بقلم ملك سعيد
وأخيرا جه اليوم الي ابطالنا مستنيينه بفارغ الصبر
البنات كانوا في صالون التجميل
بيجهزوا لليلة العمر
والشباب كانوا متجمعين مع بعض في فيلا عز
♥ ❥ ♥ ❥ ♥
في أوضة عز
فارس واقف قدام المرايا بيعدل الكرافتة
و سيف بيسرح شعره
و عز بيلبس جاكت البدلة
وفهد اللي ربنا يكون في عونه
كان بيتدرب علي الرقصة اللي طلبتها منه رضوي
ومشغل فيديو بالأغنية وبيحاول يرقص زي شاروخان
فارس شاف فهد وهو بيتنطط
فسأل عز و سيف وقالهم بسخرية : ماله الواد ده ؟! ... بيتنطط زي القرود كده ليه ؟!
سيف و عز ضحكوا علي كلامه
وقاله سيف وهو بيضحك علي منظر فهد اللي مش واخد باله منهم : بيتدرب علي الرقصة اللي طلبتها منه رضوي
فارس بصدمة : متقولش انه هيتنطط كده في الحفلة !!
سيف بضحك : للأسف ايوا
فارس ضرب كف بكف وقال : انهاردة الضحك هيبقي للركب
عز بضحك : ربنا يعينه علي اللي هو فيه .... بس احب اقولكم من دلوقتي لو الشخص ده رقص ... بالطريقة دي انهاردة ... هقطع صلتي بيه
وقضوا الوقت وهما بيضحكوا علي فهد اللي مش ملاحظهم اصلا
♥ ❥ ♥ ❥ ♥
قدر وهي حاطة ماسك علي وشها قالت بفرحة : ياه مش مصدقة إن انهاردة هتجوز عز
رضوي بتأيد كلامها و بتقول : ولا أنا مصدقة اني هتجوز فهد
ندي بتكمل كلامهم وبتقول بهيام : وأخيرا هتجوز سيف حبيب قلبي
قطعت نور واصلة الحب الي عايشين فيها وقالت:
ما تتلمي إنتِ وهي ... قال سيف حبيب قلبي ...ومش مصدقة اني هتجوز فهد ... ولا هتجوز عز ... مالكم مدلوقين كده ليه ؟!
اتعدلت قدر في قعدتها وقالت:
وهو إنتِ مش مبسوطة ولا إيه ؟! ... ولا إنتِ مش بتحبي فارس؟؟
نور : هو من ناحية اني بحبه ... فأنا بحبه ... بس اعمل إيه لسه متضايقة منه ... بس خلاص دقت ساعة العقاب
قالتلها بابتسامة خبيثة
البنات قلقوا من كلامها
فسألتها رضوي بغباء: معقول هتسيبي الفرح ومش هتكمليه علشان تنتقمي من فارس؟؟
بصتلها نور بغيظ وقالت لقدر و رضوي:
شيلوا البت دي من قدامي الحكاية مش ناقصة غباء
وقضوا باقي وقتهم في تجهيز نفسهم
والبنات المسؤولين عن تجهيزهم
بدأوا يحطولهم الميك اب و يجهزوا قصات شعر العرايس
♥ ❥ ♥ ❥ ♥
في صالة الحفلات
ام قدر واقفة بتعاين تجهيزات الفرح
وبتستقبل الضيوف
وكذلك ياسين وأحمد ابو نور
وكمان صباح و حنان
وحتي مازن
بفرحة كبيرة وليه لأ مش انهاردة
فرح أولادهم وقرة عينهم و فلذة كبدهم
صباح لحنان : الف مبروك يا حنان عقبال ما نشوف عيال فارس و نور
حنان بفرحة : الله يبارك فيكي يا صباح ... والله انهاردة الفرحة مش سيعاني ابدا .... وأخيرًا جه اليوم اللي اشوف فيه نور عروسة ... ومش اي عروسة لا عروسة لفارس
صباح بحب : ربنا يتمم ليهم علي خير ... ونشوف عيالهم وعيال عيالهم كمان
حنان بضحك : عيال عيالهم مره واحدة
.... وهو احنا هنعيشلهم
صباح بغرور مصطنع : ومنعشلهمش ليه إنشاء الله ؟! ... احنا لسه صغيرين وفي عز شبابنا
حنان بضحك : صح لسه في عز شبابنا
♥ ❥ ♥ ❥ ♥
جه تليفون لعز برقم غريب
فبعد عن الشباب ورد علي المكالمة
وقبل ما يتكلم سمع صوت شخص بينهج نتيجة الجري وبيقوله : عز باشا مراد هرب من السجن
عز بصدمة : بتقول إيه ؟! ... إزاي قدر يهرب منكم ؟! ... للدرجة دي انتوا اغبية
الضابط بتبرير : عز باشا صدقني متوقعناش منه الحركة دي
عز وهو بيجز علي اسنانه من الغضب: تقلبوا عليه الدنيا وتلاقوه ... وصدقوني لو عرفت انه اتسبب لقدر بأذي هخلي كل اللي كان السبب في هروبه يندم وأولهم إنت
الضابط بخوف من تهديد عز : بس يا باشا صدقني احنا كنا مشددين عليه الحراسة
عز بصوت عالي من الغضب سمعه الشباب : اومال هرب ازاييي ؟!
