رواية رحمه في رمضان الفصل الواحد الثلاثون 31 وبقلم سلوي عوض
رحمه: هدخل انا بقا اشوف أكل عيشي
صابر: ربنا يهديكي يا رحمه
رحمه: حبيبي يا ابو رحمه
(تتركهم رحمه وتدخل غرفتها)
رحمه: تعالي بقا يا لاب توبي نبدأ بمين… اه بالواد سيد خطيب رانيا
(تتصل به)
رحمه: ابو السيد الغالي
سيد: عايزه ايه يا وش القلق
رحمه: اه يا ابن حكمت كنت جايبه لك مصلحه
سيد: انتي ييجي من وراكي مصالح برضه
رحمه: اصبر بس واسمعني
سيد: ارغي
رحمه: ايه رأيك نعمل رسومات وديكورات للوكاله بتاعتك
سيد: مش فاهم
رحمه: نوع من انواع الدعايه والزبائن هتكتر عندك والعمليه سهله ومش هتتكلف كتير يا دوبك تلاتين الف
سيد: ليه يعني هتعملي ايه
رحمه: صدقني هتتشهر وتبقا اشهر من النار على العلم
سيد: موافق
رحمه: حلو يبقا تبعت نص المبلغ حالا والنص التاني بعد يومين لما اجي اظبطلك الوكاله
سيد: ماشي ابعت على فين
رحمه: على رقمي ده وابعتلي صوره شخصيه ليك تكون واقف صوره كبيره
سيد: ماشي ثواني احولك… ها وصلوا
رحمه: اه شكرا
سيد: العفو… الا رانيا فين برن عليها مش بترد
رحمه: بقولك ايه معرفش انا دلوقتي بكلمك بصفتك عميل عندي مش مرسال الغرام اقفل بقا خليني اشوف أكل عيشي
(تغلق الهاتف)
رحمه: ايوه الصوره دي نحطها واجهه الوكاله وكمان نرسم طماطم وفاصوليا وخيار وبطاطس ونخلي الواد سيد يمسكهم بإيده ونكتب وكاله السياده لجميع انواع الفاكهه والخضار الطازجه زورنا تجدو ما يسركم بنبيع بأسعار رخيصه حققي حلمك يا ست البيت واعملي محشي بأقل تكاليف مع تحيات اخوكم سيد حسن
رحمه: بس كده حلو اوي بكره ابقا اطبعهم في الشركه واظبطهم
رحمه: اتصل على مين تاني… اه شاهين الجزار
(تتصل به)
رحمه: الو يا معلم شاهين
شاهين: ايوه يا رحمه
رحمه: مش عايز تتشهر وكل الناس تيجي تشتري اللحمه بتاعتك
شاهين: يا ريت بس ازاي
رحمه: انا هظبطلك كل حاجه بس عدس بترابه وكله بحسابه
شاهين: يعني ايه
رحمه: هعملك دعايه جامده اوي
شاهين: كتر خيرك
رحمه: هو ايه اللي كتر خيرك هو انا امي طابخه وجايبلكم طبق طبيخ ده شغل قولت ايه
شاهين: والشغل ده يتكلف كام
رحمه: اربعين الف جنيه نصهم حالا والنص التاني لما اسلمك الشغل
شاهين: ماشي
رحمه: طب حول يا معلم
شاهين: ماشي… ها وصلوا
رحمه: تمام اوي عايزه بقا صوره ليك بالجلالبيه
شاهين: معنديش اكتر منهم هبعتهالك حالا
(تظل رحمه طوال الليل تتصل بمعلمين الحاره وتعقد اتفاقات)
رحمه: ايه ده فاضل ساعه على الفجر اقوم اتسحر
(تخرج من غرفتها)
رحمه: اشطه بتتفرجوا على ايه
صابر: ده برنامج ديني ما انتي عارفه مبصدق رمضان ييجي عشان اتابع برنامج تفسير القرآن
رحمه: ربنا يكرمك يا ابا
امينه: وانا لا
رحمه: وانتي طبعا يا ام رحمه المهم انا عايزاكم في موضوع مهم اوي
صابر: خير يا رب
رحمه: عايزين نجدد الورشه ونجيب فيها خشب من اللي طالع ده ونشد الورشه شده معتبره
(يضحك صابر)
