااا لمناقشه امور المجلس ومشاكل اهل البلد وهى اوضه واسعه جدااا وفيها صالون كلاسيكى ومجموعه من التربيزات
وكمان اوضه كبير العيله عثمان الهلالى موجوده فى الدور الاول
وفى اوضه لضيوف وده الدور الاول ياحلوين تعالو نطلع لدور التانى وده بيكون من السلم اللى بيتقسم لجانبين وبيتميز بطابع الكلاسيكى
الدور التانى فيه اوض فاطمه واجلال وراضيه واوضه صفاا
وكل اوضه مزوده بحمام واسع خاص بيهااا وبلكونه
وفى سلم فخم بيطلعنا على الدور التالت اللى فيه اوضه رحمه وجناح على وكمان الجناح الخاص بيونس لانه اكتر الاوقات مش بينام مع صفااا وكمان فى اوضه مقفوله ودى بتاعه سليم واوضه لضيوف
وفى سلم بيطلعنا على الدور الاخير وهو السطح المتزين بالورد وموجود ركنه وكراسي لان اكتر الاوقات الشباب والبنات بيطلعو يسهرو فوق
وده قصر عيله الهلالى ياحلوين
&&&&&&&&&&&&&&&&
اشرقت شمس يوم جديد على قصر الهلالى وتحديداا فى المطبخ وكانت فاطمه وراضيه بيجهزو الفطار للعيله وبتساعدهم فتحيه الخدامه ومعاها بنتين
فاطمه:إكده كله چاهز
راضيه:خرچى الوكل على السفره يافتحيه لان ابوى والشباب جربو ينزلو
فتحيه:اوامرك ياستى همو بينا يابنات نخرچ الوكل
رحمه دخلت المطبخ:صباح الجمال والحلاوة
فاطمه:صباحك ورد يابتى
راضيه:ربنا يچعل كل ايامك حلوة يابتى
رحمه حضنتهم:وربنا يخليكو ليا يارب
فاطمه:اخوكى صحى يارحمه
رحمه:اه يافطومه ونازل هو وعلى
راضيه:بردك نايم فى چناحه
رحمه بهمس:ماهو بصراحه معاه حق بقي هو فى حد يعاشر اللى اسمها صفا ولا امها
فاطمه بحده:عيب اكده يابتى صفا مرت اخوكى بردك
رحمه:بس يونس مش مبسوط معاها ياماما والله حرام كدا
راضيه:بس يابتى لان لو حد سمعك الدنيا هتجوم مش هتجعد
رحمه:سكت ياعمتو
فاطمه:يلا الفطار چاهز
الكل خرجو من المطبخ وفى نفس الوقت كان خارج عثمان من اوضته ورحمه جرت عليه وباسته من خده:صباح الخير ياچدى
عثمان باس راسها:صباح النور يابتى
راضيه:شوفى البت اول شافت چدها بجت تتكلم صعيدى ومن اشوى كان بترطن بالمصرواى
عثمان بص لرحمه:حبيبه چدها تعمل اللى يريحيها
فاطمه:خليكى انت اكده ياعمى دلعها
رحمه:بجولكو ايه محدش يدخل بيناتنا انا وچدى واصل
راضيه ضحكت:يلا يابوى عشان تاكل
عثمان قعد مكانه على راس السفره وعلى يمينه كرسي فاضى ده مكان يونس وجمبه فاطمه ورحمه وعلى شماله كرسي فاضي وده مكان على وجمبه راضيه
عثمان:فين الباجى
فاطمه:نازلين ياعمى
يونس وعلى نزلو وباسو ايد جدهم ويونس باس راس فاطمه وراضيه وعلى نفس الكلام وقعدو على السفره فى مكانهم
عثمان:مرتك فين ياولدى
يونس بضيق:معرفش ياچدى
عثمان:كيف يعنى متعرفش انت جاعد فوق لحالك
على:كان عندنا شغل كاتير ياچدى وسهرنا انى ويونس نخلصه فى چناحه
عثمان:وعملتو ايه فى الصفجه الچديده
يونس:كله تمام ياچدى
عثمان:يونس انت روح الشركه وعلى هايچى وياي المصنع
يونس وعلى:تمام ياچدى
فاطمه:كفايكو حديت بجى وكلوو
صفا واجلال نزلو سوا
اجلال:اصباح الخير
الكل:صباح الخير
اجلال قعدت مكانها جمب على وصفا باست ايد جدها:صباح الخير ياچدى
عثمان:چوزك فاج ونزل وانتى لساكى نايمه اياك من ميتا والنسوان بيفوجو بعد چوزها
صفا بصت ليونس اللى بياكل:كنت تعبانه اشوى ياچدى انى اسفه
