بقلم ماهي احمد
في اليوم التالي صباحا
ف اوضه سيف
نايم ع سريره بس صاحي
ادم خبط ع باب الاوضه ودخل
ادم/صباح الخير..انت احسن دلوقتي
سيف/الحمد لله ي ادم بيه متشتغلش بالك
ادم/قوم يلا حد من الخدم هيجيب لك الفطار
سيف/انا مش جعان
ادم/طيب..انا رايح شغلي ...خروجك برا بوابه البيت ممنوعه..اخرك الجنينه هنا
سيف/انا قاعد هنا مش هطلع..متقلقش..وبعدين هروح فين يعني
ادم/طيب
وطلع برا الاوضه
وسيف اول ما اتأكد انه طلع قام من ع السرير وبدأ يلبس الجزمه وبص ع ادم من الشباك وهو بيركب عربيته ومشي
في الكومباوند ف البلكونه الكبيره
فريده ورولا وميرا قاعدين بيفطرو والخدم بيحطو لهم بقيت الفطار
احلام راحت لهم وقعدت
احلام بابتسامه/صباح الخير
رولا و ميرا/صباح الفل ي مامي
فريده/صباح الخير
احلام وهي بتفطر /ناويين تعملو ايه النهارده
ميرا/انا هروح الجامعه ورايا محاضرات
رولا/وانا هروح النادي هقضي اليوم مع صحابي
فريده/وانا هروح التدريب
نهي بعد ما صبت العصير
نهي/هروح اودي الفطار ل استاذ سيف برا زي ما ادم بيه قالي ي احلام هانم
احلام/ماشي ي نهي
نهي دخلت المضبخ
رولا بغيظ/انا مش فاهمه البني آدم دا هيفضل ف بيتنا لحد امتي
ميرا/فعلا ي مامي هو هيفضل هنا لحد امتي
احلام/وانتو شاغلين بالكم بيه ليه..اعتبروه واحد شغال مع بباكم زيه زي اي حد شغال هنا
رولا /بس دا بني ادم همجي وقليل الزوق مفيش حد من ال شاغلين مع بابي عمل كدا قبل كدا
ميرا/انا جالي فضول اشوف شكله بعد ال سمعته دا ولله
رولا/متشوفيش وحش ي حبيبتي
احلام/خلاص كملو فطاركم يلا وقفلو ع الموضوع دا
فريده/انا هقوم اروح التدريب
وقامت وخدت شنطتها ورايحه ب اتجاهه الباب
احلام راحت ورا فريده بسرعة احلام/فريده
فريده وقفت/نعم ي مامي.
احلام/مالك في ايه..صاحيه مبتتكلميش وباين عليكي متضايقه
فريده /احم لا ابدا مفيش..انا كويسه
احلام /ع اساس انا مش حفظاكي اكتر من نفسي ..احكيلي مالك في ايه
فريده بصت ف الارض/انا..سمعتك انتي وبابي بتتخانقو جامد امبارح
احلام ابتسمت /دا بقي ال مضايقك وشاغل تفكيرك كل دا؟ زعلانه علشان سمعتيني انا وبباكي بنتخانق
فريده/
احلام /انا عارفه انكم مبتشوفوناش انا وبباكي بنتخانق كتير بس عادي اوقات بنتخانق بس بنتصالح ف وقتها.. ما انتي عارفه بباكي مبيسبنيش انام زعلانه..يعني زعلنا مبيطولش ساعه ع بعض
فريده بصت لها/يعني انتو اتصالحتو
احلام ابتسمت وعدلت لها شعرها/طبعا ي هبله اتصالحنا.. مكملناش ساعه و اتصالحنا ..متخافيش
فريده ابتسمت وحضنتها و احلام حضنتها بقوه
عند رولا و ميرا ف البلكونه
بيفطرو وفجأه سيف طلع من الاوضه بعد ما غير هدومه ل بنطلون اسود وتيشرت ابيض بنص
ميرا بصت ناحيه اوضه سيف
ميرا ب اعجاب/واو متقوليش ان ال شاب ال زي القمر دا سيف
رولا بصت عليه بغيظ/اه ي اختي هو قليل الزوق
ميرا /حرام عليكي دا طول بعرض وقمور
رولا/مين دا ال قمور؟الهمجي دا ..ضحكتيني والله
ميرا/بس بقولك ايه...انا حاسه ان بابي مش هيسيبه قاعد كدا من غير ما يشغله ..وحاسه انه هيشغله حارس شخصي ليكي
رولا كانت بتشرب شاي وشرقت
رولا/ايه ال انتي بتقولي دا ..لقدر الله والله
ميرا/انا اكتر واحده حافظه بابيتو وحاسه انه هيعمل كدا..علشان عارف انك مجنونه
رولا بغيظ/وانا مش عايزه حارس شخصي يبقي لازق فيا 24 ساعه انا.. وكمان مش عايزه الدُب دا يفضل موجود ف حياتنا ان شاءالله هيمشي
عند سيف
عايز يطلع من الكومباوند علشان يتكلم ف التليفون ضروري ف اي كشك
وطلع من الكومباوند وفضل ماشي بيحاول يلاقي اي كشك ياخد منه الموبايل ويتصل بس طبعا مش هيلاقي ف الاماكن الراقيه دي
سيف بص حواليه ولقي سايس بيركن عربيات وبيتكلم ف التليفون
سيف بيفكر ف فكره ياخد منه الموبايل يعمل مكالمه
سيف راح له /احم
السايس خلص كلام ف الموبايل/أأمر ي بيه..عايزني اركن لك عربيتك ولا حاجه
سيف/لا انا عربيتي للأسف نسيت المفتاح جوه و كمان موبايلي كنت هستأذنك اعمل مكالمه بس لحد من صحابي يجي يلحقني نوديها لحد يحل الحوار دا
السايس بصله ب شك/بس انا اول مره اشوفك ف الكومباوند هنا..دا ل رجال الأعمال بس..حضرتك ابن راجل اعمال ساكن هنا
سيف ابتسم/ ياريت والله مكنش دا بقي حالي.بس انا تبع ادم بيه
السايس ب احترام/اه تبع ادم بيه الحديدي..اهلا وسهلا خد الموبايل براحتك اهو
واعطاله الموبايل
سيف/كتر الف خيرك..هراضيك بس اطلع موبايلي والمحفظه من العربيه
السايس ابتسم/لالا ولا يهمك ادم بيه خيره سابق
سيف اخد الموبايل وراح يتكلم ف جمب
واتصل ب رقم أحمد وحط الموبايل ع ودنه
احمد/الو
سيف/احمد دا انا
احمد/انت اختفيت فين ي ابني فجأه
سيف/هحكيلك بعدين.. انا ف مجموع كومباوندات كدا بعيد عن بيتي وشغلنا ساعه ونص طريق
احمد ب استغراب/بتعمل ايه عندك
سيف/ابويا حاططني امانه عند واحد لسه عارفو امبارح..وانا مش مضطر استحمل الوضع دا .انا هحاول اخلع من هنا وارجع بيتي واكمل شغلي زي ما كنت..وابويا دا مبقاش ليا علاقه بيه نهائي..طالما هو اختار وجوده من السجن ب ارداته يبقي كل واحد يستحمل نتيجه غلطاته ..هحاول اقابلك خلال كام ساعه..استني اتصالي
احمد/ماشي .مستنيك...آه استني ..لو عايز انا ممكن اجي اخدك من المكان ال انت في
سيف/لا ملوش لزوم انا هتصرف.
