رواية احببت وأنا علي ذمة اخر الفصل الخامس والثلاثون 35 والأخير بقلم نوسه حمد
بعد قفلت من رامي اتصل علي اخوي قلت ليهو ابن الحلال علي زكرو يبان هسي في سيرتك كيفك ان شالله كويس حسيت صوتو متغير قال لي نوسه الحمد لله الدنيا قضت غرضها قلت ليهو كيف يعني قال لي مرتي اتوفت امس بليل وما قدرت اكلمك في نفسك الوقت قلت بتكوني نايمه قعد ابكي وقطع قلبي هو يبكي وانا ابكي رانيه جات مخلوعه قالت لي طارق مالو تاني قفلت من اخوي وقلت ليها طارق كويس دي مرت اخوي اتوفت عزتني وكان يوم صعب علي دا الوقت المحتاجني فيهو اخوي واكون ما جنبو ومافي طريقه انزل السودان عشان العقد الكاتباهو بليل رامي اتصل علي رديت عليهو وصوتي كان رايح من البكا قال لي نوسه مالك قلت ليهو مرت اخوي اتوفت قال لي لا حول ولا قوه الا بعد العلي العظيم انا لله وانا اليه راجعون ياريتني قبيل مشيت ليهم بس كانت في اجراءات مهمه مشيت اعملها قلت ليهو إجراءات شنو قال لي طبعا موقف عبله صعب جدا ي اعدام يا مؤبد من اول جلسه المعاها اعترفو عليها وفضحوها وفضحو اعمالها رغم انها حاولت تضلل الحقيقه بس في ادله كتيره اتقدمت ضدها اولهم البت الكانت عامله فيها صاحبه لدن للاسف كانت من ضحاياها وبعد عرفت انها اتورطت قعدت معاهم واهلا متبريين منها لانو اتزوجها ود عمها وطلقها في نفس الشهر وطردوها عشان ما تفضحهم اكتر يا ريتهم قتلوها لانها اتسببت بضرر كميه من البنات ضمنهم لدن الزوله دي بقا ما فارق معاها اي شي قلت ليهو لا حول ولا قوه الا بالله آلعلي آلعظيم معقوله يا رامي في كده يعني انت م بتحكي لي في فيلم قال لي يا ريتو فيلم نوسه انا الولد القلبي قوي للان مندهش بي افعالهم والحمد لله انها جات علي كده مشيت امضي اني استلمت بت طارق لغايه م الوضع اهدا وطارق يقوم بالسلامه ويشيل بتو بكره ان شاءالله ماشين نراغب الدكتور عشان نشوف ولد. طارق وحتي تاني يقبضو عليهو لانو دا تاجر اعضاء ومعاهو دكاتره من اجناس تانيه قلت ليهو ان شاء الله تلقو ولد طارق عشان اطلعنا من الحزن الانحنا فيهو دا ولد طفل م فاهم شي الله انتقم منها عبله حسبي الله ونعم الوكيل طبعا ي نوسه الولد هو ما راح الولد حسب كلام البت انو الدكتور اتناقش معاها وقلعو منها لانها شايله منو قروش بس نحنا م عايزين نحسسو عشان نعرف مكان الولد تاني الشرطه بتتخد معاهو اللازم قلت ليهو ربنا يوفقك وح ترجع متين انا خلاص زهجت راجعه السودان قال لي نوسه انا متفهم الانتي ماره بيهو الان بس بالعقل لو جيتي مرت اخوك ح تقوم من القبر اكيد لا يعني اخوك ما ح يستفيد من جيتك وانتي قلتي اخوك قال بجيب بناتو وبجي عمره قلت ليهو فعلا قال لي بس تمام بعد يرفع الفراش ويتمو شهر يجو عمره وانتي بتكوني قربتي تنتهي العقد دا لو ناس الشغل اتخلو عنك قلت ليهو انا مستحيل ي رامي اقعد قال لي ولا عشاني سكتا م رديت عليهو قلت ليهو رامي انا تعبانه دايره انوم قفلن منو وكنت زهجانه شديد ومقلقه ومتوتره م عارفه من شنو مفترض اكون فرحانه لاني اخيرا انتصرت علي عبله
