مروان
أول ما قولت له كدا وشه جاب ألوان
وصرخ فيا وهو بيقول:
__إنت بتخرف بتقول إيه ؟!!
وإزاي تكلمني كدا؟
رديت وأنا الغضب بياكل فيا وقولت:
__عايزني أكلمك إزاي يا عمي لما أعرف إن حد بيحاول يقتل مراتي؟
جزيت على سناني وأنا بضغط على إيدي وكملت:
__عمي إنت أكتر واحد عارف أنا ضحيت بإيه وعملت إيه عشان ليلى تبقى معايه ...ومش هسمح إن أي حدا ياخدها مني أو حتى يأذيها.
بصلي عمي بترقب ورجع ضهره لورا وهو بيقول:
__عندك دليل على اللي إنت بتقوله دا؟
بصيت له بدهشه وقولت:
__ليلى جايه من المقابر دماغها متعوره دا مش دليل؟
رد عمي بإقتضاب:
__مش دليل يا مروان ...إنت عارف إن ليلى مش بتطيق ناهد .
بصيت به بذهول وحسيت كأن حد صب عليا ميه ساقعة.
عمري ما تخيلت إن عمي ممكن يقف في صف ناهد حتى بعد اللي حصل لليلى.
__يعني إيه؟
بصلي عمي بجمود وقال:
__يعني مفيش دليل يا مروان ...ومش عشان أنا بثق فيك هشك في مراتي عشانك .
قعدت ثواني أستوعب اللي قاله لحد ما أتكلمت بحده:
__تمام يا عمي إنت إخترت مراتك ...وأنا كمان هختار مراتي.
وقريت منه وأنا ببص في عينه:
__بس أقسم بالله لو ليلى حصلها حاجه مش هيكفيني موتها .
وشاورت عليه:
__ولا حتى موتك ...
بصلي بصدمه من كلامي ...وخرجت قبل حتى ما يقول حاجه.
لكن سمعت صوته العالي من المكتب وهو بيقول:
__إنت بتهددني يا مرواااان؟!!
طب أعلى ما فخيلك إركبه ووريني هتعمل إيه!!!
_____________
ليلى
صحيت من النوم على صوت تكه مفتاح.
فركت عيني بإرهاق وقومت إتعدلت على السرير.
وثواني وكان داخل مروان.
أول ما وقعت عينه عليا إبتسم وهو بيحط المفتاح على الكومود وقال:
__صباح الخير
بدالته الإبتسامه وأنا بحط إيدي على راسي.
ف قرب مني بقلق وقال:
__حاسه بوجع؟
هزيت راسي ب "لا" وقولت:
__حاسه بإرهاق بس .
إتنهد بضيق كدا وقرب مني وقعد على طرف السرير.
فاضل باصص لي ثواني لحد ما قاطعت نظراته وأنا بقول بتساؤل:
__في إيه؟
عقد إيده الاتنين وهو بيقول:
__ليلى إنتِ عارفه إني بحبك؟
رجعت شعري لورا بغرور وقولت:
__عارفه.
بصلي وقال بجديه:
__ليلى أنا بتكلم بجد.
عقد حواجبي وقولت:
__إيه لازمه السؤال دا؟
لقيته إتوتر وقام من مكانه وهو بيقول:
__ولا حاجه ...
واتحرك يغير هدومه في الدريسينج...بعد دقائق كان خرج من غير تيشيرت.
شهقت بصدمه وأنا بدير وشي وقولت:
__مش قولت مليون مره تستر نفسك ...هي سيئات جاريه وخلاص؟
كنت سامعه خطواته وهو بيقرب:
__هو إنتي ليه مش عايزه تقتنعي إني جوزك ودا عادي.
مردتش عليه وغمضت عيني وأنا بديله ضهري .
لكن فجأه إفتكرت حاجه!
إتنفض من على السرير وأنا بفتح عيوني وبسأله:
__بكره إيه؟
بصلي ثواني وقال:
__24
قومت وقفت على السرير وقولت:
__يا نهارك إسود إنت ياض مش عندك إمتحان بكره؟
بصلي بدهشه وحط إيده على شعره وهو بيقول:
__دا إمتحان في الدرس .
وبعدين عقد حواجه:
__إنتي عرفتي منين؟
حاولت أخفي توتري وقولت بثقه مصطنعه:
__مصادري.
حسيته مقتنعش ....أنا نفسي بصراحه مقتنعتش!
