رواية حلال ممنوع الفصل الخامس عشر 15
بقلم نورا ناصر
سمعت صوتهُ عبر الهاتف وإذ بهِ متلهف على العودة لكي يأخذني الى احضانهِ ..
صوته كان مليء بالسعادة مليء بالأمل
لقد حل الفرج عليهِ وتحرر من قيود سجنهِ الى الابد ليقع في حفرةً يُسجن فيها للأبد حفرةً حفرها لهُ اقرب ناسهُ ..
ياترى ماذا سوف تكون ردت فعلهِ على فعلتهِ عندما يعرف بأن من سلمهُ امانتهُ خانهُ ولم يهتم بخيانتهُ ..
خوف وهروب وأمل كَبُرَ داخل وجدانهِ ..حلم رسمهُ في مُخيلتهُ وعاش فيه ايام وسنين طوال ..
فجاءةً. ..
وبعد العوده يسمع اصدار قرار سجنهِ الابدي وضياع حلمِهِ الذي باته مستحيلاً .
لكاتبتها مشكورة (Vaolit rose)❤❤❤
بقيت اتحسر كتله الله كريم طلعت من المطبخ طبيت للصالة كتله وهاي عمه وياك ..
وودعته ..
شفت عمتي رافعه وجهها الي باستغراب وملامحها كلها تكول شكو وشنو الي يريده منج ..
تجاهلتها ودخلت للمطبخ مره ثانيه هيج بس افتر واحس نفسي بس اللوب ..
اجت بلقيس تكود ابنها وبطنها صايرة جبيرة
وتنهد وترزل بي ..
جنت مااريد اسمع ضجه لان الضجيج الي بداخلي مكفي وزايد ..
صعدت فوك للغرفة بسرعة .. وكفت يم الباب
مااريد جمال ينتبه عليه لان جانت الدموع بطارف عيني وصوت معتز مديفارك مسامع اذاني
..
توجهت للحمام دخلت وسديته
وكعدت واحس شريط حياتي كله انعاد كدامي
من اول ماجان معتز يكولي مرتي
بوقتها جان عمري ٩سنوات
لحد ماكبرت وكبر هالاحساس وياي
بانه اني راح اصير مرته ..
لحظات وتهاجمني افكار سودة
واذا عرف معتز بلي صار ويا جمال
خاف يفضح كل شي .. ضربت على فخذي اله تخبل ..
طلعت من الحمام لان البرودة ظلت اصل بعظمي ..
راسا نزلت جوة .. فتت من يوم الهول عمه كاعدة هيا لازمه الفون وكاعدة ع التخم سلوى مقابيل الصوبة بيدها كتاب تقرا ..
جان يوم جمعه والكل موجود ..
هيه لحظات واندارت الدنيا بيه حسيت بدوخة رجليه ماعادت تكدر تشيلني وكعت على ركبي
الكل صاروا فوك راسي
رفعت نظري لهيا جانت نظراتها كاتلها الفضول تريد تعرف شنو الكاله الي معتز وخلاني اوكع
بقيت كاعدة ورجليه مثنيات صفح ..
صاحو الجمال اجه كمبص مقابيلي
لزم ايديه وبعيونه الخوف
سالني شبيج اوديج مستشفى ؟
جاوبته_لا بس خلي ارتاح شويه واكوم
لزمني من ايدي ديكومني
رجليه ماشالتني
كتله مابيه عوفني هنا هسه ارتاح واكوم ..
لحظات ورفعني من الارض
تمسكت بي من تشيرته وحاوطت رقبته بالايد الثانية
شالني وصعدني فوك ..
مددني على السرير ..
ظليت اباوعله بعيون مدمعه ويباوعلي باستغراب ..
نطقت كتله حاجيت معتز ..
كام من يمي معصب
كال وليش تاحجينه ..
فاتن_هو راد يحجي ويايه كال لعمه انطتني التليفون
شكول العمه مااريد احاجي انوب شتكول ومية سؤال يخطر ابالها ..
