رواية خطايا واجتثاث الفصل السابع والخمسون 57 والأخير بقلم نور علي البصري
لقد بعت السفينة وانتهى الأمر
ما كان حليفي انال إنتصاراتي فلملمت الخسائر واشتريت الحياة
ـــــــــــــــــــــ🤍ــــــــــــــــــــــ
مــــــــــــــــــريم..
من يوم اللي دزيت البصمة لصاحباتي وهنه يومية يسألن عني وقلقانات بس الحمد لله لطف الله بعباده جبير أخيرًا طلعت نتيجة الزرع و جان سلبي الحمد لله جنت كولش خايفة لا أكون ورثت مرض أمي بس الطبيب كال:
_ ماكو شي خطر بس هم لازم تنتبهي ما دام التاريخ الطبي للعائلة بيه حالة سرطان الثدي لازم متابعة مستمرة وفحوصات منزلية وفحوصات دورية.
بس طلعنا ضحكت من عـون.. حضني و الضحكة تحولت لبجي متحاضنين ونبجي ونحمد الله ونشكره:
عــون:
ــ يارب أحمدك وأشكرك.. يارب ما كشفت علينا بهيج مرض والله ولج من يوم اللي أخذوا الخزعة وآني ما أنام حسبة توديني وحسبة تجيبني ولج ما مصدك سلامات بوياي أفيش مي بارد ونزل على گلبي ربي أحمدك وأشكرك.
وخرته مني شوية وكلتله:
_ العالم دتباوعنا عيب.
_ خلي يشوفون بايك لو ناهب فرحان لو جنت مرة ألا أهلهل واهوس بعباتي.
ضحكت.. لابد يحشش ميعرف يضم مشاعره باوعتله واحنا نمشي ونطلع من المستشفى:
ــ والله عاد تطلع مرة معدلة ومزيونة وحلوة أم عيون خضر.
_ أنجبي لج مو أخذج الواهس أفييش ربي هسة أرتاحيت مال أرجع أنام نومة أهل الكهف ما أكعود إلا ورى سنين.
ضحكت:
_ وشستفاد لو نمت هاي النومة أكولك نمر للسوك نجيب للأولاد شي يفرحهم وهم لوجدان.. هاي تمشي وتوصي إذا النتيجة سليمة جيبي نذرج وياج.
_ لا حبيبتي أذبج بالبيت وأروح لعلوة الطليان أجيب ذبيحة فده لسلامتج.
بس وصلني للبيت وراح دخلت كولهم ركضوا علية وبصوت واحد:
ــ هااا بشري.
مردت أسويها دراما مسلسلات وأتظاهر بالبجي وأكول الهم النتيجة سلبية وأخوفهم لا خطية حاجيتهم وعيني على وجدان بإيدها سبحة تسبح بيها من طلعنا لزمت إيدها وكتلهم:
ــ الحمد لله النتيجة سلبية ماكو كانسر مجرد إلتهاب وتليفات بسيطة وأعالجهم إن شاء الله.
ــ ألف الحمد لله والشكر ربي مقصرت هسة أروح أتوضا وأصلي ركعتين حمد وشكر لله وأسجد سجدة الشكر يلا ولكم كولكم تتوضون وتصلون وتحمدون الله وتشكروه.
يمكن العشرة الصارت وي وجدان بوقت الشدة بانت مواقفها ولو هي قبل جانت حيل تأذيني ومعذربة بس يلة الواحد من يكبر ينضج وإحنا كبرنا على طلايب الغيرة والمنافسة عالرجال
عاد رحت دزيت بصمة للبنات وبساع فتحنها بس ماجدة يمكن ما عدها نت سولفنا وفرحن وطلعن كل وحدة منهن ناذرة نذر لوجه الله فده لسلامتي بعدها خابرت ماجدة.. وبلغتها.
مـــــــاجدة..
أتصلت بيه مريم عالشريحة رديت عليها:
ــ أحجي ولج ليش تبجين شكو على ما أفتح نت و أسمع البصمة مثل ما تكولين كوله وكت وقلق خوووب أحجيلي هسة :
عاد كالت:
ــ ماجدة ابشرج النتيجة سلبية ماكو أي كانسر
ــ الف الحمد لله مريومه فرحتيني.
حمدت الله وشكرته وحسيت روحي ردتلي بعد هذا القلق نهيت الإتصال منها ودخلت للبيت مرتاحة لكيت ماجد.. كاعد ومصفن وسألته:
ــ شبيك؟
مـــــــاجد..
سكتت.. متعلم على إهمال فيروز وما أكدر أحاسبها مثل قبل لأن لازم أحاسب ماجدة هم كلت بقلة حيلة:
_ سهلة نطلب من المطعم.
بس ماجدة.. أعترضت:
_ لا عيوني شبية صديقاتي فتحت كاميرا وياهن شيكولن أطبخ على الأقل ما أدور أعذار عشتوا وأحلى مطبك سمك مقلي مرشوش بمبروش الليمون والثومية تيراااررا ررااا.
طلعت من المايكرويف صحن بي تمن أحمر و فوكاه سمكة مقطعة شرائح سألتها:
_ هذا الصحن النا كولنا.
_ غدانا آني وياك و طيف.. أما العوبة فيروز.. يطبها مرض أمس طبخت الكم دولمة ومحسبتنا آني وبنتي و الزايد ضمته حتى كنالك متغدين وغلسنا.
_ ميخالف بس هذا ما يكفي؟
_ أكل أنت وطيف.. آني أكلت تشيز كيك.
_ وهذا الشرش كيك مدري شتسميه شنو قيمته الغذائية كعدي كعدي وأنتِ ولج فيروز.. من تجيبين من كدج وكد الخلفتج عود ضمضمي ديلا طلعي الدولمة حرريها خلينا نزغنب.
مـــــــــاجدة..
لوت بوزها فيروز وردت:
ــ تيررراا ليش ما تأكلون طبق التيررااا أمس أكلت دولمتي وگلت سحنت روحي سحن.
ما سكتت و ألتفتت عليها وكلت:
ــ قابل كذبت؟ أحبها حامضة مالحة أنتِ تسويها حامض حلو وتسحن
بس حاولت تحاجيني عيبت علية تقلدني وتهز بإيدها:
ــ ما يسوى كل هالمقدمة والخطابة كعدتي تخطبين بينا وتتباهين وتاليها طلعت سمكة وحدة ومقطعتها ثلاث قطع كل قطعة گد إصبعي.
راحت طلعت الدولمة و تدردم:
ــ يلة شنسوي راح أحميها ونخليها وي طبق التيررراا السحري مال سمكة ماجدة.
أبتسم مـاجد.. وسكت ما معبرنا بس سأل بنته:
_ شعجب تأخرتي؟
_ درس إضافي.
_ خوش.
حسيته ما مقتنع بس غلس ميريد يضغط عليها البنية تعبت نفسيتها.
أكل شوية وكال:
_ اكلو تغدوا آني شبعت.
_ بس ما أكلت شي خاف لأن قليل والله ما أعرف شكد أقيس الأكل آني أستخدمت قياسات عالمية النفر ثلاث معالق رز و قطعة سمك والباقي خضار و مقبلات شوف هاي آني سويتها.
ما ضكتها صوص ليمون بثوم مكسرت بيها بملعقة أكلت حسيتها حادة شوي بس كوتلها:
_ طيبة يلة تغدن بابا طيوفة.. أكلي وجهج صاير أصفر أعرفج تحبين الأكل تردين أوصيلج كراعين التحبيهن من المطعم.
هزت راسها لا.. وكامت صعدت لغرفتها نفخت:
_ مو حال هذا بس لا النوب تتعقد.
_ لعد أسمح لعمتها تجيها تشوفها بالوقت الي أنت بالدوام إذا أنت متريد تلتقي بإختك البنت مالها ذنب تقتلعها وتجتثها من الرباها هذا نفسيًا غلط.
باوعلي:
_ ما أعرف..
_ بعد لازم تعرف لمصلحة بنتك.
_ شوفي فضائل متعلقة بطيف وطيف ورقة ضغط أريد أعرف عن رحمة وشنو شغلها أمور لازم أفهمها.
ــ منو يكول عدها معلومات بعدين كوتلك آني شنو سوت أختك لو ما مصدكني.
_ عقليتي كرجل أمن لازم أسمع أكثر من طرف واحد.