وقفل المكالمه واعطي الموبايل ل السايس والسايس شكره ومشي
سيف بص حواليه لقي عربيات كتير
مشي براحه جمب عربيه من غير ما حد ياخد باله وجرب يفتحها لقاها مقفوله ..واتحرك كمان خطوتين وفتح عربيه لقاها مقفوله برضو
عند رولا
كمال سايق ورولا راكبه جمبه قدام وطلعو من الكومباوند وبعد ٥ د العربيه وقفت
كمال/الله ..ايه ال حصلها
وجرب يشغلها تاني
رولا/في حاجه ي عمو كمال
كمال/مش عارف ايه ي بنتي ال حصلها شكلها عايز يتغير لها مايه ..استني خليكي هنا هجيب حد من الكومباوند يساعدني نشوف فيها ايه..مش هتأخر عليكي كدا كدا احنا جمب البيت
رولا/تمام ماشي
كمال نزل من العربيه وراح بتجاه الكومباوند
فجأه حد ورا عربيه رولا زمر علشان عربيه رولا قافله عليه ومش عارف يمشي
والشاب نزل من العربيه وراح ل رولا و خبط ع الازاز
رولا فتحت الباب ونزلت
رولا/نعم
الشاب/ي انسه ممكن بس تحركي عربيتك علشان مش عارف اطلع بسببها
رولا/ممكن تستني بس ٥ د العربيه فيها مشكله و هنحلها دلوقتي
سيف شاف رولا من بعيد ف عربيتها وبتتكلم مع واحد
وابتسم وعرف هو هياخد عربيه مين يقابل بيها احمد
الشاب خلص كلام مع رولا ومشي من عند العربيه
سيف راح ل رولا/ايه ي بنت ادم بيه الحديدي..العربيه فيها مشكله
رولا بنفاذ صبر/دا ال كان ناقصني..لا العربيه تمام خليك ف حالك انت
سيف/تقريبا العربيه فيها مشكله..خليني ابص عليها انا بفهم فيهم
رولا/لاء..مفيش لزوم..عمو كمال راح يجيب حد من الكومباوند
سيف/عمك كمال لحد ما يرجع ويصلحها فيها نص ساعه..بقولك انا هعملها ف 5 د
رولا بعيند/قولت لاء
سيف/طيب ع راحتك
الشاب راح ل رولا
الشاب/ي انسه بقالي ١٠ د عايز اتحرك مش عارف بسبب عربيتك ..ياريت تخلي صاحبك ال معاكي يشغلها ونمشي نشوف مصالحنا
رولا بغضب/طيب وانا أعمل ايه؟قولت لك العربيه وقفت وعمو كمال هيجي يصلحها دلوقتي ..اصبر شويه
الشاب/يارب الصبر
ومشي راح ل عربيته
سيف/لسه برضو مُصره ع رأيك
رولا اتنهدت بغضب/طيب اعملها خلينا نخلص
ونزلت من العربيه
سيف راح فتح كبوت العربيه من قدام وظبط فيها كام حاجه وقفل الكبوت تاني
سيف/كدا تمام..استني اجرب اشغلها
وركب العربيه والعربيه فعلا اشتغلت
رولا/الحمد لله..يلا خلاص انزل بقي عمو كمال زمانه جاي
سيف /انا اسف ع ال هعمله ي بنت ادم بيه
وشغل العربيه ومشي بيها
رولا بصدمه/ايه ال انت بتعمله دا ..انت رايح فين أقف
وراحت وراه بسرعه وسيف كان هيمشي فجأه عربيه قفلت عليه الطريق بالغلط
سيف /وقتك انت كمان
رولا جريب وراه بسرعه وراحت له
رولا بغضب/انت رايح فين ي عربيتي ي بني ادم انت
وخبطت ع ازاز العربيه بغضب
سيف نزل ازاز العربيه
سيف/اركبي
رولا بغضب/انت اكيد كنت ناوي تسرق العربيه صح لولا أن الراجل جه وقف قصادك
سيف/ايه الكلام الغريب دا..انا كنت ناوي اوصلك ف المكان ال عيزاه شكل عمك كمال هيتاخر
رولا بغضب/انزل من العربيه...بقولك انزل
سيف/بصي احنا قافلين الطريق ع الناس يلا اركبي هطلع العربيه من الزحمه دي وهدهالك ..انجزي اركبي
رولا اتنهدت وراحت ركبت العربيه بغيظ وحطت حزام الامان
والشاب ال قفل عليهم الطريق بعد ب عربيته ومشي
وسيف انطلق
رولا اتنهدت/خلاص اركن العربيه ف جمب عمو كمال هيجي لنا كل الطريقه دا ازاي
سيف وهو مركز ف السواقه/ي ستي هوصلك المكان ال انتي عيزاه متخافيش..قوليلي بس حبيبك عامل ايه ان شاءالله محصلوش حاجه
رولا بغضب/انت مالك اصلا؟بتسأل اكن الموضوع هامك
سيف/بحاول أصلح علاقتنا سوا طيب اعمل ايه
رولا /مفيش علاقه بينا من الاساس..انا معرفكش
سيف /لو عايزه تعتذري علشان امبارح الوقت مناسب دلوقتي
رولا بصت له من بجاحته/عفوا ؟انا ل اعتذر منك..ليه ان شاء الله
سيف/لاني امبارح مطلعش بكدب عليكم زي ما قولتي
رولا/حتي لو كان مظبوط اعملك ايه..مش انت ال دخلت بيتنا زي الحرامي
سيف بصلها/ومين ادالكم الحق تبهدولني امبارح كدا
رولا تجاهلت كلامه/النادي اليمين الجاي..وصلني واركن العربيه واتفضل شوف كنت رايح فين
سيف مدخلش يمين وكمل ع طول
رولا بصت حواليها/فوتت الدخله ..في ايه انت مسمعتش ال قولته
سيف/اصبري عادي هندخل من ال شارع التاني
ووقف ع جنب
سيف بصلها/اهو وصلنا..ودلوقتي مضطر اودعك ي بنت ادم الحديدي..وانتي راجعه خدي تاكسي بقي تروحي بيتك
رولا بصت له بعدم استيعاب/انت بتقول ايه..اخد تاكسي ليه اصلا
سيف /انا محتاج العربيه..يلا انزلي..لو سمحتي
رولا بصدمه /يعني فعلا انت كنت هتسرق العربيه من الاول صح
سيف/لاء مش سرقه..هستلفها منك شويه ..انزلي لو سمحتي
رولا بغضب/حلو..يعني انت فعلا طلعت حرامي زي ما انا اتوقعت ف الاول
سيف/لاء انا مش حرامي..ممكن تنزلي من العربيه حالا علشان مستعجل
رولا بغضب/لاء مش ممكن..انا ال المفروض تنزل مش انا..يلا انزل من عربيتي
سيف اتنهد وشغل العربيه تاني وكمل سواقه
رولا بصدمه/انت مشيت ليه ي بني ادم بقولك اقف
سيف/
رولا بغضب /انت ال جبته ل نفسك
وفتحت ازاز العربيه وبدأت تصرخ علشان حد يلحقنا
رولا/الحقوني ...help
سيف بصدمه بيحاول يركز ف السواقه وبيحاول يسكتها ويبعدها عن الشباك
سيف/لالا ي مجنونه بتعملي ايه
رولا بتصرخ/حد يلحقني
سيف مسك دراعها وبعدها عن الشباك وبعدين ركز ف السواقه
