امينه: يابت اخرسي شويه انتي ايه
رحمه: خرسنا
لتتركهم امينه لتعد الشاي
ادم: انتي شاطره ف الحسابات
رحمه: يعني شويه
ادم: طاب واللغات
رحمه: حماره
ادم: اما هتشتغلي معايا ازاي
رحمه: هبقا اروقلك المكتب زي ماروقتلك الشقه
ادم: طيب ماشي بكره الصبح اعملي حسابك هننزل سوا نروح المكتب
رحمه: لاء طبعا انته اديني العنوان وانا اجيلك
ادم: اشمعنه
رحمه: انته عايزني اروح واجي معاك والناس تتكلم عليا
ادم يضحك: طاب ما هما كده كده بيتكلمو عليكي
رحمه: عارفه وبيقولو عليا مجنونه
ادم: اه طيب خدي الكارت اهو فيه عنوان المكتب
رحمه: ايه ده مكتبك ف جاردن سيتي جاتك نيله وجاي تسكن عندنا ده انته طلعت عبيط اوي
ادم: احترمي نفسك انا المدير
رحمه: طيب
وهنا يدخل عليهم امينه
امينه: الشاي يا حبيبي
ادم: شكرا لحضرتك
اما العم شكري الحاتي كان يجلس في مطعمه
شكري: شدو حيلكم يا ولاد عشان مطلوب مننا طلبيه كبيره لمصنع الهدوم الي بعدينا بشارعين
عبدالهادي شريكه ف المطعم: عملتو ايه عند الدكتور
شكري بحزن: مافيش فايده كل العلاج اللي خدناه مجابش نتيجه شكلي اموت قبل مشوفلي حتت عيل يقوللي يا أبا
عبدالهادي: طاب اقولك علي وصفه إنشاءالله بعدها ربنا يكرمك علي طول
شكري: انا ومراتي خدنا كل الوصفات عطارين علي وصفات تانيه اللي تقولها هاتي السمكه المبروكه واللي تقولها روحي الترب لا اقفي قدام القطر لاء روحي مش عارف فين وادحرجي عبدالهادي ولا اي حاجه من دول
عبدالهادي: وصفه ايه طيب
عبدالهادي: صلي يا شكري واطلب من ربنا سبحانه وتعالى ولح ف الدعاء صلي ف اي وقت وادعي ربنا انته ومراتك والجامع اللي مبتعتبوش روح صلي فيه
شكري: الصراحه يعني انا بصلي بس مش علي طول
عبدالهادي: عارف وكمان بتكروت ف الصلاه
شكري: ما انته عارف الشغل بقا
عبدالهادي: ادي العباده حقها وطلع صدقه انته مش فقير ربنا الحمدلله كارمك
شكري: والله كلامك صح يا صاحبي
اما ذكيه فكانت تجلس مع عزه اختها
ذكيه: هو انتي بتلفي وتدوري ليه يا بنت امي وابويا
عزه: انا عايزه مصلحتك جوزك عايز يرجعلك الراجل اتعدل وعرف قيمتك وطلق اللي كان مجوزها ديه
ذكيه: عايزاني ارجعله بعد ما رماني انا وابنه ده لولا بيت ابونا كت قعدت انا وابني ف الشارع وبردك لولا معاش ابونا كان زماني مش لاقيه اللقمه
عزه: بس هو اعترف بغلطه وهيعوضكم عن كل حاجه وحشه حصلتلكم
ذكيه: بقولك ايه انا راسي وجعتني تشربي قهوه
عزه: أه بتهربي طاب يكون ف علمك بقا انا عزمته بكره يفطر معانا
ذكيه: انتي عبيطه انا بقا مش قاعده ف البيت هروح أفطر علي اي ماءده
عزه: طاب عيني ف عينك كده انتي لسه بتحبيه هتنكري
ذكيه: اه لسه بحبه بس كرامتي اهم
عزه: صدقيني يا اختي ابنك لازم يتربي معاكم البطيخه مبتكبرش غير ف عرشها يا اختي
ذكيه: مش عارفه بقا
عزه: خلاص هنربيه شويه وبعدين ابقي ارجعيله
ذكيه: اللي فيه الخير يقدمه ربنا
اما بخيته فكانت تجلس مع زوجها
بخيته: ايه يا اخويا مرتاح ف الشغل مع كريم باشا
زوجها: اه والله ده راجل طيب اوي ده حتي اداني بدلتين من عنده وكمان قاللي هيوديني مستشفى عشان يشوفولي حل ف رجلي
بخيته: مش انا قولتلك ربنا مبينساش حد انا بقا هروح ادفع مقدمه تلاجه وتلفزيون
زوجها: طاب خدي الفلوس ديه اهي تساعد معاكي
بخيته: ربنا يخليك لينا
أما الست بمبه فكانت قاعدة مع زوجة أخوها اعتماد.