_ أوف منك هواي تهنبل بوظيفتك أستجن عموما كيفك بعدين رغم المرة تكرهني بلا سبب بس شنو أذنبت ترى حرام و وحدها ببيت خاف يصير بيها شي وهي جبيرة إذا على زواجاتها أبوك أنطاها الذنب كوله ذنب أبوك المسكينة شتكدر تسوي الحق يقال وإذا سكتت عن حقيقة أبوك ورحمه وأمك يجوز مثل مكالت بقيهم ذكرى حلوة بعقلك متريد تقهرك أنت كشفت أهلك والأفضل تغلق ملف رحمة.. وخلاص والعايش لابد بيوم يظهر وآني كدامك أكبر مثال.
حسيت فيروز مركزة ويانا وهو عض شفتة يمكن جفصت عبالي ما يضم عليها شي عاد غيرت الموضوع المن ضوجة الخلك هاي لاحظتها هواي تنس ومن جوة لجوة والعرايك اللي جانت تسويها عافتها تحولت لهادئة
قضيتي تجرجرت أشهر رغم طلع تحليل النسب إيجابي بس الحكومة فاسدة وروتين الدولة ممل شكد حاولوا بتهديد وترغيب
اليوم سويت كيك وزينته بنقش رتبة مقدم لأن زوجي أستلم ترقيته لرتبة مقدم وسويت أجواء وحفل أحاول أخفف توتر البيت أباوع لبنتي هادئة والظاهر عمتها تروحلها للمدرسة تلتقي بيها.
سألتني فيروز.. الي من فترة تتابع قضيتي وتهتم أكثر مني:
_ يعني إذا كسبتي قضية الورث تصيرين مليارديرة.
باوعتلها وما حجيت ردها ماجد:
_ شعليج بأمور غيرج أستجني.
زعلت وراحت غرفتها تدردم:
_ الله ينطي جوز للماعنده ضروس بخت.
طيف هنا أول مرة طلعت من صمتها تفاعلت لأجلي:
_ اللهم صل على محمد هاي عينج ليزر لا تطيرين رزق أمي.
هنا حجيت:
_ تدرون بيتي وزوجي وبنتي والي ببطني أهم عندي من أموال العالم كولها.
من أشهر حامل وعلى وشك ولادة طبعاً وضعي دقيق متابعة مشددة وعلاجات ملائمة للوضع الجديد إي طلوك ممنوع لأن إحتمال الطلوك يحفز توتر و انفعالات الصرع لذا حددت موعد الي قبل إكمال شهري أولد عملية بس الحمد لله كولشي تمام بس وصل للموعد ولادة قيصرية وولدت بنتي لارين.. ردت أسميها سـؤدد.. كد ما أحب سـؤدد.. وأحس فضلها كبير علية بس الأبو ما قبل وحتى تفشلت لأن كوتلها راح أسمي بنتي سـؤدد.. هي هم ولدت بنت سمتها ماجدولين.. الأسم الي حبيته رغم أسم راده عدوي بس لأن قريت قصة ماجدولين ترجمة المنفلوطي وشكد بجيت بيها الظاهر صاحبة هيج أسم دوم حظ نحس.
تأجلت القضية الي صارلها سنة معلكة قضايا الورث متعبة ببلد روتينه مزعج وجرجرة بلغتني المحكمة ديسون فرز للاملاك الموجودة والمبيوعة يحددون قيمتها قبل إصدار الحكم النهائي طمني يكون لصالحي بس بعد جرد الأملاك و الرجوع الى أساسها هل فعلاً ملك شاكر عن ورث أمه يعني شغلتج تطول مراجعة أرشيف العقارات وهوستها هوسة أما المبيوع والمتصرف بيه خلال السنين الفاتت من حياة جدي ليومنا يعتبر دين تجبر عمتي بسداده أو مصيرها سجن أكدر أقاضيها والله لو علية ما أريد شي بس راحة البال.
وصلنا خبر فضائل.. باعت البيت الي هو أصلاً من زمان خواتها و أخوها متنازلين الها عنه و أخذت بيت يم أختها مودة واجرته كراتب ووارد الها و كعدت عند مودة الي ترملت قبل أربع سنوات عدها رجلها وواحد من ولدها قتلوهم د11ما أعرف ليش أنقهرت على فضائل رغم اذتني هواي الله لا يخلي بشر بموقفها الي تنباع مرتين شنو فرق أبو ماجد.. عن لـؤي.. الفرق بس رتبة و مكانة وإلا طلعوا كولهم بعثية أو جوكر يلعب صوبين من أفقرهم لأغناهم يمشي مبدأ الساديا والاجرام بدمهم.
بيوم أجتنا مودة راحت طيف.. تفتح الباب وأجت تتحاضن وي عمتها:
_ هلا بريحة عمتي فضولة هلا بعماتي الأحبهن.
بلة هاي تهلي ترحب بيهن لو دتغثني هاي بنتي بنتهم ما فهمت عبالك آني مرت أبوها رحبت بيها وباستني مودة هي من خوات ماجد من الأب والأم و جانت أحسن من خواته من أبوه. سلمت علية :
_ شلونج ماجدة.. صايرة ضعيفة أذكرج قبل جنتي مملية ومدبدبة.
رديت:
ــ جنت مدبدبة من الخير جنت مسعدة وهسة الضيم كاتلني.
ضحكت:
ــ شنو ماجد.. مجوعج.
حسيتها بيها زعلة من ماجد من جابت إسمه
طلعت فيروزة وسلمت من ورى خشمها وجنها مودة هي هم مو هلكد تحبها.
فيروزة : يا هلا..
مودة : شلونج أم سند..
فيروزة: اااح.. بخير.
باوعتلي فيروزة وكالت:
ــ البيت صاير عبارة عن لاجئين وخطارهم.
ما تقبلت الكلام منها.. مدري الشغلة شغلة لباقة وتربية :
ــ هذا بيتها لأن بيت أخوها ومرحب بيها بأي وقت.. تفضلي تفضلي عيني أم فهد..
دخلت وهي تهمسلي:
ــ شدت راس وياي لأن محبيتها زوجة لأخوي أعرف أهلها وأعرفها من طفولتها جانوا يكولون فيروز لحميدان أبن خالها آني تعجبت شلون عافته و تزوجت أخوي بس بعد قسمة ونصيب بوقتها سكتت وما كلت لماجد البنت جانوا يردوها لأبن خالها خفت لا تطلع بينهم علاقة حب أو سالفة منتهية لا تتورط لأن ما عندي دليل بهذا مجرد حجي العالم جانوا محجوزين لبعض وأهلها بمنطقتي جوارينا.
فيروز: هااا.. دتنطين السيفي لضرتي من تحجين علية عود نصي صوتج.
كالتها ودخلت عافت خطارها بباب الإستقبال ظلت أم فهد كاعدة عاد ضيفتها وبلغت ماجد اللي طلع الها شافها حضنها وباسها أم فهد بيها من ملامح رحمة هواية أشوف ماجد يباوع لعيونها ولصفناتها رغم كبر عمرها بس مبين جان ديدور على رحمة بملامح خواتها كل شوي ذب حسرة ودنك:
مودة : خوية شلونك.
ــ هلا خوية شلونج شخبارج عذريني صارلي هواي ما مار عليج.
_ خوية على الله عايشين.
_ ددزلج مصرف بيد عامل من عمالي مجاي أفرغ اجي.
_ إي خوية وصلن وأنعم الله هم عندي راتب الشهيد هم مكضيلي شغل خوية وهم فتحت سوبر ماركت واكفة بيه ونعمة من الله نعيش البنيات وأبني البقالي خوية ما جايتك على فلوس وأدري ما تجي لأن جبت فضائل يمي تعيش بس أنت أخونا الوحيد وتعرف حماي مرته ماتت من سبع سنوات كعد بلا مرة وقنعوه ميلكه أفضل من فضائل وآني قنعت فضائل تأخذه عنده خلفه وأولاده معرسين وعندة بنات أثنين حديثات وولد شاب ذول ما متزوجين هم تعرف فضائل فاتتها الخلفة وهذول يكملون النقص عدها.
_ إي.. بس حماج أهله يعني إخوانه يعرفون ما متزوجة و أختج متزوجة مرتين شلون تركعنها عاد فنون طلعتن أنتِ قصدج نزار رايدها هذا العايش بأستراليا
حاجته بزعل:
_ إي خوية هوة نزار إنسان متفهم بس خوية شبيك وياها عفاا عليك خوية مو هيج الحجي وحماي واحد فاهم ومو همجي وهي شرحتله كل ظروفها تدري هو أمه مرة أجنبية جان بالخارج عايش يجي للوطن زيارات ويرجع تدري أنت متأقلم طباع أمه و إجانه من شهر بقى يمنا والله شو أقتنع بفضائل إذا توافق حتى يجي يطلبها منك يعقد ويسوي عرس بسيط و يأخذها لبلده لأن هو هناك مستقر بأستراليا وشغله وحياته هناك.
