رواية خطايا واجتثاث الفصل الثاني والخمسون 52 بقلم نور علي البصري
سلاما على اخ كان اقرب من حبل الوريد فتغير بسبب امراة💔
ـــــــــــــــــــــــــــــــــــــــــــ
مــــــــــــــــــــــاجد
ورى ما رجعت مـاجدة.. للبيت مكدرت أبقى ردت بس أهدئ روحي وما أروح أبيس بهذا يزن.. ولك آني سابقاً يمكن مرة أو مرتين ضاربها عدا اليوم اللي رجعت بي صدوك بيست بيها سنين أدور عليها وهي مختفية سنين أريد بس أعرف مصير رحـمة تاليتي أكتشف هاي السنين ضاعت والحقيقة جانت نايمة بيتي ومستورة ومكتومة.
رحت لبيتي.. هاي مرتي أخذتلها أيام زعلانة يم أهلها تعبتني وصرت بعد ما أروح أرجعها هي تزعللها كم يوم وهي ترجع وحدها من دخلت لكيتها توها مسبحة الولد و ظال عريان عالجرباية وهي ملتهية تخابر من شافتني سدته:
ــ مو جنتي يم أهلج؟ شنو شبساع أشتاقيتي وتتصلين و الولد ليش عريان مو بطلاع الروح صارت عندي خلفة غير العلاجات العالجتهن.
_ الغرفة دافية مشغلة التدفأة الهوائية.
رحت للهيتر الهوائي عليته حتى يدفى جو الغرفة ويصير طبيعي وأخذت ملابس لبست سند.. اللي يباوعلي ويضحك لاعبته و بفشرة:
ــ .... ما اشتاقيتلي.... ولك..... صاير على خوالك نحس.
ردتني: شبيهم خوالة شو يحبوك بس أنت مالك صاحب.
ما ناقشتها شلت أبني ألاعبه وأدغدغه بس بداخلي بركان وغضب ومستهضم شلون هذا يمد إيده على شي يخصني بالرغم إنو آني كتلته بس ما أكتفيت طبعاً متابع ملف قضيتهم لأن عندي نفوذ ومعارف برتب عالية جداً بالدولة وعندي ناس واصلة أكو ضابط برتبة عقيد بالأحوال الشخصية وهو صاحبي تعرفت عليه بالمهجر أيام جان هارب من نظام البعث من شاف الملف أتصل بية يستفهم إذا جانت هاي الأسماء تخصني لو لا لأن سابقاً مكلفه يتبعلي أثر مـاجدة.. ويشوف إذا إلها وجود بالوطن لو لا.
و بفضل معارفه من ضباط بالتموينية وبدوائر ثانية ممكن من خلالها أحاول أكمش خيط عن مـاجدة.. بس بوقتها محصلت إي معلومة عنها فظليت أتابع مجرى القضية عن بعد وأشوف وين أستقرت وأنتهت بس سكتت محجيت لماجدة.. إنو أبوها طلع دون نسب أبو شاكر طلع ماله أصل شفتها مريضة.. و خفت عليها بس الظاهر إنـتصار (إذاعة الشرقية) ما قصرت وخلت الأمر كوله بإذن مـاجدة.
أنطيت الولد لأمه بعد ما أگدر أبقى مكتوف الإيدين هم أربي يزن.. وهم أضغط على أم يزن.. أريد أعرف منو أهل لـؤي جد بنتي هذا أبن حرام لو أبن حلال هواي عندي حلقات مفقودة ونقص من أيام جنت أضغط وأستفز بماجدة وفضائل.. لأن عقلي هسه مو مثل مـاجد.. القديم ذاك اللي ما جانت عنده خبرة بالجرائم وما يميز البريء من المتهم.. الوضع هسه أختلف تماماً.
_ رايـح.
ــ ترى آني هنا من يومين لو ما أخابرك فلا تجي وتسأل.
ــ المن جاي و البيت فارغ وأنتِ مولية لأهلج.
ــ ترى أسلوبك مو حلو والله فد ندمانة ما تزوجت من خوالي ماتوا علية.
باوعتلها ولزمت خدها حيل وضغطت على فكها:
_ وشورطج شوفي ولج هذا التحسر مو يمي لو أمج ما علمتج شلون تحاجين زلمتج وتريحينه من الهموم كافي دهرة و إضافة أكو أمر لازم تعرفيه أنتِ تزوجتيني من خمس سنين وما يوم كذبت عليج تعرفين طبعي كولش أكره الكذب وحيل النسوان القبلج كولهن طلقتهن لهذا السبب فلا عبالج لأن خلفتي إلي سند.. راح تلزميني بي.
_ هسة تريد تكولي شي لو دترزلني وتهدد ما أكذب بلة شمكذبة عليك.
_ الأثنين دأحذرج لأن طالعة للسوك وي أخوج وگاظيتها هالأيام فرفرة عبالج ما أعرف لو ميوصلني من خابرتيني گلتيلي راح ترجعين گتلج أنتِ زعلتي وحدج ترجعين من وحدج ما أجي و أراضي أنتظرتج تصارحيني بفرفرتج وطلعاتج بس أبد ما حجيتي وهذا أعتبره كذب أما الشي الثاني لازم تعرفيه و المفروض تعرفيه قبل اليوم بس أنتظرت كولش تتونسين يم أهلج حتى أنغص عليج طلعاتج وسفراتج الـقچق دون علمي وهذا حرام عليج مو أنتِ تصلين وتصومين جان طعتيني بهاي آني ما أقبل ولا آذن الج تطلعين خطوة وحدة من دون علمي.
_ أكولك هسة أنت دتمهد لشي جبير لو دترزل خليني أفهم.
_ أثنينهم تمام تردين تعرفين شنو بعد مستجدات حياتنا ماجدة.. رجعت ورجعت عقدت عليها لأن بنتها تريدها بس زواج على ورق مبقيها لأجل البنت آني ما أكذب وأنتِ معاشرتني تعرفين صراحتي توصل لحد التجريح بس ما أكذب.
صفنت بوجهي شوي و ظلت تدك وتلطم:
ــ عزة العزاج فيروزة گالتلي خالتي تركضين وراه علمود جماله وإمكانيته منغرة معجبة بي لأن جمال ومال ترى هذا مبين حقير و نذل وقبلج مطلق هواي ماكو مرة ظلت وياه أكثر وحدة ظلت عنده سنة وشردت منه وطلقها صوجي ما سمعت الكلام وأخذتني المظاهر ولك خمس سنين معيشني بإنضباط عسكري لازم أكعود الصبح أكرب لبيتك ولازم كولشي كامل بمكانه والغسل حتى بالشتا وسواسي نظافة بيت شكبره ما تقبل عاملة تجيب تعاوني متحملة قساوتك..
رديت عليها مستغرب.. هاي من سنة كولش متغيرة و صايرة تعترض على أتفه الأسباب وتروح زعلانة لأهلها هواي قبل هاي السنة جانت تمشي مثل الساعة ومتخربط بشي بس هسه شو كولش شنو عود خلفت وتريد تلوي ذراعي:
ــ يعني قاسي لأن دأنبهج على إهمالج لأبنج أكولج قللي گعدة وتكنيك بالنقال گاظيتها ليل نهار نقال وتنعوص بابا صرتي أم بيتج وأبنج أولى من كروبات النميمة وية خواتج وبنات عمج وخوالج ومدري ايش هن هم يعوفن بيوتهن؟ لو شايفج سنعة ما حجيت ونبهت قاسي بشنو بلة ههههه شوكت ضاربج عمي شوفي الزلم شتسوي وحمدي الله علية آني بس لسان معذرب.. وأعترف الزمن دك دگاته بية وهم هو بس لساني شوية براغيه راخية وهذا آني عاجبج يا بنت الناس بعيوني مخليج شو مدللة الذهب والمصرف كوله يمج طالعة من دون علمي.. بس نبهتج لا تتعلمين تضمين علية أو تكذبين لأن هنا رصيدج يخلص يمي ما عاجبج تمشين مسطرة وتريدين العوج روحي لبيت أهلج وآخذ أبني.. والله وياج.
زعلت ظلت تبجي ياظالمني يا عايشة بجهنم والله بيها رفسة بس أستخطيها آني يمكن بس مرة وحدة مديت إيدي عليها وطلعت معيشها عذاب:
_ رايح عندي واجب.
لبست ملابسي السود العسكرية والرتب والسلاح.. وشگد حاولت أهدئ نفسي عن يزن بس ما گدرت إلا ألعب بي طوبة.. عندي غايتين غاية أأدبه وغاية أمه.. أي أمه لأن أكيد تعرف شي ولازم أعرفه التفتت عليها وگلتلها:
ــ راح أخابر أخوج لو أمج يباتون يمج الليلة ما راح أرجع.
بغيرة گالت:
ــ يم ست الحسن مو؟ عشتو ناقصني العجايز يصيرن ضراير.
ضحكت بإستهزاء وگوتلها:
ــ منو جيجي عجوز؟ ههههههه دتعالي شوفيها ولحگي ربع عطرها وأناقتها وعود بعدين أحجي تستاهلين هيج أحاجيج لأن أنتِ ما تجرين عدل ولا تجين بالعين والأغاتي.