زفر بعصبيه وظل رايح جاي ويعيد خطواته بالغرفه يرفع شعره ليفوك بتوتر ..
مااعرف شلون طلع مني الكلام كتله والغصه تارسه صدري ..
معتز فرحان ببرائته يريد يترك كل شي ويرجع لهنانه ..
يكولي بعدني متمسك بيج واريدج ..
تقدم الي كال اسكتي اسكتييي خفت كلش منه حضنت رجليه لصدري .. حاول يتماسك اعصابه لان اني بوضع مايسمح اله يعصب عليه ..
بس حسيته ماكدر بعده يفور
خله ايدي على ميز المرايه وسحبهن من بدايته لنهايته وكع الاغراض الي ع الميز كلهاا ..
رن تليفونه شاله وركعه سوا اربع وصل ..
اني غصيت بالبجي وصار صوت البجي عالي
سوه المسافه الي بيننا خطوتين واجه يمي
خله راسي على صدره حضني حييل
دكات كلبه سريعه كلش تنفسه اسرع
جسمه حار حيل حار
يبوسني من راسي ويهدئني ..
كال راح نتخطى هاي المرحله بس ديري بالج على نفسج وثقي بيه ..
اكتفيت بالصمت ونمت على وقع همساته ولمساته ..
ماوعيت اله ع صوته هو و امه تكوله شنو هاي الاغراض ليش هيجي مكسرات
_ماكو شي ليظل بالج ..
_شلون صارت خاف حامل خلي نوديها للدكتورة ..
_ان شاءالله خير اني اخذ الها تحليل ..
_ ماتردون غدا .. ؟
_هسه اجي اخذ النا غدا ..
طلعت امه واجه يمي .. افتح عين واغمض عين
بعد مو كلش صاحية ..
ظل يباعد شعري من على وجهي ..
سألني ها شونج هسه .. ؟
جاوبته ببرود احسسن ..
_راح اجيب اكل حتى تاكلين ..
_لتعب نفسك مااشتهي
_لا اكلي لان وجهج اصفر ..
مسح بايده على شعري بحركة كلها حنية وطلع من الغرفة ..
رجع وبيده الصينيه كعد يمي وظل يقطع بلحم الدجاج ويوكلني ويا التمن والزلاطه ..
حسيت شويه براحة ..
جمال _امي تكول خاف حامل ويغمز ..
فاتن_لا مااعتقد ..
جمال_خليني اخذلج تحليل ..
فاتن_مو كتلك متاكدة ..
جمال بعصبية_اوكي خلص خلص شبعتي انزل الصينيه
فاتن _اي شبعت اني انزلها خليك انت ..كمت اريد اشيلها ..
اخذها مني كال لتوكع منج ع الدرج لان بعدج دترجفين
طلعنا سوة من الغرفه وصلني لحد باب الحمام بصفة تصير مغسلة وكفت اغسل
كال غسلي ورجعي للغرفة .. هزيت راسي وهو نزل ..
الايام الي بعدها سيرة معتز صارت تأرقني
اذا اسمع عمتي تخابره كبل اختفي من كدامهاا ..
ابو وكمال يكلوله اصبر لتجي حصل الجنسية يلله احسن الك كل شي يصير
بس هو مصر يترك كل شي ويجي يكول الهم تعبت من الغربة ..
اني وجمال بقينا على مشاحنات ..
من يصير الليل يريدني واني ماجاي اكدر اتقبله وجاي احس بتأنيب الضمير دااحس بنفسي خاينة ومو مخلصة ووفية ..
ليل نهار افكر بردة فعل معتز شون راح يتقبل الموضوع وشراح يسوي ..
جمال حتى تليفون مااشتره وماتواصل ويا معتز ابد ..
داحسه ديتهرب منه ..
بس مااحسه ندمان على السوا ابد واحسه متمسك بيه ..
يوم منهن جان عندي امتحان رياضيات ومخبوصه بي
كعدت بالكاع والارض مليانه دفاتر وملازم واحاول احل وافتهم ..
