رواية جمعتنا الذكريات الفصل العاشر 10 بقلم حنين شريف
في بيت منه
منه صحين الصبح علي صوت في الصاله ، كان صوت راجل مع اخوها وابوها.
لبست وخرجت الصاله ولقيت....
احمد
بس والله مكنش له لزوم انك تسيب شغلك وتيجي هنا
حسن ابتسم
ازاي بس يا عمي ده احنا عشره
احمد بأبتسامه
وبنا يبارك فيك يابني
منه دخلت وقالت بهدوء
صباح الخير يا بابا
احمد لف لمنه
صباح النور يا منه ..... سلمي علي حسن
حسن لف وشه لمنه بلهفه ، مش مصدق انه شافها ، زي ما هي متغيرتش عن الاول ، لسه زي ما هي ببساطتها وهدوئها
منه بجمود
ازيك يا حسن ، اخبارك ايه
حسن
الحمدلله ، انت الي عامله ايه
منه بجمود
الحمدلله ( وجهت كلامها لوالدها ) طيب بابا انا هروح الشغل ، عايز حاجه
احمد
لا يا حبيبتي ، ابقي طمنيني عليكي
منه
طيب سلام
مراد
سلام يا منه
حسن بص لطيف منه بحزن وقال لنفسه:
عارف ان الي عملته مش هين ابدا ....بس ارجوكي سامحيني
__________
اخر النهار في بيت سعد
كان سعد وسليم قاعدين
سعد
شويه كده ونقوم نلبس
سليم بأستغراب
ليه رايحين فين؟؟
سعد
علي النيل ، علشان نستني منه
سليم اتعدل في قعدته
سعد...منه دي مش من بقيت عيلتنا
سعد
مش عارف يا سليم منه دي انا ارتحتلها من اول مره شوفتها فيه ، بحسها واخده صفات كتيره اوي من ساره
سليم بشرود
لا ماهي تريح برده
سعد بصله
انت بتقول ايه؟ (تابع بمشاغبه) ولا انت رايك ايه فيها
سليم فاق من شروده
احم.....مش موضوعنا دلوقتي ( تابع بجديه) سعد ايه رايك نبقي نروح وقت تاني ، بعدين هي لو جت هتيجي تسمع باقي الحكايه ، وانا مبحبش انك تفتكر الجزء ده من الحكايه لانك بتتعب بعدها
سعد بص لسليم
ومين قالك اني مش فاكر ، مين قالك اني مستني حد يجي يسألني عن الماضي ووقتها بفتكر ، انا عمر ما الماضي راح عن بالي يا سليم
سليم
ايوه بس ليه برضو ....
سعد بمقاطعه
منه بأعتبرها زيك ، بعدين تعالي هنا ، انت من ساعه ما جيت من السفر وانت ماروحتش لابوك ، سليم علاقتك بأبوك مش عاجباني
سليم بضيق
سعد لوسمحت مش عايزك تدافع عنه
سعد بحده
سليم الي بيني وبين ابوك انت ملكش دعوه بيه ، النهارده هتيجي معايا وبعد كده تروح البيت وتقعد مع ابوك ، وبقولهالك تاني يا سليم الي بيني وبين ابوك ملكش دعوه بيه
سليم بضيق
حاضر يا سعد
_________
في سوبر ماركت كان مراد واقف بيحاسب الكشير ، وهو خارج خبط في شخص
مراد بغضب
مش تحاسب يا.....
قاطعه صدمته لما لقي سلمي
مراد بصدمه
سلمي!!
