رواية جحيم الغيره الفصل الثامن 8
بقلم أماني سيد
جلس جبران على طاولة بجانب الزجاج، ينظر من حين لآخر في ساعته. بدا عليه الهدوء، لكن أصابعه كانت تدق بخفة على حافة الكوب، كأنه يعدّ اللحظات
بعد وقت قليل جاء ياسين واعتذر منه عن التأخير
- انا اسف على التاخير بس الطريق كان زحمه
ـ مافيش مشكله انا مبقاليش كتير قاعد ... اتفضل اقعد
ـ حاضر
ـ خير يا ياسين ابتهال بلغتنى انك عايزنى
بدأ التوتر يظهر على وجهه فهو ظن أن ابتهال اخبرته بكل شئ وهو وافق
بدأ يتحدث بصوت يكاد يكون مهزوز من التوتر
ـ انا عايز اطلب ايد ابتهال
ـ طيب وفردوس
ـ إحنا انفضلنا
ـ بس لسه فى بينكم اولاد وهى نفسها لسه ماخدتش حقوقها منك
إزاى عايز تتجوز وانت لسه مادتش فردوس حقوقها.
ـ فردوس اتنازلت عن كل حاجه
ـ اتنازلت تحت ضغط منك مش طيب خاطر منها
وده غير ولادك اللى انت راميتهم من غير ما تصرف عليهم
بس لو مش عايز تصرف عليهم ومش عايزهم احنا اولى بيهم وهنربيلك ولادك ونصرف عليها
وضغط جبران على تلك الكلمه حتى يجعله يفوق ويتزكر أن له اولاد
ظهر التوتر على ملامح ياسين فرغم حديث جبران الهادئ إلا انه يوجد اسفله تجريح مبطن
ـ لا طبعاً ولادى انا هصرف عليهم وكفيل بيهم
ـ طيب وفردوس وحقوقها
ـ بصراحه انا هتجوز على العفش والحاجة دى
ـ خلاص اديها تمن الحاجه
بص يا ياسين انت لو شخص فقير ومحتاج انا كنت اديتك العذر لكن انت بتشتغل ومرتبك عالى وغير كده عندك ورث من اهلك يعنى من الاخر حقوق فردوس مش هتفرق معاك بس انت قاصد انك ماتديهاش عشان كده عايزك تبقى صريح معايا
هى دى رغبه ابتهال ؟؟
ـ بصراحه اه وبعدين انا مش وحش كده ابتهال انا اشترتلها هدايا وغيرتلها العربيه تقريبا بتمن قايمه فردوس
ـ الفلوس اللى صرفتها على ابتهال ابعتهالى وانا هردهالك ومش عايزها تعرف حاجه عن الموضوع ده
ـ بس انا مش عايز حاجه انا بقولك كده عشان ما تفكرش أنى بخيل
ـ انا فاهم بس ابتهال فى مقام بنتى وانا اولى بيها وخاصه ان مافيش اى رابط بينكم عشان تجيبلها حاجه او تصرف عليها لما يبقى في نصيب ابقى هاتلها اللى انت عايزه
والاهم من ده حقوق فردوس تاخدها وإذا كان على اقناع ابتهال انا هقنعها بس ده شرطى عشان اوافق
ـ انا مش عارف هتوافق ولا لأ
ـ انا هتصرف واتمنى من هنا لحد ما العده بتاعتك تخلص ويبقى فى ارتباط رسمى مايكنش فى كلام بينكم وبخصوص اختها انا هكلمها
ـ خلاص وانا موافق على أى حاجة هتقرروها
ـ تمام على بركه الله
انتهى جبران من حديثه مع ياسين واتصل بابتهال وطلب منها أن تأتى له بعد عملها ووافقت ابتهال واتصل بها ياسين واخبرها بعض من حديث جبران ولم تعلق عليه ابتهال
فى منزل جبران كان يجلس مع ابنه وزوجته يتحدثون بأمور مختلفه وطلب جبران من زوجته ان تزود من الطعام لأن ابتهال ستاتى لهم اليوم وافقت زوجته وذهبت لتحضير الطعام
وجلس جبران برفقه ابنه
ـ ها خلصت ورق فردوس
ـ أه تقريبا كل حاجه خلصت بس هى مش هتاخد المعاش غير لما العده تخلص وهتاخدها بأثر رجعى .