رواية مغامرات عائليه الفصل السادس عشر 16 ج 2 بقلم همسه كاتبه
حازم : وفري وقتك يا مدام دينا .. انا مش مهتم اعرف حاجة
دينا بغضب : ما تقولش مدام دي
حازم : ايه التواضع ده ؟ اومال اقولك دينا حاف عادي ؟
دينا : لا طبعا هو انت تعرفني عشان تناديني باسمي ؟! قول دينا هانم او مدموزيل دينا و عندك كمان استاذة دينا هتبقى تحفة
حازم : على حد علمي ان مكتوب كتابك يعني مدام مش كدة ؟
دينا : و انت مالك ؟ فاكرني يعني جاية اشقطك و لا معجبة بيك ؟! لا يا اخويا انا بس بعمل خير
حازم : ما تحترمي نفسك يا بت .. ايه الكلام ده ؟!
دينا : خلينا في المهم .. انا عايزة اكلمك شوية بخصوص يمنى هانم
حازم : و انا قولت مش مهتم اعرف
دينا بحدة : بقولك ايه انا مصدعة و قرفانة من الي شوفته الصبح … لو تعبني زي زياد و غادة اقسم بالله لاسيب عليك البت حلا
حازم : مين حلا ؟ اه بتاعة حلة المحشي مش كدة
دينا : ايوة .. بطل برود و سيبني اتكلم انا بقالي فترة مستنية اشوفك و اخلص من ام الحوار ده
حازم : لخصي من فضلك ورايا شغل
دينا : سبحان الله مغرور زي صاحبك .. المهم يمنى عندها حق بالي قالته و هي ما غلطتش و لا خانتك زي ما انت فهمت
حازم : و انتي ايه علاقتك بالحكاية دي ؟ الكلام ده قديم جدا و مش معنى انك صاحبة ليلة بنتي يبقى تحشري نفسك بحياتنا
دينا بنفاذ صبر : زياااااااااد
اتى زياد اليها بسرعة و قال : في ايه ؟
دينا : اقعد مع صاحبك و فهمه الكلام الي قولتهولك
زياد : حازم من فضلك اسمعها ممكن تغير رأيك
حازم : زياد لو سمحت انا مش عايز نفضل نعيد نفس الاسطوانة .. انا همشي
التفت نحو ليلة التي تقف مع مصطفى و تضحك
حازم : ليلة
ركضت باتجاهه و قالت : ايوة يا بابي
حازم : امشي نروح يلا
نظرت نحو دينا و قالت : انتو اتكلمتو ؟
دينا بخفوت : مش عايز يسمعني اصلا
ليلة برجاء : بابي سيبنا هنا شوية عشان خاطري
حازم : لا كدة هنتأخر اوي
دينا : بقولك ايه حلة المحشي زي ما هي تعالو معانا للبيت و نتعشى مع بعض و بعدها تمشو براحتكم
ليلة : ايوة و النبي يا بابي .. بقالي كتير ما اكلتش محشي مصري
حازم : لما تروحي لمامتك هي تعملهولك
دينا : طب ما تروح انت و تسيب ليلة عندنا
حازم : و انا اروح اعمل ايه يعني ؟! هيا الي عايزة تشوف مامتها
زياد : انت هتكسف دينا يا حازم ؟! كام مرة قولتلك ان دي اختي و الي زعلها يزعلني ؟ يلا بينا ع البيت ناكل و نسهر و بكرا تبقى تروح مصر و لا ايه يا ليلة
ليلة : صح .. بعدين انت وعدتني يا بابي انك هتاخدني لبيتهم و لغاية دلوقتي ما روحتش
حازم : قولنا هنروح بس يوم فرح زياد مش دلوقتي
ليلة : طب انا عيني بالمحشي الي معاهم .. اخليها بنفسي يعني ؟
دينا : لا دي عبية بحقنا .. امشي يا بت هتاكلي و بعدين تتكلو على الله
حازم : لا مش هنروح لحتة
زياد : عيب يا حازم تكسفنا .. انت عارف عادتنا بتقول الضيف ليه تلات ايام .. اقسم بالله لو ما مشيت معنا هزعل منك جامد
حازم : ما تتفلق انا مالي
اتاهم فارس و كان يمسك بطبق صغير و يأكل من المحشي
فارس : انتو بتعملو ايه كل ده ؟ مزتي كلت وش الحلة بالعربية حرام عليكو
ليلة ببكاء : لاااااا … بابي عايزة اكل محشي دلوقتي حالا
حازم بصدمة : كل ده عشان المحشي يا ليلة ؟
ليلة : اه انا لو ما اكلتش منه هخاصمك و مش هتكلم معاك ابدا
حازم بنفخ : طيب هنروح نص ساعة و نمشي
ليلة بحماس : اوك
*******************
في البيت
كانت فريدة تحمل اسر و تهز به
فريدة : اصبر بس ينام الواد و انا اوريك هعمل بيك ايه يا بتاع الستات
تميم : ليييه هو انا عملت حاجة ؟!