مرت الايام وحاولت اعمل انجاز في الشغل عشان أفاجئ رامي رغم انو الضغط كان علي شديد بس كان عندي هدف والمدير متكيف مني شديد طلبت منو يرجع عبدالله في الاول رفض بس حنستو ورجعو الشغل عبدالله حسيتو متغير شديد ما ياهو الزمان قال لي انا بشكرك انك رجعتيني الشغل قلت ليهو انت مهندس كفاءه مفترض بشغلك وعقلك تصل لي كل العاوزو وح تكون مبسوط لمن تحس نفسك انجزت وكسبتها بالحلال بس عمرو البكسب بالحرام بكون مرتاح قال لي فعلا انا طمعت شديد بس اتعلمت منك درس عمري م انساهو انو ممكن بعقلك وبمجهودك تتصل لاكتر من البتتمناهو وانا م عشان رجعت الشغل انا ي نوسه عملت بزنس براي وفشلت و اتعودت ع الشغل هنا قلت ليهو تمام انا وعد اخليك كفاءة وكل الشركات تتمني تشتغل معاهم شكرني وبدينا نشتغل ونطور في الشغل وهو كان نبيهه شديد بفهما وهي طايره وكان متكيف مني عملنا شغل مع بعض زود ارباح الشركه اضعاف اضعاف ولسه في المركز الاول من المبيعات ودا كلو فضل من ربنا كل م اتزكر الكنت فيهو والان بسجد سجده شكر
مرت الايام و رامي قال لي نوسه الحمد لله لقينا ولد طارق وقبضنا علي الدكتور وحققو معاهو وجاب كل الناس المعاهو وقضيتو هزت الراي العام وعبله بقت في خشم اي انسان وافعالها انكشفت وانفضحت ومنتظرين بس حكم المحكمه وقال لي مشيت لي اخوك وحالتو كانت صعبه وقال لي انك نهاي ما تجي بجيك هو ان شاءالله قلت ليهو ان شاءالله وطارق كيف اخر مره اختو قالت لي فتح بس م بتكلم قال لي امس كنت معاهم واتكلم واولادو مع امي كلمت اخت طارق بعد طارق يبقا كويس يمشو يشيلوهم انا اتصلت عليك عشان اقول ليك انا حجزتا بكره محتاجه اي حاجه اجيبا ليك معاي قلت ليهو سلامتك يا رامي قال لي ع فكره جايب ليك معاي مفاجاه جميله قلت ليهو شنو قال لي نوسه هي مفاجأة خلينا بعد نصل ودعني وقفل
اتصلت لي اخوي قال لي زميلك جانا هنا بي اعمامو عملو معاي الواجب وطلب يدك قلت ليهو شنو شنو قال لي انتي م عارفه قلت ليهو ما قال ماشي يطلب يدي جا عشان اعزيك قال لي لا جاب اعمامو واتعرفو علينا ولميت اهلي كلهم وسالنا منهم طلعو ناس ممتازين شديد وامو زوله استاذه كانت وربت ولدها دا قال لي كنت داير اتصل عليك بس جاري ورا التاشيره قلت ليهو انت جاي قال لي اي نور زعلانه مني قلت ليهو نور لاقيتا وين قال لي بتتكلم معاي بتلفون رانيه قلت ليهو والله ما ورتني قال لي عارفك مشغوله بالشغل وعارف اي شي لي فتره متواصل مع نور قلت ليهو طيب مدام انتو جايين انا بكره بشوف شقه اوسع عشان نتلما كلنا بناتك بكونن محتاجاتني قال لي شديد ي نوسه وفاه امهم داخل عليهم المهم انا متي ما التاشيره تطلع لينا بنتحرك وماشي ازور طارق رامي حكا لي بالمواضيع الكانت حاصله كلها والقضيه الفيها عبله قال لي انا عارف عنها كل شي بس ي نوسه م بقدر اتكلم رجال السوق كلهم بعرفها والشي المؤسف لمن زميلي جا اشتغل عشان ارجع ليك قروشك حاولت تتونس معاهو وتسكو بالتلفون وهو الوراني حقيقتا وغيرو وغيرو بس انا م عندي سلطه علي طارق وربنا شاف ليهو يربي اولادو ديل بنفعوهو ويتزوج تاني انا هسي بكره بكلمو بالواضح اقول ليهو اختي جاها عريس قلت ليهو انا ما فكرتا قال لي تفكري في شنو ولد صغير وزول متعلم ووقف معاك الوقفه دي داير ليهو تفكير بعدين انا بالي م مرتاح لازم اشوف ليك راجل قلت ليهو انا م عندي استعداد قال لي ادي نفسك فرصه ما خسرانه حاجه المهم انا وافقتا واديتو كلمتي سكتا م رديت قفلت منو ودموعي سالت م بالسهوله دي ارتبط وليه رامي ختاني امام الأمر الواقع