صفنت:
ــ و أختج مو جانت رافضة الزواج.
_ آني وخواتي قنعناها وجنها أقتنعت هي فنت حياتها لخاطرك أنت وبنتك لا تزعل حتى حقوق السجين السياسي وباقي حقوقها شالتهن أنطتهن الك وي حقوقك فتحت محلاتك وخير من الله بس بعد ما أخذت طيف منها وهي روحها بالدنيا إجه الوقت تهتم بروحها
سكتت آني حقي من أخذ موقف شلون طاوعت أب وصولي و شلون أنحدرت لهيج مستوى فضائل من بعد رحمة أجمل خواتي باقي الخوات جمال عادي.
همست:
_ خلي يجي ويجيب وياه إخوانه ويخطبون.
وهنا أنشغلنا بهوسة خطوبة فضائل الي أضطر ماجد.. يسكت من أجت لأن الرجل جان يريد حفل بسيط مجرد عقد وتلبيس حلقات و بنتي طيف أحسها مقهورة خصوصاً من سمعت إن فضائل راح تسافر وي رجلها لأستراليا هنا يعني فراق ورى الحفل وقبل لا تروح فضائل وي مودة..
التفتت وحضنت طيف:
_ أخاف أبقى وحدي أخذوج مني والله عوضني بنزار بس لا عبالج أعوفج راح أنفذ كل اللي راده أبوج حتى يقبل نتواصل يرجعلج نقالج بيناتنا مكالمات فيديو وهم ماراح أعوفج كل سنة أجي أبقى يمج فترة.
مسحت دموعها وباوعتلي من ورى خشمها.. أعرف هي ما حبتني ولا راح تحبني بيوم بس أووي مشكلتها:
_ أريد أحاجي رجلج.
ــ وهو ما يريد يحاجيج.
نفخت:
ــ اللهم طولج يا روح.
بس صوت ماجد.. نتر بية:
_ لا تدخلين وأنتِ تعاي وراي.
لزمت فستانها مال الخطوبة لا يسح بالكاع وراحت وراه سدوا الباب.
ماجـــــــــــــــد..
أنتجيت على الباب و التفتت علية وكالت:
_ مو كولشي أعرفه عن رحمة.
نترت بيها:
ــ جايبتني هنا لأجل هذا؟
_ هي من النوع الي تتصنت.. فضولية ودومها تتابع أفلام المخابرات حتى مسلسل رأفت الهجان جانت مسحورة بيه وبشخصية الجاسوس أفلام جمس بوند أدمانها تذكر جانت دوم توصيك تجيب سيديات سلسلة أفلامه.
_ كل شخص يحب نمط من مسلسل أو فلم يتابعه.
_ إلا رحمة.. جانت تحب تتقمص و تتجسس وأول عملية كلفت بيها نفسها بدون تجنيد من أحد هي من عرفت سري وسر أبوي جانت تعرف كولشي وكم مرة رادتني أتوسطلها يم لـؤي لأن سمعت يريد شخص يتكفل ببيته و ضيوفه كم مرة دز على مرتك بالبداية تلبي بس تالي بدت مرتك تنسحب و حست أكو شي مو تمام هذا اللي أعرفه عن موضوع مـاجدة.. أما رحمة آني أتصلت الها بلؤي.. بصفته
دنكت:
ــ رجلي للأسف.
وكملت:
_ المهم وافق و شرطت ينتهي دوامها العصر ترجع ما تبقى تتأخر راحت داومت يوم بعدين رفضت ظل يروحلها للمعهد يجيبها منه وتجي تشكي منه يمي أحس بذنب آني اللي قدمتها للوظيفة بس ما عبالي هيج بعدين صارت هي الي ترغب بهالشي وتتعمد تخلي مرتك بالصورة وهي ضحيتها وهي الي تأخذها تروح لبيت لـؤي رغم إن الواقع من قبل لا تقنع ماجدة.. وترافقها بطلعاتها جانت رحمة مقدمة على شغل يمه صارت تتأخر تتختل وكم مرة أحاسبها حتى أضربها بس تمردت هواية وتغيرت أخلاقها وصارت مو رحمة النعرفها.
وصلت بيها تهددني إذا ما أسايرها ونذب الصوج كوله بماجدة تفضحني يمك ويم العشيرة بزواجاتي و تسلم رگبة أبوي للمشنقة وحتى تصير سبب بإعدامك الظاهر لؤي جان يوجهها جان يريد ماجدة.. تطيعة وترجعله وتتركك بأي ثمن والظاهر من شاف ما مني فايدة لطموحه طلقني أصلاً جنت اله مجرد نزوة عجبته فكرة يسود عليها ويكسر عنفوانها هو بنفسه كالها الي جذبني بيج لسانج وعذربتج أريد أخضعج بعنفي وساديتي وأنتِ مجرد نزوة حمدي الله ما سلمت أبوج للإعدام ما أريدج بعد بس مهمتج هسة ماجدة تطلع من بيتكم وإلا أگص لسانج مثل رنا
بوقتها ما جنت أعرف منو رنا بس تالي تذكرت مرة ماجدة گالت رنا مرته خرسة خفت والله هو إنسان خطر ما صدكت عافني وطلقني ما شفت الأيام الي يمارس بيها علية همجيته وعنفه كرهني حتى بأسمي ما صدگت أخلص منه وطلقني آني قبلها توسلت بي يوظف رحمة.. الله يشهد عبالي وظيفة مضيفة بمكان عام مجرد تستقبل وتهتم بضيوف المؤتمرات والندوات بهو الإداري لو بقاعات عامة ما جنت أدري شنو
ضام لأختي وأنطاني ورقة طلاقي بيدي الشفتها مطبگة وي عقد الزواج وكال متفيديني بعد بس عرفت جان يهدد أبوي ويساومه إذا ما سلمناه ماجدة وخربنا بيناتكم يعتقل البيت كوله والكل ينعدم.
_ أبوي.. هم يدري برحمة.. عمي مو بيت عصابة.
_ لا ميعرف والظاهر لـؤي حاسب لكل شي حساب و بيوم الاعتقال بقينا بقاووش ورحمة جانت ويانا بس فجأة بالليل أجو سحلوها نظرتها إلي جانت تحجي سالفة روحة أبدية بلا رجعة
أذكر قبل لا ياخذوها بساعة حضنتنا حجتلي كل نشاطها وشكاتبة تقارير على صاحباتها و هواي أمور و شنو وظيفتها بالضبط يومها أنصدمت ما عبالي واصلة لهيج مراحل وي لـؤي.. جان مجرد سمسار عليها لأتباعه وهي جانت تسجللهم بليالي حمراء.
جانت يمي طاولة تحفيات شمرتهن عليها بغضب ... مسحت دموعها
وكملت:
_ رحمة ما جانت ضحية ولا أنجبرت هي رادت هذا الطريق وسعتله أذكر يوم قبل لا ياخذوها بجت وكالت.
_ أنكشفت لأن ردت أتخلص من لؤي صرت ألعب على الصوبين وياه ووي عدوه وتاليها كشفوني ما أعرف شنو مصيري هسة بس ذمة.. إذا ما رجعت ما أريد أحد يعرف آني شنو جنت خاصة ماجد.. أريد أبقى ذكرى بيضاء ونقية بخاطره.
خوية هذا الي أعرفه بس وين أخذوها و شسوو بيها أقسم بالله وداعتك وغلاتك ما أعرف عايشة ميتة؟ ما أدري وإذا سكتت طول هالفترة جنت لمصلحتك ما ردتك تحس بالعار من ورايه ومن وراها ثق بالله آني أنجبرت وما جان گدامي خيارات سكتت لأنها ذممتني تبقى صفحتها بيضاء ونقية عندك نفذت الوصية لحد اليوم بس هسة خنت العهد لأن خسارتك صعبة وخسارة طيف أصعب آني تزوجت فلا تحرمني من البنية أجيكم مرة بالسنة وأتواصل بالتلفونات أني سكتت والله تنفيذ وصية بس بعد شو رحمة راحت وما رجعت وحملتني هاي الذمة وهاي آني اليوم كسرت حلفاني ما جنت أريد أقهرك بالحقيقة.