ولان بالفترة الفاتت اني وجمال جنه يوم زيني ويوم لا
ماظل هالكد يقريني ..
شفته دخل بدون ميحجي وياي شعل التلفزيون ومدد ع السرير ..
واني ظليت اللوب ويا الرياضيات ..
ظل يباوعلي حس بيه
اشرلي وكال تعالي شعندج ؟
نطيت كتله ماعندي شي ارتاح
ماريد اروح يمه ع السريير لان اعرف تاليتها شنوو
كال تعاالي كتلجج ..
كمزت من صوته اخذت الكتاب وورقه ورحت يمه ..
ظل يقريني لحد مافهمت كتله اوكي شكرا واريد انزل
لزمني من شعري بخفة ولج وين
درت وجهي باوعتله هااا
كال اريد بوسة
قربت اله خدي
كال انت بوسيني شلي بخدج ابوسه
قربت اريد ابوسه بخده تعمد يحرك وجهه وصارت شفايفه على شفايفي ردت ابتعد تقرب مني اكثر
وحبس حتى انفاسي
صار فوكي واخذ الكتاب وشمره
خليت ايدي على صدره ادفعه
كتله والله عندي امتحان
كال نخلص واني اقريج امتحانج كله
وكام جر الفرشه ودفعها وكعت جوه هي والكوشايات
كتله اووو بعدين شيرتبها
كال بصوت خلاني انقهر عليه اني ارتبها ...
واستسلمت اله رغم مية شغله ابالي ..
بعدها بفترة تعبت ومثل اي مرة ببداية حملها تتعب ومتتحمل كل شي .. حللت وطلعت حامل
رجعت للبيت وياامي وبلقيس
كمال رجعنا ..
صدمة بعد صدمة بعد كل شي يروح فكري لمعتز
تمددت على السرير .. كارهة الدنيا كلها وموهامني شي حتى الي ببطني وجنت معتبرة جيته اكبر غلط بالوقت الراهن ..
اندكت الباب صحت تفضلوا .. دخلت منال
سلمت وكالت مبروك سمعت حامل ..
_الله يبارك بيج ..
كعدت يمي وظلت تسولف
دك تليفونها رفعته وظلت تحجي واني يمها بس اسمع ..
منال _الو هلو معتز حبيبي شونك خوية شو طولت موكلت تجي ..
اهاا الله يسهل عيني اني هسه يم اهلي توه جيت وامي كلتلي فاتن خطيه حامل وصعدت يمها ابارك الها تحب تحاجيها تبارك الها همين .اي فاتن مرة جمال بنت عمي شبيك معتز يااا .. اهاا اوكي يا معتز شبيك وين توه خابرت خلي احجي وياك .. يااا شبي هذااا يلله الله وياك ..
فاتن .. من سمعت كلام منال ويا معتز عرفته انصدم
كعدت منال يمي بس احس راسي راح ينفجر
ومحتاجة اتقيء .. تخربطت من راسي الرجليه
بدخلة جمال
اخذني للحمام ظليت اتقيء وهو لازملي راسي
خلصت وغسل وجهي
اجيت اوكع شالني شيل وداني للغرفة
خلاني على السرير ماحسيت بشي بعدها ..
نص الليل كعدت شفته نايم يمي بس نومته مو عدل مثل الجان ينتظرني اكعد ..
حسيت بدوخه وبطني فارغة كلش
وحلكي ناشف
احتاجيت اشرب مي مشفت يمي
كلت انزل اشرب ..
بس تحركت كعد هو ..
منعس وعيونه حمره دم ..
كال شبيج خو مابيج شي ..
اريد انزل اشرب مي ٠
رجعي نامي اني اروج اجيب واجيب الج اكل همين .
ميحتاج اني مبيه شي
مو انت دايخه خاف توكعين من على الدرج ..
بين رفضي واصراره صرخت بوجهه تره معتز عرف ..
كال ادري عرف كل شوويه مذكرتنييي تره افتهمت والله ..
وهسه شنو ترديني اسووي يعني ابني مااتخلى عنه وطلاك مااطلك خلي يكون عندج علم انت وهوو ..
