سالم: اه بغين غنوري بقا الله يحرقك بوظتيلي لساني
رسميه: العسق العسق
سالم: أبت غوري ياله شندي صاحبي جاي
سالم: ابيض يا شندي
شندي: ابيض علي الابيض ابو السوالم، ايه اللي موقفك مع البت اللي لسانها دايس عليه قطر؟
رسميه: قطن لما يلهفك يا فاسل، هاتني حقي منه يا سانم
سالم: اه حاضر روحي انتي
رسميه: مع السنامه يا نوح النوح
رسميه: بس متقفش كتين مع سندي أصله فاسن
وهنا تذهب رسميه الي نحمده والده سمسمه
رسميه: خانتي نحمده عندك بسنه؟
نحمده: اه عندي عايزه اد ايه؟
رسميه: عايزه كينو بسنه متفصص وعايزه اتنين كينو بصل وكينو طماطم
نحمده: اشمعنه الطماطم اللي بتقوليها عدل؟
رسميه: هيا بنتك ف المحن
نحمده: اه
رسميه: طيب جهزيني الطلبات هنوح اعمل شعني واجي أخدهم، حسابك كام؟
نحمده: ١٠٠ جنيه
رسميه: خدي
لتتركها رسميه وتذهب الي كوافير سمسمه
رسميه: سمسمه عايزاكي تعمنيني شعني
سمسمه: بقولك ايه انتي شعرك ناشف اوي وبيكسرلي العده
رسميه: حطي زيت كتير
سمسمه: طاب اقعدي ربنا يتوب عليا من دول زباين
رسميه: اعملينيني مكوه وششوار وكمان عايزه ماسك لوسي
سمسمه: تعرفي تخرسي خالص؟
رسميه: انا اكلم بفنوسي
سمسمه: طاب يا حلوه كده هعوز منك ٥٠٠ جنيه
رسميه: وايه يعني خدي واشتغلي
وهنا تبدء سمسمه في تصفيف شعر رسميه
سمسمه: اه يخربيتك شعرك ده عايز لغم يفجره
رسميه: بتقوني حاجه؟
سمسمه: لاء مبقولش
وبعد أن انتهت سمسمه من تصفيف شعر رسميه وانتهت أيضا من تنظيف وجهها بالماسك
سمسمه: بشرتك ديه عايزه معالجه تعالي يوم بعد يوم اعملك جلسات، الجلسه ب ١٠٠ جنيه بس ايه هتبقي احلي واحده ف الحاره كلها
رسميه: وهعجب خطيبي؟
سمسمه: بتعجب انتي اتخطبتي أمته؟ محدش قال يعني
رسميه: اصنها لسه مس نسمي
سمسمه: ومين سعيد الحظ؟
رسميه: سانم ابن خانتي باتعه اللي كان خطيبك
سمسمه: بتقولي ايه يا ام ربع لسان انتي؟
رسميه: والله اجيبلك سانم يعنفك، شغنك موتي بغيظك اتقهني سابك وخطبني يا سانم يا خوني الجنينه يا حبيبي يا سانم
سمسمه: كده طاب الف مبروك عليكم
رسميه: من قنبك
سمسمه: اه طبعا من قلبي اترزعي بقا
وهنا تدخل عفاف الكوافير
عفاف: تسلم ايدك يا سماسم العريس عجبه لون شعري اوي بيقولي اني بقيت شقراء صهباء… الا يعني شقراء صهباء ديه؟
سمسمه: يعني شقرا وجميله
رسميه: مانيش دعوه عايزه شعني يبقا نون شعنها
سمسمه: ياله يا ماما من هنا عايزين نمسح المحل
اما سالم فكان يقف مع أصدقائه طارق وشندي
شندي: عرفت اخر الاخبار يا طروق؟
طارق: لاء انا لسه صاحي حالا علي صفاره سالم
شندي: اصل سالم خطب رسميه الخنفه
ليضحك طارق
طارق: يخربيتك ديه سمسمه هتسفلتك
سالم: ديه مصلحه يا عم خمس بواكي حايرين طايرين ووقعوا عليا من السما بس امي منها لله خدت نصهم
طارق: تبيع قلبك بخمس بواكي؟
سالم: ولا بخمسه ونص حتي، طاب قولي انته اعمل ايه وانا قشفور اخر حاجه؟
شندي: تفتكر سمسمه لما تعرف هتعمل ايه؟
سالم: مش عارف ديه مجنونه بت مجانين ربنا يستر