حجتها ودارت طلعت.. بعدني مجروح جرح كبير من خواتي وأهلي بعدني ما طابت كسرتي بيهم تركتها تروح و بقيت حاط حدود بعلاقتي وياها بس كوله لخاطر بنتي مكدرت أضغط أكثر عليها أخاف تأذي روحها فقبلت يكون بيناتهن تواصل.
قضية ماجدة ظلت بإيد الفساد وكل جهة تريد تهبش الثمن وصارت السالفة كولها مساومات هواي وتأخير بتسليم الورث بحجة دنصفي تركة شاكر من تركة أبوه إلي هي من حق العمة أما وصيته بالهبة فاشترطوا إلا موافقة الورثة الي هي العمة وهواية صعبوها علينا تاليها أخذتها و تنازلت لعمتها عن الهبة حتى نفتك بس هم ظلت المعاملة تجرجر وصلت الأمور للتهديد والمساومة رفضت وخلي شيصير يصير كافي ظلم.
مــــــــــاجدة.
شهر يجر شهر صرت ما أحسب الأشهر كرهت الورث لأبو الياخذه بس ماجد كاضني وما قبل أترك سالفة ورث أبوي گال ميستاهلون ناس باطل طبعاً بهاي الفترة تحسنت علاقة ماجد.. بإنتصار صرنا تعزمنا ونعزمها وهي تدري بكل أمور القضية والورث وكولشي من أول يوم آني ما ضميت عنها شي ولا عن صاحباتي
وبيوم أتصلت إنـتصار:
_ عمتج تلح أجي وياها الج وتريد حل ومبينة ناوية على شر يا خية.
جاوبتها بملل:
_ أهووو.. هاي ولا تمل دجيبيها بلكت نوصل لحلول..
بس أجن استقبلتهن وهاي فيروز ما عافت المكان إلا وتگعود يمنا وصفت لعمتي تتلوك أبتسمت عمتي الها وبس عليها سلمت.
حجت عمتي:
_ أجيتج حتى تتنازلي.. عن الورث القضية وكسبتيها وباقي فرز أملاكي وورثي من أبوي من أملاك شاكر.. مو من صالحج تعاديني أبوي الي كبر أملاك شاكر من ماتت أمه لمن بلغ شاكر 18 وسلمه ورثه أبوي أشتغل و تعب وشاكر مات قبل أبوه ما الج ورث أبوي يعني كل الأملاك بتعب أبوي شغله حتى يكبر ورث أبنه من امه.
باوعت لفيروز اللي كامت متوترة وعافتنا وطلعت:
_ ماضي أهل رجلج ههههههه خواته شوشرة مني يخسر يجوز وظيفته ومكانته هههههه وحتى حياته.
ما حجيت.. ظليت صافنة وأفكر منين جابت هالمعلومات آني أصلاً محجيت بس لصديقاتي وإنتصار.. ومستحيل أختي تأذيني برجلي بس هي طلعت وعينها تلوح بالشر وگالت بتهديد:
_ ديري بالج على بنتج ورجلج. خاصة بنتج الضنا غالي يا بنت هديل.
_ معناتها من تصافيتي وياي بعهد بيبي هنا جان تمثيل كدامها لو بيبي عايشة تقبل بتصرفاتج هاي مو هي الأمنتني يمج.
ما جاوبتني دارت وجهها وطلعت بس لحكتها وكتلها:
ــ أنطيني دليل على ماضي أهل رجلي لا عندج دليل ولا عندج قوائم بأسماء الناس الانعدموا.. اليجي يطلب ثار مو لازم يكون عنده دليل ومتأكد إنهم أنعدموا بسبب عمي أبو رجلي ماكو أي دليل و السيفي مالتج هذا بلي وشربي ميته جنت متعاطفة وياج بس مادام هيج بسيطة
ــ اممم يعني الكلام الوصلني صح أهل رجلج طلعوا علاسةتوترت.
_ لا طبعاً دحجي على فرضيتج.
راحت وهي حجيها تهديدات مبطنة بس ما حجيت شي لماجد كلت ليش أضوجه و خليها تهوبز على راحتها ما عدها دليل الحمد لله ماجد.. حرك كل الأدلة تدرون هاي القوائم لو واكعة بإيد أحد من ذوي المعدومين جانت صارت دليل قاطع إن الجاني هو عمي ويجوز يجون بسببه يطلبون الثار من ماجد عرفت إن القوائم هاي قديمة كولش و مر عليها زمن.. يجوز أنست و ماكو أحد يورث الثار و بعد ما أعرف علمها عند الله بس كلامه هذا ريحني وبرد گلبي شوي.
بيوم إجه مصفن.
_ أنتِ حاجية يم أحد بسالفة أبوي وأمي؟
_ لا وداعتك وغلاوتك شلون أحجي.
تذكرت صاحباتي بس ذن أمان ومكتله يدرن لا يرزلني النوب لازم أدفع كفارة لأن حلفت بغلاوته:
ــ حيرة اللي طلع الحجي من بيتي منو منو طيف؟ مستحيل تسويها وشنو مصلحتها أو علاقتها بعمتج لعد منو؟
باوع لفيروز وهي تتختل ضيك عينه وسكت متربص
خلي تولي.. أمس ليلتي ورادت تبوكه مني بس كتلتها عبالها بس هي همجية و أسكت ومن أجه ماجد أشتكيت منها كال سهلة تتعاقب بس شو راح أمس وأجه اليوم ما عاقبها بس حجي دومه هيج من خلال عيشتي ببيته هنا شفته أحياناً تصرفاتها تخليه يتجاوز عليها بالضرب بس نادراً للأمانة يمكن مرتين أنضربت من أجيت لسة هو طبيعته هادئ إلا إذا واحد يجفص بمصارينه و هي الله يسلمها من أجيال هسة أمهات التكنك كوله جيك وجيك و24 ساعة نقال ونوم..
ظل ماجد لأيام أحسه قلق سألته :
ــ مجودي شبيك؟
_ اليوم دزوا علية و سألوني صدوك كيت وكيت عن أهلي كلت للعقيد ناس كذابة تريد تسقطني لأن بيني وبينهم قضية يريدون يأكلون مال اليتيمة مرتي تدرين طبعاً محد يصدكهم هاي من صالحي لأن ماكو دليل ملموس شحصلت من أهلي بس الفضايح.
حضنته اواسيه:
_ لا تبجي حصلتني آني أهلك.
باوعلي مبتسم:
ــ ولج ما باجي.
_ لا بجيت عيونك حمر شعبالك البجي بس دموع تسرسح وتدلع على خدودك المتفحة هياته عيونك خبطن حمر
ضحك:
ــ خرب إبليسج هذا غزل لو مواساة و بعدين أنتِ محصلتج من أهلي شجابج الهم فلا تعقبي شحصلت من أهلي.. مو أنتِ حصلتي آني حصلت عار وخذلان وأنكسار ودم ناس بركبتهم متشوفيني ما تهنيت بحياتي كولها كلها حوبة الشباب الراحت لو العوائل اللي أندفنت أما أنتِ فگلبـي هو الحصلج.
لزم أصبعي المبتور، وجر حسرة طويلة وهو يبوسه بحنية ورجع عضني على كيف بأصبعي وهمس وهو وعيونه بعيوني:
ــ من ورى هذا حصلتج وحبيتج من يوم اللي شفتج تدورين بقوائم أسماء الشعب أول أنجذاب جان لأصابيع إيديج.. يمكن مخبل أحب وحدة من حبي لأصابيعها وبعدين صارت كولها عشقي هم صايرة بالعالم واحد يعشق بنية من ورى أصابيعها.
ضحكت: ما أعرف أنت أدرى ههههههه
أستحيت وباوعت لأصبعي بقهر ورجفة أخذتني تذكرت ذيج اللحظة يوم البتره شافني شلون صوفرت واختفت ضحكتي:
_ شـبيج..
ظليت أسولفله تفاصيل معاناتي وهو جان يسمعني وتفاعلات غضبه جانت تطلع من روحه ومن ندمه لأن تركني لمصيري وية لؤي هذا جان ماجد يحس بس يمكن هذا هم جان من لطف الله بية حتى تاليها يجمعني بيه
_ لا تضوج ربك قسم تكرهني وتبتعد وقتها لو باقي تحارب قتلوك وجان هسة ماكو مجودي.
كاعدة بحضنه وأتغزل بيه وبنتي لارين.. وأكوله ألا باجر أخلف بعد
ــ لا.. ماكو جهال بعد أنتِ كبرتي وصحتج هسة على كدج.
بوزت وسكت والله إلا أحبل و اخليك أمر واقع باوعلي بخزرة صار يعرفني لو خليت شي براسي:
_ بلارين ردتي تموتين و عندج بنتين كافي خلفة ذني عندي هن وسند الدنيا كولها.