صاحت: أعلمك مردودتلك لعد؟
_ يعني شنو؟
ما انتظرت شجاوب لأن راحت للمطبخ والطفل بيدها عفتها وطلعت وآني أهز بيدي أستغفر الله على هالحظ المجير بالنسوان عقلي بعد شيتحمل فوك ضيمي فيروزة و غيرتها وحب التملك العدها.
رحت لدائرتي سحبت مفرزة وتحركنا لبيت أم يزن.. بقهر وبكل عنف ضربت هاي البوابة.. البوابة اللي شهدت أسوأ سنيني وأوجع أيام الإجتثاث........ الخطايا والذنوب جانت متربصة داخل هاي البناية خطايا وذنوب وإجتثاث منا ماجدة.. أجتثتني من حياتها مدري آني اللي أجتثيتها بإسم الخيانة.
رجعت لورى.. وگفت بالركن اللي شهد آخر لقاء بينا لقاء الفراق بوكتها وگفت وهي منهارة.. جانت تريد تلجألي وآني الغبي أخذني الغضب وما سمعت إلها
غمضت عيني ونزلت دمعة هواي أحاول ما أمر منا لأن كلما أمر ياخذني الشجن لإنكسار الخواطر.. هنا حبنا مات بس هو بالحقيقة.. ما مات بقى مدفون بين ضلوعي يالحبيبة بقى يقاوم الإجتثاث إجتثاثج من أعماق روحي أتذكر بيوم السقوط يوم اللي سقط الطاغية ظليت أحوم عالمكان لأجل أوگع بماجدة.. وأبوها بس أريد أعرف مصير أختي بغضب حاقد باوعت لهاي البوابة.. شگد أكره هذا البيت تقربت وبكل قوة رفست البوابة ونزلت بيها رفس حيل لحد ما أنفتحت طلعت شابة ترجف من الخوف وجانن وراها بنات.
_ ت.. ت.. تفضلوا.. ما مسوين شي سيدي.. الله يخليكم لا تسجنونا.
من بين سنوني گزيت عليهن وصحت بيهم:
ــ وين يزن.. طلعوا لا هسه أهجم هذا البيت على روسكم.
باوعتلي وهي ترجف بخوف وگالت:
ــ تقصد يزن.. أخوي ليش شمسوي؟ والله هو ما يسوي شي غلط.. خاف مشتبهين بالإسم!
صحت بيها بعلو صوتي:
ــ رجاءًا سوي طريق ووخري عاد عائلة بعثية مجرمين.. وخري لا أستخدم أمر إلقاء القبض اللي بيدي وأفوت أقتحام مخلي شوي أصول و دأطلب تسوين طريق وإلا أقتحم المكان وأطلعه لهذا الجريذي الختل لو هو زلمة ما جان يتعدى على حرمة مريضة.
ردت برهبة وخوف:
ــ أخوي متعدي على مرة؟ لا مستحيل أكيد تشابه أسماء سيدي والله إحنا ما إلنا أي صلة بالبعث أبوي.. أصلاً هرب منهم وأمي تبعته بينا إحنا من ضحايا البعث جدي وجدتي شهداء.. إي والله وحتى خالي شاكر شهيد.
ردت البنية الوراها:
ــ خاف قصدك المجرم لـؤي ؟ ترى هذا مو منا والله ونفينا صلة النسب معاه لأن ما نريد العالم تعتبرنا من ذوي بعثي مجرم وبهذا البيت جانوا ساكنين أولاده وطردناهم بعد ما نفينا نسبهم إلنا.
ــ وخري رجاءًا أو صيحي يزن.
_ سيدي بس نفتهم أخوي شسوى؟ مال يتعدى على مرة مستحيل أبد أبد.
شوي طلعت مرة جبيرة:
_ تفضل... شنو المشكلة؟
باوعتلي تدقق مثل المشبهه بيه:
_ أريد يزن.. عليه بلاغ تعدي على منتسب وحرمته اللي هو آني.
_ سيدي أنت منو شايفتك سابقاً هاي الجهامة مو غريبة علية وأبني ما يتعدى على أحد خصوصاً مرة ممكن متوهم أو أشتباه أسم.
أكدر أقتحم المكان و أخذه بس عندي گوتلكم غايتين لذا تأنيت غايتي أخذ يزن وسيلة ضغط.. و أيضا تأديب إله.
_ تفضل سيدي نتفاهم..أبني شلون تعدى عليك وعلى مرتك وآني فصاله شتطلب أمرك مطاع والله أبني فقير فدوة أروحلك أعفي عنه أبتسمت بإستهزاء رشوة بنكهة ترضية وبفصل عشائري خوش دروب وخوش جاي تتختلون وتتخشخشون حتى تاخذون كل غاياتكم بس العبوها وي غيري.. مو وياي إلا أعرف الحقيقة لأن شاك بشغلة إضافة للشكوك القبلها باوعت للمفرزة كنوع من الضغط والتهديد ورجعت أبتسمتلها بإستهزاء.. وهي من الخوف كالت:
_ والله شتأمر آني بالخدمة شكد تطلب وتتنازل.
ضحكت:
_ ترشيني؟ وكدام مفرزتي ورجالي.
التفتت إلهم أضحك:
_ شنو رأيكم دترشيني و أختارت منو للرشوى مـاجد.
واحد من الضباط برتبة ملازم كال بحدة:
_ أنتِ ملگيتي غير سيدي الرائد مـاجد حتى ترشيه ما يرتشي نزيه أبنج عليه أمر القاء قبض ولازم ينفذ.
أشرت للملازم بيدي يهدأ:
_ أهدأ ياريت تهمة تعدي للأسف أجتنا أخبارية تكول هو أحد وكلاء تجار المخدرات.
دنكت همست لريم:
_ أم يزن بجيبي اللي يلبس أبنج مؤبد شتكولين أنفذ لو تحجين.
ظلت محتارة و أشرت أدخل باوعت للمفرزة وبذكاء موهت.. حتى أدخل وراها.
ريم: سيدي تأكد أشتباه تعال تفضل و شوف بعينك وفتش البيت شوف يزن إذا إله علاقة بالمخدرات آني بيدي أسلمه الكم.
التفتت للمفرزة ووجهت الهم أمر:
ــ أبقوا هنا أنتظروا مني إشارة الاقتحام.
أبتسمت بداخلي لا لازم أول شي أوترها وألعب بأعصابها أخليها تنهار تماماً وماتشوف إي وسيلة تنقذ أبنها من الأعتقال إلا تجاوبني على كل الأمور المضمومة
من يوم رجوع مـاجدة.. وآني أحقق بالقضية من دون ما أبين إي شي حتى فضائل بديت أراقب تصرفاتها و أنتظر الوقت المناسب حتى تعترف عقليتي اليوم مو عقلية مـاجد.. السطحي إي نعم آني.. الي قبل أكثر من 16 سنة أتهمت مرتي بالعهر وية رجال البعث والتجسس لصالحهم وأتهمتها بضياع رحـمة.. بسببها و قضية العم سهيل جانت سبب مباشر خلاني أفقد الثقة كلياً بيها بحيث أسهل تهمة تتوجه إلها جنت أصدگها سبقت هالتهمة تهمة ثانية
كتبت تقرير بالرجال اللي رباها وتسببت بإعدامه وطشرت عائلته وجانت سبب دمار حارث فشلون بهاي الحالة أثق بيها رغم هي بوكتها حلفت ما إلها علاقة بس آني بقيت أشك بدون أي بحث أو دليل.. وهذا جان خطأي
هذاك جان عقل إنسان سطحي يتهم الشخص بس من ظاهر الأمور بس من التحقت بالداخلية بديت أتعلم وأفهم لا تحكم بظاهر الأمور دون دليل قاطع حتى لو توفر الدليل أتأكد من ثبوتيته وصدق مصادره من يومها بقت مـاجدة.. غصة بگلبي أحاول أربط الخيوط ببعضها بس يرجع الغضب يسيطر علية.. وفجأة تظهر گدامي سنين وآني أدور وأنواع الإشاعات والقصص جانت توصلني.. سنين كاتم ثاري ومن شفتها بوكتها هم أندفعت بغضب مـاجد.. السطحي وردت أنفذ إعدامها بإيدي بس صوت بنتي نبهني وصحاني شنو ردت أسوي وتوالت الأيام وبديت أشغل مـاجد.. المحقق مـاجد.. رجل الأمن ورجل الداخلية و لازم أتعامل وية قضيتي بطريقة غير شخصية أعزل مشاعري تماماً وأتأكد وبعدها أصدر الحكم العادل أنتبهت من أفكاري على صوت:
_ سيدي والله شايفتك بس وين مداذكر ؟
_ أم يزن آني مـاجد.. زوج مـاجدة..
باوعتلي بحدة:
_ اللي عفتها بشدتها؟
رديت بتركيز:
_ شدتها؟ ليش شدتها هي اللي أختارت الطريق بملء إرادتها طريق لـؤي وتجندت لصالحهم وضيعت أختي بسببها بس يلة.. أنتِ عمتها وأكيد راح تشهدين إلها وتدافعين عنها قابل تصيرين ضدها.
