رواية حلال ممنوع الفصل التاسع 9 بقلم نورا ناصر

رواية حلال ممنوع الفصل التاسع 9 بقلم نورا ناصر

فاتن .. صراع طويل وتفكير والم هواية وبكل لحظة اتصور الي نايم ع السرير هو معتز واريد اروح يمه بس اندار واباوعله اشوفه جمال اصحى من تخيلاتي وارجع انطي ظهر متغطية بس شرشف خفيف ومفتوح مكيف بالغرفة وباردة كوه كدرت انام ...

بعد ما غفيت حسسيت بحركة فوكاية ... كمت بسرعة شفت جمال يمي ولازم البطانية ... فزعت كمت مخروعة وارجف خفت منه كتله هاا جمال شتريد احنا شنو اتفقنا ؟؟

حسيته عصب عكد حواجبه ونزل جسمه يمي وكرفص كبالي ...

جمال ... اعرف كلش زين اني وميحتاج كل شوية تذكريني بهالكلمتين تره اعرف احسن منج واكثر مفهوم ؟

هزيت راسي شفته ماوخر من يمي خليت ايدي على صدره كتله يلله وخر عني كافي تره خوفتني

مااستجاب ماوخر سحبني من زنودي بثنين ايدي وخلاني ع السرير

انصدمت اكثر وزاد خوفي ورجفي يربي شيريد هذاااا!!!

كال كملي نومتج هنانه وتغطي بالبطانية لتتمرضين .

هزيت راسي وكتله اي ودفعته من ذراعه ..

وخر عني راح فتح باب الغرفة وطلع

باوعت للشباك بعدها الدنيا ظلمه

كنت بوقتها نعسانه حييل وتعبانه بسرعة استسلمت للنوم

للصبح حسيت بحركة فتحت عيوني وكعدت شفته يم الكنتور ناطيني ظهره ومخلي الخاولي على رقبته

وظهره عاري ومالابس بس برمودا

تمطيت لملمت رجليه صار صوت بالفرشة والسرير اندار عليه شعره مبلل ونازلة خصلات ع جبينه .

كال صباح الخير بطة .. وضحك ورد كمل كلامه

اشو نافشة ريشاتج ؟؟

كتله بعصبية شنوووو ؟

اندار ع الكنتور يطلعله ملابس متجاهل كلامي وردة فعلي

كال امج جوة ..

كمت من السرير بسرعة .. رحت لميز المراية شفت شعري مكفش وشي صاعد ليفوك .. يااشكد عيب من هيج يكولي نافشة ريشاتج .

عدلتهن بحركات سريعة وعشوائية

اللتفتلي كال اطلعي اريد ابدل ملابسي

تخصرت اله كتله متبدل لازمتك .

لزم كمر سرواله كال ابدل كدامج ؟

باوعتله بصدمة كتله لااا عزززه وشمرت نفسي ع السرير رفعت الفرشة والبطانية وصرت جواهن .

سمعت ضحكته ...

من جوة البطانية كتله انوب بدل بالحمام ..

جمال .. ممتعود ابدل بالحمام ..

صحت عليه خلصت ؟؟

جمال :- اي خلصت طلعي من العش مالتج ...

طلعت شفته ديمشط شعره ..

رحت للكنتور اخذت ملابس لزمتهم بيدي

كتله ماكو احد بالحمام اروح اسبح ؟

باوعلي واندار اخذ العطر من الميز ..

كال روحي هذا الحمام تركوا اللنا عشتو عود عرسان وكذا ..

ظل يخلي عطر .. ريحته طيبه بس اني لان من الصبح وبطني خالية مامتريكة مااحب اشم العطر تلعب نفسي منه

كتله اووي لعبت نفسي شنو من عطر هذا تره قوي كولش .

ترك العطر وندار الي رفع ايديه مثل الي بحالة استسلام

كال بسم الله الرحمن الرحيم تره كولشي ماسويتلج حتى من هسه تتوحمين .

كتله اوووو انت شكد قليل ادب .. وطلعت من الغرفة

الحمام صاير بنهاية الممر فوك رحت دخلت سبحت وطلعت رجعت للغرفة ..