الشباب بصوا لبعض بقلق وجريوا علي عز
الضابط بعملية: صدقني يا عز باشا هنلاقيه في اقرب وقت ... قبل حتي ما يفكر يأذي الآنسة قدر
عز بأمر : فورا تروح إنت وفريقك للعنوان اللي هبعتهولك ... لإني متأكد إن مراد هيروح علي هناك
عز قفل المكالمة وبعت للضبابط عنوان صالون التجميل اللي موجودة فيه قدر
فارس قرب منه وسأله بقلق:
في إيه يا عز إيه اللي حصل لكل العصبية دي ؟!
عز وهو بينهج من كمية مشاعر الغضب الي حاسس بيها : مراد هرب
فهد بصدمة : إزاي ؟! ... هو لحق يتسجن علشان يهرب
سيف بقلق علي اخته : يبقي كده قدر في خطر
عز بخوف علي قدر : لاء مستحيل اخليه يلمس شعره منها ... و يانا يا هو الليلة دي
قال كلامه وخرج جري علشان يروح لقدر و يقدر يحميها قبل ما يوصلها مراد
والشباب لما لقوا حالة عز وعصبيته الي ممكن تخليه يرتكب جريمة
لحقوه علشان يسيطروا عليه و يهدوه
♥ ❥ ♥ ❥ ♥
في عربية ماجد
مراد بابتسامة خبيثة : وجه وقت الحساب ... مش هسمحلك يا عز تعيش حياتك مع قدر في سعادة ... هاخدها منك وهبعدها عنك ... حتي لو وصلت معايا اني اقتلها
وطلع مسدسه من تابلوه العربية
وبصله بشر
قال بتوعد : جايلك يا قدري
وقال لماجد : زيد السرعة شوية ... لازم اوصل لقدر قبل ما عز يوصلها ... أكيد الضابط اتصل بعز و قاله اني هربت
وفعلا ماجد زود السرعه
تنفيذًا لأمر مراد
♥ ❥ ♥ ❥ ♥
وصل عز قدام الصالون ونزل من عربيته بسرعة وجري علي جوا
لقي البنات ما عدا قدر
وده زاد من خوفه عليها وفكر إن مراد وصلها قبله
البنات لما شافوه استغربوا وجوده
وخصوصًا لما شافوه بينهج وباين عليه القلق
عز جري عليهم وسألهم بخوف : قدر فين؟؟
وفي الوقت ده دخل باقي الشباب
ووقفوا ورا عز
البنات بصوا للشباب باستغراب
ونور سألتهم بقلق: في إيه يا جماعة؟!
وعز بيسأل علي قدر ليه ؟!
عز بغضب مكتوم : نور قدر فين ؟!
قدر من وراهم : أنا هنا يا عز
عز لما سمع صوتها بص وراه بسرعة لقي قدر واقفة ولابسة الفستان الأبيض والميك اب الخفيف اللي حطاه و قصة شعرها اللي زادتها جمال
عز لما شافها مقدرش يحرك عيونه من عليها
بس فاق من سرحانه وجري عليها و ضمها بقوة وخوف وهو بيحمد ربنا انها متأذتش
قدر بادلته الحضن بقلق
و كل ده تحت أنظار البنات و الشباب
حتي البنات اللي شغالين في صالون التجميل
قدر سألت عز بقلق وهي لسه في حضنه : مالك يا عز إنت كويس ؟!
خرج عز من حضنها ومسك إيديها وباسها بحب وقالها بكذب علشان ميخوفهاش : ابدا مفيش حاجة ... بس وحشتيني مش أكتر
بصتله بشك بس اتغاضت عنه وقالت بابتسامة مشاكسة:
هو أنا لحقت اوحشك ... ما أنا كنت معاك امبارح
عز بحب : إنتِ حتي وإنتِ معايا بتوحشيني ... فما بالك بإمبارح
......