طارق: اياك علي الله تكويلك قفاك
سالم: بقولكم ايه تعالو معايا هنروحلها المحل وانا اقولها اني كت واخد عربون مرمه واتصرف مني، ولما كلمت خالتي رتيبه تسلفني قالتلي من عيوني بس أخطب بتي، واصل كت ماضي علي العربون وصل علي بياض وخفت اتحبس وانتو تشهدو معايا وكل واحد فيكم ليه عمود
شندي: عمودين واخليها تقولك اجوزها كمان
سالم: هيا ديه الصحوبيه
شندي: الصحاب ف اجازه
سالم: لا وحياه امك
طارق: تعالي نروح معاك ما انته موراكش غير وجع القلب
وقبل أن يتحركوا تدخل عليهم رتيبه ومعها ابنها الصغير حاملا صينيه كبيره تفوح منها رائحة الشواء
رتيبه: ولا يا رامي ادي الصنيه لعريس اختك
سالم: ايه ده؟
رتيبه: ده الديك الرومي يا عين حماتك، إنما ايه يستاهل بؤك… محشي حمام وورق عنب ومكسرات تاكله بالهنا
شندي: قشطه عليكي اخالتي
طارق: ايه مش هنروح مشوارنا؟
سالم: الدنيا مش هتطير يا جدع ناكل الاول
رتيبه: كلو يا ولاد، وانته يا رامي روح هاتلهم الساقع عشان يبلعو
سالم: تعيشي اخالتي اقعدو يا عيال
رتيبه: وديه تيجي تقعدو علي الارض؟ ابدا مايحصل، هجيبلكم ترابيزه وكراسي
شندي: مش مهم اخالتي
رتيبه: لاء ازاي اصبرو بس… واد يا كنكه هاتلي هنا ترابيزه وتلت كراسي
كنكه: عيوني اخالتي حمامه
شندي: اوعا اسالم ده انته هتعيش ف عز ونعيم
سالم: اهو ار امك ده هو اللي جايبني الأرض
طارق: هو انته بجد بتحب اسماء يا سالم ولا واخدها سبوبه؟ علبه سجاير، كوبايه شاي، جنهين… واهي بتقضي
سالم: لا والله بحبها بجد بس زي ما انته شايف الظروف مش مساعده خالص، ده كمان غير امي اللي تقبل العما ولا تقبلها
طارق: بس انته كده هتكسر قلبها، ده انته بعتها بديك رومي
شندي: هاتلي انا يا عم ديك رومي وانا امضيلك علي كليتي مش اسماء
طارق: يا خساره
شندي: وانته محروق اوي عليها كده عشان بتحبها وهيا فضلت صاحبك عليك؟
طارق: له والله من وقت ما اتخطبت لسالم وهيا بقت زي اختي تمام
سالم: اوعا يا طارق، سماسم ديه العشق عليا النعمه اشقك فيها
طارق: لاء يا صاحبي انا عمري ما اخون، ولو علي كسر قلبي… بس صدقني يا سالم لو خسرت اسماء عمرك مهتعوضها
شندي: طاب بطل شحتفه انته وخليك ف حالك
وهنا تقترب منهم سمسمه
سمسمه: الف مبروك يا عريس، طاب مش كت تعزمني؟ كت هشرفك والله
ثم تقذف دبلته في وجهه
سمسمه: خدها اديها لعروستك، هيا أولي بيها… عن اذنكم
طارق: انسه اسماء استني هفهمك الحقيقة
سمسمه: استاذ طارق انا بحترمك متخلينيش ازعل منك
شندي: جري ايه يا بت خالتي متقفي تسمعي الكلام
اسماء: ابعد عني يا شندي بدل ما اخلي شبشبي يعلم علي وشك
شندي: كده بردك يا بت خالتي؟
سمسمه: بت خالتك منين؟ هيا بلاوي وبتتحدف… غور يا عم روح اقف مع صاحبك ولا وحشك طرقعه ابوورده علي خلقتك؟
لتتركهم سمسمه وتذهب الي كوافيرها وهيا تقول