فريدة : خلاص ما انت بقيت منحرف … و انا عمالة اقول ماله الراجل مش طايق البيت و عايز يفضل بالمستشفى .. ده كان عشان تروح تقعد مع الممرضات بتوعك
تميم : حرام عليكي ده ظلم و افترا … مش كنتي بتقولي على غادة اوفر ؟ ايه الي خلاكي تبقى زيها زمان و انيل منها كمان
فريدة : عشان انتو الرجالة بطبعكم خونة .. اول ما الواحد يشوف مراته خلفت يسيبها و عينه تزوغ على غيرها
تميم : استغفر الله العظيم .. انتي ايه الي حصلك يا فريدة و الله ما كنتيش كدة ابدا .. ده انا بقول عليكي العاقلة
فريدة : يعني دلوقتي شايفني مجنونة ؟!!!
تميم : اه .. انا لسا جايبلك ورد امبارح و قولت اخيرا اتصالحنا .. ليه مصممة تطفشيني من عندك .. هتتبسطي يعني لما اتقمص و اروح ادور على وحدة تطبطب عليا ؟!
فريدة بغضب : انا هطبطب عليك بشاكوش دلوقتي بس اصبر انيم ده الاول
تميم بضحك : بهزر يا بت .. و انا فين هلاقي وحدة بحلاوتك و رقتك دي
فريدة : اكدب اكدب منا الهبلة الي هتصدقك
تميم : اكدب ؟! من امته و انا بكدب عليكي يا فوفتي ؟
فريدة : من يوما خلفت الواد ده و انا حالي اتقلب و مبقتش عاجبة حد
تميم : مين قالك كدة ؟!!!!
فريدة : جدتك
تميم : و هيا زيزي يتاخد بكلامها ؟! دي بتقول اي كلام و خلاص .. و اصلا هي كانت بتعاملك وحش عشان خالتك بس انتي شوفتيها لما مشيت حضنتك ازاي
فريدة : بس قالت على كل بنات العيلة حلوين ما عدا انا .. حتى كارما اختي قالت عليها حلوة مع ان خالتنا واحدة .. و برضو قالتلي انك هتخوني و فعلا بعدها على طول شوفت صورك مع الرقاصة
تميم : طب هاتي الواد من ايدك و اقعدي استريحي
فريدة و هي تعطيه اسر : امشي بالراحة
تميم : حاضر .. حبيبتي ممكن ما تقفشيش بقا و تسيبينا مبسوطين
فريدة : يعني انا دلوقتي بقيت نكدية و بعكنن عليك ؟!
تميم : لا حول و لا قوة الا بالله .. انتي مالك بتقفشي بالكلمة و بتعملي عليها حوار ؟! .. كفاية يا فريدة اقسم بالله ما في احلى و لا احسن منك بالدنيا دي .. و رب الكعبة انك مالية عينيا و مستحيل ابص لغيرك
فريدة بابتسامة : لا طالما حلفت تبقى بتقول الحقيقة
تميم : و الله عمري ما كدبت عليكي .. انتي نصي الحلو يا بت
فريدة : بس برضو كنت بتسبل للبنت المسهوكة و خايف على مشاعرها مش كدة ؟!