صابر: ربنا يحفظك بس منين ما انتي عارفه اللي فيها وامك قالتلي على دفاتر التوفير بتاعتك انتي واختك ودول يا دوبك على قد جهازكم
(تضحك رحمه)
رحمه: اولا انا الحمدلله جهازي ودهبي كاملين مكملين
صابر: ليه وقعتي على كنز علي بابا
رحمه: لا طبعا ده كان حوار مع اهل الحاره وخلصته
امينه: ده انتي بت مشكله
رحمه: اصبري يا امينه شوف يا ابا مش انا اشتغلت مع ابن سعديه في الشركه
صابر: اه وعلى الله تعمري ايه قصدك يعني مرتبك وده هيعمل ايه
رحمه: لا مش مرتبي انت عارف القعده اللي انا قعدتها جوه ديه لميت فيها ٢٠٠ الف جنيه
صابر: انتي سامعه نفسك
رحمه: اه انا هحكيلكم
(ننتقل إلى شقه ابو عصام)
امينه عصام: ياله يا عصام هات مراتك وعيالك عشان نتسحر سوا وابوك يصلي الفجر بينا امام
عصام: حاضر يا اما حالا اهو… وحشتني كل حاجه في بلدي
ابوعصام: خلاص بقا كفايه غربه
عصام: ما انا كنت بفكر في كده وقلت بالقرشين اللي اتوفروا معايا اعمل حتت مشروع
ام عصام: وماله يا ابني زين ما فكرت
ابوعصام: اقولك بقا مين اللي ينفعك في مشروعك
عصام: مين يا ابا
ابوعصام: رحمه
عصام: ملقيتش غير المجنونه ديه
ابوعصام: صدقني رحمه مخها زي البرلنت بس مترب شويه ننضفه ونخليها تفكرلك في مشروع تمام
عصام: إن شاءالله
(ننتقل إلى شقه آدم)
سعديه: وعلى كده يا ولدي البت المخفيه رحمه نفعتك في الشغل ولا خربطت الدنيا أصلها وش أذي
آدم: لا يا اما بالعكس طب ديه اتفجت على شغل إنما ايه
انتصار: كيف يعني
آدم: مافيش النهارده كان عندي اجتماع مع وفد إيطالي والمترجم مجاش وجافل تليفونه قامت رحمه اتكلمت معاهم وظبطت كل حاجه
انتصار: هيا رحمه بتعرف لغات
آدم: اه ده انا اتفاجئت بكده ديه بتتكلم كذا لغه
(يُسمع صوت طرق على الباب)
انتصار: يا ترى مين اللي جاي على وقت السحور
آدم: خليكي انا هفتح
(يفتح الباب)
آدم: تعالي يا رحمه
رحمه: السلام عليكم
انتصار: وعليكم السلام بت حلال تعالي اتسحري معانا
رحمه: لا شكرا اتسحرت
سعديه: امال جايه ليه
رحمه: جايه للمدير بتاعي
آدم: اقعدي طيب
رحمه: مش مستاهله المهم الحمدلله عملت كذا اتفاق على شغل
آدم: امتى ده
رحمه: انا يا ابني مبضيعش وقت واه الشغل بـ ٨٠٠ الف اتحولي ٢٠٠ اللي هما حقي الربع ولما نسلم الشغل هنستلم الباقي
آدم: هيا ديه تخاريف ما قبل السحور
رحمه: انا بتكلم جد على فكره وكنت اقدر اعمل الشغل لوحدي بس انا احترمتك واحترمت الشركه وكمان انت صاحب الفكره مش مصدق صح طب شوف كده التليفون
(ينظر آدم إلى هاتفها في حاله ذهول)
آدم: يا بت القرود 😳
رحمه: ايه يا عم انت متحاسب على كلامك
آدم: معلش أصلي بس مش مصدق
رحمه: لا صدق
سعديه: طب ما انتي فلحانه اهو
رحمه: ليه هو حد قال لحضرتك إني خايبه… خلي بالك موضوع البط والمحشي ده عشان تحرمي تعملي عليا حما تاني… لكن لو اتعاملتي معايا معامله أم لبنتها ساعتها برضه هبوظلك الأكل