سمسمه: كده يا سالم تعمل فيا انا كده بعد كل الحب ده؟ طاب وحياه امك لاوريك… أن ما جننتك بس الموضوع ده فيه حاجه مش طبيعيه ولا مفهومه، سالم بيحبني وانا عارفه ومتاءكده من ده، بس تلاقيه عايز يقلبهم ف قرشين واكيد باتعه الكلب ورا الحوار ده… انا هروح اشوفها بس اروح ازاي وهيا مش طايقاني لا ف سما ولا ارض؟ اه انا ابعتلها البت عفاف وهيا تجيبلي قرار الحكايه وابقا اعملها ماسك الدهب ببلاش
لتتصل اسماء علي عفاف
سمسمه: تعالي يا فوفتي عايزاكي ضروري
عفاف: طياره
وبعد عشر دقائق تدخل عفاف الكوافير
عفاف: خير عايزه ايه يا اسماء؟
سمسمه: ايه رءيك لو عملتك ماسك الدهب ببلاش ويخليكي بتلمعي وعريسك يجنن عليكي؟
عفاف: بجد؟ وحياه امك؟
سمسمه: اه وحياه امي… بس بشرط
عفاف: قولي
سمسمه: هتروحي عند المحروقه باتعه وتعملي نفسك بتساءلي علي ملايات عشان جهازك
عفاف: نعم؟ انتي عايزه الشيخ نواف ينام علي ملايه من عند باتعه ديه؟ بضاعتها كلها شايطه والعته واكلاها
سمسمه: يا غبيه بقولك كده وكده
عفاف: ما انتي عارفه انها شبطه ومهتصدق
سمسمه: ابقي قوليلها هشيعلك امي تشتري
عفاف: ماشي وبعدين؟
سمسمه: تسرسبيها وتعرفيلي منها سالم خطب البت رسميه الخنفه ليه
لتضحك عليها عفاف
عفاف: ايه ده؟ هو سابك وخطبها؟ اما اعمي صحيح
سمسمه: ما هو انتي صاحبتي وحبيبتي وهتعرفيلي قرار الحكايه
عفاف: بس بشرط
سمسمه: ارغي
عفاف: ترسميلي حواجبي بنفس لون شعري
سمسمه: موافقه وهحطلك ضوافر كمان علي حسابي
عفاف: حبيبتي يا سماسم
سمسمه: ياله اسحبي وابقي تعالي قوليلي
عفاف: من عيوني يا مسمسه
اما طارق فكان يجلس في منزله وحيدا يبكي حاله وحال سمسمه
طارق: انا مستحيل اسيبها كده، انا بحبها من وهيا لسه عيله بتلعب ف الحاره… بس هيا قلبها مع صاحبي، بس انا هقف معاها لو علي حساب قلبي
اما نحمده فها هيا قد انتهت من بيع خضراوتها وهيا حزينه
نحمده: يا تري يا بتي هتعملي ايه لما تعرفي بعمله سالم؟ اجيبهالها ازاي دي… بس اروح افوت عليها ف المحل وأشوف هقولها ايه
لتذهب نحمده الي كوافير سمسمه
سمسمه: تعالي يا اما خشي، ايه ده مالك وشك حزين كده ليه؟ حد زعلك؟
نحمده: لاء بس اصلي سمعت حاجه كده ف الحاره
سمسمه: قصدك يعني علي خطوبه سالم ورسميه؟
نحمده: ايه ده انتي عرفتي؟
سمسمه: وهو في حاجه بتستخبي ف الحاره ديه؟ وبعدين عادي يعني يا اما… اللي يحمل يشيل، انا نفسي مش زعلانه، يغور كلب ييجي بداله سبع
نحمده: من قلبك؟
سمسمه: خلاص بقا روحي انتي عشان تنزلي الفجر تشتري الزرع وانا هخلص واقفل
نحمده: طيب يا بتي علي راحتك اللي تشوفيه
وهنا تدخل عليهم عفاف
عفاف: عرفتلك كل حاجه
لتنظر سمسمه إليها نظره اسكتتها
نحمده: انا ماشيه بقا
لتتركهم نحمده وتذهب
سمسمه: انتي حماره؟ مش شايفه امي واقفه؟ قولي عرفتي ايه
لتقص عليها عفاف كل ما حدث
سمسمه: اه يا ابن الدايخه… بعتني بخمس بواكي واكله طيب، هنشوف مين اللي هيضحك ف الآخر
عفاف: لاء ما هي باتعه خدت نصهم منه وقعدت تقولي ابني ده موكوس بيحب البت اسماء ام عرقوب المقشفه المصننه وانا اقولها عيب اخالتي
الفصل الرابع من هنا