تميم : يا بنتي دي ممرضة و بتشوف شغلها .. حرام عليكي تتهميها كدة .. و بعدين انتي عارفاني كويس مليش بالحوارات دي لو كنت عايز اعمل حاجة كنت عملتها من زمان
فريدة : جرب بس و شوف هعمل بيك ايه
تميم : طب بقولك ايه الواد ده نام و بيشخر .. ما تيجي نكمل كلامنا بالسرير
فريدة : سافل هقول ايه
تميم : ما انتي مراتي يا بت فيها ايه لو عملنا شوية جو رومانسي كدة و فكينا شوية
خبط الباب و صدر صوت كارما : فريدة جدو بيقول تعالو اتعشو معانا
تميم : يا ربي على الفصلان ده انا لسا بقول عايز جو رومانسي
فريدة بصوت عالي : كارما قوليله اتعشينا و هنام
تميم بغمزة : ايه الشقاوة الي حلت عليكي دي يا بت
فريدة بخجل : اتلم
********************
ليلة : انتي متأكدة انه هيسمع منك ؟!
دينا : هيسمع غصب عنه .. انا مش بدخل بحاجة الا اكملها
حلا : دي بقى ملاك الرحمة بتاعنا
ليلة : ما هيا ملاك فعلا .. محدش بيفكر كدة دلوقتي كل الناس بقت انانية
غادة : حلا كلي بالراحة بهدلتي هدومك
حلا : انتي هتبصيلي بطبقي يا بت .. اتلمي
ليلة : طب احنا ليه قاعدين بالمطبخ ؟ ليه ما نقعد معاهم ؟
حلا : الكبار طلبو كدة
ليلة : يعني عادتكم ان الستات لوحدهم و الرجالة لوحدهم ؟
حلا بضحك : لا .. عادة بناكل كلنا مع بعض بس واضح انهم خايفين لاحسن باباكي يشقط عمتو خولة و لا حاجة .. اصل هما نفس السن
دينا : بطلي سفالة و اتلمي
دلفت لارا و كارما
لارا : مش لو قعدنا معاهم احسن ؟
حلا : ليه ؟ عايزة تغري الراجل بالصفار بتاعك ده ؟
لارا : نينيني .. خليكي بنفسك
كارما : فريدة مش عايزة تنزل .. ما تيجو نخرج للجنينة
حلا : شوية و هنخرج كلنا
دينا : و انا ازاي هقعد اكلم حازم ده
لارا : و تكلميه ليه ان شاء الله ؟
دينا : عشان اصلحه على مراته .. ليكي شوق بحاجة ؟!
لارا : و انتي ايه علاقتك بالحكاية دي … ما تسيبه براحته
دينا : دي لارا الصفرا يا ليلة هتتعودي عليها
لارا بحدة : اتلمي يا دينا و ما تغلطيش
دينا : و الله ما غلطتش ما انتي صفرا اهو مش شعرك اصفر ؟ تبقى صفرا فعلا
لارا بغيظ : اسمها شقرا يا مثقفة
دينا بضحك : الاتنين واحد … بصي يا ليلة دي ممكن تعتبريها الحقنة الي هنا بعد حلا .. دايما مش عاجبها حد و مش طايقانا .. يعني ما تتخيليش انها ممكن تبقى صاحبتك
لارا بغضب : انتي بتتكلمي عليا و قدامي كمان ؟! و الله لاوريكي همل بيكي ايه
دينا : اممم و ورثت الكلمة دي من زيزي حبيبة قلبها
ليلة : مين زيزي ؟!
