رواية حلال ممنوع الفصل الاول 1 بقلم نورا ناصر
بعد ما خلصنه العشاء ركضت للمطبخ .. شلت المواعين
وشمّرت عن ساعدي .. واستعديت للجلف. ..
خلصت المواعين كلها .. نضفت المطبخ كملته
طفيت الضوه وطلعت ..
دخلت للهول امي ترضع اختي الصغيرة هيه ونايمه
زين ماتخنگهه وذيج بعدها بنت نفاس ..
اخواني متمددين وكلمن غافي بمكانه ..
بدون غطاء ولا فراش ...
صعدت للبيتونه .. وجان اسمع صوت الدي جي
جاي من بيت عمي بصفنه ..
اليوم حنة بنت عمي آمال ..
احنه مارحنه للحنة لأن أمي استوها جايبة
ومرة عمي گالت لأمي لاتجين تلزميها وبعد ماتخلف
لان بعدج ماطالعة من الاربعين ..
مرة عمي من نوع شكوكية وتأمن بهاي الشغلات ومتمسكة بيها هواي ..
وانا كرامتي من كرامة أُمي ..
فمارحت ..
جاي اسحب الفراشات ... سمعت صوت ضحكة
بنت ..
اخذتني خطواتي لمصدر الضحكات ..
وخرت البردة.. فتحت شباك البيتونة ...
ركزت بنظراتي على بيت عمي ادور على مصدر الضحكات الي بعدها ترن بأذني.
شفت على البلكونة بنيه لابسة فستان حفلات اسود يلصف من گد اللمعان ..
قصير وكلوش .. ومخصر .. رجليها يلمعن
سواد فستانها بارز بياض لحمها بشكل مغري.
مصفوفة على الحايط مثل اللعابة وواحد من ولد عمي لازمها من خصرها وراسه برقبتها يشم مدري يبوس بيها.
رفعت راسها ليفوگ تحرك شعرها ..
قصير حد كتفها الضوة عليه منطي لون بني وتطگها ضحكات متتالية من حركاته الها وبوساته وهمسه
نسيت نفسي ظليت اباوع عليهم وابتسامتي من الذان للذان الثانية مثل الي جاي يشوف فلم رومانسي ويا اهله ومستحي
تسرسحت وطلعت راسي من حدايد الشباك
يالله شكد حلو منظرهم شون رومانسيين شون حلويين يمته اتزوج وزوجي يسويلي هيجي
يا صحيت على نفسي ويني ووين العرس توني عمري 15 سنة ..
حسيت على راسي جلب بين حديدتين من الشباك وبما انه معوجه الحدايد بسرعه انحشك.
ظليت اجر براسي اريده يطلع ماكو
يمعود يبو الغيرة اطلع مو راح ننفضح.
صارت گذلتي على وجهي وانحجبت رؤيتهم عن عيني ... جريت راسي وبعده مجلب
بعدت گذلتي شفت جمال يباوعلي ومتوقف عن حركاته الرومانسية ..
خوفتني عيونه غمضت .. وسحبت راسي حييل
حتى تعورت .. وابتعدت كم خطوة عن الشباك وگلبي يدك وايديناتي ترجف.
بعد ماباوعت عليهم .. خمطت الفراشات
ونزلت جوة ركض .. وصلت للهول انرگعت صفح
بباب الهول ووگعت يم امي ووالفراشات طارت من ايديه.زين ما جيتت بالصغيرونه جان مردتهه مرد.
گعدت امي مخرووعة ..
هاا يممه هااا شبيج خو ما صار شي؟ ؟
اجه ابووج من البحر. .. لو شنو صار.
گمت عدلت روحي بعدت كذلتي من وجههي
اني شعري ولادي بگذلة متوسطة الطول حد ذقني
لذلك كله تصير على وجهي مااحب اشيلها بقراصة.
بعدني مرتبكه .. گتلها لاماما مااجه نامي نامي انت مدام نونه نايمه ..
خلت ايدهه جوه راسها ورجعت نامت ..
غطيتها وغطيت اخواني ..
رحت لجنطة المدرسة طلعت كتاب الفيزياء
وتمددت على المندر بصف الشباك بالهوول بارد كلش.
لزمت الكتاب وبلشت اقراا بس بالي يم جمال ابن عمي والبنية الي ويا يمكن بنت خالته اسمها تغريد شايفتها من قبل ..
بعده صوت الدي جي مالة الحنة يصدح. ..
غفيت والكتاب بيدي ..
گعدني صوت الباب خمنت انو اخوية الصايع اجه
من يشوف ابوي يروح للبحر يستغلها فرصة
ويسوي سوالف مكسرة يفشلنه ويا الجيران.
