بقلم محمد طه
_بتعملي إيه يا ندي؟
_مفيش يا ماما عايزه أفتح الأوضه دي بقي، من يوم ما بابا ما سافر وهيا مقفوله، عايزين نفتحها ونضفها ونستغلها ف أي حاجه.
_أنا مش قولت محدش يقرب من الأوضه دي نهائي، ولا أنا كلامي ما بقاش يتسمع؟
_يا ماما كلامك مسموع بقاله سبع سنين!
_ويفضل كلامي مسموع لحد ما أمو،ت.
_بعد الشر عليكي يا ماما..بس أنا بقول فيها إيه لما...
_إنتي ما تقوليش أنا هنا اللي أقول..وكلامي يتسمع ويتنفذ..والاوضه دي محدش يقرب منها؟
_طيب على الأقل يا ماما نفتحها ونضفها دي بقالها سبع سنين مقفوله!
_وهتفضل مقفوله طول ما أنا عايشه وبعد ما أمو،ت يبقوا أفتحوها وأعملو اللي إنتو عايزينه.
_بعد الشر عليكي يا ماما..وبعدين يا ماما أنا وأخويا كبرنا خلاص وما بقاش ينفع ننام ف أوضه واحده مع بعض ولا إنتي مش واخده بالك وهتفضلي شيفانا صغيرين كده طول العمر؟
_أيوه يا ندي هفضل شيفاكم طول العمر صغيرين..
وبالنسبه لنومكم مع بعض، ف من الليله مش هينام معاكي..أنا هسيب لأخوكي الأوضه بتاعتي ينام فيها وأنا هنام معاكي، ها عندك أي مشاكل تانيه؟
_عايزه أعرف إجابه السؤال اللي بسألهولك كل يوم..
فين أبويا؟ ويا تري عايش ولا لا قدر الله حصله حاجه؟ وليه مش عايزه تعرفينا حاجه عن أبونا؟
إحنا لحد دلوقتي ما نعرفش حاجه عن أبونا غير أسمه؟
_هرد عليكي بالاجابه اللي بقولهالك كل يوم..أبوكي سافر وأنقطعت أخباره ومعرفش حاجه عنو..وياريت نقفل الكلام ف الموضوع دا خالص.
_مش هينفع يا ماما نقفل الكلام ف الموضوع ده..
عشان دا أبونا ولازم نعرف هوا فين عشان نرتاح..
عارفه يا ماما لو كان أبونا لا قدر الله ما،ت..هنرتاح لأننا عارفين إنو م،يت..ولو كان سايبنا ومش سائل فينا برضوا هنرتاح لأننا عارفين إن هوا اللي رامينا..
طيب إنتي ما فكرتيش يا ماما إن أبويا لما سافر ممكن تكون حصلتله مشكله واتسجن ومش لاقي اللي يساعده؟
_أسمعي يا ندي أبوكم سافر على إيطاليا عن طريق الهجره الغير شرعيه عن طريق البحر ومكنش لوحده كل اللي سافرو معاه محدش يعرف عنهم حاجه..
سواء إن كان غرقوا ف البحر أو وصلو إيطاليا أو سافرو لدوله تانيه..محدش يعرف عنهم حاجه خالص
يعني مش أبوكي لوحده اللي محدش يعرف عنو حاجه..يا ريت بقي ما نتكلمش ف الموضوع دا تاني عشان بجد أنا تعبت وبعدين أنا مش مقصره معاكم ف حاجه ولا مخلياكم ناقصكم حاجه؟
_لو عيزاني أقفل الموضوع دا خالص..أفتحي الأوضه دي..أو على الأقل قوليلي سبب واحد مقنع ل قفلها؟
_أنا وأبوكي قبل ما يسافر قضينا أجمل ليله ف عمرنا ف الأوضه دي وأنا وعدته إن الأوضه دي هتفضل مقفوله طول ما هوا غايب ومفيش حد هيدخلها..
ها أرتحتي دلوقتي يا ندي؟
_لأ يا ماما ما أرتحتش..لأني متأكده إنك مش بتقولي الحقيقه..لأول مره تكدبي عليا
_وأنا لأول مره هضر،بك(وضربتها بالقلم)
_أضربيني تاني يا ماما..إن شالله حتي تمو،تيني..بس أنا مش هرتاح غير لما أعرف الحقيقه اللي إنتي مخبياها علينا ولما حازم يرجع إحنا لازم نفتح الأوضه دي (وقامت دخلت أوضتها)
_العيال كبروا وأسئلتهم هتكتر ولو أصروا إنهم يفتحوا الأوضه أنا مش هقدر أمنعهم واللي مستخبي بقاله سبع سنين هينكشف بين يوم وليله هتعملي إيه يا صفاء وهتتصرفي مع أولادك إزاي وهتمنعيهم إزاي
وبعد منتصف الليل دخلت صفاء الأوضه وقفلت الباب وراها ومفتحتش النور والاوضه كانت ضلمه
وفضلت واقفه ورا الباب
لحد ما سمعت صوت بيقول......