سيف/اهدي علشان منعملش حادثه دلوقتي
رولا بصت له بغضب/قولت لك أقف ب العربيه حالا
سيف/لاء مش هوقف..العربيه هتفضل شغاله ساعه ونص لحد ما اروح منطقه معينه ف اخر القاهره..لو عايزه تنزلي هنزلك فورا ..ها انزلك
رولا بعيند/لاء مش هنزل..مش هسيب لك عربيتي
سيف ابتسم/ماشي..خلاص اهلا بيكي نورتينا..رحلتنا ساعه ونص او ساعتين ..نوصل ب السلامه ي هانم
رولا ربعت ايدها بغضب/انا نفسي افهم انت مين..انت وبابي تعرفو بعض منين..اكيد ضحكت عليه صح..نهايتك مش هتكون حلوه خالص انا بحذرك
سيف وهو سايق/لا بالعكس هو ال ضحك عليا..كل ال انا فيه بسببه اصلا..امسكي كويس
وبدأ يزود السرعه
ورولا مسكت ف العربيه بخوف
رولا بتوتر/ع مهلك
سيف/متقلقيش لما اوصل المكان ال عايزو هسيبك انتي وعربيتك وترجعي بيتك براحتك
رولا بغضب/انا مبعرفش اسوق
سيف/نعم؟ازاي يعني
رولا/زي ما سمعت
سيف هدي العربيه ووقف ف جمب
سيف بصلها/لا حول ولا قوه الا بالله ازاي واحده ف سنك ومعاها العربيه ال بملايين دي مبتعرفش تسوق
رولا ربعت ايدها بغضب/امال انت شايف معايا سواق ازاي يعني..وبعدين انت مالك اصلا
سيف اتنهد مش هينفع يسيبها لوحدها وهي مبتعرفش تسوق وقرر يوديها النادي ويبقي يقابل احمد ف وقت تاني
وشغل العربيه تاني ولف رجع ف طريقه للنادي
سيف/ع العموم انا كنت بهزر معاكي وكنت رايح المول اشتري كام حاجه..هوصلك النادي وابقي اروح المول اي وقت
رولا بصتله/صدقتك انا كدا..الحركات دي متعملهاش عليا ..انت كنت ناوي تسرقها..و ع فكره انا هقول ل بابي ع ل عملته دا وهو يتصرف معاك..انا فعلا بقي عندي فضول أعرف ..انت مين بباك ..اكيد مكنش شغال عند ببايا زي ما بتقولو
سيف وهو سايق/ايه كل الاسئله دي والرغي دا..لو مدخلتيش عليا الاوضه وقعدتي تصرخي وتقولي حرامي مكناش وصلنا ل هنا
رولا بعدم تصديق/انا مش مصدقه الوقاحه...وفوق كل دا قليل الزوق
سيف/عيب الكلام دا والله
رولا بغيظ/ع فكره انت ال كنت عامل دوشه ف الاوضه ولا اكنك ماشي ف بيتكم...كان لازم تهرب انت وقتها مش انا
سيف/ف المواقف ال زي دي انتي ال لازم تخافي وتهربي..ايه ال عرفني انك مجنونه للدرجه دي
رولا/ايوا طبعا انا مبخفش ابدا..واقعد ساكت بقي
سيف/ابراهيم الناصري
رولا ب استغراب/دا مين دا
سيف ضحك/بجد متعرفيش مين ابراهيم الناصري
رولا/
سيف/بباكي السبب ف حبسه وعشت طول حياتي لوحدي بسببه..طبعا ما انتو عايشين ف الاماكن الراقيه ومش حاسين ب حد
رولا بصتله/ف ايه؟
سيف/ايه؟مش انتي ال سألتي مين ابويا..وبعدين مستغربتيش ازاي ان بباكي السبب ف حبسه..معندكوش قلب انتو خالص
رولا/لاني مستحيل اصدق حاجه زي دي عن بابي..اكيد مش هصدق واحد زيك يعني
سيف كمل سواقه وقال
بسخريه/ما دا ال ابويا و ادم بيه قالوه...ان ادم الحديدي ملوش زنب و ان ابويا هو ال ساب الشغل مع بباكي زمان وراح يشتغل مع رجال أعمال تانيه ووقتها لبسوه ف تهمه مقابل ان احنا منتأذيش و يبعتو لنا كل شهر فلوس تكفينا وتعيشنا مش محتاجين حد..ف قال يتقي شرهم يعني..يخربيت الفلوس ال تخلي ابويا يتخلي عننا بالطريقه دي
رولا/ااه فهمت ..وبباك طبعا طلب من بابي يحميك مش كدا
سيف/المفروض
رولا /طبعا انت كنت عايز تسرق العربيه علشان تروح ل الناس ال بابي وبباك عايزين يحميك منهم
سيف/بالضبط شاطره حليتي القصه كلها..بنت ذكيه..انا مش زي ابويا ومش هخاف واهرب واسيب شغلي وحياتي بسبب حد
رولا بسخريه/لا برافو عليك..شاطر والله
رولا بصتله/ع فكره كدا انت هتكون اكبر غبي لو عملت ال بتفكر فيه دا ..دا رأيي يعني
سيف بصلها/بصراحه رايك ملوش لزوم مبيهمنيش يعني..انا بس قولت اطمنك واقولك اني خارج من حياتكم قريب مش مطول يعني
رولا بصتله بغيظ /هسجد شكر ل ربنا وقتها..يارب يعني
وموبايل رولا رن وكان ادم
رولا ردت/الو ي بابي
ادم/انتي فين ي رولا..كمال بيقول ان المفروض كان ياخدك النادي ورجع ملاقكيش انتي والعربيه
رولا/ابن ال كان شغال عندك دا أصر هو ال يوصلني بالعافيه كمان..يعني تقريبا كان هيسرق العربيه
سيف بصلها /ايه الكلام ال بتقوليه ل ادم بيه دا هيفهم غلط انا مكنتش هسرق حاجه
ادم/مين؟ انتي معاكي سيف ي رولا هو ال بيتكلم دا
رولا/اه
ادم حاول يسيطر ع غضبه/اديله الموبايل
رولا/انا بصراحه اخاف ادهوله يسرقه هو كمان..ف هفتح الاسبيكر
وفتحت الاسبيكر
ادم بغضب/انت بتعمل ايه برا الكومباوند ي بني ادم..احنا مش متفقين مفيش خروج من باب البيت الا لما تقولي
سيف وهو سايق/ما انا جالي ضيق تنفس من الأماكن الراقيه بتاعتكم دي ي ادم بيه مش متعود عليها.. ف قولت اتمشي شويه لقيت بنت حضرتك عربيتها عطلانه قولت اصلحها واوصلها واعمل خير يعني
ادم/تمام..استني تخلص ووصلها علشان مبتعرفش تسوق وحسابنا لما ترجع
وقفل المكالمه
سيف/اوامرك
وركن العربيه جمب النادي
سيف/اتفضلي وصلنا..مش دا النادي ال قولتي عليه
رولا بصت حواليها
سيف ابتسم/لو اتعرفتي عليا اكتر كنت هتحبيني والله
رولا بصتله/مستحيل
سيف ابتسم /طيب براحتك...انا هستناكي تخلصي ال هتعمليه ..مينفعش اخالف اوامر ادم بيه طبعا...ومن رأيي تتعلمي السواقه علشان المواقف ال شبه دي
رولا /رايك مبيهمنيش نهائي.