شفته مجان موجود .. قفلت الباب وبدلت لبست صاية بيضة ع اطراف اكمامها ذهبي وع الخصر كمر قصير ذهبي حلوة ولونها ناصع . نشفت شعري بالسشوار .

شلت نص والباقي مفتوح ونزلتلي خصلات على جبيني .

خلصت ترتيب بس ماخليت مكياج ماعرف ولا عمري مخليه بنفسي

وكفت يم باب الغرفة فتحتها من القفل بس استحي انزل ..

ثواني واندكت الباب وانفتحت دخلن هيا ومنال

كلت بقلبي اي الله جابجن ..

سلمن عليه بوسني وباركن الي بس نظراتهن غريبة

احس عدهن كلام لحد مانطقت منال ..

منال .. هاا شونه العرس حلوو وتغمز

فاتن .. ارتبكت كتلها اي اي

منال .. يعني كلشي تمام خلصتوا كل شي ..

فاتن .. مااعرف شنو احجي بلحظتها بس اهز راسي وهنه ظلن وحدة تباوع للثانية ..

كتلها امي جوة ؟

كالت اي يلله ننزل .. بس تعاي اشوو انت ممخلية مكياج ؟

- مااعرف اخلي ممخلية من قبل ..

منال .. هيا مكيجيهاا اني اروح اشوف حمودي ابني خاف يتوكح ..

هيا ... يلله ماشي .. اكعدي فاتن ..

كعدت وظلت تمكيجني خلتلي مكياج خفيف بس حيل حلو حمرة وردية هادئة ظلال ع الجفن بس لمعة وردية وظلت تبيرمن شعري كالت احسن حتى يبرز هيج عادي .. واني كاعدة ع الكرسي كبال ميز التواليت الي صاير بصف الباب .. دخل جمال صارت عيني بعينه صفن بيه لحظات .. نزلت عيني خجلت منه كلش .. البارحة ماشافني بالمكياج كضيتها مدنجة وابجي ..

خلصت وطلعنا من الغرفة احنا الثلاثة

شفت كمال وبلقيس سلموا عليه وانطوني فلوس ..

نزلنا جوة .. شفت مرة عمو بوستها وطشت عليه جكليت كالت بس مااكدر اهلهل لان معتز ماموجود .

باعت لجمال بوسته ، باس ايدها وراسها

كلتله ليش مالبست الدشداشة البيضة الي جبتها الك هسه انت عريس وهاي صباحيتك حلوة عليك ..

جمال :- يمه شسالفة اللبس دشداشة بيضة شنوو مطهر؟

كلهم ضحكواا .. طلعت امي من الصالة ركضت عليها بوستها ودموعي نزلن من وحدهن .. وهيه هم ظلت تبجي

كمال... ولج لو ماهما هنانه يمنه جان شسويتي ..

جمال .. خليها عايشة اللحظة ..

كمال .. ولك اسمع جاي تشكيك لامها اعترف شسويت الهاا ؟؟

جمال.. والله اني رجال حباب وفقير ومؤدب كولشي مااسويت ..

كمال .. لا تحلف جذب ولك ..

فاتن .. خطية كمال مصدك عباله زواجنة حقيقي ..

دخلنه للصالة سلمت على عمو وباسني على راسي شفت ابوي كاعد ع للكرسي المتحرك رحت اله بوسته وزدت بجي وهو هم دمعن عيونه وظل يبارك الي .. وبوست اخواني عادل وعبود ونوسة بس زهير الحاقد ومااجه ..

بعدها راحوا اهلي ومقبلوا يبقون ع الغدا ..

تغدينا وخلصنا ، صعدت فوك ارتاح ..

جمال مااصعد كله يم جماعته واصدقائه ..

فرشت بالارض وتغطيت خفت لايجي جمال ويريد ينام غفيت شوية عوضت سهر البارحة .. حسيت اكو حركة بالغرفة بس ماافتحت عيوني ورجعت نمت ..