دينا : جدة جوزك المستقبلي
ليلة بضحكة : ما تقوليش كدة .. عيب
كارما : على فكرة انتي مرتبطة بارخم واحد بالعيلة بعد فارس
ليلة بضحك : هو ليه حلا و فارس دول دايما اون توب في كل حاجة
دينا : عشان هما وش المصايب بالعيلة دايما .. انا هطلع اشوف باباكي
خرجت دينا للحديقة
حلا : يا بنات انا حاسة ان المسؤولية زادت اوي عليا
غادة : مسؤولية ايه ؟!
حلا : بقيت خالة .. يعني لازم اشيل و اطبطب و اغير بامبرز .. يلهوي انا مليش بالجو ده
غادة : ملكيش بالجو ده ؟! … حبيبتي ده انتي شوية و هتتجوزي و يمكن تحملي على طول و تشيلي عيالك انتي
حلا بفزع : لاااا .. انا ما صدقت حبيبة تولد … دي كل العيلة كانت حامل معاها و تعبتنا كلنا
لارا : ما انتو ما بتعملوش حاجة غير انكم تجاروها على دلعها ده … ديما بتعمل المصيبة و احنا الي بنلبس بالاخر
حلا : انتي ايه الي حشرك ؟! اختي تدلع براحتها انتي مصرومة منها ليه ؟!
ليلة : بس واضح ان حبيبة متغيرة مش كدة ؟
حلا : متغيرة من انهي ناحية ؟
ليلة : يعني زمان كنت حاساها مغرورة شوية
لارا : مهي مغرورة لغاية دلوقتي بس عشان لسا والده فمش باين عليها بكرا تشوفي السهوكة على اصولها
حلا : سامحني يا جدو .. مش هقدر اوفي بوعدي
كارما : هتعملي ايييه ؟!
لم تمر ثواني الا و كانت حلا قد امسكت لارا من شعرها و بطحتها ارضا
لارا بصراخ : اعااااااا يا ماماااا
غادة و هي تدفع حلا : بس يا حلا حرام عليكي
لارا : سيبي شعري اااااه
حلا : اسيب شعرك يا مقملة يا ام لسان .. و الله لاعلملك على خدك ده عشان تفضلي تفتكريني
و هجمت على خدها و عضتها بقوة فصرخت بصوت علي جدا
دلفت خديجة بسرعة و قالت بفزع : في ايييه ؟!!!!
حلا و هي تهندم ملابسها : بنتك غلطت و انا ربيتها .. و انا مستعدة لاي عقوبة بقا
لارا ببكاء : دي ضربتني يماماااا .. بصي عضتني ازاي
خديجة بصدمة : انتي ازاي تمدي ايدك عليها ؟ انتي اتجننتي ؟!
حلا : مهيا الي مش عايزة تتعدل .. رجعت تغلط بحبيبة تاني
خديجة : معقولة يا لارا ؟!
لارا : انا مقولتش حاجة .. دينا بقالها ساعة بتغلط بيا و ما ضربتهاش زي المتوحشة دي
خديجة بغضب : انتي مش هتتعدلي يعني ؟! قولنا اخيرا البنت عقلت و ركزت بنفسها بس الواضح انك عايزة تربية من اول و جديد .. حتى و البنت بالمستشفى ما سلمتش من لسانك .. ع الاقل احترمي ان في ضيوف في البيت مش ضروري توريهم سوادك كله
لارا ببكاء : ما ده الي متوقعاه يعني .. حتى لو موتوني هتقولي انا السبب
تركتهم و ذهبت لاوضتها و تبعتها كارما
خديجة : برضو لو غلطت يا حلا مينفعش تضربيها لازم جيتي قولتيلي او قولتي لجدك يعاقبها.. دي مش اول مرة تمدي ايدك عليها
حلا : و الله هي الي نرفزتني
خديجة : يا رب صبرني على العيلة دي يا رب .. جاتكم وكسة
تركتهم و خرجت هي ايضا
ليلة : اوه ماي جاد .. انتي يتخاف منك بجد
حلا بخبث : اممم عشان كدة احسبي حساب لاي كلمة هتقوليها على سلفتك المستقبلية يا شاطرة .. لو هتتشيطني معاها هتشيطن معاكي و لو اتحربقتي عليها هتحربق عليكي خودي بالك يا عروسة
ليلة بعدم استعياب : يعني ايه ؟! مفهمتش ولا كلمة من الي قولتيه
غادة بنفخ : يعني هتجيبك من شعرك لو زعلتي حبيبة اختها .. دي بقا وحش العيلة
ليلة بخوف : لا لا مش هزعلها ابدا
****************
في الحديقة الخارجية
دينا : ايه ده انتو قاعدين هنا من بدري ؟
زياد : اه
دينا بغمزة : ها وصلت لايه ؟
زياد بابتسامة : حازم هيروح مصر لوحده
دينا : يا الف مبروك .. يعني ليلة هتفضل عندنا
حازم : اه دي امانة برقبتك انتي و زياد .. لو حصلها اي حاجة انتو الي هتتحاسبو قدامي
دينا بسخرية : يلهوي هموت من الخضة .. ده بدل ما تقولنا كتر خيركم ؟
حازم : مش لما اتكلم مع يمنى الاول و افهم الحكاية ؟!