وأخيراً.. صدر الحكم النهائي وأنفرزت الأملاك بعد سنة ونص ويمكن أكثر من المعاناة والمحاكم الحكم ألزم العمة بإرجاع كل ممتلكاتي إلي وتسديد كل شي باعته وصرفته منها إلزام كامل بالسداد هنا تخبلت هي ورجلها واستمرت تهديداتهم لدرجة وصلت بيهم سوو أمور بس أبن كلب يسويها..
كون أستعار لسان ماجد.. وفشايره وافشر عليهم بالطالعة والنازلة وحوش مادية بس زحمة ولو من عاشرتهم أول الفينات تعلمت منهم كم كلمة بس من سافرت رجعت لأخلاقي الفاضلة أدري راح تصفنون مثل صاحباتي من يغلطن أكولهن أخلاقي فاضلة متسمحلي شو يضحكن علية
كالعادة بوقت حلة طيف.. أظل أتابع البلازمة بالمطبخ مال كاميرات الشارع الخلاهن ماجد.. الوقت ظهر و طيف.. نزلت من سيارة الخط أباوعلها من كاميرات الشارع دتعبر تريد تجي وصلت للباب رحت أفتح الباب من فتحته أثنين لزموها وصرخت
_ يمة بنتي عوفوا بنتي يبوووو باكوني بنتي
طيف: ماما ولج ماما...
أريد أخلص بنتي ماكو ما كدرت دفعوني ودخلوها للسيارة وابتعدت ببنتي ظليت ادك والطم عزا العزاج ماجدة راحت بنيتج.
ركضت بساع للبيت وخابرت ماجد:
الو ماجد الحك الحك طيف فدوة
_ شكو شصاير؟!
بهستريا :
_ تعال ماجد بسرعة بنيتي اااخ ولك بنيتي راحت مني يمة بنيتي الحكني فدوة
_ ولج أهدئي شوي و أحجي خليني افهم ..
ماجـــــــــد
ظليت أرجف من مكالمة ماجدة وهي تحجيلي بساع ركضت لسيارتي وياي أخذت مفرزة لأن متأكد اليوم راح أصير قاتل من ورى طيف.. أكيد اللي أخذوها معروفين منو؟ من صالحه يضغط على عواطف ماجدة كأم ببنتها ماكو غير عمتها ورجلها ذاك الكلب أبن الستطعش كلب اليوم توجهت لبيتهم الي أصله بيت ماجدة اللي نبهوا منها هضيمة من أشوف الباطل والفساد ينتصر ويستعمل أساليب الترهيب.
فتشت البيت المحامي يباوعلي يتمضحك:
ــ عود كبرت وصارلك النفوذ الي زور لصالحكم القضية شفت بنتك غالية عليك.
_ هذا أعتراف منك بنتي يمك.
أشرت للمفرزة:
_ أعتقلوه يلا..
نتر إيده :
_ ولك تلعب وياي وآني بالدولة أنت ما تخاف.
_ لا ما اخاف.
طلع يزن وراد يمد إيده يعني كدامهم مسلحين ولا خافوا شكد لعد مسنودين
رفعت مسدسي على راس يزن:
_ إي شي يصيب بنتي طلقه هواي عليه.
حولت أعتقلت يزن وجلاليق ودفر التفتت اله:
_ ساعة هواي عليكم ترجع بنتي سالمة لا والخلقكم وخلقني أدزلك أبنك سفري مفروم.
سلمته للمركز وايدت ضد أبنهم قضية خطف بنتي لجهة مجهولة وطبعًا دكيته كيبل معدل حتى يعترف مكانها ولو إحتمال هسة غيروا المكان أتصلت بالعقيد وبلغته الحال الوصلته وي ذول و أتصلت بالرجل الي يعتبر العم سهيل صاحب فضل عليه وهذا صراع جديد وأكيد راح يتصل هم بنفوذه.
بس گلبي نار أندكوا ببنتي هذا شرفي ما عايز خسارات خواتي خسرني كرامتي وركبني عار وخايف لا بنتي تلحكهن.
مـــــــــاجدة..
ظليت رايحة راجعة بالبيت و أتصل بماجد بس لو مشغول لو يسده بوجهي ولكم گلبي على بنتي و طلعت للطرمة لكيت سند رايح فاتح حنفية الماطور ويرش ماي على روحه وبكل مكان تقريباً صار عمره سنتين ركضت طفيت الماطور و أنطيته راشدي.
_ يا طايح حظ تريد تموت و تموت أبوك النوب يضحك أستغفر الله أمك المهملة وين؟
أشرلي جوة وكلام رطين يقصد نايمة
لسانه ثكيل وما أعرف شبيه كوة يحجيلة كلمة و بهيج عمر المفروض يحجي أخذته لغرفته بدلتله:
_ أكعود عاقل بيا مصيبة إحنا سند حبيبي كول يا رب ترجع طيف.. سالمة غانمة الطفل دعوته مجابة.
صفن بوجهي بس كال
_ تيف..
ورطين كولشي ما أفهم:
_ إي يمة هوة هيج ترطن بعد أمك المهم النية أنت اندعيت لأختك مو؟
هم صفن وهز راسه مرة لا مرة إي ..
_ هو صوجي أطلب دعاء من واحد أبو حفاظة
رحت توضيت و صليت لوجه الله ركعتين عاد لليل رجع ماجد وياه طيف..ركضت حضنتها أشم بيها:
_ يمة بنيتي الحبيبة ماجد منو أخذها ولك أخابرك وما تجاوب شوكت تبطل هالأسلوب.
ــ الي يريد ينهبج ويأخذ أملاكج بعد منو واللي ديشوه بيه وبسمعتي بس لا تخافين أكو ناس أعلى منهم.. ضغطت عليهم وهددتهم فأجاني تلفون أخلي سبيل يزن ألكى بنتي موجودة يم الفلكة ببداية منطقتنا.
بوست بنتي وهي حضنتني
_ ماما شفت المرة اللي تجينا عمتج ودوني مكان بعيد هناك شفتها تكولي جنج هديل ملسونه هاي جينات بيبيتج لأن كوتلها أنتِ شكد حرامية هم بواكة أملاك أمي وهم بواكة بنت أمي بكتيني بلة شسوين بية لا آني شركة ولا عمارات ولا مزارع ولا مصانع.
أبتسمت:
_ بعد گلبي بنيتي بعد ماكو خط أبوج يجيبج و يوديج
وهم فاتت فترة والضغوطات علية زادت كولش أذوني أضطريت أخذتلي سيارة لأن ماجد يتقيد أحياناً ودوامه يتضارب وية حلة طيف من المدرسة فصرت آني أوديها وأجيبها بيوم توني جبتها دأنزلها يم بيتنا و لوما ستر الله ولطفه جان هم أنخطفت لوما ركض جيرانا بسلاحه ونقذها بس إلى متى.
ماجد.. كم مرة تعرض لمحاولة إغتيال على شنو كل هذا علمود الفلوس هاي السنين مرت وما عافتني رغم آني تنازلتلها عن ديونها گلت تبقى عمتي والدم ميصير ماي بس وصلت الصلافة بيها عافت البلد الخليجي ورجعت للوطن مستفادين يردون يصعدون موجة السياسة.
بس رجع ماجد عاركته وگلتله:
_ نترك البلد.. ماكو حل غير هذا.
جان يباوعلي ويفكر:
_ المحامي يهددني بأهلي ويفضحني گالي أخسرك مكانتك وأفتح ملفات قديمة وتخسر عائلتك وحياتك إذا مرتك ما تتنازل عن الورث كتله إي يلة افتح ملفات إذا لكيت شي بربج وين يلكاهن أكيد أبوي من عقد صفقة وي لـؤي سحب هاي الأوراق من لـؤي و كولشي يدينه بالأرشيف مقابل فضائل ذول يهوبزون لا تخافين.
_ ولك ذولي تخبلوا علية من يوم الي أستعدت حقي و يردوني أتنازللهم بيع وشراء حتى بعد مكدر أرفع عليهم أي قضية.
_ على كيفج و لا تكليلي ولك لا أطيح حظج شوي إحترام
خزرته وعفته.. هو أصلاً من فترة مو على بعضه ومادري شبيه دومه متوتر ومعصب أجانة رمضان وماجد لو صام ما يتحاجى يصير عصبي بشكل فرة البيت متعبة بس شوي طيف.. نادرة فايدتني وتشيل عني حمل الطبخ لأن فيروز سوت جدول أعمال منزلية
فصارت هي وطيف. بالتناوب على الطبخ أما النظافة الترتيب والمعجنات علية وهم طيف.. ما تعوفني وحدي و ذيج بس كفيان شر إذا رجلها طلع تقفل غرفتها وتغيب غيبة أهل الكهف گبر لفها الضرة مرة متراد شسوي لحظي.