تاني يوم مشيت الشغل قلت لي عبدالله عايزه شقه كبيره وما بعرف هنا انا قال لي ابشري انا عندي شقه واخدها استستمار بعطيك ليها من غير فلوس قلت ليهو لا لا انا كده م بقبل قال لي فضلك علينا خلينا نكرمك بي حاجه وحلف م يشيل مني قروش وكلم المدير المدير قال لي نحنا اخوانك وعارفين انك م محتاجه بس اقبلي مساعدتنا قلت ليهو تمام قال لي بكلم بشار المساء يجي يشيل اغراضكم وتشرفي الدار قلت ليهو تمام اتصلت ع رامي اكلمو بس تلفونو م دخل معاي عرفت انو في الطياره رسلت ليهو رسائل المساء رامي اتصل علي قال لي الحمد لله انا وصلت السعوديه وتعبان شديد ح ارجع ليك بكره قلت ليهو رد علي الواتساب قال لي اي قريت كلامك ماف مشكله البريحك ي نوسه قلت ليهو رامي ليه عملت كده ليه قلت لي اخوي قال لي نوسه انا تعبان خلي بكره بتناقش معاك قلت ليهو لا هسي ي رامي ليه عملت كده قال لي عشان انتي م بتفكري في مصلحتك وشايفه انو الطلاق نهايه دنيا وانتي بت صغيره لازم اختك امام الامر الواقع ومتكيف من اخوك واقف في صفي ويلا شوفي حيله تاني قلت ليهو قلت كده يعني قال لي بحبك يا مجنونه انا حسيتو بهظر لانو عمرو م كان جادي بس قلبي بقا يدق واتوترتا شديد وحالي بالبلا قال لي حاسي بيك عشان كده تصبحي علي خير حبيبتي 💖 وقفل الخط خلاني اتكلم براي مجنونه انا ولا هو ومعقوله انا قلبي ادق من كلمه معقوله انا بحب رامي وما حاسه مستحيل راسي داش عديل عبدالله اتصل علي ورسل السواق لميت حاجاتي ومشينا الشقه بتاعتو رهيبه كانت وعباره عن قصر حاجه فخمه شديد نور بقت فرحانه قالت لي ماما بيتنا الجديد حلو وانا ما راجعه السودان قعدت اضحك قلت ليها مهما شفتي من قصور ومباني راكوبه ملانه حنيه افضل منهن بي الف مره دي كلها لحظات نعيشا بس ما نتمناها لاخر عمرنا وطنا احلي واجمل ما نفسي بتي تحس بلدي كعب تتقبلو بي اي شي فيهو تاني يوم مشيت الشغل لقيت رامي منتظرني في المكتب وشايل ورود قال لي اشتقت ليك انا كلامو بتهرب منو وهو حاسي بي قال لي اسمعيني عازمك بعد الشغل قلت ليهو م بقدر قال لي ما عايزه تشوفي المفاجاه قلت ليهو قولا لي هنا قال لي مالك محساسني انك طفله وخايفه تمشي معاي نوسه انا كنت ليك امان قبل اطلب القرب منك ممكن تخافي من انسان بادرك الحب اول بس م تخافي من انسان بادرك الخوه وانو يكون ليك سند ووقع في حبك اطمئني انا عمري ما ح ازاك انا بس نفسي تشوفي الحاجه دي قلت ليهو تمام وطبعا زي الجاتني فوبيا لمن اشوفو بتوتر وبصلح قعدتي ولو بتكلم بسكت وهو محتار فيني قال لي نوسه م تحسسيني اني مقيدك ولا دا الخجل ما رديت عليهو بتجاوز كلامو واي شي وهو متفهم الحته دي بقيت اقول لنفسي كده اوفر انتي واعيه خليك شجاعه واكون عندك موقف وبعدين انتي زوله مطلقه ومن هنا عرفت انو مشاعر الخجل والتوتر البتجي بدايه الارتباط م عندها علاقه بالعلاقه القديمه حسيت انو مشاعري بدت تتجدد من ناحيه مبسوطه ومن ناحيه تانيه خاته ماضيني قدامي رامي بعد نهايه اليوم جا ساقني دور العربيه ومشينا وقفنا جنب بيت قال لي انزلي قلت ليهو منو دي البتنزل انت ما جادي يا رامي م عشان انا مطلقه يعني بجي معاك اي مكان انت م بتعرفني كويس ولو سمحت يا رامي رجعني الشغل واعتبر الان البينا انتهي واقف بعاين لي بي استغراب قال لي نوسه ناهيك عن انك اتسرعتي معقوله البينا تنهي بالبساطه دي م مشكله يا نوسه طلع تلفونو واتصل مكالمه وفتح الخط وبقتا اتكلم مع واحده قال ليها الغاليه نايمه ولا صاحيه قالت ليهو صاحيه انت جيت قال ليها اي افتحي