أتعمد أحجي كلام المستفز:
_ ممكن تتفضل جوة نتفاهم رجاءًا تفضل وهذول مفرزتك يا ريت تنطيهم أمر يروحون عيب من المنطقة والعالم مفرزة ببيتي لا آني تاجرة مخدرات ولا عدنا إجرام حتى تجي المكافحة لبيتنا وتفضحنا بهالشكل.
باوعتلهم :
_ روحو للسيارات أنتظروني..
أشرتلي بإيدها وهي تفتح الباب:
ــ تفضل سيدي..
دخلت وآني أمشي بالحديقة شفت أكو تغييرات و نفس الأشياء القديمة سبق البيت حرقوه بجثث لـؤي.. وعائلته دخلت للصالة كولشي مرجعيه مثل ما كان بس الأثاث مختلف والسقف مسويه جبس بورد والثريات متغيرة وتوسطت سابقاً صورة صدام هسه صورة للحجي أبو شاكر وبصفها صورة مكتوب الشهيد شاكر آني سابقاً شايف صورة الشهيد بس مو هاي اللقطة نفسها غير لقطة وهم باللبس العسكري الظاهر الصور القديمة أحترقت وي البيت أشرتلي أفوت واگعود:
ــ تفضل سيدي لو تحب أصيحك مـاجد.. كيفك إحنا سبق جنا أهل.
أبتسمت مستهزأ:
_ ولا زلنا المهم يزن هوبز و هوبز تاليته ختل مني مثل الجريذي وينه؟ خليه يصير زلمة ويطلع يواجهني.
ــ مـاجد.. اللي نالنا من البعث يكفينا عوف يزن أبني رجاءًا عوفه.
ــ ما أرتاح إذا ما أعتقله وأوديه ورى الشمس أو أنتِ بعد كيفج أنطيني شي فد سالفة منا منا تقنعني وعود أكافئج وما أسجن أبنج ترى ناوي أرفع عليه قضية وزايد عليها ألزمه متلبس بقضية مخدرات.
باوعتلي ودنگت تبجي:
ــ ما عندك دليل أبني يتعاطى ولا يتاجر بالمخدرات.
رفعت راسي باوعت لصورة الحجي حيل أحترمه لهذا الرجل جان أقاربي من عمامنا صديق للحجي وهو اللي بوكتها توسط النا وتدخل حتى يوافق الحجي وأتزوج جيجي العيون هاي جنت أشوفهن نسخة من عيون ماجدة.. وجان أبنه شاكر نسخة من الحجي بس الفرق إنه شاب ركزت بصورة شاكر.. ورجعت باوعت لريمة.. وگلتلها:
ــ اااييه.. زمن وسنين مرت وتالي آخر الحدوتة يطلع لؤي مو منكم أبن حرام ههههه والله مسكينة ماجدة بنت أخوج سابقاً ههههه طلعت غريبة عنكم صدوك لعد لـؤي.. منو أهله منو عشيرته شنو حسبه ونسبه؟ لو مثل توقعي أبن حرام.
ردت بكلمتين :
ــ بس أگدر أگولك وأطمنك على جد بنتك.. مو أبن حرام هو أبن حلال.
باوعتلها :
ــ إييي كملي من حقي أعرف جد بنتي المقبور منو هم أهله إذا هو أبن حلال حسب قولج إييي منو ذولة الحلال الخلفوه.
باوعتلي بغضب:
ــ أحترم نفسك و أطلع برى كافي تدخل شنو هذا الفضول الرجال لغيناه من نسبنا وأنتهى مالنا أي علاقة بي ولا بأولاده ولا بناته.. أوك.
ــ حتى جيجي.. ما ألج علاقة بيها؟
باوعتلي بإصرار وغضب:
ــ حتى هي ما إلي علاقة بيها لذا يلة اطلع برى وأنسى هذا البيت.. ما إلكم بي شبر كل أملاك أبوي وأمي وحتى أملاك مرت أبوي أم شاكر اللي توفت و تحولت لشاكر والنتيجة شاكر أستشهد والملك تحول لأبوي و إلي مناصفة حسب مذهبي.
باوعت للسقف وللمكان وأصرت أغادر المكان:
ــ الأفضل تغادر وما تتخذ يزن وسيلة ضغط علية حتى تستولي على الأملاك وهذا البيت بالذات.
باوعتلها بحيرة هاي شبيها هاي شنو هالنسوان ياهي أتفاهم وياها تتخبل وترعص شنو فلمجن:
ــ نعم دتطرديني ما أعرف آني شگلت حتى تطرديني عجيب و حيرة بأمركم أنتم عائلة طباكات أزلتم لـؤي.. من نسبكم ومن أدعي عليه تطرديني.
باوعتلي و بإصرار گالت:
ــ أطردك لأن مالك أي حق تسأل.. هذا ماضي ما يهمك.
ــ شلون ما يهمني وجد بنتي المقبور ما أعرف نسبه وأصله شنو.
ــ مو گوتلك تطلع برى أنت فد واحد مليق.
طلعت برى البيت واتصلت بالمفرزة يقتحمون المكان يجيبولي يزن هسة
إلا أخليج تركضين وراي وتطلعين كل المضموم سحلنا أبنها يزن سحل من نص بيتها وكدام عينها وهي تصرخ وتبجي وتهدد تشتكي علية و ترفع مظلوميتها :
ــ وين مترحين تشتكين أشتكي لگيت بحوزته مخدرات.
ظلت تلطم على راسها وتصرخ من طلعت من جيبي كيس صغير بيه حبوب وبطريق طلعتنا صورت الصور اللي كدامي عالحايط.
ــ أنتظرج.. تجين للمكتب منا لباجر إذا ما أجيتي وكشفتي المضموم ثقي بالله العظيم أخيس أبنج بالسجن مؤبد بتهمة ترويج وبيع مخدرات.
شبعته جلاليق ودفرات وهي وراي تبجي وتتوسل:
ــ مـاجد.. فدوة أروحلك على كيفك وياه أبني مدلل مو مال ضربكم.
ما همني كلامها نزلت بي كدامها كتله من كتله بحيث ظل يزحف زحوف من أعتقلوا ربعي وقيدوه وآني هم رجعت توليته دفع وجلاليق لحد باب السيارة.
صحت بالجنود:
ــ صعدوه... وتحفظوا عليه لبين ما أجي باجر.
أشرت للسيارة صعدوه وأخذوه گدامي وهي طلعت وراي بالشارع تتوسل:
ــ بس فهمني شتريد تعرف والله ما أعرف أنت شتريد بالضبط.
ــ أريد أعرف كل الي ضاميه عندي شكوك قوية واجه وقت الحقيقة حتى تظهر والمظلوم ينصف.
حجيت وحجيت وشرحتلها شنو أريد باوعتلي بحدة:
ــ أنت تريد تفتح باب جهنم علية عمر بحاله.. أنت شتحجي ها أخذ يزن بس راح أطلعه وأشتكي عليك تهمة كيدية والله أخلي مسؤولين مالتك يسحلوك سحل هسه أخابر لا عبالك ما عندي نفوذ ولك إحنا عائلة جاهدت ضد الظلم وناصرنا وهربنا شگد ناس مطلوبين واللي هم هسة أغلبهم مراكز بالدولة.
ضحكت باستهزاء وگلتلها:
ــ نشوف نفوذ منو الأقوى.. آني حالياً برتبة رائد وبعد كم شهر أستحق رتبة مقدم بس مو برتبتي أذكرج لا عيوني بنفوذي عندي نفوذ وية رتب كولش عالية حتى أعرف ناس مسؤولين كبار زمن الجهاد وسفري وهربي من البعث فادني خلاني أكون علاقات بوقت قصير و ذولة هسه صعدوا بالدولة و أحزاب أنتِ تگدرين تحاربين الحيتان؟
سكتت محتارة بس حجت شغلة خلتني أفكر:
ــ لعد تشكر وتترحم على الحجية الي لخاطر ماجدة جانت سبب إنقاذك إي ماجدة.. والحجية بفلوسهن اللي دزتهن تنقذك ماجدة.. باعت ذهبها وتداينت فوگاها من الحجية.. اثنينهن أنقذنك من حبل الإعدام تعرف (....) جان سابقاً رجل أمني بس جان مناصر للثوار لذا محد تدناله أو شك بي وقبل فترة شفته بالسوك وسلمت عليه ولو ما هو لا أنت عايش هسه ولا آني ولا رجلي عايشين ولا هسه بينا هذا الصراع أنت.. فلوس طلعتك من السجن وترتيب إقامتك برى و توصية عليك كوله بفضلي وبفضل أمي إحنا سوينا كوله لخاطر ماجدة.. اللي باعت ذهبها اللي أنطتها إياها أمي و تداينت فوگا وغير المراوغة حتى تهربكم.
_ ممممم إذا ماجدة مهمة عدكم لدرجة لخاطرها تحاجون شخص وتخاطرون حتى ينقذني و أطلع ليش هسة نكرتم النسب وياها.
_ بهاي.. خلي تعذرني طلعنا أبوها من النسب هذا حق وشرع الله و السويناه لخاطرها لأن أبوي يحبها.