واتمني مشوفش وشك مره تانيه
في النادي ف كافيه مفتوح
يحيي واتنين صحابه قاعدين
وفجأه هايدي وصحبتها قعدو ع طربيزه جمبهم
صاحب يحيي/هايدي جت اهي
يحيي قام و راح ل هايدي
يحيي/هايدي فين رولا..بكلمها مبتردش عليا والمفروض تيجي النادي النهارده
هايدي/لاء معرفش هي فين..المفروض حبيبتك تبقي عارف هي فين
يحيي/ما انتي عارفه رولا بترد ع التليفون ع مزاجها
وفجأه شافو رولا نزلت من عربيتها هي و سيف
هايدي بتبص ع رولا وسيف ال واقفين بعيد
هايدي ابتسمت ب اعجاب/واو..هو مين ال رولا جايه معاه دا
يحيي بص ع المكان ال هايدي بتبص عليه وشاف رولا واقفه مع سيف وبيتكلمو
يحيي اتنهد بغضب
ورولا خلصت كلام ف الموبايل وراحت لهم
رولا /عاملين ايه
هايدي ابتسمت/الحمد لله..رولا مين ال قمور ال موصلك دا
يحيي بغضب/رولا انتي بتعملي ايه مع البني آدم دا
هايدي/ايه دا انت تعرفو ي يحيي
رولا/في ايه ي يحيي ..عربيته عطلت وصلحها ووصلني
يحيي بغضب/ب السهوله دي يعني؟اصلا مش فاهم بعد ال حصل امبارح بيعمل ايه جمبك مش المفروض منشوفش وشه تاني ف حياتنا ولا انا فاهم غلط
رولا بغضب/يحيي..متعليش صوتك..كأني هموت ويوصلني يعني..قولت لك كنت مضطره .واصلا انت مالك مش فاهمه مين يوصلني ومين لاء
يحيي خد موبايله من ع الطربيزه بغضب ومشي
هايدي/في ايه ي رولا انا مش فاهمه حاجه فهميني
رولا اتنهدت وسحبت كرسي وقعدت
ضهرا
احلام سايقه وبتكلم ادم ف التليفون
ادم ف الشركه ف مكتبه قدامه ملف
احلام/زي ما قولت لك هعدي ع روان و جنات هنعمل شوبنج . مش هتأخر ان شاءالله
ادم وهو مركز ف الملف ال قدامه/اشمعنا يعني
احلام / علشان واحده صحبتنا من النادي عزامنا ع حفله عيد جوازها هي وجوزها عاملينها ف الفيلا بتاعتهم
و عزمتنا و مقدرتش أرفض الصراحه.انت رايك اي
ادم ساب الملف ال ف ايده /لاء مش موافق اتصلي اعتذري منها وقولي لها مش هقدر اجي
احلام/دا ليه بقي ان شاءالله..
ادم/عايزه تحضري حفله عيد جواز بليل و ف فيلا ناس غريبه انا اصلا معرفهمش ؟ وعيزاني أوافق
احلام/ادم انا مش صغيره انت مش واخد بالك اني كبرت و بقي عندي تلت بنات طولي و شاب اطول مني ..انت ازاي لسه خايف عليا اكني احلام ال صغيره ال عندها حاجه و ٢٠ سنه
ادم ابتسم/والله مهما يعدي سنين هفضل اخاف عليكي و هفضل اخبيكي من الناس الغريبه ع قد ما اقدر ...وبعدين اي (انا كبرت دي ) انتي مبتبصيش ف المرايه ولا اي .انا عمري ما شفت ولا هشوف ف حلاوتك..دا انا عندي اربع بنات مش تلاته بس
احلام ابتسمت بحب/بجد ي ادم
ادم ابتسم/بجد ي عيون ادم
احلام/طيب انا لسه عايزه احضر الحفله برضو
ادم وهو بيمضي ورق
قدامه/قلت مفيييش حفلات
احلام/طب بص خلاص تعالي معايا علشان تكون مطمن
ادم/لاء انا معرفهمش اساسا علشان اروح ..انتي اعتذري ل صحبتك وخلاص
احلام بغيظ/ ماشي ي ادم متتكلمش معايا تاني.... و ع فكره بقي انت بتغيير زي مراهقين الثانويه بالضبط
ادم ابتسم/فعلا ؟انا بغيير زي مراهقين الثانويه وانتي مبتغيريش عليا خالص ؟
احلام بزعل/ايوا ومتتكلمش معايا تاني علشان انا زعلت منك
وقفلت المكالمه
ادم ابتسم/ماشي لما اشوفك بس
بعد ساعتين
في الجامعه عند غزل
خلصت الامتحان وطلعت من المدرج هي وواحد زميلها
الشاب/بس الامتحان كان كويس يعني الحمد لله
غزل/اه والله ي اسلام انا قلت هيعقدنا ويجيب الامتحان صعب
وبصت حواليها بتدور ع ياسين ال اتفق معاها هيوصلها بعد ما رجع من شركه فريده
اسلام/انتي مستنيه حد ؟
غزل/ا
وبص من بعيد لقت
ياسين طالع من الكافتيريا ومعاه بنت و ف ايدهم قهوه والبنت بتضحك وبتهزر مع ياسين
غزل ربعت ايدها بغضب وغيره
عند ياسين شاف غزل من بعيد وهي بتتكلم مع زميلها
ياسين بغضب اعطي البنت ال جمبه القهوه بتاعته
ياسين/انا همشي اتكلي ع الله
البنت/طب هنتقابل امتي تاني ي ياسو طيب
ياسين سابها و راح ل غزل و اسلام
ياسين/حليتي كويس ف الامتحان؟
غزل بغيظ /اه
وحبت تضايق ياسين اكتر
غزل ابتسمت/الحمد لله الامتحان كان كويس لأن قبل ما يوزعو الورق اسلام شرحلي كذا جزئيه فادوني كتير ف الامتحان.ف مش عارفه اقولك اي ي اسلام بجد
اسلام ابتسم/لا متقوليش حاجه انا عملت ايه بس
وياسين كان واقف بيحاول يسيطر ع اعصابه
غزل ابتسمت/
نسيت اعرفك صحيح دا اسلام زميلي ف الكليه..و دا ياسين ابن عمي ي اسلام
اسلام ابتسم وسلم ع ياسين
وياسين سلم عليه بغضب
ياسين/اهلا
اسلام ابتسم ل غزل/لو احتاجتي ايه حاجه رني عليا
غزل ابتسمت/اكيد
اسلام/عن اذنكم همشي
غزل بابتسامه/مع السلامه
ومشي
ياسين بغضب مسك دراع غزل
ياسين/اي ال موقفك مع زفت شاب غريب
غزل بابتسامه /دا مش غريب دا اسلام
ياسين بغضب/انتي هتستعبطي ي غزل
غزل /بستعبط ف اي
ياسين بغضب/ اقسم بالله ي غزل لو شفتك بتتكلمي مع واحد غريب تاني ولا واقفه معاه بس مش هيحصل خير ابدا ..لاء وكمان مدياله رقمك..يلا امسحي رقمه فورا
غزل سحبت دراعها من ايده بغضب/لاء انا براحتي اتكلم مع ال يعجبني و أقف مع ال انا عايزه أقف معاه .انا مش عيله صغيره وانت مش وصي عليا علشان تقولي أعمل ايه ومعملش ايه
وبعدين ما انت ٢٤ ساعه مع بنات رايح جاي معاهم .ف سوري انا من حقي اتعرف ع حد مناسب يمكن احبه ويحبني الله اعلم
ياسين مسكها من دراعها بغضب وبصلها
اول مره يدرك ان فعلا غزل من حقها تحب وتتحب ..عمره ما تخيل انها ممكن تكون مع اي شاب تاني وتبعد عنه..ديما كان شايفها صحبته و اخته الصغيره ال هتفضل جنبه طول العمر
ياسين بغضب/يلا علشان اروحك البيت
وخدها وراحو وبتجاهه العربيه
عصرا
في كومباوند ادم
احلام رجعت من برا وغيرت هدومها وقاعده ف الصالون ماسكه الموبايل و بتشرب قهوتها
وفجأه دخل ياسين و غزل وياسين باين عليه الغضب
احلام ابتسمت/ حمد الله على السلامة
ياسين/انا طالع اوضتي
وطلع غرفته بغضب و غزل كانت بتبص له وهو طالع
احلام /في اي ي غزل انتو متخانقين ؟
غزل راحت قعدت جمب احلام
غزل بصوت واطي/انا عملت زي ما قلتيلي ..خليت ياسين يحس اني ممكن اضيع من ايده واحب واتحب ومش من حقه يمنعني من دا
احلام ابتسمت/اه وواضح ان الخطه نجحت ياسين داخل زي البركان اهو ومش طايق كلمه من حد
فلاش باك
من كام يوم ف كومباوند ادم
غزل كانت بايته مع البنات هنا
ف غرفه ميرا
غزل نايمه ع السرير بس صاحيه و جمبها ميرا رايحه ف النوم
احلام دخلت الغرفه تطمن عليهم
احلام ابتسمت وبصوت واطي/ميرا نامت
غزل ابتسمت/اه من بدري
احلام ابتسمت/وانتي بقي منمتيش ليه. ال واخد عقلك
غزل/مش جايلي نوم
احلام شدت كرسي وقعدت جمبها ع السرير
احلام/يعني مش هتحكيلي
غزل/احكيلك ع اي
احلام/حبيتي ياسين امتي
غزل بتوتر سندت ضهرها ع السرير/ي ياسين .مين قال ل حضرتك أن انا ا
احلام ابتسمت/محدش قالي ..انا عارفه من غير ما حد يقولي انك بتحبي ياسين وهو زي المتخلف مش حاسس ب دا ...انتي بنتي الرابعه ي غزل.. انا ال مربياكي وغلاوتك من غلاوه بناتي بالضبط.