الباب انا هنا بقيت مرعوبه معقوله رامي متزوج وشي بقا احمر والغيره بقت تشتغل فيني واغلط واصحح في نفسي لغايه ما جات امو طالعه انا غلبني البقولو قال لي ما تظلميني تاني انا كنت عامله ليك مفاجاه امو جات وسلمت علي وحضنتني شديد عليها وشكلها من وشها زوله فاهمه لدرجه بعيده قالت لي رامي ما وصفك لي بالجمال دا ووينن اولادك م جبتيهم معاك وبقت تقول لي رامي م عيب عليك تخليها في العربيه اتفضلي يا بتي رامي خشمو م فتحو بس بقا محمر لي شديد امو مسكتني من يدي ودخلتني اتلفت عشان اشوفو عمل لي بي يدو حركه اصبري ديك غلبني امسك الضحكه دخلت مع امو وشكلها طيب شديد قالت لي نحنا نتشرف بيك ورامي حكا لي عنك وح تبقي بتي قبل مرت ولدي وما تشيلي هم اولادك بتربو مع اخوانهم بقت تقول لي في كلام وانا خشمي م قادره افتحو وكانت مجهزه الغداء ويدها طاعمه وشكلها زوله مرتبه شديد من شكلها ح تعرف انها استاذه قضيت معاها يوم حلو رجعت البيت مبسوطه رامي الطريق كلو اشيل واحمر لي قلت ليهو كفايه م اتعودت عليك كده قال لي موجوع ي نوسه كيف تفكري فيني التفكير السيئ دا قلت ليهو اسفه والله انا ما فكرت لي نفسي قال لي عافي ليك بس حبيت اشوف لو زعلت زعلي بهمك ولا ح تكوني صارمه معاي زي م صارمه ف الشغل قعدت اضحك قلت ليهو رامي صحي انت شفت مني نوسه الصارمه في شغلها قال لي وحبيتا ومنا عيني اشوف نوسه الحنينه الفضلت عمري دا كلو منتظرها ما رديت عليهو قال لي م شفقان علي مهلتك بس انجزي وفكري قلت ليهو رامي طيب انا ح استخير واديك رد قال لي تردي بهنا اخوك اجي بهنا اعمل ليك عرس في السعودية اتحكو بيهو قلت ليهو سجمي عرس شنو وانا بي اولادي قال لي كمان احلي شي بجيب لي نور زفاف وفارس بدله نوسه ما تخجلي من وضعك انتي م اخترتي تكوني فيهو انتي كافحتي عشان تحافظي علي بيتك بس القدر كان ليهو دور واحتمال عشان تبقي من نصيبي قلتي شنو قلت ليهو م هسي برد عليك قال لي شفتي امي بتحبك قدر شنو قلت ليهو عارف لو وافقت ح اوافق عشان امك عارف لي قال لي رضيااان وليه قلت ليهو انا امي اتوفت خلتني صغيره كنت محتاجه لحنانها وخالاتي كل واحده في همها رباني اخوي وابوي نهاي م اتزوج بعد امي لغايه ما اتوفي اتزوجت طارق وقلت امو ح تبقا لي ام لكن للاسف امو كانت لي عدو والحمد لله قال لي نوسه ربنا ح يعوضك وصدقيني عمري ما ح اخليك تندمي علي زواجنا ح نتجاوز اي نقاشات عشان نكمل حياتنا مبسوطين قلت ليهو رامي والعمر قال لي عمر شنو ياخ انا هسي انشاف ابوك عديل م تبالغي العمر دا الا تقولي ليهم انتي بس انا عندي لسه انتي طفله ابتسمت وحسيت بطاقه ايجابيه م عاديه وصلت البيت والمساء اخوي رجع لي قال لي مشيت زورتا طارق وما شاء الله خرجوهو واولادو في حضنو وكويس شديد وعملت معاهو الواجب واتكلمت معاهو وريتو انو جاك عريس ولازم يعرف عشان الاصول بتقول كده وقال م عندو مشكله بس اكون العايز اتزوجك بخاف ربنا عشان اضمن حياه اولادو لانًو هو قال لي ممكن تجيب لي نور وفارس انا ح اربيهم بس قلت ليهو استحاله توافق وقال لي كفايه عذاب عذبتو ليها م عايز اقيف في وش سعادتها وكلمتو انو العريس رامي قال لي اطمئنيت علي اولادي وبلّغها تحياتي وبارك ليها حسيت انو في هم انزاح مني بس فجاه اتزكرت طارق بكيت قدرتي احتمال انا الوحيده الكان نفسي ما اطلق وحياتي م تدمر بس كلو لخير استغفرتا وقومتا اتوضيت وصليت واستخرتا وناديت رانيه حكيت ليها قالت لي والله يا نوسه م ح تلقي احسن من رامي زول حنين عليك وعلي اولادك ارضي قلت ليها باذن الله حاولت نومتا بدري ورامي مسيطر علي واشيل واتبسم كل م اتزكر موقف ابتسم