_ شعجب؟
سكتت ودرت وجهي ورحت باوعت ساعتي وقررت أمر على بيت الشخص اللي جان عنده تواصل برتب عالية بزمن البعث هاي الرتبة جانت تشتغل لصالح الثوار وتهربهم يعني شغلهم مثل شغل سهيل الشخص اللي رايحله هسه عندي بي علاقة طيبة وهو جان أحد المساعدين المقربين للرجل اللي جان يساعد الشباب بالهرب واللي من رجعت للعراق سمعت لـؤي كشف أمره وعادمه دون محاكمة بأواخر عهد النظام أما هذا الشخص اللي تجمعني بي علاقة قوية بوقتها هم هرب ورجع ورى السقوط بس الغريب ولا يوم حجالي أو جابلي طاري عن الحجية أو عن ماجدة وصلت للبيت نزلت من سيارتي ودگيت الجرس طلعلي واحد من ولده.
_ الحجي موجود ممكن أشوفه كوله ماجد زيارة خشن.
شوي ورجع أبتسم بوجهي ورحب بية بلهفة وگال:
ــ تفضل.. تفضل بس گوتله بإسمك كال شلون متفوته هذا واحد من أولادنا.
هو جان يسمينا أولاده لأن يحس إن هروبنا من حكم الإعدام چان بمثابة ولادة جديدة على إيده دخلت شوي طلعلي يعرج كمت بقلق من خمس أشهر التهيت ما زرته دوم أغلبنا ولده اللي بسببه ما أنعدموا نزوره:
ــ حجي شبيك؟ سلامتك..
ــ والله يا أبني من طلعت تقاعد من شهرين لليوم ظليت أتمعمر بالحديقة وأشتغل بيها وقبل أيام التوت رجلي.
ــ حجي.. المثلك يگعد ويرتاح أنت هواي تعبت بحياتك إجه وقت الراحة.
أبتسم: العمل عبادة وترتيب الحدائق هم هواية عندي ألتهي بيها وهم أحرك جسمي ودمي الإنسان اللي يظل گاعد يتمرض يا أبني.
كعد وكعدت :
ــ شخبارك بعدك تدور طيرتك المفقودة وتدور ثارات وكسر الجناح وليدي أنت كبرت وهسه عاقل و اللي مثلها هسه تلگاها ماتت ما تبقى عايشة يجوز البعث صفاها ذولة يصفون حتى اللي يمشون وياهم وما يخلون وراهم إي إدله ويجوز يسفروهم للخارج كمكافأة نهاية خدمة الله أعلم يا وليدي هي و حظها و آني سابقاً جنت بعثي بالإسم بس أنتمائي جان لتخليص الشباب من براثن البعث فأعرف دروبهم ياما بنات راحن بمفرمة ياما تفننوا بيهم وبموتهن واللي محظوظة و واسطتها جبيرة هاي جانت نهاية خدمتها وياهم يسفروها للخارج.
أبتسمت : لكيتها ورجعتها لذمتي..
باوعلي مصفن..
ــ عجيب؟ أنت مو سولفت بعض من أمورك تگول مرتك تخونك وي رجال البعث وتشتغل لصالحهم و هي السبب بإختطاف أختك من عصابات البعث.
_ إسم مرتي هو مـاجدة لـؤي حمود.. حمود هو يكون أبو شاكر تذكره حجي صديق الأستاذ سهيل وأستاذ مراد اللي أنعدموا أستاذ سـهيل.. أنعدم علاسة من مـاجدة الرباها و مراد.. لـؤي عدمه قبل السقوط بفترة قليلة كشفه هربني وهرب جماعات من شباب مع الأسف ما التقيت بالأستاذ مراد.
ــ بنت بيت أبو شاكر.. مرتك وهاي شجابها لهيج دروب مستحيل لو بس منطيني هاي التفاصيل والأسماء من سنين جان أختصرت عليك كل هذا الغضب والحقد اللي تأصل بروحك سنين يا ماجد.. الحجية بعد موت الحجي أستلمت شغله لأشهر طويلة
جانت هي اللي تدفع تكاليف التهريب للمهربين وتصرف مبالغ وتخليها بإيد الشباب الهربانين لبين ميوصلون للبلد الجديد و يدبرون أمورهم و إجتني توصية ثقيلة عليك ووصلتني مبالغ ولازم تطلع آني بوكتها تصورت حالك حال بقية الشباب الثوار اليساعدوهم ما فكرت بيك إنك نسيبهم ولا أنت اللي حجيت أسماء گدامي جان نبهتك وفهمتك.
_ زين أنت علاقتك بيهم قوية حجي.
_ إي والله صح جنت شاب زغير أول معرفت السيد مراد ومن خلاله تعرفت على الحجي توة جان جاي من محافظته تزوج جنوبية صاحبة ملك وثراء جبير وبنت تجار معروفين من عوائل الجنوبية المعروفة وقبل تعرف ماكو فرق بين مذاهب جان هو غرب الوطن وهي جنوب الوطن مذاهب مختلفة أنجمعوا بزواج وهي زوجته الثانية الأولى متخلف.. هو عنده ملك بغرب الوطن بس مادياً هي أغنى منه أصلاً كل خيره أصله لأم شاكر.. الله يرحمها بقت وياه خمس سنين هم ما خلفت تأخرت حالها من مرته الجبيرة وقتها ما عدها خلفة وسولفلي شلون لؤي صار أبنهم قبل ليتزوج مرتة الثانية والحجي ما جان مقتنع بيها بس ما خله أم ريم وراه بس تزوج مثل مكتلك و أم شاكر ورى خمس سنين خلفت شاكر.. وتوفت بالولادة تعسرت وقتها جدات تولد ذيج من ذيج تجيب مستشفيات وهم الطب وقتها بسيط.
حجالي هواي أمور و طلعت شكوكي بهاي صح.. عاد ترخصت منه وتشكرته
وطلعت وراي صراع آني وأم يزن.. هسة وضحت الصورة كولش حسيت بتعب و هاي الثولة مويجيدة.. شلون خلت يزن يضربها والله لسة ناري ولا هدأت منه مريت للدائرة اللي منتمي الها لكيت أمه هناك. تبجي تتوسل ممخلية أحد ممتصلة بي ومحد مهتم.
_ روحي للبيت وفكري زين.
_ ما أكدر والله طلع أبني فدوة.
عفتها ودخلت مكتبي رادت تفوت أشرتلها وأشرت للمفوض:
ــ شنو هيتة ياهو يطب دون أذن مني مفوض راضي من يمتى هذا التسيب بالدائرة.
طلب منها تروح وآني دزيت بطلب يزن كعدت أفر بكرسي مكتبي صوت بجي برى وصريخ أم يزن من شافت أبنها غير دعاويها علية :
_ شمسوين بالولد الله لا يوفقك ماجد بعد الله شيسوي بيك شو لبسك عار أختك الدايحة وي البعث.
هنا بكل غضب طلعتها ما أضرب مرة بس طلعت حركتي بإبنها شمرته داخل مكتبي بعنف وگوتلها :
_ إذا ما أندمج أختي إحتمال شهيدة آختي أنخطفت من بيتنا أعتقال منيلج هاي المعلومات هااا تحجين كولشي لو لا الظاهر عندج معلومات حتى عن رحـمة ليش ما تعترفين.
باوعت للشاب يتوسل يبجي حتى من الضرب الكلاه والرهبة تدرر على روحه
تقززت منه:
ــ رجعوه وتحفظوا عليه باجر تحقيق..
خليت وطلعت و عفتها عسى ولعل ترضخ رحت بسيارتي للشط أباوع للأضواء و اليخوت وحسرة فوك حسرة
_ شنو السر ولج رحـمة.. وينج خوية يتهموج بشرفج والله لأحرك الدنيا عليهم بس الزم خيط عنج قررت أرجع للبيت لكيت أم يزن يم بابي توها واصلة ددك بالباب شافتني وكالت:
ــ أجيت أحجي اللي أعرفه بس طلع أبني حيموت بيدكم والله خطية وحسبي الله عالظالم.
رحبت بيها گوتلها مـاجدة.. فوك وأنتم تعرفون الصار ماجدة.. من تلهفت إلها تريد بس تشوفها والعمة بس تباوع ما أنطيتهن فرصة لمشاعر اللقاء كبل دخلت تشرط :
ــ مـاجد.. أنت دتعلب بالنار يعني آني شحجي ورى هاي السنين تريد تهجم بيتي.
أبتسمت: قصدج يرجع الحق لأصحابه.
وكفت مـاجدة:
ــ آني ما جاي أفهم جفاج هذا أعرف أنتِ تكرهين أمي بس بأخر فترة إحنا تصافينا ليش هسه هالگد باردة وياي حتى سلامج علية مو سلام وحدة بيها لهفة مشتاق آني جنت مفقودة.. محد يعرفني ميتة لو عايشة أعرف طلع أبوية لـؤي.. مو منكم بس والعشرة هاي شلون بهالسهولة تنكريها مثل ما نكرتيني.
هنا وكفت وحيل أنقهرت وتأذيت على هاي الفاهية و فجرت القنبلة بوجه عمتها اللي أخيراً أستسلمت وبدينا نحجي بالأجتثاث من الجذر الأجتثاث الأول اللي سبقه خطايا.. ناس تخطئ وارتكبت ذنوب وناس ثانية تدفع الثمن وتكون هي ضحية هذا الخطأ أجتثاث.