إتحرك ناحيتي وهو بيبصلي بشك:
__دا أنا متراقب بقى.
شاورت على نفسي بصدمه مصطنعه وقولت:
__أنا؟
ليه إن شاء الله؟
قرب مني أكتر ف بعدت أكتر.
وشاورت له بصباعي وأنا بحذره:
__إبعد أحسنلك.
ولا حياه لمن تنادي ....فضل يقرب مني برضه لغايه ما لزق ضهري في السرير.
همس وهو بيقول:
__دا إنتي طلعتي مهتمه بقى.
بلعت ريقي وأنا ببص لبعيد وقولت:
__عشان إنت مستهتر .
__مممم
__ممكن تبعد؟
بصلي ثواني وباسني من خدي بسرعه وبعد .
وسعت عيني بصدمه ...ضحك وهو بيتحرك وبينام:
__إدعيلي إنتي بس وهقفل إن شاء الله.
بصيت له بغيظ وقولت:
__والله؟...ماشيي!
وبعد ثواني كنت قاعده على ضهره وبشد في شعره وقولت:
__عارف يا مروان لو ما قومتش دلوقتي حالًا هعضك!!
قعد يتأوه وهو بيحاول يقلبني:
__يا شيخه حسبي الله ونعم الوكيل...مذاكره إيه ؟
أنا مش وش مذاكره.
عليت صوتي وأنا بقول:
__مروااااان!!!
مسح على وشه بزهق وقال:
__عيونه والله.
إبتسمت لكن هو مشافنيش لأنه كنت قاعده على ضهره .
وفجأه قلبني وبقيت قاعده على بطنه ووشه مقابل ليا.
حط إيده الأتين على خصري وقال:
__عايزه إيه مني؟
بلعت ريقي بتوتر وقولت:
__قوم ذاكر وليك مكافأه.
ضيق عينه وقال بتساؤل:
__إيه هي؟
غمزت له:
__مكافأه ...هتعجبك.
وطبعًا ولا في مكافأه ولا بتاع بس أنا عارفه إني لما أقوله كدا هيقوم ويبطل كسل.
وفعلًا بعد دقائق كان قاعد على المكتب بتاعه والكتب قدامه وبيذاكر.
قعدت جمبه على الكرسي المقابل وأنا ماسكه عصايه الشقه وبراقبه.
بصلي بقله حيله وقال:
__أنا أول مره أشوف واحده ماسكه لجوزها عصايه!
ضحكت وأنا ماسكه روايه بقرأها وقولت:
__أديك شوفت ...ركز بقى .
كان قاعد يذاكر وطبعًا كنت علر راسه وأي حاجه مش فاهمها كنت بشرحها له.
وبعد ساعتين تقريبًا...قومت أعمل حاجه نشربها.
رجعت بعد دقائق بصنيه عليها كوبايتين عصير مانجو.
حطيتها قدامه ف بصلي بدهشه وهو بياخدها وقال:
__أنا لو أعرف إن هيجيلي عصير وأنا قاعد كدا كنت إتجوزت من بدري .
بصيت له بغيظ وقولت:
__طب خلص بسرعه يا حلو عشان تكمل.
قعد يذاكر ساعات كتير لحد ما الساعه بقت إثنين!
كنت بصراحه خلاص هنام على نفسي أصلًا ومش قادره أقعد أكتر من كدا.
بس كنت عارفه لو نمت مش هيذاكر وهيقعد يتدلع.
وفجأه قام مروان وهو بيحط إيده على خدي وقال:
__إنتي بتنامي على نفسك خلاص.
بصيت له بإرهاق وقولت:
__مش هتهرب من المذاكره...أقعد يا مروان.
أبتسم وقرب مني أكتر وشالني وهو بيقول:
_متقلقيش أنا خلصت والله.
ساعتها بجد كنت بس عايزه اغمض عيني ونام .
وقبل حتى ما يحطني على السرير كنت تايهه في النوم.
يتبععع