ابوي يشتغل صياد بللنج او قارب مخصص للصيد بالبحر بالبصرة ويظل اسابيع مايجي.
خليت المخدة على راسي ونمت ..
گعدت على صوت اختي الصغيرة تبجي وامي ماكو يمها .. رحت اخذتها خليتها بحضني واهز بيها
حتى تسكت وبعيني النومة.
گام اخوية عدولي عمره 8سنوات ..
يباوعلي ومنعس .. ظل يتمطط
ويفرك بعيونه ..
گال بطة بيش الساعة هسه ؟
جاوبته .. كم مرة گتلك لاتگوول بطة اني اسمي فاتن شنوو اسمي؟ ؟
.. اي فتوونه بيش ساعة هسه ..
الساعة سته اله ربع. ..
ظل يبجي گال .. نسييت مادرست املاء.
صيحت بوجهه ويطبك طووب البارحة كله تلعب وهسه تبجي ظلل بلكي يضربك الاستاذ حتى بعد ماتعيدها.
طبت امي .. ليش تصيحين يا ماما مو اختج بحضنج هسه تتنزز ..
گام عبدالله گال اووو مانگدر انام حتى بالدوام الظهريي ..
الام .. سودة عليه گعدوك بصياحهم .. من يجي ابوك اكوله يكمل الغرفة مالتكم يلبخهه ويحطلها جام حتى تگدرون تنامون بيهه.
فاتن .معصبة. ماما تعاي اخذي بنتج .انطيتها لأمي وگمت صحت . وبعدين بابا گال الغرفة هايه اليه اني مو الهم.
عبدالله .. بعد احنه وين نخمد.
فاتن .. ماادري شوفولكم مكان لو روحوا ناموا ويا اخوكم المصخم زهير.
عبدالله .. مايريدنه 24ساعه يطردنه ..
عادل .. انت مو راح تعرسين.
فاتن .. انجب شنوو هالحجييي.
عبدالله .. اني سمعت معتز يحاجيج من شباك المطبخ ويگولج انت راح اتزوجج راح تصيرين مرتيي.
امي لطمت وجهه ولج شنوو هالحجي بطة؟ ؟
صحت جذاب ماما جذاااب. عزاااا ظليت اخزر بي واباوعله بنظرات تهديد ووعيد.
طلعت من الهوول فشلانة كلش يااا هذا شوكت سمعه كله منك ياعزيّز المخبل ..
رحت غسلت ترضيت وصليت ..
ونوب رجعت للمطبخ شفت امي استحيت من نظراتها الي مبينة فاهمة كل شي.
رجعت بخطواتي اريد اطلع صاحتني
ونفسها النظرات منبثقة من عيونها ..
تعاي وين رايحة ..
دخلت بخجل للمطبخ .. هيه واگفة ع الطباج دتسوي بالريوگ.
عادل گاعد بالكاع يم الصوبة گال وبيده القراءة مالته صاح .. تعاي بطة قريني شوية
حنيت جسمي عليه جريته من اذنه گتله من تتأدب وتلفظ أسمي عدل يالموعادل اقريك.
امي .. ولج يووم راح عليج هالاسم بعد ميكدر ميكوله الج.
گلت .. شكد اكره اسم بطه . شحلاته بابا حبيبي ..يصيح الي تينه دصيروا مثله .
ماما تكول من اني صغيرة كنت دبدوبة
ومدنفشة وملامحي حييل بريئة
الكل يصيح الي بطة.
صاح عادل يله تينه يله ..
ماما .. ولج فكعتي مرارته قرييه شووية بينما اسوي ريوك واستلمه.
امري لله ..
كعدت بصفه .. وظليت اقريي كم كلمة حفظته
صبت الريوك امي .. تريگنه ..
ورحت بدلت ملابس المدرسة .. اجه يمي عادل
كال هاج هذا الج.
اخذته منه قلم حبر فتح الغطاء مالته شفت بمكانه سلباية قلم جاف شايلها هو ومخلي بمكانه مالة الجاف ضحكت على عقله.
گتله خلي الك ..
أصر اله اخذه ... اخذته
ودعت امي وطلعت امشي المدرسة قريبة علينة
مسافة 10 دقايق مشي ..
ولازم اروح على هيا بنت عمي ..
وكفت يم باب بيتهم وتذكرت جمال والموقف مال البارحة ظليت ارجف يممه كون مايطلعلي استحي منه.
هيه ثواني وانفتحت الباب غمضت عيوني
وظليت افتح عين واسد الثانية
وجان يصير جمال گبااالي ..
درت ظهري اله اريد امشي .. اريد اهرررب
جان اسمع صووته .. بطططططه ...
