بقلم اسماعيل موسي
عبد الكريم / هو بيبص على الشرفه دا المحروص ظهر جنب مراته اهو
عبد الصمد! / انا مش قادر افهم يا ابويا، الراجل بتاعنا قال ان العروسه هربت، ومرة عمى جابت رجالتها وجت عندنا تتهم هانى انه خطف العروسه
كيف العروسه ظهرت كده مره واحده مش غريبه دى يا ابوى؟
عبد الكريم /والله وطلعت بتفكر يا واد يا عبد الصمد، الكرش إلى انت مربيه طلع بفايده، دعبس ورا الموضوع ده ولو طلع إلى فى بالى، البلد كلها لازم تعرف الفضيحه وهجيب راس فريده الأرض
وبعد أن انصرف عبد الصمد ربت عبد الكريم على كرشه المندلق وهمس، مش هجيب راسها الأرض
هجيبها تنحنى تحت رجلى وتطلب منى إلى رفضته
ساعتها هفكر براحتى وامدلها ايدى تبوسها، أخرجه صوت زوجته من صمته عندما دبت بقدمها وجسدها الضخم
انا رايحه السوق يا عبد الكريم عايز حاجه؟
خدى واحد من الرجاله معاكى يا شوقيه ؟
حاضر يا حج مش هتأخر، هرجع بسرعه
اختفت شوقيه داخل عربة حنتور وجواد يئن، وعبد الكريم يهمس فى سره ان شاله ما ترجعى يا شيخه ولا ابص خلقتك تانى، وعندما ظهرت فريده اردف بقا المهرة حره وانا نصيبى تور؟
______________
إيه الأخبار يا شديد؟ سألت فريده وهى بتضبط طرحتها
مفيش جديد يا حجه
فريده! / والولد هانى؟
شديد / قاعد فى البيت من لحظة ما وصل ومخرجش خالص
فريده / اموت واعرف بنت البلغه دى اختفت فين وهربت ازاى ومين ساعدها
يكونش ابوها متستر عليها؟
شديد / متستر عليها ايه بس يا حجه، دا عايز يقتلها وانا اتأكدت بنفسى ان شقته فاضيه
والرجالة مترشقين فى الشارع هناك فى كل حته..
شديد؟ الموضوع طول، والتمثليه مش هتستمر ممكن مشيره تفلت منها كلمه كده ولا كده
بقلك ايه؟
أأمرى يا حجه
هات مشيره خليها هنا، احبسها فى الحوش الورانى هى هتكلفنا ايه؟
آكله يعنى؟
اوامرك يا حجه
بصت فريده على البلكونه، ابنها خالد واقف جنب مراته إلى بتنشر الهدوم
اعمل اى حاجه يا موكوس، احضنها، أربت على كتفها
انت واقف بعيد عنها كده ليه ذى العسكرى الرخم؟
الشيشه يا حجه....
سيبها هنا يا مرسى وروح انت المشوار إلى قولتلك عليه
___________________
شيماء / هانى اتأخر وانا مش عارفه اعمل ايه يا رب
معدتى بتتقطع ومش معايا فلوس حتى
فتحت الشباك وبصت على الشارع
يعنى لو، نزلت دقيقه ولا دقيقتين هيحصل ايه؟
بس انا مش معايا فلوس؟
فتحت شيماء باب الشقه وخبطت على باب الشقه إلى جنبها
فتحت ليها ست اربعينيه شايله طفل صغير
ممكن طلب صغير من حضرتك؟
انا جارتك الجديده، جوزى مشى من غير ما يسيبلى فلوس وانا جعانه وغريبه لو ممكن يعنى رغيف عيش ا اى حاجه آكلها
الست رأفت بحالها، تعالى ادخلى انا هحضرلك احلى أكل
فكرت شيماء فى سرها هيحصل ايه يعنى؟
هانى مش هنا ونا قاعده وحدى
دخلت شيماء الشقه والست قعدت تحضر ليها آكل
نزع هانى الشال والعمه إلى كان مخبى بيها وشه وطلع العماره شايل أكياس الاكل وطلع على الشقه
فتح الباب ودخل نادى على شيماء ملقيش حد
يعنى ما سمعتش الكلام ونزلت او مشيت؟ همس هانى فى سره، كده يبقا عدانى العيب
ساب الأكياس داخل الشقه ونزل بسرعه
شديد / لما شاف هانى ماشى، همس لرجالته هو كان فاكر ان شغل التخفى دا هيخيل عليا؟
دا انا شديد والآجر على الله وطلع الشقه مع رجالته
الباب كان مفتوح دخل وقفله وراها، انتى يابت انتى
وصرخ فى الرجاله فتشو الشقه
مفيش حد جوه الشقه يا معلم شديد
شاف شديد أكياس الاكل مرميه على الأرض
امال الواد هانى كان بيعمل ايه هنا؟
تكونش خدعه يا رجاله؟ تعالو ورايا خلينا نلحقه قبل ما يغفلنا ويختفي فى الشارع
وهما خارجين من الشقه باب الشقه إلى فى وشهم انفتح