بمبه: شوفتي يا أختي اللي حصل؟
اعتماد: ايه؟
بمبه: الولية أمينه نزلت بعد الفطار ومعاها شاب طول بعرض، ولفت بيه على كل الدكاكين واشترت شوية حاجات.
اعتماد: هي مين دي اللي اشترت؟
بمبه: زي ما بقولك كده! ما هو الشاب ده اللي كان بيدفع، ولما سألوها عليه قالت إنه ابنها! بس أنا عرفت إنه الساكن الجديد اللي عندهم.
اعتماد: عندهم بيت وورشة وبيلموا إيجار، والجلابية هي هي!
بمبه: وليه حانوتية تموت على القرش ده! أنا لو عندي ربع اللي عندها كنت عيشت أحلى عيشة.
وبعدين جوزها يا أختي، تقوليش برهم جروح… راجل طيب أوي، لا بيهش ولا بينش.
اعتماد: ما هو حظ المقشفة وأم عرقوب، وإحنا بختنا مايل.
بمبه: آه يا أختي…
اعتماد: هتعملي أكل ايه بكرة؟
بمبه: مش عارفة.
اعتماد: أنا هعمل مسقعة باللحمة المفرومة.
بمبه: الله! ده أنا نفسي فيها أوي… خلاص اعملي حسابنا صينية كده.
اعتماد: هو ربع كيلو لحمة يادوب على قدنا.
بمبه: ايه يا حلوة؟ هو انتي بتجيبي من بيت أهلك؟
اعتماد: دي فلوس جوزي ولازم أخاف عليها.
بمبه قربت منها وقالت بخبث:
يا أختي يا حلوة، يا هتعملي الصينية يا أقول لأخويا على السر.
اعتماد بتوتر: سر ايه؟ أنا معنديش أسرار!
بمبه: يابت عليا أنا… أمال الجمعية اللي داخلاها مع ذكية وباقي نسوان الحارة تطلع ايه؟ وكمان قبضتي اسم وفاضل اسم.
اعتماد: الله يخربيتك! وانتي عرفتي ازاي؟
بمبه: مش عيب عليكي تقوليلي كده؟ أنا ليا طريقتي… المهم قولتي ايه؟
اعتماد تنهّدت: خلاص حاضر هعملك.
بمبه: إلا قوليلي… وديتي فلوس الجمعية فين؟
اعتماد: بطلي حشرنة شوية.
بمبه: ما أنا لو عايزة أعرف هعرف.
اعتماد: شيلتهم في البوستة… هديتي؟
بمبه: طيب متنسيش تقطعي بصلتين كده جنب المسقعة ورز أبيض.
اعتماد: طيب يا أختي.
بمبه: أنا داخلة أريح شوية قبل السحور.
اعتماد: اه أحسن برده.
دخلت بمبه شقتها، ونادت بصوت عالي:
بمبه: بت يا ملك! انتي يا بت!
ملك: ايه عايزة ايه؟
بمبه: هتروحي عند الست سمرة مرات المعلم حسن، وتقوليلها أمي بتقولك لو عندك أي طبيخ باقي ولا حاجة عشان في واحدة غلبانة وجعانة… وهاتي من عندها قد عشر أرغفة. يلا روحي.
بمبه: بت يا منال خدي تعالي.
منال: ايه هشحت ايه النهارده؟
بمبه: عارفه بيت المعلم فرجاني؟
منال: ماله؟
بمبه: هتروحي لمراته تقوليلها أمي بتسلم عليكي وبتقولك لو عندك أي أكل فايض منكم هاتيه عشان في واحدة غلبانة وجعانة وينوبك ثواب فيها.
منال: حاضر.
بمبه: ياله روحي.
بمبه: بت يا ألفت انتي يا مزغوده.
ألفت: عايزه ايه؟ بذاكر.
بمبه: عارفه دكانة شاهين الجزار؟
ألفت: أم مالها؟
بمبه: هتروحي تقوليله أمي بتقولك في واحدة غلبانة وجعانة، لو عندك حتت ماسورة تعمل عليها شوربة، أصلها بتربي أيتام، واعملي نفسك إن حالها صعبان عليكي.
ألفت: هو كل يوم نفس الموال؟
بمبه: غوري يا بت ياله قبل أبوكي ما يرجع من شغله.
ألفت: يا أما حرام عليكي، كل يوم تخلينا ندور في الحته نشحت الأكل، هو انتي ليه مش بتطبخي زي باقي الستات اللي بيطبخوا لعيالهم؟
بمبه: طب وهو أنا فاضية؟ روحي يا بت ياله.