غزل ابتسمت /حبيبتي ي مرات عمو والله
احلام/مين يعرف غيري انك بتحبيه؟
غزل اتنهدت/مامي والبنات بس
احلام ابتسمت/متقلقيش..انا هساعدك وهخلي المتخلف دا يفوق كدا ويعرف ان ال صياعته مع البنات ال برا دا عك ف عك وان محدش حبه ولا هيحبه قدك
غزل اتنهدت/متتعبيش نفسك ي طنط احلام..والله لو قعدنا من هنا ل السنه الجايه مش هيحس ب حاجه ..ديما شايفني اخته الصغيره و صحبته وبنت خالته ومش اكتر من كدا ..٢٤ ساعه صايع مع البنات يسهر ويهزر ويقابل ومش شايفني اساسا
احلام/هو علشان ضامن انك كدا كدا جمبه ي حبيبتي ..ابني وانا عرفاه ..هو دلوقتي عنده كل حاجه....عنده انتي . صاحبة عمره من الطفوله واخته الصغيره ..ف ضامن انك كدا كدا جمبه هتروحي فين يعني ..وعنده البنات والسهر والصياعه مع البنات ل نص الليل ...لما يدرك بقي ان صاحبه عمره ممكن تضيع من ايده وتروح ل واحد تاني ..وتحب وتفكر ف واحد تاني ..وقتها انا أأكدلك انه هيتجنن عليكي ومش هيسمح ل ان دا يحصل ابدا
غزل ابتسمت/بجد ي مرات عمو ؟
احلام ابتسمت وغمزت لها/وحياتك عندي ل هخليه ف فتره قليله يعترفلك انه بيحبك ..امال عيزاني اشوف بنتي بتتعزب بسببه كدا وهسكتله
غزل بابتسامه حضنتها /انا بموت فيكي والله
احلام حضنتها بابتسامه
بااااك
احلام بابتسامه/احكيلي ال حصل بالتفصيل
غزل /عملت زي ما قلتي لي ..بعد ما طلعت من الامتحان كنت بتكلم مع زميل ليا اسمه اسلام .كنا بنتكلم عن الامتحان وكدا ..وشفت ياسين من بعيد كان طالع من الكافتيريا..انا كنت خايفه اعمل زي ما قلتيلي واخليه يغير من اسلام ويفكرني معجبه بيه ..كنت خايفه منه بس لما شفته خارج مع بنت وبيهزرو وبيضحكو اتعصبت وهبيت فيه وقلت له انا مش عيله صغيره ومن حقي احب واعجب ب ال انا عيزاه انا مبقتش صغيره ...بس ومن وقتها طول الطريق وهو ساكت وباين عليه الغضب
احلام/لاء برافو عليكي والله ..شفتي نجحتي ف ال عملتيه ازاي ؟ مع ان حبيب قلبي مش هاين عليا اشوفه متعصب كدا بس ف الاخر كله علشان مصلحتكم انتو الاتنين
غزل بحزن/انا كمان متضايقه يعني حاسه اني عايزه اروح اقوله مفيش بيني وبين اسلام حاجه ولا حتي ب اي راجل تاني
احلام/لاء اعقلي متضعفيش احنا كدا وصلنا ل مرحله كويسه اوي..نسيبه يهدي بس حبه من الموقف دا وبعدين اقولك ع الخطوه الجايه
غزل ابتسمت/اوك ماشي ...هي البنات لسه مجتش ؟كنت عايزه اشوفهم قبل ما اروح
عائشه /لاء لسه فريده ف الشركه و رولا و ميرا ف الجامعه التلاته زمانهم ع وصول ..وبعدين لسه بدري هتروحي البيت لي خليكي اسهري معانا النهاردت ونبقي نخلي ياسين يوصلك ونا هكلم مامتك اقولها انك هتسهري معانا
غزل ابتسمت /اوك
عند سيف ركن العربيه عند البيت
و رولا نزلت من العربيه ورزعت الباب
سيف نزل من العربيه
سيف/هو انتي ع طول متعصبه كدا
رولا بصتله/بتعصب لما بشوف وشك بس .يارب مشوفش وشك تاني و تقدر تمشي من هنا زي ما بتقول وترجع ل حياتك القديمه..ومتقلقش مش هقول ل بابي ع انك ناوي تمشي من هنا من وراه علشان اخلص منك بس مش اكتر
سيف ابتسم/كتر خيرك والله
رولا دخلت البيت و البودي جارد اخد المفتاح من سيف يركن العربيه و سيف راح قعد ف الاوضه بتاعته
عند ادم
رجع الكومباوند ونزل من عربيته
ف اوضه سيف
دخل الاوضه وقعد ع الكنبه يرتاح
فجأه الباب اتفتح بقوه وادم دخل سيف قام بسرعه بتوتر منه
ادم بغضب/انا عايز افهم كلامي مبيتسمعش ليه
سيف/احم خير ي ادم بيه
ادم بغضب قرب منه وسيف رجع خطوتين ل ورا
ادم بغضب/تعالي قرب
سيف بتوتر/لازم؟انا معملتش حاجه والله
ادم بصله وسيف قرب منه وخايف وحاسس انه هينضرب ف اي لحظه
ادم بغضب/ ايه ال طلعك من من ز_فت الكومباوند...هو انا مش قايل مفيش خروج من غير معرفتي
سيف /مهو ..زي ما قولت ل حضرتك انا كنت قريب من البيت وشوفت عربية بنت حضرتك عطلانه والطريقه زحمه ف صلحتها ووصلتها بس
ادم بعصبيه شده من ياقه قميصه وقربه منه/انت هتستعبط يالا؟ فاكرني مخدتش بالي و رولا بتقول كان عايز يسرق العربيه ويمشي...كنت ناوي تروح بيها ع فين؟
سيف بتوتر/احم..مكنتش ناوي اروح ف مكان والله ..صلي ع النبي بس وسيب هدومي
ادم ساب هدومه بغضب
ادم/دا آخر تحذير ليك... لو خرجت من غير اذني بعد كدا انت ال هتزعل..فاهم ولالا
سيف/فاهم ..بس انا هفضل محبوس هنا ل حد امتي..طب وشغلي؟هصرف ع اخواتي ازاي مش فاهم...دول محتاجين فلوس كتير كل اول شهر
ادم/منا اكيد مش جايبك احبسك هنا.. اديني وقت وهدور لك ع شغل محترم بعيدا عن الشغل والناس القر_ف ال كنت معاهم دول.. ووقتها تقدر تصرف ع اخواتك
سيف/ال حضرتك تشوفه
المغرب في الكومباوند
احلام قاعده ف الصالون مع رولا وغزل ال قاعدين ماسكين الموبايلات
رولا بتكلم يحيي ال عايز يصالحها و ياخدها هي وصحابها ويروحو كافيه هيبقي موجود المغني ال هما بيحبوه وهي في حفله حلوه
غزل شافت رولا فاتحه بوستر حفله المغني
غزل ابتسمت/ايه دا الله ..رولا انا بعشق المغني دا هو عامل حفله