هي تحجي وآني بأسلوب المحقق أسأل وأطرح عليها كل اللي عرفته وتأكدت منه من الحجي ووسط هذا كله جانت مـاجدة.. واگفة ومصدومة مذهولة من حجم الخذلان ونظرة الأنكسار بعيونها حيل قهرتني بس كابرت.. درت وجهي عنها وما أنطيتها وجه جنت أكابر بس حتى ألملم بقايا كرامتي اللي تمنيت ما تضيع كرامتي اللي أكيد راح تتبعثر وتنتهي بكلمة من ماجدة.. بعد ما عرفت آني ظلمتها مثل ما أنظلمت هي من الجذور.
(نعود للجذور منقولًا عن ذويهم وعن اشخاص شهود عيان.
(بيت حمود المدخل للجذور الأجتثاث الأول من بعد طرح جميع الخطايا والأجتثاث بقى إجتثاث أول وهو الأساس بالقصة
حمود رجل من غرب الوطن.. من أكبر عشيره الها صيتها هو مثقف و حامل شهادة لكنه رجل مترسخ بعادات وتقاليد البداوة ومتزمت لها من إنتقل للجنوب مع زوجته عنده نفوذ و عنده أصدقاء تجار الطريق الى الجنوب...)
حـــمود..
باوعت لمرتي سفاهن.. دوم أستصعب الأسم أحسه غريب فمرات أصيحها فخرية مرات شكرية يومية أطلعلها أسم أباوعلها وهي تحضن الولد لـؤي
حاجيتها بأسم اجة بعقلي غير إسمها:
_ صبرية وصلنا العاصمة ومنا قطار للجنوب اكيد أنت جوعانة وهذا أبو جرك يفتر أجيبلج
خزرتني وزعلت بس والله أسمها غريب لو مسمينها سفانة احلا شنو سفاهن:
_ يومية إسم شكل صيحني أم لـؤي.
وظلت تبوس بالطفل العمره دخل خمس سنين.. بحسرة كوتلها:
ــ عجل لو أبني صدوك أأخ ما مكتوب تقر عيني بطفل.
خزرتني: خاف الله باليتيم.. بس يصيرلك
جريت نفس طويل ورجعت الذاكرة بية سنين لورى و تذكرت بوكتها جان حملة أعتقالات الشيوعيين الباب يندك بعنف فتحته و نورية الشيوعية بنت عم مرتي دخلت وهي تباوع بخوف.
_ شردت بين المزارع أخذوا مروان.. مروان.. راح يا سفاهن ويردون يعتقلوني فدوة لا تسلموني بقوني لبين ما أهرب.
باوعتلي تتوسل هي و سفاهن و غيرت إسمها كالعادة :
ــ رضية هذا تستر على شيوعي يعني ننعدم أعتذر خوية نورية لأن بقائج ببيتنا يعني الموت إلنا.
ظلت تبجي وهي تتوسل
ــ محد يتوقع وجودي هنا لا تتخلون عني آني حامل فدوة.. سفاهن أصلاً آني مريضة و مراجعات الطبيب نهاني أحبل بس بعد صار و طلب أجهض و رفضت يعني إذا متت الطفل الج والله ربيه.. يمج أبني أدري آمان وما يحتاج شي
ترجف خايفة بوجهها وخشمها أثر دم:
_ فوتي والله اليستر.. يارب سترك.
أخذتها سفاهن وتحاضنن يبجن..
تشكرتني:
ــ خوية أبو غايب اتشكر منك والله يارب يرزقك بالذرية خوية المختار هو رشحلي بيتك ووصلني هربني لهنا گال عندك نفوذك ومحد يشك ببيتك وهم مرتك مو غريبة أبوها يصير أبن عم أبوي من بعيد.
ــ عجل الدم ميصير مي خوية والكاتبه الله يصير ولا تصيحيني أبو غايب إسمي حمود الغايب لا بد بيوم ينولد خيتي نورية.
بقت عدنا نورية وفعلاً محد دك بابي وشك بيها ببيتي بيوم كالتلي نورية:
_ خوية.. آني قربت أولد بس صحتي بالنازل إن عشت وإن متت هذا الطفل الكم أخاف عليه من الحكومة لا ياخذوه يمك أنت ومرتك أمان.
جانت تحجي وجهها أصفر وتعبانة من دخلت بشهرها الثامن للحمل ساءت صحتها أگولها خلي أخذج للطبيبة بس ترفض تخاف تلزم وتسبب إلنا مشاكل:
_ آني أموت أعرف روحي.
باوعت لسفاهن وكالت:
ــ سويتي العلمتج عليه.
باوعتلي سفاهن بتردد و كالت:
_ إي خية نورية.
ــ حتى لو عشت آني هو الطفل الج وضعي السياسي مهدد و أخاف عليه يمج أمانتي هذا.
_ أن شاء الله أصون الأمانة وما أقصر وياه أدللـه.
باوعتلي: أمانة الله ورسولة الطفل يا خوية.
سكتت وأخذت سفاهن برى:
_ شنو القضية ما فهمت شي.
_ من كم شهر بالمنطقة شيعت آني حامل ومريضة ومن أطلع أخلي لبطني كوار خرك تبين حمل.
_ ما استأذنتيني ولج شلون أخذ أبن العالم وراه أهل وعشيرة أبوه وعمامه شتحجين لا تورطيني.
_ شمدريهم تكول محد يعرف بحملي بس رجلي انت اول تالي تشوفلك مرة تخلف وآني أبقى بلا ذرية عاد أكبره يشيل كبرتي يا حمود.
_ لا اله إلا الله تلعبين لعب ما مرتاح للسالفة هذا حرام و تردين أنسب طفل مو من صلبي باجر و رزقني الله بنات شلون يربى وياهن.
_ آني ما مني أمل تعرف هواي راجعت دكتورات وحتى جدات عرب ماكو أمل ناخذه يتيم نكسب بي ثواب ونربيه يرد عنا الوحشة ويونسنا.
سكتت مكسرت بخاطرها وصار اللي صار توفت أمه وقتها أندفنت بسكته وحتى دون شهادة وفاة وضاع ذكرها كمفقودة الحمد لله هي أهلها متوفين من الصغر ومحد سألنا عنها كل ظن الحكومة كدرت تعبر خارج الوطن.
هزت إيدي فأنتبهت من تسلسل الذكريات وأيضا غلطت بأسم سفاهن هالمرة صارت فريدة :
_ ها فريدة.
_ يبووو.. ساعة السودة اللي سموني سفاهن صيحني أم لـؤي هذا صار أبنا جاي أكولك الولد برد أنطيني الإيزار من الجنطة أغطيه.
وكفت بممر القطار وجريت الجنطة من قمرية فوك كراسينا والحياة بالجنوب جانت أفضل وأكثر تطور من محافظتي الأصلية حتى إزدهار علمي وثقافي هنا أكثر من مرة التقي بشكرية بنت كبار التجار هنا مصالح ربطتني بأبوها بس ما كمل أبوها توفى وأستلمت هي مكانة.
أذكر من إجت:
ــ أستاذ آني شكرية بنت عطية شريكك أجيت أتفق وياك نكمل الشراكة وصلني خبر تريد تفكها.
باوعتلها مسحور بجمالها وسمارها الجنوبي:
ــ إي أكمل ليش لا ست ست..
_ صيحني شكرية.
_ ااا... أحم شكرية آني شوي مشغول بوضيفتي آني مدرس فيزياء فمخلي عمال.
_ إي وإذا..
جانت شكرية أغنى مني بهواي هواي عمارات أملاك مطنطنة و بيوت.. زادت لقاءاتنا وتحولت لقصة حب عكس زواجي بسفانة جان زواج أقارب و تقليدي و صارحت سفانة أنتفضت بغضب ورفضت بس من كوتلها أريد ذرية دنكت سكتت:
_ ما أعيش وياها روح سوي اليعجبك.
تزوجتها و عشت أجمل خمس سنين زواج عن حب أعوام المرت جانت أجمل أعوامي خاصة هي مكملة دراستها لذا أفكارنا متشابهة متفاهمين هملت سفانة و لـؤي (ادلعها سفانة أسهل من إسمها) الي سفانة تدلله لدرجة الفساد هو عدها كولشي بالحياة و تعاركني من أعترض على تربيتها هي تصور لأن مو أبني من صلبي بس آني أريد يصير رجال فأضطر أقسوا عليه حتى يصير حوك بس الصار أنملى حقد.
و حبلت شكرية و حملها تمام وصحتها شحلاتها بس مشاكل آني عازلهن كلمن ببيت خاصة شكرية عدها أملاك ما قبلت تعيش وي ضرة فضلت ببيتها
أما فترة الحمل بقيتها يم سفانة عود تداريها بس تحول بيت إلى مشاكل بين شكرية.. و بين لـؤي.. وسفانة..