أما في شقة أم سيد زوجة حسن.
سيد: ولدها، إن شاء الله لما تلبسي النظارة الصداع هيروح.
حكمت: بس يا ابني، أبوك ومراته يعني هيقلسوا عليا.
سيد: ليه يعني؟ وانتي أصلًا نظرك وصحتك راحوا زمان أيام الشقا والتعب.
حكمت: آه والله يا ابني، كنت بسافر الفلاحين من قبل صلاة الفجر وألم الزرع، حتى في عز ما كنت حامل فيك كنت بشيلك وأفضل ألف بيك، ولما كبرت شوية وجيه أخوك كنت باخدكم انتوا الاتنين وأبوك نايم للضهر، وأول ما شم نفسه شمه عليا وراح اتجوز، حتى معاملته معايا زي ما انت شايف.
سيد: خلاص بقى يا أما، عايز أقولك خبر هيفرحك.
حكمت: خير يا حبيبي؟
سيد: عارفه البت رانيا بت عم صابر النجار؟
حكمت: آه طبعًا مالها؟
سيد: الصراحة يعني أنا عايز أخطبها.
حكمت: بس يا ابني دي بنت متعلمه وبيقولوا هتخش الجامعة.
سيد: وايه يعني؟ هو انتي ناسيه إن أنا معايا بكالوريوس زراعة؟
حكمت: اسكت الحيطان ليها ودان.
سيد: ربنا يخليكي ليا يا أما.
حكمت: ويخليك انت وأخوك وأفرح بيكم.
سيد: طب قولتي ايه؟
حكمت: بس انت يا ابني عارف إن أمها ماسكه على الدنيا.
سيد: وأنا مش عايز منهم حاجة، أنا الحمدلله راجل وكسيب والحالة مستورة.
حكمت: ربنا يسترك دنيا وآخرة… ايه ده فاضل على الفجر ساعتين.
سيد: خليكي مرتاحة وأنا هجهزلك أحلى سحور، ولا أقولك أنا هسحرك النهارده بره.
حكمت: بره فين؟
سيد: هنروح نسهر في خيمة رمضانية.
حكمت: طب خش صحي أخوك عشان يروح معانا.
سيد: عيوني، وهنروح بعربيتي الجديدة.
حكمت: انت عايز أبوك يطين عيشتنا ويقول إنك بتخنسر منه؟
سيد: أنا جايبها من عرق جبيني يا أما، والله عمري ما مديت إيدي على جنيه من فلوسه، ما انتي عارفه يا أما إني سمسار فاكهة وخضار.
أما في شقة رحمة كانت أمينه تعد السحور.
رحمه: هتسحرينا ايه؟
أمينه: فول وبطاطس.
رحمه: أنا عايزه جبنه وزبادي.
أمينه: اديكي هتشتغلي ابقي هاتي اللي انتي عايزاه من فلوسك.
رحمه: خلاص اخش اجيب أنا من المخبأ السري.
أمينه: انتي يا بت خدي هنا.
لتدخل رحمه الغرفه الصغيره.
رحمه: شكلها نسيتها مفتوحه قشطه… لتدخل رحمه ايه ده! أمي مخبيه خيار… وايه ده جبنه وطماطم يا خبر!
لتدخل عليها أمينه.
أمينه: عارفه لو مطلعتيش وسيبتي الحاجه اللي في ايدك ديه هكسر رقبتك.
رحمه بصوت عالي: الحقوني أمينه هتموتني!
وهنا تسمع رانيا صوت طرق على الباب، لتجد آدم أمامها.
رانيا: اتفضل ادخل. أبا تعالي كلم المهندس آدم.
صابر: جاي يا بنتي.
لتسمع أمينه صوت رانيا، فتخرج من الغرفه وتغلق على رحمه بالمفتاح.
أمينه: اهلا يا آدم خير يا ابني؟ ده ميعاد السحور.
أدم: أيوه يعني انتو جاي ليه لما هو ميعاد سحور؟
أدم: مش احنا اتفقنا إني هفطر واتسحر معاكم كل يوم؟
أمينه: ليه يا أخويا حد قالك فاتحينها سبيل؟ روح شقتك خلينا نعرف ناكل اللقمه.
ليشعر آدم بحاله ذهول، ليجد رحمه أمامه.
أمينه: انتي خرجتي من الاوضه ازاي؟
رحمه: الباب خشب وقديم كسرت منه حته وخرجت.
أمينه: يا بنت ال… إن مكسرتك مبقاش أنا أمينه!
رحمه: قول يا فكيك.