عثمان:متكررهاش واصل
صفا:حاضر ياچدى
صفا راحت قعدت جمب امها والكل بدأ يفطروو وبعد شويا الرجاله خرجو لشغلهم وفاطمه وراضيه ورحمه دخلو المطبخ وفضل اجلال وصفا قاعدين مكانهم
اجلال قربت وقعدت جمب صفا:انتى متخانجه مع چوزك
صفا بضيق:واللهى ياما معملتش حاچه غير انى جولتله عايزة اشترى طجم الدهب عاچبنى
اجلال بمكر:وانتى تساليه ليه بجى
صفا:جصدك ايه ياما
اجلال:چيبى اللى عاچبك والفاتورة تروح على الشركه
صفا بشهقه:ده يونس كان جتلنى ياما
اجلال:خليكى اكده هبله طول عمرك المال مالك يابت اجلال وبعدين هيضايج اشوى وهينسي والباجى عليكى بجى
صفا بتفكير:صوح ياما هروح اكلمهم يبعتولى الطجم
اجلال:روحى ياجلب امك
صفا طلعت اوضتها واجلال ابتسمت بخبث
=======================
نروح للقاهرة بقي ياقمرات
فى احدى عمارات القاهرة
وتحديدااا فى الدور التالت فى شقه مختار خال روح والكل لسه نايمين لكن بطلتنا الجميله واقفه فى المطبخ بتحضر الفطار وهى حزينه دخلت عليها رباب:الفطار لسه مخلص ليه ياروح هانم
روح:دقايق والفطار هيبقي على السفرة
رباب:ياريت ياختى تتحركى شويا عشان خالك مايطينش عيشتك
روح بصتلها بحزن:حاضر
بعد ٥ دقايق خرج مختار من اوضته وكان الفطار محطوط على السفرة قعد مكانه ورباب قعدت هى كمان تفطر
مختار:هى ريهام لسه نايمه
رباب:النهارده معندهاش محاضرات فسبتها تنام شويا
روح جت ومعاها صنيه عليها فنجانين قهوة وحطت واحد قدام خالها واحد قدام رباب
روح:صباح الخير ياخالو
مختار من غير مايبصلها:صباح الخير
رباب بسخريه:قعدى افطرى يامدام روح عشان متقعيش من طولك زى كل يوم
روح:ماليش نفس ... خالو النهارده المعاد بتاعى عند الدكتورة
مختار:هتروحى لوحدك
روح:شهد هتيجى معايا
رباب:روحى ياختى ماحنا ناقصنا مصاريف على مصاريفك
مختار:روحى ومتتاخريش
روح:حاضر
روح دخلت اوضتها ودموعها نزلت على معامله خالها ومراته ليها وفاقت على رنه فونها كانت شهد
روح:الو...صباح النور.......اه ياشهد الساعه ٢ هكون جاهزة..... ربنا يخليكى ليا
===============
بعد وقت طويل روح كانت حضرت الغدا وراحت تلبس عشان تروح لدكتورة وخرجت من الشقه كانت شهد مستنياها
روح:اسفه اتاخرت عليكى
شهد:الجميل يتاخر براحته ياقلبي
روح:بجد ياشهد مش عارفه من غيرك كنت هعمل ايه
شهد:انتى عبيطه ياروح انتى اختى يابت وانا لو ماوقفتش جمب اختى مين هيقف معاها بقي
روح ابتسمت من تحت نقابها:يلا عشان مش عايزة اتاخر
شهد:يلا التاكسي واقف مستنى تحت اصلا
==================
فى شركه الهلالى للحديد فى مكتب يونس قاعد بيشتغل على شويا ورق الباب خبط ودخل على
على قعد على الكرسي بتعب
يونس بصله:مالك
على:جدك مرمطنى النهارده فى المصنع
يونس:الشحنه اتسلمت
على:اه ووصلت كمان يامعلم
يونس:عايزين نفتح اليومين دول لان الشغل كتير وعايزك تتابع مع مدير الحسابات مش عايز غلط
على:اعتبره حصل متقلقش
يونس:انا خلصت شغلى يلا نروح القصر
على:ياريت لانى هموت وانام
==================
بليل رجعت روح على البيت ودخلت كان خالها ورباب وريهام قاعدين فى الريسبشن رفعت نقابها:مساء الخير
مختار:ايه اللى اخرك كدا يابت انتى
روح:الدكتورة كان عندها زحمه والله ياخالو