تاني يوم قومتا لبست احلي عبايه عندي حسيت نفسي اشوف رامي اتاكدت انو ح يكون من نصيبي لاني حاسه بي ايجابيه لمجرد اتزكرت اسمو وصلت المكتب لقيتو منتظرني قال لي خصم خمسه ايام ليه اتاخرتي قعدت اضحك قلت ليهو طوالي شالتني نومه ياخ قال لي احلي نومه انا غير راحتك م عاوز شي وعندي ليك اخبار ح تبسطك شديد قلت ليهو شنو قال لي معقوله خليني اظبط راسي بي قهوه قلت ليهو رامي ياخ قال لي معليش حبيبتي استحمليني شويه مشا جاب ليهو قهوه وجا قال لي نوسه اخيرا عداله ربنا ظهرت قلت ليهو احكي ياخ قال لي امس الليل كلو كنت اتكلم مع زميلي الضابط وطبعا قال لي كلهم متورطين في القضيه بنسبه ميه في الميه حكمو علي الولد القتل لدن اعدام وعبله مؤبد والبت المعاها خمسه سنه والدكتور مؤبد قلت ليهو رامي ازغرت قال لي مجنونه قلت ليهو م عارفه بس اخيرا حقي وحق طارق وحق غيري خلص قال لي اكيد اي شي ليهو نهايه ونهايتهم كانت كعبه للاسف لانهم بدو حياتهم بالشر اتمتعو في الدنيا بس ربنا قال ليهم خلاص حدكم هنا وان شاءالله عبله تتعظ وتتوب طبعا مفترض يحكمو عليها بالرجم حتي الموت لانو حكم البتعمل علاقه محرمه وهي متزوجه الرجم لكن في بلدنا ما مطبق القانون دا عشان كده اتحكم عليها مؤبد زيو وزي الرجم وبقت عظه لي غيرها اولهم الكانو معاها بس ما مثبت عليهم حاجات وتاني كلو زول يبقا علي مرتو عشره ما يديها فرصه تعاين لي بره اصلا م عارفه انا النسوان ديل جنن ولا رجالهم قاسين عليهم قلت ليهو اكون معاك واضحه الراجل والمره ليهم دور في الحاجه دي في ناس كتيره رجالهم في البيت بعاينو بره وخايضين في الحرام خواضه وللاسف نسوانهم بكونو نفسي الشي كما تدين تدان ما اقول ليك كل الرجالهم خاينين نسوانهم خاينات والله في نسوان مسكينات ورجالهم اكعب منهم ماف ودا برجع لي التربيه المتربيه صاح م بتعاين بره تكتفي بي زوجها وربنا يهديهم قال لي امين ي نوسه المره بي طبيعتها محتاجه البعاملها بي احترام وقت الخصام وبي دلع وقت زهجها وكمان لازم اكون صارم معاها عشان هو راجل قلت ليهو كنا ماشين كويس خربتها مالك قال لي انا بشيلك في عيوني وربنا لا جاب البخليني اعاين بره واخليك قلت ليهو انت لو عاينت بقتلك قال لي افهم شنو قلت ليهو تفهم القتل الواحد دا قال لي لا ي غبيه افهم انك موافقه قلت ليهو ااااااي رامي فرح شديد وقال لي اخوك اجي ونعمل العرس وع فكره هديه ومهيد ح يجو هنا بعد يتزوجو اتوعدنا كده هو كان منتظرك تجي بس انا قلت ليهو لا نوسه م بتجي هسي نقعد سنه وننزل قال لي لو وافقت انا بتم عرسي وبنجي نقضي شهر العسل في السعوديه ونحضر عرسكم بقيت مبسوطه بعد رجعت البيت كلمت اخوي قال لي كنت اصلا عاوز اتصل عشان اقول ليك نحنا الجمعه معاكم ودا احلي خبر سمعتو انك وافقتي قال لي ع فكره انا احتمال ادخل معاك قلت ليهو كيف قال لي داير رانيه قعدت اضحك قلت ليهو فكرت فيها كيف قال لي والله ولا بتزكرها بس دا اقتراح رامي وبناتي موافقات تبقا ليهن اخت قلت ليهو لكن فكرك هي ح توافق قال لي مسكينه انتي موافقه هي ومتواصل معاها رامي ظبط الموضوع ورسل رقمها لي وبقيت