بقلم اسماعيل موسي
مجبتش شديد ليه معاك يا هانى؟
وقعونا فى كمين يا جدتى
كمين؟ امال انت كنت فاكر نفسك رايح فين؟ حفلة ولا خطوبه يا واد ولدى؟
رفع هانى جسده بآلم، معملناش حسابنا يا جدتى اتخدنا غدر
فين باقى الرجاله يا هانى؟
فرك هانى جبهته معرفش ياجدتى انا قدرت اهرب بطولى بالعافيه
تنهدت الجده عديله بأستياء، يعنى هربت وسبت رجالتك وراك يا هانى؟
كنا تلاته يا جدتى وكانو اكتر من عشره
المرجله مش بالعدد يا ولدى إلى يدير ضهره ويفكر في نفسه مينفعش يبقى قائد
كانت شيماء واقفه بتابع الكلام بصدمه، مش مصدقه ان عديله بتكلم هانى المصاب فى كتفه بالطريقه دى
الست دى مفيش فى قلبها رحمه ازاى بتعمل كده؟
هنادى / بنبره ممتعضة، باين عليه اتعود على عادات أهل مصر يا جدتى
ثم رقمت هانى بنظره صغيره، عوده لسه طرى
صرخ هانى بعصبية، اسكتى
انتى مين اصلا عشان تحسبينى؟
رفعت هنادى ايدها وقبل ما تتكلم عديله غمزتلها بعينها، يعنى اسكتى
لكن هنادى مقدرتش تقاوم الرغبه فى الكلام، لازم يعرف يا جدتى حجم الغلط إلى وقعنا فيه
الجحيم إلى فتح بابه وسابه وهرب، شديد كان فرصته الوحيده إلى هتحميه وتحمينا من الفضيحه
فضيحة ايه؟ صرخ هانى بعصبيه
هنادى بتحدى، شديد كان الشاهد الوحيد، القشه إلى هتنقذنا كلنا من سم فريده
قبل الجلسه العرفيه، شديد كان هو الحل
دلوقتى انت خاطف مراة ابن عمك واحنا متسترين عليك
انا محدش خطفنى، همست شيماء بصوت واطى
هانى انقذنى
استدارت هنادى فى مواجهة شيماء، ومين يثبت ده؟
كلامك ولا كلامه؟
اى حاجه تتقال دلوقتى ملهاش معنى
هانى خطفك وانتى عشيقته للآسف كلام فريده هيتصدق دلوقتى
طالما انت مش قد حاجه بتعملها ليه من الأول
حاول هانى ان ينهض، ان يدافع عن نفسه، لكن هنادى غادرت الغرفه وعلى وجهها استياء كل العالم.
هنعمل ايه دلوقتى؟
همست عديله، انت مش هتعمل حاجه، انا الى هعمل، شيماء هتتسلم لفريده
وانت هترجع لوالدك يتصرف معاك
لكن يا جدتى انتى كده بتتخلى عنى، بتتخلى عن الحق
البنت الغلبانه دى فريده كانت هنخلى واحد يغتصبها
على اخر عمرك هتسمحى بالحرام يا جدتى؟
لم ترد عديله، صكت الباب وسحبت شيماء فى ايدها
فى الغرفه الملحقه كان مرتضى راقد على السرير ينازع الموت
سألته عديله بعد ما سمعت إلى حصل
هانى وطى على رجل شديد يا مرتضى؟
عملها يا حجه، عملها ولو كنتى هناك كنتى شوفتى ضحك شديد ونظرة الشماته فى عيونة
عليه العوض همست عديله، الغلط غلطى، كنت، لازم اعمل حساب كده
هنسيب شديد يا حجه؟
فريده هتقلب الدنيا علينا يا مرتضى، دى مراة ابنها قدام الناس، هانى يعتبر خاطفها
خطفها يوم فرحها، كل إنسان لازم يتحمل نتيجة أفعاله
انا هسلم شيماء لفريده مفيش حل تانى، انا على اخر عمرى مش هقعد بين الرجال منكسة راسى اسمع اللوم والعتاب
فتحى ابعت مرسال لفريده انا عايزه اقابلها تانى خلينا نخلص المشكله قبل ما الموضوع ما يوسع والناس تعرف بيه
بعد يومين وفى نفس المكان
عديله / انا هسلمك شيماء يا فريده
فريده / اخيرا رجعتى لعقلك يا عديله؟
عديله / بس انا لى شرط
فريده شرط ايه؟
هانى يخرج من الموضوع مش عايزين فضايح قدام الناس
البت هترجعلك اعملى فيها إلى انتى عايزاه
قولى هربت قولى كانت عند اهلها، بس ولد عبد الكريم بره الموضوع.
ابتسمت فريده ،هو دا كل إلى همك؟ عبد الكريم وعياله
ابنى انا؟ حفيدك
ولا خالد مش حفيدك زى هانى؟
عديله هو دا كلامى يا فريده وانتى اختارى
احضر فتحى شيماء وهو يجرها من ايدها وحطها فى عربية فريده