أدم: المهم أنا هتسحر ايه؟
أمينه: روح على شقتك أنا العفاريت بتتطنط في وشي.
أدم: وهو فيه عفاريت في رمضان؟
صابر: يا وليه كفاية فضايح، اقعد يا ابني اتسحر معانا.
أمينه: والله ما حد هيدوقه غير لما تصلحلي الباب اللي كسرته الشملوله بتك.
أدم: يا ستي أنا هجيبلك باب غيره بس أنا جعان والمحلات كلها قفلت.
أمينه: يعني انت هتجيبلي باب غيره؟
أدم: اه.
أمينه: الباب بكام عندك يا صابر؟
صابر: يا ربي على الكسوف.
أمينه: متخلص يا راجل.
صابر: في باب يعمل باكو ونص.
أمينه: باب تقيل يعني؟
صابر: اه.
أمينه: ادي لعمك صابر حق الباب.
أدم: الحمدلله إني سحبت فلوس زياده.
أمينه: اخلص الفجر هيدن.
أما رحمه فكانت تجلس مع أم عصام.
أم عصام: شكريه كده برده يا رحمه؟ ديه عمله تعمليها يا بنتي؟ عاجبك اللي أمك عملته فيا؟
رحمه: مخلاص بقا خليكي حلوه يا خالتي، والله لو عم خليل صاحي كنت قعدت واتسحرت معاه.
أم عصام: يا نضري انتي متسحرتيش؟
رحمه: لا.
أم عصام: طب اقعدي اسحري معايا، على الاقل تنوسيني. عمك أبو عصام بيسحر بدري عشان العلاج وأنا بسحر لوحدي.
رحمه: هتسحريني ايه؟
أم عصام: فول وبيض وجبنه وبطاطس محمره وزبادي.
رحمه: قشطه… طب متتبنيني يا خالتي؟
أم عصام: من غير أي حاجه تعالي افطري واتسحري معانا كل يوم بدل ما احنا قاعدين لوحدينا.
رحمه: بجد؟
أم عصام: اه يا بنتي بجد والله.
رحمه: عارفه يا خالتي أنا كان نفسي أمي تبقى حنينه، لكن للأسف أمي بخيله حتى في مشاعرها، وأبويا غلبان. هو ساعات بيتخانق ويتعارك معاها بس برده بتعمل اللي هي عايزاه.
أم عصام: ربنا يهدي يا بنتي.
أما المعلم فرجاني صاحب المقهى فكان يجلس مع الصبي تفله.
فرجاني: خلص ولم الكراسي.
تفله: عايزين شوية طلبات يا معلمي، العناب خلص والسكر بيشطب.
فرجاني: ماشي اعمل شيشني على كل حاجه، بس الأول تعالى عايزك في حاجه.
تفله: أوامر يا معلمي.
فرجاني: عايزك أول ما تشوف الأسطى صابر بعد المفطر تقولّي على طول، حتى لو أنا في البيت اتصل عليا.
تفله: ماشي، بس ليه يعني؟
فرجاني: أصلي ليا عنده أمانه.
تفله: طب ما أنا وصبيان القهوه نتلم عليه ونعدمه العافيه ونجيبلك أمانتك من عنده.
ليضحك فرجاني: بس يا عبيط.
تفله: الله!
تفله: عبيط ليه بقى؟ ده أنا عايز أخدمك.
فرجاني: الأمانه دي تبقى رحمه بنته.
تفله: أكيد المجنونه بت المجانين دي عملت حاجه زعلتك.
فرجاني: اخرس قطع لسانك! دي رحمه دي ست البنات.
تفله: هي مين دي اللي ست البنات؟ دي بت لاسعه ورايحه منها على الآخر.
فرجاني: ما هو ده اللي محببني فيها… بالك يا واد، البت دي لو اتجوزتها هترجعلي شبابي، البت زي القمر حتة بت… إنما ايه مهره على حق.
تفله: ده انت واقع أوي يا معلمي.
فرجاني: غرقان لشوشتي.
تفله: طب أنا عندي فكره حلوه.
فرجاني: قول، وليك الحلاوه.
تفله: بس ده هيكلفك شويه.
فرجاني: مش مهم، الخير كتير أوي.
تفله: تعمل فطار جماعي لأهل الحته كلها، وطبعًا أمها مش هتصدق، وإحنا بنفطر تكلم أمها، لكن صابر ده إيدك منه والأرض.
فرجاني: عفارم عليك… خلاص بكره تروح تتفق مع شكري الحاتي يعملنا وجبات الفطور، وخليه يتوصي ويزود.
تفله: وانت بقى تنبه على أهل الحاره، وتخلي الفطور بعد بكره.