متواصل معاها موش انا قلت ليك نور زعلانه لمن تكوني في الشغل بتكلم معاهم بالساعات بس هي بتحترمك شديد زي والدتها عشان كده م صرحت ليك وقالت لي كلمها انت قلت ليهو والله رانيه دي عباره عن ملاك قال لي اكيد انا فهمتها ح امشي بيتهم اطلبها ادوني رد بتزوج معاك ومرتي الله يرحمها ويغفر ليها اخر وصيه قالت لي اتزوج انا حاسه نفسي ظلمتك كتير وانا ي نوسه ما عشان هي ظلمتني بناتي محتاجات البقعد معاهم في غيابي قلت ليهو فعلا وربنا اتم علي خير فرحت شديد لاخوي مرتو الله يرحمها بس نهاي ما كانت بتديني احساس انها مرتو اقل شي تخلق مشاكل ونقاشات ربنا يرحمها بس عذبتو شديد وانا متاكده رانيه ح تحترمو شديد بس ح افقدها في تربيه اولادي 😭 مشيت لقيت رانيه تصلي انتظرتها خلصت قلت ليها شنو المفاجأت دي قالت لي نوسه الكلمك منو رامي صاح قلت ليها رامي ادغل منو الله م خلق تكتك وخطط ما جاب لي سيره اخوي يا حليلو ما بدس شي المره الفاتت وقع في الكلام بس انا م فهمتو وهسي قال لي عديل والف مبروك فرحت فرح انتي تستاهلي كل الخير وما اوصيك علي اخوي سنينو دي كلها مرتو ظالماهو كوني حنينه عليهو قالت لي نوسه نحنا اتوعدنا نكون امان لبعض وما ندي الظروف فرصه تخرب علاقتنا انا هدي شايفه بي عيني المشاكل والقصص قلت ليها واعيه والله يا رانيه ع العموم الف مبروك ربنا يتم علي خير
مرت الايام وانا ورامي بقينا نحب بعض حب عمري م عيشتو الفرق فيهو خوف رامي علي عمرو م حسسني اني اكبر منو كان ح اندم لو م ارتبطت بيهو قال لي ح اخليك تشتري اي شي نفسك فيهو وما تعتبري نفسك اتزوجتي قبل كده اعتبري نفسك اول مره تتزوجي وناس اخوي جو وبناتو قطعن قلبي بكن شديد ع فراق امهن بس انا متاكده رانيه ح تنسيهم امهم وطبعا هي قريبه في العمر ليهن ويقعن ويقومن سوا مهيد وهديه عملو مناسبتهم هناك وجو السعوديه جنبنا ما شاء الله البيت بقا ملان وبجهزو معاي كاني اول مره اتزوج واهلي ف السعوديه كانو كتار كلهم عزمناهم ورانيه يا حليلا ناسيه نفسها وهمها فيني قلت ليها رانيه انتي المفترض اهتمو بيك عشان اول مره تعرسي اخوي رسل جاب امها واختها وما شاء الله اختها جات اوله السودان في الشهاده السودانيه بت عباره عن ملاك محترمه شديد وجهزو تفاصيل زواجنا كلها اهل رامي جابو الشنطه والحاجات رامي كان حريص يعيشني اي احساس انا كنت خجلانه بس هو زعل مني قال لي ممكن تنسي الماضي مجرد م طلب مني كده نسيتو وبقيت في تفاصيل عرسي بالصغيره والكبيره وحجزنا الزفافات ولقينا خبيره مكياج بتجي البيت وكانت لحظات زواجنا جميله شديد اجملها اول م رامي مسك يدي وبادرني احساس انو انا ملكه كنت مبسوطه شديد وانا معاهو نور بتي فرحانه بالزفاف طبعا م كانت فاهمه شي وفارس كمان ورانيه طلعت حلوه شديد وبنات اخوي ما مديات اخوي فرصه يقيف جنبها حارساتنها وطبعا بقن بحبنها شديد وامها طيبه طيبه لمن تحسها بسيطه هما في الدنيا تكون مستوره في فرق بين زول اكون ما عندو وابسط حاجه تفرحو زي رانيه واهلا وفي فرق بين زول اكون م عندو واعاين ليها عند غيرو زي عبله
كان يوم فرحنا جميل جدا وانا ورامي سافرنا اخوي قعد مع اولادي ووصلنا خبر وفاه ام طارق اتصلت عزيتهم وطارق بارك لي وبلغني انو اتزوج والحمد لله حياتو ماشه ميه الميه فرحت ليهو الاستقرار بشبهو والله يازا الكان سبب في زعزعتو