_ لا والله أنت مدري شلونك شوفه ولد شحلاته بس هاي شكرية.. توزك حتى تكرهه أكيد كتلها مو ابنا مو؟ شوف حمود أنت تزوجت شكرية.. العوبة ما حجيت صح مشاكل ضراير توصل كفاش من الشعر رغم هي ما تقبل تكعد بيت واحد بس نلتقي أحياناً و تنتهي بعركة من الروس بس والله لخاطرك أسكت لخباثتها متكبرة و مغرورة عليمن والله تمد إيدها على لـؤي.. أكسرها لا تضربة..
_ شبيج سفانة؟! على كيفج
_ أجت تغثني وتتحجج بتفاهاتها ولكيتها تضرب أبني وتريد تجويه.
_ أنتِ كذابة ابنج وكيح أم لـؤي.. أصلاً شكرية.. تكول يضرب بطنها
_ كذابة كفنا شرها لا تجينا بعد زين.
_ أبنج صار عمره عشرة و لسانه ميحترمها تشتكي دوم منه
_ كذابة ولوتيه مرتك هاي راح تخبلي أبني تذب عليه تهم الله يرضاها؟
_ كافي كافي المرة تحب لؤي وآني لخاطرج ترى الولد مبقيه وهم عدموا كل أهله عمامه واللي بقولة بعاد عليه بالقرابة ينشمر ميتم وضميري ما يتقبل هذا.
بجت وهي تتوسل وأخذت لـؤي.. لحضنها:
_ راح اخليه يبتعد من تجينا مرتك بس لا تشد راس وياه.
ضاع الحق من الباطل بين شكرية و لـؤي منو الي يسبب مشاكل بس جنت أميل اصدك شكرية بنظري هي ملاك ومرت شهور الحمل و تفاجأت بالولادة كالوا متعسرة والصدمة وفاتها أذكر يومها مكابل أبني باوعتله لحمة حمرة و سلمته لسفانة اللي أعلنت التفرقة وميولها لأبن قريبتها إي سميته على أسم أمه شاكر من شكرية حتى سفانة (سفاهن) ما تفهمت حزني تشمتت:
_ هاي حوبتنا ماتت لأن أنت مو حقاني وتفرق.. تفرق بيني آني وهذا اليتيم اللي هملته وبينها هي وحملها اللي فضلتهم علينا ولدتلك من صلبك هاي بركة بكفالة لـؤي بس كون العقول تفتهم وتعرف الله.
_ عيب الشماتة راعي حزني و لـؤي ما هملته دلالج مخربة ولا مفرق بينج وبينها الله يشهد.
كبروا الجهال ومرت خمس سنوات لـؤي أحسه زاد عنف و بيوم رجع لـؤي وجهه أحمر عصبي يجر بأخوه العمره 5 سنين بس جان وكيح حرك يلعب وي جهال الشارع و لـؤي.. دوم ينبه ممنوع يطلع طفل يجروه الجهال وتخرب تربيته بس أحس يتحجج على أبني يريد يعقده بالبيت يعني شاب شكبرك تأذي حتى الحيوانات اندك الباب رحت:
_ منو؟
_ أبو مـحسن.
فتحت الباب :
_ يا هلا أبو مـحسن.
_ عمي تابع ابنك يلزم الحيوانات بزازين قبل كم يوم يجر بحبل سرهن يشلعه توهن مولودات خطية واليوم كلب شنقة.
تعذرت ووعدته راح اعاقبة هديت لزمت لؤي حيل وشاكر ختل ورى القنفة يباوع بعيونه وخانس أكيد شاف مشهد تعنيف كلب وقتله ربحي.. بلؤي يعقدلي أبني ضربت لـؤي.. لزم وجهه
_ ليش شمسوي؟
_ تكتل بزازين و كلاب ولك ذن روح.
دنك ما حجى بس نزلت دموعه باوع لشاكر.. اللي يبجي يرجف سودة علية وليدي مخلوس من أفعال اخوه:
_ إي آني قتلتهن آسف ما اعيدها ضربتهن واير وشنقت كلب.
جبت صوندة و عاقبت لـؤي كولشي ولا الحيوان وأذيه الجيران الا اربيك هدت سفانة وهي تدفع بية فبعصبية كوتلها:
_ الجيران دوم يشتكون منه لازم كلب بالشارع شانقه أصفكله؟ لو البزازين ما سلمت من شره أبنج راح تحوليه مجرم لأن تضميله أخطاءه و تعاركيني من أعاقبه يلة ولك لغرفتك يلة ادبسز
راح يركض وهو يناشغ يبجي ولازم ضهره يتلوى الم من قساوة عقابي.
بجى شاكر:
_ مزاعلك ضربت أخوي تف عليك.
ركضت أريد اكتله شرد ورى اخوه:
_ أستغفر الله هذا شاكر.. منين متعلم يتفل عالجبير أكيد أبنج لـؤي.. مخرب تربية الولد عود هم ذكريني يتيم للعلم أنطيته أسمي حتى يعيش بكرامة لأنه أبن شيوعي وعاملته كأبن من صلبي وآني أبوه اللي أربيه اأي أحاسبه حتى يصير زلمة بس أنتِ تعتبرين كل عقاب و كل تصرف مني عداوة وتعمد أاذيه زرعتي داخله هذا لدرجة أحسه حاقد علية يسوي إي شي حتى يأذي سمعتي بالمنطقة ولج لازم الحيوانات ويعذب بيهن هذا مو صاحي.
_ كذابين الي يكولك يكذب يكره لـؤي أصلاً أبني مؤدب و لطيف.
_ إي كولش..
هواي مواقف بس أختصرتها إلكم
السنين تمشي وصاروا شبان لـؤي تخرج من الكلية العسكرية تخصص مخابرات و بالحرب نقلوه لمخابرات عسكرية أذكر فرحتله من تخرج و بيدي لبسته رتب الملازم وقتها.. بس بقى يغار من شاكر.. و بقى يدور طلايب و الحرب بدت و مواليد أنطلبت هنا واسطات خليت شاكر.. وي أخوه كلت أخوه ويهتم بي بعده شاكر توة تخرج ولازم يلبس عمرة توة 22 خريج كلية علوم كيمياء إجت أم لـؤي.. تريد أخطب للؤي بنية أقاربها جيرانا يومها طلابة شكبرها سمع شاكر.. و أعترض:
_ يمة قبلة كتلج أريدها أخوي أكبر مني بعشر سنين آني البنية بجامعتي
و تخرجت قبلها أكبر منها بسنة كضينا ثلاث سنين علاقة حب بالكلية تريدينها لإبنج شلون اله نفس بنية أزغر منه ب 11 سنة لا يابة لا تظلمونا
هنا رفضت البنت مو أستنقاص بيها بس مردت الإخوان يتعاركون على بنية الله يشهد جنت أحبه كأبني شاكر.. راح يلتحق أبني وصيت لـؤي.. عليه كولش:
_ أخوك عضيدك وسندك هذا دير بالك عليه أنت ما تتوصى أنت وليدي الجبير.
تلفتت : زين وينه مختفي
رد بحدة:
ــ راح يلاقيها يابة مو كلت نسد سالفة البنية بس شاكر.. ما سد السالفة أبد
ويلتقي بيها.
سكتت ما أعرف شجاوب..
هــديل.. أوائل الثمانينات..
شكد أفرح من أزور خالتي لأن راح أشوف الحبيب ببيتهم جيران لخالتي الجمعة آروح بينا قصة حب أبتدت صداقة طفولة ومن راهقنا تحولت لحب وعشق فجنت أدور دوم حجج حتى نتشاوف وهو صار يجي للجامعة باوعت أخر نظرة لوجهي التسريحة دلص أو تسريحة الأسد تعطرت ماكو مكياج فقط كحلة عيوني آني وحبيبي مقاربات بس حبيبي أحلا وافتح.
_ ماما رايحة للجامعة يجوز أتأخر نطلع آني و صاحباتي.
_ روحي بس هواي دتتاخرين..
أبتسمت ولمحت:
_ يجوز بس هاي الفترة وياج راح أتخرج و أتأهل وآني حلوة الحلوات قابل أبقى يمج هههههه.
باوعتلي وكالت:
_ جيرانا أم حازم طلبتج كوتلهم دتدرس.
_ إي أدرس لا تقبلين ترى ماأاتزوج بس اللي يقنعني مكانةً و شكلاً و أهم شي الأخلاق.
_ الله يهديج بنتي ويوفقج ويجيبلج آبن الحلال اللي يهنيج ويعوضج الفقر العايشيه.
رحت بساع أتمشى و وكفت سيارة حبيبي فتحت الباب صعدت:
_ من خابرتني وآني قلقة عليك صدوك سحبوا مواليدك شلون خايفة عليك.
_ لا تخافين أبوي عنده نفوذ توسطلي نفس الوحدة اللي بيها لـؤي.. لأن لـؤي بمخابرات عسكرية أبوي ما يعوفني وحدي موصي لـؤي علية وهم ناس يعرفهم.
_ الحرب ما تعرف واسطة يا حبيبي ولـؤي.. ما أثق بيه لأنه كم مرة كوتلك ما أرتاحلة من الطفولة أحسه يحس بنقص و دومه حقير ويحب يستولي على أغراضك.
ــ مستحيل اللي دتحجيه أنتِ لأن دوم وياه عرايك ودومج تكرهيه ولج هذا أخوي.. اصلا دومه يحميني ويفديني بنفسه وآني الي أحب استولي أغراضه أحب اشاكسه هواي بس أخوي أحبه.