نور بصوت واطي سمعه فارس : إيه المحن ده؟؟
فارس ضربها بكوعه في جنبها بخفة
واتوجعت نور وبصتله بغضب مكتوم وقالتله : بتضربني يا فارس ... ماشي هي كلها كام ساعة و يتقفل علينا باب واحد ... وشوف أنا هعمل فيك إيه
فارس بغمزة : ده إنتِ اللي هتشوفي عمايل بس الصبر
اتكسفت من كلامه ولفت وشها الناحية التانية وقالت في سرها بتوعد:
لما تشوف حلمة ودنك ... لو قربت مني انهاردة ... والله لأنيمك علي الكنبة
.......
سيف انبهر بجمال ندي وقالها بمشاكسة : معقول القمر دي هتكون مراتي ... وهتفضل طول عمرها في حضني؟؟
ندي بخجل : علي فكرة إنت قليل الادب
سيف بغرور : مش جديد عليا
ضحكت ندي علي طريقة كلامه
وقالتله : وأنا بقي اللي هربيك علي ايديا
سيف بحب : وأنا موافق
.......
رضوي مالت علي ودن فهد وقالتله :
اتدربت للرقصة ؟!
فهد بصلها بغيظ وقالها : كل همك الرقصة الهباب دي ... إنتِ خليتيني مسخرة قدام الكل ... وخليتي اللي يسوي واللي ميسواش يتريق عليا ... واللي هو فارس طبعا
... تخيلي كان بيشبهني بالقرد
رضوي بضحك : هههه قرد إيه هو اتعمي ... ده إنت قمر ١٤
سيف كان سامع كلامهم فقالهم بسخرية : القرد في عين امه غزال
الكل سمع سيف وضحكوا علي كلامه وعلي نظرات فهد المتغاظة لسيف
♥ ❥ ♥ ❥ ♥
عند مراد اللي دايما بيسعي للإنتقام
وعمره ما فكر في حساب ربنا
ومكنش يعرف انه هييجي اليوم و يتعاقب أشد عقاب علي كرهه و حقده اللي جوا قلبه علي قتل اخوه
علي انتقامه اللي ملوش سبب وعلي اذية قدر
......
مراد بغضب مكتوم : ما تزيد السرعة أكتر يا غبي
ماجد بخوف من غضب مراد : تمام يا باشا
ماجد زود سرعة العربية علي اعلي سرعة
وفجأة وبدون مقدمات
ظهرت قدام عربيتهم شاحنه كبيرة
وخبطت في عربية مراد
ومن قوة الاصطدام اتقلبت العربية عدة مرات
والدخان بدأ يطلع منها
ومراد و ماجد اغمي عليهم
من شدة الاصتدامات الي اتعرضولها
مراد كان بينزف من كل جسمه واصاباته كانت أكبر من إصابات ماجد
وبعد مدة المارة بدأو يتجمعوا حوالين العربية
و الشباب حاولوا يطلعوا مراد و ماجد
بس مقدروش يطلعوهم لإن العربية كانت مقلوبة
وباب العربية مبيتفتحش
دخان العربية زاد وتقريبا العربية هتنفجر
كل المارة بعدوا عن العربية تجنبًا للأذي
وفجأة العربية انفجرت
واتحرقت وحرقت الي فيها
وده كان عقاب ربنا لمراد ، و ماجد
علي كل الأخطاء اللي عملوها في حياتهم
وبكده انتهت شخصية مراد وشره في روايتنا
♥ ❥ ♥ ❥ ♥
في صالة الحفلات
المتزينة بالورود البيضا والزينة الناعمة
صوت الزغاريد سيطر علي المكان
قدر واقفة فوق السلم لابسة فستان أبيض لايق بروحها إيديها في إيد سيف أخوها سمعته وهو بيقولها بحب:
زمان أخدوكي مني وحرموني منك بس رجعك القدر في حضني حضن اخوكي … وإني شايفك قدامي في فستان الفرح ده، دي هدية ربنا ليا
قدر عينيها دمعت ومسكت إيده بحب وقالت:
ربنا يخليك ليا وتفضل سندي وضهري العمر كله
نقلت نظرها علي عز اللي واقف مستنيها وعيونه عليها ونظراته كلها حب
نزلت قدر علي السلالم ببطء بسبب فستانها الطويل وكعبها العالي
لما نزلوا وقفوا قدام عز اللي مدلها إيده وقال بابتسامة ملهاش مثيل : وأخيرًا … بقيتي ليا بجد
قدر ضحكت بخجل ومسكت إيده ووشها احمر من الخجل
الكل سقف ليهم بحب وفرحة
♥ ❥ ♥ ❥ ♥
فهد بص لرضوي اللي واقفة جنبه بفستانها الأبيض البسيط الناعم وبيقولها بحب :
عارفة… كنت فاكر إني هقضي كل عمري لوحدي بس لما شوفتك أول مرة ... وإنتِ مبتخرجيش من بالي … وعرفت وقتها إن لسه فيا أمل ... وهقدر أعيش حياتي طبيعي و اتجوز البنت اللي قلبي دقلها من اول مرة جت عيني في عينها
بصتله بحب وقالت :
فهد أنا مخطرش علي بالي في يوم اني ممكن الاقي الحب الحقيقي ... بس بسببك إنت قدرت الاقيه ... أنا عمري ما اتخيلت اني هحب و اتحب زي المسلسلات و لا الروايات ... مكنتش متوقعة اني هلاقي بطل روايتي ... في يوم من الأيام
فهد بصلها بنظرات كلها عشق وباس راسها وقالها بهمس مليان مشاعر حب : أنا بحبك يا كل عمري ... واوعدك اني هخليكي اسعد انسانة في الدنيا
رضوي اتكسفت لما باسها فحاولت تغير الموضوع وقالتله بمزاح : يعني هترقصلي؟؟
بعد عنها فهد بسرعة وبصلها بغضب مكتوم وقالها وهو بيجز علي اسنانه بغيظ: والله يعني بعد كل الكلام الرومانسي اللي قلتهولك ده .... جاية تقوليلي هترقصلي ما تتلمي شوية .... واحترميني
رضوي بضحك : خلاص أنا اسفة ... بس بردو مش هترقص؟؟
فهد محاولا اقناعها : يعني يرضيكي أكون مسخرة الحفلة
رضوي بإقتناع : بصراحة لاء
فهد : يبقي عايزاني ارقص ليه ؟!