بهذا اليوم ورى الفطور طيف.. تكفلت المواعين :
_ عفية بنتي النادرة فركيهن حيل حتى ينظفن بعد گلبي السنعة
_ ماما أهوو لا تعلميني ترى من عمري تسعه أعرف أغسل مواعين و الفضل لعمتووو النادرة هسة لو آمج معلمتج ما أشيل شغلي وشغلج وذيج تسرح تمرح جان هديت عليها ولعبت فلك وداعت بابا الماعنده حظ وياجن.
سكتت تورطت حجيت ولا تسكت عفتها تدردم عبالك هي عمتنا أم رجلنا وتدردم على خراميتنا حسب منطوقها.
ورى صلاة العشاء توضيت ولبست المحرم فرشت سجادتي وسبحتي يمي وقرآني أريد أصلي التراويح.
ورى ما كملت جان ماجد.. طالع وي جماعته أشرت لبنتي الي إجت ورى مكملت الشغل:
_ صليتي الواجبة.
_ إي آني على صلاة أبوي أصلي مثله من زمان كملت المغرب والعشاء
_ لعد أقري قرآن هذا شهر العبادة
ردتني:
ــ ومن يخلص رمضان أركنهن للعبادة هذا نفاق.
رزلتها:
ــ شفتيني آني لو أبوج منافقين هم بيوم ركنا صلاة لو قرآن؟! شو أنتِ تلكفين لكف بالحجي منبهتج مليون مرة فكري بالكلمة قبل لا تحجيها ترى سواء رمضان أو مو رمضان عبادة الله واحب بس الي اقصده برمضان نكثف العبادة يلا توضي شو كدامي بلا نعوصة.
ضحكت: فديت العبصية أمي لا صايرة تخوفين.
ظليت أخوزرها والله تعلوم سـؤدد هذا كالت ضبي بنتج خليها تهابج:
_ دحجي عدل عبصية بعينج طايحة حظ لا أكوم أنتف عطوبج.
دنكت هي وآني جني نجحت إزرع داخلها مهابتي توضت و إجت يمي بالمحرم وظلت تقرأ قرآن :
_ لازم نختم القرآن بليالي القدر حاولي اليوم تقرين جزأين أنتِ متأخرة تسختين بحجة شغل البيت.
سكتت ما راددت بعد ولا جاوبتني
شوي رجع ماجد كعد مبتسم يباوعلنا
وانتجى عالقنفه
_ راح التعب و الهم هالمنظر النقي والملائكة الحاضرة بيتي بتلاوتجن تقبل الله أعمالجن أتوضأ وإجي أول خلي أبدل .
بس خطية راح لغرفة مرته ذيج عشتو ليلتها اليوم فد أشتاقله واضوج من يروح بس المثلي تضم غيرتها لا تخرب هدوء البيت عكسها متملكه
باوعتلي طيف
_ صدق الله العظيم ماما أكدر أحجي
أممممم خطوة حلوة تستأذن:
_ أحجي وراها كملي الجزأين الي متأخرة بيهن.
_ كم مرة أطب لمرت بابا تخابر واحد تكلة حبيبي بس خفت أحجي بابا ما يصدك كوليله خلي يطلكها نفتك منها شو ما منها فايدة.
ما صدكت طيف.. كلت تكذب لأن تدور طلايب وي مرت أبوها حتى تطلكها منه:
_ أنجبي عيب متوضيه دتقرين كلام الله بين أيديج رجعي كملي الجزأين أفضلج
ظلت تقرا وآني هم أندمجنا بروحانية بس ماجد.. تأخر شنو مو كال أبدل أتوضأ وإجي وياجن إقرأ مممم غوته الحقيرة عيشتيش ولا أحب الضراير
بس الصار دقائق كبت الطلابة صدق الله العظيم رجعت القران والمصلاية مكانها يارب أستر شصاير؟
بنتي هم: صدق الله العظيم ماما بابا معصب كتلها.
_ تولي شوفي شسوت المرة هي تخلق أحترامها وهي الي تجيب الأهانة لروحها.
بس أنصدمنا يسحل بيها للشارع رحت وراه وبنتي تركض فرحانة:
_ راح يطلكها ونصفاله بس إحنا
_ أشش أنجبي يارب أستر ولج لازم مسدسة المعزاية شمسوية.
إجه بعقلي حجي طيف باوعت لطيف:
_ طيف؟!
دنكت:
_ و اعوف بابا مخيون؟ دزيتله رسالة من ورى الفطور بابا فتش نقال فيروزة بس أبد ما فتح الدردشة عباله تدلعات تنعوصات أقناعات أسافر لعمتي زيارة.
ــ أنجبي تسافرين لعمتج حتى هاي هي ..
_ المهم يجوز أحتاج نقاله فتحه شاف تنبيهي وبابا كشفها هلا هلا.
ظلت تتمركص وآني لازمه گلببي بشيشة النوب ركضت أتبعه أنطلق بالسيارة سند إجه معصب يشتكي
ويرطن :
طيف: أنجب بلة لا تغلط علينا أمك ال.....
ضربت طيف.. بحلكها:
_ أكص لسانج إذا حاجيتيه هيج فنج أدبسز.
ظليت متوترة متوجسة ما أعرف شكو من رجع مهموم باوعلي وعيونه صبت دموع محبيت جهالة يشوفوه منهار أخذته لغرفتنا ظل يسولف ويسولف وجسمه يرجف تدرون منو جان الجاسوس اللي ينسنس ويدز كل معلوماتنا للعمة مقابل فلوس فيروز ولكاها هم علاقة مستمرة تلفونات رسائل وي أبن خالها وحبيات ومن كشفها ماجد طلقها و انطوت صفحتها للأبد
لأن صارت كعدة عشاير هو بباب بيتهم معوقها برصاصة برجلها واشتكوا عليه بس هددهم يفضحها فسحبوا الشكوة وهم صارت اتفاقيات يسكت مقابل ياخذ سند و ما تشيع على أهله تهم باطله طبعاً يكول باطله وينكر شسوو أهله خوما يجيب التهمة لروحه والها عواقب مستقبلية نكر وخلاها كدام أهلها و عشايرها كذابة خاينة مهملة وسخة واغلب الكاله مو كذب و لا هي العدها دليل يأيد حجيها و أانسد موضوعها و تنازلت عن سند ورى سنة سمعنا تزوجت حبيبها وحتى ما يوم طالبت تشوف سند حيل أنقهرت عليه أول إيام يدورها بالغرف وين ماما يجي يسألنا وين ماما ويرطن يبجي لمن تعود وحضنته حال من حال بناتي حتى أفكر أخاويه بطفل ولد يسنده لو كبر ما أريد مثل أبوه يبقى وحيد خواته ماله عضيد وسند.
كم مرة بنتي رادت تتعرض للخطف وكم مرة زوجي راد ينقتل صارت حياة البني آدم رخيصة والدم و صلة الرحم تنباع وتنشري بالفلوس وصلت مرحلة من خوفي على عائلتي ردت أسوي الي يريدوه وأتنازل و أخلص بس فاجأني ماجد مقدم طلب تقاعد:
ــ مستحيل أعوفها تأخذ حقج وتتهنى بيه هاي هي قررت أسمع كلامج الي إلج سنين تقنعيني بيه نهاجر هواي الله دينبهنا كم مرة حاولوا يقتلوني لو بنتي خاف يضيعوها لو يبيعوها للمعارض لو ملاهي لو أعضاء مو كل مرة تسلم الجرة مدام عطلة ممنوع طيف.. تطلع ولا وحدة منجن بابجن مينفتح بس الي ونبهي مريم أو أختج يجن بوقت وجودي كولشي يصير ينتهزون فرصة جيتهن تطلعين للباب وخاف يأذوج أنتِ والجهال أحتاج وقت أكمل تقاعدي حتى لو رحت للخارج أكدر مناك أستللمه هم ينفعنا.