تقرب مني يحاول يتماسك اعصابه
كال بطه عفية لاتكدرين عليه فرحتي بهاليوم ..
فاتن ..بس اني حب عمره وسنينه ..
جمال .. انت زوجتي حلالي وام ابني ..
_اني شريكتك بالغدر والخيانة ..
ضحك احلى شريكة والله ..
_وخر عني ريحتك مطيبه ..
ظل يشمشم بروحه
نظيف والله اروح للدوام اسبح ارجع من الدوام اسبح تدرين بيه كلش زين ..
اروح اجيبلج مي وارجع ..
نزل ورجع جاب مي كال خليت الاكل ع الطباخ داايحمه ..
وهم رجع جاب الاكل وكلني بايده وغسلني بيده ..
سالته خابرك معتز ؟
جاوبني .. خابر على كمال وحاجاني ..
شنو كلك ؟
كال انسى عندك اخ ومتبري منك ..
جر حسرة كلش جبيرة وكال اخخ يافاتن اني شنو مسوي بحياتي حتى الله يعاقبني هيج ..
كمت اريد اخذ الصينيه كال اكعدي اني اخذها ..
يوم عن يوم حالتي تزيد للاسوء ..
جمال جان يهتم بيه
الغرفه اكرهها بسبب العطورات
شالهم جمال وداهم لغرفة البنات
ظلت هيا بالعناد تخلي منهم
هالبنيه خاله دوبها من دوبي من يوم الي تدخلت بينها وبين حمه منال هي موطايقتني ..
المدرسة ماتركتها لان ارتاح من اروح
اغير جو البيت ..
مرة زهير بهالايام ولدت وراحت بيت اهلها وزهير سافر امي اخذتني يمها لان متت مااتحمل غرفتي
مرات انام بالممر .. وجمال مااشتهي كلش .. ماحب اتنفس ريحته ابد ..
فرحت ويا امي ..
نايمه بغرفتها اشتميت ريحة مو غريبه كعدت قرفانه
شفته جمال كاعد يم رجليه
كتله انت شجابك هنانه وتارس روحك عطر انت شنو ماتحس ..
ضحك كال والله ممخلي ولاقطرة هاي قبل لتتوحمين بس هو العطر يلطش ..
روح روح لتجي بعد ..
جمال .. هاي فوكاها بعد صدك لو كالو لاتسوي زين ..
خل يمي علاكه ..
كال هذا موبايل جبته الج
كتله خوش خوش بس روح راح اتقيء
كال خليتلج بي سيم كارد ..
كتله زين ..
طلع باوعت للغرفة مليانه علاليك ..
اجت امي كالت هذا رجلج جابهم خطيه ممخلي شي ممشتري ..
مرت يومين اني عند اهلي .. وجمال مااجه بعد
اخذت التليفون ودكيت رقمه ..
جاوبني ..
كتله انت ماتسال ماتكول مرتك حامل مريضة تجي تشوفها تطمئمن عليها ..
جمال .. والله احتاريت وياج اجي يمج اطرديني اروح من يمج تعتبين ..
فاتن .. اقلاها جان خابرت سالت مو كلش مسويها عليه يابسه ..
جمال .. مو خاف اشمين ريحتي من التليفون ههههاي
فاتن . .تره ماتضحك ...
جمال ..اني شعندي غير بطوطتي .. بس شنو مبين بطوطتي مشتاقتلي ..
فاتن .. اي شوكت تجي
جمال .. ياعيني متطورين وصايرين نشتاق
لج اني عد عيناج هسه جاي بس اخلي عطر .
فاتن .. يبووو لعد لتجي ..
جمال .. اشاقه وياج حبيبي اجيت ودخلتني امج عليج شفتج نايمه متقربت منج رغم كلش جان بنفسي ابوسج بس مردت تنقرفين مني ..
فاتن .. لعد يلله شوكت تجي ..
جمال - جايج حبيبي ......