مرت الايام والشهور والسنين الطويله ونحنا استقرينا في السودان. مع ام رامي ابدا ما حسستني انها حماتي بالعكس لو رامي علا صوتو علي بلقاها واقفه في صفي ورامي كان شايلني في راسو واحترم اولادي قبل يحترمني ونور كبرت بقت كبيره وشالت معاي الحمل ولدت من رامي اربعه شهد وشاهندا وشريف وسيف كانو قطعه من رامي وبمجهودنا فتحنا اكبر شركه استيراد وتصدير وانا كان عندي معهد للتدريب وكانو بجوني الناس من بره وعلاقتي في الشغل كانت واسعه شديد وضعت بصمه في اي شركه كبيره في السودان وتم تكريمي من اكتر من عشره شريكات بالاضافه للشركه السعوديه الاشتغلت فيها خمسه سنه كانت اجمل خمسه سنين عشتهم وهديه ولدت ولدين تؤام ورانيه كمان جابت لي اخوي تلاته اولاد الاولاد الكان نفسهم فيهم وكبرت نور وفارس وكانو بمشو لي ابوهم بزورو اخوانهم اولاد عبله محترمين شديد بشوفهم مع نور وفارس وعبله ماتت في السجن ودي كانت نهايتها ونهايه روايه احببت وانا علي ذمه اخر ح اتكلم عن اهداف الروايه الانا مخصوص كتبت فيها الروايه
اول اهداف روايتي المتزوجه البتحب وهي في عصمه راجل عنوان الروايه خدش كميه من الناس واتحسسو. وانا لحظتها اصبت الهدف ولو بنزل ليكم الرسايل الفي الخاص ح تستغربو شديدوتحتارو كتار عاشو في قصص حرام زي دي بس هل كانت عندهم الجراءه يحكو لي ازواجهم زي م عملت نسيبه انا قصدت اخلي نوسه تحكي لي زوجها عسي ولعل يتراجع من الظلم العيشا فيهو وفي الروايه في كم قصه واحده متزوجه وعامله علاقه اولهم بديتا بي نسيبه ما عايزه ابرر علاقتها مع خالد بسبب زوجها ليه لانو حتي ولو م من حقها تعمل علاقه وهي في عصمتو تصبر او تطلق بس م تقع في الحرام بس نوسه زيها وزي اي واحده ضعفت قصاد اهتمام وكلام معزول من راجل وكانت مظلومه ومحتاجه للحاجه دي والشي المؤسف تسعه وتسعين في الميه سببها طارق لانها كانت بتترجاهو انو يحافظ علي البيت ويرجع ليها زي زمان وما كانت عارفه سبب التغير والشي الصدمها زواجو من صديقتها والصدمها اكتر انو داسي زواجو منها الراجل محلالات ليهو اربعه وربنا ما قال دسو زواجكم التاني لانو لا عيب لا حرام ودا حق من حقوقك بس زي م انت عندك حقوق هي عندها حقوق ليه في عصمتك وتهجرها ليها هي في عصمتك وتعتبرها زي البيت الواقف وتزلها وتهينا من غير اسباب لو م عندك استعداد للعدل طلقها ودا ابغض الحلال وعشان ما ترتكب فيها ذنب انها شافت غيرك بالذات لمن تكون صغيره ومشاعرها لسه طلقها وخليها تنزوج عديل ما تعمل علاقه
نجي لي الوقعت في نفس الغلط هديه وكان غصب عنها ومشكلتها نفس مشكله نوسه ضعفت قصاد الكلام المعسول
بس نجي لي مرت خالد المتزوجه خالد وبدل العلاقه عامله الف وكمان مع منو مع المشاهير وياريتها وقفت علي انها كده حاولت تبتز نوسه وتفضحها وهي فيها كل عبر الدنيا لغايه م دخل رامي حظر حسابها وعرف حقايق عبله وكل شي كان لخير
نجي لي عبله الممثله انها الشريف الرضي وهي فاتحاهو بيت عديل وللاسف كل البجن فيهو متزوجات تعالو نشوف المشكله في شنو في النسوان بقن عينن طايره ولا في الطرف الاخر اكون مهمل وخايض الحرام بكل انواعو نكون واقعيين في ازواج متزوجين بحبو نسوان متزوجات ناهيك عن انت اتعديت حدودك شعورك شنو لو زوجتك حبت وعملت زي الانت بتعملو حاره صاح م حاره وبس مووووت تسعه وتسعين في الميه من العلاقات من النوع دا بكون سببها الراجل بحلل لنفسو علاقتو مع متزوجه وناسي كما تدين تدان وبتترد ليك بس هل كل النسوان زي نوسه بواجهن وبقولن الحقيقه طبعا لا ليه لانو عندنا الرجل السوداني ممكن يقتل عديل لو زوجتو قالت ليهو بحب غيرك بس لو كل واحده فضحت نفسها لي زوجها وورتو قتلا يا خلاها بس المهم تعترف بغلطها كان العلاقات من النوع دا قلت بنسبه تسعه وتسعين في الميه