سعديه: كيف يعني
رحمه: بهزر معاكي يا أم خطيبي
انتصار: ايه أم خطيبي ديه… قوليلها يا أما
رحمه: هقولها بس لما أحسها
آدم: هو انتي مين… البت المجنونه اللي بتلعب مع العيال في الشارع وكل يوم تجيب مشكله شكل… ولا انتي الآنسة رحمه اللي فاجأتني إنها بتفهم في كل حاجه حتى شغلي… اللي ياما بنات اشتغلوا ومشيوا عشان مش فاهمين… وفي يوم واحد بس تدخلي الشركه كل العملاء دول… فهميني
رحمه: أنا كل دول عادي يعني… ولو لسه هتكمل معايا يبقى تقبلني بكل شخصياتي
آدم: نعم ناوي… ده أنا عايز أتجوزك النهارده
وحيد: الحب ولّع في الدره
آدم: ما انت قاعد ساكت من بدري… حبكت تتكلم يعني
انتصار: قوله اللي عمره ما سمعني كلمه زينه
سعديه: امسكي الخشب يا بت… هتحسدي ولدي وعروسته
آدم: قولتي عروسته؟
سعديه: هي مش عروستك ولا ايه
آدم: عروستي… بس انتي يعني مكنتيش موافقه
سعديه: خدي يا بت يا رحمه
رحمه: خير
سعديه: أهم حاجه في الدنيا تسعدي ولدي وتحطيه في عيونك
رحمه: ايه ده… أخيراً رضيتي عني 😄
سعديه: ربنا يرضى عننا كلنا
رحمه: امين يارب
رحمه: اسيبكم انا بقا عشان في فكره جديده جات ف دماغي
ادم: ربنا يستر عارف انا افكارك
رحمه: كده طيب ايه رأيك هنفذ الفكره ديه لوحدي
ادم: طاب فهميني فكره ايه طيب
رحمه: لاء خليك انته جنب امك
سعديه: وبعدين معاكي مش جولنا بقينا حبايب
رحمه: معلش نسيت
(تخرج رحمه وتتركهم وتذهب الي شقتها)
(تجد والدها ووالدتها يقرؤن في كتاب الله)
رحمه: اخش أنفذ الفكره
(تنشئ رحمه حساب لها علي اليوتيوب)
(تبدأ اول حلقه في برنامجها "رحمه في رمضان")
رحمه: السلام عليكم
رحمه: اي حد يدخل يحط اللايك عشان اعرف معايا كام
رحمه: احب اعرفكم انا اسمي رحمه صابر من حي شعبي
رحمه: واحب اقولكم أننا لازم نستغل اي حاجه عندنا ونعمل منها اشياء مفيده
رحمه: وكمان البنات اللي ف سني عيشو حياتكم بس عيشوها صح
رحمه: يعني ايه يا رحمه نعيش حياتنا صح؟
رحمه: الحلقه الجايه انشاءالله هنعرف
رحمه: سلامو عليكم
لتغلق رحمه اللاب توب لتسمع أذان الفجر.
رحمه: "حلو، الفجر بيأذن… يلا أقوم أتوضى وأصلي الفجر وأناملي كام ساعة."
أما رانيا فكانت تذاكر دروسها.
رحمه: "أنا خلاص عنيا وجعتني… إيه الصداع ده! أحسن حاجة أنام ومروحش المدرسة بكرة. إيه ده؟ جسمي سخن… شكلي داخلة على برد شديد، ربنا يستر."
أما في منزل المعلم حسن، نجد أن زوجتيه قد انتهوا من صلاة الفجر.
حكمت: "عايزه حاجة يا سمره؟"
سمره: "مقولتيش هنعمل أكل إيه بكرة."
حكمت: "والله ما عارفه… كل يوم نحتار في الأكل."
بهية: "أقولكم أنا؟"
حكمت: "قولي يا بيبو."
بهية: "هنعمل صينية الباشا."
سمره: "ايوه يا كوكو… نفس فيها أوي ومحدش بيعرف يعملها غيرك."
حكمت: "حاضر من عيوني."
سمره: "تسلم عيونك يا حبيبتي."
وهنا يدخل عليهم المعلم حسن:
حسن: "الله… شكلكم حلو أوي وانتو حابين بعض… بس يارب تبقوا كده على طول."