رولا بصوت واطي/وطي صوتك ..يحيي عايزني اروح معاه هو وهايدي الحفله ال هتتعمل ف الكافيه دي
غزل بفرحه بصوت واطي/هاجي معاكم ي رولا علشان خاطري ..انا بحبه اوي وعايزه اروح
رولا/انا لسه مقولتش ل بابي مش عارفه هيوافق ولالا
غزل/انا هروح البيت اخد شاور واستأذن بابي و انتي قولي ل اونكل ونتقابل هناك علشان خاطري
رولا/ماشي بس مش هنقول حفله علشان ولا بباكي ولا ببايا هيوافقو
غزل/ماشي موافقه
احلام بصت ع رولا وغزل ال قاعدين بيتهامسو
احلام/خير يارب بتتكلمو ف ايه ف السر كدا
غزل ابتسمت /مفيش ي مرات عمو دا هايدي والجروب ال ف النادي عايزين رولا تقابلهم ف كافيه يقضو شويه وقت وانا بقولها عايزه اجي معاكم
رولا /ب الضبط
احلام/مين هيخرج معاكم من جروب النادي
رولا/ هايدي ويحيي
احلام/ا
رولا/من قبل ما تتكلمي انا مش هكدب ع بابي وهقول الحقيقه..هقول ان يحيي معانا عادي هو عارف انه زي اخونا من زمان ومبيقولش حاجه
احلام اتنهدت
ادم دخل البيت وراح ل احلام و رولا وغزل
ادم/السلام عليكم
رولا بابتسامه /وعليكم السلام ..حمد لله ع السلامه ي daddy
غزل ابتسمت/وعليكم السلام..حمد لله ع السلامه ي اونكل
ادم وهو بيبص ع احلام ال متجاهلاه بزعل
ادم/الله يسلمكم ي حبايبي
وباس راس رولا وبعدين غزل
رولا/dad انا هروح انا وغزل وهايدي وكام حد من النادي نقعد ف كافيه شويه
ادم/واكيد مفيش معاكم اي واحد غريب
رولا/دا يحيي بس ال هيبقي موجود وانت عارف ان يحيي زميلنا من زمان و زي أخونا يعني ي بابي اكيد مش هترفض
ادم /ماشي متتأخروش
رولا ابتسمت/اوك حاضر
وفريده نزلت من غرفتها وباست ادم من خده
فريده بابتسامه/حمد لله ع السلامه
ادم ابتسم/الله يسلمك ي روح قلبي
وباس راسها
احلام تليفونها رن ف غرفتها وطلعت الغرفه علشان ترد وادم بصلها وهي بتطلع
غزل بصوت واطي/انت زعلتها ولا ايه
ادم/وانا اقدر برضو ازعلها ..انت تعرفي عني كدا ؟
غزل بابتسامه/لاء طبعا دا انت الجان بتاع عيلتنا
ادم ابتسم/حبيبه قلبي..هطلع اغير هدومي وانزلك اشوفك عملتي اي ف الامتحان
غزل ابتسمت/اوك
وادم طلع الغرفة
وفريده قعدت مع غزل و رولا
فريده بصت ع غزل ال قاعده سرحانه
فريده/مالك ي روح قلبي..حصل حاجه؟
غزل/انا عايزه احكي لكم ع حاجه
رولا سابت الموبايل/ايه
غزل حكت لهم الحصل بينها وبين ياسين وان احلام عارفه كل حاجه
فريده بصدمه/مامي عارفه انك بتحبي ياسين؟
غزل /ششش وطي صوتك ..ايوا طلعت عارفه
رولا ابتسمت/مش سهله ماموش برضو..لاء وكمان بتعملو خطط و حركات من ورانا
غزل اتنهدت/منا قلت لك اهو
فريده/طب وانتي متضايقه لي دا الخطه نجحت وبتقولي ياسين متضايق من وقتها
غزل/مش يمكن مثلا علشان مبحبش اشوفه متضايق ؟وكمان بسببي
فريده ابتسمت
عند احلام ف الغرفه
واقفه بتتكلم ف التليفون
ادم دخل الغرفه و رمي الجاكيت و الموبايل ع السرير
احلام /ايوا فهماكي...
ادم قرب من احلام وحاوط وسطها ب ايدها وقربها منه
وباس خدها
احلام بصت ل ادم بخجل وبعدت الموبايل عنها
احلام/ادممم
ادم /عيون ادم
وباس رقبتها واحلام ابتسمت وحاولت تخلص المكالمه
احلام/خلاص تمام ماشي ي حبيبتي هكلمك بعدين ..مع السلامه
وقفلت المكالمه
احلام/عاجبك كدا توترني وانا بكلم الناس
ادم وههو باصص ف عيونها /وانتي ينفع كدا متقوليلش حمد لله ع السلامة بعد ما رجعت من الشغل؟
احلام من غير ما تبصله بزعل/ايوا ينفع ..ومتتكلمش معايا بعد اذنك
وكانت هتبعد عنه بس ادم محاوط وسطها بتملك
ادم وهو بيعدل لها شعرها/انا اسف حقك عليا علشان زعلتك
وباس شفايفها
واحلام ابتسمت
احلام /كل مره بتضحك عليا كدا بكلمتين
ادم /مقدرش والله
قوليلي ايه ال يرضيكي وانا اعملهولك
وباس راسها
احلام / اروح الحفله
ادم/مش احنا قفلنا موضوع الحفله دا خلاص
ورجع خصله من شعرها ورا ودنها وقرب منها
ادم ابتسم/وبعدين احنا ممكن نحتفل هنا احتفال احلي من ال هيحصل هناك ١٠٠ مره
وباس شفايفها و رقبتها
احلام ابتسمت بحب
احلام/غلبتني تاني يعني ومقدرتش اقنعك واروح الحفله ..نفسي اعرف افضل زعلانه منك للاخر... مبقدرش
ادم باس راسها/وانا ميهونش عليا زعلك ابدا ابدا ...و علشان اعوضك عن الحفله ال مرحتيهاش .. يلا نلبس هاخدك نتعشى سوا برا ف المطعم ال بتحبيه
احلام بابتسامه/قول والله
ادم /والله ..ولا الخروج مع سي ياسين احلي من الخروج معايا؟
احلام بابتسامه حاوطت رقبته بدراعها وقربت منه
احلام/لاء الخروج معاك احلي طبعا
ادم ابتسم /لسه زعلانه مني؟
احلام بابتسامه/لاء مقدرش
ادم ابتسم وباس شفايفها
بعد ساعه
قاعد ف البلكونه
فريده ال بترسم تصاميم و غزل و رولا ال بتكلم صحابها ع الجروب واتساب و ميرا ال رجعت من برا خدت شاور وغيرت هدومها
فجأه سيف طلع قعد قدام الاوضه بعد ما غير هدومه و بيشرب قهوه وسرحان
غزل بصت ناحيه اوضه سيف
غزل ب اعجاب/هو دا سيف ال انتو حكيتولي عنه..دا طلع قمور بجد
ميرا بصت عليه/اه هو ب عينه
غزل ابتسمت/دا ايه الحلاوه دي بجد