فاتن .. بهذه الايام صارت روحي بجمال كلش تعلقت بي وانتظر يوم يوم اولد واشوف ابني
معتز ابد ماتواصلت ويا بعد لا اني ولا جمال
جانوا اهله يلحون عليه يجي للعراق ميقبل
يجي .. يكول بعدني متخوف خاف انغدر
رغم مشكلته انحلت وللابد ..
بس اني وجمال جنه نعرف ليش ميجي
جمال جان متردد يصالحه خاف ليرفض او يصده..
امتحنت وزاري وكعت اكمال بدرسيين انكليزي واقتصاد ..
امتحنت واني بطني لحلكي الحمدلله نجحت
والتهيت بتجهيز ابني ..
شكد لح عليه جمال ادخل كليه ماقبلت كتله اجلها مااكدر وراي ولادة ..
خلاني على راحتي ..
سنة ٢٠٠٧ شهر ١١ ولدت طفلي الاول حسن ..
جان بي شبه هوايه من معتز ..
جمال يكول من كد ماجنه نفكر بي صار يشبهه ..
كان كلما يمر الوقت يزيد تعلقي بجمال اكثر
وصارت تغريد مصدر قلق الي ..
مره نايمه على ايده
كتله جمال كول لتغريد خل تتزوج
جر حسرة باوعلي
شبيك تباوع
كايل الها اني بس هي متقبل ودتحضر للماجستير ..
بعدها بكم يوم اجت النا قبل الغدا هي وامها
بس شافت حسوني وبوقتها جان عمره ٦ اشهر شبعته بوس ..
اني خليته عدها وركضت للفوك
خابرت جمال
جاوبني هاا بطوطتي اكو شي ..
اكولك جمال لتجي
ليش خير شكوو
هنا تغريد مااريدك تشوفها
ضحك كال بدلي انت وحسوني اجي ونروح نتغدا بره جوعان ..
لاحبيبي هسه شيكولون عليه مااعرف الاصول اعوف الخطار ..
لعد اني جوعان واريد ارجع للبيت وهم ميصير مااسلم عليهم ..
مو داكولك لتجي ..
صاح لج جوعان دااكولج شبيج وبعدين لو ماهي قبل يومين جانت يمي بالمختبر هي وخالتي
اشوو مكتلي ؟؟
شكوولج ولج حتى تسوين مثل هسه ..
تصنعت البجي مثل الاطفال
كال لج حبيبتي انت تعرفين شون حبيتج لج اني خطفتج خطف تردين ابدلج هسه انسي الماضي وخلينه عايشين بالحاضر ..
ظليت افكر بكلامه ..
طلعت احلى ماعندي من ملابس ولبستهم مكيجت وتعطرت ..
اني دائما قبل لايجي اسوي هيج بس اليوم شويه اوفر
سمعته اجه نزلت جوه
شفته دخل للصاله يسلم عليهم
مدت ايدها تغريد تصافحه
اني احتركت حرك
اخذ منها حسوني واجه يمي جنت واكفه اباب الصاله
كمت بسته من خده هو نزل على راسي باسه ٠
كلش فرحت بوقتها .. عبالك مسويه فد انجاز ..
بعدها بايام .. جنه كاعدين بغرفتنه اني وجمال وحسوني نايم
دائما اشعل شموع واسوي جو رومانسي النا
لبست سيت نوم ورحت يم جمال
نمت على ايده باوعلي
كال هواي تصرفين شمووع ..
كمت من يمه كتله موصوجك صوجي اني اسويلك جو
جرني اله خلاني على صدره
ويبوس بخدي ويلعب بشعري ..
كال تره مااشاقه وياج بعد اذا بسرعه تزعلين ..
هزيت راسي بامتناع ..
هيه دقايق وسمعنا صوت كمال عالي كلش هنانه فوك رغم هو غرفته جوه ونادرا مايصعد ..
بسرعه كام جمال .. وطلع من الغرفة
لبست روب ولفيته وخليت شال
على راسي وطلعت وراه
شفته بغرفة البنات
وعبالك ديضرب وحدة منهن ويرزل بيها .
يتبع