معاملة التقاعد هم جرجره لبين ياخذ راتب التقاعد ويصفي أملاكه وآني هم أبيع شكو عقار أحوله نقدي لبنوك بلدي الأخر هواي احتاجينا وقت بعت بعض العقارات ومنتضرة السمسار يجيب مشتري للباقي وهو باع محلاته
فكرت أوكل محامي يبيع و يحولي لبلدي بس ماجد كال وين الأمان النوب تريد توكيل لمحامي عفية عليج حولنا كولشي مبالغ لبنوك بالبلد الثاني الملك حولته مبالغ نقدية.
_ لعبت روحي من الحياة هنا مؤامرات وفساد بس الحوت يكدر يعيش وي حيتات وآني حياتك وحياة بناتي عندي أهم من كولشي.
_ هو نطلع لهنا و حدي بعد وصلت بيهم يحاربوني بوظيفتي ويعرضون علية أتخلى عن نزاهتي صعب ماجدة.. شفرقني عن لؤي.. وحتى عن أبوي إذا أخذت فلوس حرام باجر يدمر ويحرق عائلتي.. عمر الحرام ما يدوم يالحبيبة هذا بلد يحكمه فساد بكل زمن هو هو نفسه الفساد بس أختلفت المسميات لعبالج يعوفونا خلاص إنتهى مشواري بخدمة بلدي شو سند أمه شمرته علية وكتبت تنازل تام وتزوجت الله لا يوفقها
_ من زمان كتلك نسافر وما قبلت.
_ جنت زوج بعد نسافر فضت.
الصار وهو يمشي بمعاملته سودة علية تعرض لأطلاق ناري من مجهول أجاني إتصال ورحت للمستشفى أشوفه بين الحياة والموت.
_ لا ماجد لااا فدوة ولك لا.
بالإنعاش أسبوع يالله أنتبه خلال هذا الأسبوع قررت اشتري حياة زوجي وعائاتي لأن أكيد يكدرون يموتوه وهو بالعناية الفساد ببلد عانه ويلات الحروب وانتهى بلد يحكمه ناس ما تخاف الله.
زرته جان يباوع كوة يحجي:
_ لا تعوفي بناتج وسند أمانة عندج جني ما أعيش
تخبلت من حجيه بجيت لطمت وجهي كدامه:
_ ولك أنجب ما تموت ولك أشتريتك و أشتريت حياتك بذهبي ومالي وأنت كارهني بس كلت أهم شي عايش يجر النفس تريد هسة أنطيك الهم يقتلوك لا والله..
صوت جهاز القلب يخوفني آحس هالنبض المتقطع رمز الحياة إي مندس مجرم يبيع ضميره بأبره قاتله يكدر يقتله وهو هنا لازم أنهي المهزلة واسد اسدال نهاية الورث النقمة صار والله موجود ميتهنون بيه
عاد رحت لبيت عمتي الي تركت الفلا من استعاديتها وسكنت شقة بمكان أطراف مركز مدينة ركنت سيارتي بكراج العمارة وسألت الحارس عن رقم وطابق شقة المحامي أبو يزن صعدت بالمصعد وكفت كبال الباب و رنيت جرس طلعلي بنية سمرة يمكن هاي اللي تزوجها يزن.
_ أريد أقابل الست ريم.
دخلت وشوي إجت عمتي أبتسمت :
_ مكالمتي ونصيحتي جابت نتيجة مو أكيد فكرتي ليش تخسرين رجلج خاف ديتقاعد ترى هواي ترتيبات لبين سفركم بس متلحكون تترملين الظاهر رجلج مهم عندج أكثر من بناتج ما خضعتي مثل ما كرصة أذن برجلج.
_ شتردين أنطيج بس عوفيني آني وعائلتي جان خفتي الله من هيج ضربتوه ضربة موت يا كرصة أذن الله ستر ما مات.
_ العار بسبع أرواح ههه هو و الي متقوي بيه تفضلي نتفاهم.
_ لا ما أريد بس تجين باجر بالتسجيل العقاري نتكاتب تنازل عن العقارات.
_ لا هذا ميصرف ينطعن بيه أريد بيع وشرى وينكتب مبالغ المبايعة طبعاً ما أدفع فلس بس شكليات وحبابة حولي الي بالبنك الي بعتيهن وحولتيهن لرصيدج ببلدج
هزيت راسي وكملت كولشي معاملة بيع شرى تحويل الأملاك أوقع وإيدي ترجف أسلم ارثي بيدي أيام مرت متعبة بين أزور ماجد الي وضعه بعده حرج وبين المعاملات.
و إنتهت عمتي حققت قول الله عن اكلين أموال اليتامى وان شاءالله تنال عقابهم آمين ربي
(قال الله تعالى في سورة النساء (الآية 10):
{إِنَّ الَّذِينَ يَأْكُلُونَ أَمْوَالَ الْيَتَامَىٰ ظُلْمًا إِنَّمَا يَأْكُلُونَ فِي بُطُونِهِمْ نَارًا ۖ وَسَيَصْلَوْنَ سَعِيرًا}
شهر بالمستشفى أروكض بيه لمن تحسن صحته وطلع طبعاً خواته ما قطعن بيه يزورنه وفضائل تخابر خواتها يطمننها عليه كولها شجعته يطلع وقررنا الرحيل
_ حولتي كل املاكج للخارج بفترة نومتي مستشفى بعتيهم مو.
سكتت ودنكت ونزلت دموعي:
_ هااا خير.
_ أسفة لو ما أسوي هيج يقتلوك
_ ولج شنو.
_ رجعت كولشي الها مبايعة وشراء يولي ماجد.. أهم شي سلامتك
عصب يومها:
_ غبية غبية غبية سوايتج متنحجي من رحتيلها وهددت هم حسب قولج فتحي تسجيل سجلي صوري دليل لو هو غباء
_غباء لأن حسيت راح يموتوك والله غباء ولا اخسرك أنت سالم ونسوي مشروع وهم أرجع لشغلي هناك والله أهم شي راحة بال شمدريني جدتي أم أبوي مالها حلال حرام شمدريني هاي السنين الشغلوا المال ما داخله حرام يولي لو الورث بيه خير ربك ما خلاهم ياخذوه يجوز بيه صالح آني اؤمن بهيج الله يبعد عن المؤمن ما ياذيه
_ كافي دخيل بختج هنا دكليلي الشر أنتصر و الورث أنباك مثل ما الوطن أنباك والفاسد صار صاحب حق ومدعي بقول حق وهو باطل وانطبقت كلمة حق يراد بها باطل
وصار الرحيل ورتبت إقامتهم بوصفه زوج مواطنة من بلد أجنبي لخاطر حياته وحياة بناتي نبدي حياة جديدة بعيدة عن الصراعات والثارات ماله ذنب يتحمل وزرهاوالحمد لله بدينا مشروع يتقاول وي تجار الوطن يدز بضائع أوربية كهربائية او ملابس و كولشي واله نسبة عليهن وهم فتحله بوتيك وعايشين
أنتهت قصة إجتثاثي بحياة مهجرة بعيداً عن وطن مسلوبة الحق والورث ببلد حكامه وساسته فساد
بنتي طيف.. حالياً تدرس بالجامعة تأخرت سنتين المفروض متخرجة والحمد لله أخذها لمراكز تأهيل النفسي الي أعمل بيه وهذا خلاها تختار تخصص طب النفس ومستقبلاً تجيني طبيبة جديدة تعمل بمركز التأهيل هاي سنين مرت بينا بين الخطايا والأجتثاث وكدرت أولد ببداية هاي السنة أبني برهام بعد گلبي وليدي هسة عمره أشهر وكل سنة نروح بالعطلة نسافر لشمال وطننا يم شيلان نتجمع الصديقات وعوائلنا أما جنوب الوطن فبعد أبد ما طخت رجلي هناك من يوم الهاجرنا
أما رحمة للأن مفقودة ومحد يعرف عنها أثر حتى من رحت أشوف أمي و حارث هاي قبل هجرتي الظاهر واصله سالفتي من إنتصار تذكرت ذاك اليوم يحاجيني بثكل بس حسيته شوي لان فسألته عن رحمة:
_ ما أعتقد يتركوها تعيش هي لاعبة عليهم لجهة معادية ومنافسة للؤي ميتركها تعيش آخر مرة شفتها دخلوها علية واعتدوا عليها جماعي وين ذكرتيني.
دنك و أخذته رجفه وبجى أذكر بيوم شفته منهار من يوم أنطيته فلوس هربه أنقذته حتى يعيش دمعت عيوني:
ــ هاي قضيةشرف الأفضل طي الكتمان بس ماجد مهموم الا يعرف ميتة لو عايشة
_ الله يدري هي ماضي وانطوى جثة ماكو تعتبر مفقودة ومصير مجهول
ودعته وكال:
_ شكراً لأن انقذتيني وهمزين طلع لؤي مو دمج.