دينا : اقسم بالله لو كنت مكانها عمري ما هرجعلك .. ده انت سبتها كل ده متعلقة عشان خاطر سوء تفاهم
زياد : دينا اسكتي لو سمحتي .. دي حياتهم الخاصة و هما حرين بيها
يزن من وراهم : مساء الخير
زياد : اهلا زوزو .. انت كنت فين كل ده ؟؟
يزن ببرود : كان عندي شغل
دينا : كنت لسا هكلمك و ..
يزن بمقاطعة : ممكن نتملم على جنب لوحدنا
دينا باستغراب : اوك .. عن اذنكم
قامت و ذهبت معه للحديقة الخلفية
زياد : شكله متعصب
حازم باستغراب : ليه ؟
زياد : معرفش .. يمكن حصل بينهم مشكلة و لا حاجة
حازم : هيا الي اسمها دينا دي هتغلب معاه يعني ؟ دي عاملة نفسها مصلحة اجتماعية
زياد : دينا الملاك الحارس بتاع البيت ده .. بنت جدعة و بمية راجل .. اتجدعنت معانا كلنا و الله
حازم : باين عليها من غير ما تقول .. عشان كدة سبت ليلة تصاحبها يمكن تتعلم منها
في الحديقة الخلفية
دينا : في ايه ؟ مالك بتطلع شرار من عينيك ؟
يزن بحدة : ممكن افهم بتعملي ايه معاهم برا ؟!
دينا : ما انت عارف اني مستنية حازم ده عشان ..
يزن بمقاطعة : عشان تصلحيه على مراته .. عارفين بس ده مش معناه اني اجي اشوفك قاعدة معاهم لوحدك
دينا بحماس : وااااو .. دي غيرة ؟ بتغير عليا يحبيبي ؟!
يزن بغضب : انا بتكلم بجد
دينا : فيها ايه يا اسطا ده راجل قد ابويا و بصلحه على مراته عشان خاطر الغلبانة بنته
يزن : و انا الكلام ده مش عاجبني يا دينا
دينا : و مالك بتشد على اسمي و انت بتنطقه ؟ ده تهديد ؟
يزن : ايوة تهديد و لو ما اتعدلتيش هتشوفي الوش التاني
دينا بدلع : و اهون عليك يا حبيبي ؟!
يزن : بطلي سهوكة و اقفي عدل
دينا : في اييه ؟! هما مراتات باباك سخنوك عيليا و لا ايه ؟
يزن : هما فاضين ؟؟ البركة بالحجة زيزي علمتهم حاجات عمري ما توقعتها
دينا : علمتهم ايه ؟!