يمه يمه يمه .. ياعزايه وياصخامييي ..
ياابه بطت راحت طارت
بس البط ميطير
زين ذبحوهاا وصارت تشرييب ..
صاح تعاليييي فزييت ..
درت وجهي وعيوني ع الارض
الكلمة مدتطلع
هاهاها يمكن مية مرة گلت هاا ويلله حجيت باحرف متقطعة .
. صباح الخير جماال ..
رد صباح النور .. واجه يمي تقرب .. باوعت اله لابس قميص ابيض،وبنطرون نيلي .. ولازم بايده كتب الجامعة .. لان هو مرحلة اخيرة كلية ..
غمس اصابعه بشعري
گال ولللج بطه كبرانه وصايرة تباوعين على شغلات اكبر منج.
وسحب ايده وهو يسحبها بعثر شعري وخبصه
ووخر من يمي وراح صعد بسيارة الخط
الي اجت عليه ..
ظليت واكفه مادخلت انتظر هيا
استحي ادخل لبيتهم من الصبح ..
لشوية .. وكفت سيارة ونزل منها معتز اخو جمال الاصغر منه ..
مخلي سترته على كتفه اليمين ولازمها بأيده ..
يمشي ويتمايل بمشيته مو طبيعية ..
شافني اجه وكف گبالي ..
اباوعله وانصي بخجل .. لان ادري بكلامه وشراح يكوول.
گال فدوة لبطتي.
گتله اووو عزوز ..
اروح فدوة لكلمة عزوز الطلعت من لسانج ولج بطوطتي يمته تكبرين وابوج ينطيج الي.
ضحكت بخجل ولك عيب احنه بالشارع وبعدين انت وين رحت من الصبح وهسه جييت.
فدوة انوب تحاسبني.لا ولج جنت بايت يم احم صديقي.
وبعدين ليش هيج رگبتك زرگة عاضك جلب؟ ؟
هههههه اي شون كلب ثلاثيني .....
شنو يعني ثلاثيني؟ ؟
يعني عمره 30 ...
خررب هاي شلك بيها هو الجلب يكتل روحه عمره10لو 15 سنه.
فدوة للفهاوة العندج ولج شبيج طالعه من البيت مامشطة شعرج ..
كلت هاا ورفعت ايدي لشعري ارتب بي ..
گال مو گتلج طوولي ولا تگُصييي
حتى تشيلي وميتخربط هيج.
ماريد يعجبني هيج.
محلوووو
ميخالف.عندي حلووو
اووو خلي اروح انام البارحة منايم
وخله ايده على حلگة يتثائب ..
كتله صيح لاختك وياك تره تاخرنا.
كال خوش بطوطتي ..
هذا معتز من اني وصغيرة هذا كلامه وياية
يكولي انت خطيبتي واريدج الي ويهتم بيه هوايه
لحد ماتعلقت بي وصرت اريده من صدگ.
مرات اكوله عزيز ومرات عزوز وهو يكيف ..
تذكرت شعري شفت ليكدام سيارة واكفة
رحت اركض شيطلعها هيا خانم.
وكفت يم السيارة طلعت مشط صغير من جنطتي وظليت اعدل بشعري وامشطة.جمال الخبيث خربطة ..
انفتحت الجامة وولد كاعد خرعني جان يكولي
هو انت منيلج شعر وتمشطين.
عفته ورجعت باتجاه بيت عمي يمه شهالمواقف الخربانه من الصبح.
طلعت هيا تفرك بعيونها .. حتى ماصبحت.ومشينة
گالت اوووو البارحة مانمت كضيناهه رگص وهاي ام الفيزيا مقبلت تأجل الامتحان.
اندارت عليه گالت شوفي بلله اكو بعيوني كحلة
شكد نضفتها وماراحت.
باوعت الها گتلها اي اكو شوية ..
ظلت تنضف بعينها بالمنديل منا لحد ما وصلنه للمدرسة ..
دخلنه للصف وظلينه نراجع .. اجت المدرسة
جان عدنه درس انگليزي.
المدرسة تشرح واحنه نكتب ..
نورس الطالبة الي گاعدة بصفي.
اخذت القلم الي اخذته من عادل ..
گالت هذا قلمج؟ ؟
گتلها اي ..
فتحته ..
صاحت هذا قلمي ياجذابة ياحرامية شايلة الحبر منه ومخلية مكانه قلم جاف حتى لااعرفه؟
كتلها على كيفج اخذته من اخوي.
المدرسة سمعت الضجة كالت كوموا اوكفوا شبيكم.