رضوي بقلة حيلة: خلاص يا فهد مش لازم ترقص هنا ... لما نروح هترقص
فهد بصلها بتوعد وقال : رضوي لما نروح أنا هقتلك
ضحكت رضوي عليه وفهد شاركها الضحك
♥ ❥ ♥ ❥ ♥
فارس واقف جنب نور وشابكين ايديهم ببعضهم بس لما شاف مازن بيبص عليهم قرب منها أكتر وقال بصوت عالي قاصد يسمع مازن :
بصوا يا جماعة… دي نور .... مراتي وحبيبتي … علشان لو حد نسي ... قولت افكره
الكل ضحك عليه ونور ضربته بخفة وهي بتضحك
وقالتله : بلاش فضايح يا فارس
مازن رفع إيده باستسلام وهو بيضحك وقال :
خلاص يا عم فهمت الرسالة
الكل ضحك عليهم وعلي غيرة فارس الواضحة
♥ ❥ ♥ ❥ ♥
سيف كان بيبص لندي بفرحة مش سايعاه
وكإنه مش مصدق إن خلاص ندي بعد كام دقيقه هتبقي مكتوبة علي اسمه
ونفس حالته كانت حالة ندي اللي كانت بتبصله بحب و خجل واضح
سيف مسك إيديها وباسهم وقالها بعشق : كلها كام دقيقة وتبقي ليا ... ووقتها مش هسيبك لحظة واحدة
ندي بخجل : بس يا سيف علشان بتكسفني
سيف بغمزة وجراءة جديدة عليه : بتتكسفي من كلمتين ... اومال سبتي إيه لما نروح؟؟
ندي بصتله بصدمة ممزوجة بخجل وضربته علي كتفه بقوة وقالتله بغضب مصطنع : علي فكرة إنت طلعت قليل الادب ... وأنا مكنتش اتوقع منك ده
سيف بجرأة : اتوقعي مني كل حاجة ... عدا اللي هعمله فيكي لما نروح
ندي بعدت وشها عنه وهي بتحاول تخفي ابتسامتها الخجولة عنه
♥ ❥ ♥ ❥ ♥
ياسين وهو ماسك إيد قدر بحب ابوي : وأخيرًا يا قدر جه اليوم اللي اشوفك فيه عروسة ... تعرفي علي قد فرحتي انك هتتجوزي ... علي قد ما أنا زعلان علي بعدك عني
دموعه نزلت في آخر كلامه
قدر مستحملتش تشوف دموعه فحضنته وشددت علي حضنه وقالتله بحب : مش عايزة اشوف دموعك دي ابدا
خرجت من حضنه و مسحت دموعه وقالتله بمرح وهي بتبص علي عز اللي واقف جنبها و متأثر بكلام ياسين : اه صحيح مين اللي قالك اني هبعد عنك ... أنا هعيش معاك اصلا ... مش هروح مع عز
عز بصلها بصدمة وقالها : ده اللي هو في أحلامك يا قدر ... والله ما أنا سايبك دقيقة أكتر من كده
وبص علي ياسين وقاله بابتسامة رسمها بالعافية : أنا اسف يا حمايا هضطر اخد حبيبتي علشان .... اربيها علي كلامها ده
وقبل ما يسمع رد ياسين علي كلامه كان واخد قدر وبعد عنه
فضحك ياسين علي غيرة وحب عز لبنته