سمره: ربنا يبعد عننا العين
حكمت: آمين يا رب العالمين
بهية: بابا بعد إذنك… أنا كنت عايزه أروح رحله مع المدرسة
حسن: فين الرحلة ديه؟
بهية: بعد العيد إن شاءالله
حسن: أيوه يعني الرحلة فين برده؟
بهية: الفيوم… هنزور كل معالمها
حسن: وهترجعوا أمتى؟
بهية: في نفس اليوم
حسن: طب إيه رأيك آخدكم كلكم كده ونروح نقضي أسبوع في الفيوم وتتفسحي براحتك؟
بهية: موافقة طبعًا 😍
بهية: وليا عند حضرتك طلب تاني
حسن: قولي… عشان عايز أنام
بهية: العيال في المدرسة بيتريقوا على اسمي وبيقولوا اسمك قديم أوي
حسن: طب وعايزه إيه؟ خليهم يقولولك "بيبو" زي ما بنقولك هنا
بهية: لا… أنا عايزه أغير اسمي، وأسمي نفسي أي اسم تاني غير بهية
حسن: خلاص… بكرة أخوكي ياخدك بالتوكيل اللي أنا عامله له وتغيري اسمك
حسن: بس اختاري اسم حلو
بهية: طب ما تختارلي أنت اسم
حسن: أختارلك اسم؟
حسن: يبقى هسميكي "نور"… عشان تبقي نور البيت كله
بهية: الله! ده اسم جميل أوي 🥹✨
بهية: قلبي انت
حكمت: هتعوزوا مني حاجة عشان هقوم أنام
سمره: تصبحي على خير
(أما في شقة الأسطى فاروق بعد صلاة الفجر)
فاروق: حرماً يا نجاه
نجاه: جمعاً إن شاءالله
فاروق: قوليلي صحيح… فين الباسبور بتاعك؟
نجاه: جوه في درج التسريحة
فاروق: تمام
نجاه: بتسأل عليه ليه؟
فاروق: أصلي نويت إن شاءالله نطلع عمرة ليلة القدر
نجاه بفرحه: بجد! 😍
فاروق: بالراحة على نفسك… انتي ناسيه إنك حامل
نجاه: معلش من الفرحة
فاروق: ربنا يقدرني وأفرحك دايماً
فاروق: يلا بقا نخش ننام
نجاه: مش بكرة الحد إجازة الورشة؟
فاروق: اه… بس الصراحة أنا جعان نوم أوي
فاروق: ولو لقيتيني نايم بالله عليكي متصحينيش
فاروق: أصلي هلكت النهارده… حوالي ست عربيات مصلحهم
نجاه: ربنا يديك الصحة ويرزقك برزقنا
فاروق: آمين… ويخليكي ليا ❤️
(أما في شقة بمبه)
(تجلس بمبه وحدها وهي غاضبة وتكلم نفسها)
بمبه: الله يقطعك يا رحمه يا بت أمينه
بمبه: من ساعة الحوار اللي عملتيه وأنا مبقتش أعرف أي أخبار عن الحارة ولا عن سكانها
بمبه: منك لله بقا
بمبه: أنا أشيع… البت تجيبلي كام رغيف عيش على حبة طماطم وخيار من عند سمره تقولها مافيش
بمبه: أقوم أنا أروح لها… تقولي متجيش عندنا تاني
بمبه: ربنا يكفينا شرك
بمبه: ماشي يا رحمه… إن ما وريتك بقا
بمبه: انتي تقطعي عني السَبوبة! 😡
بمبه: أنا لازم أتصرف… بس مين هيساعدني في الحارة الفقر ديه؟
البت لفتهم كلهم… ستات ورجالة
أعمل إيه يا بمبه؟ أعمل إيه؟
(تسمع صوت زوجها من الداخل)
الزوج: انتي يا ولية… تعالي اتخمدي
مش جايلي نوم
أحسن عنك ما اتخمدتي
طب ابقي صحيني قبل الضهر عشان أصلي واتكل على الله على شغلي
ماشي… هبقى أصحيك
(ينام الزوج، فتتكلم وهي متغاظة بصوت واطي)
راجل غبي… مبيعرفش يقلب رزقه
يلا خليني أنا أفكر للمخفيه ديه في حوار يقطم رقبتها 😈
(تسكت لحظة وتفكر)
آه صح! عمتها كانت تايهه عني فين؟
أكيد بعد المغرز اللي عملته فيها هي وابنها هتبقى عايزه تنتقم
بس هعتر عليها إزاي؟
فكري يا بمبه… فكري
(تبتسم بخبث)
آه صح… أنا معايا نمرتها
أول ما الراجل الفقر ده يغور… هكلمها ونشوف هنعمل إيه
بمبه: طيب يا رحمه… إن مطلعت البلا الأزرق على جتتك مبقاش أنا بمبه بت سكينة 😈
(يمر الوقت… ويؤذن الظهر)
(في الشركة – رحمة وصلت بدري لوحدها من غير آدم)
نشوى: إيه يا جميل؟ شكلك بتحبي الشغل… انتي تقريبًا أول واحدة جات
رحمه: هتصدقيني لو قولتلك إن الشغل فرق معايا جدًا؟
حسيت إني ممكن أفيد وأستفيد بدل ما أنا قاعدة في البيت
المهم… خلينا في المهم
النهارده بعد صلاة التراويح هتاخدي ماما وتروحي العنوان ده
نشوى: عنوان إيه ده؟
رحمه: انتي غبية يا بنتي؟ ما هو مكتوب… مستشفى الدكتور فاضل
نشوى: معلش مخدتش بالي
رحمه: هتروحي وملكِيش دعوة بأي حاجة
(يدخل آدم عليهم فجأة)
ادم: انتي إيه اللي خلاكي تيجي الشركة لوحدك؟
رحمه: ليه… هيخطفوني؟
وبعدين أنا سألت عليك ولقيتك نايم
ادم: كنتي قوليلهم يصحوني
رحمه: خفت أتأخر على الشغل… أصل المدير بتاعي رخم أوي 😏
ادم: طيب يا رحمه… ماشي
نشوى: أفندم؟
ادم: خديها وخليها تشرحلك المشاريع
وشوفي المهندس رؤوف عشان يرسملكوا رسومات تطبيقية
اتفقتي على التسليم إمتى يا أستاذة؟
رحمه: بكرة بعد الفطار هسلمهم
ادم: إزاي؟ إحنا كده مش هنلحق!