وصلني للجامعة وكال يمر علية من أكمل حسب أتفاقنا لأن عازمني.. آني وشاكر بينا حب من المراهقة وصداقة طفولة وبيني وبين لـؤي.. عداوة دومه حقير لدرجة أجاني للجامعة يعترف يحبني ويذكرني بماضي بينا ماضي نفرته من عرفت شغله حجتها أمه يم خالتي وحلفوني ما أحجي سكتت و الثمن تركته لأن اكيد اتزوج واحد عنده أهل وجاه مال أعيش مرفهه مو بعوز مثل أمي اللي عانت وي أبوي لأن فكر.
تذكرت عتابه توسله:
_ آني أحبج و لازم تتركين شاكر.. لمصلحته وتقبلين بية حاجيت أمي تخطبج.
رزلته: آني مو بايسكل ولا لعبة وتاخذها منه لأن أبوك قاسي وياك ترى أمك تشكي يم خالتي ما تضم شي لا عيوني أنت ما تفيد أحب شاكر.. و البينا أنتهى
تركته و هددته يبتعد عني:
_ وعد يا هديل.. ما تتهنين بي.
_ شتقصد؟
_ مستحيل أخلي زواجكم يتم اقتلج وانسجن ولا أقبل تتزوجين أخوي وجنتي وياي علاقة حب.
ظليت قلقة محبيت يصير وي أخوه بنفس الوحدة.
أبو شـــاكر..
صوت صياح وعياط عالي بالممر بين الإخوة لگيت لـؤي.. لازم شاكر.. بكيبل يضربه بي وشاكر.. ديصيح :
ــ لا خوية.. والله أحبها.
ــ تنساها هاي تحدتني وآني اللي يتحداني أدمره.
ــ خوية أتوسل بيك عوف حبنا أنت لا عبالك غشيم ما أعرف دروبك ملتهي بالملاهي والشرب ترى والله العظيم أروح أگول لأبوي.
هنا بعد ما گدرت دفعت لـؤي:
ــ أنت شجاي تسوي ولك تضرب أخوك يا طايح الحظ تهضمه وتذله بلي يحبها مو هذا أخوك يتيم.. دير بالك عليه مو آني خليته وياك نفس وحدتك شلون آمنه بعد يمك.
تراجع لـؤي.. وهو مهضوم:
_ يابة عمري صار 32 أريد أتزوج هديل أقارب جيرانه أم حازم.
باوعلي يترجاني :
_ ضروري أتزوجها تحدتني إلا أكسر خشمها.
_ هذا دلال أمك إلك مع الأسف إحنا ما صنا الأمانة ولا ربيناك صح دللناك لحد الفساد والخراب تريد تكسر ببنت العالم وتهجم بيوت الناس حتى تشبع
غرورك وجبروتك شوف ولك لا إلك وأنت هم يا شاكر.. أنساها لهالبنية ما متوازي علمود مرة تخرب بينكم.
كام شاكر.. بتمرد:
_ خربت بينا بس خليها ببالك يابة أخوي اللي عينه على حبيبتي ما أريد أخوته أبد باجر التحق وكون أموت وأخلص عفتوها بنفسي وحرمتوني منها.. والله هذا آني عود أبنكم.
دخلت سفانة تصيح على بنتي ريمة اللي أنولدت بنص السبعينات بعد سنين طويلة من الأنتظار خطية ما خلفت غير هالبنت بس رغم هذا جانت تميل للؤي.. وتفضله على الكل تگول هذا الولد أمانة وهو وجه الخير علية:
_ تـعاي أمشطلج..
ظلت تركض و لزمت بيد شاكر.. وهي تلاعبه ورجعت لزمت إيد لـؤي وشبكت إيديهم سوى:
_ كم مرة أصالحكم المن مزاعلين خوية لـؤي.. خطية شوفة يبجي صالحة.
لـؤي.. نتر إيده من شاكر.. و رجع باوعله:
_ ليش أختارتك وآني أحبها قبلك ليش شناقصني.
دنك شاكر.. وظليت آني محتار وعاجز شسوي حتى أفض هالشغلة وأطفي هالنار المشتعلة بيناتهم لـؤي.. ربيته وتعبت عليه لحد ما وصلته لهيج مكانة رغم هو بعده ببداية مشواره شاكر فقير وفطير كولش على أمه بساع يصدك وعود الحب بساع ينقهر وينجرح من أخوه ولدي مدللين بس للأسف معرفت أبني شخصية لشاكر تخليه يحمي نفسه ويأخذ حقوقه بإيده أميل أنفذ لشاكر وأوگف وياه وأزوجه حبيبته بس أخاف العواقب وأخاف بين الأخوة حسمت الأمر:
_ البنية.. لا إلك ولا إلك سدوا السالفة لا تخلوني أروح لأهلها وأسوي طلابة إلها أستجنوا.
عفتهم وطلعت لدوامي وقتها جنت بعدني ما متقاعد..
لــؤي..
شناقصني وأنرفض شو نقيب گد الدنيا بجهاز أمني مهم ومستقبلاً بس تخلص الحرب.. ناوي أنتقل لجهاز المخابرات المركزي ليش متريدني أحبها من هي زغيرة أعرف من أعصب أجرم بالمقابل ومن يوم الضربت أبن خالتها ببوري وهي نفرتني جنت أحس بيها تميل إلي قبلها أول ما بدت تراهق بس حولت على شاكر شلون تريد أفعصهم سوى النوب أخوي اللي أحبه تريد تخرب خوتنا هدأت نفسي كلت قسمة ونصيب ورحت لشاكر:
ــ رفيق زعلان مني مو بيدي حبيتها قبلك وأنطتني هي أمل غمزات نظرات ضحكات اتصالات تالي ليل رسائل والله من نهت علاقتنا حركت هداياها والرسائل جان أنطيتك ياهن كدليل ضدهة حتى تصدك بيه ولك صدك أخوي لا تخلي مرة تخرب بينا هي بسبب عركتي وي حازم نفرتني وعافتني.
باوعلي وبأصرار عاندني:
_ ما تاخذها زين وكول كال شاكر.
_ شتقصد؟!
_ سلامتك.
التحقنا و خليته مقرب مني وادير بالي عليه كم مرة أصدقائي عادل وعدنان وجميل اللي صعدوا مناصب تالي قوية ينتقدوه
_ توصينا عليه بزر نستلة شنو بابا يدرب و يقاتل حالة حال الضباط البقية.
صاحه جميل: ملازم شاكر.. تعال.
تقدم وطك تحيه النا.
_ نعم سيدي.
_ وحدتنا راح تنتقل للخطوط الحمراء وأنت تحتاج تدريبات مكثفة خلال شهر تنسحب الوحدة لأقصى الجنوب لازم نحرر أرضنا من الأعداء شلون نقود ضباط وجنود مثلك صير زلمة و تدرب الثقيلة حالك حال البقية.
باوعلي يتوسل أنقذه أعرف مدلل و مو كفو قتال و تدريب برصاص حي:
_ جميل على كيفك شاكر ميروح للجبهة إلا بعد إكمال شهر تدريب خوية شاكر تنزل مجاز أجازة مأمورية وتكليف مفتوحة من أجي آني تلتحق وياي وترجع تدريبات مكثفة قبل نزولك للجبهة.
أخذته جانب وطمنته:
_ أحاول أخليك عسكري إداري لو أعرف أسوي المستحيل و أزور كتاب صحي أخليك غير مكلف بحمل السلاح أو القدم سطوح هنا ميخلوك على السلاح أما إداري أو ندفع فلوس بدل تكليف والله بيهم يدفعون بدل يبقون ببيوتهم بس لازم دوم يروح يوقع حتى لا يعتبر فراري بهاي الفترة الي تروح للبيت آني أرتب وضعك هنا ولك ترف مو مال حروب شوف شلون ماع الفطير بس ذبوه تدريب بالشمس.
فرح وبوسني ومدحني:
_ ما كذب السماك أبو الغيرة ولك لـؤي خوية أبو الغيرة دبرها مو مال حرب آني واسطات أبوي واسطاتك بعد أخوك.
ضحكت و استحى دومه من صغره رچيچ فطير رغم عركتنا الأخيرة بس أحبه أخوي رغم أبوي زرع بينا كلمة أنت واحد غيور من شاكر بس جنت سنده يتعارك دوم أفزع مكانه دوم و أضرب اللي يأذيه بقسوة تعلمت دوم أتحمل أخطاء شاكر حتى من أخذله فترة يمشي وي أولاد وكح يضربون حيوانات وياذونها وتجي شكوة لأبوي أعرفه أبوي ما يقبل بإذية بشر ولا حيوان جنت أتحمل العقاب واعترف آني الضربت و الاذيت الحيوان.
_ شكبرك تصرف تصرف أرعن و تأذي حيوانات ممأذيتك.
وينزل بية بصوندة لو عقوبات قاسية جنت أكول آني جسمي جلد مو ترف مثل شاكر ميتحمل عقوبة هو عمره 6 وآني وقتها 16 مراهق فنظرولي سادي آاذي حيوانات لأن بعمر المفروض يفهم يميز.