للعصر كعدوني البنات كالن كومي بدلي ورتبي نفسج اجونه خطار .. نزلت سلمت خطار جاي وخطار طالع

من بينهم خالة معتز ام تغريد .. كعدت واني مقابيلها نظراتها الي خالية من الحقد بس بيها غيرة ضوجتني كلش

بقت شوية وبعدين كامت واني بقيت بمكاني

ظليت افكر وين راحت اكيد راحت لحبيب القلب

واجه على بالي قبل كم سنة من شفتهم ع البلكون سوه وشون جان حاضنها ..

افكاري السودة خلتني اطلع من الصالة وظليت ادور .. رحت للمطبخ مجان اكو احد سمعت صوت كلام .. طليت من الشباك شفتهم بالحديقة الخلفية يحجون وهي تفرك بعيونها مثل الي تمسح الدموع .. ياالله شكد تبجي هااي ..

اه يامعتز شكم قلب كسرت واولهم قلبي ..

طلعت من المطبخ وصعدت فوك

كل ضوجة الدنيا بيه ..

ملخت التراجي من اذني احس توجعت وشمرتهن ع الميز والسوارات والكلاده وكل شي شمرته ..

باوعت لوجهي فتحت شعري نزل ع اكتافي تمنيت بهاللحظة اكصه مثل قبل ولادي ..

مديت ايدي للمجر دااطلع المكص ..

دخل جمال جفلت .. ظليت اباوعله بخوف

كال شكوو شبيج ؟؟

ببرود حاجيته ماكوو

جمال .. شكو بعد عايفة الخطار وكاعدة هنا وحدج ..

درت ظهري ، مشيت وكعدت السرير رفعت راسي باوعتله جاوبته بنفس النبرة السابقة.. البركة بيك انت ممقصر ..

جمال .. شتقُصدين ؟!!

فاتن .. عزااا انتبهت على نفسي هسه يكول مضغوطة حاولت اغطي على غلطتي

كتله انت اكعد يمهم مو هما اقاربك ..

جمال ... اشو انت متعرفين تحجين مو هاي الاصول المفروض تكعدين يمهم غير هم جايين يشوفوج .

فاتن .. ديالله هو العرس كوله مو على حسب الاصول وخليت رجل على رجل ..

جسر حسرة وتقرب يمي درت وجهي عليه شفته عاكد حواجبه وعيونه مظلمة .. تقرب ووصل يمي فصل رجليه عن بعض وكال

جمال .. اشوو انت كلش وكحة ومتعرفين تحجين عدل

فاتن .. وكفت على حيلي كتله انت معليك بيه ..

جمال .. احترمي من تحجين

بعد ممكمل كلامه واندكت الباب.. خزرني وراح فتحها .. سمعت هيا تكوله بابا يصيحك اجو جماعتك

باوعلي وبعدة مخنزر ومعصب بسرعه درت وجهي..

فتح الباب بقوة وطلع بسرعة ..

شيريد مني هو هم مصدك اني مرته والله يا الله ..

رفعت شعري .. كلت خلي انزل احسن خاف يجي مااريد ابقى ويا بمكان واحد ..

صار لليل تعشينا .. ام تغريد راحت بعد العشا ..

صعدت ليفوك .. رحت غسلت ونظفت اسناني

ورجعت للغرفة .. لبست تراك بصلي فاتح برمودا

طلعت فراش وجاي افرشه جوة ..

شفته دخل انطيته ظهر كلت اووو بس لا يفتح موضوع العصر والله صرت اضوج انجمع ويا بمكان واحد ..

اجاني صوته ..

بطه نامي ع السرير واني انام جوة ..

بدون ماللتفت اله .. حاجيته ولساني يرجف ومتوترة .. كتله لا اني مااحب انام ع السرير ماارتاح

حسيته اجه يمي .. خله ايديه على كتفي ودارني اله

كلش ارتبكت من قربه مني دنكت راسي ومارفعتها ..

بس اسمع شنو يحجي .. كال بطة لتخافين واطمئني

انت امانه عندي واني مستحيل اجبرج على شي او اذيج اوكي ؟

هزيت راسي .. بقبول ورغم كمية الحنان الي بلمساته وكلامه بس لسه خايفه منه ومامطمئنة كلش اخاف من قربه ..

