بقلم اسماعيل موسي
الجده عديله وهى قاعده بتفكر ! فريده عارفه ان إلى حصل دا فضيحه وعار، ولو اتعملت قعده الناس كلها هتعرف بت مدكور كانت عايزه تعمل ايه
ونتفضح فى البلد، لكن هقول ايه؟ سلو عيلتهم، عيلة نج..س.ة
بت مدكور مش هتقرب من هنا غير لما توقعنا فى الغلط ويكون معاها ورقه تلعب بيها.
ثم نظرت تجاه الحقول الممتده، بنات الناس مش لعبه ولو سكت عن إلى حصل يبقى الموت احسن والى مترضهوش لنفسك مترضهوش للناس.
ياواد يا مرتضى؟
ابعت مرسال لفريده انا عايز اقابلها
حاضر يا جده
______
شديد / هتعملى ايه يا حجه؟
فريده / هقابلها
شديد / طيب ما تمنحينى الأذن اقتل هانى والبت دى ويبقى خلصنا كل حاجه؟
أطلقت فريده نظرة غضب، مينفعش دلوقتى، عديله وصلها الكلام، لو حصل حاجه الكل هيعرف اننا إلى ورا موتهم
وناويه تصرفي ازاى يا حجه؟ بتقولى عديله عارفه الحقيقه؟
بصت فريده على الشارع، على عبد الكريم الى قاعد وسط عياله بيدخن الشيشه
كلهم عايزين يحرمونى من حفيد، لكن بعينهم بدل الحفيد هيكون عندى خمسه
عديله، كل إلى معاها كلام، مجرد كلام يا شديد، مفيش شاهد معاها
انا هركبها الغلط، هى إلى جبته لنفسها، هصغرها قدام كل الناس لو ما سمعتش كلامى
همس شديد بغير تصديق /يعنى هتهدديها يا حجه
هعمل اكتر من كده لو مسمعتش كلامى هقلب حياتها جحيم
وهى مريضه اصلا مش هتستحمل
جهز العربيه، انا هقابلها برة البلد عند الغيط القديم
تقصدى غيط المرحوم ابوكى؟
فريده / ايوة، لازم عديله تفتكر كل الظلم إلى عيلتها عملته زمان
كانت عديله فى انتظارها لما فريده وصلت، واقفه بين رجلين مسلحين عديله شاورت للرجالة تبعد
اتكأت عديله على العصا وبصت بعنيها الضعيفه على فريده
لسه زى ما أنتى يا فريده متغيرتيش؟ كأنك لسه بنت صغيره مش بتهدى، الغيره والحقد مالى قلبك وروحك ؟
همست فريده /بتعلم منك يا عديله
انتى عارفه الشر منبعه فين؟
انتى وعيالك
تصعبت عديله /رغم كده وافقتى تتجوزى ابنى دون عن كل رجالة البلد؟
شديد لازم يموت يا فريده، هتسليمنى شديد والموضوع يخلص؟
اشعلت فريده سيجاره، وضحى كلامك يا عديله، انا مش فاهمه انتى بتلمحى لأيه؟
انتى عارفه اقصد ايه يا فريده، والى اتكرر مره مش هسمح بيه يتكرر تانى
ابنك.... وتركت عديله الكلمه معلقه
إلى بتعميه حرام وعار يا فريده ،بتخلى رجلك يدخل على مراة ابنك؟
زعقت فريده، ايه الهبل إلى انتى بتقوليه ده؟
انتى بتحاولى تدارى الفضيحه بكدبه اخترعتيها؟
فضيحة ايه يا فريده؟
حفيدك! ولد عبد الكريم إلى خطف بنتى يوم فرحها ويعالم عمل معاها ايه لحد دلوقتى
اقفلى فمك صرخت عديله
مش هسكت يا عديله، سلمينى الواد والبت خلينى انضف عارى، هانى لازم يموت ولا انتى نسيتى الدين والشرع والأصول
ولد شاب خطف واحده يوم جوازها هيكون ليه يعنى؟
يلعب معاها شطرنج؟
انا لحد دلوقتى قافله بقى وبدارى على الفضيحه لكن ورحمة ابويا إلى خطف مراة ابنى وعمل معاها الحرام لاقتله حتى لو قدام ابوه، ابنك عبد الكريم...
انا هديكى فرصه اسبوع يا عديله، اسبوع واحد وبعدها هقلب الدنيا كلها فوق دماغك وفوق دماغ ابنك عبد الكريم
غادرت سيارة فريده المكان وتركت عديله تضرب بعصاها الأرض
مرتضى؟
نعم يا جده
شدد الحراسه على الدار مش عايزه دبانه تدخل البلد من غير ما اعرف
فريده مش هتسكت، فريده مصدقه الكدبه إلى كدبتها وهتعمل اى حاجه عشان تنتقم.
مش معانا دليل وكلام فريده قدام الناس هيتصدق وانا ست كبيره مش عايزه راسى تتحط فى الأرض على اخر ايامى
ناويه تعملى ايه يا حجه؟
همست عديله، شديد لازم يجى هنا، الكلب ده لازم يعترف بكل حاجه
لكن شديد مش بيتحرك من جنب فريده، والرجالة بتاعته دايما معاه
لازم نتصرف يا مرتضى وبسرعه قبل الدنيا ما تتطربق
داخل الدار، هانى أعلن انه هو الى هيجيب شديد، المشكله إلى عملها لازم يحلها
ورغم كل المشاكل مفيش ولا شخص اتكلم عن همسات مرتضى فى ودن عديله
عن تسليم شيماء لفريده والخلاص من كل المشاكل دى كلها
انطلق هانى مع تلت رجاله ملثمين تجاه القاهره مسلحين بمسدسات متتبعين الطرق البعيده عن عيون الشرطه
ولما وصلو اختار هانى شقه قريبه من الحاره
وراقب حركات شديد وتحركاته لحد ما وصل اليوم الى شديد كان رايح مشوار مع رجالته بعيد عن الحاره