رولا بغيظ/انا مش فاهمه انتو شايفينه حلو ع ايه بجد ..دا دُب
ميرا/حرامي عليكي دا جان وعسول
فريده/خلاص بقي متبصوش عليه كتير هياخد باله
غزل/بذمتك ي فريده مش حلو؟
ميرا بخبث/ولا استاذ زين ال ف التدريب احلي
فريده ابتسمت /بس يبت لمي نفسك...ايه ال جاب سيره زين دلوقتي
رولا ابتسمت/شوف شوف شوف ال بتتكسف لما سيرته تيجي .لالا دا احنا محتاجين لنا قعده مع بعض
فريده ابتسمت
ادم واحلام نزلو من غرفتهم بعد ما احلام لبست دريس بيج سمبل وحلو اوي وادم لبس بدله سوده وراحو للبنات
ميرا ابتسمت/ايه دا ايه الحلاوه والشياكه دي كلها
فريده ابتسمت/رايحين ع فين كدا
احلام ابتسمت/هنتعشي برا
غزل بابتسامه/ايوا ي عم الله يسهلكم
ورولا ابتسمت لما عرفت انها هتاخد راحتها ف الحفله لان ادم واحلام هيتأخرو برا
ادم/ياسين فين
فريده/ف اوضته
ادم/ماشي ..ياريت تفضلو عاقلين وب أدبكم لحد ما نرجع ..و رولا متتأخريش ب الكافيه كدا كدا اخرك 10 انتي عارفه
رولا ابتسمت/حاضر dadd متقلقش
احلام ابتسمت/يلا باي
البنات/باي
وادم واحلام طلعو برا البيت
رولا/انا هقوم اغير هدومي
وطلعت غرفتها بسرعه
و غزل اتنهدت
فريده /اطلعي شوفي ياسين بدل ما انتي قاعده بتاكلي ف نفسك كدا
غزل /اطلع بجد؟ يعني مش هيهب فيا وهو متعصب كدا؟
فريده/انتي عارفه ان ياسين ميهونش عليه يعملك حاجه حتي وهو متعصب متخافيش
غزل/طيب هطلع اشوفه
فريده ابتسمت/اطلعي ي اختي
عند ادم واحلام طلعو من البيت ورايحين للعربيه
سيف قام وقف لما شافهم
احلام ابتسمت/ازيك ي سيف
سيف ب احترام/اهلا ب حضرتك ي احلام هانم
احلام/اهلا بيك
سيف/انا كنت عايز اعتزر ع ال عملته امبارح مقصدتش ابدا اخضكم او اعمل مشاكل
احلام ابتسمت/ولا يهمك خالص دا مجرد سوء تفاهم متعتذرش
سيف ابتسم/شكرا
ادم ل احلام/اركبي العربيه وانا هتكلم معاه دقيقتين واجيلك
احلام/ماشي ي حبيبي.
ادم فتح لها باب العربيه واحلام ركبت وادم قفل الباب
ادم ل سيف/كلت؟
سيف/اه بعتولي الاكل من شويه وكلت متشكر
ادم/ماشي.. انا خارج ساعتين كدا وراجع ..طبعا انت مش هتتحرك من مكانك لحد ما ارجع...كدا كدا قولت للامن انت ممنوع خروجك
سيف فرح لان عنده فرصه يخرج يقابل احمد النهارده بس مش عارف هيهرب من الأمن ازاي
سيف/اكيد طبعا يعني هخرج اروح فين..انا قاعد هنا
ادم/تمام
وطلع موبايل جديد من جيبه
ادم/خد الموبايل دا..مفهوش غير رقمي علشان لو حبيت اتواصل معاك وانا ف الشغل أو برا البيت..وكمان سجلت عليه رقم اخواتك لانهم اتصلو بيك امبارح
سيف/تمام متشكر
في الكومباوند
في غرفه ياسين
قاعد ف البلكونه ع الطربيزه و بيشرب قهوه وسرحان وباب غرفته متوارب
غزل دخلت الغرفه وراحت له
غزل /احممم
ياسين بصلها
غزل سحبت كرسي وقعدت
ياسين/خير ؟
غزل ابتسمت/لاء مفيش قلت اجي اقعد معاك شويه ..انت عامل اي ؟
ياسين ببرود /انا تمام
غزل/غريبه يعني مخرجتش تسهر مع صحابك النهارده
ياسين/مليش مزاج
غزل /ياسين هو انت بتتكلم معايا كدة ليه الله
ياسين مسك دراعها ب ايده وقال بعصبيه/امال عيزاني اتكلم معاكي ازاي بعد ما رحت اخدك من الزفت المدرج لقيتك واقفه مع راجل غريب وبتتكلمو ومبسوطين..مين اصلا الزفت السئيل ال ملوش منظر دا .. لاء وجايه تقولي لي من حقي احب واعمل ال انا عيزاه...انامسكت نفسي ب العافيه علشان مكسرش عضمه لاني اتعلمت الدرس لما زعلت ميرا بس الموضوع دا لو اتكرر تاني والله ما يفرق معايا حاجه واهد الجامعه دي فوق دماغك
غزل ابتسمت ومبسوطه من غيرته عليها
غزل /ايوا من حقي
ياسين بعصبيه/ياك كسر حُقك
غزل ابتسمت/طيب اهدي طيب
ياسين بيحاول يسيطر ع غضبه/غزل قومي من وشي امشي يلا
غزل ابتسمت/لاء انا مش عايزه امشي ..وبعدين قلت لك اهدي اي كل العصبيه دي
ياسين مسك ال كرسي ال هي قاعده عليه وشده وقربه منه وغزل بقت قريبه منه وسرحت ف عنيه
ياسين بحزم /قسما بالله لو اتكررت تاني ي غزل ل اطربق الكليه فوق دماغك ودماغه ..مشفكيش واقفه مع الواد ال ملزق دا تاني ..ولا حتي مع اي زفت واحد غريب ..واتفضلي امسحي رقمه
غزل كانت ف عالم تاني وسرحانه ف قربه الزايد منها و عيونه ال سرحت فيها و غيرته الحلوه اوي عليها
ياسين/مفهوم ولا لاء
غزل انتبهت وبعدت عنه/احم ...لاء ع فكره انا براحتي اعمل ال انا عيزاه مش من حقك تتدخل..ومش همسح حاجه
ياسين/لاء من حقي ومش عايز كلام ف الموضوع دا كتير ..يلا امسحي الرقم ومش هعيد كلامي تاني
غزل بغيظ وعيند ربعت ايدها/مش همسحه
ياسين بصلها بغضب
غزل /طيب خلاص حاضر
وفتحت موبايلها ومسحت رقم اسلام
غزل /يارب تكون مرتاح كدا .. انا غلطانه اني جيت اتكلم معاك ..انا مروحه
وقامت
ياسين اتنهد وحاول يهدي
ياسين/تعالي اقعدي
غزل قعدت تاني
ياسين/انا اسف ..علشان عليت صوتي عليكي .حقك عليا
غزل ابتسمت
غزل/و دراعي وجعني برضو ع فكره انت مسكته جامد
ياسين مسك ايدها وباسها
ياسين/انا اسف
غزل ابتسمت وقلبها دق بسرعه
ياسين/لسه زعلانه مني؟
غزل ابتسمت/لاء مش زعلانه