ــ دير بالك على إنتصار وأمي .
_ شيلي من ماجد فكرة يدورها ويلكاها لو عايشة رجعت.
_ لو ميته جان عرفنا بس كول مفقودة وماجد يكسر خاطري أحس بيه .. بين الخذلان وكسرة الخاطر شكد مرات بالليل ألكفه خاتل بمكان كاعد وحده وبإيده ألبوم صور رحمة يكلب بيهن ويتحسر أخت ميعرف مصيرها شنو ولا وصل لنتيجة تبرد حيرته ولا عرف الأسباب القوية اللي دفعتها تخون ثقته جانت رحمة.. أجمل شي عند زوجي طفلته يعتبرها لذا جانت كسرته بيها قوية.
أنتبهت من شرودي على نقالي يدك
جان مكالمة جماعية كروب السنافر الأربعة مكالمة جماعية
شيلان: إجه الصيف يلا يمتى تجن
كوتلها:
_ ان شاء الله بهاي الآيام ننطلق وهم خابرت إنتصار تجي للشمال تصيف حتى أشوفها.
بس صوت سـؤدد طلعت بسالفة صفح :
ــ آني قررت أنفصل مكدر أتأقلم بس مشاكل هاي هي من باجر أخذ جهالي وأفلت وأطلب الطلاق وارجع للوطن
ملينا يومية طلابة وزعلات والظاهر هالمرة قررت تنفصل تمنينالها التوفيق
سـؤدد: هو آني مكدر أكمل وي رجال أعيش وحدي بس لجهالي شنو قابل المرة إلا رجال يكملها.
مـريم: سـؤدد.. فكري زين.
سـؤدد: لا أبد.. قافلة.
مـريم: بعد كيفج بس تتنبعد كيفج بس تتندمين جاد خوش رجال ويحبج.
كعدنا نقنع بيها وفوك ساعة ونص نقنع قفلت عاد كولنا أتمنينالها التوفيق بقرارها ونزلنا ستوريات وتاكات مساندة الها بس الصبح من كعدت أجتنا تركض
سـؤدد: عزة العزاني ولجن شمنزلات
الصديقات: خبر طلاقج ونتمنالج التوفيق.
سؤدد: ولجن هسة تمسحن مناشيرجن يا صديقات الشؤم فال الله ولا فالجن البارحة تصالحنا و جابلي هدايا وآني هم رجعت أغراض ذكريات حسن لأمي شحنتهن لحسين كلادة وحلقات و طلبت منه يتبرع بيهن لشاب فقير يريد يتزوج أما الكلادة فيخليها هدية ينطيها لأبنه حسن من يتزوج هدية مني لمرته.
شيلان: وشمدرينا بيج عبالنا صدوك حتنفصلين يلا بيها الخير وعلى العطلة الصيفية كولكم وعوائلكم كالعادة تجونا تصيفون بالشمال أمس عزمتكم بس أنتِ طلعتي صفح والتهينا وياج.
وأخيراً أجتي العطلة تجمعنا بجبال الشمال كاعدات وسؤدد.. وزوجها جاد كل شوي عركة هو خوش ولد هادئ بس صاحبتي أعرفها مليقة تموت على الطلايب وتفتعل المشكلة وهو يسكت ويتحملها و إحنا صرنا أبد ما ندخل بيناتهم لأن نعرفها شغلة ساعات ويتم الصلح.
التفت جاد عليها بإبتسامة:
جـاد: سـؤدد.. آنتِ حبلانة هيدي المشاكل والزعلات تعودت عليها منك كل ما بتحبلي ببلش النكد وبتدوري على حجة لتزعلي وتعملي قصة.
سـؤدد: أكولك.. لا تدور حجج وتطلع نفسك من المشكلة.
جان ماجد يراقب و بوجهه ضحكة خباثة وجه كلامه لوالتر:
ــ لو منك أسحلها من شعرها هالمليقة
خزره والتر:
ــ ما فيك تتدخل بينا.. أوكي.
صفكت سؤدد وحضنت رجلها وباست خده:
ــ عاااا بوم تستاهل يالمليق من تدخل فيما لا يعنيه لقي ما لا يرضيه وبعدين شلون يجرني من شعري وآني تحجبت
رد عليها ماجد يضوجها:
ــ والله غيرة من مرتي شفتيها تحجبت كلتي أتحجب مثلها.
دارت وجهها مردت تجاهلته وهو هم سكت.. هم دومهم دهرة فحتى بوطننا الثاني دهرتهم متنتهي
مــــــاجد..
جنت لازم إيد ماجدة وصافن على حياتنا الجديدة.. أتأمل وشلون رب العالمين تاليها جمعنا ووصلنا لهنا وعائلتي وزوجتي يمي الفضل كوله بعد الله يرجع لماجدة باوعتلها وهمست:
ــ ما أكدر أنسى فضلج علية مرتين أنقذتِي بيها حياتي من الموت.
ــ الفضل لله وحده مو إلي يا حبيبي هو الله اللي خططلك ما تموت بيدين عدوك وخلاني سبب بحياتك حتى تعيش و نضل سوه الفلوس والأملاك فدوة الك المهم أنت سالم.
ــ بس يا حبيبة ما قابل تنطين ورثج راح أظل ألومج لأن بتنازلج هذا دتكولين للشر ممكن ينتصر وهاي معادلة مو عادلة أبد ولا مثال حلو لأطفالج باجر راح يتعلمون منج الاستسلام وما يصارعون لأجل حقوقهم.
ــ بالعكس منو يگول الله سبحانه يمهلهم لعلهم بطغيانهم يعمهون حتى العقوبة أشد من ترفع قضيتي من قضاء الدنيا الفاسد لقضاء السماء العادل رغم أختلاف المذاهب بينا بس شوف على سبيل المثال قضية الحسين رضي الله عنه وأرضاه أستشهد وهو أنتصر.
ــ عليه السلام.. فعلاً هو أنتصار الدم على السيف لأن الحاكم كان فاسد وظالم لدرجة إنتقلت بيها قضية الحسين لعدالة السماء للقضاء الأعدل والأعلى صايرة تحجين حكم وأمثال تدرين شكد أحبج أحبج أكبر من الحياة اللي صرتي أنتِ سبب بيها.. آني ميت من أول الألفينات ورجع عمري و هم إنتهى يوم الضربوني ضربة موت بس ربج كتبلي عمر وخلاج أنتِ السبب.
مـــــاجدة..
لازمة إيد ماجد رفيق دربي وحياتي وإحنا نتمشى بين جمال الطبيعة وصوت الشلالات فجأة نزينا على صوت سؤدد:
ــ ولكم كبرناا العيال كبرت.. عاااا اليوم عيد ميلادي الـ48 وصرت عجوز ولك جاد شلون تنسى ميلادي هسة من أرفع قضية طلاق تلوموني.
وكبت العركة بينها وبينا صرنا ما ندخل ولا ننقهر هسة طلقني ساعات وتكوله حبيكووو
أباوع لصاحباتي كلمن واستقرارها الحياة مو مجرد قصة حب طائش ولا حكاية مراهقات يمكن قصة حياتي آني وصديقاتي ما تصدر ترند القصص ولا وصلت قصتنا ملايين مو قصة مجون ولا قصة حبيات اللي تدورها مراهقات تقرأها لفترة وتنضج وتنساها أو تتندم على يوم قرتها قصتي آني وصديقاتي هي قصة أربع صديقات مثلنا بحياتنا الخطايا و الأجتثاث الأجتثاث الي ميجي الا نتيجة خطايا عميقة ممكن تكون خطايا تسبب اجتثاث من عمق الجذور مثل حياتي قصتنا عرضناها للعقول الواعية الراقية قصة إجتماعية سياسية بطعم عواطف قلوبنا العشقت واجتثت بسبب خطايا ماضي واللي رجعت أحياها حاضر مستقر.
توكلوا على الله واستودوعوه أنفسكم أولادكم أزواجكم أهلكم أرزاقكم وحاشا الله الا يرد الأمانات بالاحسن منها لهنا وأغلق ملف الخطايا والأجتثاث ..
تمت بحمد الله
وأيضا زرونا على صفحة الفيس بوك
وايضا زورو صفحتنا سما للروايات
من هنا علي التلجرام لتشارك معنا لك
كل جديد من لينك التلجرام الظاهر امامك
وايضا زورو صفحتنا سما للروايات
من هنا علي التلجرام لتشارك معنا لك
كل جديد من لينك التلجرام الظاهر امامك