سلمي بحزن
ازيك يا مراد
مراد بجمود
كويس ، عن اذنك ( مراد كان هيمشي لكن سلمي مسكت ايديه وقالت بأسف:
انا اسفه يا مراد ، عارفه اني كنت قاسيه معاك ، بس والله لسه بحبك وعمري ما عرفت انساك ، انا بحبك يا مراد
مراد قلبه رق عليها لكنه لف وشه ليها واتكلم بجمود عكس الي جواه:
خلاص يا سلمي الي بينا انتهي ، و...مش هينفع نرجع لبعض
سلمي بدموع
خلاص بقي يا مراد انت لسه زعلان مني ، كنت فاكره انك لسه بتحبني ، ( تابعت بشك )ولا.....انت حبيت؟
مراد حاول يتماسك
ده شئ ميخصكيش ابدا ، (تابع بحده ) عن اذنك بقي
مشي مراد وأظهر الحزن الي جواه ناحيه حبيبته الي عمره ما قدر ينساها
____________
عند سعد وسليم كانو قاعدين قدام النيل
سليم بضيق
انا مش عارف انت مصر تجيبنا هنا برضو ليه
سعد لف وشه ناحيه سليم
هو الي هنعيده هنزيده ، ما قولنا علشان منه
سليم بضيق وبص علي النيل
انا عايز اعرف هي من بقيه عيلتنا؟!..
سعد بزهق
يوووه ، سليم أسكت بقي
سليم
حااااضر
بعد شويه منه راحت لسعد وسليم وقالت بأبتسامه:
ازيك يا عمو
سعد بابتسامه
الحمدلله ، تعالي يا منه
منه قعدت ولاحظت ملامح سليم المنزعجه ، قالت بحرج:
الصراحه كنت جايه اتطمن عليك ، اخر مره كنت تعبان شويه
سعد ابتسم
متقلقيش انا كويس
منه كانت بتبص للبحر بشرود ، لفت انتباه سعد شرود منه وقال بتسأل: مالك يا منه ، ايه الي واخد عقلك
منه فاقت من شرودها
هاا...لا مفيش حاجه...انا كويسه
سعد
متأكده
منه بصيت لسعد وقالت
لا صدقني مفيش حاجه
سعد بص للنيل وقال
تعرفي ان في شبه بينك وبين ساره ، نفس فرحتك لما اجي احكيلك حكايتي ، نفس اسلوبك لما يكون في حاجه شاغله تفكيرك، ( رجع بص لمنه ) فيكي حجات كتيره اوي منها ، وده اكتر حاجه بحبها في الكلام معاكي...لانك بتفكريني بيها
منه بابتسامه
تعرف اني نفسي اوي اشوفها ، من كتر كلامك عليها ونظره عينيك بحس بفضول رهيب اشوفها
سعد ابتسم وقال: مش لازم علشان اكون بحبها يبقي هي كانت فائقه الجمال ، هي اه بالنسبالي كانت اجمل واحده شافتها عيني ، بس ده علشان الي بيحب حد بيشوفه جميل ، حتي لو كان متوسط الجمال ، في كذه عين الدنيا الناس بتشوفك بيها ، في العين الحقوده ، والعين الشريره الي بتتمنالك الشر ، وفي عين الام الي كلها حنيه وحب ، وفي عين الحبيب الي بيشوف كل حاجه حلوه فيك ، حتي عيوبك ، بيبحب عيوبك اكتر من مميزاتك ، او بيحب كل حاجه فيكي ، عيوب ومميزات اي حاجه متعلقه بيكي هيشوفها بعينه جميله ، والاهبل هو الي يفرط في حب زي ده ، لان الي اليومين دول انك تلاقي حبيب حقيقي صعب ...
منه
يعني انت عايز تفهمني انك متجوزتش بعدها
سعد ابتسم وبص للبحر
لا اتجوزت ، بس منستهاش ، "وكيف انساها وهي قد ملكت قلبي وعقلي، وسيطرت علي روحي"..
منه بتذكر
انا سمعت الجمله دي قبل كده بس فييين؟....
سليم ابتسم علي محادثتهم وقال: قرأتي قبل كده "الحب الحقيقي هو من يمتلكه العقل قبل القلب"
منه بصدمه
هو انت سعد الهادي؟!