ياسين ابتسم
عند سيف ف الاوضه
دخل وقفل الباب وجاب ورقه من الدرج كان كاتب فيها رقم أحمد ل حسن الحظ
واتصل بيه
احمد رد/الو
سيف/انا سيف
احمد بيحاول يعلي صوته/انت فين ي ابني هو احنا مش كنا المفروض نتقابل من الصبح
سيف/معرفتش .بس انا لازم اقابلك دلوقتي ضروري
...انت ايه الدوشه ال عندك دي
احمد/ف كافيه ***في حفله ل مغني هنا واحنا جايين نقابل المغني نعمل معاه صفقه علشان أماكن السهر بتاعتنا
سيف/دا جمب الكومباوند ال انا في..دا كدا حلو اوي اوي..خليك عندك انا هجيلك حالا
احمد/ماشي مستنيك
وقفل معاه واتصل ب حبيبه اخته يتطمن عليها
حبيبه/الو
سيف/حبيبه انا سيف
حبيبه/سيف قلقتنا عليك بقالك يومين قافل موبايلك
سيف/حقكم عليا انشغلت كدا ف كام حاجه وغيرت رقمي كمان..انتو عاملين ايه
حبيبه ابتسمت/بخير الحمد لله و ال ٦٠ الف وصلو امبارح شكرا ي حبيبي
سيف ف سره/اه يبقي سامر بعتهم ..كتر خيره
عند رولا
غيرت هدومها ل بلوزه كات زيتي و بنطلون سكيني جينز
وواقفه ف الدريسنج تختار عقد الماظ من بتوعها
ميرا من وراها/بتعملي ايه
رولا بخضه/ميرا ..خضتيني ي ز_فته
ميرا/حضرتك رايحه فين
رولا وهي بتبص ع عقد/ما قولت رايحه اشرب حاجه ف كافيه
ميرا /اه وانا صدقتك فعلا..رايحه تقعدي ف كافيه عادي ب عقد تمنه قد كليتك .هتقولي الحقيقه ولا اروح اقول لياسين وفريده
رولا اتنهدت وبصت لها/هقولك بس مش هتقولي ل حد
ميرا/ها
رولا/الكافيه هيبقي موجود في مغني وفي حفله .هنروح انا وغزل و هايدي ويحيي
ميرا حطت ايدها ع فمها بصدمه/ ومن غيري؟
رولا/علشان عارفه انك مبتحبيش المغني دا..هعوضك ف مره تانيه لو مغني بتحبيه
وانتي طبعا اختي حبيبتي هتداري عني لو اتأخرت..هتقولي ل ياسين وفريده اني رجعت قبل ١٠ و ف اوضتي عادي
ميرا رفعت كتفها/لا مليش دعوه افرض بابيتو رجع بدري وسأل عنك
رولا/مش هيرجع بدري انتي عارفه لما بيخرج هو ومامي بيتأخرو ..وافقي بقي ي ميرا دا انا ياما غطيت عنك
ميرا/اوك بس بشرط
رولا بتلبس العقد/خير
ميرا ابتسمت/هاخد البلوزه بتاعتك ال اشترتيها الاسبوع ال فات
رولا/الله الله ..وليه بقي ان شاءالله
ميرا/خلاص هروح اقول ل ياسو
وكانت هتمشي رولا مسكتها بسرعه
رولا/خلاص خلاص ي جز_مه..خديها
ميرا بابتسامه/ميرسي
عند سيف ف الاوضه
غير هدومه ل بنطلون اسود وقميص ابيض ومشمر ايد القميص و فاتح القميص زرارين
وطلع برا الاوضه ومش عارف يهرب ازاي من الأمن ولا عارف هيركب تاكسي ازاي وادم واخد محفظته
سيف/وبعدين بقي
سيف اتصل ب سامر ال سجل رقمه من شويه عايز يشكره ع الفلوس
سامر/الو مين
سيف/انا سيف
سامر بابتسامه/حبيب قلبي حاولت اكلمك كتير مردتش..عامل ايه
سيف/انا زي الفل والله
سامر/كنت عايز اعتذر منك ملحقتش اجمع لك ل ٦٠ الف من يومين لما طلبت مني بس دلوقتي جمعتهم اهو ابعتهم ع حساب مين
سيف/ايه؟انا لسه مكلم حبيبه وقايله ان الفلوس وصلت لها؟ متأكد مش انت ال بعت
سامر/ايوا ي ابني متأكد
ياسين وصل الكومباوند ونزل من عربيته بعد ما وصل غزل
وبيتكلم ف التليفون
ياسين/يعم انا معنديش مشكله اعمل معاكم السباق بس عربيتي مش مخصصه ل السباق يعني الموضوع هيبقي غير عادل
سيف /هكلمك بعدين
وقفل مع سامر و راح ل ياسين بعد ما سمع اخر كام جمله
ياسين/طيب خلاص...هكلمك بعدين ماشي
وقفل المكالمه
سيف /ايه الاخبار ي باشا
ياسين /انا زي الفل انت عامل ايه
سيف ابتسم/انا الحمد لله..كنت عايز اعتذر ع ال حصل مني امبارح ف بيتكم وبهدلت صاحبك برضو..يعني حصل سوء تفاهم
ياسين/لا ولا يهمك ..انا بعد كدا عرفت انك مش غريب وبباك معرفه قديمه مع ادم ف تمام يعني ولا يهمك
سيف ابتسم /تمام.. بالمناسبه انا اعرف صاحب معرض عربيات عنده عربيات للسباق.لو عايزني اكلمهولك يظبلك واحده
ياسين/بجد والله
سيف/اه يعم سهله
ياسين ابتسم/طب حلو اوي..هستني منك الخدمه دي
بكره
سيف/بس بشرط
ياسين/انا عارف ان محدش بيعمل خير ف الزمن دا من غير مقابل.. اتفضل قول
سيف/عايز استلف منك فلوس تاكسي دلوقتي ..خارج ضروري ونسيت اسحب فلوس..وبباك خرج من البيت.. انت الوحيد ال اقدر اطلب منه دلوقتي
ياسين ابتسم/بس كدا؟يعم سهله..ولو عايزني اوصلك انا تمام
سيف ابتسم/لاء الفلوس كفايه متشكر
ياسين طلع من جيبه محفظته واعطي سيف فلوس
سيف/شكرا ي صاحبي..العربيه مني ليك بكره و الفلوس دي اكيد هرجعهالك
ياسين /عيب ملوش لزوم الكلام دا
سيف ابتسم/ماشي..بس انت مشوفتنيش النهارده
ياسين /انت مين اصلا؟
سيف ضحك/جدع
وياسين ابتسم ودخل البيت
وسيف حط الفلوس ف جيبه
سيف /ايه الحاله ال انا وصلت لها دي بقيت بشحت فلوس من شباب أصغر مني
وبص ع الأمن
سيف/ههرب منهم ازاي دول
وبص لقي رولا بتطلع من البيت
وراحت ركبت عربيتها وكمال ركب يوصلها
سيف وطي شويه وفضل يمشي جمب العربيات المركونه ويستخبي وراها لحد ما وصل ل عربيه رولا
وكمال بدأ يسوق و سيف بدأ يمشي جمب العربيه براحه لحد ما عدي من البوابه من غير ما الامن ياخد باله