نورس .. ست دائما تضييع اشيائي مني والگاهن عند فاتن وتنكر وتكول ملاتي.
فاتن ... ست والله كذب هذا القلم مالتي انطانيا اخوي اليوم الصبح.
كامت طالبة اسمها اديان .. كالت ست تسمحيلي
تره اخو فاتن حرامي والله كل مرة يلزمونه بالمنطقة يبوگ.
ظلن البنات يضحكن وقسم منهم يباوعلي بنظرات عطف وشفقة على انه اني مالي ذنب واكو يعرفن اني شنوو؟ اني مو هيج.!!
صاحت بيهن المدرسة اسكتوو بلا ضحك بلا كلاام.
وانت فاتن باجر تجيبين امج وتجيين.
اريد احجي اكول الها امي استوها والدة سكتتني وگعدنا نزلت راسي دموعي وگعن بحظني
طول اليوم ماحجيت بعد ولاگدرت ارفع راسي من الفشلة.
بالحلة طلعت اريد اروح ويا هيا
صرخت بوجهي وخرررييي وبعد ديري بالج تگوولين اني بنت عممج.
عفتها ورجعت وحدي ..
الظهر جاي اغسل مواعين ع الغده على الشباك السنگ .. شفت معتز دك الشباك وفتحه ظل يضحكلي كال هاا ماتجيين للعرس،
تحسرت وحجيت لاا ماجي.
ليش اذا ماعندج ملابس جديدة هسه اروح اجيبلج احلى ملابس.
منين تجيبلي من اختك المحروسة مااريد خلي يكون عندك علم.
لالا اختي شنوو اجيبلج جدد هسه اروح للسوك.
ومنين عندك فلوس تاخذ من ماما وبابا!
عندي معليج.
انت ليش تريدني اروح شعليك بيه. ؟
اريدج تجين تتونسين ادري ضايجة
مااريد... وروح منا لايشوفونك اخواني ..
عفته ورحت ارتب الكاونتر ..
دخل زهير اخوية .. جر كرسي وكعد
گال بطيطة صبيلي غدا يلله ..
انداريت وانا كلي حقد وكره اله ..
گتله اصبلك سم وزمهرير وزقووم كله منك فاضحنه بالمنطقة يومية تطفر على بيت تبوكة سمعتي صارت زففت بالمدرسة والكل يتهمني على اني حرامية مثلك.
كام من مكانه اخذ الكرسي وشمره عليه
بس ماطخ بيه ..
واجه لزمني من شعري ظل يعت بي
واني اصيح واغلط عليه اريد اطلع النار الي شبت بروحي بسببه اليوم.
وهو يضرب ويعت براسي حسيت راح ينشلع بيده
نبتت اضافري بأيده .. زاد بيه ضرب.
اجت امي بيدهه اختي الصغيرة ..
تريد تفكه مني . . دفعها وگعت ماكدرت تكووم
صياحنه صار عالي .. ماحسيت اله ومعتز بصفي
ضرب زهير بوكس وگعه بالارض ..
ختلت وراه معتز هيج حسيت بي هو الامان اليه ..
ظل يصيح على زهير
شبيك ولك تخبلت تريد تموتها هيج انت بلا رجولة وتتطاول على اختك وابوك ماموجود.
كام زهير من الارض والدم يصب من خشمه ..
زهير .. تعال اشوفك الرجولة شونها ياابو النسوان.
وصاروا واحد يملخ الثاني .. اغراض المطبخ كلها وكعت على الكاع من شدة عركتهم.
اني اصيح وامي تصيح ومانكدر نفكهم ..
امي صاحت على اخواني يروحون يصيحون لعمي.
راحوا صاحوله .. اجه هو وجمال .. وفاككوهم ..
ظل عمي يغلط عليهم ادبسزية زعاطيط شبيكم ولكم ولد عم انتوا شخليتوا للغربة.
زهير .. ابنك ابو النسوان هذا هو الي اتدخل بيني وبين اختي واجة ضربني وبيتنا ..
معتز .. ولك حرامي طايح الحظ جيت تموتها هيه هاي رجولتك تتمرجل على اختك وتضربها.
زهير .. عسى مااموووتها اذبحها ارميها انت مااعليك.
عموو .. انجبوو ادبسزية جهاال تف عليكم مااسمع الكم صوت.
ويلله امشي انت ولك معتز للبيت ..
ام زهير .. فدوة خوية اخذ فاتن وياك هذا موتها اذا بقت هنااا اخذها على مايجي ابوها.
فاتن ...اخذني عمي و رحت وياهم لان صدك جنت خايفه من زهير بس ماافتهمت ليش زهير يكول لمعتز ابو النسوان ؟ ؟..
يتبع