رباب:واطمنتى على نفسك ياسنيورة
روح:الحمدلله ... خالو
مختار:نعم
روح بتوتر:كنت عايزة .. اجيب علاج الدكتورة كتبته ليا
مختار:هو انا هلاقيها من مصاريف اكلك ولا الدكتورة ولا العلاج يابت انتى هو انا خلفتك ونسيتك
رباب:مش لازم يعنى كل ماالست الدكتورة تكتبلك علاج تجيبه كولى كويس وانتى مش هتحتاجى لعلاج
ريهام:ماهى بتاكل معانا احلى اكل ياماما
رباب:صح روحى يلا غيرى هدومك دى وحضرى العشا
روح بحزن:حاضر
روح دخلت اوضتها غيرت وصلت العصر اللى فاتها والمغرب وخرجت حضرت العشا ورفضت تاكل معاهم ودخلت اوضتها صلت العشا وقرات وردها ونامت على السرير بتفتكر كلام الدكتورة
••فلاش باااك••
الدكتورة:روح انا المرة اللى فاتت قولتلك لازم ترتاحى وتاكلى كويس وزنك نزل عن المرة اللى فاتت وكمان جسمك ضعيف جداا
شهد:وكدا فى خطر عليها يادكتورة
الدكتورة:لازم تريحى نفسك وياريت تنامى على ضهرك كتير وتاكلى كويس وتاخدى العلاج اللى هكتبه ليكى ده بانتظام لو عملتى غير كدا هيبقي فى خطر ومش عليكى لوحدك لا هيبقي الخطر عليكى انتى والجنين
روح وشهد خرجو من عند الدكتورة
شهد:هاتى الروشته وانا هجبلك العلاج ياروح
روح:لا ياشهد هخلى خالو يجيبه ليا
شهد:وافرض مرضاش زى المرة اللى فاتت
روح:متشليش هم انتى يلا نروح
••بااااك••
روح حطت ايدها على بطنها وعيطت جامد: حسبي الله ونعمه الوكيل فيك على اللى عملته فياا.....
روايه جرح يداويه العشق
••﴿الشخصيات﴾••
تدور احداث روايتنا ما بين احدى محافظات الصعيد والقاهرة
خلونا نتعرف على شخصيات الموجوده فى الصعيد
فى احدى القصور الفخمه الذى يعيش فيه اكبر عائله والتى تحكم البلد وهى عائله الهلالى
يعيش فيه كبير العيله (عثمان الهلالى) والذى يتميز بشخصيته جاده جدا وكلمته مسموعه فى البلد كلهااا والكل بيعمله الف حساب
زوجته متوفيه وعنده ولدين وبنت
←الابن الاكبر→
حمدان متوفى
مراته بنت عمه فاطمه طيبه جدااا وبتحب عيلتها جداا
عندها ولد وبنت
الولد الكبير ﴿يونس﴾
عنده ٣٣ سنه نفس شخصيه جده عثمان فى كل حاجه حتى الشكل وقريب جداا منه
متولى ادارة مصانع الحديد والشركه الخاصه بالعيله وهو كبير البلد من بعد جده
متجوز بنت عمه صفاا ومش بتخلف واتجوزها بطلب من جده
-------
البنت الصغيرة ﴿رحمه﴾
عندها ٢٥ سنه درست فى كليه اداب شخصيتها مرحه وحنينه جداا نفس شخصيه والدتها فاطمه
كانت متجوزة طارق صديق يونس ولكن اكتشفت بعد ٥ شهور من جوازها انها مش بتخلف وحصل مشاكل بين طارق ووالدته بسبب موضوع الخلفه وهو رفض يطلق رحمه لكن هى مقبلتش بده وطلبت من يونس انه يطلقها من طارق رغم حبها الكبير ليه وهو كمان بيعشقها ورفض يتجوز بعدها
***************
←الابن الاوسط لعثمان→
متولى متوفى وزوجته اجلال شخصيتها حقودة جدااا وبتكره يونس بس هدفها الوحيد ان بنتها تتجوز يونس وتخلف منه عشان تبقي ست البيت وهدفها اتحقق لما يونس اتجوز صفا بس طلعت مش بتخلف
عندها ولدين وبنت
الكبير سليم
عنده ٣٥ سنه متوفى وكان شيطان ماشي على الارض وهنعرف قصته سوااا
------
الوسطى صفا
عندها ٢٨ سنه زوجه يونس مش بتخلف ونفس شخصيه امها بتحب يونس جداا على عكسه هو مش بيحبها اتجوزها عشان خاطر جده بس