يزن : تخيلي روحت البيت لقيتهم حاطين على وشوشهم ماسك زبادي بالقهوة
دينا بضحك : يا انهار اسود
يزن : و نازلين دلع على الحج بطريقة انا عمري ما شوفتها بالكون كله
دينا : زيزي دي تخرب بلد بحالها .. سيبك منها و خليك معايا .. احنا بقالنا كتير ما قعدناش مع بعض
يزن بابتسامة : منا كنت معاكي امبارح لحقت اوحشك ؟ .. اه صحيح طمنيني على مرات اوس و البيبي
دينا : ما تفكرنيش اليوم ده مش هينمحي من ذاكرتي ابدا
يزن باستغراب : ليه ؟ حصل حاجة ؟
دينا : لا بس كانت تجربة جديدة عليا … بص هيا اوك الولادة صعبة اوي بس لما شوفت النون صغير كدة و كيوت خالص حسيت قد ايه يستاهل التعب ده
يزن بابتسامة : ربنا يباركلهم بيه
دينا : على فكرة انا لسا زعلانة و متدايقة و هعمل حاجات جديدة و ادبسك معايا عشان تتعاقب
يزن بصدمة : ليييه هو انا عملتلك حاجة ؟!
دينا : اه عملت .. انت مشاعرك ناحيتي قلت مش كدة ؟
يزن : ايه الكلام الاهبل ده ؟! انتي عارفة اني بعشقك و مش بقدر اعيش من غيرك
دينا : بس بقالك كتير مش بتسأل عليا و لا بتجيبلي كتب جديدة
يزن : و الله انشغلت شوية بالشغل مش قصدي ابعد يعني و بعدين انا كل يوم بكلمك حتى و انا بالشغل
دينا : و ده شيء كافي بالنسبالك ؟!
يزن : طب بقولك ايه .. طالما الدنيا حلوة هنا و كله رايق و فرحانين بالبيبي الجديد ما تيجي نقترح عليهم نتجوز الفترة دي و نبقى مع بعض بقا لاخر العمر
دينا : الفترة دي عندنا فرحين يعني مش هيقبلو يبقو تلاتة و بعدين ماما عايزة تجهز لفرحي براحتها
يزن : ما كدة هنفضل بعاد عن بعض و بعدين خطوبتنا خدت وقت كتير و الكل بقا يسأل على ميعاد الفرح
دينا : معلش نخلص الاول من فرح زياد و غادة و بعدين نكلمهم .. تعالا نقعد معاهم يلا
يزن بحدة : و الله ؟! انتي صاحية لغاية الان ليه ؟! اطلعي نامي يلا
دينا : ما كلهم سهرانين يا اسطا
يزن : انتي مش هتروحي لحبيبة بكرا ؟! يلا اطلعي نامي مش هعيدها كتير
دينا : اممم انت بتغير عليا يعني
يزن : اكيد مش مراتي ؟ لازم اغير
دينا بتوهان : لا انا ما استحملش الكلام الحلو ده
ابتسم و احاط خصرها بيداه .. اقترب منها اكثر و هي تائهة في حضنه
: احم احم
دينا بفزع : اعااااا
ابتعدت عنه و التفتت نحو الصوت وجدت حلا تقف و تبتسم بخبث
دينا : يخربيتك خضيتني
يزن باحراج : انا .. انا همشي .. تصبحي على خير
ذهب باتجاه الخارج
دينا : ضروري تقطعي عليا يا واطية ؟!
حلا بخبث : ايه ؟ جيت بالحتة المهمة مش كدة ؟
دينا : طب اتلمي و خلي الطابق مستور منا ياما قافشاكي مع فارس
حلا : و الله احنا كنا بمصر و مفيش حد حوالينا غيرك .. بس هنا و ع العلن دي تبقى قلة ادب
دينا : شوفو مين بيتكلم .. انا هروح اتخمد
حلا : و انا كمان امشي يلا
*******************
في اليوم التالي
دلفت فريدة لاوضة كارما و لم تجدها .. اتجهت لاوضة لارا و دلفت
فريدة : كارما ليه نايمة هنا ؟
غادة : معرفش لقيتها نايمة مكاني روحت نمت باوضة دينا و حلا …… يتبع