رحمه: لا هنلحق
وبعدين أنا مش عايزة حد معايا غير نشوى
ادم: الشغل مفيهوش لعب
رحمه: بقولك إيه… سيبنا نشوف أكل عيشنا
ادم: يا بنتي انتي قاعدة على فرشة خضار؟!
رحمه: تعالي يا نشوى نشوفلنا حتة نقعد فيها
أحسن العسل كتر أوي هنا… لا نلزق ولا حاجة 😅
نشوى: أروح معاها يا مستر آدم؟
ادم (بتأفف): روحي يا ستي
بس والله يا رحمه لو بوظتي حاجة…
رحمه: ولّا بلاش ليه؟ هتعمل إيه يعني؟
هترفدني قبل ما أتعيّن؟
ادم: عليكي كمية لماضة وطولة لسان… ربنا يصبرني عليكي
رحمه: يا عم اجري… هو إنت كنت تطول واحدة قمر زيي وأنا وافقت عليك؟ 😏
ادم (بغضب): رحمه… غوري من وشي
(أما عند بمبه)
بمبه: ألو… إزيك يا ست أم صادق
صباح: مين معايا؟
بمبه: أنا جارت أخوكي صابر
صباح: أنا ماليش إخوات… بلا صابر بلا وجع دماغ
بمبه: يا قلبي عليكي يا أختي… منها لله اللي عملته فيكي
صباح: عملت إيه؟
بمبه: البت عملت نفسها مخطوفة… وابنك يا عيني اتاخد في الرجلين عشان متتجوزوش
صباح: ليه يعني؟ ده ابني دكتور قد الدنيا
بمبه: عارفة يا أختي… بس إنتي متعرفيش
صباح: معرفش إيه؟
بمبه: البت دي ماشيه مع الواد اللي ساكن عندهم… أدم
ده غير رايحين جايين مع بعض… ولا هاممها ابن عمتها اللي كسرت قلبه
صباح: العيب مش عليها… العيب على أبوها اللي سايبلها السايب
بمبه: طيب وإنتي هتسكتي على كده؟
صباح: أعمل إيه؟ ابني نفسيته وحشة أوي
بمبه: طيب واللي ينتقم لك منها؟
صباح: ياريت… نفسي أشفى غليلي منها
بمبه: خلاص… قابليني وقت التراويح عشان محدش يشوفنا
صباح: ماشي… بس في الشارع اللي وراكو
بمبه: تمام… سلام
(تغلق الهاتف وتبتسم بخبث)
كده حلو أوي 😈
(لكن يوسف كان قاعد تحت الشباك وسمع كل حاجة)
يوسف: يا نهار… الست دي عايزة تأذيها
وأنا مالي؟ ياكش يولعوا في بعض
بس لا… دي صاحبتي
لازم أتصرف
(يتصل بها فورًا)
رحمه: يوسف يا صاحبي الغالي 😄
إيه هنلعب بعد الفطار؟
يوسف: اسمعيني… عايز أقولك حاجة مهمة
رحمه: في إيه؟ الكورة ضاعت؟ أجيبلكم غيرها
يوسف: اسكتي بقا واسمعيني
رحمه: طيب قول
(يحكي لها كل اللي سمعه)
رحمه: آه يا ولاد الـ…! 😳
طيب اسمع بقا
بعد الفطار تمشي وراها من غير ما تحس بيك
وتسمع الاتفاق اللي بينها وبين صباح
وتيجي تقولي
وأنا بقا… هعمل فيهم مقلب يتهزله الحارة كلها
وكمان ليك عندي هدية معتبرة
يوسف: أنا بعمل كده عشان انتي صاحبتي… مش عايز حاجة
رحمه: حبيبي يا يوسف