رجع كمل كلامه كال اني اعتبرج اختي او بنتي لان اني اكبر منج بهواية اني جنت اشيلج من انت صغيرة ..

مجاوبت منه وخرت كتله اريد انام ..

كال اخذي راحتج ..

رحت نمت وتغطيت .. اسمع صوت التلفزيون

على حسه غفيت بعد ماتعب عقلي من التفكير بنفسي بمعتز بحياتي المستقبلية شون راح اكمل احس نفسي بدوامة ماضي مؤلم حاضر مشتت مستقبل مجهول .

مرت كم يوم الخوف بدأ يتلاشى جمال ابد مااذاني بس يضحك عليه وارد عليه ..

معتز ابد محاجيته من اخر مرة احترمت الورقة الي تربطني بجمال . .

هيا بدت امتحانات الوزارية اشوفها تقرا وبداخلي انقهر ع دراستي الي فرطت بيها ..

بالنهار اللتهي بالشغل ومرات اروح يم امي اساعدها وارجع ..

جمال شغله محلل .. بالنهار بالمستشفى العصر يشتغل بمختبر .. وبالليل بالبيت ..

بعد العشا خلصت غسل مواعين ويا سلوى وصعدت فوك غسلت ونظفت اسناني .. ورحت للغرفة شفت جمال متمدد ع السرير ويباوع ع التلفزيون مطلع مصارعة من دخلت باوعلي بنظرات خاطفة واندار يباوع تلفزيون ..

رحت اخذت ملابس من الكنتور .. ورحت للحمام بدلت كلبيتي لبست تراك وطلعت رجعت للغرفة ..

رحت اخذت الريموت كونترول وكلبت التلفزيون على غير قناة ..

كام من مكانه كاال ولج !! منو سمحلج تكلبي مو كدامج داتفرج ؟؟

وكفت كباله بصف التلفزيون وايدي على خصري كتله اريد اباوع هذا المسلسل متابعته ..

كام من مكانه واخذ الريموت كونترول من ايدي ورجعه ع المصارعة ..

وراح للسرير تمدد كال ببرود شوفي بالنهار مو يعيدو اني بس بالليل هنا اريد اباوع ..

جاوبته اني بالنهار جوة ومااصعد فوك ..

جمال .. صعدي شوفي ..

ظليت انفخ بعصبية ورحت للميز اللهي نفسي بالمكياج واركع بالغراض باوعت للمراية شفته يباوعلي كتله مو ع اساس دتباوع مصارعة ..

كام نزل جوة كعد .. كال بطة تعالي هناا وياشر ع الكاع

كتله مااريد ..

كال تعااي كتلج ..

رحت كعدت بمكان مااشر الي ..

انطاني تليفونه كال هاج خابري اهلج ..

ههههه العصر يمهم اني ..

حك لحيته كال صديقااتج ماعندج صديقات ؟

فكرت باميرة بس ماعندي رقم خالو كلش متشوقة اعرف اخبارها .. جاوبته عندي صديقات بس مااعرف رقمهم ..

كال راح اطلعلج لعبة واعلمج عليها .. اللتهي بيها بينما اشوف المصارعة لان مااكدر افوتها اني .. وانت رتبي وضعج بالنهار وشوفي المسلسل ..

خوش ...

اخذت الموبايل جان اسمه الشمعة لونه فضي ..

جان راقي بوقته .. طلعلي لعبة اسمها سكاي فورس

طيارة واقاتل بيها ظليت اضحك بداخلي يعتبرني طفلة خررب عود يسكتني يعاملني بالسياسة شنوو انت جمال ..

اخذت التليفون وصعدت ع السرير .. ظليت اللعب شوية ومليت .. طلعت منها ..

كتلني الفضول ادور بالفون .. اشوف شنو يحجي ويا معتز او تغريد ..

ظليت ادوس واباوع اله شفته مندمج ويا المصارعة

ورحت ابحوش بالمسجات والرسائل .. !!!!

يتبع ...

                الفصل العاشر من هنا 

          لقراءة جميع فصول الرواية من هنا

تعديل المقال