أذكر يجيني يبجي:
_ هم كلولي نشلع خيوط صرة القط الصغير.
لزمته أعلمه.
ــ عوفهم ذول جهال ممترباين حيوان توه مولود تشلعون حبل السر ماله ليش ولكم خطية لا ترافكهم أموتك دكاك بس أسمع بيك زين..
_ هديل كالت تعال بزون ببيت خالتي ولدت وخالتي تريد تذبهن تعال نذبهن بالجول وهناك التمت الأولاد يضربوهن وهديل وياهم فشاركت.
_ لا اله الا الله.. بعد مالك علاقة بذول وكح.
كبرنا بقيت أتحمل أخطاء المدلل و شاع علية كل ذنوبه واجتثيت من مشاعر أبوي اللي أحسه يجامل على حسابي ويفرق بيني وبين شاكر و دون سبب كبرت وشفت هديل گدامي كل ما تجي تبرز أنوثتها وجمالها وراهقت من عمرها 15سنة نظرات وضحكات بيناتنا بوكتها جنت توني متخرج من كلية الضباط ورسائل وصلت علاقتنا لثلاث سنين من حب وراها تعاركت وي حازم ومن يومها نفرتني مدري شلون كبلت وي أخوي أعتقد بالجامعة لقاءاتهم كثرت وهنا تحولت الصداقة إلى علاقة حب هي مرحلة أولى و هو مرحلة ثانية وقتها طلبت مني أبتعد ولمحت آني مو الإبن المفضل يم أبوه و لمحت أمور إنو أحتمال مو آبنهم مدري منين سمعت أعرف علاقة أمي وي أم حازم قوية رحت بيومها لأمي وآني مقهور أريد الحقيقة بس نكرت وكالت هاي عوفها ما تعرف شتريد مو رزنه ليش تتورط وتريد تخلق مشاكل تشكك بأنك ابنا خلي تاكل تبن هملت الموضوع ومشت حياتي وآني مغفل بيوم توسلت بأمي تخطبها :
_ بس يمة أحبها هي حبيبتي أريد أخطبها.
_ أوف منك أخطبها وأحاول أقنعها.
وفعلاً راحت أمي تجس نبض البنت بس إجت غمتني:
_ ما تربدك تغني مواويل مو يمك لا تذب نفسك على بشر تولي أزوجك أغاتها.
وأنسد الموضوع.. لحد ما فتحه شاكر من جديد وهو يريد يخطب البنت اللي جانت حبيبتي لثلاث سنين تاليها طلع بيناتهم علاقة حب بالجامعة رحت بنفسي وتأكدت.. إي نعم تأكدت الكل هناك بالكلية و يسموهم عصافير الحب يسولفون بحبهم والصدمة من شفتهم بعيوني إيد بإيد يمشون بوكتها حلفت والله متزوجها يا شاكر شگد أنت عزيز علية ومستعد أفديك بروحي بس هاي البنت بالذات تحدتني ومرغت كرامتي ومستعد توصل للدم من وراها وأنسى خوتنا بس الحمد لله الظاهر أبوي حل الموقف ونهاها السالفة گال لا إلي ولا إله إي أحسن بنية تلعب بين الإخوان ومتعرف منو تريد هاي تريد مكانة وفلوس ومن شافت أبوي يميل لشاكر عافتني.
شــــاكر...
نزلت حسب الإجازة كمكلف فرحان أريد أنتهز الفرصة أخوي هنا إجازة مفتوحة أكمل عرسي وأقنع أبوي نخطب أحب هديل ما أكدر أصدك حبت لـؤي قبلي أعتبره كذاب وهي نكرت كالت هو ذاب نفسه علية إحنا من الصغر جنا أصدقاء كبرنا وعشكنا بعض بفترة هي إمتحانات سادس جانت تجي بيت خالتها يدرسوها هنا بد الحب بينا بس ما بينا حبنا لحد لمن بيوم أجاني لـؤي و شافنا إيد بإيد نتمشى عشاق و الجامعة كولها تحجي بحبنا تذكرت حجاية لـؤي وهو يبتسم ويودعني من نزلت إجازة:
_ هو أنت مو كفو حرب تروح للجبهة ترجع ملفوف علم.. شوف خوية بهذا الأسبوع راح ياخذون الشباب للجبهة وإحنا وياهم لازم نروح أنت أبقى لمن أرتب وضعك بعيد عن الجبهة والموت شعندي غيرك النوب تروح مني.
وقتها باوعولي واحد أسمه جمال جان نقيب مثل لـؤي و عدنان رائد وعادل تاخرت رتبته عليه عقوبات بقى ملازم أول أما آني توني لبست عسكرية بعد ما تخرجت من كليتي رتبتي جانت ملازم بس وصلت لأهلي وتفاجأت حتى أبوي ماخذيه جيش شعبي و يتدرب سولفلي متعرف على ناس اللي يدربوهم إلهم مركز وأنتقد الحرب والأوضاع والحكومة:
_ لا تحجي يابة الحيطان تسمع وما أريد أخسرك بلكت الحرب ما تطول يابة مدام لـؤي.. ما موجود أترجاك تخطبلي والله بنفسي بس تخطبها الي أكيد أخوي يشيل إيده تدري هناك مدللني ما يخلي عقوبات الي مثل الجنود ولا أحد يكدر يحاجيني ترى هو عصبي صح و يهدد ويهوبز بس گلبه طيب ما يحرمني منها أخليه أمام أمر واقع و يزعل فترة ونتراضى دومنا هيج.
كدرت أقنعه وأعرف عائلة هديل ناس كد الحال يعني ما يمانعون بتهم تزوج شخص متمكن أتفقنا على كولشي وعقدنا شيخ بس أبوها راد خطوبة طويلة لذا مقبل نعقد محكمة إلا يرتبون وضعي بعيد عن الجبهة سبق أبوها متخوف لا تترمل بنته فبين ما ينطي بنتة لعسكري لو ما بينت إلهم آني إداري مو بالجبهة وراح أرتب وضعي أدفع بدل و بهاي الفترة ظليت أطلع وياها ونيتي أخذها حتى ما أترك مجال يرجع لـؤي و يأزم الوضع وتعال أفسخ أملاك أمي هواي ومزارع عدنا كل هذا الي وآني دوم أسولف لهديل:
_ شايفة البيت اللي بي إحنا هذا بيتي لأن لأمي وأنتقل الي ورثي من أمي
وعندي بيت بمنطقة راقية.
ذكرت أسمها كالت:
_ بيت خوالي هناك عندي أبن خال مستقل من هسة مشتريلة بيت تدري رادني ورفضته هههه وآني أريدك الك.
لزمت إيدها حيل بغيره:
_ أراويج البيت.
تحمست هي وهذا المطلوب:
_ خاف أتأخر وأمي وأبوي شوي هالايام يوصوني يكولون أكولك ما يردون خطوبة طويلة إحسم موضوع دفع بدل بس أكولك الحكومة شلون توافق متشددة.
_ واسطات ويرتبها لـؤي.. تقرير صحي آني غير مكلف أو غير قادر حمل سلاح أنتِ بس كولي يا الله ماكو عوارض.
_ أن شاء الله ولو أخوك ما مرتاحتله ولا أحبه شلون لفق علية نحب بعض ويشوهني يمك كوله غيرة منك.
_ لا لـؤي طيب بس يجوز أنعجب بيج هو راح أحسم الأمر ههههههه.
ضحكت و سقت للبيت:
_ من نتزوج أعزل بيج هنا هذا بيتنا شوفيه يخبل كل هذا الخير يا هديل باجر لجهالنا الحمد لله أمي تركتلي أموال وعقارات وعمارات وبيوت ملك خير من الله.
أبتسمت ولزمت إيدي :
_ هواي أحبك.
نزلنا كتلها:
ــ المكان نظيف دوم أكو من ينظفه خاف نجي هنا وآني أحياناً أحب أنفرد هنا أوقات لؤي يجي وياي وهسة جبتج شنو رأيج تسكنين هنا بعد زواجنا.
_ إي عجبتني فكرة نستقل بحياتنا ولا أكابل أخوك أبو الطلايب.
_ لا عاد تخلين أخوي بعقلج.
هـــديل..
أباوع بوابه جبيرة وبيت يخبل بنفس شارع بيت أبن خالي سمعت مأجره لناس وكاعد يم أهله بعد ما أعرف بس هيج يوصل الحجي من يوم رفضته خربت علاقة أهلي وي خالي وولده..
دخلت للصاله حبيتها بحياتي مشايفة هيج بيوت فخمة لزم إيدي :
ــ أراويج غرفتنا حتى تشوفين شنو تردين نغير بيها.
لزمنا أيد بإيد وصعدنا ركض وإحنا فرحانين ببيتنا المستقبلي وبخططنا فوتني غرفة كولش جبيرة و حلوة تلفتت وافتريت حول نفسي على كيف وآني أتبع الأثاث والجمال والحياة الغنية اللي تمنيتها:
_ هاي النا باجر هنا ننام مو؟ شاكر أحبك أموت بيك.
أبتسم و سد باب الغرفة قفلة وانتجى عليه يبتسم أستغربت شبي يباوع هيج وليش الباب أنسد....
يتبع....