--------
الصغير على
عنده ٢٦ سنه شخصيته مرحه جداا بيحب يونس وقريب اوى منه واخد طيبه والده على عكس والدته واخواته وبيكره طريقه امه واخته
*********
←البنت الصغيره لعثمان→
راضيه زوجها متوفى ومش عندها اولاد وبتحب يونس ورحمه وعلى وبتعاملهم على انهم ولادها وهما كمان قريبين منها جدااا وكمان طارق كان قريب اوى منها
ودى عيله عثمان الهلالى وكلهم عايشين فى القصر
&&&&&&&&&&&&
نروح نتعرف على الشخصيات اللى عايشه فى القاهرة
طارق
عنده ٣٣ سنه صديق يونس وعلى وقريب جداا منهم وبيشتغل فى الجيش رتبته رائد
كان بيعشق رحمه وحلمه الوحيد انها تبقي على اسمه بس حصل مشاكل كتير بينه وبين والدته لانها اتاخرت فى الخلفه وطلقها غصبن عنه لما يونس اجبره لانه ده كان طلب رحمه
ومن وقت ماطلق رحمه وهو عايش فى القاهرة ورافض يرجع البلد ورافض تماماا كل العرايس اللى والدته بتجيبهم ليه
*****************
فى احدى عمارات فى القاهرة تعيش بطله روايتنا
←روح
عندها ٢٢ سنه
والدها اتوفى وهى صغيرة كانت تقريباا ٧ سنين ووالدتها اتوفت وهى فى ثانويه عامه ومن وقت وفاتها وهى عايشه مع خالها ومراته وبنته
مكلمتش دراستها رغم تفوقها وكانت نتيجتها ٩٧٪ بسبب رفض خالها ومراته وبجحه انهم مش هيقدرو يصرفو على تعليمها وكفايه عليهم مصاريف اكلها ولبسها
روح بنت قمه فى الجمال وكان بيجيلها عرسان كتير من وقت ماكانت صغيرة بسبب جمالها فاجبرتها مرات خالها تلبس النقاب عشان محدش يتقدملها تانى لانها كانت غيرانه لان مافيش حد بيتقدم لبنتها ابداا
روح كانت بتعطى روح وفرحه لاى مكان تكون موجوده فيه بس بسبب اللى حصل معاها اتغيرت بقى الحزن صديقها فى كل الاوقات وهنعرف ايه اللى حصلها مع بعض من الاحداث
**********
مختار
خال روح كان بيشتغل سواق سليم ابن عم يونس وبيلعب قمااار وبيشرب دايماا وبيسمع كلام مراته فى كل حاجه
وبيعامل روح بقسوة وهو السبب الاول فى اللى حصلها ووصلها لحاله الحزن اللى هيا فيهاا
*********
رباب
مرات خال روح بتكره روح ومضايقه منها لانها احلى من بنتها ومستغله انها قاعده عندهم ومخلياها تعمل كل شغل البيت من الاخر خدامه عندهااا
عندها بنت واحده ريهام
عندها ٢٤ سنه بتدرس فى كليه تجارة بس فاشله وبتاخد السنه فى سنتين مش بتحب روح ودايما تعملها مشاكل عشان خالها يضربها
************
شهد
عندها ٢٢ سنه صديقه روح الوحيده وقريبه جداا منها اكتر من اخوات بتدرس فى كليه اداب واختارت قسم اعلام لانها نفسها تبقي صحفيه
شخصيتها قويه جدااا ولسانها طويل ومش بيهمها حد ومرحه اوى وعايشه مع والدها فى نفس العمارة اللى عايشه فيها روح والداتها اتوفت وهى بتولدها وابوها كل حاجه فى حياتها
محمد
والد شهد اطيب خلق الله وبيعامل روح بكل حنيه وهو الحضن اللى بتجرى عليه لما تتعب او خالها يضربهاا
&&&&&&&&&
ودووول شخصيات روايتنا ي حلوين وطبعا الروايه هتكون مزيج من اللهجه الصعيدى واللهجه العاميه
الشباب يونس وعلى وطارق ورحمه كلهم بيتكلمو بالعاميه بحكم دراستهم وشغلهم بس فى وجود جدهم بيتكلمو صعيدى احترامااا وتقديراا ليه طبعااا
والجد وفاطمه واجلال وراضيه وصفا بيتكلمو صعيدى..
لقراءة جميع فصول الرواية من هنا