الهدف التاني من الروايه عبله الصديقه الدخلت حياه صاحبتها بسبب فرق الطبقات البينهم خربت كل حياتها وجاطتها نوسه كانت حالتهم الماديه حلوه شديد ودا كان رزق من فوق جاهم وعبله رزقها انها تقوم وتلقا م عندهم تقرا وتجتهد وتشتغل وتطور نفسها وتسد حوجتها وتفرح بي انجازاتها لا تمشي تفتش ليها جاهزه بالقوه والرجاله وفي كتار زي عبله دي لمن يطمعو في غيرهم بحاولو يخسروهم ما بسعو لي انهم يكونو زيهم وللاسف بس ربنا قادر مهما عملت ونصبت مكايد بالشيوخ وبي غيرو نوسه ما انهزت وقفت صامده زي الجبل وكل العملتو فيها عبله م كسرها بالعكس زادها قوه وصلابه وعبله كانت سبب في طلاقها بس ما انكسرت وقعدت في البيت طلعت للمجتمع تاني مره بي انجازاتا وكان احلي انجاز بالنسبه ليها تكريمها بعد سته شهور من طلاقها والجرايد والمحطات اتدولت الخبر وكان اعظم انتصار ليها قصاد شر صديقتها
تالت شي نجي للنسيبه نتفق النسيبه لمن تكون مسكينه وما قادره علاقه الزواج بتكون ناجحه بنسبه ميه في الميه زي ام رامي بس ام طارق كانت سليطه وقدرت فرقت بينهم للاسف انا نفسي افهم ليه في نسيبات بعتبرو زواج ولدهم حرب وما بتراعي لي ولدها ولا بتتمني ليهو الاستقرار بتدوس عليهو من طرف نفسي اعرف بعد تخرب حياتهم بكون احساسها شنو دا لو اصلا هي بتحس وربنا اكفينا شر النسيبه الزي ام طارق
رابع حاجه الطلاق م نهايه دنيا لو انتي صغيره واولادك صغار ادي نفسك فرصه والمره دي م تغلطي غلطتك الاولي اختاري البقدرك زي مهيد ورامي بس اوعك بعد اولادك يكبرو تفكري تعرسي لانو ح يدخلو في صراع نفسي بالذات لمن يكون عندك ولد
خامس شي زوجه اخو نسيبه كانت كعبه بمعني الكلمه زوله ما بت اصول انانيه وبتحب تدوس علي الناس بي جزمتها بس رغم الصفات السيئة الفيها زوجها لا طلقا لا شكا منها عكس الكانت حياتهم مستقره بفتشو لي نسوانهم في المشاكل زي م عمل طارق ليه الراجل البتحترمو وتقدرو بعتبرها زي الجزمه وبدوسها والبتكون شريره بخافو منها وبحترموها للاسف لو كانت عندك الزي نوسه وهديه كافي صبرهم وتحملهم ليك بالهدايا والاستقرار ولو عندك زي عبله ومرت اخو نسيبه ادبهم لأنهن استاهلن الادب بس اوعك تغلط وتعمل العكس ساعتها بتكون في عداله السماء وح تكون ضدك فاحزر
اخر شي الكلام لي الزي طارق لانهم كتار شديد اذا عايز زوجتك بعد تكون تحبك وتعشقك تكرهك اهجرها
اذا عايز الشيطان يدخل والحب يموت اهجرها ودمر حياتك وخونها مع متزوجه زيها عشان الدنيا ح تدور وساعتها م ح تستحمل
انا حزينه انو الروايه خلصت لاني عشت كل تفاصيلها
بعتزر علي اي تاخير وبتمني تكون الروايه عجبتكم مع خالص حبي الشديد لكل متابعني نسيبه حمد عبدالصادق اقبل النقد بصدر رحب 🥰.
تمت بحمد الله
لقراءة جميع فصول الرواية من هنا
وأيضا زرونا على صفحة الفيس بوك
وايضا زورو صفحتنا سما للروايات
من هنا علي التلجرام لتشارك معنا لك
كل جديد من لينك التلجرام الظاهر امامك
وايضا زورو صفحتنا سما للروايات
من هنا علي التلجرام لتشارك معنا لك